Nanchi Baibolo Watwajijila Kupimpula Byubilo Byenu Nyi?
“Mwalulukenga kupichila mu kupimpulanga milanguluko yenu.”—LOMA 12:2.
NYIMBO: 61, 52
1-3. (a) Ñanyi byubilo bimo byakonsha kwitukatazha kuleka nangwatu panyuma ya kubatizhiwa? (b) Inge kya kuba’mba kitukatazha kupimpula byubilo, ñanyi mepuzho o twakonsha kwishikisha? (Monai bipikichala bitanshi.)
PA MYAKA yavula, ba Kevin bakayanga makayo a kuchikapo mali, kupepa fwanka, kupendwapendwa ne kwingijisha bizhima. [1] (Monai byambo bikwabo.) Mu kuya kwa kimye, bafunjile pe Yehoba kabiji bakebelenga kwikala balunda nanji. Bino pa kuba’mba bobe bino, bafwainwe kupimpula byubilo byabo. Bapimpwile byubilo byabo na bukwasho bwa Yehoba ne na bulume bwa Mambo anji, Baibolo.—Bahebelu 4:12.
2 Bino nangwatu panyuma ya kubatizhiwa, ba Kevin bafwainwe kutwajijila kupimpulako byubilo byabo pa kuba’mba bekale mwina Kilishitu wawama. (Efisesa 4:31, 32) Ba Kevin bazhingilanga bingi bukiji, onkao mambo, bebikileko bingi kuba’mba bafunde kufwomona bukaji, bino kechi kyapelele ne. Baambile’mba kufunda kuleka kuzhingila kwakatezhe bingi kukila ne kuleka bintu byatama byo baubanga saka bakyangye kubatizhiwa. Pano bino, kulomba kwi Yehoba ne kutanga Baibolo bibakwashishe kupimpula byubilo byabo.
3 Saka tukyangye kubatizhiwa, atweba bavula twalekele bintu byatama byo twaubanga pa kuba’mba twikelenga mwayila byamba Baibolo. Bino nangwatu luno, twayuka’mba twafwainwa kutwajijila kupimpulako byubilo bimo pa kuba’mba tulondelenga Lesa ne Kilishitu. (Efisesa 5:1, 2; 1 Petelo 2:21) Kampe twataana kuba’mba twijizhañanya bingi, kuyebeka bakwetu nangwa kwamba byatama pe abo. Nangwa kampe tuji na moyo wa kuchina bantu kya kuba tukankalwa ne kuba bintu byo twayuka’mba byawama. Kampe twaeseka kupimpulako bino byubilo pa myaka yavula, bino twakankalwa. Onkao mambo, twakonsha kwishikisha’mba: ‘Mambo ka o kyankatezha kushinda ino miteeto? Nakonsha kulondela byepi byamba Baibolo pa kuba’mba ntwajijile kupimpula byubilo byami?’
MWAKONSHA KUSANGAJIKA YEHOBA
4. Mambo ka o tukankelwa kusangajika Yehoba mu byonse byo tuba?
4 Twamutemwa bingi Yehoba kabiji tukeba kumusangajika na muchima wetu yense. Bino kyatamakotu ke kya kuba’mba tukankalwa kumusangajika kimye kyonse mambo twi bambulwa kulumbuluka. Javula tumvwa byonka byaumvwanga mutumwa Paulo, wanembele’mba: “Muchima wa kukeba kuba kyawama nji nanji, pakuba bulume bwa kwikyuba mfwabo.”—Loma 7:18; Yakoba 3:2.
5. Ñanyi byubilo byo twalekele saka tukyangye kubatizhiwa, bino ñanyi miteeto yakonsha kutwajijila kwitukatazha?
5 Saka tukyangye kwinunga ku kipwilo kya bwina Kilishitu, twalekele byubilo byashikwa Yehoba. (1 Kolinda 6:9, 10) Pano bino, twi bambulwa kulumbuluka. (Kolose 3:9, 10) Onkao mambo, tulubankanya bimye byavula nangwa kya kuba twabatizhiwe kala. Bimye byavula, twikala na milanguluko yatama, nangwa kukankalwa kushinda muteeto umo ye tuji nanji. Kimo kimye, twakonsha kweseka kushinda uno muteeto pa myaka yavula.
6, 7. (a) Ñanyi kintu kitukwasha kwikala balunda na Yehoba nangwa kya kuba twi bambulwa kulumbuluka? (b) Mambo ka o twafwainwa kubujila kukankazhama kulomba lulekelo lwa mambo?
6 Nangwa kya kuba twi bambulwa kulumbuluka, twakonsha kwikala balunda na Yehoba ne kumwingijila. Vulukainga byo kyajinga kimye kitanshi kyo mwaikele balunda na Yehoba. Aye ye wamwene bintu byawama mwi anweba kabiji wakebelenga’mba mumuyuke. (Yoano 6:44) Wayukile’mba mulubankanya, kabiji nangwatu kulutwe na lwendo mukalubankanyanga. Nangwa byonkabyo, Yehoba wakebelenga amba mwikale balunda nanji.
7 Yehoba witutemwa bingi, onkao mambo witupele bupe bwanema bingi. Watumine Mwananji, aye Yesu pano pa ntanda pa kuba’mba akapane bumi bwanji kwikala bukuzhi pa mambo etu. (Yoano 3:16) Inge twalubankanya, twakonsha kulomba Yehoba kwitulekelako mambo. Kabiji na mambo a bukuzhi, twayuka’mba uketulekelako mambo kabiji tukatwajijila kwikala balunda nanji. (Loma 7:24, 25; 1 Yoano 2:1, 2) Vulukai’mba Yesu wafwijile bandengamambo balapila. Onkao mambo, nangwa inge twamona’mba twalenga mambo akatampe, kechi twafwainwa kuleka kulomba lukelelo lwa mambo kwi Yehoba ne. Inge twabula kumulomba kwitulekelako mambo, kikekala nobe twakana kowa ku maboko saka kuji biko. Tumusanchila bingi Yehoba mambo wituswisha kwikala balunda nanji nangwa kya kuba twi bambulwa kulumbuluka.—Tangai 1 Timoti 1:15.
Inge tukeba kwikala balunda na Yehoba, twafwainwa kutwajijila kwibikako kulondela Lesa ne Mwananji
8. Mambo ka o twafwainwa kubujila kulubakotu ku byubilo byatama?
8 Pano bino, kechi twafwainwa kutalangapotu pa bilubo byetu ne kubula kwingijilapo ne. Yehoba witubuula byafwainwa kwikala balunda nanji. (Salamo 15:1-5) Onkao mambo, inge tukeba kwikala balunda nanji, twafwainwa kwibikako kulondela Lesa ne Mwananji. Kabiji twafwainwa kwibikako bingi kushinda miteeto yatama. Nangwa inge twabatizhiwe kala, twafwainwa kutwajijila kupimpula byubilo byetu.—2 Kolinda 13:11.
9. Twayuka byepi amba twafwainwa kutwajijila kuvwala bumuntu bupya?
9 Mutumwa Paulo wabuujile bena Kilishitu amba: “Bemufunjishe kuba’mba mwafwainwa kuvuula bumuntu bwa kala bwa mwayijile byubilo byo mwajinga nabyo kala kabiji bubena kujimbaikwa na milanguluko yatama imutwala mungi. Kabiji mwafwainwa kutwajijila kulengwa ke bapya mu michima yenu, ne kuvwala bumuntu bupya bwalengelwe monka mwayila kyaswa muchima wa Lesa mu bololoke ne mu bukishinka bwa kine.” (Efisesa 4:22-24) Ko kuba’mba twafwainwa kutwajijila kwibikako kupimpula byubilo byetu ne “kuvwala bumuntu bupya.” Onkao mambo, nangwatu inge twaingijila Yehoba pa myaka yavula, twafwainwa kutwajijila kufunjilapo bintu byavula pe aye. Kabiji Baibolo wakonsha kwitukwasha kutwajijila kupimpulako byubilo byetu pa kuba’mba twikelenga monka mwayila kyaswa muchima wanji.
MAMBO KA O KYAKATEZHA?
10. Twafwainwa kuba byepi pa kuba’mba tutwajijile kupimpula byubilo byetu na bukwasho bwa Baibolo, kabiji ñanyi mepuzho o twakonsha kushikisha?
10 Atweba bonse tukeba kulondela byamba Baibolo. Bino twafwainwa kwibikako inge tukeba kutwajijila kupimpula byubilo. Mambo ka o twafwainwa kwibikilangako? Mambo ka Yehoba o abujila kulengela amba kitupeleleko kuba byawama?
11-13. Mambo ka Yehoba o akebela’mba twibikengako kushinda byubilo byetu byatama?
11 Inge twalanguluka pa bintu biji mu mulwelele, tushiinwa’mba Yehoba uji na bulume bwa kuba kintu kyonse kyo akeba. Walengele juba jiji na bulume bukatampe bingi. Juba jiji bingi na bulume bwa kupana kyeya ne kyuya, pano bino pa ntanda pafikatu bulume bucheche, bino nangwa bwakepa, bulengela bilengwa byonse kwikala byumi. (Salamo 74:16; Isaya 40:26) Yehoba upana ne bulume ku bakalume banji inge bakooka. (Isaya 40:29) Kine, umvwe Yehoba wakebelenga, inge witulengele mu jishinda ja kuba’mba kitupelelenga kushinda miteeto yatama. Pano mambo ka o abujila kuba bino?
12 Yehoba witupa luusa lwa kwifuukwila. Witupa luusa lwa kusalapo kumukookela nangwa ne. Inge twasalapo kumukookela ne kwibikako kuba kyaswa muchima wanji, tumwesha’mba twamutemwa kabiji tukeba kumusangajika. Satana wamba’mba Yehoba kechi uji na luusa lwa kulama ne. Pano inge twakookela Yehoba, tumwesha’mba amba aye ye Kalama wetu. Kabiji twayuka’mba Shetu wa butemwe usanta bingi pa byo twibikako kumukookela. (Yoba 2:3-5; Byambo bya Maana 27:11) Inge twibikako kushinda miteeto yetu nangwa kya kuba kechi kyapela ne, tumwesha’mba twi bakishinka kwi Yehoba kabiji tumwesha’mba aye ye Kalama wetu.
13 Yehoba witubuula’mba twafwainwa kwibikako kwikala na byubilo byo ajipo nabyo. (Kolose 3:12; tangai 2 Petelo 1:5-7.) Kabiji ukeba’mba twibikengako kushinda milanguluko yabula kufwainwa. (Loma 8:5; 12:9) Inge twibikishako kushinda muteeto watama, tumvwa bingi bulongo.
SWISHAI MAMBO A LESA KUTWAJIJILA KUPIMPULA BYUBILO BYENU
14, 15. Twakonsha kuba byepi pa kuba’mba twikale na byubilo byatemwa Yehoba? (Monai kakitenguluzha kaamba’mba “ Baibolo ne Lulombelo Byapimpwile Bwikalo Bwabo.”)
14 Twakonsha kwikala byepi na byubilo byatemwa Yehoba? Kechi twafwainwa kwifuukwila atwe bene mo twafwainwa kupimpulako ne, pakuba twafwainwa kuswisha Lesa kwitutangijila. Loma 12:2 waamba’mba: “Kilekai kulondela bintu bya buno bwikalo, bino mwalulukenga kupichila mu kupimpulanga milanguluko yenu kuba’mba muyukenga kyaswa muchima wa Lesa, akya kyawama, kyalumbuluka kabiji kimutokesha ku muchima.” Onkao mambo, pa kuba’mba tuyuke bikeba Yehoba, twafwainwa kuketekela mu bukwasho bo etupa. Twafwainwa kutanganga Baibolo pa juba pa juba, kulanguluka languluka pa byo tutanga ne kulomba Yehoba kwitupa mupashi wanji wazhila. (Luka 11:13; Ngalatiya 5:22, 23) Inge ketube bino, Yehoba uketukwasha kuyuka bintu bimutokesha ku muchima, ne kufunda kumona bintu monka mo ebimwena. Kikafumamo, milanguluko yetu, byambo byetu ne byubilo byetu bikatokeshanga Yehoba ku muchima, kabiji tukayuka ne byo twakonsha kushinda byubilo byatama. Bino nangwatu inge twauba bino, tukakebewanga kutwajijila kwibikako kushinda miteeto yatama.—Byambo bya Maana 4:23.
Kebainga mitwe mu mabuku etu ne Binembelo bikemukwasha kushinda miteeto yatama (Monai jifuka 15)
15 Kununga pa kutanga Baibolo pa juba pa juba, twafwainwa kufundanga Baibolo na bukwasho bwa mabuku etu, nabiji Kyamba kya Usopa ne Labainga! Mitwe yavula itaanwa mu ano magazini itufunjisha byo twakonsha kwikala na byubilo bijipo ne Yehoba ne byo twakonsha kushinda miteeto yetu. Twakonsha kutaanamo mitwe nangwa binembelo bibena kwamba pa bukooke bonka bo tuji nabo. Twakonsha kutwajijila kutanga bino binembelo ne mitwe ya mu magazini kimye kyonse.
16. Mambo ka o twafwainwa kubujila kulefulwa inge kibena kwitukatazha kupimpula byubilo byetu?
16 Papita kimye pa kuba’mba tuyuke byo twakonsha kulondela byubilo bya Yehoba. Onkao mambo, inge mwamona’mba kimukatazha kwikala na byubilo bya Yehoba, kange mukooke ne. Patanshi, kyakonsha kwimukatazha kuba byaamba Baibolo. Bino inge mwatwajijila kulanguluka pa bikeba Yehoba, kikemupelela kumona bintu monka mo ebimwena ne kuba byawama.—Salamo 37:31; Byambo bya Maana 23:12; Ngalatiya 5:16, 17.
LANGULUKAINGA PA BINTU BYAWAMA BIJI KULUTWE
17. Ñanyi bintu byawama byo twakonsha kutengela inge twatwajijila kwikala ba kishinka kwi Yehoba?
17 Tubena kutengela kimye kyo tukekala balumbuluka ne kwingijila Yehoba myaka ne myaka. Pa kyokya kimye, kafwako miteeto yatama iketukatazhanga ne, kabiji kiketupelela kwikala na byubilo bijipo ne Yehoba. Bino ne lunotu, twakonsha kupopwela Yehoba mambo witupa bupe, ko kuba’mba bukuzhi. Nangwa kya kuba twi bambulwa kulumbuluka, twakonsha kumusangajika inge twatwajijila kwibikako kupimpula byubilo byetu ne kulondela byo etufunjisha mu Baibolo.
18, 19. Twayuka byepi amba Baibolo uji na bulume bwa kutwajijila kupimpula byubilo byetu?
18 Ba Kevin bebikileko bingi pa kuba’mba bafunde kufwomona bukaji bwabo. Balanguluka langulukanga pa byo bafunjile mu Baibolo ne kwibikako kupimpula byubilo byabo. Balondelanga ne byo bebabuulangako ku bena Kilishitu bakwabo. Nangwa kya kuba papichile myaka icheche pa kuba’mba ba Kevin bapimpule byubilo byabo, bino pa kupitapo kimye, bebatongwele ne kwikala bankwasho mu kipwilo. Kabiji luno papita ne myaka 20 kufuma po bebatongwejile kwikala bakulumpe mu kipwilo. Bino ne luno, bayuka’mba bafwainwa kutwajijila kwibikako kushinda byubilo byabula kufwainwa.
19 Ne atweba twafwainwa kutwajijila kupimpulako byubilo byetu, byonka byaubile ba Kevin. Inge twauba bino, tukatwajijila kwikala balunda na Yehoba. (Salamo 25:14) Inge twibikako kupimpula byubilo byetu pa kuba’mba tumutokeshe ku muchima, aye uketupesha. Kabiji Baibolo ukatwajijila kupimpula byubilo byetu.—Salamo 34:8.
^ [1] (jifuka 1) Jizhina japimpulwa.
