Kani Baibolo Icalula Amekalilo Enu?
“Musanguke pa kubuka libili imilangwe yenu.”—ABALOMA 12:2.
INYIMBO: 61, 52
1-3. (a) Ni fisa fintu ifingatukatasho’kuleka na panuma ya kubatishiwa? (b) Ni fisa fyakwipusha tungalipusha kani tatulukwalukapo bwangu? (Boneni ifikope ifili peulu.)
PA MYAKA iyakuti ubwingi, ba Kevin balukwangala ifyakwangala fya kushitikapo, balukupendwa, kabili balukupyungishe’miyanda mu nshila iitayelelwepo. [1] (Boneni tumashiwi twa pa mpelo.) Eli basambilile pali baYawe kabili balukufwayo’kuba icibusa cabo. Pano pakweba’ti bacite’fyo, balyalwile makosa amekalilo abo. Pakuti pa kofwako kwa baYawe ne Mashiwi abo, Baibolo, ba Kevin balikonsesho’kucite’fyo.—AbaEbeya 4:12.
2 Na panuma ya kubatishiwa, ba Kevin balyelelwe ukupitilisho’kwalulako imibelo yabo pakweba’ti babe abaKlistu abaweme. (AbaEfesa 4:31, 32) Ku cakubwenako, balukufiitwa bwangu. Balikankamene ili baishibile ifi cali icikatesho’kuleko’kufiitwa bwangu. Ba Kevin balilabiile ati ukuleko’kufiitwa bwangu kwalikateshepo ukucila na pa kuleko’kucite’fibipile ifi baalukucita ili tabangabatishiwa. Pano, ba Kevin balikonsesho’kucite’fi ukupitila mu kulomba baYawe ukubofwako ne kulisambisha Baibolo.
3 Ili tatungabatishiwa, fwe bengi twalyalwile amekalilo esu pakweba’ti tulukwikala koti ni fyefyo Baibolo ilabila. Pano na bubuno bukumo, tulibwene ati tulyelelwe ukulukuwamyako imibelo yesu pakweba’ti tulukutuntulula makosa baLesa na baYesu. (AbaEfesa 5:1, 2; 1 Petilo 2:21) Ku cakubwenako, cipale tungabona ati tulalitamasha makosa neli ukulabile’fibipile pa bantu bambi. Neli tungalukubamba mu mutima pakuti pali fyefyo bambi bangalukulanguluka neli ukulabila pali fwebo. Cipale pa myake’ingi tulyesesho’kuwamyako imibelo yesu, pano tulacita ifyakubifya fyopele’fyo impindi ne mpindi. Popele, tungalukulipusha ati: ‘Mba nindo cinkatashisho’kuwamyako imibelo yanji? Findo ningacita pakweba’ti ndukucita ifi Baibolo ilabila ne kupitilisho’kuwamyako imibelo yanji?’
MUNGASANGALASHA BAYAWE
4. Nindo tekuti tusangalashishepo baYawe lyonse?
4 Tulitememwe baYawe kabili tulafwaisha makosa ukulukubasangalasha. Ku cakubombomanika, pakuti tatuwamininepo, tatucitapo ifyakubasangalasha lyonse. Tulomfwa koti ni ntangishi Paulu iyalabiile ati: “Ukufwaya kuli na nebo, sombi ukucite’fiweme takupo.”—AbaLoma 7:18; Jakobo 3:2.
5. Findo twalekelo’kucita ili tatungabatishiwa, pano ni bwisa bukatasho ubu tungaba nabo?
5 Ili tatungasalululapo ukuba Imboni, twalilekelo’kucite’fintu ifi baYawe bapatile. (1 AbaKolinto 6:9, 10) Pano na ino mpindi, tatuwamininepo. (AbaKolosai 3:9, 10) Popele, tulabifya nangaba’ti palipitile imyaka iyakuti ubwingi ukufuma ili twabatishiwe. Impindi ne mpindi, tungalukuli ne kukumbwa ukwa kucite’fibipile, neli cingatukatasho’kulwisha ukunaka kwesu. Cipale tulyelelwe ukucite’fyo pa myaka iingi.
6, 7. (a) Cindo cilengesha fwebo ukulitemwesha bucibusa ubuweme na baYawe nangaba’ti tatuwamininepo? (b) Nindo twelelwe ukulukulomba ukufitulukilwa kuli baYawe?
6 Nangaba’ti tatuwamininepo, tungaba na bucibusa ubuweme na baYawe ne kulukubapyungila. Lyonse mulukwanuka ifi mwabele icibusa ca baYawe. Ebabwene ifiweme muli mwebo kabili ebalukufwaya mwebo ukubeshiba bwino. (Yoane 6:44) Nakabili, balishibile ati kuliko mumo mumo umu munakile kabili ati impindi ne mpindi mukalukubifya. Nangabe’fyo, baYawe baalukufwaya mwebo ukuba icibusa cabo.
7 BaYawe baalitutemenwe makosa icakweba’ti balitupeele impese iyakuti ubukulu. Balitumine Abana babo pa calo pakweba’ti babe abakutulubula ku kubifya. (Yoane 3:16) Kani twabifya, tungalomba baYawe ukutufitulukila. Nakabili, pakuti pa mulubulo, tungacetekela ati baYawe bakalukutufitulukila kabili tukapitilisho’kuba ifibusa fyabo. (AbaLoma 7:24, 25; 1 Yoane 2:1, 2) Mulukwanuka ati baYesu baalifwilile abakubifya abalapila. Popele, nangaba’ti tulukumfwa ati tulibifishe makosa, tatwelelwepo ukuleko’kulomba ukufitulukilwa. Ukubulo’kulomba ukufitulukilwa tungakupalanya ku kukano’kusamba ku minwe ili kuli ifiko. Mame’fi citusangalasha ukwishiba ati baYawe balilengeshe fwebo ukuba ifibusa fyabo nangaba’ti tuli bakubifya!—Pendeni 1 Timote 1:15.
8. Nindo tatwelelwepo ukupufisho’kunaka kwesu?
8 Ukuba, tekuti cibepo bwino ukupufya ukunaka kwesu neli ukulukulipokolola kani twabifya. BaYawe balitubuulile imibelo twelelwe ukuba nayo pakweba’ti tube ifibusa fyabo. (Amasamo 15:1-5) Popele, kani tulukufwayo’kupalamina kuli bo, tulyelelwe ukulukutuntulula baLesa ne Bana babo. Nakabili, tulyelelwe ukwesha ne makosa esu onse ukulwisho’kunaka kwesu, kabili lumbi tungakonsha ne kuleka ukucite’fibipile. Nangaba ne myaka iyapitapo ukufuma ili twabatishiwe, tulyelelwe ukupitilisho’kulukuwamyako imibelo yesu.—2 AbaKolinto 13:11.
9. Tuliishi shani ati ukufwalo’buntu bwa bukumo cintu ici twelelwe ukupitilisho’kucita?
9 Intangishi Paulu yalilabiile ku baKlistu ati: “Mukabupose koti kwikala kwenu ukwakale, ubuntu bwakale, ubulukubipa koti kukumbwa kwa kutumpaika; mubuke mu mupashi wa mutima wenu, mufwale ubuntu bwa bukumo, ubwalengelwe mu cipasho ca baLesa mu kulungama na mu kuswetelela kwa bucine.” (AbaEfesa 4:22-24) Ici cilukwalula ati tulyelelwe ukupitilisho’kwesha ukuwamyako imibelo yesu ne ‘kufwala ubuntu bwa bukumo.’ Nangaba ne myaka tupyungiile baYawe, tungasambilile’fintu ifingi ifya bukumo pa mibelo yabo. Nakabili, Baibolo ingatofwako ukuwamyako imibelo yesu pakweba’ti tulukubatenteka makosa.
NINDO CIKATASHISHA UKUWAMYAKO?
10. Findo twelelwe ukulukucita pakweba’ti Amashiwi abaLesa apitilisho’kutwalula, kabili ni fisa fyakwipusha tungepusha?
10 Fwense tulafwaisho’kulonda ifi Baibolo ilabila. Pano tulyelelwe ukupyungisha makosa pakweba’ti tupitilisho’kulukuwamyako imibelo yesu. Mba nindo twelelwe ukucitile’fyo? Mba nindo baYawe tekuti balengeshepo lukoso cabe’cipubile kuli fwebo ukulukucite’filungeme?
11-13. Nindo baYawe bafwaila fwebo ukupyungisha pakweba’ti tuleke ukucite’fibipile?
11 Kani twalanguluka pa calo conse ne fintu fyonse ifilimo, tulalibwena fwebene ati baYawe bali ne makosa aakucite’fili fyonse. Ku cakubwenako, balipangile akasuba akakwatishe’makosa. Impindi ne mpindi, akasuba kalatupeelo’kutuba ne kukaba, pano kutuba lukoso ukunini ne kukaba ukupengelwa pakweba’ti ifintu filukuli ne mweo. (Amasamo 74:16; Yisaya 40:26) Nakabili, baYawe balapeela amakosa ku bapyungishi babo aba pa calo. (Yisaya 40:29) Caboneka apaswetele ati baYawe kani baalukufwaya, nga balilengeshe lukoso cabe’cipubile kuli fwebo ukuleko’kulanguluka ifibipile. Pano, nindo tabacitile’fyo?
12 BaYawe balitupeele amakosa akulisalulwilapo. Balilekele ati tulukulisalulwilapo fwebene ukubomfwila neli ukubulo’kubomfwila. Kani twasalululapo ukubomfwila ne kucito’kufwaya kwabo, tukalangisha ati tulibatemenwe kabili tulafwaya ukubasangalasha. Satana alalabila ati baYawe tabelelwepo ukwikalika. Pano kani tulukumfwila baYawe, ninshi tulukulangisha ati tulafwaya bo ukuba Abekalikishi besu. Nakabili, baWishifwe abatutemenwe makosa balatoota pakuti pali fyefyo twesha ukulukubomfwila. (Jobo 2:3-5; Ifisimpi 27:11) Kani tulukupyungisho’kuwamyako imibelo yesu nangaba’ti tacipubilepo, ninshi tuli aba bucine kuli baYawe kabili tulalangisha ati tulukufwaya bo ukuba Abekalikishi besu.
13 BaYawe balatubuula ati tulyelelwe ukulukutenteka imibelo yabo. (AbaKolosai 3:12; pendeni 2 Petilo 1:5-7.) Balafwaya fwebo ukulukwesha ne makosa onse ukulukulanguluka pa fintu ifiweme. (AbaLoma 8:5; 12:9) Impindi shonse ili twapyungisho’kuwamyako imibelo yesu kabili twakonsha ukucite’fyo, tulaba abasangalele makosa.
AMASHIWI ABALESA NGA ALUKUMWALULENI
14, 15. Findo twelelwe ukucita pakweba’ti tulukuli ne mibelo yeyo baYawe batemenwe? (Boneni akabokoshi ka “ Ukupenda Baibolo ne Kutembela Kwalibaalwile.”)
14 Findo twelelwe ukulukucita pakweba’ti tulukuli ne mibelo baYawe batemenwe? Pa mupunda wa kupyungisha lukoso akalango kesu ili tulukusalululapo umwakuwamyako, tulyelelwe ukuleka baLesa ukututangilila. Pa AbaLoma 12:2 palalabila ati: “Tekupalana ne ba mpindi ino; sombi musanguke pa kubuka libili imilangwe yenu, ati mwishibe bwino ukufwaya kwa baLesa ukuweme ukwa mpokelelo, ukwa kuwaminina.” Popele, pa kwishiba ifi baYawe balukufwaya fwebo ukucita, tulyelelwe ukweyamina pa kofwako kwabo. Tulyelelwe ukulukupenda Baibolo lyonse, ukwalakanyapo, ne kulomba baYawe ukutupeela umupashi uswetelele. (Luku 11:13; AbaGalatya 5:22, 23) Ili tulukucite’fi, baYawe bakatofwako ukwishiba ifingabasangalasha, kabili tukalukulanguluka koti ni bo. Ifikafumamo fyakweba’ti ifi tulanguluka, ukulabila, ne kucita fikalukusangalasha baYawe kabili tukalukuwamyako imibelo yesu. Pano, na yopele’yo impindi tukelelwa ukulukulwisho’kunaka kwesu.—Ifisimpi 4:23.
Bikeni pamo ifiputusha ukufuma mu mabuuku esu neli amalembo aamofweniko ukulwisho’kunaka kwenu, ne kulukupendamo impindi ne mpindi (Boneni palakalafu 15)
15 Ukulunda pa kupenda Baibolo lyonse, tulyelelwe ukulukulisambisha Baibolo ukupyungisha amamakashini amu kwanshika kwesu aali koti Akatambo ka Wakulama na Loleni! Ifiputusha ifingi muli aya amamakashini filatusambisha ifi tungalukutenteka imibelo ya baYawe na fyefyo tungapitilisho’kuwamyako imibelo yesu. Cipale tungasanga ifiputusha ne malembo ifingatofwako makosa. Tungabika pamo amalembo, ne fiputusha fya kube’fyo ne kulukupendamo impindi ne mpindi.
16. Nindo tatwelelwepo ukubombomanina kani twabona ati tatulukwalukapo bwangu?
16 Palapite’mpindi pa kusambilila ukutuntulula imibelo ya baYawe. Popele, kani mwasangana ati kuliko imibelo yeyo mulukufwayo’kuwamyako pano tamulukwalukapo bwangu, mulyelelwe ukutekanya. Pa kutanga, mungelelwa ukulipangilisha pakweba ati mucite ifi Baibolo ilabila. Pano, ili mulukulanguluka makosa ne kucite’fintu mu nshila iingasangalasha baYawe, cikabe’cipubile kuli mwebo ukulukulanguluka koti ni bo kabili mukalukucite’filungeme.—Amasamo 37:31; Ifisimpi 23:12; AbaGalatya 5:16, 17.
MULUKWALAKANYA PA FIWEME IFIKACITIKA KUNTANGIILE
17. Findo tukalitemwesha kuntangiile kani twapitilisho’kuba aba bucine kuli baYawe?
17 Tulafwaishe’mpindi ili tukaba abawaminine ne kulukupyungila baYawe umuyayaya. Pali yeyo impindi, tatukapengelapo ukulukulwisho’kunaka kwesu. Nakabili, cikabe’cipubile kuli fwebo ukulukutuntulula imibelo ya baYawe. Pano na bubuno bukumo, tuli ne shuko lya kupempela baYawe ni pakuti balitupeelo’mulubulo. Nangaba’ti tatuwamininepo, tungabasangalasha kani tulukwesha ne makosa esu onse ukwalulako ne kuwamyako imibelo yesu ne kulukulonda ifi balukutusambisha ukupitila muli Baibolo.
18, 19. Kani tulishi shani ati Baibolo ili ne makosa akwalula amekalilo esu?
18 Ba Kevin baalipyungishe apapelele amakosa abo pakweba ati baleko’kufiitwa bwangu. Baalyalakenye makosa pali fyefyo balukupenda mu Baibolo kabili baalyeseshe ne makosa onse ukuwamyako imibelo yabo. Nakabili, baalilondelo’kufunda uku abaKlistu babyabo balukubapeela. Nangaba’ti paalipitileko impindi pakweba’ti bawamyeko imibelo yabo, mu kupita kwa mpindi baalisontelwe ukuba umupyungishi wakofwako. Imyaka 20 iyapitapo balapyunga koti bakulu ba mwi kelesha. Pano na ino mpindi, baliishi ukweba’ti balyelelwe ukupitilisho’kulwisha ukunaka kwabo.
19 Na fwebo tungawamyako imibelo yesu koti ni fyefyo ba Kevin bacitile. Kani twacite’fyo, tukapitilisho’kupalamina kuli baYawe. (Amasamo 25:14) Nakabili, kani tulukwesho’kuwamyako imibelo yesu pakweba’ti tulukubasangalasha, bakatofwako makosa. Popele, kani tulukulonda ifi Baibolo ilabila, tungacetekela ati tukapitilisho’kwalula amekalilo esu.—Amasamo 34:8.
^ [1] (palakalafu 1) Ishina talipo lyabo.
