1-3. (a) Vyuma vimwe muka vize vinahase kutukaluhwila kwecha kufuma hakutumbapachisa? (b) Vihula muka tunahase kulihulisa kachi nge tunakuhona kuzovoloka muvyuma vimwe? (Talenu mivwimbimbi yakulivanga.)

HAMYAKA yayivulu, Kevin azanyinenga mukuhema chakulyapula vakwavo, nakunwa makanya, nawala, namaundu akupendesa. ^[1] (Talenu chinyikilo chakusongo.) Kutwala muze, alinangwile vyaYehova nakufwila kupwa sepa lyenyi. Oloze atelele kwalumunako vyuma vimwe mukuyoya chenyi numba apwenga sepa lyaYehova. Ahashile kwalumuna vilinga vyenyi mwomwo yakumukafwa kuli Yehova, naMazu enyi Mbimbiliya aze atwama nangolo.—WavaHepeleu 4:12.

² Omu Kevin vamumbapachishile, atwalileho lika kwalumunako vilinga vyenyi mangana apwenga muka-Kulishitu wamwenemwene. (Wavaka-Efwesu 4:31, 32) Chakutalilaho, akwachilenga washi matoto, kaha achiwanyinenga kupwa chachikalu kwecha muchima wamatoto. Kevin ambile ngwenyi, chapwile chachashi kumbila vilinga vyeka vyavipi shimbu kanda  vamumbapachise, oloze chamukaluhwilile kwecha muchima wamatoto. Chipwe ngocho, alinangwile chikuma Mbimbiliya nakulembelela Yehova amukafwe, kaha echele muchima wamatoto.

³ Shimbu kanda vatumbapachise, etu vavavulu twambilile vilinga vyavipi mangana tuyoye kweseka nomu yahanjika Mbimbiliya. Noholyapwa kuliko vyuma vimwe vize twatela kwalumunako mukuyoya chetu, mangana tulondezeze Kalunga naKulishitu. (Wavaka-Efwesu 5:1, 2; WaPetulu 1, 2:21) Chakutalilaho, tunahase kumona ngwetu tweji kuyayavalanga chikuma, chipwe kuyongola vakwetu nakuhanjika mazu amapi hali vakiko. Tunahase nawa kulizakamina ngwetu pamo vakwetu vali nakutumonanga ngwavo katwalinga vyuma vyakwolokako. Pamo tunakilikitanga hamyaka yayivulu mangana twechenga jitato jajipi, oloze tunahono. Ngocho twatela kulihulisa ngwetu: ‘Mwomwo ika chinapwila chachikalu kuli ami kumbila jitato kaneji? Vyuma muka ngwatela kulinga numba ngukavangize vyuma yahanjika Mbimbiliya mangana ngupwenga navilinga vyamwaza?’

4. Mwomwo ika chapwila chachikalu kwivwisa Yehova kuwaha muvyuma vyosena vize tweji kulinganga?

⁴ Hakuwana nge twazanga Yehova, ngocho twafwila kulinga vyuma vize navimwivwisa kuwaha. Chaluvinda, katweshi kuhasa kumwivwisa kuwaha lwola lwosenako, mwomwo katwakupukako. Tweji kwivwanga ngana muze evwile kaposetolo Paulu uze asonekele ngwenyi: “Nguli nakufwila kulinga vyuma vyamwenemwene, oloze kangweshi nangolo jakulinga vyuma kanako.”—Wavaka-Loma 7:18; WaYakova 3:2.

5. Vilinga muka twambilile shimbu kanda vatumbapachise, kaha jitato muka tunahase kulipika najo kumbila?

⁵ Shimbu kanda tupwenga vaka-Kulishitu, twambilile vilinga vize ahunga Yehova. (Wavaka-Kolinde 1, 6:9, 10) Chipwe ngocho, hanga twapwila vakuhona kukupuka. (Wavaka-Kolose 3:9, 10) Shikaho tweji kulimbenjanga numba tuhu vatumbapachishile lyehi. Shimbu jimwe chapwa chachikalu kwecha vishinganyeka vyavipi najitato jajipi. Kaha tunahase kulipika naukalu kana hamyaka yayivulu.

6, 7. (a) Chuma muka cheji kutukafwanga tupwenga nausepa wamwaza naYehova chamokomoko nakuhona kukupuka? (b) Mwomwo ika twatela kutwalaho lika kulomba Yehova atukonekele?

⁶ Numba tuhu katwakupukako, oloze tunahase kupwa nausoko wamwaza naYehova nakutwalaho lika kumuzachila. Mwatela kushinganyekanga halwola luze mwaputukile kupwa sepa lyaYehova. Ikiye amwene vyuma vyamwaza muli enu, kaha asakile mumutachikize. (Yowano 6:44) Atachikijile ngwenyi kamwakupukako, kaha nawa mweji kulimbenjanga. Oloze Yehova amitavilile kupwa sepa lyenyi.

⁷ Yehova atuzangile chikuma hakutuhana wana wakulipwila. Atumine Mwanenyi Yesu hano hamavu mangana ahane kuyoya chenyi kupwa ndando yakutusokola kujishili jetu. (Yowano 3:16) Nge tunalimbenje, kaha twatela kulomba Yehova atukonekele. Twatela kufwelela ngwetu Yehova mwatukonekela nakupwa lika masepa jenyi mwomwo yandando yakusokola. (Wavaka-Loma 7:24, 25; WaYowano 1, 2:1, 2) Anukenu ngwenu, Yesu afwilililile vaka-shili vaze navapihilila nakwalumuka. Numba tuhu twatachikiza ngwetu tunalingi vyavipi,  oloze katwatela kulitwamina kulomba Yehova atukonekeleko. Nge katweshi kumulomba atukonekeleko, kaha nachifwana nge mutu uze mwakana kusana kumavoko kuze kuli majilo. Twawahilila chikuma hakuwana nge Yehova atwitavisa tupwenga tumasepa jenyi numba tuhu katwakupukako.—Tangenu WaChimoteu 1, 1:15.

8. Mwomwo ika katwatela kuliula tutenga twetuko?

⁸ Chipwe ngocho, katwatela kuliula tutenga twetu chipwe kutumona kupwa hijila yakulingilamo vyuma vyavipiko. Yehova atulweza vyuma vatela kulinga vatu vaze asaka vapwenga masepa jenyi. (Samu 15:1-5) Ngocho, nge tuli nakusaka kupandama kuli ikiye, kaha twatela kufwila lika kulondezeza ikiye naMwanenyi. Twatela nawa kukilikita tuhonese tutenga twetu, nakufwila kutumbila. Chamokomoko namyaka tunatwame kufuma hakutumbapachisa, twatela kutwalaho lika kwalumuna vilinga vyetu.—Wavaka-Kolinde 2, 13:11.

9. Twatachikiza ngachilihi ngwetu twatela kutwalaho lika kuvwala mutu wamuhya?

⁹ Kaposetolo Paulu alwezele vaka-Kulishitu ngwenyi: “Vaminangwile muzule mutu wamwaka wakuya mwaya twamiso yenu yamwaka, uze vali nakulumbula nge omu mwaya kufwila chawo chakutangisa. Kaha pwenunga lika muvavahya muvishinganyeka vyamichima yenu, kaha nawa vwalenu mutu wamuhya uze vatengele kweseka nomu mwaya muchima waKalunga namukwoloka chamuchano namukushishika.” (Wavaka-Efwesu 4:22-24) Echi chalumbununa nge twatela kukilikita lika mangana twalumuke nakuvwala “mutu wamuhya.” Chamokomoko namyaka tunazachila Yehova, tunahase kutwalaho lika kulinangula vilinga vyenyi. Mbimbiliya yinahase kutukafwa tutwaleho lika kwalumuna vilinga vyetu mangana tulondezeze Yehova.

10. Vyuma muka twatela kulinga numba twalumune vilinga vyetu, kaha vihula muka twatela kulihulisa?

¹⁰ Tuvosena twafwila kukavangiza vyuma yahanjika Mbimbiliya. Oloze twatela kuzata nangolo numba tutwaleho lika kwalumuna vilinga vyetu. Mwomwo ika twatela kufwila kuzata nangolo? Kutala Yehova keshi kuhasa kutukafwa mangana tulinge vyuma vyakwoloka nyi?

11-13. Mwomwo ika Yehova asaka tuzate nangolo nakuhonesa jitato jajipi?

¹¹ Nge natushinganyeka havyuma vyosena vatenga mumelu nahamavu, natwitavila chikupu ngwetu Yehova akwechi ngolo jakulinga kala vyuma. Chakutalilaho, atengele likumbi lize likwechi ngolo chikuma. Sekondi hisekondi, likumbi lyeji kumunyikanga nakuneha kuzuma. Oloze kuzuma chachindende kaha chikiko cheji kulingisanga vyuma vyahano hamavu viyoye kanawa. (Samu 74:16; Isaya 40:26) Yehova nawa eji kuhananga vangamba jenyi ngolo kachi nge navamulombajo. (Isaya 40:29) Chikupu vene, kachi nge Yehova asakile, kachi ashiwisako vyuma mangana tuhase  kuhonesa jitato jetu jajipi nakulitwamina nawa kushinganyekanga havyuma vyavipi. Uno mwomwo ika ahonena kulinga chuma kana?

¹² Yehova atuhana lisesa lyakulisakwila etu vavene kumwononoka chipwe nduma. Kachi nge natumwononokanga nakuzata nangolo mangana tulinge mwaya muchima wenyi, kaha natusolola ngwetu twamuzanga nakusaka kumwivwisa kuwaha. Satana eji kwambanga ngwenyi, Yehova katamo kutuyulako. Oloze nge natwononoka Yehova, kaha natusolola ngwetu twasaka atuyulenga. Kaha nawa twatela kutachikiza ngwetu, ou Setu wazangi eji kumonanga kukilikita chetu chakufwila kumwononoka. (Yopa 2:3-5; Vishimo 27:11) Kachi nge natuzata nangolo jetu josena mangana tumbile jitato jetu jajipi numba tuhu chuma kana chapwa chachikalu, kaha natusolola ngwetu twapwa vakushishika kuli Yehova nakumumona kupwa Muka-kutuyula.

¹³ Yehova atulweza ngwenyi tuzate nangolo mangana tumulondezeze nakupwa navilinga vyamwaza. (Wavaka-Kolose 3:12; tangenu WaPetulu 2, 1:5-7.) Asaka nawa tuzate nangolo mangana tuhonese vishinganyeka vyavipi. (Wavaka-Loma 8:5; 12:9) Tweji kuwahililanga chikuma nge tunakilikita nakumbila vilinga vyavipi.

14, 15. Vyuma muka twatela kulinga mangana tupwenga navilinga asaka Yehova? (Talenu lipwata lyakwamba ngwavo, “ Mbimbiliya naKulomba Vyalumwine Kuyoya Chavo.”)

¹⁴ Vyuma muka twatela kulinga numba tupwenga navilinga vize azanga Yehova? Twatela kupendamina hali Kalunga atutwaminyine, muchishishisa chakulisakwila  etu vavene vyakulinga. Mukanda Wavaka-Loma 12:2 wamba ngwawo: “Kanda namwitavila katwamino kamyaka yino kamyalumuneko, oloze alumukenu hakulingisa vishinganyeka vyenu kupwa vyavihya, mangana mutachikize kanawa mwaya muchima waKalunga, ngwenu mwamwaza, mukiko vetavila, kaha mwakukupuka.” Ngocho hakusaka tutachikize vyuma asaka Yehova, twatela kupendamina chikuma hakutanganga Mbimbiliya hakumbi hakumbi, nakushinganyeka havyuma natutanga, nakulomba Yehova atuhane shipilitu yenyi yajila. (Luka 11:13; Wavaka-Ngalesha 5:22, 23) Ngocho Yehova mwatukafwa twivwishise vyuma vize vyeji kumwivwisanga kuwaha, nakutulingisa nawa tushinganyeke ngana muze eji kushinganyekanga ikiye. Kaha vishinganyeka vyetu, navyuma natuhanjika, navize natulinga, navivwisa Yehova kuwaha, nakulinangula mwakuhonesela jitato jajipi. Chipwe ngocho, twatela kutwalaho lika kuhonesa jitato kaneji.—Vishimo 4:23.

¹⁵ Omu natutanganga Mbimbiliya hakumbi hakumbi, twatela nawa kuzachisanga mikanda yakufwana nge Kaposhi Kakutalila naTonenu! mangana yitukafwe. Vihande vyavivulu vyeji kupwangamo vyeji kutunangulanga kupwa navilinga ngana vyaYehova nomu tunahase kuhonesa jitato jetu. Tunahase kuwanamo vihande vimwe navisoneka vize navitukafwa chikuma. Twatela kuvilama nakuvihitulukanga lwola lwosena mangana vitukafwe.

16. Mwomwo ika katwatela kwivwa kupihya kachi nge jitato jimwe katwajimbilile washiko?

 ¹⁶ Cheji kumbatanga lwola numba tulinangule vilinga vyaYehova. Nge munamono ngwenu muchili nakupindasana kumbila jitato jimwe, kaha mwatela kuunda muchima. Hakavanga chinahase kumikaluhwila kulinga vyuma yahanjika Mbimbiliya. Oloze nge namushinganyeka lika vyuma asaka Yehova nakufwila kuvilinga, kaha nachipwa chachashi kumona vyuma ngana muze avimona Yehova nakulinga jino vyuma vyakwoloka.—Samu 37:31; Vishimo 23:12; Wavaka-Ngalesha 5:16, 17.

17. Vyuma muka vyamwaza twatalilila nge natushishika kuli Yehova?

¹⁷ Tuli nakutalilila kulwola luze natukapwa vakukupuka nakuzachila Yehova haya myaka yosena. Halwola kana, katweshi kukapwa natutengako, ngocho nachikapwa chachashi kulondezeza Yehova. Oloze namakumbi ano, tweji kulemesanga Yehova mwomwo atuhana wana wandando yakusokola. Numba tuhu katwakupukako, tunahase kumwivwisa kuwaha nge natuzata nangolo mangana twalumune vilinga vyetu nakukavangiza vyuma eji kutunangulanga muMbimbiliya.

18, 19. Uno natufwelela ngachilihi ngwetu Mbimbiliya yikwechi ngolo jakwalumuna vilinga vyetu?

¹⁸ Kevin azachile nangolo jenyi josena mangana ahonese muchima wamatoto uze apwile nawo. Ashinganyekelenga havyuma atangilenga muMbimbiliya, nakukilikita mangana alumune vyuma vimwe mukuyoya chenyi. Akavangijilenga nawa vyuma vamulwezelenga vakwavo vaka-Kulishitu. Omu mwahichile myaka yayindende, Kevin ambilile muchima wenyi wamatoto, kaha kutwala muze vamutongwele kupwa muka-kuzachila muchikungulwilo. Kaha munahichi jino myaka 20 kufuma haze vamutongwele kupwa kalama. Oloze noholyapwa atachikiza ngwenyi atela kutwalaho lika kuhonesa jitato jimwe jajipi.

¹⁹ Ngana mwaKevin, nayetu twatela kutwalaho lika kwalumunako vilinga vyetu. Nge natulinga ngocho, kaha natupandama chikuma kuli Yehova. (Samu 25:14) Kachi nge natukilikita nakwalumuna vilinga vyetu mangana tumwivwise kuwaha, kaha mwatukafwa tufukile. Ngocho natufwelela ngwetu, Mbimbiliya nayitukafwa twalumune vilinga vyetu.—Samu 34:8.