1-3. (a) Yumanyi yinateli kutukalila kuleka hanyima yakupapatishewa? (b) Malwihwinyi itunateli kudihula neyi tunakañanyi kuleka yilwilu yatama? (Talenu mwevulu wakutachikilahu.)

A KEVIN ahemeneña njuuka, kupepa makanya, kusheta nikunwa yitumbu yashetana hadi yaaka yayivulu. ^[1] (Talenu mazu adi kunsa.) Ilaña adizili hadi Yehova nawa akeñeleña kwikala ibwambu dindi. Hakwila eli mwenimu, azatili nañovu kulonda ahimpi yilwilu yawu. Atwesheli kuhimpa muloña Yehova wayikwashili niñovu Yezu dindi Bayibolu.—Aheberu 4:12.

² A Kevin chapapatisheweliwu, ateleleli kutwalekahu kuhimpa yilwilu yawu kulonda ekali mukwaKristu walala. (Aefwesesa 4:31, 32) Chakutalilahu, adiña nakuzuwa swayi. Chayikalilileña kuleka kuzuwa swayi. A Kevin aweni ahosheli nawu chadiña chapela kuleka yuma yatama yinelileña henohu kanda nipapatishewi kubadika kuleka kuzuwa.  Ilaña ahimpili yilwilu yawu kuhitila mukulembelela Yehova yayikwashi nikudiza chikupu Bayibolu.

³ Henohu kanda tupapatishewi, etu amavulu twahimpili yilwilu yetu kulonda twileña yuma kwesekeja nachahosha Bayibolu. Ilaña niyinu mpinji, kudi yilwilu yitwatela kuleka hakwila nawu twikali neyi Nzambi niKristu. (Aefwesesa 5:1, 2; 1 Petulu 2:21) Chakutalilahu, hadaha twatobaña nankashi hela kutuñula nikuhosha chatama hadi akwetu. Indi kwiji tunateli kwakamena netu akwetu akutoñojoka hela kuhosha nawu tunakwila yuma yaloña wanyi. Hela tuneseki kuleka yilwilu yatama hadi yaaka yayivulu ilaña tunakañanyi. Dichi tunateli kutoñojoka netu: ‘Muloñadi chinnakubulila kuleka tuyiluwa twanyanya? Natela kwiladi hakwila nawu nilondeleña chahosha Bayibolu kulonda nileki yilwilu yatama?’

4. Muloñadi wutwakañenyaña kumutiyisha Yehova kuwaha muyuma yejima yitwelaña?

⁴ Twamukeña Yehova nawa twafwilaña kumutiyisha kuwaha namuchima wejima. Chawushona, hitunateli kumutiyisha kuwaha mpinji yejimaku, muloña twaluwañeshaña. Kakavulu twatiyaña neyi kapostolu Pawulu wahosheli nindi: “Muchima wakukeña kwila chachiwahi nidi nawu, ilaña kwilamu kutwesha nehi.”—Aroma 7:18; Yakoba 3:2.

5. Yumanyi yitwalekeli henohu kanda tupapatishewi, nawa kuzeya zeyanyi kutunakukabakana naku?

⁵ Henohu kanda tupapatishewi, twalekeli kwila yuma yahelayi Yehova. (1 Akorinda 6:9, 10) Ilaña twawanina wanyi. (Akolose 3:9, 10) Hela chakwila hanashimbuli kufuma hitwapapatisheweli, twatwalekañahu kukoña yiluwa. Kakavulu, tunateli kutachika kufwila kwatama hela chinateli kutukalila kuhimpa yilwilu yetu. Hadaha, chinatukalili kuleka iyi yilwilu hadi yaaka yayivulu.

6, 7. (a) Muloñadi wutunateli kwikalila ibwambu daYehova hela chakwila twawanina wanyi? (b) Muloñadi wutwatela kutwalekelahu kulomba kudi Yehova netu yatwanakeni?

⁶ Hela chakwila twawanina wanyi, tunateli kwikala ibwambu daYehova nikumukalakela. Mpinji yejima anukenuña chimwekalili ibwambu daYehova. Diyi wamweni yuma yayiwahi mudenu nawa wakeñeleña nindi mumwiluki. (Yowanu 6:44) Welukili cheñi nindi mwaluwañeshaña nawa mwakaluwañeshaña. Ilaña Yehova wayitondeli kwikala ibwambu dindi.

⁷ Yehova watukeñeli nankashi chakwila watwinkeli chawaana chalema. Watemesheli Yesu hamaseki kulonda yahani wumi windi neyi ifutu danyiloña. (Yowanu 3:16) Neyi tunakoñi chiluwa, twatela kulomba kudi Yehova kulonda yatwanakeni. Nawa hamuloña wefutu danyiloña, tunateli kukuhwelela chikupu netu akutwanakena nawa tukwikala amabwambu jindi. (Aroma 7:24, 25; 1 Yowanu 2:1, 2) Mwatela kwiluka nenu, Yesu wafwilili akwanshidi abalumukaña munyichima. Dichi hela chakwila tukumona netu tunakoñi nshidi yeneni, twatela kuleka wanyi kulomba kudi Yehova kulonda yatwanakeni.  Neyi tubula kumulomba kulonda yatwanakeni, chidi neyi tunakukeña wanyi kuwela kumakasa kudi majilu. Twakooleka muloña Yehova watwiteja kwikala amabwambu jindi hela chakwila twawanina wanyi.—Tañenu 1 Timotewu 1:15.

8. Muloñadi wutukubulila kudiwula kuzeya-zeya kwetu?

⁸ Hela chochu, hitunateli kudiwula kuzeya-zeya kwetuku. Yehova watuleja antu atela kwikala amabwambu jindi. (Masamu 15:1-5) Dichi neyi tunakukeña kukundama kwakwihi nayena, twatela kuzata nañovu kulonda tumwimbujoli yena niMwanindi. Twatela cheñi kukañesha kufwila kwila yuma yatama hela kuyileka. Hela chakwila hanashimbuli kufuma hitwapapatisheweli, twatela kutwalekahu kuhimpa yilwilu yetu.—2 Akorinda 13:11.

9. Tuneluki ñahi netu twatela kutwalekahu kuvwala muntu wamuha?

⁹ Kapostolu Pawulu walejeli akwaKristu nindi: ‘Vuulenu muntu wenu wamukulu wachisemwa chachikulu, waditamishaña mwaya kufwila kwatama kwayidimbilaña. Nawa mutwalekuhu kwikala antu amaha muyitoñojoka yaspiritu yenu. Mudivwiki muntu wamuha aleñeluwu mwekalilayi Nzambi mukuloña nakujila kwansañu yalala.’ (Aefwesesa 4:22-24) Ichi chinayi mukwila nawu twatela kutwalekahu kuhimpa ‘nakuvwala muntu wamuha.’ Hela chakwila tunamukalakeli Yehova hadi yaaka yayivulu, twatela kutwalekahu kwiluka yilwilu yindi. Nawa Bayibolu yikutukwasha kutwalekahu kuhimpa yilwilu yetu kulonda twikali neyi yena.

10. Twatela kwiladi hakwila nawu Bayibolu yitukwashi kuhimpa yilwilu yetu, nawa malwihwinyi itunateli kwihula?

¹⁰ Wejima wetu twafwilaña kulondela chahosha Bayibolu. Ilaña neyi tunakufwila kuhimpa twatela kuzata nañovu. Muloñadi wutwatelela kuzata nañovu? Yehova kwila yapelesha yuma kulonda twileña mwaloña nehi?

11-13. Yehova wakeñelañadi nindi tuzati nañovu kulonda tushindi kuzeya-zeya kwetu?

¹¹ Neyi tushinshika mwiwulu niyuma yekalamu, tukwiluka chikupu netu Yehova wukweti ñovu yakwila yuma yidi yejima. Chakutalilahu, waleñeli itañwa datoñekaña nankashi. Itañwa dafumishaña chejeji niyena deneni chikupu hasekondi yimu, ilaña iyena dantesha hohu didakeñekaña hakwila nawu yuma yonaña yihandi hamaseki. (Masamu 74:16; Isaya 40:26) Yehova wenkaña cheñi ambuñindi ahamaseki ñovu neyi anakeñi. (Isaya 40:29) Yehova neyi wakeñeli, kachi wapelesha yuma kulonda  tushindeña kuzeya-zeya kwetu nikuleka kufwila kwila yuma yatama. Hanu dinu muloñadi chabulilayi kupelesha?

¹² Yehova watwinka wuswa wakudifuukwila. Watwiteja kuditondela etu aweni kumwovwahila hela nehi. Neyi tutonda kumwovwahila nikuzata nañovu kulonda twileña nkeñelu yindi, tukumwekesha netu twamukeña nawa tunakufwila kumutiyisha kuwaha. Satana wahoshaña nindi Yehova wudana wuswa wakuyuula. Ilaña neyi tumwovwahila Yehova, tukumwekesha netu tunakukeña Nzambi kwikala Nyuuli yetu. Nawa tukukuhwelela netu Tata yetu wukweti kukeña walemesha chitwazataña nañovu hakwila nawu tumwovwahili. (Yoba 2:3-5; Yishimu 27:11) Neyi tukuzata nañovu kulonda tushindi kuzeya-zeya kwetu hela chakwila chakala kwila mwenimu, tukumwovwahilaña Yehova nawa tukumwekeshaña netu tunakukeña yekali Nyuuli yetu.

¹³ Yehova watulejaña nindi twatela kuzata nañovu hakwila nawu twimbujoli yilwilu yindi. (Akolose 3:12; tañenu 2 Petulu 1:5-7.) Wakeña cheñi nindi tuzateña nañovu kulonda tutoñojokeña yuma yayiwahi nikuleka kufwila yuma yatama. (Aroma 8:5; 12:9) Neyi tuzata nañovu netu tuhimpi nawa mwalala tuhimpa, twatiyaña kuwaha.

14, 15. Twatela kwiladi kulonda twikali nayilwilu yakeñayi Yehova? (Talenu chikasha chinakwila nawu “ Bayibolu niKulomba Kwahimpili Chihandilu Chawu.”)

¹⁴ Twatela kwiladi hakwila nawu twikali nayilwilu yakeñayi Yehova? Twatela kulomba  Nzambi kulonda yatukwashi kuhimpa. Aroma 12:2 yahosha nawu: “Bayi mulondeja mwelañawu antu amakonuku; ilaña yitoñojoka yenu yibalumuki kwikala yayiha; kulonda mushinshiki mwaya muchima waNzambi, diwu wawuwahi, watiyishaña kuwaha, walala chikupu.” Dichi hakwila nawu twiluki yuma yakeñayi Yehova, twatela kushindamena hawukwashu watwinkayi. Twatela kutaña Bayibolu mafuku ejima, kutoñojoka hajitunakutaña nikulomba Yehova kulonda yatwinki spiritu yindi yajila. (Luka 11:13; Aŋalija 5:22, 23) Neyi twila mwenimu, Yehova wukutukwasha kwiluka yuma yamutiyishaña kuwaha nawa tukutachika kutoñojoka neyi chatoñojokañayi. Chikufumamu, yitoñojoka yetu, nhoshelu niyilwilu yetu yikumutiyishaña Yehova kuwaha nawa tukwiluka chakushinda kuzeya-zeya kwetu. Hela chochu, twatela kutwalekahu kulwisha nañovu.—Yishimu 4:23.

¹⁵ Kubombela hakutaña Bayibolu, twatela kudiza Bayibolu kuzatisha nyikanda yetu yidi neyi Kaposhi Kakutalila niAwake! Yibaaba yayivulu yekala munawa magazini yatudizishaña chitunateli kwimbujola yilwilu yaYehova nichitunateli kushinda kuzeya-zeya kwetu. Tunateli kuwanamu yibaaba ninsona yinateli kutukwasha. Tunateli kuyihemba iyi yibaaba ninsona kulonda tuyitañeña mpinji yejima.

16. Tukubuliladi kuneña neyi kudi yilwilu yitunakañanyi kuhimpa swayi swayi?

 ¹⁶ Hahitaña mpinji hakwila nawu mwikali nayilwilu neyi yaYehova. Dichi neyi munamoni nenu kudi yilwilu yimuchidi kanda muhimpi, bayi muneñaku. Hakusambila, mwatela kuzata nañovu hakwila nawu mwileña kwesekeja nachahosha Bayibolu. Ilaña neyi mutoñojokaña nikwila yuma kwesekeja nachinakukeñayi Yehova, chikuyipelela kutoñojoka neyi chatoñojokañayi nikwila yuma yaloña.—Masamu 37:31; Yishimu 23:12; Aŋalija 5:16, 17.

17. Tukuchiñejañadi kumbidi neyi twikala ashinshika kudi Yehova?

¹⁷ Tunakutalila mpinji yakumbidi yitwakekala awanina nawa yitwakamukalakelaña Yehova haya nyaka. Hayina mpinji, twakekala wanyi nayilwilu yatama nawa chikatupelela kumwimbujola Yehova. Tunakutwesha kudifukula kudi Yehova makonu muloña watwinka chawaana chefutu danyiloña. Hela chakwila twawanina wanyi, tunateli kumutiyisha kuwaha neyi tutwalekahu kuzata nañovu kulonda tuhimpeña nikulondela yuma yatudizishañayi muBayibolu.

18, 19. Tunateli kwiluka ñahi netu Bayibolu yikweti ñovu yakutwalekahu kuhimpa yilwilu yetu?

¹⁸ A Kevin azatili nañovu kulonda aleki kuzuwa. Atoñojokeli hayuma yatañiliwu muBayibolu nawa azatili nañovu kulonda ahimpi chihandilu chawu. Alondeleli cheñi kufumba kwayifumbiliwu kudi akwawu akwaKristu. Hela chakwila hashimbwili hakwila nawu aKevin ahimpi, mukuhita kwampinji ekalili ankoñi akuzatila. Nawa hadi yaaka 20 yinahitihu, anakalakali neyi aeluda. Ilaña nichayinu mpinji, eluka nawu atela kutwalekahu kuzatila hakuzeya-zeya kwawu.

¹⁹ Kufwana aKevin, tunateli kutwalekahu kuhimpa yilwilu yetu. Neyi tuhimpa, tukutwalekahu kukundama kwakwihi naYehova. (Masamu 25:14) Nawa chitwazata nañovu kuhimpa, wukutukiswila. Dichi tunateli kukuhwelela chikupu netu Bayibolu yikutukwasha kutwalekahu kuhimpa yilwilu yetu.—Masamu 34:8.