1-3. a) Aj tjaw aʼ qwiʼ, ¿alkye junjun tiʼchaq il tiʼj tuʼn tbʼaj qchʼixpuʼn? b) Aj tel qnikʼ tiʼj qa kwest tuʼn kykubʼ qchʼixpuʼn junjun tiʼchaq, ¿tiʼ jaku kubʼ qxjelin? (Qʼonka twitza tiʼj tnejel tilbʼilal).

KYOJ nim abʼqʼi, saqchan Kevin tiʼj pwaq, in sichʼintoq, in kʼantoq qʼeʼn ex in kʼantoq droga ^[1] (tqanil jun). Yajxitl, el tnikʼ tiʼj Jehová ex ten tajbʼil tuʼn tok te tamiw. Tuʼn tbʼant jlu tuʼn, iltoq tiʼj tuʼn tkubʼ tchʼixpuʼn nim tiʼchaq toj tanqʼibʼil. Bʼant chʼixpubʼil lu tuʼn noq tuʼn tonbʼil Jehová ex tuʼn tonbʼil tipumal Tyol (Hebreos 4:12).

² Tej otoqxi jaw aʼ twiʼ Kevin, moqa otoqxi bʼyan, iltoq tiʼj tuʼn kukx tbʼaj tchʼixpuʼn junjuntl nya bʼaʼn tmod tuʼntzun tok te jun tbʼanel okslal (Efesios 4:31, 32). Jun techel, jun rat in tzajtoq tqʼoj. Jaw labʼin tej tel tnikʼ tiʼj qa kwest tuʼn tok t-xqʼuqin tibʼ tuʼntzun miʼn ttzaj naj tqʼoj. Ex tqʼama Kevin qa mas kwest ela toj twitz tuʼn t-xi t-xnaqʼtzan tibʼ tuʼn  tten tbʼanel tmod twitzju tej tkyaj tkolin junjuntl nya bʼaʼn tej naʼmxtoq tjaw aʼ twiʼ. Noqtzun tuʼnj, bʼant nim chʼixpubʼil tuʼn Kevin noq tuʼnju xi tqanin onbʼil te Jehová ex tuʼnju ok tenxix xnaqʼtzal tiʼj Tyol.

³ Tej naʼmxtoq tjaw aʼ qwiʼ, at nim qe bʼant nim chʼixpubʼil quʼn toj qanqʼibʼil tuʼntzun tkubʼ qbʼinchaʼn aju in tzaj tqʼamaʼn Tyol Dios. Maske ikju, ax ikx el qnikʼ tiʼj qa at junjuntl tal tiʼchaq il tiʼj tuʼn tkubʼ qchʼixpuʼn tuʼntzun tten qmod ik tzeʼn te Jehová ex Jesús (Efesios 5:1, 2; 1 Pedro 2:21). Qape in nel qnikʼ tiʼj qa nim maj in qo yolin nya toj tumel moqa naqʼli qoʼ tuʼn qiqen yol kyiʼj txqantl ex junjuntl yol nya bʼaʼn. Moqa ax ikx in tzaj qxobʼil tiʼj tiʼ kbʼel kyximen ex tiʼ jaku kyqʼama txqantl qiʼj qa ma kubʼ qbʼinchaʼn aju bʼaʼn. Olo tzʼok tilel quʼn tuʼn tkubʼ qchʼixpuʼn qe tiʼchaq lu kyoj nim abʼqʼi, noqtzun tuʼnj, aʼyex tiʼchaq lu in bʼant quʼn. Tuʼntzunju, jakulo kubʼ qxjelin jlu: «¿Tiquʼn kwest in nela toj nwitze tuʼn tkubʼ nchʼexpuʼne junjun tal tiʼchaq? ¿Tiʼ jaku bʼant wuʼne tuʼn tkubʼ nbʼinchaʼne aju in tzaj tqʼamaʼn Tyol Dios tuʼntzun woke te tbʼanel xjal?».

4. ¿Tiquʼn melay tzalaj Jehová quʼn toj tkyaqil ambʼil?

⁴ Kʼujlaʼn Jehová quʼn ex tuʼn tkyaqil qanmi qaj tuʼn ttzalaj quʼn. Maske ikju, nya toj tkyaqil ambʼil jaku tzalaj Jehová quʼn tuʼnju aj il qoʼ. Jakulo qqʼama ik tzeʼn te apóstol Pablo: «Wajbʼile tuʼn nbʼinchanteye aju bʼaʼn, pero mintiʼ wipumale tuʼn tbʼant wuʼne» (Romanos 7:18; Santiago 3:2).

5. a) ¿Alkye junjun tiʼchaq bʼaj qchʼixpuʼn tej naʼmxtoq tjaw aʼ qwiʼ? b) Tuʼnju aj il qoʼ, ¿alkye junjuntl tiʼchaq kukx kʼokel tilel quʼn tuʼn tbʼaj qchʼexpuʼn?

⁵ Tej naʼmxtoq qoktz toj tnam Jehová, kyaj qtzaqpiʼn qeju tiʼchaq in nel tikʼun (1 Corintios 6:9, 10). Noqtzun tuʼnj, kukx aj il qoʼ (Colosenses 3:9, 10). Tuʼntzunju, kukx in kubʼ qbʼinchaʼn junjun tiʼchaq nya toj tumel maske ma tzikʼ nim abʼqʼi tjawlen aʼ qwiʼ. Atlo junjun maj in kubʼ qnaʼn ex in kubʼ qximen junjun nya bʼaʼn, moqa kwest tuʼn tok qxqʼuqin qibʼ kyiʼj junjun tiʼchaq nya toj tumel in bʼant quʼn. Nya oʼkxju, axlo jlu kukx in nok qxqʼuqin qibʼ tiʼj kyoj nim abʼqʼi.

6, 7. a) ¿Tiquʼn kukx jaku qo ok te tamiw Jehová maske aj il qoʼ? b) ¿Tiquʼn bʼaʼn tuʼn t-xi qqanin te Jehová tuʼn tkubʼ tnajsaʼn qil?

⁶ Maske aj il qoʼ, kukx jaku qo ok te tamiw Jehová ex jaku qo ajbʼen te. Bʼaʼn tuʼn ttzaj qnaʼn qa a Jehová tzaj qʼiʼn qe tuʼn qok te tamiw tuʼnju ok tqʼoʼn twitz tiʼjju tbʼanel in bʼant quʼn ex ten tajbʼil tuʼn tok qojtzqiʼn te (Juan 6:44). Ojtzqiʼntoq tuʼn qa at junjun tiʼchaq nya toj tumel in bʼant quʼn ex tuʼntzunju kukx jakutoq qo el txalpaj. Maske ikju, ten tajbʼil Jehová tuʼn qok te tamiw.

⁷ Tuʼnju at nim tkʼujlabʼil Jehová qiʼj tzaj tqʼoʼn jun tbʼanel oyaj qe. Tzaj t-samaʼn Tkʼwaʼl tzalu twitz Txʼotxʼ tuʼntzun t-xi tqʼoʼn tchwinqlal tuʼn tchjet qil (Juan 3:16). Aj in kubʼ qbʼinchaʼn jun tiʼ nya toj tumel, jaku txi qqanin te Jehová tuʼn tkubʼ tnajsaʼn qil. Ex noq tuʼn chojbʼil, jaku tzʼok qʼuqeʼ qkʼuʼj tiʼj qa kbʼel tnajsaʼn Jehová qil ex iktzun tten kukx jaku ten qamiwbʼil tukʼil (Romanos 7:24, 25; 1 Juan 2:1, 2). Bʼaʼn tuʼn ttzaj tnaʼna qa kyim Jesús tuʼn kypaj aj il xjal. Tuʼntzunju, qa in kubʼ qnaʼn qa at qil, kukx jaku txi  qqanin te Jehová tuʼn tkubʼ tnajsaʼn qil. Qatzun qa mintiʼ ma txi qqanin te tuʼn tkubʼ tnajsaʼn qil, ik tten jlu ik tzeʼn nya qajbʼil tuʼn tel qtxʼajoʼn qqʼabʼ qa tzʼilqe. Jaku txi qqʼoʼn nim chjonte te Jehová tuʼnju kukx in jyon tumel tuʼn qok te tamiw (kjawil uʼjit 1 Timoteo 1:15).

8. ¿Tiquʼn mintiʼ tuʼn tkubʼ qximen qa mintiʼ jun nya bʼaʼn in bʼant quʼn?

⁸ Mintiʼ tuʼn tkubʼ qximen qa mintiʼ jun nya bʼaʼn in bʼant quʼn moqa tuʼn kukx qjyon jun tumel tuʼntzun miʼn kykubʼ qchʼixpuʼn. O tzaj tqʼamaʼn Jehová qe alkyeqe xjal tajbʼil tuʼn kyok te tamiw (Salmo 15:1-5). Tuʼntzunju, qa qajbʼil tuʼn qok laqʼeʼ ttxlaj Jehová, il tiʼj tuʼn kukx tel qkanoʼn qe tmod ex qe tmod Jesús. Ax ikx, il tiʼj tuʼn kukx tok qxqʼuqin qibʼ kyiʼj qe nya bʼaʼn qajbʼil ex tuʼn kyel qikʼun. Noq jniʼxku ambʼil tjawlen aʼ qwiʼ, kukx kʼokel tilil quʼn tuʼn kyten tbʼanel qmod (2 Corintios 13:11).

9. ¿Alkye tten in nel qnikʼ tiʼj qa kukx jaku qo ok te akʼaj?

⁹ Kyaj tqʼamaʼn apóstol Pablo aju tbʼanel nabʼil lu: «Kykotpiʼmele kyiʼje aju ojtxi kytene, ex kyqʼonkje aju ojtxi kychwinqlale, porque aju ojtxi kytene nibʼan tnaj tuʼnju in pon tkʼuʼj tiʼj nimku ex in t-sbʼun tibʼ. Kyjaʼtzun, tzʼokwit kyanmi te akʼaj tukʼix kynabʼle, ex kyqʼoʼnke kyiʼje aju akʼaj kytene, porque o che bʼinchanjtze tuʼn kyoke ik tzaʼn tilbʼilal Dios, tuʼn kyoke tzʼaqlxix ex xjan tuʼnju yol axix tok» (Efesios 4:22-24). A T-xilen jlu qa il tiʼj tuʼn kukx tok tilel quʼn tuʼn tbʼaj qchʼixpun qibʼ ex tuʼn qok te «akʼaj». Tuʼntzunju, noq jniʼxku ambʼil tjawlen aʼ qwiʼ kukx jaku tzʼel mas qnikʼ kyiʼj tbʼanel tmod Jehová. Ex Jaku tzʼonin Xjan Uʼj qiʼj tuʼn kukx tbʼaj qchʼixpuʼn junjun qmod tuʼntzun tten qmod ik tzeʼn te Jehová.

10. ¿Tiʼ kbʼantel quʼn tuʼn kukx tonin Tyol Dios qiʼj tuʼn tbʼaj qchʼixpuʼn junjun tiʼchaq ex tiʼ jaku kubʼ qxjelin?

¹⁰ Qkyaqilx qajbʼil tuʼn tkubʼ qbʼinchaʼn aju in tzaj tqʼamaʼn Tyol Dios. Noqtzun tuʼnj, il tiʼj tuʼn kukx tok tilel quʼn tuʼn tbʼaj qchʼixpuʼn junjuntl tiʼchaq. ¿Tiquʼn il tiʼj tuʼn tok tilel quʼn? ¿Mlaype bʼant jun tiʼ tuʼn Jehová tuʼntzun nya kwest tuʼn tbʼant jlu quʼn?

11-13. ¿Tiquʼn tajbʼil Jehová tuʼn kykubʼ kyiʼj nya bʼaʼn qajbʼil quʼn?

¹¹ Qa ma qo ximen tiʼj kykyaqil tbʼinchbʼen Jehová, in nel qnikʼ tiʼj qa at nim tipumal tuʼn tbʼant noq alkyexku jun tiʼ tuʼn. Jun techel, bʼaj tbʼinchaʼn Qʼij ex at nim tipumal. Aj in nikʼ junjun segundos, in tzaj tqʼoʼn Qʼij luz ex kyaq. Noq chʼin luz in nel tiʼj Qʼij tuʼn tten anqʼibʼil tzalu twitz Txʼotxʼ (Salmo 74:16; Isaías 40:26). Ax ikx, aj kysikt tmajen Jehová, in tzaj tqʼoʼn kyipumal (Isaías 40:29). Tuʼn jlu in nel qnikʼ tiʼj qa jaku bʼant jun tiʼ tuʼn Jehová tuʼntzun nya kwest tuʼn tela toj qwitz tuʼn tkubʼ kyiʼj nya bʼaʼn quʼn ex tuʼn miʼn tten qe nya bʼaʼn qajbʼil. Qa ikju, ¿tiquʼn mintiʼ in bʼant tuʼn?

 ¹² O tzaj tqʼoʼn Jehová ambʼil qe tuʼn tjaw qjyoʼn tiʼ kbʼantel quʼn. Tajbʼil tuʼn awoʼx tuʼn qximen tiʼj qa qo ajbʼel te moqa miʼn. Qa ma jaw qjyoʼn tuʼn qnimen te ex qa ma tzʼok tilel quʼn tuʼn tbʼant tajbʼil, tuʼn jlu in kubʼ qyekʼun qa kʼujlaʼn quʼn ex qa qajbʼil tuʼn ttzalaj quʼn. Tqʼama Satanás qa mintiʼ toklen Jehová tuʼn tkawin. Tuʼntzunju, qa ma jaw qjyoʼn tuʼn qnimen te, in kubʼ qyekʼun qa qajbʼil tuʼn tkawin Jehová qibʼaj. Ex jaku tzʼok qʼuqeʼ qkʼuʼj tiʼj qa nim toklen tuj twitz Jehová qa in nok tilil quʼn tuʼn qnimen te (Job 2:3-5; Proverbios 27:11). Aj tok tilil quʼn tuʼn tkubʼ kyiʼj qeju nya bʼaʼn qajbʼil maske kwest in nela toj qwitz, tuʼn jlu kukx in qo ajbʼen te Jehová ex in kubʼ qyekʼun qa qajbʼil tuʼn tkawin qibʼaj.

¹³ In tzaj tqʼamaʼn Jehová qe qa bʼaʼn tuʼn tel qkanoʼn qe tbʼanel tmod (Colosenses 3:12; kjawil uʼjit 2 Pedro 1:5-7). Ax ikx tajbʼil Jehová tuʼn tok qxqʼuqin qibʼ tiʼjju in kubʼ qnaʼn ex tiʼjju in kubʼ qximen (Romanos 8:5; 12:9). Aj tok tilil quʼn tuʼn tbʼaj qchʼixpuʼn junjun tiʼchaq ex in kubʼ kyiʼj quʼn, nim tzalajbʼil in kubʼ qnaʼn tuʼn jlu.

14, 15. ¿Ti jaku bʼant quʼn tuʼn kyten qmod aʼyeju kʼujlaʼn tuʼn Jehová? (Jyonkuxa aju recuadro « Onin Tyol Dios ex naʼj Dios kyiʼj tuʼn tbʼaj kychʼixpuʼn kyanqʼibʼil»).

¹⁴ ¿Tiʼ kbʼantel quʼn tuʼn kyten tbʼanel qmod aʼyeju kʼujlaʼn tuʼn Jehová? Mas tbʼanel qa ma txi qqʼoʼn ambʼil te Jehová tuʼn ttzaj tyekʼun qbʼe twitzju qa ax qoʼ in qo kubʼ ximente alkye junjun tiʼchaq kbʼel qchʼixpuʼn. In tzaj tqʼamaʼn Romanos 12:2 jlu: «Miʼn che ok lpeʼye tiʼj kynabʼl xjal mya bʼaʼn,  noq oʼkx kychʼexpum kynabʼle tuʼn kyoke te akʼaj, tuʼntzun kyojtzqinteye alkye tajbʼil Dios, tuʼn tel kynikʼe tiʼj alkye bʼaʼn, ex alkye in tzalaj Dios tiʼj ex alkye ju tzʼaqlxix». Tuʼntzunju, qa qajbʼil tuʼn tel qnikʼ tiʼj alkye tajbʼil Jehová, il tiʼj tuʼn tok qeʼ qkʼuʼj kyiʼj onbʼil in tzaj tqʼoʼn qe. Il tiʼj tuʼn quʼjin tiʼj Tyol tkyaqil qʼij, tuʼn qximen tiʼjju in jaw quʼjin ex tuʼn t-xi qqanin te tuʼn ttzaj tqʼoʼn xewbʼaj xjan qe (Lucas 11:13; Gálatas 5:22, 23). Tuʼn jlu, tzul tonin Jehová qe tuʼn tel qnikʼ tiʼj alkye in tzalaj tiʼj ex jaku txi qxnaqʼtzan qibʼ tuʼn tten qximbʼetz ik tzeʼn te t-ximbʼetz. Iktzun tten ktzalajel Jehová tiʼjju kbʼel qximen, tiʼjju kxel qqʼamaʼn ex tiʼjju kbʼantel quʼn. Ax ikx, kxel qxnaqʼtzan qibʼ tuʼn tok qxqʼuqin qibʼ kyiʼj qe nya bʼaʼn qbʼinchbʼen. Maske ikju, kukx kʼokel tilil quʼn tuʼn kykubʼ kyiʼj quʼn (Proverbios 4:23).

¹⁵ Ex nya oʼkx tuʼn quʼjin tiʼj Tyol Dios tkyaqil qʼij, ax ikx il tiʼj tuʼn qxnaqʼtzaʼn tiʼj tukʼil onbʼil in tzaj kyqʼoʼn txqantl uʼj, ik tzeʼn uʼj Aju Xqʼuqil ex ¡Despertad! At nim xnaqʼtzbʼil tkuʼx kyoj jatumel in qo tzaj kyxnaqʼtzaʼn alkye tten jaku tzʼel qkanoʼn qe tbʼanel tmod Jehová ex alkye tten jaku kubʼ kyiʼj junjun tiʼchaq nya toj tumel in bʼant quʼn. Jaku kanet jun xnaqʼtzbʼil moqa jun taqikʼ Tyol Dios quʼn aju jaku tzʼonin nim qiʼj. Bʼaʼn tuʼn t-xi qkʼuʼn qe uʼj lu ex qeju taqikʼ Tyol Dios tuʼntzun kyjaw quʼjin toj juntl ambʼil.

16. ¿Tiquʼn mintiʼ tuʼn ttzaj qbʼis qa nya nim chʼixpubʼil o bʼant quʼn?

 ¹⁶ In xi tiʼn ambʼil tuʼn t-xi qxnaqʼtzan qibʼ tuʼn tel qkanoʼn qe tmod Jehová. Tuʼntzunju, qa in kubʼ qnaʼn qa nya nim chʼixpubʼil o bʼant quʼn ik tzeʼn qajbʼil tuʼn tbʼant, bʼaʼn tuʼn tten qpasens. Tnejel, il-lo tiʼj tuʼn tok qobligarin qibʼ tuʼn tkubʼ qbʼinchaʼn aju in tzaj tqʼamaʼn Tyol Dios. Noqtzun tuʼnj, qa mas ma qo ximen ex mas ma kubʼ qbʼinchaʼn aju tajbʼil Jehová, mas nya kwest kʼelel toj qwitz tuʼn qximen ik tzeʼn te ex tuʼn tkubʼ qbʼinchaʼn aju mas bʼaʼn (Salmo 37:31; Proverbios 23:12; Gálatas 5:16, 17).

17. Qa kukx ma qo ajbʼen te Jehová, ¿tiʼ tbʼanel jaku tzaj qe?

¹⁷ In qo yon tiʼj ambʼil tuʼn qok te tzʼaqlixix ex tuʼn qajbʼen te Jehová te jumajx. Toj ambʼil aju, ya melay tzʼok tilil quʼn tuʼn tkubʼ tiʼj jun nya bʼaʼn in bʼant quʼn ex mas nya kwest tuʼn kyel qkanoʼn tmod Jehová. Ax ikx jaʼlo, jaku bʼant qkʼulin te Jehová tuʼnju o tzaj tqʼoʼn chojbʼil. Maske aj il qoʼ, kukx jaku tzalaj Jehová quʼn qa kukx ma tzʼok tilil quʼn tuʼn kykubʼ qchʼixpuʼn junjun tiʼchaq toj qanqʼibʼil ex qa kukx ma qo ok lepeʼ tiʼjju xnaqʼtzbʼil in tzaj tqʼoʼn Xjan Uʼj.

18, 19. ¿Alkye tten jaku tzʼok qeʼ qkʼuʼj tiʼj qa at tipumal Tyol Dios tuʼn tbʼaj tchʼixpuʼn qanqʼibʼil?

¹⁸ Nim ok tilil tuʼn Kevin tuʼn tok t-xqʼuqin tibʼ kyiʼj nya bʼaʼn tmod. Ximen tiʼjju jaw tuʼjin toj Tyol Dios ex ok tilil tuʼn, tuʼn tbʼant junjun chʼixpubʼil tuʼn toj tanqʼibʼil. Ax ikx xi tbʼiʼn nabʼil xi kyqʼoʼn junjuntl okslal te. Maske ikju, ax ikx xi tiʼn junjun abʼqʼi tuʼn tbʼant qeju chʼixpubʼil tuʼn. Tej tbʼet ambʼil, xi qʼoʼn toklen te onil kye ansyan ex kyoj qeju 20 abʼqʼi ma che ikʼ, in najbʼen te ansyan. Ex ax ikx toj ambʼil jaʼlo, kukx in nok tilil tuʼn, tuʼn kykubʼ kyiʼj junjun nya bʼaʼn tuʼn.

¹⁹ Ik tzeʼn te Kevin, ax ikx jaku kubʼ qchʼixpuʼn junjun qmod. Qa ik ma bʼant quʼn, kukx jaku qo ok laqʼeʼ ttxlaj Jehová (Salmo 25:14). Ex aj tok tilil quʼn tuʼn ttzalaj Jehová, tzul tonin qe tuʼn tbʼant quʼn. Jaku tzʼok qeʼ qkʼuʼj tiʼj qa jaku tzʼonin Tyol Dios qiʼj tuʼn tbʼaj qchʼixpuʼn junjun tiʼchaq toj qanqʼibʼil (Salmo 34:8).