1-3. (a) Ke diphetogo dife tšeo re ka thatafalelwago ke go di dira ka morago ga ge re kolobeditšwe? (b) Ke dipotšišo dife tšeo re ka ipotšišago tšona ge re bona eka re thatafalelwa ke go dira diphetogo? (Bona diswantšho tše di lego ka mo godimo.)

KEVIN o feditše nywaga e mentši a petšha, a kgoga, a enwa bjala ka mo feteletšego e bile a kgoga dihlaretagi. ^[1](Bona tlhaloso.) Ke moka o ile a ithuta ka Jehofa gomme a nyaka go ba mogwera wa gagwe. Eupša gore a be mogwera wa Modimo, o be a swanetše go dira diphetogo tše dikgolo bophelong bja gagwe. Kevin o ile a kgona go dira diphetogo tšeo ka thušo ya Jehofa le ya Lentšu la Gagwe leo le nago le matla e lego Beibele.​—Baheberu 4:12.

² Ka morago ga gore Kevin a kolobetšwe, o be a sa dutše a swanetše go dira diphetogo semelong sa gagwe e le gore e be Mokriste yo mokaone. (Baefeso 4:31, 32) Ka mohlala, o be a na le mokgwa wa go galefa kapela. O ile a makala ge a be a hwetša gore go thata gore a ithute go laola kgalefo ya gagwe. Ge e  le gabotse, Kevin o re go ithuta go laola kgalefo ya gagwe go be go le thata kudu go feta go tlogela dilo tše mpe tšeo a bego a di dira pele a kolobetšwa! Eupša o ile a kgona go dira diphetogo ka go lopa Jehofa gore a mo thuše le ka go ithuta Beibele ka mo go tseneletšego.

³ Ba bantši ba rena re ile ra swanelwa ke go dira diphetogo tše dikgolo maphelong a rena pele re kolobetšwa e le gore re phele ka tsela yeo Beibele e rego re phele ka yona. Eupša gaešita le gona bjale, re a lemoga gore go sa na le diphetogo tše dinyenyane tšeo re swanetšego go di dira gore re kgone go ekiša Modimo le Kriste kutšwanyana. (Baefeso 5:1, 2; 1 Petro 2:21) Ka mohlala, re ka lemoga gore re rata go ngongorega goba gore gantši re seba ka batho le go bolela dilo tše mpe ka bona. Goba ka dinako tše dingwe re ka tlogela go dira dilo tše dibotse re tšhaba seo batho ba tla se naganago ka rena goba go se bolela. Mohlomongwe ke kgale kudu re leka go dira diphetogo, eupša re dula re boeletša diphošo tše di swanago. Ka gona re ka ipotšiša gore: ‘Go re’ng ke thatafalelwa ke go dira diphetogo tše dinyenyane gakaakaa? Ke swanetše go dira’ng gore ke diriše seo Beibele e se bolelago e le gore ke tšwele pele ke kaonefatša semelo sa ka?’

4. Ke ka baka la’ng re sa kgone go thabiša Jehofa ka mehla?

⁴ Re rata Jehofa, e bile re nyaka go mo thabiša ka dipelo tša rena ka moka. Eupša ka maswabi, re ka se kgone go mo thabiša ka mehla, ka gobane ga se ra phethagala. Gantši re ikwa go swana le moapostola Paulo, yo a itšego: “Ke kganyoga go dira se sebotse eupša ga ke kgone.”​—Baroma 7:18; Jakobo 3:2.

5. Ke diphetogo dife tšeo re di dirilego pele re kolobetšwa, eupša ke mafokodi afe ao re ka swanelwago ke go tšwela pele re a lwantšha?

⁵ Pele re eba ditho tša phuthego, re ile ra swanelwa ke go tlogela go dira dilo tšeo Jehofa a di hloilego. (1 Bakorinthe 6:9, 10) Eupša ga se gore ga bjale re phethagetše. (Bakolose 3:9, 10) Ka gona re tšwela pele re dira diphošo gaešita le ge re na le nywaga e mentši re kolobeditšwe. Nako le nako, re ka ba le dikganyogo tše mpe le maikwelo a fošagetšego, goba ra thatafalelwa ke go laola bofokodi bjo itšego bjo re nago le bjona. Ge e le gabotse, re ka swanelwa ke go lwa le bofokodi bjoo ka nywaga e mentši.

6, 7. (a) Ke’ng se se dirago gore re kgone go ba bagwera ba Jehofa le ge re sa phethagala? (b) Ke ka baka la’ng re sa swanela go dikadika go kgopela Jehofa gore a re lebalele?

⁶ Gaešita le ge re sa phethagala, re sa dutše re ka ba bagwera ba Jehofa le go mo hlankela. Dula o gopola seo se dirilego gore o be mogwera wa Jehofa. Ke Yena a bonego dika tše dibotse go wena gomme a nyaka gore o mo tsebe. (Johane 6:44) Le gona o be a tseba gore ga se wa phethagala, gore o na le mafokodi le gore o sa tlo dira diphošo. Lega go le bjalo, Jehofa o ile a go goga gore o be mogwera wa gagwe.

⁷ Jehofa o re ratile kudu moo a ilego a ba a re nea mpho e kgolo kudu. O ile a romela Morwa wa gagwe e lego Jesu mo lefaseng gore a tle a re hwele le go re lopolla dibeng. (Johane 3:16) Ge re dira sebe, re ka kgopela Jehofa gore a re lebalele. Le gona ka baka la topollo, re ka kgodišega gore o tla re lebalela dibe tša rena gomme ra dula re le bagwera ba gagwe. (Baroma 7:24, 25; 1 Johane 2:1, 2) Gopola gore Jesu o hwetše badiradibe bao ba itsholago. Ka gona le ge re nagana gore seo re se  dirilego ke se sebe kudu, ga se ra swanela go kgaotša go rapela Jehofa gore a re lebalele. Ge re ka se mo kgopele gore a re lebalele, re tla swana le motho yo a ganago go hlapa diatla tša gagwe tše di šilafetšego. Re leboga kudu gore Jehofa o dirile gore re kgone go ba bagwera ba gagwe gaešita le ge re sa phethagala!​—Bala 1 Timotheo 1:15.

8. Ke ka baka la’ng re sa swanela go iphoufaletša mafokodi a rena?

⁸ Ke therešo gore re ka se no hlokomologa mafokodi a rena goba ra itirela sehlare sa ntšhirela ka ona. Jehofa o re boditše seo re swanetšego go se dira gore re be bagwera ba gagwe. (Psalme 15:1-5) Ka gona ge e ba re nyaka go ba bagwera ba gagwe, re swanetše go tšwela pele re leka go ekiša yena le Morwa wa gagwe. Le gona re swanetše go leka go laola dikganyogo tša rena tše mpe, e bile tše dingwe tša tšona re ka kgona go di tlogela. Go sa šetšwe gore re na le nako e kaakaang re kolobeditšwe, re swanetše go tšwela pele re kaonefatša semelo sa rena.​—2 Bakorinthe 13:11.

9. Re tseba bjang gore go apara semelo se sefsa ke mogato o tšwelago pele?

⁹ Moapostola Paulo o boditše Bakriste gore: “Lahlang semelo sa kgale seo se dumelelanago le tsela ya lena ya pele ya boitshwaro le seo se senywago go ya ka dikganyogo tša sona tše di forago. Le dule le mpshafatšwa matleng a lena a tutuetšago monagano, le apare semelo se sefsa seo se bopilwego go ya ka thato ya Modimo tokong ya therešo le potegong.” (Baefeso 4:22-24) Se se ra gore re swanetše go tšwela pele re dira maiteko a go fetoga gomme re “apare semelo se sefsa.” Ka gona go sa šetšwe gore re na le nako e kaakaang re hlankela Jehofa, re ka se fetše go ithuta ka dika tša gagwe. Le gona Beibele e ka re thuša go tšwela pele re fetoša semelo sa rena gore re swane le yena kutšwanyana.

10. Re swanetše go dira’ng ge e ba re nyaka gore Beibele e re thuše go tšwela pele re dira diphetogo, gona ke dipotšišo dife tšeo re ka ipotšišago tšona?

¹⁰ Ka moka ga rena re nyaka go latela seo Beibele e se bolelago. Eupša re swanetše go šoma ka thata ge e ba re nyaka go tšwela pele re dira diphetogo. Ke ka baka la’ng go nyakega maiteko? Ke ka baka la’ng Jehofa a sa fo re nolofaletša go dira se se lokilego?

11-13. Ke ka baka la’ng Jehofa a letetše gore re dire maiteko a go fenya mafokodi a rena?

¹¹ Ge re nagana ka legohle le dilo ka moka tšeo di lego go lona, re a kgodišega gore Jehofa o na le matla a go dira selo se sengwe le se sengwe. Ka mohlala, o bopile letšatši, leo le nago le matla a sa lekanywego le selo. Motsotswaneng o mongwe le o mongwe, letšatši le tšweletša seetša se segolo kudu le phišo, eupša gore go be le bophelo mo lefaseng, go nyakega feela karolwana e nyenyane kudu ya phišo ya lona. (Psalme 74:16; Jesaya 40:26) Le gona Jehofa o nea bahlanka ba gagwe ba mo lefaseng  matla ge ba a hloka. (Jesaya 40:29) Ka gona go molaleng gore ge nkabe Jehofa a be a nyaka o be a ka re nolofaletša go lwa le mafokodi a rena le go se sa ba le dikganyogo tše mpe. Bjale ke ka baka la’ng a sa dire bjalo?

¹² Jehofa o re neile tokologo ya go itirela diphetho. O re dumeletše go kgetha go mo kwa goba go se mo kwe. Ge re kgetha go mo kwa gomme re šoma ka thata go dira thato ya gagwe, re bontšha gore re a mo rata le gore re nyaka go mo thabiša. Sathane o re Jehofa ga se a swanela go buša batho. Eupša ge re ekwa Jehofa, re bontšha gore re nyaka e eba Mmuši wa rena. Le gona re ka kgodišega gore Tatago rena yo yo lerato o thaba kudu ge re katanela go mo kwa. (Jobo 2:3-5; Diema 27:11) Ge re šoma ka thata go laola mafokodi a rena gaešita le ge go se bonolo, re bontšha gore re botegela Jehofa le gore re nyaka e eba Mmuši wa rena.

¹³ Jehofa o re re swanetše go šoma ka thata go ekiša dika tša gagwe. (Bakolose 3:12; bala 2 Petro 1:5-7.) E bile o letetše gore re šome ka thata go laola dikgopolo tša rena le maikwelo a rena. (Baroma 8:5; 12:9) Ka mehla ge re šoma ka thata go lahla mokgwa o itšego gomme re atlega, re ikwa re thabile kudu.

14, 15. Re ka dira’ng gore re be le dika tšeo Jehofa a di ratago? (Bona lepokisi le le rego, “ Beibele le Thapelo di Fetošitše Maphelo a Bona.”)

¹⁴ Re swanetše go dira’ng gore re be le dika tšeo Jehofa a di ratago? Go e na le go ikgethela moo re nyakago go dira diphetogo, re swanetše go dumelela Modimo a re hlahla. Baroma 12:2 e re: “Lesang go bopega ka sebopego sa tshepedišo ye ya dilo,  eupša fetogang ka go fetola menagano ya lena, e le gore le itlhatselele thato e botse le e amogelegago le e phethegilego ya Modimo.” Ka gona e le gore re tsebe seo Jehofa a se nyakago go rena, re swanetše go diriša dilo tšeo a re neilego tšona go re thuša. Re swanetše go bala Beibele letšatši le letšatši, re naganišiše ka seo re se balago, gomme re rapele Jehofa gore a re nee moya wa gagwe o mokgethwa. (Luka 11:13; Bagalatia 5:22, 23) Ge re ka dira bjalo, Jehofa o tla re thuša go tseba dilo tšeo di mo thabišago, e bile re tla nagana go swana le yena. Ke moka dilo tšeo re di naganago, re di bolelago le go di dira di tla thabiša Jehofa kudu, e bile re tla ithuta go laola mafokodi a rena. Eupša le ge re ka dira bjalo, re sa dutše re tla swanelwa ke go lwantšha mafokodi ao.​—Diema 4:23.

¹⁵ Go tlaleletša tabeng ya go bala Beibele letšatši le letšatši, re swanetše go ithuta yona re diriša dikgatišo tša rena, tše bjalo ka Morokami le Phafoga! Dihlogo tše dintši ka dimakasineng tše di re ruta kamoo re ka ekišago dika tša Jehofa le kamoo re ka lwantšhago mafokodi a rena. Re ka hwetša dihlogo goba mangwalo ao a re thušago ka go lebanya. Re ka kgoboketša mangwalo ao le dihlogo e le gore re tle re di bale leboelela.

16. Ke ka baka la’ng re sa swanela go nyama ge re sa dire diphetogo ka lebelo?

¹⁶ Go tšea nako gore re ithute go ekiša dika tša Jehofa. Ka gona ge e ba o nagana  gore ga se wa hlwa o dira diphetogo tša go bonala, o se ke wa fela pelo. Mathomong, o ka swanelwa ke go ikgapeletša go dira seo Beibele e se bolelago. Eupša ge o dutše o nagana le go itshwara ka tsela yeo e thabišago Jehofa, o tla hwetša go le bonolo go nagana go swana le yena le go dira dilo tše di lokilego.​—Psalme 37:31; Diema 23:12; Bagalatia 5:16, 17.

17. Ge e ba re botegela Jehofa, re ka lebelela pele go tlo hwetša bokamoso bofe bjo bo kgahlišago?

¹⁷ Re lebeletše pele nakong yeo re tla bego re phethagetše gomme re hlankela Jehofa ka mo go sa felego. Ka nako yeo, re ka se sa lwa le mafokodi le ge e le afe, le gona go tla ba bonolo kudu gore re ekiše Jehofa. Eupša gaešita le gona bjale re kgona go hlankela Jehofa ka gobane o re neile mpho ya topollo. Gaešita le ge re sa phethagala, re ka mo thabiša ge e ba re tšwela pele re šoma ka thata go dira diphetogo e bile re latela seo a re rutago sona ka Beibeleng.

18, 19. Ke’ng seo se ka re kgodišago gore Beibele e na le matla a go tšwela pele e fetoša maphelo a rena?

¹⁸ Kevin o ile a dira sohle se a ka se kgonago go ithuta go laola kgalefo ya gagwe. O ile a naganišiša ka seo a bego a se bala ka Beibeleng gomme a leka ka matla go dira diphethogo bophelong bja gagwe. Le gona o ile a diriša keletšo yeo Bakristegotee le yena ba bego ba mo nea yona. Gaešita le ge go tšere Kevin nywaga e mentšinyana gore a dire diphetogo tše, mafelelong o ile a hlankela e le mohlanka wa bodiredi. E bile nywageng e 20 e fetilego, o be a dutše a hlankela e le mogolo. Eupša gaešita le gona bjale, o a tseba gore o swanetše go tšwela pele a lwantšha mafokodi a gagwe.

¹⁹ Go swana le Kevin, re ka tšwela pele re kaonefatša semelo sa rena. Ge re ka dira bjalo, re tla tšwela pele re batamela kgauswiuswi le Jehofa. (Psalme 25:14) Le gona ge re ka leka ka matla go dira diphetogo e le gore re mo kgahliše, o tla re thuša go atlega. Re ka kgodišega gore ka thušo ya Beibele, re ka tšwela pele re dira diphetogo maphelong a rena.​—Psalme 34:8.