1-3. a) Bautizarishca jipapash ¿ima cosascunapita cambiashpa catinara capanchi? b) Huaquin cosascunapi cambianara cashcamandaca ¿imatata tapurinchiman? (Callari fotocunata ricupangui).

KEVINGA nara testigo de Jehová cashpami ashtaca huatacunata culquimanda pugllashpa, tabacota chupashpa, machashpa, drogacunata ufiashpa causarca ^[1] (cai tema tucuripi notata ricupangui). Shinapash Jehová Diosmanda yachajushpami Diospa amigo cangapaj munarca. Chaimandami nara bautizarishpallata paipa causaipi ashtacata cambiana carca. Paica Jehovapa ayudahuan, Bibliapa ushaihuanmi cambiai usharca (Hebreos 4:12).

² Bautizarishca jipapash, Jesusta ali catingapaj munaimandami Kevinga cambiashpa catinara carca (Efesios 4:31, 32). ¿Imapita cambianara carca? Paica ñapashmi culiranlla carca. Ñapash culiranata saquinaca shinllimi carca. Paica ninmi, bautizaringapaj munashpa nali cosascunata saquinaca na yapa shinlli carcachu. Shinapash, ñapash culiranata saquinaca shinlli shinllimi carca nishpa. Chaimandami Kevinga, Jehovata ayudahuai nishpa Bibliataca ashtahuan aliguta yachajui callarirca. Shina rurashpami Kevinga cambiai usharca.

³ Ashtacacunaca nara bautizarishpallatami tauca cambiocunata  rurashpa Bibliapi nishcacunata pactachircanchi. Shinapash bautizarishca jipaca Jehovapa, Jesuspa ejemplota ali catingapaj munashpapash huaquin cosascunapi cambiashpa catinara cashcatami cuenta japishcanchi (Efesios 5:1, 2; 1 Pedro 2:21). Huaquin ejemplocunata ricupashun. Huaquinbica yapata quejarijunata, shujcunamanda parlashpa purina costumbretami charinchi. Cutin huaquinbica shujcuna imata pensanata, imata ninata manllaimandami alitaca na ruranchi. Huaquinbicarin mejorangapaj munashpa ashtaca huatacunata esforzarishpapash pandarishpa catinchirami. Shina cashcamandachari tapurinchi: “¿Imamandata cambiaitaca na ushani? Bibliapi nishca shina cambiashpa mejorangapaca ¿imatata rurana cani?” nishpa.

4. ¿Imamandata Jehovata tucuipi cushichitaca na ushapanchi?

⁴ Jehovata sirvijcunaca Jehovata juyashpami tucui shunguhuan paita tucuipi cushichingapaj munanchi. Shinapash juchayucuna nacirishca caimandaca na ushanchichu. Ñucanchicunaca cutin cutinmi apóstol Pabloshna sintirishcanchi. Paica alita rurangapaj munashpapash huaquinbica na ushanllu carca (Romanos 7:18; Santiago 3:2).

5. a) Bautizaringapaca ¿ima ruraicunatata saquina carcanchi? b) Ashtaca huatacunata bautizarishca cashpapash juchayu nacirishcamandaca ¿imata tucunchi?

⁵ Bautizarishpa testigo de Jehová tucungapaca Jehová Dios millanayachishca ruraicunatami saquina carcanchi (1 Corintios 6:9, 10). Shinapash juchayucuna nacirishca caimandaca, mashna huatacunata bautizarishca cashpapash pandarishpa catinchirami (Colosenses 3:9, 10). Chaimandami, ñana imapipash pandarishachu, punda rurashcacunamanga ñana tigrashachu, nalita rurana munaicunataca ñana charishachu nishpa yuyaitaca na ushanchi. Huaquinbicarin nalita rurana munaicunata mishangapaca ashtaca huatacunatachari esforzarinajunchi.

6, 7. a) ¿Imamandata juchayucuna cashpapash Jehovapa ali amigocuna caita ushapanchi? b) ¿Imamandata Jehová Diosta perdonahuai nishpa mañanataca na saquina capanchi?

⁶ Juchayu nacirishca cashpapash Jehovaman quimirishpa paita sirvita ushanchimi. Caipi pensaripai, Jehová Diosca ñucanchi shungupi imapash alita ricushpa, paita rijsichun munashcamandami ñucanchicunaca paiman quimirita ushashcanchi (Juan 6:44). Ñucanchicuna juchayu cashcamanda imapipash pandarinataca alimi Jehová Diosca yacharca. Shinapash Jehová Diosca paipa amigo tucuchunmi munarca.

⁷ Jehová Diosca ñucanchita ashtacata juyaimandami, paipa Churi Jesustaca ñucanchipa juchacunamanda huañuchun cachamurca (Juan 3:16). Chaimandami imapipash pandarishpaca perdonahuai nishpa Jehovataca mañana canchi. Jehová Diosca Jesús paipa causaita cushcamandami ñucanchitaca perdonashpa paipa ali amigocuna cashpa catichun saquin (Romanos 7:24, 25; 1 Juan 2:1, 2). Jesusca juchacunamanda arripintirij gentecunamandami huañurca. Chaimandami, imapipash pandarishcamanda nali sintirijushpaca perdonahuai nishpa Jehová Diostaca mañana canchi. Perdonahuai nishpa Jehovata na mañashpaca ñucanchi mapa maquita yacu tiajpita na maillangapaj munajuj shinami canchiman. Shinaca ¿nachu juchayucuna cajpipash Jehová Dios paiman quimirichun saquishcamandaca ashtacata agradicinchi? (1 Timoteo 1:15, liingui).

8. ¿Imamandata cambiashpa catingapaj esforzarina capanchi?

⁸ Juchayu nacirishcamandami pandarini nishpallaca na saquirinachu canchi. Jehová Diosca paipa ali amigocuna imata ruranataca villajunmi (Salmo 15:1-5). Chaimandami paipa ali amigocuna cangapaj munashpaca paipa ejemplota, Jesuspa ejemplota catingapaj esforzarina canchi. Shinallata, nali munaicunamanda jarcaringapaj, huaquin nali munaicunata cungangapapash esforzarinami canchi. Mashna huatacunata bautizarishca  cashpapash ashtahuan mejorangapami esforzarina canchi (2 Corintios 13:11).

9. ¿Imashinata yachanchi, mushuj causaita charingapaca esforzarishpa catina cashcata?

⁹ Apóstol Pabloca nircami: ‘Punda mauca causaitaca shitashpami saquina canguichi. Chai nalita rurana munaicunami pandachishpa, chai nalitalla rurachishpa charijurca. Cangunapa yuyaipica, mushujtalla yarishpami causana canguichi. Mushuj causaitaca mushujta churajunshna causaichi. Taita Dios munashcashna [alita] rurashpa, paipa agllashcashna causaichi’ nishpa (Efesios 4:22-24). Imashinami ricunchi, mushuj causaita charingapaca ashtahuan mejorangapami esforzarishpa catina canchi. Mashna huatacunata Jehovata sirvishpa causajushpapash Jehová Dios imashina cajtaca ashtahuanmi yachajuita ushanchi. Bibliami ñucanchitaca Jehová imashina cajta ashtahuan yachajushpa paishnalla cangapaj esforzarichun ayudaita ushan.

10. a) Biblia ayudashpa catichunga ¿imatata rurana capanchi? b) ¿Ima tapuicunapita pensarina capanchi?

¹⁰ Tucuicunami Bibliapi ima nijujta cazungapaj munanchi. Shinapash mejorashpa catingapaca ashtacatami esforzarina canchi. ¿Imamandata ashtacata esforzarina minishtirin? ¿Imamandata Jehová Diosca ñucanchi nali munaicunata ashtahuan jahualla mishachunga na ayudan? nishpa

11-13. ¿Imamandata Jehová Diosca ñucanchi nali munaicunata mishangapaj ashtacata esforzarichun munan?

¹¹ Jehová Diospa rurashcacunapi pensarishpaca, Jehová Dios imata munashcata rurangapaj ashtaca poderta charishcatami cuenta japinchi. Indipi pensaripashun. Cada segundomi Indimandaca ashtaca ashtaca calor llujshijun. Chai ashtaca calormandaca ashalla calormi cai Alpaman chayamujun. Chai ashalla calor chayamushpallatami cai Alpapi causai tiashpa catichun ayudan (Salmo 74:16; Isaías 40:26).  Jehová Diosca paipa sirvijcuna shaijushca sintirjujpica paicunamanbash ushaita cushpami ayudan (Isaías 40:29). Chaimandachari huaquingunaca yuyan, Jehová Dios ashtaca poderta charishpaca ¿imamandata ñucanchi nali munaicunata ashtahuan jahualla mishachunga na ayudan? nishpa.

¹² Jehová Diosca ñucanchillata imata ruranata, imata na ruranata agllachunmi saquishca. Chaimandami paica, paita cazunata o na cazunataca ñucanchillata agllachun saquin. Paita cazunata agllashpa, pai munashcata rurangapaj esforzarishpaca paita juyashcata, paita cushichingapaj munashcatami ricuchinajunchi. Diabloca ninmi, Taita Diosca mandana derechotaca na charinllu nishpa. Diablo shina nijpipash Jehovata cazushpaca Jehová Dios ñucanchita mandachun munashcatami ricuchinajunchi. Ñucanchicuna chashna esforzarijujta ricushpaca alicachishpami Jehová Diosca ricujun (Job 2:3-5; Proverbios 27:11). Ñucanchi nali munaicunata ashtahuan jahualla mishachun Jehová Dios ayudajpica, esforzarinaca na minishtirinmanllu. Jehovata tucui shunguhuan cazungapaj munashcata, Jehová Dios ñucanchita mandachun munashcata ricuchinapash na minishtirinmanllu.

¹³ Jehová Diosca pai imashina cajta yachajushpa ñucanchipash shinallata cangapaj esforzarichunmi munan (Colosenses 3:12; 2 Pedro 1:5-7, liingui). Paica ñucanchi imata pensashcacunata, ñucanchi imashina sintirishcacunata controlachunmi munan (Romanos 8:5; 12:9). Shinllita esforzarishca jipa cambiashpaca ashtacatami cushijushun.

14, 15. Jehová Dios munashcashna cangapaca ¿imatata rurana capanchi? (“Bibliapash oracionda ruranapash cambiashpa catichunmi ayudan” nishca recuadrota ricupangui).

¹⁴ Jehová Dios munashcashna cangapaca ¿imatata rurana canchi? Ñucanchillata imapi cambiana cashcata ricunapa randica Jehová Dios imapi cambiachun munashcatami ricuna canchi. Romanos 12:2​pica ninmi: ‘Na cai pachapajtalla rurashpa cushijushpa causanachu canguichi. Ashtahuangarin cangunapa yuyaita Dios mushujyachishcamandami, mushujta causana canguichi. Shina causashpami imami Taita Diospa munai cajta, paita cushichinata, ima pandatapash na rurashpa causanata yachanguichi’ nishpa. Ñucanchicuna Jehová Dios munashcashna cangapaca paipa ayudatami chasquina canchi. Paica Bibliahuan, espíritu santohuanmi ayudan. Chaimandami Bibliata cada punlla liina canchi, shinallata imata liishcapi aliguta pensarina canchi. Ashtahuangarin Jehová Diospa espíritu santopa ayudatami mañana canchi (Lucas 11:13; Gálatas 5:22, 23). Shina rurajpimi Jehová Diosca pai imata alicachishcata intindichun ayudanga. Ñucanchipash paishnallami pensaita ushashun. Shinami ñucanchi pensashcacunapash, parlashcacunapash, rurashcacunapash Jehovata cushichinga. Shina cajpipash, ñucanchi nali munaicunata  mishangapaca esforzarishpa catinami canchi (Proverbios 4:23).

¹⁵ Bibliata cada punlla liishca jahuapash Villajun revistapa, ¡Despertad! revistapa ayudahuanmi Bibliataca yachajushpa catina canchi. Chai revistacunapi ashtaca temacunaca Jehová Dios imashina cajta, ñucanchi nali munaicunata imashina mishanatami yachachin. Huaquin temacuna o Bibliapi huaquin textocunaca ñucanchi minishtinajushcapachami can. Chai temacunata huaquinbi huaquinbi cutin liingapaca alichinallami canchi.

16. Na ñapash cambiai ushajushpaca ¿imamandata na desanimarina capanchi?

¹⁶ Jehová Dios imashina cajta yachajushpa paishnalla cangapaca ninanda esforzarinami minishtirin. Chaimandami mejorangapaj munashpapash na mejorai ushashpaca pacienciata minishtinchi. Shinapash na desanimarinachu canchi. Callaripica, Biblia ima nijta cazungapami ñucanchillata obligarina canchi. Jehová imata pensashcata pensangapaj, imata munashcata rurangapaj esforzarishpaca jipamanga ashtahuan jahuallami Jehová munashcashna pensashpa alita rurashun (Salmo 37:31; Proverbios 23:12; Gálatas 5:16, 17).

17. Jehovata ali sirvishpa catishpaca ¿imashinata shamuj punllacunapica causashun?

¹⁷ Ñucanchicunaca jucha illaj tucushpa Jehovata para siempre sirvingapami munanchi. Chai tiempocunapica Jehová imashina cajta yachajushpa paishnalla cangapaca ñana cunanbishna ashtacata esforzarinajushunllu. Shinapash Jesús paipa causaita cushcamandaca cunanbillatami juchayu nacirishca cashpapash Jehovata ali adorai ushanchi. Bibliapi mandashcacunatapash cazungapaj, ashtahuan mejorangapapash esforzarishpa catijpica Jehová Diosca alicachingami.

18, 19. ¿Imashinata yachanchi, Bibliaca ñucanchi causaipi cambiashpa catichun ayudai ushashcata?

¹⁸ Callari parrafocunapica Kevin shuti huauquimandami parlarcanchi. Paica ñapash culiranllami carca. Shinapash Bibliata liishpa, liishcapi aliguta pensarishpami cambiangapaj esforzarirca. Ashtahuangarin, shuj huauquicunapa consejotapashmi uyarca. Cambiangapaj ashtaca huatacunata esforzarishpami tiempohuanga siervo ministerial tucurca. Cai último 20 huatacunapicarin congregacionbi ancianomi cashca. Shinapash paica ninmi, mejorashpa catingapaca esforzarishpa catinarami cani nishpa.

¹⁹ Kevin huauquishnallatami cambiangapaca esforzarishpa catina canchi. Esforzarishpaca Jehovapamanmi ashtahuan quimirishpa catishun (Salmo 25:14). Shinaca, Jehová munashcashna cambiangapaj esforzaripashunchi. Shina esforzarijpica Jehovapash ayudangami. Shinami ñucanchillata ricushun, ñucanchi causaipi cambiashpa catichunga Biblia ayudai ushashcata (Salmo 34:8).