1-3. (a) Ino nkucinca nzi ikukonzya kutukatazya kucita twamana kubbapatizyigwa? (b) Ikuti notuyaabuyaambele catuyumina kwiinda mbotwali kuyeeyela, ino mibuzyo nzi njotukonzya kubuzya? (Amubone zifwanikiso izili kumatalikilo aacibalo.)

KWAMYAKA minji, ba Kevin bakajisi cilengwa cakubbeja, kufweba, kunywa kapati alimwi akubelesya misamu iikola. ^[1] (Amubone bupanduluzi buyungizyidwe.) Mpoonya bakaiya kujatikizya Jehova alimwi bakali kuyanda kuba mulongwe wakwe. Pele kutegwa bacite oobo, bakeelede kucinca kapati mubuumi bwabo. Bakacikonzya kucinca kwiinda mukugwasyigwa a Jehova alimwi anguzu zya Jwi lyakwe, Ibbaibbele.—Bahebrayo 4:12.

² Nobakabbapatizyigwa ba Kevin, bakeelede kuzumanana kucinca bukkale bwabo kutegwa babe Munakristo uuli kabotu. (Baefeso 4:31, 32) Mucikozyanyo, bakali kufwambaana kunyema. Bakagambwa kapati nobakabona mbocikatazya kwiiya kulijata. Mane buya ba Kevin bakaamba kuti kwiiya kulijata  kutegwa batanyemi cakali ciyumu kwiinda mbocakabede kuleka zintu zibyaabi nzyobakali kucita kabatanabbapatizyigwa! Pele bakacikonzya kucinca kwiinda mukukombelezya Jehova kuti abagwasye alimwi akwiinda mukwiiya Bbaibbele cakulomya.

³ Katutanabbapatizyigwa, bunji bwesu twakacinca kapati mubuumi bwesu kutegwa tucikonzye kupona kweelana ambolyaamba Bbaibbele. Pele noliba lino, tulizyi kuti kuli kucinca mumbazu zimwi nkotweelede kucita kutegwa tube mbubwenya mbuli Leza alimwi a Kristo. (Baefeso 5:1, 2; 1 Petro 2:21) Mucikozyanyo, tulakonzya kuba acilengwa cakutongooka kapati naa cilengwa cakuvwiya bamwi alimwi akwaamba zintu zibyaabi kujatikizya bamwi. Ambweni zimwi ziindi tulakonzya kuyoowa kapati kujatikizya zintu nzyobakonzya kutuyeeyela bamwi naa kwaamba cakuti tulaalilwa kucita ciluzi. Andiza twali kusoleka kucinca kwamyaka minji pele tucizumanana kulubizya mbuli lyoonse. Aboobo tulakonzya kulibuzya kuti: ‘Nkaambo nzi ncocindikatazya kapati kucinca muzintu zisyoonto zili boobu? Ncinzi ncondikonzya kucita icikonzya kundigwasya kutobela ncolyaamba Bbaibbele kutegwa ndizumanane kubambulula bube bwangu?’

4. Nkaambo nzi ncotutakonzyi kumukkomanisya Jehova muzintu zyoonse nzyotucita?

⁴ Tulamuyanda Jehova, alimwi camoyo woonse tulombozya kumukkomanisya. Pele cuusisya ncakuti, tatukonzyi kumukkomanisya lyoonse akaambo kakuti tatulondokede. Kanji-kanji tulimvwa mbuli mwaapostolo Paulo iwakaamba kuti: “Walo moyo ulayanda kucita cibotu, pele tandijisi nguzu zyakucicita.”—Baroma 7:18; Jakobo 3:2.

5. Ino nkucinca nzi nkotwakacita katutanabbapatizyigwa, pele ino nkulezya kuli buti nkotucilwana ankuko noliba lino?

⁵ Katutanaba cibeela cambungano, twakacileka kucita zintu Jehova nzyasulide. (1 Bakorinto 6:9, 10) Pele tucili bantu batalondokede. (Bakolose 3:9, 10) Aboobo tulazumanana kulubizya nokuba kuti twakabbapatizyigwa kaindi. Ciindi aciindi, tulakonzya kulimvwa alimwi akulombozya zintu zibyaabi, naa cilakonzya kutuyumina kuleka kampenda kamwi mubukkale bwesu. Mane buya tulakonzya kulwana akampenda nkamunya aako kwamyaka minji.

6, 7. (a) Ino ncinzi cipa kuti cikonzyeke kulindiswe kuba balongwe ba Jehova nokuba kuti tatulondokede? (b) Nkaambo nzi ncotuteelede kuwayawaya kulomba kulekelelwa kuli Jehova?

⁶ Nokuba kuti tatulondokede, tulakonzya kuzumanana kuba acilongwe a Jehova alimwi akumubelekela. Kamuyeeya lyoonse cilongwe canu a Jehova mbocakatalika. Leza ngonguwe iwakabona bubotu mulindinywe alimwi wakali kuyanda kuti mumuzyibe. (Johane 6:44) Alimwi wakalizyi kuti mulalezya alimwi mulijisi tumpenda akuti mwakali kuyoozumanana kulubizya. Nokuba boobo, Jehova wakacili kuyanda kuti mube balongwe bakwe.

⁷ Jehova wakatuyanda kapati cakuti wakatupa cipego ciyandisi. Wakatuma Mwanaakwe Jesu anyika kutegwa ape buumi bwakwe kacili cinunuzyo cazibi zyesu. (Johane 3:16) Ikuti twalubizya, tulakonzya kumulomba Jehova kuti atulekelele. Alimwi akaambo kacinunuzyo, tulakonzya kuba masimpe kuti uyootulekelela akuti tuyoozumanana kuba balongwe bakwe. (Baroma 7:24, 25; 1 Johane 2:1, 2) Mutalubi kuti, Jesu wakafwida basizibi ibeempwa. Aboobo nokuba kuti tulimvwa kuti ncotwakacita ncibi kapati, tatweelede  kuleka kupaila kuli Jehova kulomba kulekelelwa. Ikuti katutamulombi kuti atulekelele, cilakonzya kuba mbuli kukaka kusamba kumaanza ciindi notuli adooti. Eelo kaka tulalumba kapati kuti Jehova wapa kuti cikonzyeke kulindiswe kuti tube balongwe bakwe nokuba kuti tatulondokede!—Amubale 1 Timoteyo 1:15.

8. Nkaambo nzi ncotuteelede kukulanga buyo kulezya kwesu?

⁸ Nokuba boobo, tatweelede kukulanga buyo kulezya kwesu naa kuzumanana kupa twaambo twakulitamizya kujatikizya nkuko. Jehova watwaambila bantu mbayanda kuti babe balongwe bakwe. (Intembauzyo 15:1-5) Aboobo ikuti naa katuyanda kuba acilongwe anguwe, tweelede kuzumanana kusolekesya kumwiiya alimwi akwiiya Mwanaakwe. Kunze lyaboobo, tweelede kusolekesya kuleka kulombozya kucita zintu zibi, alimwi buya tulakonzya kuzileka zintu zimwi zibi nzyotwali kucita. Tacikwe makani naa kwainda ciindi cilamfwu buti kuzwa notwakabbila, tweelede kuzumanana kubotya bube bwesu.—2 Bakorinto 13:11.

9. Ino tuzyi buti kuti tulakonzya kuzumanana kusama buntu bupya?

⁹ Mwaapostolo Paulo wakaambila Banakristo kuti: “Mwakayiisyigwa kuti mweelede kusamununa buntu bwanu bwakaindi oobo bweendelana abukkale bwanu bwakaindi, bwalo busofwaazyigwa azisusi zyambubo zyalweeno. Alimwi mweelede kuzumanana kubukulusya mizeezo iimweendelezya lyoonse, akusama buntu bupya ibwakalengwa kweelana akuyanda kwa Leza mubululami bwini-bwini alimwi amukusyomeka.” (Baefeso 4:22-24) Eeci caamba kuti tweelede kuzumanana kusolekesya kucinca alimwi “akusama buntu bupya.” Aboobo kufwumbwa naa twali kumubelekela Jehova kwaciindi cilamfwu buti, lyoonse tulakonzya kwiiya zinji kujatikizya bube bwakwe. Alimwi Bbaibbele lilakonzya kutugwasya kuzumanana kubucinca bube bwesu kutegwa tube mbuli nguwe.

10. Ino tweelede kucita nzi kutegwa tuzumanane kucinca kwiinda mukugwasyigwa a Bbaibbele, alimwi mibuzyo nzi njotukonzya kubuzya?

¹⁰ Toonse tulayanda kutobela ncolyaamba Bbaibbele. Pele tweelede kubeleka canguzu ikuti naa katuyanda kuzumanana kucinca. Nkaambo nzi ncotweelede kusolekesya kucita boobo? Sena Jehova takonzyi kupa buyo kuti cituubaubile kucita ciluleme?

11-13. Nkaambo nzi Jehova ncayanda kuti tubeleke canguzu kulwana kulezya kwesu?

¹¹ Twayeeya bubumbo alimwi azintu zyoonse zili mumo, tacidoonekwi kuti Jehova ulijisi nguzu zyakucita cintu cili coonse. Mucikozyanyo, wakalenga zuba, ilijisi nguzu zitaambiki. Mukavwalu-vwalu kali koonse, izuba ligusya mumuni munji alimwi akupya. Nokuba boobo, mweelwe musyoonto buyo wanguzu eezyi nguuyandika kuti kube buumi anyika. (Intembauzyo 74:16; Isaya 40:26) Alimwi Jehova ulabapa nguzu babelesi bakwe anyika ciindi nobayandika nguzu zili boobo.  (Isaya 40:29) Cakutadooneka, ikuti Jehova naakali kuyanda, naakapa kuti cituubaubile kulwana kulezya kwesu alimwi akutaba akulombozya kubyaabi. Aboobo ino nkaambo nzi ncatacitili boobo?

¹² Jehova wakatupa nguzu zyakulisalila. Ulatupa coolwe cakulisalila kumumvwida naa pe. Ciindi notusala kumumvwida alimwi akubeleka canguzu kucita kuyanda kwakwe, tutondezya kuti tulamuyanda alimwi tuyanda kumukkomanisya. Saatani wakaamba kuti Jehova tajisi nguzu zyakweendelezya pe. Pele ciindi notumumvwida Jehova, tutondezya kuti tuyanda kuti abe ngo Mweendelezi wesu. Alimwi tulakonzya kuba masimpe kuti Taateesu siluyando ulakukkomanina kusolekesya kuli koonse nkotucita kutegwa tumumvwide. (Jobu 2:3-5; Tusimpi 27:11) Ciindi notubeleka canguzu kutegwa tulwane kulezya kwesu nokuba kuti tacili cuubauba kucita boobo, tutondezya kuti tulasyomeka kuli Jehova akuti tuyanda kuti abe ngo Mweendelezi wesu.

¹³ Jehova utwaambila kuti tweelede kubeleka canguzu kutegwa twiiye bube bwakwe. (Bakolose 3:12; amubale 2 Petro 1:5-7.) Alimwi uyanda kuti tubeleke canguzu kutegwa tulyeendelezye muzintu nzyotuyeeya alimwi ambotulimvwa. (Baroma 8:5; 12:9) Ikuti twabeleka canguzu kutegwa tucince mpoonya twazwidilila kucita boobo, tulakkomana kapati.

14, 15. Ino inga twacita buti kutegwa tube abube mbwakkomanina Jehova? (Amubone kabbokesi kakuti “ Bbaibbele Alimwi Amupailo Zyakacinca Buumi Bwabo.”)

¹⁴ Ino tweelede kucita nzi kutegwa tube  abube mbwayanda Jehova? Muciindi cakulisalila tobeni mbotweelede kucinca, tweelede kulekela Leza kuti atusololele nguwe. Lugwalo lwa Baroma 12:2 lwaamba kuti: “Amuleke kutobela ziyanza zyabweende bwazintu obuno, pele amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.” Aboobo kutegwa tuzyibe ncayanda Jehova, tweelede kusyoma lugwasyo ndwatupa. Tweelede kulibala Bbaibbele abuzuba, kuzinzibala kuyeeya nzyotubala, alimwi akupaila kuli Jehova kutegwa atupe muuya wakwe uusalala. (Luka 11:13; Bagalatiya 5:22, 23) Ikuti twacita oobo, Jehova ulakonzya kutugwasya kuzyiba zintu zimukkomanisya, alimwi tulakonzya kwiiya kuyeeya mbwayeeya. Ikucita boobo kuyoopa kuti nzyotuyeeya, nzyotwaamba alimwi anzyotucita kazimukkomanisya kapati Jehova alimwi tuyakwiiya mbotukonzya kuzunda kulezya kwesu. Nokuba boobo, tuyooyandika kuzumanana kuzilwana zintu eezyo.—Tusimpi 4:23.

¹⁵ Kunze lyakubala Bbaibbele buzuba abuzuba, tweelede kuliiya kubelesya mabbuku eesu, mbuli Ngazi Yamulindizi alimwi a Sinsimuka! Zibalo zinji izili mumamagazini aaya zituyiisya mbotukonzya kwiiya bube bwa Jehova alimwi ambotukonzya kukuzunda kulezya kwesu. Tulakonzya kujana zibalo zimwi naa magwalo aakonzya kutugwasya kapati. Tulakonzya kwaayobola magwalo aaya alimwi azibalo kutegwa katuzibala ciindi aciindi.

16. Nkaambo nzi ncotuteelede kutyompwa ikuti naa kacitukatazya kucinca cakufwambaana?

 ¹⁶ Citola ciindi cilamfwu kuti muntu aiye kutondezya bube bwa Jehova. Aboobo ikuti naa mulimvwa kuti tamunacinca kapati kweelana ambomuyanda, amukkazike moyo. Kumatalikilo, inga mwayandika kulisinikizya buya kucita ncolyaamba Bbaibbele. Pele mbomuyaabuzumanana kuyeeya akulilemeka munzila Jehova njayanda, ciyakumuubaubila kuyeeya mbuli mbwayeeya walo alimwi akucita ciluleme.—Intembauzyo 37:31; Tusimpi 23:12; Bagalatiya 5:16, 17.

17. Ikuti naa katusyomeka kuli Jehova, ino mbuumi nzi butaliboteli mbotukonzya kulangila?

¹⁷ Tulangila kumbele ciindi notuyoolondoka akubelekela Jehova kukabe kutamani. Kuciindi eeco, kunyina notuyakulwana akulezya kwesu kuli koonse, alimwi ciyakutuubila kumwiiya Jehova. Pele noliba lino tulacikonzya kumukomba Jehova akaambo kakuti wakatupa cipego cacinunuzyo. Nokuba kuti tatulondokede, tulakonzya kumukkomanisya ikuti naa twazumanana kubeleka canguzu alimwi akutobela ncatuyiisya mu Bbaibbele.

18, 19. Mbuti mbotukonzya kuba masimpe kuti Bbaibbele lilijisi nguzu zyakuzumanana kubucinca buumi bwesu?

¹⁸ Ba Kevin bakabeleka canguzu kwiiya kulijata ciindi nobanyema. Bakazinzibala kuyeeya zintu nzyobakabala mu Bbaibbele akusolekesya kucinca mubuumi bwabo. Alimwi bakalutambula lugwasyo ndobakapegwa a Banakristonyina. Nokuba kuti ba Kevin cakabatolela myaka iili mbwiibede kutegwa bacince, mukuya kwaciindi bakacikonzya kubeleka kabali bakutausi. Kwamyaka iili 20 yainda, bali kubeleka kabali baalu. Pele noliba lino, balizyi kuti beelede kuzumanana kulwana kulezya kwabo.

¹⁹ Mbubwenya mbuli ba Kevin, andiswe tulakonzya kuzumanana kucinca bube bwesu. Ikuti naa twacita oobo, tuyoozumanana kuswena afwaafwi a Jehova. (Intembauzyo 25:14) Ikuti twabeleka kusikila mpotugolela kucinca kutegwa tumukkomanisye Leza, uyootugwasya kuzwidilila. Tuli masimpe kuti kwiinda mukugwasyigwa a Bbaibbele, inga twazumanana kucinca mubuumi bwesu.—Intembauzyo 34:8.