1, 2. (a) Wafawar sararḇer Yesus ḇyedi kuker ḇena yaf anggur oso. (b) Rariso sararḇer ani fyasnabos rari ḇefrur pyum ma ḇaḇenaḇye ya rai?

RO ARWO prim ya, ḇena yaf anggur oso rya ḇe pasar fa syewar ḇefararur sya. Ikofen na ḇyuk ḇaḇyak ḇesi, ma snon ḇeḇeso simarisen sifararur ro yaf ḇyeja. Ḇape ḇefararur sya sibor ḇa kaker, inja rya ḇe pasar ro swaf ḇeḇeso fa syewar wer ḇefararur sya. Ḇyeasas nari ḇyak sikam kuker ḇaḇyak ḇemnis kaku. Ro papupes ras ya, iryur ḇefararur sya fa ḇyak si. Ḇefararur sya sifararur ro ras ya ḇesiper ḇaido oras rioser monda, ḇyak si kuker ḇaḇyak ḇemnis kam. Imbape, snon ḇefararur ro ras ya ḇesiper sisurem. Ḇena yaf ya ikofen, ’Mkokarem kwar ḇae kuker ḇaḇyak na yaḇuk ḇe mko? Yana hak ḇake fa yaḇak ḇefararur syakam kuker ḇaḇyak yamarisen na? Mkomarisen ḇa ke snaro yafrur pyum si?’​—Mat. 20:1-15.

² Ro farfyar Yesus ḇyedine, fyarkor ko roi oso ḇefandun kaku kuker ”Allah ḇaḇenaḇye ḇyedi”. ^[1] (Mam fasfas ḇepupes.) (Wasya 2 Korintus 6:1.) Rariso? Ono sisya skara snar snon ḇefararur ro ras ḇesiper ansine fandun fa sna ḇaḇyak syadi buro snon ḇese sya. Ḇape ḇena yaf ya fyasna ḇaḇenaḇye ḇyedi faro ḇefararur ro oras riḇeso monda. Snonkaku ḇefawi nanem oso ikofen snar wos ”ḇaḇenaḇye” ro Refo kyurfasna ḇe sasuref sbukna kuker sne ḇesiper ma saswar fakamaman snonkaku oso ismana,  ḇaido roi oso sḇuk faro snonkaku oso ḇesyus ḇa fa ḇesmana.”

3, 4. Rosai ḇefnai ya ma rariso Yahwe fyasna ḇaḇenaḇye faro snonkaku syakam?

³ Refo ikofenḇadir ḇeko snar ḇaḇenaḇye Allah ḇyedi iso ”saswar fakamaman”. (Ef. 3:7) Snar kopok fa kosouser mnis kaku ḇa Yahwe I, kosyus ḇa fa kosma ḇaḇenaḇye ro Allah. Kakuya, na komar. Raja Salomo ikofen, ”Snonkaku ḇenapes oso ḇaḇeri ro supswan na ifrur pyum ḇesyakwar ma na ifrur sasar ḇa.” (Pkh. 7:20) Ḇarpurya, manwawan Paulus ikofen snar ”snonkakusya sḇesasar kwar ma sḇinkwanbur Allah ḇeḇuk koreri ḇesia” ma ”snar marmar irya sasuref ro sasarya.”​—Rm. 3:23; 6:23a.

⁴ Snaro Yahwe iswar kaku snonkaku sya, iwan ”Rumkun Mandos ḇyedi” fa imarwarek ko. Iso fasasna ḇeba ro ḇaḇenaḇye Allah ḇyedi. (Yoh. 3:16) Paulus ikofen snar Yesus kirine ”kuker wower payamyum ma syowi, insa Allah saswar-fakamaman ḇyena ifawi marmari faro snonkakusya kam.” (Ibr. 2:9) Imbo, ”kankenem ḇekain fyoro-fyoro fnoḇek Yesus Kristus Manseren koḇedi irya fakamaman Allah ḇyuk waworek monda maḇeko”.​—Rm. 6:23b.

5, 6. Rosai bonya snar ḇeḇepoik ko iso (a) sasarya? (b) Allah ḇaḇenaḇye ḇyedi?

⁵ Rosai ḇefnai fa kosasar ma komar ya? Refoya ikofen snar ”marmarya daḇen snonkakusyakam ro awar Adam . . . marmarya deksi”. Inja, snaro koine Adam kpu ḇyesiko, komnis ḇa ma na komar. (Rm. 5:12, 14, 17) Ḇape, na kokinfir fa sasarya ḇyepoik ko ke oroḇa. Rariso nyan ya? Fandun fa kokyar faro farsarser fasaspar Kristus ḇyedi insama kona fainda ro ḇaḇenaḇye Yahwe ḇyedi. Refoya ikofen, ”Rofyor snonkaku ansi sḇesasar syadi wer, Allah fyasna iswar syadisi wer. Inja, imnis komar snar kofrur sasar, rarirya kako Allah ḇyuk nyan maḇeko insa koḇye kaḇer wer kuker Allah snar saswar ḇyeja ḇeko. Ma snar ḇaḇeoser koḇedi kuker Allah, iḇye kaḇer kwar ma ḇyuk kako kankenem fyoro-fyoroya maḇeko snar Manseren koḇedi Yesus Kristus.”​—Rm. 5:20, 21.

⁶ Koine snonkaku ḇesasar kaker, ḇape na komewer sasarya ḇyepoik ko. Inja, rofyor kofrur sasar, kor ampun ro Yahwe I. Paulus ḇyuk swarapepen ḇeko, ”Sasar anya ḇyewayam kaker awer naek aw, snar wakenem kaker ro sasoser agama Yahudi ḇakwar, mboi awsya kwar ro Allah saswar [ḇaḇenaḇye] ḇyedi.” (Rm. 6:14) Rariso, na kona fainda ro Allah ḇaḇenaḇye ḇyedi rai? Paulus ikofen, ”Snar Allah saswar-fakamaman ḇyena . . . fyarkor ko insa kobur ḇarḇorna ma rmomen supswan ine ma insa kokenem kuker fawawinanem, nanapes ma ḇaḇeari faro Allah ro supswan ine.”​—Tit. 2:11, 12.

7, 8. Rosai knam ya snar Yahwe ḇaḇenaḇye ḇyedi ”fyasna na ro nyan ḇebor”? (Mam sonin ḇerandak ro artikel ine.)

⁷ Manwawan Petrus fyas, ”Mkuffarmyanyae mko, imnis raris fakamaman snonkaku oser-oser isma kwar imnis manfarkin ḇeḇye ro Allah saswar-fakamaman ḇyena [fyasna na ro nyan ḇebor].” (1 Ptr. 4:10) Rosai knamya snar Yahwe ḇaḇenaḇye ḇyedi ”fyasna na ro nyan ḇebor”? Ine kyurfasna snar roi ḇesamswen ro kankenem koḇenakam, Yahwe nari ḇyuk rosai kofandun na fa kofarmku pdef. (1 Ptr. 1:6) Nari Ḇyuk ḇeko roi kofandun kakuna fa kofrur mnis roi ḇesamswenna.

⁸ Manwawan Yohanes fyas, ”Snar ifo kuker saswarya, ma saswar [ḇaḇenaḇye] ḇyedi imnaiḇa ma ḇyeḇok ko.” (Yoh. 1:16) Snaro Yahwe fyasna ḇaḇenaḇye ḇyedi kuker  nyan ḇebor, kosma barakas nabor. Rosai ḇarakas nane?

9. Barakas rosai kosma snar Yahwe fyasna ḇaḇenaḇye ḇyedi ḇe ko, ma rariso na kofasna kasumasa koḇena faro I?

⁹ Yahwe ipyos sasar koḇena. Kokofen kasumasa snaro ḇaḇenaḇye Yahwe Ḇyedi, ipyos sasar koḇena. Ḇape, Yahwe na ifrur rarirya ḇeko rofyor kombror kaku ma koḇensewar fa kopampum marisen fa kofrur sasarya. (Wasya 1 Yohanes 1:8, 9.) Paulus ikofenḇair ḇe snonkaku Kristen ḇesma ramrem sya ro fafisu ḇyedi, rariso Yahwe ipyos sasar ya. Ikofen, ”[Allah] fyaspar kobur papoik pampanya ma dun koḇe papoik Ḇaḇesasoser Rumkun saswar ḇyedi; kuker Rumkun ḇyedi kosma faspar, isoine sasar koḇena neḇepyos kwar.” (Kol. 1:13, 14) Kokofen kasumasa kaku faro sawarwar Allah ḇyedi, inja komarisen kosandik I. Ma snaro Yahwe ipyos sasar koḇena, na kosma barakas ḇepyum ḇebor ḇese wer.

10. Barakas rosai wer kosma snaro Allah ḇaḇenaḇye ḇyedi?

¹⁰ Kosma ḇaḇeḇati ḇepyum kuker Allah I. Koine snonkaku ḇesasar si ko, inja rofyor koḇeaben, koma koḇembroḇ kuker Allah I. Ḇape Paulus ikofen, ”Rofafisu koḇembroḇ kuker Allah, kosma ḇaḇedasi kuker marmar ro Rumkun ḇyedi.” (Rm. 5:10) Snaro farsarser fasaspar ya, na kofanam kuker Allah, iso ḇefnai fa koḇeaski ma koḇebati kuker I. Paulus ikofenḇair rariso roi nane nefasfesepen kuker ḇaḇenaḇye Yahwe ḇyedi rofyor ikofen ḇe naek ḇesma ramrem sya, ”Baboine kosma kankenem ḇeḇye kaḇer kuker Allah snar kakyar koḇena. Ma eḇedari kokenem ro aski kuker Allah snar Yesus Kristus Manseren koḇedi. Snar kokyar Yesus ḇyuk fa kosma Allah saswar ḇyedi, eḇedari kokenem isof baboine.” (Rm. 5:1, 2) Na kokofen kasumasa nabor kaku snar kosma ḇaḇebati kuker Yahwe I!

11. Rariso snonkaku ḇesma ramrem sya sun ’domba-domba ḇesesya’ faro nanapes ya?

¹¹ Koḇe snonkaku ḇenapes ro ḇarpon Allah I. Nabi Daniel fyas snar fafisu ḇepupes ya, ”snonkaku bena fawawi”, isoine ḇesma ramrem sya, nari sun ”snonkaku ḇebor faro nanapes ya”. (Wasya Daniel 12:3.) Nyan ya rariso sifrur na rai? Sibaryas ankankinem ḇeḇye ma sḇuk farkarkor kuker Yahwe sasoser ḇyedi faro yuta ma yuta ro ’domba-domba ḇesesya’. (Yoh. 10:16) Sifnoḇek si fa senapes ro ḇarpon Allah I, ine na ndarirya snaro Yahwe ḇaḇenaḇye ḇyedi. Paulus ikofenḇair, ”Inja Allah saswar [ḇaḇenaḇye] ḇyeja munda snonkakusya ḇaḇe oser sedi kuker Allah iḇye kaḇer; nyan ḇyedi isoine: Snonkakusya sisma ḇaḇemkei snar Yesus Kristus I.”​—Rm. 3:23, 24.

12. Rariso nadi ḇefesepen kuker Allah ḇaḇenaḇye ḇyedi?

¹² Kofanam ḇe Allah I ro nadi ya. Snaro ḇaḇenaḇye Ḇyedi, na koḇenadi faro Yahwe I. Paulus dap karapesa Yahwe ḇyedi ḇe ”karapesa ro ḇaḇenaḇye” ma kofanam ḇe I ”kuker ḇaḇemkei fa kawos”. (Ibr. 4:16a) Na koḇenadi ḇe Yahwe I ro fafisu nakam roro Yesus I. Ine fakamaman ḇeba kaku faro ko! Paulus ikofen, ”Komsik ma kosma nyan ḇesun mufaḇe Allah, kuker kakyar koḇena faro i.”​—Ef. 3:12.

13. Rariso ḇaḇenaḇye na ifnoḇek ko ro fafisu ḇemnis?

¹³ Na kosma farfnoḇek ro fafisu ḇemnis. Paulus danun ḇeko fa koḇenadi ḇe Yahwe I rofyor kona fandandun oso, snaro ”Allah iswar ko ma ḇyeḇok ko ma kosma fafnoḇek, rofafisu koḇefandunya”. (Ibr. 4:16b) Rofyor kosma roi ḇesamswen ro kankenem koḇena, na kor ḇe Yahwe fa ifnoḇek ko. Yahwe fandun ḇa fa kyarem nadi koḇena ḇape kofawi na ifrur rarirya.  Ḇyuk farfnoḇek ḇeko ro naek srar koḇesya. Yahwe kyarem nadi koḇena ”rarirya kuker kakyar kokofen: ’Manseren ifnoḇek aya, inja nari yamkak ḇa. Snonkaku oso ḇaḇeri nari ifrur roi oso maḇe aya!’”—Ibr. 13:6.

14. Rariso Yahwe ḇaḇenaḇye ḇyedi ḇyuk sneprei ḇeko?

¹⁴ Na kosma wos ḇeyun sneprei. Inema barakas ḇeba kaku snar Yahwe ḇyuk sneprei ḇeko rofyor koḇesanekar. (Mz. 51:17) Rofyor snonkaku Kristen ro Tesalonika sekandera snar sewayam si, Paulus fyas, ”Ma Allah, Kma koḇedi, kuker Manseren Yesus Kristus, saswar-fakamaman ḇyena iswar ko kwar ma ḇyuk ḇeko sneprei ḇekain fyoro ma saneraro ḇeḇye maḇeko, ma nbuk sneprei ma samambraḇ faro mko ro fararur mkoḇena kada, fnoḇek awawos ḇeḇye ro kakyarya.” (2 Tes. 2:16, 17) Sne koḇena naprei kaku snar kofawi Yahwe iswar ma fyandun kaku ko!

15. Snar Yahwe ḇaḇenaḇye ḇyedi, saneraro rosai kosma na?

¹⁵ Kona saneraro fa kokenem fyoro. Snar koine snonkaku ḇesasar, rofyor Yahwe Ifnoḇek ko ḇa na kona saneraro ḇa. (Wasya Mazmur 49:7, 8.) Ḇape Yahwe ḇyuk ḇeko saneraro ḇepyum kaku. Rosairirya? Yesus ikofen, ”Snar Mami marisen ḇyedi ryadine, isoine insa snonkaku oser-oser ḇemam Rumkunya, ma ḇekyar faroi, sisma kankenem ḇekain fyoro.” (Yoh. 6:40) Inja, kona saneraro fa kokenem fyoro snar Yahwe ḇaḇenaḇye ḇyedi. Paulus ikofen, ”Snar Allah saswar-fakamaman ḇyena ḇeḇuk koreri faro snonkakusya kam nasnai kwar.”​—Tit. 2:11.

16. Rariso snonkaku Kristen ḇeḇeso ro abad randak sisyowi ḇa faro Allah ḇaḇenaḇye ḇyedi?

¹⁶ Kosma barakas ḇebor snar Yahwe ḇaḇenaḇye ḇyedi. Ḇape, pok fa kofasna kosyowi ḇa ḇaḇenaḇye ḇyedi kuker kofrur sasar. Snonkaku Kristen ḇeḇeso ro abad randak ”ḇeḇeninyan ḇaryas ro Allah koḇedi ḇaḇye ḇyena fasḇuk ifrur nafsu-rmomen sena”. (Yud. 4) Snonkaku Kristen ḇesoasuser ḇa sine skara rofyor sifrur sasar na Yahwe ḇyuk ampun ḇesi ḇesyakwar. Siḇensewar kako fa sifrowes naek srar  ḇesesya fa sifrur rarirya kako. Isof ro kirine, snonkaku ḇefrur rarirya ima ”snonkaku ḇekoryae saswar-fakamaman Rurya”.​—Ibr. 10:29.

17. Ananun ḇesnai bos rosai Petrus ḇyuk na?

¹⁷ Ro fafisu ine, Setan ifrowes snonkaku Kristen ḇeḇeso fa skara bisa fa sifrur sasar ya snaro nari Yahwe ḇyuk ampun ḇeri ḇe si. Kaku, Yahwe imarisen ḇyuk ampun faro snonkaku ḇembror kaku sya. Ḇape Yahwe imarisen insama kopampum marasrisen ḇesasar koḇena. Yahwe fyarkin Petrus i fa fyas, ”Ḇape mko naek srar yaswar kaku, mkofawi ḇepon roi ḇeḇor nane kwar. Inja mkepen mko, imbude mkosaso snonkaku ḇeḇor ḇefawi sasoser ḇa isof mkosapibur moḇ ḇeknonya. Iḇye kada mkofawi kaku Manseren ḇaḇenaḇye ḇyena, Wairek Ḇeḇuk korerima ḇeko isoine Yesus Kristus ma mko kako mkofawi kaku i.”​—2 Ptr. 3:17, 18.

18. Snar Yahwe ḇaḇenaḇye ḇyedi, fakamamar rosai kosmana?

¹⁸ Kokofen kasumasa kaku faro Yahwe ḇaḇenaḇye ḇyedi. Inja, fandun fa koḇuk rosai Yahwe ḇyukna fa kosandik I ma kofnoḇek snonkaku ḇesesya. Rariso kofrur na rai? Paulus ikofen, ”Ko oser-oser nya fakamaman ḇesisye. Fakamaman anna Allah ḇyuk na maḇeko raris saswar ḇyedi. . . . Snonkaku ḇena fakamaman fa ḇeḇaryas Allah wos ḇyena, snonkaku ani ḇyardi ḇararyas ro Allah raris kakyar ismaya. Snonkaku ḇena fakamaman fa ḇefnoḇek snonkaku ḇese, snonkaku ani ifnoḇek kaku ḇeri snonkaku ḇese kuker kaku. Snonkaku ḇena fakamaman fa ḇeḇuk farkarkor, iḇyekada ḇyuk farkarkor kuker kaku. Snonkaku ḇena fakamaman fa ḇeḇuk wos raryaḇ faro snonkaku ḇese, kaku ḇeri snonkaku ani ḇyuk wos raryaḇ faro snonkaku ḇese. . . . Snonkaku ḇena fakamaman fa ḇefasna saswar faro snonkaku ḇese, snonkaku ani ifrur fararur ani kuker marisen.” (Rm. 12:6-8) Inja, snar Yahwe ḇaḇenaḇye ḇyedi, kona fakamamar fa kofararur marḇak ro ḇaḇebaryas, koḇuk farkarkor Refo ḇe snonkaku ḇesesya, kosambraḇser naek srar koḇesi, ma koḇuk ampun ḇe snonkaku ḇefrurduf sne koḇena.

19. Fakamamar rosai nari kowawos ro artikel ḇeḇeuser ya?

¹⁹ Kosma kwar baraskas ḇebor snar Yahwe ḇaḇenaḇye ḇyedi. Inja, fandun fa kosewar kaku fa koḇe ”saksi Ankankinem Ḇeḇye ro saswar ma fakamaman Allah”. (Kis. 20:24) Ro artikel ḇeḇeuserya na kowawos kuker fakamamar koḇena ine.