1, 2. (1) Püküja süchiki tü naaʼinrakat chi wayuu kaʼapainseshi naashajaakai achiki Jesuu. (2) ¿Jamüsü shiiʼiyatia nutuma chi wayuu kaʼapainseshikai asülajülin nia otta anamiashaatain nia?

EEJACHI wanee wayuu kaʼapainseshi. Oʼunüshi nia soʼu wanee kaʼi pülaasapaʼamüin sünain achajawaa wayuu aʼyataainjatü nümüin. Nüküjaleein jeʼrainjatüin nneerü naapakat namüin, «aa» müshiijaʼa naya nümüin. Mapa, niʼraka chi wayuukai choʼujaain sooʼomüin wayuu aʼyataainjatü nümüin. Wainmatua nukua sünain asaajaa wayuu soʼu kaʼikat tia. Walaasü nakanain naya wayuukana nutuma. Sajaʼttapa naʼyataain, nükotchojooka naya süpüla nuwalaajüin naya. Noʼuluku naya wayuukana siraasü kaʼi naaʼu sünain aʼyatawaa otta waneeinnua aʼyataʼalaashii wanee oora neʼe. Akaisaʼa chia wayuukai wanaawasü nakanain nutuma. Jashichipejeʼe na wayuu siraakana aaʼu kaʼi sünain aʼyatawaa nümüin. Niasaʼa chi kaʼapainseshikai, nüsoʼirüin naaʼin sünain «aa» namatüjüliin nümüin sümüin tü nuwalaajüinjatkat namüin. Nümüshii naya sünain nuwalaajeerüin eepünaale nücheküin süka nünneetsaajuchin nia. Süchikijee, nüsakiraka sünain nachumujataakajaʼa saaliin asülajülin nia (Mat. 20:1-15).

² Aashajaashi Jesuu süchiki tü naaʼinrakat chia wayuu kaʼapainseshikai süpüla nikirajüin waya sünain «anamiashaatain» Maleiwa (paashajeʼera 2 Corinto 6:1). ^[1] Eesüjaʼa süpüla wainmainjatüin saaʼin amüinyüü nakanain na wayuu siraakana aaʼu kaʼi noulia na waneeinnua. Akaisaʼa chi wayuu kaʼapainseshikai niiʼiyatüin anamiashaatain  nia namüin na paliʼitkana oora aʼyataain. Naashin wanee süpüʼüya tü Wiwüliakat, tü pütchikat «anamiashaata» maka suluʼu tü Wiwüliakat, shia süküjaka achiki «wanee kasa aapünaka wamüin sünain machekajuuin shia» jee shiale «wanee kasa aapünaka nümüin wanee wayuu sümaa nnojoluin eein kasayaain nuwalaajüin saaʼu».

3, 4. (1) ¿Jamüsü niiʼiyataka Jeʼwaa namüin na wayuukana anamiashaatain maʼin nia? (2) ¿Kasa naaʼinraka Jeʼwaa süpüla niiʼiyatüin sünain anamiashaatain maʼin nia?

³ Saashin tü Wiwüliakat, sünainjee anamiashaatain Maleiwa müsü süsülajünakai saaʼin wanee kasa wamüin (Éf. 3:7). Sükajee nnojoluin jaa wamashaatain nümüin Jeʼwaa, nnojotsü süpüla niiʼiyatüin sünain anamiain nia wamüin. Sutuma tia ouktajanayaa waya. Müshinka Salomón: «Nnojoishi eeichin wanee wayuu lotokai akuwaʼipa yaa mmapaʼa aaʼinrakai kasa anasü sümaa maainjalain nia» (Ecl. 7:20, TNM). Kakalia mapa nüküjüin Pablo «kaainjalain wayuu ütamüinreʼeya nuulia Maleiwa je sükatalaain suulia tü kasa anasü nüchekakat süpüleerua» otta walaainjatüin «tü waainjalakat ouktapa waya» (Roma 3:23; Roma 6:231, TNM).

⁴ Aishii maʼin napüshuaʼa na wayuukana nüpüla Jeʼwaa. Nuluwataainjeseʼe ouktüin waaʼu chi waneeshikai Nüchon. Sükajee tia niiʼiyatüin wamüin sünain anamiashaatain maʼin wamüin (Juan 3:16, TNM). Naashin Pablo, kojutüshi maʼin Jesuu sükajee ouktüin nia waaʼu, eesü tia sutuma «anamiashaatain maʼin Maleiwa» (Heb. 2:9, TNM). Tü nüsülajakat wamüin Maleiwa shia katüinjatüin woʼu waneepia nünainjee Jesuu (Roma 6:232, TNM).

5, 6. (1) ¿Kasa alataka wamüin sutuma waleʼeruʼuin tü kaainjalaakat? (2) ¿Jamüsü wakuwaʼipa sutuma kojutüin wamüin anamiain Maleiwa wamüin?

⁵ ¿Jamüshiiche kaainjalaka jee ouktaka waya? Shia süka kaainjalain Adán paala sümaiwa saashin tü Wiwüliakat. Ouktüshii otta kaainjalashii waya süka nuuʼuliwoʼuin waya Adán (Roma 5:12, 14, 17). Mayaapejeʼe müin wakuwaʼipa, eeshii süpüla wojuʼitüin suulia süchepchia kaainjalaa. ¿Jamüsü süpüla wountüin tia? Wanoujüinjatü sünain naapajiraain nikii Jesuu waaʼu. Mayaa weeʼiyateerü shiain kojutüin wamüin anamiashaatain Jeʼwaa wamüin. Müsü tü Wiwüliakat: «Mayaainje kaainjaralüin maʼi tü wayuukolüirua, nountüitpa anajiraain naya nümaa Maleiwa süka anamiashaatain maʼi nia namüin. Tü taküjüitpakat achiki jümüin, müsü mayaa: Na wayuu süchepchiakana kaainjalaa, oukteena naya napüshua sümaa katatüin naya nuulia Maleiwa. Otta wayakana, nnojoleena nükatalüin nuulia, süka anamiashaatain maʼi nia. Saaʼu wanoujain nünain chi Wasenyotsekai Jesucristo, wountüin wapüshua anajirawaa nümaa Maleiwa sümaa suʼwanajaain waaʼin süpüla [katüin woʼu waneepia]» (Roma 5:20, 21).

⁶ Ayatayülia waleʼeruʼuin tü kaainjalaakat, nnojotpejeʼe wooʼulaain suʼunirüin wakuwaʼipa tü kaainjalaakat. Jamüshiijaʼa kaainjarale waya nuulia Jeʼwaa, achuntawaishii waya nümüin süpüla motuin naaʼin waainjala. Müshi Pablo: «Soto jaaʼin sünain anajiraainapain jia nümaa Maleiwa sünainjee anamiashaatain nia jümüin süpüla taashinjanain jia nütüma suulia süchepchiaa kaainjalaa. Nnojoliishii jia müin aka naaʼin na wayuu aapünakana amüin tü nuluwataakat anain Moisés, tü nnojotkat akaaliijain naya suulia kaainjalaa. Je sükajee tia, juuʼulaa suulia süchepchiaa kaainjalaa» (Roma 6:14). Wainmeerü kasa anasü weʼraka kojutüle wamüin anamiain Maleiwa wamüin. Naashin Pablo, wayoukteerü «süpüshua tü kasa mojutkat akajee nia [Maleiwa] watüma» otta nnojoleerü «kachiiruain waaʼin tü kasa mojusü keejiakat namüin na manoujainsaliikana». Akaʼaya waya, laülaajeerü waaʼin, waaʼinreerü tü nüchekakat Maleiwa wapüleerua otta keisaleena waya sümüin wakuwaʼipa nuʼupala (Tito 2:11, 12).

7, 8. ¿Jamüsü naatawaika tü atüjaa naapakat Jeʼwaa? (Piirakaa sümüin tü ayaakuaa suluʼukat süpana 20).

⁷ Naashin Pedro, akaaliinjiraainjana waya süka tü atüjaa naapakat Maleiwa wamüin waneʼewai wakua. Naataʼawaisü tü atüjaa aapünakat  wamüin nutuma Jeʼwaa (1 Ped. 4:10). ¿Jamüsü naatawaika tü atüjaa naapakat Jeʼwaa? Shia süpüla wachecherüin waaʼin suʼunnaa weʼrüin wamüliala, jaʼitairü kasawalain eejiraain amaa waya (1 Ped. 1:6). Naapeerü tü choʼujaakat süpüla wayamülüin tü eejiraakalü amaa waya.

⁸ Weʼrüin naatawalin tü atüjaa naapakat Jeʼwaa wamüin süka anamiashaatain nia. Anuu nünüiki Juan: «Aapüneerü wamüin wapüshuaʼa [...] tü kasa eekat sutuma anamiashaatain Maleiwa wamüin» (Juan 1:16, TNM). Sutuma naaʼinrüin Jeʼwaa tia, wainma kasa anasü weʼrakat. Wekirajaa sünain waneeirua kasa anasü weʼraka.

9. (1) ¿Kasa naaʼinraka Jeʼwaa wapüleerua süka anamiashaatain nia? (2) ¿Kasa waaʼinrajatka süpüla weeʼiyatüin sünain kojutüin wamüin tü naaʼinrakat Jeʼwaa wapüleerua?

⁹ Nülatirüin Jeʼwaa sooʼopünaa naaʼin tü waainjalakat. Naaʼinrüin tia süka anamiashaatain nia wamüin. Nülatirapejeʼe tü waainjalakat müleka wayaawajaale suulia otta wachecherüle waaʼin suulia aaʼinraa kasa mojusü (paashajeʼera 1 Juan 1:8, 9). Nüküjüin Pablo namüin na anoujashii namaiwajanakana tü naaʼinrakat Jeʼwaa süpüla nülatirüin tü naainjalakat noulia. Naashin niakai, ayuʼnnüshii naya nutuma Maleiwa saʼakajee piyuushi süpüla noʼunüinjanain eemüin nuluwataaya chi Nüchon aishikai nüpüla. Taashiinnapa naya nükajee Jesuu otta nülatirüin Jeʼwaa tü naainjalakat naya anoujashiikana nükajee Jesuu (Col. 1:13, 14, TNM). Kojutüle wamüin tü naaʼinrakat Jeʼwaa wapüleerua, waʼwaajeechi nia. Wainmeerü maʼin kasa anasü weʼraka sutuma nülatirüin Jeʼwaa tü waainjalakat woulia.

10. ¿Jamüsü wakuwaʼipa nümaa Maleiwa süka anamiain nia?

¹⁰ Anajiraashii waya nümaa Maleiwa otta aleewashii waya nümaa. Mojujiraatüjülii waya nümaa Maleiwa süka weweeniraain sümaa tü kaainjalaakat. Müshi Pablo süchiki tia: «Mayaainje mojaawain waya paalainka nümaa Maleiwa, anaawashii waya jooluʼu nümaa sütüma tü naaʼinrakat chi Nüchonkai sünain ouktüin nia waaʼujee» (Roma 5:10). Anajiraashii waya nümaa Maleiwa saaʼu naapajiraain nikii Jesuu waaʼu. Jee müsia anajiraashii waya namaa na aleewakana nümaa Maleiwa. ¿Jamüsü sünainpünaaka tia anamiain maʼin Maleiwa? Müshi Pablo namüin na anoujashii chainjanakana iipünaa: «Saaʼu anajiraainapain waya nümaa chi Maleiwakai sünainjee tü wanoulakat nünain, anaitpa jooluʼu tü waaʼinkat nuʼupala nütüma chi Wasenyotsekai Jesucristo. Sünainjee tü naaʼinrakat Cristo, niiʼiyatüin chi Maleiwakai naʼanasia wamüin. Je maaʼulu yaa, kamalaintpa wamüin tü anajirawaakat nümaa» (Roma 5:1, 2). Waapeein analuʼut nümüin Jeʼwaa saaʼu anajiraain waya nümaa otta aleewain waya nümaa.

11. ¿Jamüsü sukuwaʼipa natuma na anoujashii chainjanakana chaa iipünaa süpüla lotuinjatüin sukuwaʼipa wayuu noʼuluʼu Jeʼwaa?

¹¹ Lotusü wakuwaʼipa noʼuluʼu Jeʼwaa. Naashin Daniel, wainmeena wayuu lotokana akuwaʼipa noʼuluʼu Maleiwa maaʼutpünaa yaa süka nakaaliinjain naya na anoujashii chainjanakana chaa iipünaa (paashajeʼera Daniel 12:3). ¿Jamüsü sukuwaʼipa tia natuma? Aküjüshii naya pütchi süchiki Nuluwataaya Maleiwa otta nekirajüin tü wanee anneetkalüirua süchiki tü nuluwataakalü anain Jeʼwaa (Juan 10:16). Müsü sukuwaʼipa natuma süpüla nakaaliinjain wayuu süpüla lotuinjatüin sukuwaʼipa noʼuluʼu Jeʼwaa. Eepejeʼe tia sutuma anamiain Jeʼwaa. Müshi Pablo: «Anamia maʼi chi Maleiwakai sümüin wayuu süpüshua waneepia. Je saaʼujee anamiain maʼi nia, chi eekai nünoujain nünain Cristo Jesús, taashishi nia suulia naainjala sümaa anajiraain nia nümaa Maleiwa» (Roma 3:23, 24).

12. ¿Jamüsü sünainpünaaka anamiain Maleiwa tü oʼuraajaakat?

¹² Arütkaashii waya nünainmüin Maleiwa sükajee woʼuraajüin nümüin. Eeshii süpüla woʼuraajüin nümüin Maleiwa süka anamiain nia wamüin. Naashin Pablo, chaa eere joyotuin Jeʼwaa sünain aluwatawaa shia shikiisükat tü anamiaakat otta keeʼireesü naaʼin warütkaain nünainmüin sümaa lotuin wanüiki nümüin (Heb. 4:161, TNM). Eeshii süpüla woʼuraajüin nümüin Jeʼwaa eepünaweere neʼe. Achuntüinjanapejeʼe  waya nümüin nükajee Jesuu. «Sünainjee wanoujainapain nünain Cristo, nnojoliinapa waya mmolüin seema arütkawaa nünainmüin chi Maleiwakai süpüla aashajawaa nümaa», müshi Pablo (Éf. 3:12).

13. ¿Kasa naaʼinraka Jeʼwaa wapüleerua süka anamiain nia?

¹³ Akaaliinjünüshii waya soʼu choʼujaain shia wamüin. Nüküjüin Pablo woʼuraajüinjanain nümüin Jeʼwaa süpüla nümüliajüin waya otta nükaaliinjain waya soʼu choʼujaain shia wamüin süka anamiain nia (Heb. 4:162, TNM). Eeshii süpüla wachuntüin kaaliinwaa waneepia nümüin Jeʼwaa suʼunnaa weʼrüin wamüliala. Asouktüshiaʼaya neʼe nia wamüin waneepia süka anamiain nia. Eeshi nükaaliinjale waya Jeʼwaa nakajee na wawalayuukana. Süka nusouktüin Jeʼwaa wamüin «anasü müleka wachecherüle waaʼin nünain süpüla müinjatüin wanüiki sümüin wayuu: ‹Nia teenakaka chi Maleiwakai süpüla nükaalinjain taya. Nnojoleechi taya mmolüin seema tü saaʼinreetkat tü taʼünüükolüirua›» (Heb. 13:6).

14. ¿Kasa maa naaʼinraka Jeʼwaa wapüleerua saaʼu anamiain nia wamüin?

¹⁴ Amüliajünüshii waya. Süka anamiain Jeʼwaa, nümüliajüin waya shapaale waaʼin (Sal. 51:17). Jamüshiijaʼa soʼu müliain atumaa na anoujashii chejeʼewaliikana Tesalónica, müshi Pablo namüin: «Waapüin analuʼut nümüin chi Maleiwakai süka alin maʼi waya nüpüla sünain anamiain maʼi nia wamüin. Ayatshiʼiya waya sünain wachecherüin waaʼin, süka watüjaain naaʼu sünain naaʼinrüinjatüin süpüshua tü nüküjakat achiki wamüin paala. Je sükajee tia, achuntüshii waya jaaʼu nümüin chi Wasenyotsekai Jesucristo je nümüin chi Washikai Maleiwa süpüla natütüjüinjanain jia süpüla katsüinjatüin jaaʼin» (2 Tes. 2:16, 17). ¿Aashin atütülaain waaʼin sutuma watüjaain saaʼu alin waya nüpüla Jeʼwaa otta jülüjain waya naaʼin saaʼu anamiain nia?

15. ¿Kasa waʼatapajaka sutuma anamiain Maleiwa?

¹⁵ Eejeena waya süpüla kaʼikat süpüshuaʼa. Nnojoliire nükaaliinjain waya Jeʼwaa, nnojoishiijeʼe waya kaʼatapalain süka waleʼeruʼuin tü kaainjalaakat (paashajeʼera Salmo 49:7, 8). Anashaatasü maʼin tü waʼatapajakat. Naashin Jesuu, keeʼireesü naaʼin chi Nüshikai katüinjatüin noʼu waneepia na anoujakana nünain Jesuu (Juan 6:40, TNM). Süka anamiain Jeʼwaa wamüin, waʼatapajüin katüinjatüin woʼu süpüla kaʼikat süpüshuaʼa. Nüküjüin Pablo sünain «niiʼiyatüitpain naʼanasia chi Maleiwakai sümüin wayuu süpüshua je sünain  nuʼtteʼerüinjanain naya sünainjee tü naaʼinrakat Jesucristo süka ouktüin saaʼu saainjala» (Tito 2:11).

16. ¿Kasa naaʼinraka waneeinnua anoujashii namaiwajannuu sutuma mojutüin namüin anamiain Maleiwa?

¹⁶ Wekirajaaitpa anain wainmain kasa anasü weʼraka sutuma anamiain Jeʼwaa. Nnojotpejeʼe mojutüyaainjatüin tia wamüin. Nnojoishii waya kaainjalainjanain nuulia Jeʼwaa sutuma anamiain nia weʼrüin. Sümaiwa paala, eejana waneeinnua anoujashii mojutka amüin anamiain Maleiwa, müshiijeseʼe naaʼinrüin kasa yarüttüsü (Judas 4). Naaʼinruʼu nayakana, eeshii süpüla naaʼinrüin kasa mojusü otta nülatirüinjatü Jeʼwaa naainjala noulia. Akaʼaya naya, naainjireein kasa mojusü waneeinnua anoujashii. Chi anoujashi eekai müin naainjala mayaa, niiʼiyatüin sünain mojutüin nümüin «chi Naaʼinkai Maleiwa anamiakai maʼi» (Heb. 10:29).

17. ¿Kasa nüchiaaka oulia Pedro na anoujashiikana?

¹⁷ Kojuyainna anoujashii nimeejaka Satanaa. Nunoujirüin naya sünain eein süpüla kaainjalain naya otta motomaateerüin tia naaʼin Maleiwa naajüin. Shiimainsaʼa nülatirüin Jeʼwaa naainjala na ayaawajaakana suulia. Keeʼireepejeʼe naaʼin wachecherüin waaʼin suulia kaainjalaa. Anuu tü nüshajitkat Jeʼwaa Pedro: «Jalia jia suulia kapülajüin jaaʼin nanüiki. Müleka jüshatüle nakuaippa, amalajaajeerü tü jünoulakat. Shia anaka aluʼu müleka kachiiruale jaaʼin sünain kooʼomüinjatüin sütsüin tü jünoulakat sütüma naʼanasia Maleiwa aapünakat jümüin. Anakaja müleka juushikajaale süchiirua kooʼomüinjatüin jümüin tü aleewaakat nümaa [...] Jesucristo, chi Oʼtteʼerüikai» (2 Ped. 3:17, 18).

18. Sutuma anamiain Jeʼwaa wamüin, ¿kasa tü waaʼinrajatkat?

¹⁸ Kojutüle wamüin anamiain Jeʼwaa wamüin, weeʼiyatüinjatü nujutü nümüin sükajee tü kasa naapakat wamüin otta wakaaliinjüinjana na wawalayuukana. ¿Suluʼu jamüin? Naashin Pablo, «naataʼawaisü tü atüjaa aapünakat wamüin». Müshi nia: «Saapünüle pümüin süpüla aapirülinjachin pia wayuu süka nünüiki Maleiwa, anakaja püküjale waneepia tü shiimüinkat pünoujakat anain [...]. Shiale süpüla ekirajülinjachin pia suluʼu tü outkajaaleekat, anasü paaʼinrüle tia. Chi wayuu eekai naapünüin amüin süpüla achecherülinjachin nia saaʼin wayuu sünain anoujaa, anashi müleka naaʼinrüle tia [...]. Shiale süpüla amüliajülinjachin pia wayuu, anashi müleka paaʼinrüle tia sümaa talatüin paaʼin» (Roma 12:6-8). Sutuma anamiain Maleiwa wamüin, wachajaainjatü sukuwaʼipa süpüla waküjüin maʼin pütchi, wekirajüin wayuu sünain tü Wiwüliakat, watütüleʼerüin naaʼin otta walatirüin naainjala na wawalayuukana.

19. ¿Kasa wekirajaajeetka anain suluʼu tü wanee ekirajaayakat?

¹⁹ Wainma maʼin kasa anasü naaʼinraka Jeʼwaa wapüleerua sutuma anamiashaatain nia wamüin. Suluʼujee tia waküja maʼin «süchikü tü pütchi anasükat nüchikü Maleiwa sünain anamiain nia» (Aluw. 20:24). Suluʼu tü wanee ekirajaayakat, wekirajaajeerü anain jamüin choʼujaaka waküjüin nüchiki Maleiwa sünain anamiain nia sümüin wayuu.