1, 2. (a) Shintulula kyelekejo kya Yesu kya mwinē budimi bwa mañanza. (b) Le luno lusango lulombola namani mwikadile buntu ne kanye kakatampe?

DIFUKU dimo lubanga, mwinē budimi bwa mañanza waenda mu nsoko kukakimba bengidi ba kwingila mu budimi. Webalombola mfutwa nabo abaitabija’yo. Inoko mwinē budimi byaadi ukisakila’ko bengidi bakwabo, wajokela monka mu nsoko misunsa mivule kukakimbila’ko bengidi. Nabo webalombola mfutwa ya muswelo umo’nka na ya babajinji. Kyolwa, mwinē budimi wabunge bengidi mwanda wa kwibafuta. Wafuta bonso mfutwa ya muswelo umo, boba baingilanga difuku dituntulu ne boba ba nsá umo. Ino pashilula kutompola boba baingilanga difuku dituntulu, mwinē budimi wanena’mba: ‘Mwene tubeimvwanikanga ino mfutwa? Le nkidipo na bubinga bwa kufuta bengidi bami bonso monsakila? Le ubaimvwana mukao mwanda wa buntu bwami?’​—Mateo 20:1-15.

² Luno lusango lwānene Yesu lwitufundija mwanda mukatampe utala pa “kanye kakatampe” ka Yehova. ^[1] (Tala bilembwa bya ku mfulo.) (Tanga 2 Kodinda 6:1.) Muswelo’ka? Bamo babwanya kunena’mba boba baingilanga difuku dituntulu bafwaninwe kupebwa mfutwa mivule kupita ya bakwabo. Inoko mwinē budimi aye walombolanga kanye kakatampe ku bengidi baingilanga’tu kipindi kya difuku. Shayuka umo pa kwisambila pa “kanye kakatampe”  katelelwe mu Bible wanene amba: “Mulangwe wa kyalwilo wa kino kishima i kyabuntu kya ku bitupu, kipēlwe muntu kwampikwa kuputumina’kyo nansha kufwaninwa’kyo kwine.”

3, 4. I muswelo’ka ulombwele Yehova kanye kakatampe ku bantu, ne mwanda waka?

³ Bible witulombola’mba kanye kakatampe ka Leza i “kyabuntu kya ku bitupu.” (Efisesa 3:7) Byoketubwanyapo kukōkela Yehova mu muswelo mubwaninine, nanshi ke twi bafwaninwepo kutambula kanye ka Leza nansha kamo kene. Na bubine, twi bafwaninwe lufu. Mulopwe Solomone wānene amba: “Binebine panopanshi kepadipo moloke, ulonga biyampe ne kulonga bubi mpika.” (Musapudi 7:20) Mwenda mafuku mutumibwa Polo wānena’mba: “Bonso i bapye mambo kadi kebafikilangapo pa ntumbo ya Leza,” ne amba “mpalo ipala bubi i lufu.”​—Loma 3:23; 6:23a.

⁴ Yehova byasenswe bantu bininge, wātumine “wandi Mwana mubutulwe bunka” kwitufwila. Kano kadi kanye kakatampe kupita tonso. (Yoano 3:16) Polo wānene amba Yesu “pano i muvwikwe kilukwa kya ntumbo ne bulēme mwanda wafwile, amba pa kanye kakatampe ka Leza, atompe lufu pa mwanda wa muntu ense.” (Bahebelu 2:9) Bine, “kyabuntu kipāna Leza i būmi bwa nyeke mudi Kidishitu Yesu Mfumwetu.”​—Loma 6:23b.

5, 6. I bika bikalupuka’ko shi tubikalwe (a) na bubi? (b) na kanye kakatampe?

⁵ Mwanda waka tulubanga ne kufwa? Bible unena’mba “pa kilubo kya muntu umo lufu lwābikele bulopwe.” Byotudi bana ba Adama, twi bampikwa kubwaninina kadi tufwanga. (Loma 5:12, 14, 17) Inoko, tubwanya kutonga kuleka kubikalwa na bubi nansha kwendejibwa nabo. Le bikokejika namani? Potulombola lwitabijo mu kitapwa kya kinkūlwa kya Kidishitu, tumwenanga mu kanye kakatampe ka Yehova. Bible unena’mba: “Kokwa kwadi kuvula bubi, po pene kanye kakatampe nako kadi kavudila’ko. Mwanda waka? Mwanda, monka mwābikadile bubi bulopwe pamo na lufu, mo monka musa kubikela kanye kakatampe bulopwe kupityila ku boloke butwala ku būmi bwa nyeke kupityila kudi Yesu Kidishitu.”​—Loma 5:20, 21.

⁶ Nansha byotukidi ba bubi, ketunenwepo kuleka bubi bwitubikale. O mwanda shi tubaluba, tulombanga Yehova etulekele. Polo wādyumwine amba: “Ke-buntu bubi kebufwaninwepo kwimubikala bufumu, mwanda kemudipo mu bijila, aa, ino mudi mu kanye kakatampe.” (Loma 6:14) Penepo, tubwanya namani kumwena mu kanye kakatampe ka Leza? Polo amba: “Kanye kakatampe ka Leza . . . ketufundijanga kupela bumpikwa bwine Leza ne bya kusakasaka bya ino ntanda, ne mwa kwiendejeja na ñeni mibwane ne boloke ne bwine Leza mu ino ngikadilo ya bintu.”​—Tetusa 2:11, 12.

7, 8. Le kunena’mba kanye ka Yehova i “[kalombolwe] mu miswelo palapala” kushintulula namani? (Tala kifwatulo ku ngalwilo.)

⁷ Mutumibwa Petelo wāsonekele amba: “Monka mutambwidile muntu ne muntu kyabuntu, ingidijai’kyo mwanda wa kwiingidila banwe bene na bene byomudi batulama balumbuluke ba kanye kakatampe ka Leza, kalombolwa mu miswelo palapala.” (1 Petelo 4:10) Le kunena’mba kanye ka Yehova i “[kalombolwe] mu miswelo palapala” kushintulula namani? Kushintulula’mba nansha shi tutanwe na makambakano’ka mu būmi, Yehova uketupa byotusakilwa amba tūminine’o. (1 Petelo 1:6) Uketupa nyeke enka bine byotusakilwa amba tunekenye ditompo ne ditompo.

⁸ Mutumibwa Yoano nandi wālembele amba: “Byaadi muyulwe kanye kakatampe ne bubine, twadi tutambula kyaba kyonso kanye kakatampe.” (Yoano 1:16) Yehova  byalombola kanye kandi kakatampe mu miswelo palapala, netu tumwenanga’mo madyese mavule. Le i madyese’ka amoamo?

9. Le tumwenanga namani mu kanye kakatampe ka Yehova, ne i muswelo’ka otukafwija’ko?

⁹ Yehova ulekelanga bubi bwetu. Dyese, kupityila ku kano kanye kakatampe, Yehova ulekelanga bubi bwetu. Inoko ulekelanga’bo enka shi tubesāsa ne kwendelela kulwa na kusakasaka kwetu kwa bubi. (Tanga 1 Yoano 1:8, 9.) Polo wāshintulwidile bene Kidishitu bashingwe māni ba mu andi mafuku muswelo ulekelanga Yehova bubi. Wānene amba: “[Leza] wetukūdile ku lupusa lwa fukutu ne kwitutundulwila mu Bulopwe bwa Mwana wasenswe, mudi aye twi banyongololwe na kinkūlwa, ke kulekelwa kwa bubi bwetu kadi.” (Kolose 1:13, 14) Tufwijanga’ko Leza pa lusa lwandi kadi tusakanga kumutendela. Kadi Yehova byaetulekela bubi bwetu, tubwanya ne kutambula madyese makwabo a kutendelwa.

10. I bika byotumwena kupityila ku kanye kakatampe ka Leza?

¹⁰ Tubwanya kwikala mu kipwano kya ndoe na Leza. Tudi bampikwa kubwaninina, nanshi potubutulwa’pa tudi kala balwana na Leza. Inoko Polo wānene amba: “Potwadi balwana, twapwanijibwe na Leza pa lufu lwa wandi Mwana.” (Loma 5:10) Kupityila ku kinkūlwa, tubwanya kupwana na Leza, ko kunena’mba kwikala nandi mu ndoe ne kwikala balunda nandi. Polo ushintulula muswelo ukwatañene uno mwanda na kanye kakatampe ka Yehova paāsapwidile banababo bashingwe māni amba: “Penepo pano potwatelwa bu boloke pa mwanda wa lwitabijo, twikalei nanshi mu ndoe na Leza kupityila kudi Mfumwetu Yesu Kidishitu, kwine kotwamwena ne muswelo wa kufikila na lwitabijo lwetu mu kano kanye kakatampe mwine motwimene’mu.” (Loma 5:1, 2) Bine tufwijei’ko pa kipwano kya ndoe kyotupwene na Yehova!

11. Le bashingwe māni balamwinanga namani “mikōko mikwabo” ku boloke?

¹¹ Tubwanya kwikala boloke ku meso a Leza. Mupolofeto Danyele wāsonekele amba mu kitatyi kya ku mfulo, “boba badi ne ñeni,” ko kunena’mba bashingwe māni, bakalamwina “bangibangi ku boloke.” (Tanga Danyele 12:3.) Le bashingwe māni baloñanga kino namani? Basapulanga myanda miyampe ne kufundija “mikōko mikwabo” midiyo ne midiyo bijila bya Yehova. (Yoano 10:16) Bebakwashanga bekale boloke ku meso a Leza, kine kibwanikile enka kupityila ku kanye kakatampe ka Yehova. Polo wāshintulwile’mba: “Kutelwa kobatelwa bu boloke i kyabuntu kya ku bitupu pa kanye [ka Leza] kakatampe kupityila ku bunyongolodi bwa kinkūlwa kyafutyile Kidishitu Yesu.”​—Loma 3:23, 24.

12. Le milombelo i mikwatañane namani na kanye kakatampe ka Leza?

¹² Tubwanya kufwena kudi Leza mu milombelo. Tubwanya kulomba Yehova pa mwanda wa kanye kandi kakatampe. Polo wātelele lupona lwa Yehova bu “lupona lwa kanye kakatampe,” ne kwitwita tufwene’ko “ne kunena pampikwa kafinda.” (Bahebelu 4:16a) Tubwanya kulomba Yehova kitatyi kyonso kupityila padi Yesu. Bine dino i dyese’po kashā! Polo wānene amba: “Tunenanga namino pampikwa kafinda kadi tudi na bwanapabo bwa kufwena Leza na lukulupilo ponka pa lwitabijo mudi aye.”​—Efisesa 3:12.

13. Le kanye kakatampe kabwanya namani “kwitukwasha pa kitatyi kifwaninwe”?

¹³ Tubwanya kutana bukwashi pa kitatyi kifwaninwe. Polo wētukankamikile tulombe Yehova ponso potusakilwa bukwashi, “mwanda wa tufwilwe lusa ne kutana kanye kakatampe ka kwitukwasha pa kitatyi kifwaninwe.” (Bahebelu 4:16b) Ponso potutanwa na matompo ne makambakano a mu būmi, tubwanya kuzenza Yehova etukwashe. Kadi ulondololanga milombelo yetu  nansha byakanenwepo kulondolola’yo. Divule wingidijanga batutu ne bakaka betukwashe. Yehova ulondololanga milombelo yetu “amba twikale na bukankamane bukatampe ne kunena’mba: ‘Yehova i mukwashi wami; nkikakwatwapo moyo. Le muntu ukokeja kunonga kika?’”​—Bahebelu 13:6.

14. Kanye kakatampe ka Yehova kaseñanga mityima yetu namani?

¹⁴ Tubwanya kusengibwa ku mityima yetu. I dyese dikatampe kusengibwa na Yehova ponso potutyumukwa mutyima. (Ñimbo ya Mitōto 51:17) Pādi pasusuka bene Kidishitu ba mu Tesalonika na kupangwapangwa, Polo wāsonekele amba: “Mfumwetu Yesu Kidishitu mwine ne Leza Tata wetu, aye wetusenswe ne kwitupa busengi bwa nyeke ne lukulupilo luyampe ponka pa kanye kakatampe, bemusenge ku mityima ne kwimukomeja pototo.” (2 Tesalonika 2:16, 17) Kino kitusenga’po kashā pa kuyuka’mba kupityila ku kanye kandi kakatampe, Yehova witusenswe ne kwituta mutyima!

15. Le i lukulupilo’ka lotudi nalo pa mwanda wa kanye kakatampe ka Leza?

¹⁵ Tudi na lukulupilo lwa būmi bwa nyeke. Byotudi ba bubi, i bikomo kwikala na lukulupilo pampikwa bukwashi bwa Yehova. (Tanga Ñimbo ya Mitōto 49:7, 8.) Yehova i mwitupe lukulupilo lwa kutendelwa. Le i lukulupilo’ka? Yesu wānene amba: “Kine kino’ki kyo kiswa-mutyima kya Tata, amba ense uyuka Mwana senene ne kulombola lwitabijo mudi aye akamone būmi bwa nyeke.” (Yoano 6:40) Nanshi tudi na lukulupilo lwa kwikala na būmi bwa nyeke pa mwanda wa kanye kakatampe ka Yehova. Polo wānene amba: “Kanye kakatampe ka Leza i kalombolwe patōka, kadi kabaleta lupandilo ku bantu ba miswelo yonso.”​—Tetusa 2:11.

16. Lelo bene Kidishitu babajinji bamo bāonene namani kanye kakatampe ka Leza?

¹⁶ Tutambulanga madyese mavule pa mwanda wa kanye kakatampe ka Yehova. Nanshi, ketufwaninwepo kona kanye kandi, ko kunena’mba, kwikalamuna ke kabepelo ka kulongela’mo bubi. Mu bene Kidishitu babajinji, mwādi bamo bādi “balamuna kanye kakatampe ka Leza . . . ke kabepelo  ka kwiendeja pampikwa bumvu.” (Yude 4) Padi bano bene Kidishitu bampikwa kikōkeji bādi balanga’mba nansha shi abajilula namani, Yehova ukendelela kwibalekela. Bādi ke baningila’nka ne kuningila banababo balonge bubi pamo bwa abo. Dyalelo, ense ulonga namino ufutululanga “na kibengo mushipiditu wa kanye kakatampe.”​—Bahebelu 10:29.

17. Le Petelo wāletele madingi’ka a kamweno?

¹⁷ Satana i mongole bene Kidishitu bamo dyalelo balange’mba shi abalonga bubi Yehova ukebalekela’nka ponka’pa. Shako Yehova udi na mutyima wa kulekela banonga bibi besāsa; inoko, witusakilanga tulwe na bya kusakasaka bya bubi bwetu. Yehova wāpele Petelo mushipiditu asoneke amba: “Shi ke pano, banwe baswedibwe, byomuyukile kala bino’bi, dyumukai kutyina’mba bakemongola na kilubo kya bantu bajilula bijila, kemujimija kininga kyenu. Ino tamai’nka kutama mu kanye kakatampe ne buyuki bwa Mfumwetu Umpandiji Yesu Kidishitu.”​—2 Petelo 3:17, 18.

18. Le i biselwa’ka byotudi nabyo pa mwanda wa kanye kakatampe ka Yehova?

¹⁸ Tufwijanga’ko mpata pa mwanda wa kanye kakatampe ka Yehova. Nanshi, tufwaninwe kupāna byabuntu byetu mwanda wa kutumbija Yehova ne kukwasha bakwetu. Ye byotufwaninwe kulonga. Tukengidija namani bino byabuntu? Polo amba: “Penepo nanshi, byotudi na byabuntu bishileshile mwendele kanye kakatampe kotupelwe, shi i kyabuntu kya bupolofeto, tunenei bupolofeto mwendele lwitabijo lotupelwe; shi kadi i mwingilo, twendelelei na uno mwingilo; kadi yewa ufundija, endelele na bufundiji bwandi; kadi yewa ukankamika, endelele na kukankamika kwandi; . . . yewa ufwilañana lusa nandi, endelele kufwila lusa na mutyima wa tusepo.” (Loma 12:6-8) Nanshi pa mwanda wa kanye kakatampe ka Yehova, tudi na kiselwa kya kusapula bininge, kufundija bantu bakwabo Bible, kukankamika batutu ne bakaka, ne kufwila lusa muntu ense witulubila.

19. Le i kiselwa’ka kyotupelwe kyotukabandaula mu kishinte kilonda’ko?

¹⁹ Pamo bwa boba besēlwe kupityila ku kanye kakatampe ka Yehova, netu tufwaninwe kulonga bukomo bwetu bonso bwa “kusapula ne pa mfulo bukamoni bwa myanda miyampe ya kanye kakatampe ka Leza.” (Bilongwa 20:24) Tukabandaula kino kiselwa mu kishinte kilonda’ko.