1, 2. (a) Lombololenu cisimo ca Yesu ca yala mukua citungu ca viniu. (b) Vati cisimo caco ca solola vifua via vuhuanga na kavumbi?

UMO yala ua kele na citungu ceni ca viniu ua ile na ku kumuna vamala va ku mu pangele. Ua likuminyine ku va fueta imo ndando ya vimbongo, kaha vamala vaco va tavele. Vunoni mu ku linga ivenia lihia ua tondele vakua ku panga vavengi, ua ile na ku kumuna naua vakuavo mu vintsimbu via ku liseza-seza. Kaha ua litavelele ku fueta vamala vaco ndando ya cili. Ku cinguezi, ivene lihia ua kunguluile vakua ku mu pangela vose linga a va fuete. Ua va fuetele ndando imo na vaze va putukile ku panga fume ku cimene na vaze va pangele ola imo lika. Vunoni vaze vamala va suile ku panga ku cimene va temene, kaha ivene liha ua handekele na umo uavo, ngueni: “Ka ci tava ange ku linga na vufuko vuange ngue ange ivene nji na zange, ni? Liso liove lia lipi muomu ange nji ua cili?”​—Mateo 20:1-15.

² Cisimo ca Yesu ci tu longesa viuma via seho ku tuala ha “kavumbi” ka Yehova kaze ka ka tu pandele. (Tandenu 2 Kolintu 6:1.) Mu njila ika? Vamo va hasa ku singanieka ngecize vamala va pangele litangua liose va pandele ku tambula vimbongo via vingi ku hiana vakuavo. Vunoni ivene lihia ua muesele kavumbi ka kama ku vose na vaze va putukile ku panga ku mutana. Umo mulongisi  ua kama ua lomboluele eli lizi “kavumbi” li va soneka mu Mbimbiliya ngueni: “Lizi liaco lia lomboloka vuana vue ku tambula muntu ka pandele ku vu tambula ni ka vua mu fuilile.”

3, 4. Vati Yehova ue ku muesa kavumbi ku vantu vose, kaha omo lia vika?

³ Mbimbiliya ya tu leka ngecize kavumbi ka Njambi ka pua “vuana.” (Efeso 3:7) Mu ku linga ka tu hasa ku ononoka Yehova mu vutantuluke, nga ka tua pandele ku tambula nkala kavumbi ka Njambi. Mua vusunga, tua fuila ku-tsa. Muangana Solomone ua handekele ngueni: “Ka hesi umo mukua vuviuke, ue ku panga via ku viuka, kaha ke ku linga vupi.” (Ekelesiaste 7:20) Ku lutue lua ntsimbu kapostolo Paulu ua sonekele naua ngueni: “Muomu vose va na lingi vipi, va na simina ku vumpahu vua Njambi,” kaha “fueto ya vupi, ku-tsa.”​—Loma 3:23; 6:23a.

⁴ Mu ku linga Yehova ua lema vantu cikuma, “ua hele Muaneni umo lika” a ku tu tsile. Ka kuesi kavumbi ka hiana ovu vuhuanga vua kama ngeci. (Yoano 3:16) Paulu ua sonekele ngueni “vunoni tu mona uze i va na puisa kavundende muintsi lia tungelo, ikeye Yesu vene omo ku yandela ku-tsa va na mu hakela cilongo ca vumpahu na kasingimiko, linga ku kavumbi ka Njambi, a makele ku-tsa omo vose.” (VaHevelu 2:9) Cili vene, “vuana vua Njambi, muono ua miaka yose ua ya-ye muli Kilistu Yesu Muangana uetu.”​—Loma 6:23b.

5, 6. Vika vi hasa ku izamo nga tu tava ku tu endesa (a) ku vupi? (b) ku kavumbi?

⁵ Omo lia vika tue ku linga vupi na ku-tsa? Mbimbiliya nguayo omo lia “ku vulumuna ca uze umo lika, ku-tsa ca suanene.” Mu ku linga tua tunda hali Andama, ka tua tantulukile ngeci tue ku-tsa. (Loma 5:12, 14, 17) Vunoni tu hasa ku hangula ku viana vupi vu tu endese ni ku tu sika. Mu njila ika? Nga tu muesa lutsilielo mu ku tu kula ca Kilistu, tu ka uana ku vezika ku hitila mu kavumbi ka Yehova. Mbimbiliya nguayo: “Kuze ku vua lanene vupi, kavumbi ka lanene mua ku hiana cikumakuma; Ngoco vene ngue vupi vua suanene ha ku-tsa, ngecize vene kavumbi ka ka suane ha vuviuke ku muono ua miaka yose ya ya-ye hali Yesu Kilistu Muangana uetu.”​—Loma 5:20, 21.

⁶ Vutuhu tu vakua vupi, ka tua pandele ku tavesa vupi vu tu sike. Ngeci nga tua vulumuna, tue ku vundila Yehova a tu ecele. Paulu ua tu mamuine ngueni: “Vupi ka vu ka mi suana, houe: muomu ka muesi ku mezi a lisiko vunoni mu kavumbi.” (Loma 6:14) Vati tu hasa ku uana vukuasi ku kavumbi ka Njambi? Paulu ngueni: “Kavumbi ka Njambi ka na soloka. . . na ku tu longesa, linga mu ku viana ku sahula Njambi na masungu a hano ha mavu, tu yoye na ku silikinia na mu vuviuke na mu ku lemesa Njambi ku ntsimbu eyi ya vuovuno.”​—Tito 2:11, 12.

7, 8. Vika ca lomboloka kavumbi ka Yehova “ka ku fua mueka na mueka”? (Talenu cikupulo ca ku vuputukilo.)

⁷ Kapostolo Petulu ua sonekele ngueni: “Ngue ku muntu ku muntu mu na tambula vuana, pangenu navuo ha kati kenu, ngue vangamba va cili va kavumbi ka Njambi ka ku fua mueka na mueka.” (1 Petulu 4:10) Vika via lomboloka kavumbi ka Yehova “ka fua mueka na mueka”? Ka lomboloka ngecize nkala visoti vi tu hasa ku lua navio mu muono, Yehova a ka tu hana vi tondeka linga tu kolese. (1 Petulu 1:6) Ntsimbu yose a ka tu hana vi tu tonda mpundu linga tu vule nkala ceseko.

⁸ Kapostolo Yoano ua sonekele ngueni: ‘Etu  vose tua tambuile ku ku-sula ceni, na kavumbi ka ku pandakana ku kavumbi.’ (Yoano 1:16) Tue ku tambula vivezikiso via vingi, muomu Yehova ue ku muesa kavumbi keni mu vifua via ku liseza-seza. Vivezikiso viaco via pua vika?

9. Ku vezika cika tue ku uana mu kavumbi ka Yehova, kaha vati tu hasa ku muesa ku santsela?

⁹ Yehova ue ku tu ecela ku vipi vietu. Omo lia kavumbi keni, Yehova ue ku tu ecela ku vipi. Vunoni ue ku lingamo lika nga tu liveya na ku aluluka na ku lihakela kapandi ka ku lua na vizango via vipi. (Tandenu 1 Yoano 1:8, 9.) Paulu ua lomboluelele Vakua Kilistu va ku vuavesa va ku matangua eni, mua vati Yehova ue ku konekela vipi. Ua handekele ngueni: “[Njambi] Ikeye ua tu ohielele ku ngolo ya milima, kaha na tu lunduluila ku vuangana vua Muana uze ua cilemo ceni; Muli ikeye tu li na ku-patuka cetu, ku-ecela ca vipi vietu.” (Kolose 1:13, 14) Tua vezika cikuma ku ngozi ya Yehova ngeci tu tonda ku mu sangala. Mu ku linga Yehova ue ku tu ecela ku vipi, tu hasa naua ku tambula vivezikiso via vingi kuli ikeye.

10. Ku vezika cika tua kala naco omo lia kavumbi ka Njambi?

¹⁰ Tu hasa ku kala na vusamba vua ciyulo na Njambi. Etu ka tua tantulukile, fume ha ku semuka cetu, tue ku pua vitozi va Njambi. Vunoni Paulu ngueni: “Omo tua puile vitozi, tua lihambele na Njambi ha ku-tsa ca Muaneni.” (Loma 5:10) Vunoni omo lia ku tu kula, tu hasa ku lihamba na Njambi, ni nguetu tu hasa ku kala mu ciyulo na Njambi na ku likuata neni vusamba. Paulu ua lomboluele ku likuata ca kalaho na kavumbi ka Njambi mua lekele vamuanaye va ku vuavesa ngueni: “Omo etu tu na sambue mu ku tsiliela, tu na lihambe na Njambi hali Muangana uetu Yesu Kilistu; hali ikeye naua tu na kovela, ha ku tsiliela, mu kavumbi kano ha tu na mana; kaha tu viukilila mu ku lavelela vumpahu vua Njambi.” (Loma 5:1, 2) Ca pua ku vezika ca kama mpundu ku kala na vusamba vua ciyulo na Yehova!

11. Vati va ku vuavesa ve ku kuasa “vampanga veka” va pue vakua vuviuke?

¹¹ Tu hasa ku pua vakua vuviuke ku meso a Njambi. Kapolofeto Ndaniele ua sonekele ngueni ku ntsimbu ya ku kotokela, “vaze va li na mangana,” ua tumbuile va ku vuavesa, va ka “aluluisa va vengi ku vuviuke.” (Tandenu Ndaniele 12:3.) Mu njila ika va ku vuavesa ve ku lingamo? Ve ku ambulula muzimbu ua cili na ku longesa masiko a Yehova ku makulukazi a “vampanga veka.” (Yoano 10:16) Ve ku va kuasa va pue vakua vuviuke ku meso a Njambi, kaha ce ku tava lika ku lingamo omo lia kavumbi ka Yehova. Paulu ua lomboluele ngueni: “Va na sambue ca vuana ku kavumbi keni [Njambi] ha ku-kuka cize ci li hali Kilistu Yesu.”​—Loma 3:23, 24.

12. Vati civundilo ca likuata na kavumbi ka Njambi?

¹² Tu hasa ku suena kuli Njambi mu civundilo. Omo lia kavumbi ka tu muesa Yehova tu hasa ku vundila kuli ikeye. Paulu ua tumbuile citumamo ca Yehova ngueni, “citumamo ca kavumbi,” kaha na tu lania tu sueneko “na ku simpa.” (VaHevelu 4:16a) Tu hasa ku vundila kuli Yehova nkala ntsimbu ku hitila muli Yesu. Ca pua ku vezika ca kama mpundu! Paulu ua handekele ngueni: “Tu li na ku simpa kaha tu hasa ku ingilako na ku takama omo tu na mu tsiliela.”​—Efeso 3:12.

13. Vati kavumbi ka Njambi ka hasa “ku tu kuasa ku ntsimbu tu ka ka zela”?

¹³ Tu hasa ku uana vukuasi ku ntsimbu i tondeka. Paulu ua tu kaniamesele ku vundila kuli Yehova hose oho ha tu tondela, “linga  tu tambule cikeketima, kaha tu uane kavumbi ka ku tu kuasa ku ntsimbu tu ka ka zela.” (VaHevelu 4:16b) Nkala vieseko vi tu lua navio mu muono, tu hasa ku vundila vukuasi kuli Yehova. Kaha ue ku kumbulula vivundilo vietu cipue nga ka tondo ku lingamo. Ntsimbu imo ue ku pangesa vamuanetu mu cikungulukilo va tu kuase. Yehova ue ku kumbulula vivundilo vietu linga tu hase “ku simpa mu ku handeka, nguetu, ‘Muangana [Yehova] ikeye mukuasi uange; Ka nji kevua vuoma: Muntu a ka nji linga vikandzo?’”​—VaHevelu 13:6.

14. Vati kavumbi ka Yehova ke ku lembezieka mitima yetu?

¹⁴ Tu hasa ku uana ku lembezieka mu mitima yetu. Ca pua ku vezika ca kama ku tu simpisa kuli Yehova nga tuli na visoti via mu visinganieka. (Visamo 51:17) Omo Vakua Kilistu va ku Tesalonika, va kele na ku va yandesa, Paulu ua va sonekelele ngueni: “Muangana uetu Yesu Kilistu ivene, na Njambi Tatetu uze ua tu lemene kaha ua tu hele ku-lilembezieka ca miaka yose ya ye-ye na ku-lavelela ca ku viuka ha kavumbi keni, ikeye a lembezieke mitima yenu na ku i kolesa.” (2 Tesalonika 2:16, 17) Ca pua ku vezika ku tantekeya ngecize, omo lia kavumbi keni, Yehova ua tu lema na ku tu niunga!

15. Lulavelelo luka tu li naluo omo lia kavumbi ka Njambi?

¹⁵ Tua lavelela muono ua ya-ye. Mu ku pua vakua vupi, ka tua kele na lulavelelo ca ku hona vukuasi vua Yehova. (Tandenu Visamo 49:7, 8.) Vunoni Yehova ua tu hana lulavelelo lua seho ya kama. Lulavelelo luka? Yesu ua handekele ngueni: “Tata cikeco eci, ngecize uose a mona Muana, kaha a mu tsiliela, a ka kala na muono ka ue ku hua ua ya-ye; kaha nji ka mu sangula ku vatsi ku litangua lize lia ku kotokela.” (Yoano 6:40) Tu li na lulavelelo lua ku ka yoya miaka yose omo lia kavumbi ka Yehova. Paulu ua handekele ngueni: “Kavumbi ka Njambi ka na soloka na ku neha vuovoke ku vantu vose.”​—Tito 2:11.

16. Vati vamo Vakua Kilistu va ku sekulu ya ku livanga va sahuile kavumbi ka Njambi?

¹⁶ Tue ku tambula vivezikiso via vingi omo lia kavumbi ka Yehova. Vunoni ka tua pandele ku pangesa ngozi yaco ku pua vukovelelo vua ku linga vupi. Ha kati ka Vakua Kilistu va ku livanga ha kele vamo va sahuile “kavumbi ka Njambi . . . ku ka alulula viuma via vipi.” (Yunda 4) Ava Vakua Kilistu vaco va ku hona vusunga, va singaniekele nguavo va hasa ku linga vupi, kaha Yehova a ka pua na ku vecela ntsimbu yose. Va setekele na ku lingisa vamuanaye va kovele mu vupi vu va kele na ku linga. Ku matangua ano uose a lingamo a “sahula sipilitu ua kavumbi.”​—VaHevelu 10:29.

17. Petulu ua hele cimamuna cika ca ntsindo?

¹⁷ Matangua ano Satana na puputisa vantu va singanieke nguavo va hasa ku linga vupi, kaha Yehova a ka vecela lika. Cili vene Yehova a li na cizango ca ku ecela vakua ku liveya ku vupi, vunoni a tonda tu lue na vizango vietu via vupi. Ngeci ua huiminine Petulu ku soneka ngueni: “Ngoco vene enu, vakua cilemo cange, mu mu ku tantekeya evi laza, zangamenu ku tina mu hungumuke na ku-sevuka ca vakua vipi, kaha mu tanguke ku ku-kolesa cenu. Vunoni kulenu mu kavumbi na ciningi ca Muangana uetu ikeye Muovole Yesu Kilistu. Kuli ikeye ku kale vumpahu vuovuno na ku litangua ka lie ku hua lia ya-ye.”​—2 Petulu 3:17, 18.

18. Viteli vika tua kala navio omo lia kavumbi ka Yehova?

¹⁸ Tue ku santsela cikumakuma ku kavumbi ka Yehova. Ngeci mukemuo tua pande ku pangesa vuana vuetu mu ku hana Yehova kasingimiko na ku kuasa vakuetu. Tu li na kapandi ka ku lingamo. Vati tu hasa ku pangesa vuana vuetu? Paulu ngueni: “Kaha omo tu li na vuana vueka na vueka ngue ku kavumbi kaze va tu heleko,. . . cipue vipanga tu hakenu mitima ku vipanga vietu; cipue mukua ku longesa, a lihake ku vulongesi vueni; Cipue mukua ku nangula a lihake ku ku nangula ceni; . . . mukua ku tetela vakuavo, a linge na ndzolela.” (Loma 12:6-8) Kaha omo lia kavumbi ka Yehova, tu li na kapandi ka ku panga na ngolo yose mu ku ambulula, ku longesa vakuetu Mbimbiliya, ku kaniamesa vamuanetu na ku ecela nkala muntu na tu vulumuina.

19. Viteli vika vi tua kala navio vi tu ka lilongesa mu cilongesa ci na hatako?

¹⁹ Mu ku pua vaze va va vezikisa na kavumbi ka Yehova, tua pande ku ivua ntsindiye ya ku lihakela kapandi ka “ku ambulula vukaleho vua zimpande zia cili zia kavumbi ka Njambi.” (Vilinga 20:24) Tu ka hilula ha viteli viaco mu cilongesa ci na hatako.