1, 2. (a) Fotokozani ciratizo ca Jezu cakulewa bza mweneciro munda wa mpesa. (b) Kodi nkhaniyi imbalatiza tani makhalidwe ya kupasa na kudeka mtima kukulu?

MACIBESE yanango, mweneciro munda wa mpesa adayenda ku msika kuti akanyang’ane wanthu kuti akalime m’munda mwacemo. Iye adawagumana ndipo adapangana nawo kobiri yomwe angadawapasa, ndipo wanthuwo adabvuma. Tsono pakuti mwenekaciro mundayo akhafuna anyabasa azinji, iye nsiku imweyo adayenda kazinji kense ku msikako kuti akanyang’ane wanthu azinji. Iye adatsimikiza kuti angadapasa kobiri wanthu wensenewo mwa cirungamo. Kuphampha kwa nsikuyo, mweneciro mundayo adatsonkhanisa anyabasa wensene kuti awapase kobiri yawo. Iye adapasa wensene kobiri ibodzi-bodzi napo kuti winango akhadaphata basa kwa nsiku ya thunthu ndipo winango kwa ora ibodzi basi. Tsono wanthu omwe adaphata basa kwa nsiku ya thunthu adayamba kudandaula, koma mweneciro mundayo adati: ‘Kodi mulibe kubvuma kobiri yomwe tapangana ire? Kodi ndiribe ugo bwakupasa anyabasa wangu wense ciri-cense comwe ine  ndin’funa? Kodi munkuipidwa thangwe ndine munthu wakupasa?’—Mateu 20:1-15.

² Nkhani ya Jezuyi imbatipasa pfunziro lakufunika kwene-kwene pa nkhani ya ‘kudeka mtima kukulu’ kwa Yahova. ^[1] (Onani mafala yakuthumizira.)(Werengani 2 Wakolinto 6:1.) Kodi ni pfunziro liponi? Winango angakumbuke kuti wanthu omwe adaphata basa nsiku ya thunthu wale akhafunika kupasidwa kobiri zizinji kuposa winangowo. Tsono mweneciro munda adalatiza kudeka mtima kukulu kuna omwe adaphata basa kwa nthawe zing’ono-ng’ono pa nsikuyo. Pakulewa bza mafala yakuti ‘kudeka mtima kukulu’, mdziwi munango adalewa kuti: “Nkhani ikulu pa mafalaya inkuthandauza kupasa munthu fovolo cinthu comwe akhatemera lini na bzomwe wacita.”

3, 4. Kodi Yahova adalatiza tani kudeka mtima kukulu ndipo n’thangwe ranyi?

³ Bibliya limbatiuza kuti kudeka mtima kukulu kwa Mulungu ni ‘mphaso ya fovolo.’ (Wayefezo 3:7) Pakuti tingakwanise lini kubvera Yahova mwakulungamiratu, ifepano tiribe kuthema kutambira kudeka mtima kuli-kwense kwakucokera kwa Mulungu. Kulewa cadidi, ifepano tingadathemera kufa. Mambo Salomau adalewa kuti: ‘Palibe munthu wakulungama pa dziko la pansi omwe nthawe zense ambacita bzabwino bzokha-bzokha mwakusaya kuphonya.’ (Mpalizi 7:20) Patsogolo pace mpostolo Paulo adalewa kuti: ‘Pakuti wense adaphonya ndipo ambaifikira lini mbiri ya Mulungu.’ Ndipo ‘malipo ya pikado ni infa.’—Waroma 3:23; 6:23a.

⁴ Thangwe rakuti Yahova ambafuna kwene-kwene wanthu, iye ‘adatumiza Mwana wace wakubadwa yekha’ kuti adzatifere. Kumweku kukhali kudeka mtima kukulu kwakusaya kundendemerana nako. (Juwau 3:16) Paulo adalewa kuti Jezu ‘tsapano adabvala umbiri na ulemu ninga msinga msolo ya umambo pakuti adatsautsidwa mpaka kufa ndipo thangwe ra kudeka mtima kukulu kwa Mulungu, iye adalawidza infa m’mbuto mwa wanthu wense.’ (Wahebereu 2:9) Inde, ‘mphaso yomwe imbaperekedwa na Mulungu ndiyo moyo wamuyaya mwa Kristu Jezu, Mbuya wathu.’—Waroma 6:23b.

5, 6. Kodi ni bzakutewera bziponi bzomwe bzingabwere tikakhala kuti tinkutongedwa na (a) pikado? (b) kudeka mtima kukulu?

⁵ Thangwe ranyi timbacita pikado ticifa? Bibliya limbalewa kuti ‘infa idatonga thangwe ra pikado ya munthu m’bodzi.’ Tenepo, pakuti ndife wana wa Adamu, ndife wakuperewera ndipo timbafa. (Waroma 5:12, 14, 17) Tsono, tingasankhule kuleka kutongedwa, ayai kutsogoleredwa na pikado. Kodi bzimwebzi bzingakwanisike tani? Tikakhulupira nsembe ya cakulombolera ya Kristu, tingagumane phindu thangwe ra kudeka mtima kukulu kwa Yahova. Bibliya limbati: ‘Pomwe pikado idathumizirika, kudeka mtima kukulu kudathumizirikambo kwene-kwene. Thangwe ranyi? Kuti ninga momwe pikado idatongera pabodzi na infa, tenepombo kudeka mtima kukulu kutonge mwa cirungamo na kuti kutsogolere ku moyo wakusaya kumala mwa Jezu Kristu.’—Waroma 5:20, 21.

⁶ Napo tikali wanthu wakuphonya, tin’funika lini kulekerera kuti pikado ititonge. Tenepo tikacita cinthu ciri-cense cakuphonyeka, timbakumbira Yahova kuti atikhululukire. Paulo adatilimbisa kuti: ‘Pikado in’funika lini kutonga pakati panu, thangwe muli lini pansi pa cakutonga, koma pansi pa kudeka mtima kukulu.’ (Waroma 6:14) Kodi tingagumane tani phindu thangwe ra kudeka mtima kukulu kwa  Mulungu? Paulo adati: ‘Pakuti kudeka mtima kukulu kwa Mulungu . . . kwatipfunzisa kuti tilambe makhalidwe yakuipa na bzikhumbo bza dziko, koma kuti tikhale na makumbukidwe yabwino, wacirungamo na wakubzipereka kwa Mulungu mu nkonzedwe uno wa bzinthu.’—Tito 2: 11, 12.

7, 8. Kodi mafala yakuti kudeka mtima kukulu kwa Mulungu ‘kumbalatizidwa mu njira zakusiyana-siyana,’ yambathandauza ciyani? (Onani cithunzi-thunzi pa tsamba 16.)

⁷ Mpostolo Pedru adanemba kuti: ‘Mwakubverana na mphaso yomwe ali-wense adatambira, iphatiseni basa pa kutumikira winango ninga nyakunyang’anira wabwino wa kudeka mtima kukulu kwa Mulungu, komwe kumbalatizidwa m’njira zakusiyana-siyana.’ (1 Pedru 4:10) Kodi mafala yakuti kudeka mtima kukulu kwa Mulungu ‘kumbalatizidwa mu njira zakusiyana-siyana,’ yambathandauza ciyani? Bzimwebzi bzimbathandauza kuti pa bzineso bzense bzomwe tingagumane nabzo pa moyo, Yahova an’dzatipasa bzomwe n’bzakufunika kuti tikwanise kupirira. (1 Pedru 1:6) Nthawe zense iye an’dzatipasa bzomwe tin’funikadi kuti tikwanise kupirira bzineso bziri-bzense.

⁸ Mpostolo Juwau adanemba kuti: ‘Pakuti pa bzinthu bzizinji bzomwe iye akhanabzo, tensenefe tidatambira kudeka mtima kukulu kwakusaya kumala.’ (Juwau 1:16) Ifepano timbatambira bzisimbo bzizinji thangwe rakuti Yahova ambalatiza kudeka mtima kwace kukulu mu njira zakusiyana-siyana. Kodi bzinango mwa bzisimbobzi n’bziponi?

9. Kodi timbagumana tani phindu thangwe ra kudeka mtima kwa Yahova, ndipo tingalatize tani kutenda kwathu bzimwebzi?

⁹ Yahova ambatilekerera pikado zathu. Thangwe ra kudeka mtima kwace kukulu, Yahova ambatilekerera pikado zathu. Tsono iye ambacita bzimwebzi kokha tikakungula na kupitiriza kulimbana na bzikhumbo bzathu bza pikadobzo. (Werengani 1 Juwau 1:8, 9.) Paulo adafotokozera Akristau wakudzozedwa wa mu nthawe yace momwe Yahova ambalekerera pikado. Iye adati: ‘[Mulungu] adatipulumusa ku mphanvu ya utongi bwa mdima, acititumiza ku umambo bwa Mwana wace wakufunidwa, omwe mwa iye tidalomboledwa, na kulekereredwa bzakuphonya bzathu.” (Wakoloso 1:13, 14) Tinkutenda kwene-kwene nsisi za Mulungu ndipopa timbafuna kumutumbiza. Ndipo thangwe rakuti Yahova ambatilekerera pikado zathu, ifepano tingatambire pomwe bzisimbo bzinango bzizinji.

10. N’ciyani cimbatikondwesa thangwe ra kudeka mtima kukulu kwa Mulungu?

¹⁰ Tingakhale pa uxamwali wabwino na Yahova. Ndife wanthu wakuperewera, tenepo pa nthawe yomwe timbabadwa, timbakhala anyamadulanthaka wa Mulungu. Tsono Paulo adati: ‘Pomwe tikhali anyamadulanthaka, tidabveranisidwa na Mulungu mwa infa ya  Mwana wace.’ (Waroma 5:10) Thangwe ra cakulombolera, tingabveranisidwe na Mulungu, bzomwe bzingathandauze kuti tingakhale pa mtendere na iye ticikhala axamwali wace. Paulo adafotokoza bzimwebzi na momwe bzimbabveranira na kudeka mtima kukulu kwa Yahova pomwe iye adauza abale wace wakudzozedwa kuti: ‘Tsapano pakuti tayesedwa wakulungama thangwe ra cikhulupiro, bwerani tikhale pa mtendere na Mulungu mwa Mbuya wathu Jezu Kristu, mwa ule omwe tidatambirambo kudeka mtima kukulu komwe tinako tsapano thangwe ra cikhulupiro; mbatikondweni na cidikhiro ca kugumanika mu umbiri bwa Mulungu.’ (Waroma 5:1, 2) Ndife wakutenda kwene-kwene kuti timbakondwa na uxamwali bwabwino na Yahova!

11. Kodi wakudzozedwa ambabweresa tani ‘mabira manango’ ku cirungamo?

¹¹ Tingakhale wakulungama pamaso pa Mulungu. Mpolofeta Danyeri adanemba kuti mu nthawe yacimaliziro, ‘wanthu wa nzeru,’ omwe ambaimira wakudzozedwa angadadzabweresa ‘wanthu azinji ku cirungamo.’ (Werengani Danyeri 12:3.) Kodi wakudzozedwawo ambacita tani bzimwebzi? Iwo ambapalizira bzipsa bzabwino na kupfunzisa bzakutonga bza Yahova kuna bzulu na bzulu bza ‘mabira manango.’ (Juwau 10:16) Iwo ambawathandiza kuti akhale wakulungama pamaso pa Mulungu, bzomwe bzimbakwanisika kokha na kudeka mtima kukulu kwa Yahova. Paulo adafotokoza kuti: ‘Kuyesedwa kwawo wakulungama kuli ninga mphaso yafovolo thangwe ra kudeka mtima kwace kukulu [Mulungu] mwa kutsudzulidwa na cakulombolera cakulipiridwa na Kristu Jezu.’—Waroma 3:23, 24.

12. Kodi mpembo umbabverana tani na kudeka mtima kukulu kwa Mulungu?

¹² Tingakwanise kufenderera Mulungu mwa mpembo. Thangwe ra kudeka mtima  kwace kukulu, tingakwanise kupemba kuna Yahova. Paulo adalewa kuti tingafenderere ‘mpando wa umambo’ wa Mulungu ndipo ankutilimbisa kuti ‘timbamufenderere na ufulu bwakulewalewa.’ (Wahebereu 4:16a) Tingapembe kwa Yahova nthawe iri-yense mwa Jezu. Cadidi, bumwebu ni ulemu bukulu! Paulo adati: ‘Tina ufulu bwa kulewalewa na kufenderera Mulungu na mtima wense thangwe ra cikhulupiro cathu mwa Kristu.’—Wayefezo 3:12.

13. Kodi kudeka mtima kukulu ‘kungatithandize tani pa nthawe yakuthemera?’

¹³ Tingagumane thandizo pa nthawe yakuthemera. Paulo adatilimbisa kuti timbapembe kwa Yahova nthawe iri-yense yomwe tingafune bzimwebzo, ‘kuti aticitire nsisi na kutilatiza kudeka mtima kukulu pa nthawe yomwe tikufunikira thandizo.’ (Wahebereu 4:16b) Pali-pense pomwe tingagumane na bzineso pa moyo wathu tingakumbire Yahova kuti atithandize. Iye ambangingimizidwa lini kutawira mipembo yathu, koma ambaitawira mwa kufuna kwace. Iye kawiri-kawiri ambaphatisa basa abale na mpfumakazi zathu kuti atithandize. Yahova ambatawira mipembo yathu ‘tenepo tin’funika kukhala wakulimba mtima ticilewa kuti: “Yahova ndiye mthandizi wangu, cipo ndicidzacita mantha. Munthu angandicitenyi?”’—Wahebereu 13:6.

14. Kodi kudeka mtima kukulu kwa Mulungu kumbapasa tani phindu?

¹⁴ Ifepano tingatambire mtsangalazo wa mu mtima. N’cisimbo cikulu kwene-kwene cakuti Yahova ambatitsangalaza napo pomwe tidasunama. (Psalymo 51:17) Pomwe Akristau Wakutesalonika akhali pa cizunzo, Paulo adanemba kuti: ‘Mbuya wathu, Jezu Kristu caiyeyo na Mulungu Baba wathu, omwe adatifuna na kutipasa mtsangalazo wakusaya kumala na cidikhiro cabwino mwa kudeka mtima kukulu, atsangalaze mitima yanu ndipo akulimbiseni.’ (2 Watesalonika 2:16, 17) N’bzakutsangalaza kudziwa kuti Yahova ambatifuna ndipo ambatisamalira si kokha thangwe ra kudeka mtima kwace kukulu!

15. Kodi timbakhala na cidikhiro ciponi thangwe ra kudeka mtima kukulu kwa Mulungu?

¹⁵ Tina cidikhiro ca moyo wakusaya kumala. Pakuti ndife wakuphonya, tingakhale lini na cidikhiro ciri-cense mwakusaya kuthandizidwa na Yahova. (Werengani Psalymo 49:7, 8.) Tsono Yahova adatipasa cidikhiro ca bwino kwene-kwene. Kodi n’cidikhiro ciponi? Jezu adati: ‘Cakulinga ca Baba wangu n’cakuti, ali-wense wakuzindikira mwana na kumukhulupira akhale na moyo wakusaya kumala.’ (Juwau 6:40) Tenepo tina cidikhiro cakudzakhala kwa muyaya thangwe ra kudeka mtima kukulu kwa Yahova. Paulo adati: ‘Kudeka mtima kukulu kwa Mulungu kudaonekera, kucibweresa cipulumuso kwa wanthu wa mitundu yense.’—Tito 2:11.

16. Kodi Akristau winango wakuyambirira akhanyoza tani kudeka mtima kukulu kwa Mulungu?

¹⁶ Timbatambira bzisimbo bzizinji thangwe ra kudeka mtima kukulu kwa Yahova. Tsono, tin’funika lini kukuwona kudeka mtima kwa Yahova ninga mpata wakucitira pikado. Pakati pa Akristau wakuyambirira, pakhana winango omwe adayamba ‘kuwona kudeka mtima kukulu kwa Mulungu kukhala thangwe ra kucitira khalidwe la kunyansa.’ (Juda 4) Akristau wakusaya kukhulupirikawa akhawona kuti angadacita pikado ndipo Yahova nthawe zense angadawalekerera. Iwo adafika pa kuyeza kupumpswa abale wawo kuti ambacitembo  pikado zawozo. Nsiku zino, ali-wense omwe ambacita bzimwebzi ambakhala ‘ankunyoza mzimu wa kudeka mtima kukulu.’—Wahebereu 10:29.

17. Kodi ni malango yaponi yamphanvu yomwe Pedru adayapereka?

¹⁷ Nsiku zino Sathani ankupumpswa Akristau winango kuti ambakumbuke kuti iwo angambacite pikado utowa ndipo Yahova acimbawakhululukira. N’cadidi kuti Yahova ambalekerera pikado za munthu omwe akungula; tsono iye ambafuna kuti timbalimbane na bzikhumbo bzathu bza pikado. Yahova adafulizira Pedru kuti anembe kuti: ‘Tenepo wakufunidwamwe, pakuti munkudziwiratu bzimwebzi, cenjerani kuti muleke kusoceresedwa na bzakuphonya bza wanthu winango na kuti muleke kugwa. Kusiyana na bzimwebzi, pitirizani kukula mwa kudeka mtima kukulu na kukhala na cidziwiso ca Mbuya na Mpulumusi wathu Jezu Kristu.’—2 Pedru 3:17, 18.

18. Kodi tina udindo buponi thangwe ra kudeka mtima kukulu kwa Mulungu?

¹⁸ Ifepano tinkutenda kwene-kwene kudeka mtima kukulu kwa Yahova. Tenepo tin’funika kutumbiza Yahova pabodzi na kuthandiza winango. Bzimwebzi ni udindo bwathu. Kodi tingacite tani bzimwebzi? Paulo adalewa kuti: ‘Tenepo, pakuti tina mphaso zakusiyana-siyana mwakubverana na kudeka mtima kukulu komwe tidapasidwa, . . . penu ni utumiki, bwerani ticite utumikibo; ayai omwe ankupfunzisa, apitirize kupfunzisako; ayai omwe ambalimbisa, alimbise na mtima wense; . . . nyansisi, apitirize kulatiza mwakukondwa.’ (Waroma 12:6-8) Tenepo thangwe ra kudeka mtima kukulu kwa Yahova, tina udindo bwa kucita utumiki na nyongo, kupfunzisa Bibliya winango, kulimbisa abale na mpfumakazi wathu na kulekerera ali-wense omwe angatiphonyere.

19. Kodi tin’dzacezerana ciyani mu msolo unkutewerayu?

¹⁹ Ifepano tidasimbidwa thangwe ra kudeka mtima kukulu kwa Yahova. Ndipopa tin’funika kucita bzense bzomwe tingakwanise kuti ‘tipereke umboni bwakukwanira bwa bzipsa bzabwino bzakulewa bza kudeka mtima kukulu kwa Mulungu.’ (Mabasa 20:24) Kucita bzimwebzi ni udindo bwathu! Tin’dzacezerana udindo bumwebu mu msolo unkutewerayu.