1, 2. a) ¿Imatan Jesús willaran juj uvas chajrayoq runamanta? b) ¿Imatan chay willakuy Jehová Diosmanta yachachiwanchis?

JUJ kutinsi uvas chajrayoq runa tutallamanta plazata risqa chajranpi llank’amunankupaq runakunata contrataq. Wakin runakunata tarispas paykunawan rimanakusqa jornalninta pagapunanpaq. Chay p’unchaypiqa askha kutipis uvas chajrayoqqa plazata risqa runakuna contrataq. Llapankuwansi rimanakusqa iman paganata jinalla pagapunanpaq. Chay p’unchay tukupuqtinsi chay runaqa ch’isiyaq llank’aqkunamanpas juj horallata llank’aqkunamanpas igualta pagapusqa. Chaysi ch’isiyaq llank’aqkunaqa rimapakuyta qallarisqaku, jinas uvas chajrayoqqa nisqa: ‘¿Manachu juj jornalta paganaypaq rimanakuranchis? Kay qhepa kaqmanpas qanman jinallataqmi pagayta munani. Qolqeywanqa noqan yachani ima ruwaytapas. Icha, ¿envidiakunkichu allin runa kaqtiy?’, nispa (Mat. 20:1-15).

² Chay willakuytaqa Jesusmi willaran. Chaywanmi allinta  rikuchiran Jehová Dios “ancha sumaq sonqo” kasqanta ^[1] (qhaway 21 paginapi willakuyta) (leey 2 Corintios 6:1). Chay uvas chajrayoq runaqa ancha sumaq sonqo kaywanmi qhawariran pisi horallata llank’aq runakunata. Chay pasasqanmantan juj allin yachaq runa niran: “Bibliapi ‘ancha sumaq sonqo’ nisqa palabraqa mana mereceq runakunaman imapas gratislla qosqa kasqanmantan rimashan”, nispa.

3, 4. ¿Imanaqtinmi Jehová Dios runakunata sumaqta qhawariran? ¿Imaynatan chayta rikuchiran?

³ Bibliaq nisqan jina, Diospa ancha sumaq sonqo kayninqa juj regalon (Efes. 3:7, NM). Lliu runapas juchallikuqtaq kanchis chayqa, manan Diosqa sumaqtachu qhawariwananchis, aswanpas wañuymanmi juchachawananchis. Chaymi rey Salomonqa niran: “Manan allin kaqllatapuni ruwaq runaqa kanchu, mana jayk’aq juchallikuq chanin runapas manan kanchu”, nispa (Ecl. 7:20). Apóstol Pablopas niranmi: “Llapallanmi juchallikurqanku, chaymi Diospa k’anchashaq qayllanmanta karupi kashanku”, “juchaq pagayninqa wañuymi”, nispa (Rom. 3:23; 6:23a).

⁴ Jehová Diosqa runakunata anchata munakusqanraykun “sapan Churinta kachamuran” paykunarayku wañunanpaq. Chaypin aswan allinta rikukuran Diospa ancha sumaq sonqo kaynin (Juan 3:16). Chaymi apóstol Pablo niran: “Qhapaq kaywan jatunchaywan iman Jesusqa coronawan jina churasqa kashan, [...] Diospa ancha sumaq sonqo kayninpin payqa llapa runarayku wañuran”, nispa (Heb. 2:9, NM). Chayraykun ‘Diospa qokuynin Señorninchis Jesucristopi wiñay kausay’ (Rom. 6:23b).

5, 6. a) ¿Iman pasanqa juchaq kamachinpi kaqkunawan? b) ¿Iman pasanqa Diospa ancha sumaq sonqo kayninpi kaqkunawan?

⁵ Bibliaq nisqan jina, Adanpa juchan jawan wañuyqa llapa runata ‘rey jina kamachiran’ (Rom. 5:12, 14, 17, NM). Manaña wañuymanta librakuyta atisunmanchu chaypas, atisunmanmi juchaq kamachikuyninmanta librakuyta. Chaypaqmi Cristoq sacrificionpi iñinanchis, chhaynapin Jehová Diosqa ancha sumaq sonqo kayninta rikuchiwasun. Chayraykun Biblia nin: “Maypichus sinchi jucha kasqanpin Diospas astawanraq ancha sumaq sonqo kayninta rikuchin. ¿Imaraykun chayta ruwan? Chaytaqa ruwan, imaynan juchawan wañuywan rey jina kamachiranku chhaynata Diospa ancha sumaq sonqo kayninpas rey jina chanin kaywan kamachinanpaqmi, chhaynapi Señorninchis Jesucristorayku runakuna wiñay kausayta chaskinankupaq”, nispa (Rom. 5:20, 21).

⁶ Juchallikuqña kanchis chaypas, manan juchaq kamachinchu kananchis. Ima juchamanpas urmaspaqa kaq raton Jehová Diosmanta perdonta mañakunanchis. Chaymi apóstol Pablopas niran: “Qankunaqa manan kamachikuy simipichu kashankichis, aswanpas Diospa ancha sumaq sonqo kayninpin kashankichis, chaymi juchaqa mana qankunata dueñochakunanchu”, nispa (Rom. 6:14). Pabloqa nillarantaqmi: ‘Diospa ancha sumaq sonqo kaymi yachachiwanchis imachus  Diospa munaynin contrapi kaqta, kay pachaq millay munapayayninkunatawan cheqnikunanchispaq; yachachiwallanchistaqmi kay tiempopi allin yuyaywan, chaninta, Dios sonqo jina kausananchispaqpas’, nispa (Tito 2:11, 12).

7, 8. ¿Imaynapin Jehová Diospa ancha sumaq sonqo kaynin ‘imaymanapi rikukun’? (16 paginapi fotokunata qhaway.)

⁷ Apóstol Pabloqa nillarantaqmi: “Qankunaqa Diospa imaymanapi rikukuq ancha sumaq sonqo kayninta chaskiq allin mayordomokunan kankichis, chayrayku maykamachus Diospa qokuyninta chaskisqaykichisman jina jujkuna-jujkunawan servinakuychis”, nispa (1 Ped. 4:10, NM). Chhaynaqa ima sasachakuypiña tarikuqtinchispas Jehová Diosqa imachus necesitasqanchistan qowasunchis chay sasachakuyta aguantananchispaq. Chhaynapin paypa ancha sumaq sonqo kaynin imaymanapi rikukun (1 Ped. 1:6).

⁸ Apóstol Juanmi niran: “Paymantan Diospa ancha sumaq sonqo kayninta askhatapuni chaskiranchis”, nispa (Juan 1:16, NM). Diospa sumaq sonqo kayninta askhatapuni chaskisqanchisraykun imaymana bendicionkuna kapuwanchis. Wakinmanta yachasunchis.

9. ¿Ima bendiciontan chaskinchis Jehová Dios ancha sumaq sonqo kasqanrayku? ¿Imaynatan agradecekusunman?

⁹ Juchanchiskunan perdonasqa kapun. Jehová Diosmi juchanchiskunata perdonawanchis ancha sumaq sonqo kasqanrayku. Chaypaqmi ichaqa payman kutirikunanchis, manataq juchawan dominachikunanchischu (leey 1 Juan 1:8, 9). Chaymantan apóstol Pablo niran: “[Diosmi] laqhayaqpa atiyninmanta kacharichiwaspanchis munakusqan Churinpa gobiernonman churawaranchis, chay Churinwanmi preciowan kacharichisqa karanchis, arí, juchanchismantan perdonasqa karanchis”, nispa (Col. 1:13, 14, NM). Chhaynaqa Diostan agradecekunanchis khuyapayawasqanchismanta, chaytan ruwasunman payta alabaspa. Payqa askha bendicionkunatan qowasunchis juchanchista perdonasqanrayku.

10. ¿Ima bendiciontan chaskillanchistaq Jehová Dios ancha sumaq sonqo kasqanrayku?

¹⁰ Diospa amigonmi kapunchis. Nacesqanchismantapachan Diospa enemigon karanchis jucharayku. Ichaqa Jesuspa wañusqanwanmi ‘Dioswan allipunakapuranchis’ (Rom. 5:10). Arí, Jesuspa precio pagasqanwanmi Dioswan allipunakapuspa paywan amigontin kapuranchis. Chayraykun apóstol Pablo cielopaq ajllasqa cristianokunata niran: “Iñisqanchisraykutaq  chaninpaq jap’isqa kanchis chayqa, Dioswan sumaqta kausashallasun Señorninchis Jesucristorayku. Paypi iñisqanchisraykun juj ñan kicharikun ancha sumaq sonqo kayninta Dios rikuchiwananchispaq, chaytan kunanqa chaskishanchis”, nispa (Rom. 5:1, 2, NM). Chhaynaqa anchatan Jehová Diosta agradecekunanchis paywan allipunakapusqanchismanta.

11. ¿Imaynatan ajllasqa cristianokuna ‘waj ovejakunata’ chanin kausayman kutirichishanku?

¹¹ Diospa ñaupanpi “chanin” nisqa kapunchis. Profeta Daniel nisqanman jina, tukukuy p’unchaykunapiqa askha runakunatan “chanin kausayman” kutichikunan karan (leey Daniel 12:3). ¿Pikunan chayta ruwananku karan? Cielopaq ajllasqakunan. Chaypaqmi paykunaqa ‘waj ovejakunata’ Jehová Diosmanta pachantinpi yachachishanku (Juan 10:16). Paykunatan yanapashanku Diospa ñaupanpi “chanin” nisqa kanankupaq. Jehová Dios ancha sumaq sonqo kaqtillanmi paykunaqa chhayna nisqa kankuman. Chaymi Pablo niran: “Diosqa runakunata chaninpaq qhawarin juchamanta kacharichisqa kanankupaq Cristo Jesús juj preciota pagasqanraykun, chayqa karan Diospa ancha sumaq sonqo kayninpin”, nispa (Rom. 3:23, 24, NM).

12. ¿Imanaqtinmi mañakusqanchista Dios uyarin?

¹² Diosmi uyariwanchis mañakuqtinchis. Ancha sumaq sonqo kasqanraykun Jehová Diosqa mañakusqanchista uyarin. Chaymi apóstol Pablo niran: “Chayrayku achhuykusun ancha sumaq sonqowan qhawariq Diospa trononman, jinaspa ama manchakuspa paymanta mañakusun”,  nispa (Heb. 4:16a). Chhaynaqa Diosmantaqa ima ratopipas mañakullasunmanmi Jesuspa sutinpi. Chaymi Pablo nillarantaq: “Noqanchisqa paypi iñisqanchisraykun mana manchakuspa mana iskayaspa ima Diosman achhuykushanchis”, nispa (Efes. 3:12).

13. ¿Imaynatan Jehová Dios yanapawanchis ‘yanapanata necesitashaqtinchis’?

¹³ Yanapana kashaqtinchismi Dios yanapawanchis. Pablon cristianokunata kallpacharan yanapanata necesitaspanku Jehová Diosmanta mañakunankupaq, chhaynapi ‘pay khuyapayananpaq ancha sumaq sonqowan qhawarinanpaqwan’ (Heb. 4:16b, NM). Jehová Diosqa manan obligasqachu kashan yanapawananchispaq, chaywanpas payqa yanapawasunmi yanapanata mañakuqtinchisqa. Payqa iñiqmasinchiskunawanmi mastaqa yanapawasun, chhaynapi mana imatapas manchakunanchispaq, aswanpas: “Jehová Diosmi yanapawaqniyqa, manan manchakusaqchu”, nispa ninanchispaq (Heb. 13:6, NM).

14. ¿Imatan Jehová Dios ruwan llakipi tarikuqtinchis?

¹⁴ Diosmi llakikuyninchispi kallpachawanchis. Jehová Diosmi yanapawasun llakiq ñit’isqan tarikuqtinchisqa (Sal. 51:17). Chaymi apóstol Pablo qatikachasqa kashaq cristianokunata niran: “Yayanchis Diosqa munakuwanchismi, paymi ancha sumaq sonqo kayninpi mana tukukuq consuelota sumaq suyakuyta ima qowanchis. Paymantan mañakuyku Señorninchis Jesucristowan kuska sonqoykichispi kallpachanasuykichispaq”, nispa (2 Tes. 2:16, 17, NM). ¿Manachu kusikunchis Jehová Dios ancha sumaq sonqo kayninpi munakuwasqanchista yachaspa?

15. ¿Ima suyakuymi kapuwanchis Dios ancha sumaq sonqo kasqanrayku?

¹⁵ Wiñay kausaytan suyakushanchis. Juchasapa kasqanchisraykun mana ima suyakuypas kawananchischu karan (leey Salmo 49:7, 8). Jehová Diosmi ichaqa juj sumaq suyakuyta qowaranchis. Chaymantan Jesús niran: “Yayayqa munan pipas Churita rikuspa iñinantan, ajinapi wiñay kausayniyoq kananpaq”, nispa (Juan 6:40). Jehová Diosqa ancha sumaq sonqo kasqanraykun chay wiñay kausaytaqa qowasun, chaymi apóstol Pablo niran: “Diosmi ancha sumaq sonqo kayninta rikuchiran imaymana clase runakunapaq salvacionta apamuspa”, nispa (Tito 2:11, NM).

16. ¿Imaynatan wakin cristianokuna Diospa khuyapakuyninta q’ewiranku?

¹⁶ Jehová Dios ancha sumaq sonqoña chaypas, manan chayraykuchu juchapi purinanchis. Apostolkunaq tiemponpin wakin cristianokuna ‘Diospa khuyapayakuyninta q’ewispa mana p’enqarikuspa juchallapi purisharanku’ (Judas 4). Chay cristianokunaqa nirankuchá: “Juchallikullasun ima munasqanchistapas, Jehová Diosqa perdonawallasunmi”, nispa. Chhaynata nispan jujkunatapas juchaman aysayta munaranku. Pipas chhaynata ruwanman chayqa, ‘Diospa ancha sumaq sonqo kayninta rikuchiq espiritutan pisichashanman’ (Heb. 10:29, NM).

17. ¿Imatan apóstol Pedro niran?

¹⁷ Kay tiempopipas wakin cristianokunan  ninku: “Diosqa perdonawallasunmi imataña ruwaqtinchispas”, nispa. Chhaynata piensaspaqa Saqrawanmi engañachikushanku. Jehová Diosqa perdonakuqña chaypas, tukuy kallpanchiswan juchawan maqanakunanchistan munan, chaymi apóstol Pedro niran: “Munasqa wayqe-panaykuna, qankunaqa ñataq chaykunata yachankichisña chayqa, allinta cuidakuychis, paqtataq chay millayta kausaq runakuna pantasqa yachachikuyninkuwan pantachisunkichisman, jinaspa manaña qaqatachu sayawaqchis. Chayrayku wiñashallaychis salvawaqninchis Señorninchis Jesucristoq ancha sumaq sonqo kayninta chaskiypi, jinallataq paymanta yachaypipas”, nispa (2 Ped. 3:17, 18, NM).

18. ¿Imakunata ruwaspan Jehová Diosta agradecekusunman?

¹⁸ ¿Imaynatan Jehová Diosta agradecekusunman sumaq sonqo kasqanmanta? Payta jatunchaspa jujkunata yanapaspa iman. Chaymantan apóstol Pablo niran: “Diosqa ancha sumaq sonqo kayninpin sapankanchisman atiyta qowanchis, ichaqa manan kaq atiytachu; chayrayku profetizanapaq atiyta chaskiqqa, profetizachun iñiy chaskisqanman jina; jujkunata servinanpaq atiyta chaskiqpas, servishallachun; jinallataq yachachiqpas yachachishallachun, jujkunata kallpachaqpas kallpachashallachun, rakiqpas ama mich’akuspa rakichun, umalliqpas allinta umallichun, khuyapayaqpas tukuy sonqo khuyapayachun”, nispa (Rom. 12:6-8, NM). Chhaynaqa tukuy sonqon Diosta servinanchis, jujkunatapas Bibliamantan yachachinanchis, iñiqmasinchiskunatapas allintan kallpachananchis, phiñachiwaqninchiskunatapas perdonananchismi.

19. ¿Imamantan yachasunchis qatimuq estudiopi?

¹⁹ Imaymana bendicionkunatataq Jehová Diosmanta chaskiranchis chayqa, tukuy kallpanchiswanmi ‘Diospa ancha sumaq sonqo kayninmanta allin willakuykunata willananchis’ (Hech. 20:24, NM). Chaymantan qatimuq estudiopi yachasunchis.