1, 2. a) Arathá mbá lájuíin xkri̱da ndrígóo xa̱bu̱ bi̱ gíʼdoo mbaaʼ ndrígóo uva. b) Xú káʼnii esngájma rígi̱ xú káʼnii nindxu̱u̱ mbáa xa̱bu̱ bi̱ májánʼ wéñuʼ a̱jkiu̱u̱n ga̱jma̱a̱ rí naxná rí gíʼdoo xá.

 MBÁA xa̱bu̱ nigiʼdoo mbá mbaaʼ ndrígóo uva. Mbá mbiʼi nigájnuu miʼcha̱ wéñuʼ mu maʼga̱ náa xuáá mu mbañíínʼ xa̱bu̱ muñajunʼ. Niʼthún nguáthá gáʼni numún ga̱jma̱a̱ ikhiin nindrigú ñajunʼ. Itháan wakhaʼ, xa̱bu̱ ndiʼyoo rí ndayóoʼ itháan xa̱bu̱. Ikha jngó nitanga̱a̱ mbaʼa miʼtsú mu mbañíínʼ itháan xa̱bu̱ bi̱ muñajunʼ. Ga̱jma̱a̱ xúgínʼ niʼthún rí maʼni numún xó má kaʼyoo. Índo̱ niguámbá mbiʼi, nigimbíin xúgínʼ xa̱bi̱i̱ mu maʼni numún. Tikhun niñajunʼ kañiʼ mbiʼi ga̱jma̱a̱ tikhun káaʼ nguáthá hora. Mú xa̱bu̱ niʼni numún ikháá xúgínʼ. Ikhú xa̱bu̱ bi̱ niñajunʼ xúgíʼ mbiʼi nuxieʼkhá. Xa̱bu̱ niʼni marmáʼáan a̱jkiu̱ún rí ikhiin nithi mudrigú mbújkha̱a̱ rí maxnún. Ma̱ngaa niʼthún rí ikhaa kaʼyoo maxnún xa̱bi̱i̱ mbújkha̱a̱ rí ikhaa gáʼndoo. Nda̱wa̱á niraxu̱u̱n á mu naxígu̱u̱n numuu rí ikhaa májánʼ a̱jkiu̱u̱n (Mat. 20:1-15).

² Jesús niʼthí historia rígi̱ mu maʼsngúún ga̱jma̱a̱ numuu “rí  májánʼ wéñuʼ rí na̱ʼkha̱ náa Dios” ^[1] (atayáá nota rí na̱ʼkha̱ náa námbá artículo) (atraxnuu 2 Corintios 6:1). * Mbáa tikhun nundxa̱ʼwa̱míjna̱ rí xa̱bu̱ bi̱ niñajunʼ xúgíʼ mbiʼi kaʼñún itháan mbújkha̱a̱ ki xóo eʼwíínʼ. Mú xa̱bu̱ bi̱ ndrígóo mbaaʼ nisngájma rí májánʼ wéñuʼ a̱jkiu̱u̱n náa xa̱bu̱ bi̱ niñajunʼ nguáthá hora. Mbáa bi̱ ndaʼyoo naʼthí rí ajngáa rí nijuiʼtájuíi náa Biblia xóo “rí májánʼ wéñuʼ” nandoo gáʼthúu̱n “mbá rí nakhánulú rí asndu rakáʼyulú” ga̱jma̱a̱ “nindxu̱u̱ mbá rí nuxnáá mbáa xa̱bu̱, mú ikhaa tádaaʼ ni má táʼni nimbá mu makhánúu rígi̱”.

3, 4. a) Náa numuu rí Jeobá nisngájmun xa̱bu̱ numbaaʼ rí májánʼ wéñuʼ a̱jkiu̱u̱n rá. b) Xú káʼnii niʼni xá.

³ Náa Biblia naʼthí rí mani̱ndxu̱u̱ májánʼ a̱jkia̱nʼ nindxu̱u̱ mbá regalo (Efes. 3:7). Numuu rí na̱nguá eʼngo̱o̱ muʼnimbánii xúgíʼ rí naʼthí Jeobá, rakáʼyulú rí maʼni májánʼ a̱jkiu̱u̱n náa ikháanʼ. Ikha jngó kaʼyulú makhañúlúʼ. Rey Salomón naʼthí: “Numuu rí nda̱wa̱a̱ náa tsu̱du̱u̱ ku̱ba̱ʼ xa̱bu̱ jmbii bi̱ maʼni má xúʼko̱ rí májánʼ ga̱jma̱a̱ xakiéʼkúun” (Ecl. 7:20). Mbiʼi nda̱wa̱á apóstol Pablo niʼthí rí “xúgínʼ nixudami̱jna̱ aʼkhá ga̱jma̱a̱ na̱nguá eʼngu̱u̱n gúxkamaa gloria ndrígóo Dios” ga̱jma̱a̱ rí “índo̱ nakháñulú nuʼninuma̱a̱ aʼkhá” (Rom. 3:23; 6:23a).

⁴ Jeobá nandoo kaʼñún wéñuʼ xúgínʼ xa̱bu̱. Ikha jngó nikuʼmaa A̱ʼdióo mu makhañúu ga̱jma̱á numulúʼ. Rígi̱ nindxu̱u̱ rí itháan mba̱a̱ rí nasngájma rí nandoo kaʼyulú (Juan 3:16). Pablo niʼthí rí xúgi̱ Jesús “nikhánaa gloria ga̱jma̱a̱ gamajkhu numuu rí nimínuʼ índo̱ nikháñu, ga̱jma̱a̱ numuu rí májánʼ wéñuʼ a̱jkiu̱u̱n Dios rí Jesús nikháñu ga̱jma̱a̱ numuu xúgínʼ xa̱bu̱” (Heb. 2:9). Ikha jngó regalo rí naxnúlú Dios “dí makuwáanʼlu kámuu mbiʼi ga̱jma̱a̱ numuu Cristo Jesús bi̱ nindxu̱u̱ Señor ndrígiulúʼ” (Rom. 6:23b).

5, 6. a) Ndiéjunʼ rí gúʼdaaʼ á mu naʼtáñajunlú aʼkhá rá. b) Ndiéjunʼ rí gúʼdaaʼ á mu naʼtáñajunlú rí májánʼ wéñuʼ a̱jkiu̱u̱n Dios rá.

⁵ Ndíjkha rí nuxuʼdámíjná aʼkhá ga̱jma̱a̱ nakháñulú rá. Náa Biblia naʼthí rí ga̱jma̱a̱ numuu aʼkhá rí niʼni Adán ‹rí nakháñulu niʼtáñajunʼ›. Numuu rí xúgiáanʼ naguwaʼ náa Adán, xúgiáanʼ kuaʼdáá aʼkhá ga̱jma̱a̱ nakháñulú (Rom. 5:12, 14, 17). Maski asndu xúʼko̱, ma̱ndoo muraʼwíí rí aʼkhá maxaʼtáñajunlu. Xú káʼnii gúʼni rá. Rí musngájma fe náa tsigijñaʼ ndrígóo Cristo. Xúʼko̱ nuniʼñánʼ rí májánʼ a̱jkiu̱u̱n Jeobá maxkaxáanʼ muʼni rí nandoo. Náa Biblia naʼthí: “Índo̱ nirígá itháan aʼkhá, ma̱ngaa nirígá itháan rí májánʼ wéñuʼ a̱jkiu̱u̱n. Náa numuu rá. Mu rí xó má aʼkhá niʼtáñajunʼ ga̱jma̱a̱ rí nakháñulú, xúʼko̱ má rí májánʼ wéñuʼ a̱jkiu̱u̱n maʼtáñajunʼ jmbu rí maʼni makuwáanʼ kámuu mbiʼi ga̱jma̱a̱ numuu Jesucristo” (Rom. 5:20, 21).

⁶ Maski ajndu xóó ni̱ndxu̱lú xa̱bu̱ aʼkhá, na̱nguá eyóoʼ muniʼñáaʼ rí aʼkhá maʼtáñajunlú. Ikha jngó índo̱ nuʼni mbá dí na̱nguá májánʼ, nunda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyulú. Pablo naʼthí: “Aʼkhá ragíʼmaa maʼtáñajuanla, numuu rí nánguá kuwaanʼ ga̱jma̱a̱ numuu xtángoo, kuwaanʼ ga̱jma̱a̱ rí májánʼ wéñuʼ a̱jkiu̱u̱n” Dios (Rom. 6:14). Á mu nuniʼñánʼ rí májánʼ wéñuʼ a̱jkiu̱u̱n Dios maʼtáñajunlú,  ndiéjunʼ rí gúʼdaaʼ rá. Pablo niʼthí rí muʼni gaʼduunʼ “xoguiʼ ri ramejanʼ, jma xoguiʼ ri nando aʼcuʼlu muʼni” ga̱jma̱a̱ gakuwáanʼ “mejanʼ mbiʼji riguiʼ, jma muʼni ri jmbu, cami macuhua micaʼju náa inu Dios” (Tito 2:11, 12).

7, 8. Ndiéjunʼ eyoo gáʼthúu̱n rí Jeobá nasngájma rí májánʼ a̱jkiu̱u̱n “mbaʼa miʼtsú” rá. (Atayáá timbá xtiʼkhu.)

⁷ Apóstol Pedro niʼthí rí gíʼmaa majmulúʼ rí Dios nixnúlú mu mumbáyumíjna̱lu “xóo mayordomo bi̱ májánʼ a̱jkiu̱ún numuu rí Dios májánʼ wéñuʼ a̱jkiu̱u̱n ga̱jma̱a̱ nisngájma mbaʼa miʼtsú” (1 Ped. 4:10). Ndiéjunʼ eyoo gáʼthúu̱n rí Jeobá nasngájma rí májánʼ a̱jkiu̱u̱n “mbaʼa miʼtsú” rá. Nandoo gáʼthúu̱n rí asndu kaʼnii xkujndu rí kuaʼdáá, ikhaa naxnúlú rí ndayúlú mu maʼngulú (1 Pedro 1:6). Naxnúlú má xúʼko̱ rí ndayúlú mu maʼngulú muraʼníí mámbá xkujndu.

⁸ Xó má eʼyáá, Jeobá nasngájma mbaʼa ikhoo rí májánʼ a̱jkiu̱u̱n. Apóstol Juan niʼnirámáʼ: “Xúgiáanʼ ikháanʼ nundrígulú mbá káxi̱, xúʼko̱, rí májánʼ wéñuʼ a̱jkiu̱u̱n ga̱jma̱a̱ tsu̱du̱u̱ rí májánʼ wéñuʼ a̱jkiu̱u̱n.” (Juan 1:16). Numuu rí Jeobá nasngájma mbaʼa ikhoo rí májánʼ a̱jkiu̱u̱n, ikha jngó naʼni tsajkurámáánʼ wéñuʼ. Guʼyáá tikhu xóo eʼni tsajkurámáánʼ.

9. a) Xú káʼnii embáyulú rí májánʼ wéñuʼ a̱jkiu̱u̱n Dios rá. b) Xú káʼnii esngajmá dí ra̱ʼkhá tháán exnáa núma̱aʼ xá.

⁹ Jeobá naʼni mba̱a̱ a̱jkiu̱u̱n kaʼyoo aʼkhúlúʼ. Numuu rí májánʼ wéñuʼ a̱jkiu̱u̱n, Jeobá naʼni mba̱a̱ a̱jkiu̱u̱n kaʼyoo aʼkhúlúʼ. I̱ndó naʼni á mu natanga̱a̱ a̱jkiu̱lúʼ ga̱jma̱a̱ nuʼni tsiakii mu xúʼni̱ dí ra̱májánʼ (atraxnuu 1 Juan 1:8, 9). * Pablo niʼthún cristianos bi̱ kaxtaʼwíin bi̱ kuwa ikhú xú káʼnii Jeobá naʼni mba̱a̱ a̱jkiu̱u̱n kaʼyoo aʼkhúlúʼ. Ga̱jma̱a̱ numuu Dios niʼthí: “Dios neʼni macahuiñaʼlu naʼ siaquiyu su guixa, ganeʼni rí maʼtañajunʼlu Adio su Ica naniguʼ-ye. Ica Adio suʼcui neʼni macahuiñaʼlu riʼdo Ica nicañu, neʼni mba aʼtiun jma numu ri aʼcanʼlu” (Col. 1:13, 14). Á mu nuxnáa núma̱aʼ rí Dios niʼni ga̱jma̱a̱ numulúʼ, musngajmá á mu nuʼni mba̱a̱. Numuu rí ikhaa naʼni mbáa a̱jkiu̱u̱n kaʼyoo aʼkhúlúʼ, ma̱ndoo maʼni tsajkurámáanʼlu itháan.

10. Ndiéjunʼ rí edrigú numuu rí májánʼ wéñuʼ a̱jkiu̱u̱n Dios rá.

¹⁰ Ma̱ndoo makuwaanʼ tsímáá gajmiúlú Dios ga̱jma̱a̱ mambáxulu gajmiúlú. Numuu rí ni̱ndxu̱lú xa̱bu̱ aʼkhá, asndu nákha nagumáanʼ ni̱ndxu̱lú xa̱bu̱ sia̱nʼ gajmiúlú Dios. Maski ajndu xúʼko̱, apóstol Pablo niʼthí: “Naca xoʼ guiʼdo sŋaʼ Dios jma numaʼlu, Ica-ma-hui neʼni ri mambaxiʼlu jmiʼli riʼdo nicañu Adio” (Rom. 5:10). Ga̱jma̱a̱ numuu rí nikháñu Jesús, ma̱ndoo mambáxulúʼ gajmiúlú Dios. Rígi̱ nandoo gáʼthúu̱n rí ma̱ndoo makuwáanʼ tsímáá náa ikhaa ga̱jma̱a̱ mambáxulu gajmiúlú. Mú, xú káʼnii kagujtuminaʼ  rígi̱ ga̱jma̱a̱ rí májánʼ a̱jkiu̱u̱n Dios rá. Pablo niʼthí rígi̱ índo̱ niʼthún bi̱ kaxtaʼwíin: “Rí najuiʼtúlú rí ni̱ndxu̱lú jmbii ga̱jma̱a̱ numuu fe, gakuwaanʼ gagi gajmiúlú Dios ga̱jma̱a̱ numuu Señor Jesucristo, numuu ikhaa niguáʼdáá fe náa rí májánʼ wéñuʼ a̱jkiu̱u̱n rí náa kuwáanʼ asndu xúgi̱; ga̱jma̱a̱ gaʼdxuu a̱jkiu̱lú numuu rí kuaʼti̱i̱n gloria ndrígóo Dios” (Rom. 5:1, 2). Ma̱ndoo muxnáa núma̱aʼ numuu rí kuwaanʼ tsímáá náa ikhaa ga̱jma̱a̱ rí nambáxulúʼ gajmiúlú.

11. Xú káʼnii bi̱ kaxtaʼwíin naguwáʼ kudiin bi̱ ‹eʼwíínʼ mugu̱› náa rí jmbu rá.

¹¹ Ma̱ndoo manindxu̱lúʼ jmbii náa Dios. Gaʼyee Daniel niʼnirámáʼ rí índo̱ inu ma̱ʼkha̱ fin bi̱ kaxtaʼwíin “gáguwaʼ kudiin mbaʼin mu muni rí jmbu” (atraxnuu Daniel 12:3). * Xú káʼnii eni rígi̱ bi̱ kaxtaʼwíin rá. Ikhiin nutaraʼa ajngáa ndrígóo Reino ga̱jma̱a̱ nusngúún xtángoo ndrígóo Jeobá mbaʼin wéñuʼ bi̱ ‹eʼwíínʼ mugu̱› (Juan 10:16). Xúʼko̱ numbañún xa̱bu̱ bugi̱ mu Dios mbaʼñún xóo xa̱bu̱ míjínʼ. Rígi̱ nandoo narígá numuu rí májánʼ a̱jkiu̱u̱n Jeobá. Pablo naʼthí: “Nindxu̱u̱ xóo mbá rí nimináanʼ numuu rí májánʼ a̱jkiu̱u̱n ikha jngó naʼni rí manindxu̱lúʼ xa̱bu̱ jmbii índo̱ rí niʼtsiwáanʼ Cristo Jesús mu maʼni káwáanʼ” (Rom. 3:23, 24).

12. Xú káʼnii nambánii rí májánʼ wéñuʼ a̱jkiu̱u̱n Dios ga̱jma̱a̱ muʼtákáñii rá.

¹² Ma̱ndoo muxuʼmamijná náa Dios á mu nuʼtájkáan. Ga̱jma̱a̱ numuu rí májánʼ wéñuʼ a̱jkiu̱u̱n Dios, ma̱ndoo muʼtákáñii.Numuu rí ikhaa naʼtáñajunʼ májánʼ wéñuʼ, Pablo naʼthí rí Jeobá gíiʼ náa “trono rí na̱nguá kaʼyulúʼ mundrígú” ga̱jma̱a̱ naʼthí rí muxuʼmamijná náa trono rúʼko̱ ga̱jma̱a̱ “xúgíʼ a̱jkiu̱lú” (Heb. 4:16a).  Ga̱jma̱a̱ numuu Jesús muʼtájkáan náa Jeobá asndu náa má mbi̱ʼi̱i̱. Rígi̱ ra̱ʼkhá tháán májánʼ. Pablo naʼthí: “Numuu ikhaa kuaʼdáá rí nuʼthá kaʼwu ga̱jma̱a̱ ma̱ndoo muxuʼmamijná ga̱jma̱a̱ numuu fe ndrígúlú náa ikhaa” (Efes. 3:12).

13. Xú káʼnii embáyulú rí májánʼ wéñuʼ a̱jkiu̱u̱n Dios “mbiʼi rí gáʼyulúʼ” rá.

¹³ Ma̱ndoo mixtambáyulú índo̱ gáʼyulúʼ. Pablo naʼthúlúʼ rí guʼtákáñii Jeobá índo̱ rí gáʼyulúʼ, “mu magaʼwíínʼ a̱jkiu̱u̱n kaʼyulúʼ ga̱jma̱a̱ mu muxkamaa rí májánʼ rí na̱nguá kaʼyulúʼ mundrígú mbiʼi rí gáʼyulúʼ” (Heb. 4:16b). Índo̱ guguaʼdáá mbá xkujndu, ma̱ndoo munda̱ʼa̱a̱ Jeobá rí mambáyulúʼ. Ikhaa na̱nguá eyóoʼ mariʼña̱a̱, mú naʼni. Ikhaa najmiuu má xúʼko̱ a̱ngiu̱lú náa congregación mu mumbayulúʼ. Numuu rí ikhaa nariʼña̱a̱ rí nuʼtájkáan, “ma̱ndoo muʼthá ga̱jma̱a̱ xúgíʼ a̱jkiu̱lú: ‹Jeobá nindxu̱u̱ bi̱ nambáyuʼ; xámiñuʼ. Ndiéjunʼ gándoo gáʼniuʼ xa̱biya̱ rá.›” (Heb. 13:6.)

14. Ndiéjunʼ i̱mba̱ rí májánʼ endrígúlú numuu rí májánʼ wéñuʼ a̱jkiu̱u̱n Jeobá rá.

¹⁴ Ma̱ndoo mundrígú rí maʼni̱i̱ a̱jkiu̱lú. I̱mba̱ rí xóo eʼni tsajkurámáánʼ numuu rí májánʼ wéñuʼ a̱jkiu̱u̱n Jeobá nindxu̱u̱ rí ikhaa naʼni maʼni̱i̱ a̱jkiu̱lú índo̱ kuwáanʼlu gíná. Índo̱ cristianos bi̱ kuwa náa xuajen Tesalónica nijuiʼxkhúún, Pablo niʼnirámáʼ: “Mínaʼ má Señor Jesucristo ga̱jma̱a̱ Dios bi̱ ñajunʼ Anu̱lú, bi̱ nindoo kaʼyulúʼ ga̱jma̱a̱ niʼni maʼni̱i̱ a̱jkiu̱lú kámuu, ma̱ngaa kuaʼti̱i̱n mbá rí májánʼ ga̱jma̱a̱ numuu rí májánʼ dí rakáʼyulú, guni̱i̱ a̱jkia̱la ga̱jma̱a̱ guni rí jmbu” (2 Tes. 2:16, 17). Lá ragájkhun rí naʼni̱i̱ a̱jkiu̱lúʼ índo̱ nduʼyáá rí Jeobá nandoo kaʼyulúʼ ga̱jma̱a̱ nañewu̱nlú numuu rí májánʼ wéñuʼ a̱jkiu̱u̱n xáʼ.

15. Ndiéjunʼ rí kuaʼti̱i̱n marigá nda̱wa̱á numuu rí májánʼ wéñuʼ a̱jkiu̱u̱n Dios rá.

¹⁵ Ma̱ndoo muguaʼthi̱i̱n rí makuwáanʼ kámuu mbiʼi nda̱wa̱á. Numuu xa̱bu̱ aʼkhá ñajunlú, á mu Jeobá tsímbayúlú xúguaʼthi̱i̱n mbá rí májánʼ nda̱wa̱á (atraxnuu Salmo 49:7, 8). * Mú ikhaa nixnúlú mbá rí májánʼ rí kuaʼti̱i̱n marigá nda̱wa̱á. Ndiéjunʼ nindxu̱u̱ rá. Jesús niʼthí: “Rigueʼ ri nando tsi nijungun: Ri jamba tsi nayaxu Ada, jame majumu-jaʼyo, mbaʼya asjndo jamu” (Juan 6:40). Ga̱jma̱a̱ numuu rí májánʼ wéñuʼ a̱jkiu̱u̱n Jeobá kuaʼti̱i̱n rí makuwáanʼ kámuu mbiʼi. Pablo niʼthí: “Ga̱jma̱a̱ numuu rí májánʼ wéñuʼ a̱jkiu̱u̱n Dios bi̱ maʼni káwíin xúgínʼ enii xa̱bu̱ nakujmaa pa̱jnu̱” (Tito 2:11).

16. Xú káʼnii ninújngorámuunʼ xtángoo timbíi̱n cristianos numuu rí májánʼ a̱jkiu̱u̱n Dios rá.

¹⁶ Xó má ndiʼyáá, numuu rí májánʼ a̱jkiu̱u̱n Jeobá naguma tsajkurámáánʼ wéñuʼ. Mú ragíʼmaa manújngorámúlú numuu rí májánʼ a̱jkiu̱u̱n. Xóo muʼthá, na̱nguá nindxu̱u̱ mbá rí naniñulú muʼni aʼkhá. Nákha mbiʼi ndrígu̱ún timbíi̱n cristianos, tikhun nindúún majmúún rí májánʼ a̱jkiu̱u̱n Dios mu ma̱ndoo muni dí ra̱májánʼ (Jud. 4). Nakujmaa rí cristianos bi̱ na̱nguá guájun jmbu nikumu̱ún rí ma̱ndoo muxudami̱jna̱ aʼkhá ga̱jma̱a̱ rí muguaʼthi̱i̱n rí Jeobá maʼni mba̱a̱ a̱jkiu̱u̱n kaʼñún. Asndu nini rí eʼwíínʼ cristianos muxudami̱jna̱ aʼkhá xó má ikhiin. Asndu  tsáa tsí naʼni rúʼko̱ rí mbiʼi xúgi̱ nakudaminaʼ aʼkhá dí ra̱ʼkhá tháán mba̱a̱ náa ‹xi̱ʼ dí ra̱ʼkhá tháán májánʼ› (Heb. 10:29).

17. Xú káʼnii xtágabu nixná Pedro rá.

¹⁷ Rí mbiʼi xúgi̱, Satanás niʼni nduwiinʼ tikhun cristianos rí ma̱ndoo muxudami̱jna̱ aʼkhá ga̱jma̱a̱ muguaʼthi̱i̱n rí Jeobá maʼni mba̱a̱ a̱jkiu̱u̱n kaʼñún. Gajkhun má rí Jeobá xtáa xawii mu maʼni mba̱a̱ a̱jkiu̱u̱n kaʼñún bi̱ nuxuda̱mi̱jna̱ aʼkhá. Mú ma̱ngaa nagiʼthu̱u̱n rí muʼni gaʼduunʼ índo̱ nagua̱ʼa̱ muʼni dí ra̱májánʼ. Ikha niʼni rí apóstol Pedro maxná xtágabu rígi̱: “Guñeumíjna̱la mu xagun kudáanʼ gajmiála ikhiin ga̱jma̱a̱ numuu aʼkhún xa̱bu̱ bi̱ ra̱míjínʼ ma̱ngaa ní xátani rí jmbu. Na̱nguá; gaganiáanʼ náa rí májánʼ wéñuʼ ga̱jma̱a̱ náa ku̱ma̱ ndrígóo Señor ga̱jma̱a̱ bi̱ Naʼni káwáanʼ Jesucristo” (2 Ped. 3:17, 18).

18. Numuu rí májánʼ wéñuʼ a̱jkiu̱u̱n Jeobá, ndiéjunʼ rí gíʼmaa muʼni rá.

¹⁸ Á mu nduʼyamajkuíí rí májánʼ wéñuʼ a̱jkiu̱u̱n Jeobá, gíʼmaa rí majmulúʼ rí naxnúlú ikhaa mú mbuʼyamajkuíí ga̱jma̱a̱ mu mumbáñuun eʼwíínʼ. Xú káʼnii gúʼni rá. Pablo niʼthí rí “numuu rí mixtiʼkhu rí najmañulúʼ nuʼni xó má májánʼ wéñuʼ rí nikhánulú”. Niʼthí rí á mu Dios nixnúlú “rí muʼtáraʼa, gakuwaanʼ ruʼtáraʼa”. Ga̱jma̱a̱ niʼthí xóó: “Bi̱ naʼsngáa, gaxtáa raʼsngáa; o bi̱ naʼtáñajunʼ, gaxtáa raʼtáñajunʼ”. Nda̱wa̱á niʼthí: “Bi̱ nagáwiinʼ a̱jkiu̱u̱n kaʼñún eʼwíínʼ, gaʼni ga̱jma̱a̱ gagi” (Rom. 12:6-8). Ndiéjunʼ eyoo gáʼthúu̱n rígi̱ rá. Numuu rí Jeobá nisngájmulú rí májánʼ wéñuʼ a̱jkiu̱u̱n, kuaʼdáá rí muʼni tsiakimijna muʼtáraʼa, muʼsngúún eʼwíínʼ ga̱jma̱a̱ numuu Biblia, muxnún tsiakii a̱ngiu̱lú ga̱jma̱a̱ muʼni mba̱a̱ a̱jkiu̱lú kuʼñúún bi̱ nuni gawúnlú.

19. Ndiéjunʼ gúʼyáá náa i̱mba̱ artículo rá.

¹⁹ Numuu rí Jeobá ra̱ʼkhá tháán eʼni tsajkurámáánʼ numuu rí májánʼ a̱jkiu̱u̱n, ikháanʼ gíʼmaa muʼnimi̱jna̱ rí muʼtáraʼa “káxi̱ ajngáa rí májánʼ wéñuʼ rí na̱ʼkha̱ náa Dios” (Hech. 20:24). Náa i̱mba̱ artículo mbuʼyáá ga̱jma̱a̱ numuu ñajunʼ rígi̱.