1, 2. (a) Lombolola ulandu watiamẽla komunu ukuacumbo. (b) Ulume ukuacumbo wa lekisa ndati ocali, kuenda ohenda ya piãla?

ETEKE limue komẽle, ulume umue ukuacumbo cayuva, wa endele pocitanda cimue oku sapela lalume vamue oco va talavaye vocumbo caye. Eye wa sapela lalume vaco hati, eci va mãla oku linga upange va pondola oku fetiwa olombongo. Omo liaco, va tava oku linga upange waco. Omo okuti ulume ukuacumbo wa sukilile olonalavayi vialua, wa endele kocitanda olonjanja vialua vokuenda kueteke liaco, oco a vokiye ketendelo liolonalavayi. Kesulilo lieteke, wa vilikiya olonalavayi viosi oco vi fetiwe olombongo, ndomo a ci likuminyile. Pokati kolonalavayi viaco pa kala vimue via talavaya lika owola yimosi. Pole, wa vi feta onjongo yimuamue yolombongo. Vamue pokati kalume vaco va kala oku lisiõsiõla omo lioku fetiwa onjongo yimuamue yolombongo la vana va talavaya lika owola yimosi. Omo liaco, ukuacumbo wa va sapuila  hati: ‘Ka tua likundile hẽ okuti, vu tambula ofeto nda sokiya oku eca kokuene? Si kuete hẽ omoko yoku feta olonalavayi viosi olombongo nda sokiya? Anga hẽ vu kuete onya omo liohenda nda lekisa kolonalavayi vikuavo?’—Mateo 20:1-15.

² Ulandu Yesu a tukula ndeti, u tu longisa ovina vi kuete esilivilo viatiamẽla ‘kohenda ya piãla ya Yehova.’ ^[1] (Tala etosi kesulilo liocipama.) (Tanga 2 Va Korindo 6:1.) Momo lie? Momo, omanu vamue va siata oku sima okuti, alume vana va talavaya eteke liosi, va sukilile oku fetiwa olombongo vialua okuti, via vana va talavaya lika owola yimosi vi sule. Pole, ulume ukuacumbo, wa lekisa ohenda kolonalavayi vina via talavaya lika owola yimosi. Ulume umue onoño, poku lombolola eci catiamẽla ‘kohenda ya piãla’ ya tukuiwa Vembimbiliya, wa popia hati: “Ondaka yokuti ohenda ya piãla, yi lomboloka oku eca ocina cimue komunu okuti, ka sesamẽla oku ci tambula.”

3, 4. Yehova wa lekisa ndati ohenda yaye komanu vosi?

³ Embimbiliya li popia hati, o henda ya piãla ya Yehova, ‘ombanjaile’ yimue ya tunda kokuaye. (Va Efeso 3:7) Omo okuti ka tu pondola oku pokola ku Yehova lonjila yimue ya li pua, ka tu sesamẽla ohenda yaye. Pole, tu sesamẽla oku fa. Soma Salomone wa popia hati : “Ka kuli ukuesunga kilu lieve okuti o lingainga esunga kuenje ka lueya.” (Ukundi 7:20) Noke, upostolo Paulu wa popiavo hati: “Vosi va linga ekandu kuenje va lipumbisa ulamba wa Suku.” Momo, “onima yekandu oku fa.”—Va Roma 3:23; 6:23a.

⁴ Omo okuti Yehova o sole calua omanu, wa tuma “Omõlaye wongunga,” oco a file akandu etu. Olondaka evi vi eca uvangi wohenda ya piãla Yehova a lekisa komanu. (Yoano 3:16) Paulu wa popia hati, cilo Yesu “wa futisua lulamba lesumbilo, haeye wa talisiwa ohali yoku fa, okuti omo liohenda ya piãla ya Suku o mahẽla omanu vosi oku fa.” (Va Heveru 2:9) Ocili okuti, “ongavelo ya eciwa la Suku omuenyo ko pui vu Kristu Yesu Ñala yetu.”—Va Roma 6:23b.

5, 6. Nye ci pondola oku pita lomunu (a) o vialiwa lekandu? (b) Nye ci pita lomunu o vialiwa lohenda ya Yehova?

⁵ Momo lie tua siatela oku lueya, kuenda oku fa? Embimbiliya li popia hati: “Omo liekandu liomunu umosi oku fa kua viala ndosoma.” Omo okuti tua tunda ku Adama, ka tua lipuile, kuenda tua siata oku fa. (Va Roma 5:12, 14, 17) Pole, tu pondola oku nõlapo oku yuvula oku vialiwa lekandu. Tu ci linga ndati? Nda tu lekisa ekolelo kocilumba cocisembi ca Kristu, tu kuatisiwa lohenda ya Yehova. Embimbiliya li popia hati: “Apa pali ekandu lialua ohenda ya piãla yaluapo vali. Locimãho cipi? Ndeci ekandu kuenda oku fa via viala ndosoma, cimuamue haico, ohenda ya piãla yi viala ndosoma omo liesunga loku tuala komuenyo ko pui mekonda lia Yesu Kristu Ñala yetu.”—Va Roma 5:20, 21.

⁶ Ndaño okuti toke cilo tua siata oku lueya, tu yuvuli oku vialiwa lekandu. Omo liaco, nda tua linga ocina cimue ka ca sungulukile, tu sukila oku pinga ongecelo ku  Yehova. Paulu o tu sapuila hati: “Ekandu ka li ka viale vokuene, momo ka vu kasi vemehi liocihandeleko, pole, vu kasi vemehi liohenda ya piãla.” (Va Roma 6:14) Tu kuatisiwa ndati lohenda ya Yehova? Paulu o tu sapuila hati: ‘Ohenda ya piãla ya Yehova, yi tu longisa oku likala ovina vi lipatãla locipango caye, kuenda oku likala oloñeyi violuali. Pole, yi tu vetiya oku kuata olondunge, loku lekisa esunga, kuenda oku sumbila Yehova voluali lulo.’—Tito 2:11, 12.

7, 8. Olondaka viokuti, ohenda ya Yehova “yi lekisiwa volonepa viñi viñi,” vi lomboloka nye? (Tala elitalatu kefetikilo liocipama cilo.)

⁷ Upostolo Petulu wa soneha ndoco: “Omo okuti omunu lomunu wa tambula ongavelo yimue, a [kuatise] layo vakuavo nda va kalei va sunguluka lohenda ya piãla ya [Yehova], yi lekisiwa volonepa viñi viñi.” (1 Petulu 4:10) Olondaka viokuti, ohenda ya Yehova “yi lekisiwa volonepa viñi viñi,” vi lomboloka nye? Vi lomboloka okuti, ndaño tua siata oku liyaka lovitangi vialua komuenyo, pole, Yehova o pondola oku tu ĩha ovina tu sukila, oco tu pandikise. (1 Petulu 1:6) Yehova wa siata oku eca ovina tu sukila, oco tu yule ovitangi viosi tu liyaka lavio.

⁸ Upostolo Yoano wa soneha ndoco: “Tua tambulavo ohenda ya piãla.” (Yoano 1:16) Omo okuti Yehova o lekisa ohenda ya piãla volonjila via litepa, tua siata oku tambula asumũlũho alua. Asumũlũho api tua siata oku tambula?

9. Tu kuatisiwa ndati lohenda ya Yehova? Tu lekisa ndati olopandu ku Yehova omo liohenda a lekisa kokuetu?

⁹ Yehova o pondola oku ecela akandu etu. Eye wa siata oku ci linga, omo liohenda a tu kuetele. Pole, Yehova o ci linga lika nda tu likekembela akandu etu, kuenda tuamamako oku yuvula olonjongole ka via sungulukile. (Tanga 1 Yoano 1:8, 9.) Paulu wa sapuila Akristão olombuavekua va kala kotembo yaye ndomo Yehova a siata oku ecela akandu. Eye wa va sapuila hati: “[Yehova] wa tu popela kuviali wowelema kuenda wa tu sondoluila kuviali Womõlaye a sole, okuti vokuaye tu kuete eyovo omo liocisembi kuenda ongecelo yakandu etu.” (Va Kolosai 1:13, 14) Tu pondola oku eca olopandu poku vangula ovina viatiamẽla kovituwa viwa via Yehova. Omo kuti Yehova wa siata oku ecela akandu etu, tu pondolavo oku tambula asumũlũho alua a komõhisa.

10. Esumũlũho lipi tu kuete omo liohenda ya Yehova?

¹⁰ Tu pondola oku kuata ombembua la Yehova Suku. Eci tua citiwa tua kala ndovanyãli va Yehova omo liekambo lietu lioku li pua. Pole, Paulu wa popia hati: “Eci tua kala ovanyali, tua linalisa la Suku omo liolofa Viomõlaye.” (Va Roma 5:10) Tu pondola oku kuata ukamba la Yehova,  omo liocisembi. Kuenje, tu taviwa laye, kuenda tu linga akamba vaye. Paulu wa lomboluila Akristão catiamẽla kohenda ya Yehova, poku popia hati: “Omo cilo tua tendiwa ndavakuesunga mekonda liekolelo, tu kuati ombembua la Suku vonduko ya Ñala yetu Yesu Kristu, una okuti vokuaye tua tambula ohenda ya piãla omo liekolelo tu kuete cilo.” (Va Roma 5:1, 2) Tu eca olopandu omo liombembua tu kuete, yi tunda koku pamisa ukamba wetu la Yehova!

11. Akristão olombuavekua, va kasi oku nena ndati “olomeme vikuavo” kesunga?

¹¹ Tu pondola oku kala vakuesunga kovaso a Yehova. Uprofeto Daniele wa lombolola hati, omo okuti Akristão olombuavekua ‘va loñoloha,’ va laikele oku nena omanu valua ‘kesunga,’ vokuenda kuoloneke via sulako. (Tanga Daniele 12:3.) Akristão olombuavekua va kasi oku ci linga ndati? Va ci linga poku kunda olondaka viwa, kuenda oku longisa ovihandeleko via Yehova komanu vosi vatiamẽla ‘kolomeme vikuavo.’ (Yoano 10:16) Ovo va siata oku kuatisa omanu vaco, oco va kale vakuesunga kovaso a Yehova. Pole, va pondola lika oku kala vakuesunga omo liohenda Yehova a va kuetele. Paulu wa lombolola hati: “Va tendiwa ndavakuesunga omo liohenda ya piãla [ya Yehova] poku yovuiwa locisembi ca eciwa la Kristu Yesu.”—Va Roma 3:23, 24.

12. Ohutililo yi sokisiwa ndati lohenda ya Yehova?

¹² Tu pondola oku linga akamba va Yehova lekuatiso liohutililo. Citava okuti tu likutilila ku Yehova, omo liohenda a tu kuetele. Paulu o tukula ocalo ca Yehova  hati, ‘ocalo cohenda ya piãla,’ kuenda o tu laleka oco tu kuate ‘utõi woku vangula.’ (Va Heveru 4:16a) Tu pondola oku likutilila ku Yehova olonjanja viosi, vonduko ya Yesu. Oku ci linga, cinena asumũlũho alua! Paulu wa popia hati: “Tu kuete utõi woku popia kuenda oku amela kokuaye omo liekolelo tu u kuetele.”—Va Efeso 3:12.

13. Tu pondola oku kuatisiwa ndati eci tu sukila “ekuatiso lia Yehova”?

¹³ Tu pondola oku kuatisiwa votembo ya sokiyiwa. Paulu o tu vetiya oku likutilila ku Yehova olonjanja viosi, oco ‘tu kuatisiwe lohenda yaye, eci tu sukila ekuatiso.’ (Va Heveru 4:16b) Nda tu kasi oku liyaka lovitangi, tu pondola oku pinga ekuatiso ku Yehova. Ndaño okuti Yehova ka kisikiwa oku tambulula olohutililo vietu, pole, wa siata oku ci linga. Olonjanja vimue Yehova o tuma manji umue oco a tu kuatise. Yehova wa siata oku tambulula olohutililo vietu, ‘oco tu kuate utõi woku popia hati: Yehova oñuatisi yange; si kuata usumba. Omunu o ndinga nye?’—Va Heveru 13:6.

14. Omo liohenda ya Yehova tu kuatisiwa ndati eci tu sumua?

¹⁴ Tu pondola oku tambula elembeleko. Oku tambula elembeleko lia Yehova nda tua sumua, ci nena asumũlũho alua. (Osamo 51:17) Eci Akristão vo ko Tessalonike va kala oku lambalaliwa Paulu wa va sonehela hati: “Ñala yetu Yesu Kristu kuenda Suku Isietu, una wa tu sola, okuti wa eca elembeleko ka li pui lelavoko liwa omo liohenda ya piãla, a lembeleke ovitima viene loku vu pamisi.” (2 Va Tesalonike 2:16, 17) Tu sanjuka calua poku limbuka okuti, Yehova o lekisa ohenda ya piãla kokuetu, o tu kuetele ocisola, kuenda wa siata oku tu tata ciwa!

15. Ohenda ya Yehova yi tu ĩha elavoko lipi?

¹⁵ Tu lavoka oku kuata omuenyo ko pui. Omo okuti tua siata oku lueya, tu kuata lika elavoko, nda tua tambula ekuatiso lia Yehova. (Tanga Osamo 49:7, 8.) Momo wa tu ĩha elavoko limue li komõhisa. Elavoko liaco lie? Yesu wa popia hati: ‘Ocipango ca Isiange ceci okuti, wosi o limbuka Omõla loku u kolela o kuata omuenyo ko pui.’ (Yoano 6:40) Omo liaco, tu lavoka oku kala palo posi otembo ka yi pui, omo liohenda Yehova a tu kuetele. Paulu wa popia hati: “Ohenda ya piãla ya Suku ya lekisiwa, loku tuala omanu vosi kepopelo.”—Tito 2:11.

16. Ovina vipi Akristão vamue va setekele oku linga kosimbu?

¹⁶ Tua siata oku tambula asumũlũho alua omo liohenda Yehova a tu kuetele. Pole, tu sukila oku yuvula ovisimĩlo viokuti, ndaño tua linga ovina ka via sungulukile, Yehova o tu ecela omo liohenda yaye. Pokati Kakristão vatete, pa kala vamue va setekele oku ‘tomba Suku, loku pengisa ohenda yaye, oco va kuate epuluvi lioku linga ovina viumbondo.’ (Yuda 4) Akristão vaco va enda oku sima okuti, ndaño vamamako oku linga ekandu, pole, Yehova o pondola oku va ecela. Ovo va enda oku vetiya vamanji vakuavo oco va likongele kokuavo oku linga ekandu. Kolonoke vilo, manji umue o seteka oku ci linga,  ci lekisa okuti, o kasi oku pembula ‘espiritu lia Suku lina tua tambula lohenda yaye ya piãla.’—Va Heveru 10:29.

17. Elungulo lipi uposotolo Petulu a eca?

¹⁷ Koloneke vilo, Satana wa siata oku kemba Akristão vamue oco va sime okuti, ndaño va linga ekandu, Yehova o pondola oku va ecela. Yehova wa siata oku ecela omanu vana va lueya okuti, noke va likekembela. Pole, eye o yongola okuti, tuamamako oku likandangiya oco tu yuvule oloñeyi vĩvi. Yehova wa vetiya upostolo Petulu oku soneha ndoco: “A vamanji wa soliwi, omo vu kuete ale ukũlĩhĩso waco osimbu, lunguki okuti ka vu yapuisiwa lavo loku lueya kuomanu va tomba ovihandeleko kuenje vu lipumbisa epandi liene. Puãi amamiko oku kula kohenda ya piãla kuenda kukũlĩhĩso wa Ñala yetu haeye Upopeli Yesu Kristu.”—2 Petulu 3:17, 18.

18. Ocikele cipi tu kuete omo lihenda ya piãla Yehova a siata oku lekisa kokuetu?

¹⁸ Tu eca olopandu omo liohenda Yehova a siata oku lekisa kokuetu. Omo liaco, olongavelo tu kuete tu sukila oku kuatisa lavio omanu. Momo, tu kuete ocikele coku linga upange waco. Tu pondola oku ci linga ndati? Paulu wa popia hati: ‘Omo okuti omunu lomunu o kuete olongavelo via litepa ndomo via tu ĩhiwa lohenda ya piãla, nda tu kuete upange u kola, tu lingi upange waco. Una o longisa, a litumbike koku longisa kuaco, una o vetiya, a vetiye, una o lekisa ohenda, a ci linge lesanju.’ (Va Roma 12:6-8) Omo liohenda Yehova a siata oku lekisa kokuetu, tu kuete ocikele coku vokiya ombili kupange woku kunda, oku longisa Embimbiliya komanu, oku vetiya vamanji, kuenda oku ecela vana va tu lueyela.

19. Nye tu ka konomuisa vocipama ci kuãimo?

¹⁹ Ndeci ca pita lomanu vamue va tambula esumũlũho liohenda ya Yehova, tu sukilavo oku likolisilako oku kunda ‘olondaka viwa viohenda yaye.’ (Ovilinga 20:24) Vocipama ci kuãimo, tu ka konomuisa ovikele viaco.