1, 2. Rariso manwawan Paulus fyasna kasumasa faro Allah ḇaḇenaḇye ḇyedi?

MANWAWAN Paulus kuker sneḇesiper ikofen, ”Snar Allah ḇaḇenaḇye ḇyedi aya isya raris moḇ baboine yaraine.” (Wasya 1 Korintus 15:9, 10.) Paulus ifawi kaku snar ḇyenaḇye ḇa fa isma Allah sawarwar ḇyedi. Snaro randakya iso ḇewayam snonkaku Kristen sya.

² Fanam imḇe imarya, Paulus fyas ḇe Timotius i, ”Yakofen kasumasa faro Yesus Kristus, Manseren koḇani, ḇeḇuk sambraḇ ḇeaya ma snar kyara aya ḇeḇeuser ma ikyar afuffarmyan ine maḇeaya.” (1 Tim. 1:12-14) Fararmyan rosai rirya? Paulus ikofen ḇe penatua ro sidang Efesus, ”Ḇape yafandun nyawa yediḇa beri, mboi yasowar fa yasma knam ḇepupes fa yafrur posa afuffarmyan Manseren Yesus ḇyeasas faro aya insa yaḇe saksi Ankankinem Ḇeḇye ro saswar ma fakamaman Allah.”​—Kis. 20:24.

3. Fararmyan ḇepyum rosai sḇuk ḇe Paulus i? (Mam sonin ḇerandak ro artikel ine.)

³ ”Ankankinem ḇeḇye” rosai Paulus ḇyaryas na? Ma rariso  nane fyasna Yahwe ḇaḇenaḇye ḇyedi? Paulus ikofen ḇe snonkaku Kristen ro Efesus, ”Ma mkomnaf kwar rariso fararur saswar-fakamaman Allah, sikyar mabe aya faro mko.” (Ef. 3:1, 2) Yesus iwan Paulus i fa ḇyaryas ankankinem ḇeḇye faro snonkaku Yahudi ḇa sya snar kirine sikako sna saneraro fa sakḇepoik kayam kuker Kristus ro Karajan Allah. (Wasya Efesus 3:5-8.) Paulus ḇyaryas kuker raryaḇ ma ḇyuk farari ḇepyum faro snonkaku Kristen ro baboine. Fyasna snar Allah ḇaḇenaḇye ḇyedi faro i nefromo monda ḇa.

4, 5. Rosai ḇefnai fa na kokofen ”ankankinem ḇeḇye Karajan” imnis kuker ankankinem ḇeḇye ”Allah ḇaḇenaḇye ḇyedi”?

⁴ Ro fafisu ḇepupes ine, Yahwe iwan kawasa ḇyesi fa sbaryas ”Ankankinem Ḇeḇye ro Ḇaḇesasoser . . . ro supswan ḇesiper fa ḇyesaksi faro er sya kam.” (Mat. 24:14) Ankankinem ḇeḇye Karajan ine kako iso ’ankankinem ḇeḇye kuker Allah ḇaḇenaḇye ḇyedi’. Rosai ḇefnai ya? Snaro barakas ḇebor kam kosmana ro Karajan Allah iso bon ro Yahwe ḇaḇenaḇye ḇyedi. (Ef. 1:3) Paulus fyasna kasumasa faro Yahwe ḇaḇenaḇye ḇyedi kuker iryaḇ ro ḇaḇeḇaryas ya. Ko kako kofarari Paulus i ke?​—Wasya Roma 1:14-16.

⁵ Ro artikel ḇeponya, kofawi kwar koine snonkaku ḇesasar rariryano, kosma fainda ro nyan ḇebor ro Yahwe ḇaḇenaḇye ḇyedi. Inja, kona fakamamar fa koḇuk farkor ḇe snonkaku ḇesesya kuker rariso Yahwe fyasna saswar ḇyedi ma rariso na si kako sisma fainda. Kuker nyan rariso kofnoḇek snonkaku ḇesesya fa sfasna kasumasa faro Allah ḇaḇenaḇye ḇyedi rai?

6, 7. Rofyor kofasnaḇair farsarser fasaspar ḇe snonkaku sya, rariso kobaryas ankankinem ḇeḇye kuker Allah ḇaḇenaḇye ḇyedi?

⁶ Fafisu ine, snonkaku ḇebor sḇaḇir sifrur royoḇa rofyor sifrur sasar. Inja sfawi ḇa rosai ḇefnai fa snonkaku sya sfandun farsarser fasaspar. Osower ido, snonkaku ḇebor syadiwer sḇaḇir snar nyan kankenem sena nun marasrisen ḇesi ḇa. Isof ro sawos kuker Saksi Yahwe sya, insape sfawi sasar ido rosairirya, rariso roi nane nawyae kankenem snonkaku sya, ma rosai fandun fa sifrurna insama sḇewomen ḇe sasar ya werḇa. Rofyor sfawi mnis kuker sasar ya, snonkaku ḇenapes sya sikofen kasumasa ḇe Yahwe I snar iwan Rumkun ḇyedi ḇe supswan ine fa fyaspar ko ro sasar ma marmarya. Yahwe ifrur rarirya snar saswar ma ḇaḇenaḇye ḇeba ḇyedi.​—1 Yoh. 4:9, 10.

⁷ Mamkada rosai Paulus ikofen kuker Rumkun Yahwe iswar kakuya, ”Snar ro Yesus kosma fasaspar snar rik ḇyedi, isoine ḇaḇepayasyos ro sasar, imnis nana saswar-fakamaman [Yahwe] ḇyena.” (Ef. 1:7) Farsarser fasaspar Yesus ḇyedi iso fasasna ḇeba kaku ro Allah saswar ḇyedi ḇeko ma fyasna ḇaḇenaḇye ḇeba Ḇyedi. Sne koḇena naprei snar kofawi rofyor kofasna kakyar faro Yesus farsarser ḇyedi, nari sasar koḇena neḇepyos ma kona sneuser ḇesren! (Ibr. 9:14) Kakuya ine iso ankankinem ḇeḇye faro snonkaku ḇesesya!

8. Rosai ḇefnai fa snonkaku ḇesasar sfandun sḇeoser kaḇer kuker Allah I?

⁸ Snonkaku sya sfasna kakyar faro Yesus farsarser ḇyedi ḇa ido, Allah myam si ḇe mbroḇ. Inja, kona fakamaman fa kokofenḇair ḇesi snar bisa fa sḇebati kuker  Allah I. Manwawan Yohanes fyas, ”Mansei ḇekyar faro Rumkunya, isma kankenem ḇekain fyoroya, ḇape mansei ḇeḇeuser Rumkunya ḇa, ipok isma koreriḇa, mboi Allah masasor ḇyedi kyuri ḇesya kwar.” (Yoh. 3:36) Na komarisen kaku snar farsarser Kristus ḇyedi na ḇefrur fa koḇebati kuker Allah I. Paulus fyasnaḇair na radine, ”Randakya mkokenem ḇinkwanbur Allah, ma mkoḇe mbroḇ i kuker rari ma kakara ḇeḇarḇor mkoḇena; ḇape ro baboine, kuker marmar ro Rumkun ḇyedi, Allah ifrur ḇaḇeoser mkoḇedi, iḇye kaḇer wer kuker mankundi.”​—Kol. 1:21, 22.

9, 10. (a) Fakamamar rosai Kristus ḇyuk ḇe snonkaku ḇesma ramrem sya? (b) Rariso ’domba-domba ḇesesya’ sifnoḇek si rai?

⁹ Kristus ḇyuk ’fararur’ faro naek ḇesma ramrem ḇyesya fa ifnoḇek ’snonkaku ḇesesya kako sakḇye kaḇer wer faro Allah’. Paulus ikofen ḇesi, ”Allah iso ḇefrur nakamya. Ifrur rarirya snar Kristus ma koḇye kaber wer kuker i, raimnai ḇyuk fararur maḇeko fa koḇaryas wos ḇeḇye insa snonkaku ḇesesya kako sakḇye kaḇer wer faro Allah. Inja wos nkoḇena kuker manfandu Kristus, Allah ifrur isof snonkakusya siḇye kaḇer wer kuker Allah. Allah ifrurna rarirya mboi kyor sasar snonkakusya sifrur faroi naba. Ma Allah ḇyuk fararur ani maḇenko fa nkoḇaryas wos ani. Inja nkoine manwawan Kristus. Ma nkawawos faro naek mko imnis Allah mankundi ḇewawos faro naek mko. Snar Kristus snonsnon ḇyedi, nkor kaku ḇeri ḇemko, mkona Allah saswar ḇyedi ḇeḇuk fa mkoḇye kaḇer wer kuker i.”​—2 Kor. 5:18-20.

¹⁰ Inema fakamaman faro ’domba-domba ḇesesya’ fa sifnoḇek ḇesma ramrem sya ro ḇaḇebaryas. (Yoh. 10:16) Ḇe manwawan Kristus ḇyesi, ’domba-domba ḇesesya’ sifrur fararur ḇeba kaku ro ḇaḇebaryas, sḇuk farkarkor napnapes faro snonkaku sya ma sifnoḇek sifa sna ḇaḇebati kuker Yahwe. Ine ḇar ḇefandun kaku ro ḇaḇebaryas ankankinem ḇeḇye kuker Allah ḇaḇenaḇye ḇyedi.

11, 12. Rosai ḇefnai fa koḇuk farkarkor kuker nadi ḇe snonkaku sya imnis kuker koḇaryas ankankinem ḇeḇye ḇe si?

¹¹ Snonkaku ḇebor sya senadi insama sisma sneprei, ḇape sikyar kaku ḇa snar Allah ryower nadi sena. Fandun fa sifawi Yahwe iso ”Manḇerower nadi”. Daud fyas, ”Sye, Manberower nadi, faro au monda snonkaku sya nari srama. Sasar ayena neḇepoik syadi ro aya. Faro sasar nkoḇena, nari werer wakawef na.”​—Mz. 65:2, 3.

¹² Yesus ikofen ḇe manfamfyan ḇyesi, ”Rofyor mkor roi ono kuker snonsnon ayedi, nari yafrur na.” (Yoh. 14:14) Ine kyurfasna snar na kor ”roi ono” ḇemnis kuker Yahwe marisen ḇyena. Yohanes fyas, ”Snar kokyar imnaf fararyor koḇena, rofyor kor rosairya wer imnis kuker marisen ḇyedi.” (1 Yoh. 5:14) Ipyum kaku snar kofnoḇek snonkaku sya fa sfawi snar nadi ima nbuk sneprei ḇesi monda ḇa ḇape ine nyan fa sfanam ḇe ”karapesa ro ḇaḇenaḇye” Yahwe ḇyedi! (Ibr. 4:16) Rofyor koḇuk farkarkor ḇe snonkaku sya fa senadi kuker nyan ḇenapes, faro Yahwe, ma sor roi ḇemnis, kofnoḇek si fa sḇebati kuker Yahwe I ma sisma sneprei rofyor sekandera.​—Mz. 4:1; 145:18.

13, 14. (a) Fakamaman ḇeba rosai snonkaku ḇesma ramremsya nari sisma ro fafisu iwamaya? (b) Roi ḇepyum rosai na snonkaku ḇesma ramrem sya sifrur ḇe snonkaku sya?

¹³ Yahwe nari fyasna ḇaḇenaḇye ḇyedi  ibasyadi ”rofafisu nari ḇeramaya”. Rariso nyan ya? Snonkaku ri 144.000 siso nari ḇepoik kayam kuker Kristus ro nanki, Allah nari ḇyuk ḇe si fakamaman ḇepyum kaku. Paulus fyasnaḇair fakamaman rosai nari sismana rofyor fyas, ”Ḇape Allah ḇyuk maḇe ko fakamaman snar ifo kuker saswar ḇeba. Koine snonkaku ḇemar kwar snar sasar koḇena ḇape ifrur fa kokenem kaḇer fnoḇek Kristus, snar saswar-fakamaman Allah mkosma koreri snar koḇeoser kuker Yesus Kristus, Allah ḇyawes kaḇer ko ma ḇyuk moḇ ḇeko fnoḇek Yesus Kristus ro boiyaswa, insa rofafisu nari ḇeramaya, fyasna saswar-fakamaman ḇyedi imnis raris ḇaḇye ḇyedi maḇeko ro Yesus Kristus.”​—Ef. 2:4-7.

¹⁴ Yahwe fyasos roi ḇepyum kaku faro snonkaku Kristen ḇesma ramrem sya rofyor sḇepoik kayam kuker Kristus ro nanki. (Luk. 22:28-30; Flp. 3:20, 21; 1 Yoh. 3:2) Yahwe nari ”fyasna saswar-fakamaman ḇyedi” faro si kuker nyan ḇepyum kaku oso. Nari sḇe ”Yerusalem babo”, ḇinfakawin Kristus ḇyedi. (Why. 3:12; 17:14; 21:2, 9, 10) Nari sfararur kayam kuker Yesus i fa ”ssḇuk nafrur ersya fasiprei”. Nari sifnoḇek snonkaku sya fa sḇemkei ro sasar ma marmarya ma sḇe snonkaku ḇemnis kaku.​—Fasasna Faro Yohanes 22:1, 2, 17.

15, 16. Rariso Yahwe nari fyasna ḇaḇenaḇye ḇyedi faro ’domba-domba ḇesesya’ ro fafisu naiwama?

¹⁵ Efesus 2:7 ikofen snar Allah nari fyasna ḇaḇenaḇye ḇyedi ”rofafisu nari ḇeramaya”. Fafisuya, snonkaku syakam ro supswan nari smam Allah ”fyasna saswar-fakamaman ḇyedi”. (Luk. 18:29, 30) Nyan ḇepyum kaku oso nari Yahwe fyasna ḇaḇenaḇye ḇyedi ro supswan iso ḇyuk aḇiḇer faro snonkaku ḇemar kwar sya ro ”Syeol”. (Ayb. 14:13-15; Yoh. 5:28, 29) Manseiso nari ḇeḇebawes ya? Snon ma bin ḇesoasuser siso ḇemar rofyor Yesus imar ḇaim ma ’domba-domba ḇesesya’ ḇesoasuser ḇe Yahwe isof ro simar ro fafisu ras papupes ya. Snonkaku ḇesoasuser sine nari sikenem kaḇer fa sefaryam ḇe Yahwe I pdef.

 ¹⁶ Snonkaku yuta ma yuta ḇemar kwar sya ḇape smamḇir Allah I ḇaim, sikako nari sikḇok. Yohanes fyas, ”Ma yamam snonkaku ḇemarsya, ḇeba ma kasun, sores kam ro ḇarpon karapesa ḇaḇesasoser ani. Ma syapna neḇeḇas. Ḇarpurya syap oso ḇese ḇyeḇeḇas, isoine syap kankenemya. Ma rofafisu ani samamyai ssḇuk faro snonkaku ḇemarsya, imnis rosai sifrur kwar siso fasfasepen ro syap anna. Raimnai sorenya ḇyefa ḇemar roisya sisasyar. Marmar ma munaiḇui daksasyar ḇemar roisya. Ma sikam sisma samamyai imnis kuker rosai sifrur kwar.” (Why. 20:12, 13) Snonkaku ḇesma aḇiḇer sya nari sna swaf ḇepyum fa sfarkor kuker Yahwe I ma skarem ḇaḇepapoik Ḇyedi. Fandun fa sfarkor ma siso mnis wos ḇefarkin ḇero Refo ma farkankin ḇebabo ḇero ”syapna”. Farkankin ḇebabo nane iso nyan ḇese Yahwe fyasna ḇaḇenaḇye ḇyedi.

17. Rosai fandun fa koswarepen rofyor koḇaryas?

¹⁷ Fafisu ine, kobaryas ankankinem ḇeḇye Karajan ima fararur ḇefandun kaku syadiwer snar papupes ya fyanam kwar! (Mrk. 13:10) Fandun fa koswarepen koḇaryas snar komarisen kosyowi Yahwe I. Inja fandun fa, kofawar ḇe snonkaku ḇesesya kuker barakas ḇebor nari kosma na ro dunya babo snar Yahwe ḇaḇenaḇye ḇyedi.

18, 19. Rariso kosandik Yahwe ḇaḇenaḇye ḇyedi?

¹⁸ Rofyor koḇaryas ḇe snonkaku ḇese, kokofenḇadir rofyor Karajan Kristus ḇyepoik, snonkaku sya nari sisma fainda ro fasaspar ma nari sḇesnonkaku ḇemnis kaku. Refoya ikofen, ”Snar rofafisu oso farsyos sansoren nari isma faspar ro papoik ḇemuni fa ḇyemomprafya ma nari isma ḇaḇemkei fnoḇek Allah romawa ḇyesi ro baba siḇe sismaya.” (Rm. 8:21) Asas ine nari ndarirya snar Yahwe ḇaḇenaḇye ḇyedi.

¹⁹ Kona fakamaman fa kokofenḇair ḇe snonkaku ḇesesya kuker asas ḇepyum kaku ḇefas ro Wahyu 21:4, 5, ”[Allah] nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako. Roi ḇeḇor ḇekwar napromes.” Ramnai Yahwe, mankun ḇekain ro karapesa ani ikofen, ”Baboine yafrur nakam fanbabo!” Ma ikofen wer, ”Fasepen nane, snar wos nane nkaku ma neḇekyare.” Rofyor kobaryas kuker raryaḇ anun ine, koḇuk sanandik faro Yahwe ḇaḇenaḇye ḇyedi!