1, 2. ?Aposol Pol i mekem wanem from fasin blong God blong mekem i gud tumas long hem?

APOSOL Pol i talem se: “God i givhan long mi long gladhat blong hem . . . Mo hemia i no blong nating nomo, i gat frut blong hem.” (Ridim 1 Korin 15:9, 10.) Pol i luk se i no stret nating blong God i lavem hem, from we hem i stap spolem ol Kristin.

² Klosap long taem we bambae Pol i ded, hem i raet i go long Timoti se: “Mi mi stap talem tangkiu long Jisas Kraes, Masta blong yumi, from we hem i givim paoa long mi, mo i luk mi se mi stret blong holem wok blong hem, nao i putum mi long wok ya.” (1 Timoti 1:12-14) ?Wanem wok ya we Pol i mekem? Pol i talem long ol elda long Efesas se: “Mi mi luk finis, we laef blong mi i olsem nating nomo long mi. Mi no moa tingbaot laef blong mi, mi wantem kasem en blong rod blong mi. Mi wantem finisim wok ya we Jisas, Masta blong yumi i givim long mi blong mi mekem. Wok ya i blong talemaot gud nius ya we God i lavem yumi tumas, mo i stap mekem i gud tumas long yumi.”​—Ol Wok 20:24.

3. ?Pol i kasem wanem spesel wok? (Yu luk pija long stat blong stadi.)

 ³ ?Wanem “gud nius” ya we Pol i talemaot, mo olsem wanem samting ya i soemaot gladhat blong Jehova? Pol i talem long ol Kristin long Efesas se: “Yufala i harem finis we God i stap givhan long mi long gladhat blong hem, blong mi mekem wok ya blong givhan long yufala.” (Efesas 3:1, 2) Jisas i talem long Pol blong i prij long ol man we oli no laen blong Isrel. Long rod ya, olgeta tu oli save kasem blesing ya blong joen wetem Kraes long Kingdom blong God. (Ridim Efesas 3:5-8.) Pol i wok strong long wok blong prij, mo hemia i wan gudfala eksampol blong ol Kristin tede. Hem i soemaot se “i no blong nating nomo,” we God i givhan long hem long gladhat blong hem.

4, 5. ?‘Gud nius blong Kingdom’ i sem mak long wanem? Plis yu eksplenem.

⁴ Long ol las dei ya, ol man blong Jehova oli stap mekem wok ya blong ‘talemaot gud nius blong Kingdom long olgeta ples long wol.’ (Matiu 24:14) Gud nius blong Kingdom, i sem mak long “gud nius ya we God i lavem yumi tumas, mo i stap mekem i gud tumas long yumi.” ?From wanem yumi talem olsem? From we ol blesing we bambae yumi kasem long Kingdom blong God, oli soemaot se Jehova i kaen tumas long yumi. (Efesas 1:3) Pol i wok strong long wok blong prij blong soemaot se hem i glad long fasin blong Jehova blong mekem i gud long hem. ?Olsem wanem? ?Yumi stap folem eksampol blong Pol?​—Ridim Rom 1:14-16.

⁵ Long las stadi, yumi luk se nating we yumi sinman, be long gladhat blong God hem i stap givhan long yumi long plante rod. Taswe, yumi wantem givhan tu long ol narafala blong oli save olsem wanem Jehova i stap soemaot se hem i lavem yumi mo olsem wanem oli save kasem blesing from. ?Wanem sam samting we yumi save mekem blong givhan long ol narafala blong oli talem tangkiu long God from gladhat blong hem?

6, 7. Taem yumi tokbaot sakrefaes blong Jisas long ol man, ?olsem wanem hemia i soemaot se yumi stap talemaot gud nius ya se God i lavem yumi tumas?

⁶ Tede, plante man oli no sore nating taem oli mekem sin, taswe oli no kasemsave from wanem ol man oli nidim sakrefaes blong Jisas. Mo tu, plante man oli luksave se fasin blong laef blong olgeta i no mekem olgeta oli glad. Mo bifo we oli storian wetem ol Witnes blong Jehova, oli no save se sin i wanem, wanem rabis samting we sin i mekem long yumi, mo samting we yumi mas mekem blong kam fri long sin. Be taem olgeta we oli lavem Jehova oli kasemsave ol samting ya, oli glad tumas. Oli talem tangkiu long Jehova from we hem i sanem Pikinini blong hem i kam blong mekem yumi fri long sin mo ded. Jehova i mekem olsem from we hem i lavem yumi tumas mo i wantem givhan long yumi long gladhat blong hem.​—1 Jon 4:9, 10.

⁷ Pol i tokbaot samting ya we Jisas i mekem i se: “Nao from we blad blong Kraes i ron, God i mekem yumi ya we yumi joen long Kraes, yumi friman finis. Hem i fogivim yumi finis, i tekemaot ol sin blong yumi. Gladhat blong God i bigwan tumas.” (Efesas 1:7) Sakrefaes blong Jisas, hem i bigfala samting we i soemaot se Jehova i lavem yumi tumas mo i wantem givhan long yumi long gladhat blong hem. Yumi harem gud tumas blong save se sipos yumi bilif long sakrefaes blong Jisas, God bambae i fogivim ol sin blong yumi mo tingting  blong yumi bambae i klin. (Hibrus 9:14) Hemia i wan gudfala nius we yumi wantem tokbaot wetem ol narafala.

8. ?From wanem ol man oli mas bilif long sakrefaes blong Jisas?

⁸ Sipos ol man oli no bilif long sakrefaes blong Jisas, God bambae i luk olgeta olsem ol enemi blong hem. Taswe, yumi gat wok ya blong talemaot long olgeta se oli save kam ol fren blong God. Aposol Jon i talem se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem. Mo man olsem, God bambae i stap kros long hem olwe nomo.” (Jon 3:36) Yumi glad we sakrefaes blong Jisas i mekem se yumi save kam ol fren blong God. Pol i tokbaot samting ya i se: “Bifo, . . . Yufala i strenja long God, yufala i enemi long hem, from we tingting blong yufala i agensem hem, mo fasin blong yufala i nogud. Be naoia, from we Kraes i kam man olsem yumi, mo i ded, God i mekem yufala i fren blong hem bakegen long ded blong Kraes.”​—Kolosi 1:21, 22.

9, 10. (1) ?Wanem wok we Jisas i givim long ol tabu Kristin? (2) ?“Ol narafala sipsip” oli givhan long ol tabu Kristin olsem wanem?

⁹ Kraes i givim wok long ol tabu Kristin long wol blong oli ‘pulum ol man oli kam fren blong God.’ Pol i talem long olgeta se: “God nomo we i stap mekem ol samting ya. Hem i mekem rod long Kraes, blong mekem we mifala i no moa enemi blong hem, mifala i fren blong hem. Mo hem i putum wok ya long han blong mifala, blong mifala i pulum ol narafala man oli kam, oli fren blong hem. Tok ya we mi talem, i min se God i mekem rod long Kraes blong tekem ol man long wol oli kam, oli fren blong hem. Naoia hem i no moa makem kaon blong ol sin blong olgeta. Mo hem i givim tok ya long mifala blong talemaot, se God i mekem rod finis, blong olgeta man oli save kam fren blong hem. From samting ya, mifala i man blong karem tok blong Kraes, we God i stap yusum mifala blong singaot yufala. Long nem blong Kraes, mifala i talem long yufala se, ‘Plis, yufala i letem God i tanem yufala, yufala i no moa enemi blong hem, yufala i kam fren blong hem.’”​—2 Korin 5:18-20.

¹⁰ I wan nambawan blesing blong “ol narafala sipsip” oli givhan long ol tabu Kristin blong mekem wok ya. (Jon 10:16) “Ol narafala sipsip” oli olsem ol man blong karem tok. Olgeta oli stap mekem bigfala wok ya blong prij, tijim ol man long trutok mo oli givhan long olgeta blong oli fren gud wetem Jehova. Hemia i wan impoten haf blong wok ya blong talemaot gud nius ya we God i lavem yumi tumas.

11, 12. ?From wanem i gud blong tijim ol man blong prea?

¹¹ Plante man oli prea jes blong harem gud nomo, be oli no bilif nating se God i stap harem prea blong olgeta. Olgeta ya oli nidim blong save se Jehova i stap lesin long ol prea. Deved i talem se: “Oltaem . . . Yu yu stap ansa long ol prea blong mifala. Olgeta man long evri ples bambae oli mas  kam long yu, from we oli stap mekem sin. Ol fasin nogud blong mifala oli stap winim mifala, be yu yu stap fogivim mifala, yu stap tekemaot sin blong mifala.”​—Ol Sam 65:2, 3.

¹² Jisas i talem long ol disaepol blong hem se: “Sipos yufala i askem samting long mi long nem blong mi, bambae mi mi save mekem.” (Jon 14:14) Hemia i min se yumi save prea from eni samting we i laenap wetem tingting blong Jehova. Jon i talem se: “Taem yumi kam long fes blong God long prea, yumi bilif strong se sipos yumi askem samting long hem we i stret long tingting blong hem, hem bambae i harem prea blong yumi.” (1 Jon 5:14) I gud tumas blong givhan long ol man blong oli kasemsave se prea i no wan samting nomo blong mekem olgeta oli harem gud, be i wan rod blong kam klosap long Jehova we i stap ‘givhan long man long gladhat blong hem.’ (Hibrus 4:16) Taem yumi tijim ol man blong prea long Jehova mo prea from samting we i laenap wetem tingting blong hem, yumi stap givhan long olgeta blong kam fren blong Jehova. Mo tu, yumi givhan long olgeta blong oli harem gud taem oli kasem trabol.​—Ol Sam 4:1; 145:18.

13, 14. (1)  ?Wanem ol nambawan blesing we ol tabu Kristin bambae oli kasem long fiuja? (2) ?Wanem nambawan wok we ol tabu Kristin bambae oli mekem blong givhan long ol man?

¹³ Long niufala wol, Jehova bambae i mekem i gud moa long yumi blong soemaot gladhat blong hem. ?Bambae hem i mekem samting ya olsem wanem? God bambae i givim wan nambawan blesing long ol 144,000 man ya we bambae oli rul wetem Jisas long heven. Pol i tokbaot blesing ya i se: “God i sore tumas long yumi, mo hem i stap lavem yumi tumas. Nao taem yumi stap olsem we yumi ded, from we yumi no bin obei long God, hem i joenem yumi long Jisas Kraes, i mekem yumi olsem we yumi laef bakegen wetem hem. Hemia i samting blong gladhat blong God nomo, we hem i givhan long yufala olsem, i sevem yufala. Nao long fasin ya we God i joenem yumi long Jisas Kraes, hem i leftemap yumi wetem hem, i givim hae nem long yumi wetem hem long heven. God i mekem olsem, blong i save soemaot fasin blong hem long olgeta man oltaem, gogo i no save finis. Long gudfala fasin ya we God i mekem long yumi ya we yumi joen long Jisas Kraes, hem i soemaot we gladhat blong hem blong givhan long yumi, i bigwan tumas, i bitim mak.”​—Efesas 2:4-7.

¹⁴ Ol gudgudfala samting we Jehova i mekemrere blong ol tabu Kristin taem bambae oli rul wetem Kraes, oli nambawan tumas. I had blong yumi kasemsave long olgeta. (Luk 22:28-30; Filipae 3:20, 21; 1 Jon 3:2) Jehova bambae i soemaot long ol tabu Kristin long wan spesel rod, se ‘gladhat blong hem blong givhan long olgeta, i bigwan tumas, i bitim mak.’ Bambae olgeta oli mekemap “niufala Jerusalem,” we i woman blong Kraes. (Revelesen 3:12; 17:14; 21:2, 9, 10) Olgeta bambae oli wok wetem Jisas blong “tekemaot sik blong ol man blong ol kantri long wol.” Bambae oli givhan long ol man blong oli kam fri long  sin mo ded mo oli kam stret gud olgeta.​—Ridim Revelesen 22:1, 2, 17.

15, 16. ?Olsem wanem Jehova bambae i soemaot gladhat blong hem long “ol narafala sipsip” long fiuja?

¹⁵ Efesas 2:7 i talem se God bambae i soemaot gladhat blong hem long niufala wol. Long taem ya, bambae yumi evriwan i harem gud long ‘gladhat blong hem blong givhan long yumi, we i bigwan tumas, i bitim mak.’ (Luk 18:29, 30) Wan long ol nambawan rod we Jehova bambae i soemaot gladhat blong hem long yumi, hemia taem hem i mekem ol dedman oli laef bakegen. (Job 14:13-15; Jon 5:28, 29) ?Bambae hu i laef bakegen? Hemia ol gudfala man mo woman we oli laef bifo long ded blong Jisas, mo “ol narafala sipsip” we oli holemstrong long Jehova mo oli ded long ol las dei ya. Olgeta ya bambae oli laef bakegen blong oli gohed blong mekem wok blong Jehova.

¹⁶ Plante man we oli ded we oli no save God, bambae oli laef bakegen. Jon i talem se: “Mi luk olgeta dedman, olgeta we bifo oli haeman wetem olgeta we oli no gat nem, oli kam stanap long fes blong Man ya we i stap sidaon long bigfala jea blong hem. Nao ol enjel oli openem ol buk, mo oli openem wan narafala buk we i gat nem blong ol man we oli gat laef i stap long hem. Nao Man ya i jajem ol dedman from ol fasin we oli mekem bifo, we hem i bin raetemdaon long ol buk ya. Olgeta man we oli ded long solwota, oli aot long solwota oli kam. Mo olgeta narafala dedman tu oli kam. Ded wetem Hom blong ol Dedman tufala i no moa save holem olgeta, olgeta evriwan oli aot long tufala, oli kam. Nao Man ya i jajem olgeta from ol fasin we oli mekem bifo.”  (Revelesen 20:12, 13) Olgeta we oli laef bakegen bambae oli gat janis blong save Jehova mo sapotem hae rul blong hem. Bambae oli mas lanem mo folem ol rul blong Baebol long laef blong olgeta, mo bambae oli lanem ol niufala loa we oli stap long “ol buk ya.” Ol niufala loa ya we Jehova bambae i givim, i wan narafala rod we i soemaot se hem i lavem yumi tumas.

17. ?Yumi mas tingbaot wanem taem yumi stap talemaot gud nius?

¹⁷ Tede i impoten tumas we yumi wok strong blong talemaot gud nius, from we en i klosap. (Mak 13:10) Yumi mas tingbaot se mak blong yumi taem yumi prij i blong ona long Jehova. ?Yumi mekem samting ya olsem wanem? Hemia taem yumi talemaot long ol man se ol blesing we bambae yumi harem gud long olgeta long niufala wol, bambae oli kamtru from we Jehova i kaen tumas long yumi.

18, 19. ?Olsem wanem yumi soemaot se yumi stap presem Jehova?

¹⁸ Taem yumi prij long ol man, yumi save eksplenem long olgeta se taem Kraes i rul long Kingdom, bambae yumi kasem ol blesing mo sloslo bambae yumi kam stret gud olgeta. Baebol i talem se: “Ol pikinini blong [God] oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” (Rom 8:21) Gladhat blong Jehova nomo i save mekem samting ya i kamtru.

¹⁹ Yumi gat nambawan blesing ya blong talemaot long ol man, promes blong Jehova long Revelesen 21:4, 5, we i se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” Mo Jehova, we i stap sidaon long bigfala jea blong hem, i talem se: “!Yu luk! Mi mi stap mekem olgeta samting oli kam niuwan bakegen.” Mo tu hem i talem se: “Yu raetem tok ya, from we tok blong mi i tru, mo ol man oli save bilif long hem.” Taem yumi wok strong blong prij, yumi soemaot se yumi stap presem Jehova from we hem i lavem yumi tumas.