1, 2. Kuchi postolo Paulu asolwele usakwililo wenyi, ha chawana cha vumbi lia Zambi?

POSTOLO Paulu kambile ni mbunge yeswe ngwenyi: “Vumbi [lia Zambi] lize anguhele kuliapwile liamokomoko.” (Tanga 1 A-Korindu 15:9, 10.) Paulu kanyingikine pundu ngwenyi, iye te katelele kutambula keke ya Zambi. Mumu te kakuhungumiona akwa-Kristu.

² Kusongo lia mwono wenyi, Paulu yasonekena Timoteu ngwenyi: “Nakusakwila yoze wakungukolesa, iye Kristu Yesu Mwene wetu, se wangumwene umwe mahasa kungufuliela, kashika hangusela ku uvumbiko.” (1 Timoteu 1:12-14) Uvumbiko uka wenawo? Paulu kalwezele makulwana a mu chikungulwila cha Efwesu ngwenyi: “Chishi kunyonga mwono wami ngwe chuma chilemu kuli yami mwene, hanga ngukamanunune wenyi wami ni uwahililo, ni uvumbiko uze natambwile kuli Mwene Yesu, kushindakenya chikolo sango lipema lia vumbi lia Zambi.”—Yilinga 20:24.

3. Uvumbiko uka ulemu uze Paulu atambwile? (Tala chizulie ha uputukilo.)

³ ‘Sango lika lipema’ lize Paulu ambulwile, nawa kuchi chino chasolwele chawana cha vumbi lia Yehova? Paulu kalwezele akwa-Kristu mu Efwesu ngwenyi: “Hinwevwa ha uselo wa vumbi lia Zambi uze hanangwehe hali yenu.” (A-Efwesu 3:1, 2) Yesu kalwezele Paulu hanga ambujole sango lipema kuli atu waze te hi A-Yunda ko. Ha chino, atu akwa-mavungu te mahasa kupwa mu chiyulo cha Wanangana uze anayulu kuli Meseya. (Tanga A-Efwesu 3:5-8.) Paulu kambulwile sango lipema ni zango lieswe ni kuhichikila akwa-Kristu chilweza chipema musono. Iye kasolwele ngwenyi, chawana cha vumbi muli iye kuchakapwile ‘chamokomoko.’

4, 5. Mumu liaka mutuhasa kwamba ngwetu, “sango lipema lia Wanangana” linalumbunuka nawa “sango lipema lia vumbi lia Zambi”?

⁴ Ha matangwa wano kusula, tuvumbi twa Yehova kali ni mulimo wa kwambujola ‘sango lipema lia Wanangana mu yifuchi yeswe ya hashi ni kusa shindakenyo ku mavungu eswe.’ (Mateu 24:14) Sango lipema lia Wanangana linalumbunuka nawa “sango lipema lia vumbi lia Zambi.” Yika chino chinalumbunuka? Chinalumbunuka ngwo, yiwape yeswe mutukatambula mu Wanangana wa Zambi, makatwahayo ha mukunda wa keke ya Yehova. (A-Efwesu 1:3) Paulu kasolwele usakwililo wenyi ha chawana cha vumbi lia Yehova ha kwambujola sango lipema ni zango lieswe. Shina ena unembulula chilweza cha Paulu nyi?—Tanga A-Roma 1:14-16.

⁵ Ha mutwe uze wapalika, twalilongesanga chize etu akwa-shili twakuyuka ku chawana cha vumbi lia Yehova mu majila eka ni eka. Amu twakuyuka chinji, kashika tuli ni chiteli cha kulongesa akwetu chize Yehova akusolola zango lienyi, ni chize no mahasa kuyuka ku chawana chacho. Mu majila aka mutuhasa kukwashilamo akwetu hanga no ayuke ku chawana cha vumbi lia Zambi?

6, 7. Muze twakuhanjika ni atu hakutwala ku ukuule, kuchi twakulumbununa sango lipema lia chawana cha vumbi lia Zambi?

⁶ Musono, atu anji keshi kwivwa yikola ku mbunge muze malinga shili, kashika o kanyingikine mumu liaka atu anafupiwa ukuule. Chikwo nawa, atu anji kanamono ngwo, yitanga yize akusolola ku mwono wo kuushi kwaanehena uwahililo. Chipwe muze o akuhanjika ni Yela ja Yehova, anji akuli ayo kanyingikine chize shili yapwa, chize yakutupinjisa, ni yize twatamba kulinga hanga tutuhuke mu upinji wa shili. Muze o akunyingika chize shili yapwa, atu waze akwete mbunge yipema kakusakwilila chinji ha chize Yehova atumine Mwanenyi hano hashi hanga atukule ku shili ni kufwa. Yehova kahanyine Mwanenyi ha mukunda wa zango lienyi linene ni chawana chenyi cha vumbi.—1 Yoano 4:9, 10.

⁷ Achitala yize Paulu ambile hakutwala kuli Mwana wa Yehova: “Muli iye, ukuule tuli nawo ku manyinga jenyi, we ukonekeno wa milonga yetu, nikulita ni kulumbama cha vumbi lienyi [Yehova].” (A-Efwesu 1:7) Chitapo cha ukuule wa Kristu chili chilweza chinene cha zango lia Zambi hali yetu nawa chakusolola unene wa chize chapwa chawana Chenyi cha vumbi. Uno uli uhuzululo unene ha kunyingika ngwetu, nyi twafuliela ku chitapo cha Yesu, matukonekena shili yetu ni kupwa ni mbunge yitoma! (A-Hepreu 9:14) Chochene, jino jili sango jipema jize twatamba kwambujola kuli akwetu!

8. Mumu liaka atu akwa-shili anafupu kuliwanyisa ni Zambi?

⁸ Atu nyi mahona kufuliela ku chitapo cha Yesu, Zambi kakwaamona ngwe akwa-kole jenyi. Kashika yetu tuli ni chiteli cha kwaalweza ngwetu, o mahasa kupwa masepa ja Zambi. Postolo Yoano kasonekene ngwenyi: “Yoze mafuliela mwe Mwana, mwono wa mutolo ali nawo. Yoze keshi kwononoka kuli mwe Mwana, kechi kamona mwono, alioze utenu wa Zambi kuwatwama hali iye.” (Yoano 3:36) Mutuhasa kuwahilila ngwetu, chitapo cha ukuule wa Kristu chapwisa chashi, yetu kupwa masepa ja Zambi. Paulu kachilumbunwine mu jila yino ngwenyi: “Yenu se ha miaka ya kunyima nwahandunukine kuli Zambi, nwapwile akwa kulimika mu kunyonga chenu ni mu yitanga yenu ya ungulungulu, hindu haliapwila hananuwanyisa mu mujimba wa musunya ku kufwa chenyi.”—A-Kolosu 1:21, 22.

9, 10. (a) Chiteli chika Kristu ahanyine kuli mandumbu jenyi akuwayisa? (b) Kuchi “mapanga akwo” akukwasa mandumbu akuwayisa?

⁹ Kristu hanahane kuli mandumbu jenyi akuwayisa hano hashi “uvumbiko wa uwanyino.” Paulu kaalwezele ngwenyi: ‘Yuma yeswe ya kuli Zambi, yoze hanatuwanyisa ni iye mwene, ku tachi ja Yesu Kristu, mba hanatwehe uvumbiko wa uwanyino. Ngwetu, Zambi wapwile muli Kristu nikuwanyisa akwa hashi kuli iye mwene, nikujimisa milonga yo. Iye hatukunjika lie liji lia uwanyino. Kashika yetu tuli tunganda twa Kristu, chapwa ngwe Zambi kanaliumbu mu liji lietu. Tunahanjika mu jina lia Kristu nikuliumba ngwetu, ‘Liwanenu ni Zambi.’—2 A-Korindu 5:18-20.

¹⁰ “Mapanga akwo” kali ni chiwape chinene chakukwasa mandumbu akuwayisa ha uvumbiko wacho hanji mulimo wakwambujola. (Yoano 10:16) Amu o ali tunganda hanji akwa-sango ja Kristu “mapanga akwo” kanalingi chihanda chinene mu mulimo wakwambujola, kulongesa atu umwenemwene ni kwaakwasa hanga apwe ni usepa upema ni Yehova. Chino chili chihanda chinene cha mulimo wakwambujola sango lipema lia chawana cha vumbi lia Zambi.

11, 12. Mumu liaka chili sango lipema kuli atu kunyingika ngwo ayo mahasa kulemba kuli Yehova?

¹¹ Atu anji kakulemba mumu ngwo chakwaanehena kuwaha ku mbunge, alioze o keshi kutayiza ngwo, Zambi kakwivwa yilemba yo. Ayo kanafupiwa kunyingika ngwo Yehova ‘Kakwivwa kulemba.’ Ndawichi kasonekene ngwenyi: “Yena wakwivwa kulemba, kuli yena akwa musunya eswe meza Yuma ya uhenge yangukumba. Hakutwala ku milonga yetu, yena mukayitomesa.”—Samu 65:2, 3.

¹² Yesu kalwezele tumbaji twenyi ngwenyi: “Nyi munwita chuma chimwe mu jina liami, kumungukachilinga.” (Yoano 14:14) Chinalumbunuka ngwo, mutuhasa kulemba hanga twite ‘chuma cheswacho’ muchilita ni upale wa Yehova. Yoano kasonekene ngwenyi: “Lino lie hamu tuli nalio kuli iye, nyi kachi mutwita chuma chimwe cha kulita ni upale wenyi, aye matwivwa.” (1 Yoano 5:14) Chili chipema chinji kukwasa atu hanga anyingike ngwo, kulemba kuchishi kutuvwisa wika kuwaha, alioze chili jila yize ya kutukundamisa “ku ngunja ya vumbi,” lia Yehova! (A-Hepreu 4:16) Muze mutulongesa atu chize twatamba kulemba, Mutu yoze twatamba kulemba, ni yuma yize twatamba kwita, tunakwasa atu jacho hanga apwe masepa ja Yehova ni kuwana utakamiso muze mapwa ni yipikalo.—Samu 4:1; 145:18.

13, 14. (a) Yiteli yika yipema mandumbu akuwayisa makapwa nayo? (b) Mulimo uka upema uze akwa-Kristu akuwayisa makalingila atu?

¹³ Yehova makasolola chinji chawana chenyi cha vumbi “ha miaka yize muyiza kwiza” hanji hashi haha. Kuchi makachilinga? Zambi makahana chiteli chilemu kuli 144,000 akwa-Kristu akuwayisa, waze makayula ni Kristu mu malilu. Paulu kalumbunwine chize chiteli chacho muchikapwa muze ambile ngwenyi: “Zambi, mukwa keke ya kulumbama, mumu ha zango lienyi linene lize atuzangile nalio, chipwe muze twapwile afu mu milonga yetu, hanatupwisa ni mwono hamwe ni Kristu mumu ku vumbi hananulamwina. Hanatuhindwisa hamwe nenyi; hanatutwamisa hamwe nenyi mu malilu muli Kristu Yesu; hanga ha miaka yize muyiza kwiza, akasolole kulumbama chahiana cha vumbi lienyi ni utu kuli yetu muli Kristu Yesu.”—A-Efwesu 2:4-7.

¹⁴ Chili chikalu kunyonga yuma yipema yize Yehova analuliekela akwa-Kristu akuwayisa muze makayula hamwe ni Kristu mu malilu. (Luka 22:28-30; A-Fwilipu 3:20, 21; 1 Yoano 3:2) Yehova makasolola “kulumbama chahiana cha vumbi lienyi” kuli ayo mujila yalipwila. O makapwa “Yerusaleme yaha,” nandungi ya Kristu. (Usolwelo 3:12; 17:14; 21:2, 9, 10) O makakilikita hamwe ni Yesu hanga ‘awuke mavungu.’ Makakwasa atu hanga atusuke ku shili ni kufwa nawa makaakwasa hanga akapwe angunu.—Tanga Usolwelo 22:1, 2, 17.

15, 16. Kuchi Yehova makasolola chawana cha vumbi lienyi kuli “mapanga akwo”?

¹⁵ Mukanda wa A-Efwesu 2:7 unambe ngwo, Zambi makasolola chawana cha vumbi lienyi “ha miaka yize muyiza kwiza.” Ha shimbu liacho, mutu mweswe hano hashi, makamona “kulumbama chahiana cha vumbi lienyi.” (Luka 18:29, 30) Yimwe jila yinene yize Yehova makasolwelamo chawana chenyi cha vumbi hano hashi, yili uhindukilo wa afu. (Yombi 14:13-15; Yoano 5:28, 29) Aya makahindwisa? Malunga ni mapwo ashishika waze afwile shimbu Kristu te kanda achifwa ni “mapanga akwo” waze akufwa ni ushishiko weswe kuli Yehova ha matangwa akusula. Tuvumbi wano eswe ashishika makahindwisa hanga akanunge kuwayila Yehova.

¹⁶ Tununu twa atu waze akufwa chakuhona kunyingika Zambi, no makahindwisa. Yoano kasonekene ngwenyi: “Namwene afu, anene ni akepe, kanamana kulutwe lia ngunja. Apakwile mikanda, mba apakwile mukanda ukwo, uze wa mwono. Apatwilile afu ku yuma yize yasonewene mu mikanda, nikulita ni yitanga yo. Kalunga-lwiji wechele afu aze apwilemo; ni kufwa ni Heteze yechele afu aze apwilemo; aapatwilile, mutu ni mutu nikulita ni yitanga yenyi.” (Usolwelo 20:12, 13) Atu jacho makapwa ni uhashi wa kulilongesa hakutwala kuli Yehova ni kutayiza chiyulo chenyi. Ayo ndo akalilongese shimbi ja Mbimbiliya ni kujikaula ni kukaula nawa shimbi jaha jize mujikapwa ha “mikanda.” Shimbi jino jaha mujikapwa jila yikwo yize Yehova makasolwelamo chawana cha vumbi lienyi.

17. Yika twatamba kusa mu manyonga jetu muze tunambujola sango lipema?

¹⁷ Chili ni ulemu unji musono kwambujola sango lipema lia Wanangana, mumu songo hiliakundama! (Marku 13:10) Twiwulukenu ngwetu, muze tunambujola sango lipema, nyonga lietu liatamba kupwa kuhalisa Yehova. Kuchi mutuhasa kuchilinga? Twatamba kulweza atu ngwetu yiwape yeswe yize mutukatambula hashi haha, muyilingiwa wika ha mukunda wa keke yinene ya Yehova.

18, 19. Kuchi twakuhalisa chawana cha vumbi lia Yehova?

¹⁸ Muze tunambujola kuli atu, mutuhasa kwaalumbunwina ngwetu, muze Wanangana wa Kristu muuyula, atu makazuka yiwape yeswe ya chitapo cha ukuule nawa hakehe-hakehe makapwa atu angunu. Mbimbiliya yinambe ngwo: ‘Yuma yeswe muyikatusuka ku undungo wa kupola, muyikapwa ni kutusuka cha uhenya wa ana a Zambi.’ (A-Roma 8:21) Chino muchikalingiwa wika kupalikila mu chawana cha vumbi lia Yehova.

¹⁹ Tuli ni mulimo upema wa kulweza atu eswe hakutwala ku chilakenyo chingunu chize chili ha Usolwelo 21:4, 5, ngwo: “[Zambi] makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.” Nawa, Yehova yoze watwama ha ngunja yamba ngwenyi: “Talenu, ngunatange yuma yeswe yaha.” Yamba nawa ngwenyi: “Soneka, mumu yino yuma yamwenemwene kuyishi mahuza.” Muze twakwambujola sango lipema kuli akwetu ni zango lieswe, pundu lume, twakuhalisa chawana cha vumbi lia Yehova!