1, 2. Paul nih Pathian vel cungah aa lawmh kha zeitindah a langhter?

LAMKALTU Paul nih “[Pathian nih] ka cung i vel a ka ngeihmi cu a lak ka siter ve lo” tiah a chim. (1 Korin 15:9, 10 rel.) Paul cu Khrihfa pawl a hremtu a rak si caah Pathian zaangfahnak hmuh awkah kaa tlak lo ti kha fiang tein a hngalh.

² Paul nih a thih lai ah Timote sinah hitin a ṭial: “Ka rianṭuannak ah thazaang a ka petu kan Bawipa Khrih Jesuh cu ka lawmh. Amah rianṭuantu ah ser awk tlak i a ka ruah caah a cungah kaa lawm.” (1 Tim. 1:12-14) Zei rian dah a chimmi a si? Paul nih Efesa khua i Khrihfa upa hna kha hitin a ti hna: “Bawi Jesuh nih a ka fialmi rian, Pathian velngeihnak thawngṭha chim hi ka liim khawh paoh ahcun ka nunnak hi cu zeihmanh ah ka rel lo.”—Lam. 20:24.

3. Paul cu a hleikhunmi zei rian dah pek a si? (A hramthawknak hmanthlak zoh.)

 ³ Paul nih zei “thawngṭha” dah a chim, mah nih Jehovah vel kha zeitindah a langhter? Paul nih Efesa Khrihfa hna kha hitin a ti hna: “Nanmah ṭhatnak ding ah Pathian nih a vel thawngin hi rian hi ṭuan a ka fial ti kha nan theih cang ṭheu lai.” (Efe. 3:1, 2) Jesuh nih Paul kha Judah miphun a si lomi hna sinah thawngṭha chim awkah a fial. Cucaah miphun dang hna zong Messiah ukmi Pennak ah an i tel kho ve cang. (Efesa 3:5-8 rel.) Paul cu phungchimnak ah a lung a thomi a si i tuchan Khrihfa hna caah zohchunhawk ṭha taktak a si. Pathian nih a cungah a langhtermi vel cu “a lak” a si lo kha a langhter.

4, 5. “Pennak kong thawngṭha” cu “Pathian velngeihnak thawngṭha” he aa khat tiah zeicah kan chim khawh?

⁴ Hi donghnak caan ah Jehovah miphun cu ‘miphun vialte hna ca i tehte si awkah Vancung Pennak kong thawngṭha kha khuazakip i chim’ awkah rian an ngei. (Matt. 24:14) Pennak kong thawngṭha cu “Pathian velngeihnak thawngṭha” zong a si. Zeicah? Pathian Pennak ah kan hmuh laimi thluachuah vialte cu Jehovah vel thawngin kan hmuh laimi a si caah a si. (Efe. 1:3) Paul nih Jehovah vel kong lungtho tein a chimnak thawngin aa lawmhnak kha a langhter. Paul kha kan i zohchunh maw?—Rom 1:14-16 rel.

⁵ Mitlinglo kan si ko nain Jehovah vel thawngin lam a phunphun in ṭhatnak kan hmuhnak kong kha a hmasa capar ah kan i ruah cang. Cu bantuk ṭhatnak kan hmuh caah Jehovah nih zeitindah dawtnak a langhter, mah in zeitindah ṭhatnak hmuh khawh a si timi kong kha mi sinah chim awkah rian kan ngei. Pathian vel cungah an i lawmh nakhnga mi kha zei ti lam hna in dah kan bawmh khawh hna?

6, 7. Mi sinah tlanhnak man kong kan chim tikah zeitindah Pathian vel kong thawngṭha kan chim a si?

⁶ Tuchan mi tampi cu sualnak an tuah tikah ka sual timi ruahnak an ngei lo. Cucaah zeicah tlanh kan herh ti kha an hngal lo. Asinain atu ah duh paoh in kan nunmi nih nuamhnak taktak a kan hmuhter kho lo ti a hngalmi zong an tam chin lengmang ve. Jehovah Tehte Hna he an i ton tik lawngah sualnak timi cu zeidah a si, mah nih zeitindah a kan hnorsuan ti le sualnak sal sinak in luat awkah zeidah tuah a herh ti kha an hun hngalh. Jehovah nih a kan dawt tuk i vel a kan ngeih caah sualnak le thihnak in kan luat nakhnga a Fapa a thlah timi an hun hngalh tikah lungthin ṭha a ngeimi hna cu an i lawm tuk.—1 Johan 4:9, 10.

⁷ Jehovah dawtmi Fapa he aa tlaiin Paul nih hitin a chim: “Khrih thihnak nih kannih cu a kan luatter, cucu kan sualnak kha ngaihthiam kan si tinak a si. Pathian vel cu a va lianngan hringhran dah.” (Efe. 1:7) Khrih tlanhnak man cu Pathian dawtnak a langhtermi a ngan bikmi thil a si. Pathian velngeihnak a lianhngan ning zong a langhter. Jesuh tlanhnak man kan zumh ahcun  kan sualnak ngaihthiam kan si lai i chiaṭha thleidannak lungthin thiang kan ngei lai ti hngalh cu hnangam awk ngai a si. (Heb. 9:14) Mah cu mi sinah chim dingmi thawngṭha taktak a si.

8. Mitlinglo a simi hna cu zeicah Pathian he an i rem a herh?

⁸ Jesuh tlanhnak man a zum lomi hna kha Pathian nih ral in a hmuh hna. Cucaah annih zong Pathian hawikom an si kho ve ti kha chim awkah rian kan ngei. Lamkaltu Johan nih hitin a ṭial: “Fapa a zummi paoh cu zungzal nunnak an ngei, Fapa nawl a ngai lomi paoh cu nunnak an ngei bal lai lo i Pathian thinhunnak cu an cungah a um zungzal ko lai.” (Johan 3:36) Khrih tlanhnak thawngin Pathian hawikom kan si khawh caah kan i lawm tuk. Paul nih hitin a chim: “Hlan ah cun thil ṭhalo nan tuahmi le nan ruahmi ruangah khan Pathian he nan rak i hlat i a ral ah nan rak i ser. Sihmanhsehlaw atu cu a Fapa, a pum le a titsa in a thihnak thawng khan Pathian nih a hawi ah aan ser cang hna.”—Kol. 1:21, 22.

9, 10. (a) Khrih nih chiti thuhmi a naule kha zei rian dah a pek hna? (b) “Tuu dang” nih chiti thuhmi kha zeitindah an bawmh hna?

⁹ Khrih nih vawleicung i chiti thuhmi a naule kha ‘midang zong Pathian hawi i ser ve awkah rian’ a pek hna. Annih kha Paul nih hitin a ti hna: “Hi thil vialte a tuahtu cu Pathian a si i Pathian nih cun Khrih thawngin kannih a ral a simi cu a hawi ah a kan thlen i midang zong a hawi i ser ve awk rian cu a kan pek. Cucaah kannih kan biapi cu, Pathian nih mi vialte kha Khrih thawngin hawi ah a ser hna, ti hi a si. Pathian nih an sualnak kha anmah sual phawtnak ding caah cazin chungah a khumhpiak hna lo i kannih cu a hawi i a ser hnanak bia chim kha a kan fial. Cucaah Khrih lamkaltu bantukin kannih cu kan ra. Kannih nih kan in nawl hna hi Pathian nih aan nawl hna bantuk a si: Pathian he i rem ko u, tiah Khrih min in kan in nawl hna.”—2 Kor. 5:18-20.

¹⁰ Mah rian ṭuannak ah “tuu dang” cu chiti thuhmi pawl bawmhnak tinvo sung an hmu. (Johan 10:16) Khrih bia phortu a simi “tuu dang” hna cu phungchimnak, cawnpiaknak le Jehovah he pehtlaihnak ṭha ngeih awk mi bawmhnak ah a biapi bikmi hmunhma in an i tel. Mah cu Pathian vel kong thawngṭha chimnak ah aa tel vemi a biapi ngaimi rian a si.

11, 12. Jehovah sinah thlacam khawh a si ti hngalh cu mi caah zeicah thawngṭha a si?

¹¹ Thlacam tikah lungdaihnak an hmuh caah mi tampi cu thla an cam. Asinain  Pathian nih an thlacamnak a ngaih ti kha an zum lo. Jehovah cu “kan thlacamnak a kan lettu” a si kha an hngalh a hau. Salm caṭialtu David nih hitin a ṭial: “Maw Pathian, nang cu kan thlacamnak a kan lettu na si. . . . Mi vialte nih an sualnak cu na hmaiah an phuan lai: kan sualnak cu kan caah a rit tuk hringhran, nangmah lawnglawng nih na kan thenhpiak khawh.”—Salm 65:1-3.

¹² “Zeipaoh ka min in nan ka hal ahcun ka tuah lai” tiah Jesuh nih a zultu kha a ti hna. (Johan 14:14) Mah cu Jehovah duhnak he aa tlakin “zeipaoh” thla kan cam khawh tinak a si. Johan nih hitin a ṭial: “Amah duh ningin kan hal ahcun kan halmi paoh kha a kan pek hrimhrim lai ti kan zumh caah Pathian cu ṭihnak zeihmanh um loin kan fuh ngam.” (1 Johan 5:14) Thlacamnak cu lung daihtertu men lawng a si lo, ‘vel a umnak Jehovah bawiṭhutdan’ fuhpanh khawhnak lam zong a si ti kha mi kan cawnpiak hna awk a si. (Heb. 4:16) Aho sinah, zeitindah, zei kong dah thlacam awk a si timi kong kha mi kan cawnpiak hna tikah Jehovah hawikom si awk le harnak ton caan ah hnemhnak hmuh awkah kan bawmhmi hna a si.—Salm 4:1; 145:18.

13, 14. (a) Chiti thuhmi hna cu hmailei ah zei tinvo sung dah an hmuh lai? (b) Chiti thuhmi hna nih minung caah a ṭha tukmi zei rian dah an ṭuan lai?

¹³ Hmailei caan ah Jehovah nih a vel kha tam deuh in a langhter lai. Zeitin in dah? Pathian nih Khrih he vancung ah uktu a ṭuan dingmi 144,000 kha khuaruahhar tuk a simi tinvo sung a pek hna lai. Mah tinvo he aa tlaiin Paul nih hitin a ṭial: “Pathian nih a kan zaangfahnak cu a tam tuk i a kan dawtnak cu a ngan tuk hringhran caah a nawl kan ngaih lo ruang i thlaraulei in kan thih ko lioah khan Khrih sinah cun a kan nunter. Khamh nan sinak cu Pathian vel thawngin a si. Khrih Jesuh he kan i pehtlaihnak thawngin vancung khua i amah sin i uktu si ve dingah, amah he cun a kan thawhter. Khrih Jesuh thawngin a langmi a dawtnak chung i a ummi a vel cu zeitluk in dah a ngan ti kha a zungzal in hmu hna seh ti a kan duh caah hi cu a tuah.”—Efe. 2:4-7.

¹⁴ Chiti thuhmi Khrihfa hna cu Khrih he vancung ah uktu an si tikah an caah Jehovah nih a tuah laimi khuaruahhar thil kong ruah cu a har. (Luka 22:28-30; Fil. 3:20, 21; 1 Johan 3:2) An cungah Jehovah nih ‘a ngan tukmi a vel’ kha a hleikhunmi lam in a langhter lai. Annih cu Khrih nupi ding a simi “Jerusalem thar” an si lai. (Biat. 3:12; 17:14; 21:2, 9, 10) Annih cu ‘miphun vialte hna damternak’ ah Jesuh he rian an ṭuanṭi lai.  Minung kha sualnak le thihnak sal sinak in luatter awk le mitling si awkah an bawmh hna lai.—Biathlam 22:1, 2, 17 rel.

15, 16. Hmailei ah Jehovah nih “tuu dang” cungah a vel kha zeitindah a langhter lai?

¹⁵ Pathian nih ‘a ra laimi caan ah’ a vel a langhter lai tiah Efesa 2:7 (NW) nih a ti. Mah caan a phanh tikah vawleicung i a ummi dihlak nih ‘a ngan tukmi a vel’ kha an hmuh hrimhrim lai. (Luka 18:29, 30) Vawleicung ah Jehovah nih a vel a langhter lainak a ngan bikmi lam cu mithi thawhternak a si lai. (Job 14:13-15; Johan 5:28, 29) Ahote dah a tho ṭhan lai? Khrih a thih hlanah a thimi zumhfekmi nu, pa hna le donghnak caan chungah zumhfek tein a thimi “tuu dang” pawl an tho ṭhan lai. Mah zumhfekmi dihlak cu Jehovah biak zungzal awkah an tho ṭhan lai.

¹⁶ Pathian kong hngalh loin a thimi mi nuai tampi zong an tho ṭhan lai. Johan nih hitin a ṭial: “Mithi mi kha a ngan he a hme he, bawiṭhutdan hmai i an ṭhut kha ka hmuh. Cauk kha an kau hna, cun cauk a dang pakhat, nunnak cauk zong kha an kau ve. Mithi cu an rak tuahmi cauk chung i aa ṭial ning khan an bia an ceih hna. Cun rili nih a chung i a thimi kha a hun chuah hna. Thihnak le mithi khua zong nih khan, an hrenmi mithi kha an hun chuah ve hna. An dihlak in an tuah ning cio bantuk khan an bia an  ceih hna.” (Biat. 20:12, 13) A tho ṭhanmi hna cu Jehovah kong cawn awk le a phunglam zulh awkah tinvo sung an hmu lai. Baibal phunglam le “cauk” chung i lamhruainak thar hna kha cawng in an zulh a hau lai. Mah lamhruainak thar pawl cu Jehovah nih a vel a langhternak lam dang a si lai.

17. Phungchim tikah zeidah kan i cinken awk a si?

¹⁷ Donghnak a naih chin bantukin Pennak kong thawngṭha chim zong a biapi chin ve. (Mar. 13:10) Phung kan chim tikah kan i tinhmi cu Jehovah thangṭhat a si ti kha kan i cinken a hau. Cutin zeitindah kan tuah khawh? Vawlei thar ah kan hmuh laimi thluachuah vialte cu Jehovah vel thawng lawngin hmuh khawh a si ti kha mi kan chimh hna a hau.

18, 19. Jehovah vel kha zeitindah kan thangṭhat khawh?

¹⁸ Khrih Pennak uk hram aa thawk tikah minung cu tlanhnak man in ṭhatnak tling kan hmu lai i duhsah in mitling kan si ṭhan lai timi kong mi sinah kan chim a hau. “Ni khatkhat cu sermi thil vialte hi thutnak sal sinak khan luatter an si lai i Pathian fale hna luatnak a sunglawimi kha an i hrawm te lai” tiah Baibal nih a ti. (Rom 8:21) Mah cu Jehovah vel thawng lawngin hmuh khawh a si lai.

¹⁹ Biathlam 21:4, 5 ah ṭialmi a ṭha tukmi mah biakam kong hi mi sinah chimnak tinvo sung kan ngei: “[Pathian nih] an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.” Cun bawiṭhutdan cung i a ṭhumi Jehovah nih “atu cu thil vialte kha a thar in ka ser dih cang hna” tiah a ti. “Hi bia hi ṭial hna, zeicahtiah a hmaanmi le zumhawktlak a simi bia an si” ti zongin a ti. Mi sinah mah thawngṭha kha lungtho tein kan chim tikah Jehovah vel kan thangṭhat a si.