1, 2. ¿Kasa niiʼiyataka akajee Pablo sünain kojutüin nümüin anamiain Maleiwa nümüin?

MÜLIAPUʼUSHII na anoujashiikana nutuma Pablo. Müsüjeseʼe nütüjaain aaʼu nnojoluinjatüin sümülialaain naaʼin Maleiwa naalin naashin. Anuu nünüiki Pablo nüchiki Maleiwa: «Nnojotsü amülaʼalüin neʼe anamiain nia tamüin», müshi (paashajeʼera 1 Corinto 15:9, 10, TNM).

² Wanaa sümaa sülüʼülüin nükalia Pablo süpüla ouktaa, müsü nünüiki nümüin Timoteo: «Taapüin analuʼut nümüin chi Wasenyotsekai Jesucristo süka katsüintpain taaʼin nütüma süpüla taʼyataain nümüin. Nüneeküin taya paala süka nütüjaain saaʼu sünain tekeraajeerüin waneepia tü kasa eʼitaanüinjatkat tapüla» (1 Tim. 1:12-14). ¿Jarat tü aʼyatawaa eʼitaanakalü nüpüla Pablo? Anuu nünüiki namüin na laülaashii chajanakana Éfeso: «Akaisaʼa nnojolin aaʼinmajiraain maʼi taya takuaippa sütümajee tia. Jaʼitakajaʼa ouktüin taya, meemasat tamüin. Müleka shialeje tainküin tekeraajüin tü aʼyatawaa niʼitaakat chi Senyotkai tajapuluʼu sünain taküjain süchikü tü pütchi anasükat nüchikü Maleiwa sünain anamiain nia sümüin wayuu» (Aluw. 20:24).

3. ¿Kasa wayuu tü aʼyatawaa aapünakat nümüin Pablo? (Piirakaa sümüin tü ayaakuaa suluʼukat süpana 25).

³ ¿Jarat tü pütchi anasü nüküjakat Pablo? ¿Jamüsü sünainpünaaka tia  anamiain Maleiwa? Müshi Pablo namüin na anoujashii chejeʼewaliikana Éfeso: «Jütüjaa jümata saaʼu sünain kamaneein chi Maleiwakai tamüin maa aka nüneeküin taya süpüla takaaliijainjanain jia gentilekana» (Éf. 3:1, 2). Nuluwataain Jesuu Pablo sünain aküjaa pütchi namüin na nnojoliikana judíoin. Tü nüküjakat Pablo namüin shia eein süpüla naluwataain chaa iipünaa wanaa nümaa chi Mesiiakai (paashajeʼera Éfeso 3:5-8). Aküjüshi pütchi Pablo süka süpüshuaʼa naaʼin otta niʼitaain wapüleerua tü sukuwaʼipainjatkat watuma tü aküjaakat pütchi. Sutuma naaʼinrüin tia, niiʼiyatüin sünain nnojoluin «amülaʼalüin neʼe anamiain» Jeʼwaa nümüin.

4, 5. ¿Jamüsü watüjaaka saaʼu wanaawain tü pütchi anasü süchikikat Nuluwataaya Maleiwa sümaa «tü pütchi anasükat nüchikü Maleiwa sünain anamiain nia»?

⁴ Nuluwataain waya Jeʼwaa sünain aküjaa tü pütchi anasü süchikikat Nuluwataaya. Alüʼütsü sükalia sajaʼttajatkat oʼu kasa süpüshuaʼa otta waküjüinjatü tü pütchikat «sainküin mmakat süpüshua süpüla saapünüinjatüin sütüma wayuu süpüshua» (Mat. 24:14). Tü pütchi anasü süchikikat Nuluwataaya Maleiwa shiaʼaya neʼe «tü pütchi anasükat nüchikü Maleiwa sünain anamiain nia». ¿Jamüsü watüjaaka saaʼu tia? Shia süka eejeerüin wainma kasa anasü sutuma Nuluwataaya Maleiwa saaʼujee anamiain nia (Éf. 1:3). Aküjüshii pütchi Pablo süka süpüshuaʼa naaʼin süka kojutüin nümüin anamiain Jeʼwaa nümüin. ¿Püshatüinche nukuwaʼipa Pablo? (Paashajeʼera Roma 1:14-16).

⁵ Wekirajaaitpa anain sünain tü wanee ekirajaayakat wainmain kasa anasü weʼraka sutuma anamiain Jeʼwaa wamüin mayaapejeʼe waleʼeruʼuin tü kaainjalaakat. Müsüjeseʼe waküjüinjatüin sümüin wayuu tü pütchi anasü süchikat anamiain Maleiwa otta waküjüinjatü namüin tü naaʼinrajatkat süpüla neʼrüinjanain kasa anasü saaʼu anamiain Maleiwa. ¿Kasaka waaʼinrüinjatüin süpüla wakaaliinjain wayuu sünain eeʼiyataa kojutüin sümüin anamiain Maleiwa?

6, 7. Wanaa sümaa waküjüin naapajiraain nikii Jesuu waaʼu, ¿jamüsü shiaka waküjüin süchiki anamiain Maleiwa?

⁶ Maaʼulu yaa, wainma wayuu nnojotka mojuin aaʼin sutuma saainjala. Sutuma tia, nnojotsü nayaawatüin aaʼu jamüin choʼujaaka naapajiraain nikii Jesuu saaʼu wayuu. Wainmapejeʼe na eʼrakana nnojoluin talatüin naaʼin sutuma tü naaʼinrakat. Shiasaʼa naashajaapa namaa na aküjüliikana pütchi nüchiki Jeʼwaa, eeshii eekai nayaawatüin saaʼu kasain wayuu tü kaainjalaakat, jamüin mojuka nakuwaʼipa sutuma otta nayaawata aaʼu tü naaʼinrajatkat süpüla nooʼulaain suulia süchepchiaa kaainjalaa. Chi eekai anamiain, kojutüsü nümüin nütüjaapa saaʼu naapüin Maleiwa chi Nüchonkai süpüla taashin waya suulia kaainjalaa jee ouktaa. Jee müsia, nayaawata aaʼulu naaʼinrüin tia Maleiwa saaʼu alin wayuu nüpüla jee saaʼu anamiain nia (1 Juan 4:9, 10, TNM).

⁷ Müshi Pablo nüchiki Jesuu: «Taashiinapa waya suulia [kaainjalaa], süka nuwalaajüitpain Jesús süka nüsha amülakat wanaa sümaa ouktüin». Naashin Pablo, nülatirüin Jeʼwaa tü waainjalakat woulia sünainjee anamiain nia (Éf. 1:7). Niiʼiyatüin Jeʼwaa sünain aishaatain maʼin wayuu nüpüla otta anamiashaatain nia sünainjee naapüin chi Nüchonkai waaʼu. Jutatsü waaʼin sutuma watüjaaitpain saaʼu nülatireerüin Jeʼwaa waainjala woulia otta wuleerüin waaʼin weʼitaale waaʼin sünain naapajiraain nikii Jesuu waaʼu (Heb. 9:14). Shia wanee kasa anashaatasü maʼin tia. Waküjeein shia sümüin wayuu süpüshuaʼa, ¿aashimüin?

8. ¿Jamüsü choʼujaaka anajiraainjatüin wayuu nümaa Maleiwa?

⁸ Na nnojoliikana eʼitaain naaʼin sünain naapajiraain nikii Jesuu saaʼu wayuu, naʼünüü naya Maleiwa. Müsüjeseʼe waküjüinjatüin sümüin wayuu eein süpüla aleewajiraain naya nümaa Maleiwa. Müshi Juan: «Chi eekai niʼitaain naaʼin nünain chi Nüchonkai Maleiwa, kateerü noʼu waneepia;  niasaʼa chi eekai nnojolin noonooin nümaa, amülouijeechi sümaa süsaleechin nia nutuma Maleiwa» (Juan 3:36, TNM). Talatüshii maʼin waya sutuma watüjaain saaʼu eein süpüla anajiraain waya nümaa Maleiwa sünainjee naapajiraain nikii Jesuu (paashajeʼera «Pütchi pütüjaainjatka aaʼu»). Anuu nünüiki Pablo: «Je paala manoujainwaʼaya jia, nnojoipüʼüshi kasajachin chi Maleiwakai jümüin. Paʼünüüwapüʼüshii jia nümaa, süka jülüjain jaaʼin tü mojulawaakat waneepia sümaa jaaʼinrüin shia. Akaajasa jooluʼu nünainjee Cristo, süka naapajiraain nukuaippa sünain ouktüin, nnojoliinapa jia paʼünüüwain nümaa Maleiwa» (Col. 1:21, 22).

9, 10. (1) ¿Kasa nuluwataakalü anain Jesuu na anoujashii chainjanakana iipünaa? (2) ¿Kasa naaʼinraka na anoujashii yaainjanakana yaa mmapaʼa süpüla nakaaliinjain na chainjanakana iipünaa?

⁹ Nuluwataain Jesuu na anoujashii chainjanakana iipünaa süpüla nemeʼejüin saaʼin wayuu shiiʼiree anajiraain nümaa Jeʼwaa (paashajeʼera «Pütchi pütüjaainjatka aaʼu»). Müshi namüin naya anoujashiikana: «Chi eeʼiratakai wakuaippa, nia Maleiwa. Anajiraainapa waya nümaa sünainjee tü naaʼinrakat Cristo sünain ouktüin nia waaʼu. Je jooluʼu, aneekünüshii waya anoujashiikana wapüshua nütüma chi Maleiwakai süpüla wemeʼejüinjatüin saaʼin wayuu shiiʼiree anajiraainjatüin shia nümaa. Waküjeerü nüchiki namüin sünain nülatirüin naainjala sünainjee tü naaʼinrakat Cristo je sünain nücheküin süpüleerua anajiraainjanain naya nümaa. Aluwataanüshii waya anoujashiikana wapüshua nütüma chi Maleiwakai süpüla waapirüinjatüin wayuu süka nünüiki Cristo, je süpüla wemeʼejainjatüin naaʼin shiiʼiree anajiraainjanain naya nümaa, maa aka tü nümakat chi Maleiwakai waneepia sümüin tü manoujainsatkalüirua süpüshua. Je tü wamakat namüin na eekai manoujain jaʼaka: ‹Anakaja müleka anajiraale jia nümaa›» (2 Cor. 5:18-20).

¹⁰ Kojutüsü maʼin namüin na anoujashii yaainjanakana kepiain mmapaʼa naküjüin pütchi süpüla nakaaliinjain na chainjanakana iipünaa (Juan 10:16). Naya anoujashiikana, naaʼinrüin tü nuluwataakalü anain Jesuu na anoujashii chainjanakana iipünaa, aküjüshii naya pütchi. Naya ekirajaka maʼin wayuu sünain tü Wiwüliakat jee nakaaliinjain wayuu süpüla aleewainjatüin nümaa Jeʼwaa. Tia sünainpünaasü aküjaa «tü pütchi anasükat nüchikü Maleiwa sünain anamiain nia».

11, 12. ¿Jamüsü shiaka wanee pütchi anasü namüin na wayuukana natüjaapa saaʼu eein süpüla noʼuraajüin nümüin Jeʼwaa?

¹¹ Wainma wayuu oʼuraajakana süka anain naaʼin sutuma oʼuraajaa. Nnojotpejeʼe nanoujain sünain naapüin Maleiwa nanüiki. Choʼujaasü natüjaain saaʼu naya wayuukana sünain naapüin Jeʼwaa sünüiki wayuu suʼuraajapa. Müshi David sünain eeʼirajaa nümüin Jeʼwaa: «Piakai chi Aapajakai sünüiki wayuu suʼuraajapa, anteerü pünainmüin wayuu eekai eein. Katsüinreesia tü taainjalakat toulia. Pülatireetpajaʼa woulia tü waainjalakat» (Sal. 65:2, 3, TNM).

¹² «Juchuntüle wanee kasa nümüin chi Tashikai, naapeerü jümüin saaʼujee tanülia», müshinka Jesuu namüin na nikirajüinkana (Juan 16:23, TNM). Naashin Jesuu, eeshii süpüla wachuntüin nümüin Jeʼwaa kasa eekai eein pansaa sümaa tü keeʼireekat naaʼin. Müshi Juan nüchiki Jeʼwaa: «Wachuntüle nümüin tü nüchekakat wapüleerua, jaʼitairü wachuntüin kasa eekai eein, watüjaa aaʼulu sünain naapüin wanüiki» (1 Juan 5:14, 15). Talatüshii maʼin waya sutuma wakaaliinjain wayuu sünain ayaawataa saaʼu nnojoluin anain neʼe saaʼin sutuma oʼuraajaa; tü oʼuraajaakat shia wanee sukuwaʼipa süpüla warütkaainjanain nünainmüin Jeʼwaa, chi anamiakai maʼin (Heb. 4:16, TNM). Wekirajüinjana na wayuukana sünain oʼuraajaa, wekirajüinjana naya sünain jaralinjachin noʼuraajüin amüin otta tü eekat süpüla nachuntüin noʼuraajapa. Waaʼinrüle tia, wakaaliinjeena naya süpüla aleewain naya nümaa Jeʼwaa otta süpüla sümülialaain naaʼin neʼrapa müliaa (Sal. 4:1; 145:18).

13, 14. (1) ¿Kasa wayuu naapeetka Jeʼwaa namüin na anoujashii chainjanakana chaa iipünaa? (2) ¿Kasa naaʼinrajatka na anoujashii chainjanakana iipünaa napüleerua na wayuukana?

¹³ Niiʼiyataleejeetpajaʼa maʼin Jeʼwaa «mapeena» sünain anamiain nia. ¿Jameerü sukuwaʼipa tia nutuma? Anashaateerü maʼin nutuma nakuwaʼipa na 144.000 anoujashii aluwataainjanakana wanaa nümaa Jesuu. Müshi Pablo süchiki tia: «Chi Maleiwakai, saaʼu alin maʼi waya nüpüla, je süka nümüliajeein wayuu süpüshua shiiʼiree suuʼulaweein suulia saainjala, nujuittirüin waya suulia süchepchiaa waainjala. Mayaasüje nnojolin kasajachin nia wamüin sütümajee kaainjaraliin waya, niiʼiratüin waaʼin sükajee tü naaʼinrakat Cristo. Nuʼtteʼerüin waya süka anamiain nia wamüin. Maa aka nüsoʼiraain aaʼin Cristo süchikijee ouktaa, müshiʼiya wayakana, ojuittüinapa waya suulia süchepchiaa waainjala nutuma chi Maleiwakai, süka shiiʼiranajaaitpain waaʼin. Je maa aka nuʼunüin Cristo iipünaamüin süpüla nuluwataainjachin wanaa nümaa chi Nüshikai, akaweenia wayakana oʼuneena süpüla aluwatawaa wanaa nümaa Cristo chaa iipünaa. Chi Maleiwakai, niiʼiratüin waaʼin süpüla sütüjaainjachin naaʼu wayuu mapeena sünain anamiashaatain maʼi nia wamüin saaʼu nuʼtteʼerüin waya suulia waainjala sünainjee tü naaʼinrakat Cristo Jesús» (Éf. 2:4-7).

¹⁴ Isasü wachiki wayaawatüin saaʼu tü kasa anashaatasü maʼin naapeetkat Jeʼwaa namüin na aneekuushiikana naluwataapa wanaa nümaa Jesuu chaa iipünaa (Luc. 22:28-30; Filip. 3:20, 21; 1 Juan 3:2). Niiʼiyateerü Jeʼwaa namüin naya anoujashiikana sünain anamiashaatain maʼin nia namüin. Nayainjana tü «Jerusalén jeket» otta tü nuʼwayuuseinjatkat chi anneetchonkai saashin tü Wiwüliakat (Alat. Map. 3:12; 17:14; 21:2, 9, 10, TNM). Aʼyanaajiraainjana naya nümaa Kürisüto süpüla anainjatüin wayuu natuma. Nakaaliinjeerü wayuu süpüla taashinjatüin suulia süchepchiaa kaainjalaa jee ouktaa (paashajeʼera Alateetkat Mapeena 22:1, 2, 17).

15, 16. ¿Kasa naaʼinrajatka Jeʼwaa süpüleerua tü wanee anneetkalüirua süpüla niiʼiyatüin anamiain nia?

¹⁵ Saashin Éfeso 2:7, niiʼiyateerü Maleiwa «mapeena» sünain anamiain maʼin nia. Soʼu tia, neʼreerü napüshuaʼa na kepieenakana yaa Mmapaʼa anamiain maʼin Maleiwa namüin (Luc. 18:29, 30). Wanee kasa naaʼinrajatka Jeʼwaa süpüla niiʼiyatüin  sünain anamiain maʼin nia shia sükajee nüsoʼireʼerüinjatüin naaʼin na ouktüshiikana (Job 14:13-15; Juan 5:28, 29). ¿Jaralii na asoʼiraainjanaka aaʼin nachikuaʼa? Naya na waneepiakana nümaa Maleiwa süpülapünaa ouktüin Jesuu. Müsia tü «anneerüiruayaʼa waneejannuu» nüküjakalü achiki Jesuu, na ouktakana suʼunnaa sülüʼülüin sükalia süpüla sajaʼttüin kasa süpüshuaʼa. Asoʼiraajeerü naaʼin napüshuaʼaleʼeya süpüla ayatüinjanain naʼyataain nümüin Jeʼwaa.

¹⁶ Nüsoʼireʼerüinjatü Jeʼwaa naaʼin watta naalii wayuu ouktakana sümaa nnojoluin natüjaain naaʼu Jeʼwaa. Müshi Juan: «Teʼrakalaka na wayuu ouktakana paala shaʼwatüin sümülatuʼu tü einaseekat, na miyoʼuyuukana otta na tepichikana; sujutannakalaka wanee karalouktairua. Sujutannataalaka joo wanee karalouktaya, shia tü süchikimaajatkat tü kataakalü oʼu. Asouktüinjana naya saaʼu tü naainjalakat sükajee tü ashajuushikat sünain tia karalouktakat. Jee na wayuu ouktakana shiroku tü palaakat otta na suluʼukana tü süpüleekat tü ouktüsükalüirua, ojuʼitüshii naya süpüla nasouktüinjanain waneʼewai nakua saaʼu tü naaʼinreetkat» (Alat. Map. 20:12, 13, TNM). Na asoʼiraainjanakana aaʼin, ekirajünüinjana nüchiki Jeʼwaa otta eeshii süpüla naneeküin niainjachin Jeʼwaa aluwataain naaʼu. Naaʼinrüinjatü tü sümakat tü Wiwüliakat otta tü sümakat tü pütchi suluʼujeetkat tü karaloukta jeketkat. Sükajee tü ashajüneetkat sünain tia karalouktakat, niiʼiyateerü Jeʼwaa sünain anamiain maʼin nia.

17. ¿Kasa wayuu sotuinjatka waaʼin waküjapa pütchi?

¹⁷ Alüʼütsü maʼin sükalia sajaʼttajatkat oʼu kasakat süpüshuaʼa. Müshiijeseʼe waküjüinjanain tü pütchi anasü süchikikat Nuluwataaya Maleiwa (Mar. 13:10). Sotuinjatpejeʼe waaʼin waküjüin pütchi süpüla weeʼiyatüin nujutü Jeʼwaa nümüin. Waaʼinrüin tia waküjapa sümüin wayuu wainmeerüin kasa naapeetka Jeʼwaa wamüin suluʼu tü Paʼaraiisükat sünainjee anamiain maʼin nia wamüin.

18, 19. ¿Kasa waaʼinrajatka süpüla weeʼiyatüin sünain kojutüin maʼin wamüin anamiain Jeʼwaa?

¹⁸ Waküjapa pütchi, waküjeein sümüin wayuu tü naaʼinrüinjatkat Jesuu süpüleerua wayuu nuluwataapa yaa saaʼu tü Mmakat. Waküjeein namüin aneerüin maʼin wayuu soʼuweena kaʼikat tia saaʼujee naapajiraain nikii Jesuu waaʼu, maainjaleerü wayuʼuya. Müsü tü Wiwüliakat: «Aʼatapüsü maʼi tü akumajuushikalüirua jooluʼu sujuittinnüinjatüin suulia sümüliala soʼu kaʼikat tia. Meeria aka shia wayakana nüchooinkana Maleiwa sünain anashaataleein maʼi noʼuluʼu Maleiwa» (Roma 8:21). Ekeraajeerü süpüshuaʼa tia sünainjee anamiain maʼin Jeʼwaa.

¹⁹ Anashaatasü maʼin tü waaʼinrakat süka waküjüin sümüin wayuu süchiki tü naaʼinrüinjateetkat Jeʼwaa saashin Alateetkat Mapeena 21:4, 5. Müsü sünüiki tia pütchikat: «‹Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia›. Nümakalaka joo chi Maleiwa joyotüshikai saaʼu tü einaseekat: ‹Anuu, jeketüitpa tatüma kasa süpüshua›, müshi nia. ‹Püshaja pümata tü tanüikikat süpüla kapülainjatüin saaʼin wayuu shia süka shiimüin›». Waküja tia pütchikat süka süpüshuaʼa waaʼin, müle shia watuma, weeʼiyateerü sünain kojutüin maʼin wamüin anamiain Jeʼwaa.