NI KIDI kioso, poxolo Phaulu ua zuela: ‘O henda ia ng’idikisa Nzambi, kiiaii ngó.’ (Tanga 1 Kolindo 15:9, 10.) Phaulu uejidile kiambote kuila, Nzambi ka tokalele ku mu londekesa o henda. Muéne ua zukutisile o Jikidistá.

1, 2. Kiebhi Phaulu kia londekesa o kisakidilu kiê mu henda ia mu londekesa Nzambi?

² Ku disukilu dia muenhu ué, muéne ua sonekena Timote, uixi: “Eme nga sakidila Kristu Jezú, Ngana ietu, ua ngi bhana o kutena kua kubhanga o kikalakalu kiami. Nga mu sakidila muène, kuma ua ngi mono kukala fiiele, iú ua ngi bokuesa mu ungunza uê phala ku mu bhikila.” (1 Timote 1:12-14) Ungunza uahi ua tambuile? Phaulu ua tangela o tufunga mu kilunga kia Efezo, uixi: ‘Ki nga suu-phe kima. Né o muenhu uami ki ng’u jijila, kabasa ngi zubha o njila ia ngi xindi, ni ukunji ua ngi bhana Ngana Jezú. O ukunji uen’iú: O kubhana umbangi ua njimbu iambote ia henda ia Nzambi.’—Ikalakalu 20:24.

3. Ukunji uahi ua tambuile Phaulu? (Tala o foto ia dianga.)

 ³ Iebhi o “njimbu iambote” ia boko Phaulu, ni kiebhi o njimbu íii ia londekesa o henda ia Jihova? Phaulu ua tangela o Jikidistá ku Efezo: ‘Ki mu kambe kuívua o ukunji ua ngi bhana mu henda ia Nzambi, phala mbote ienu.’ (Efezo 3:1, 2) Jezú ua tendelesele Phaulu kubokela o athu kexile Jijudé. Mu kithangana kienhokio, o athu akuâ jixi, akexile kiá ni ujitu ua kubhanga mbandu ku Utuminu ua Mexiia. (Tanga Efezo 3:5-8.) Phaulu ua xisa phangu iambote phala o Jikidistá lelu, mu kuboka ni kusuína kuoso. Muéne ua londekesa kuila, o henda ia mu londekesele Nzambi, ‘kiiaii ngó.’

4, 5. Mukonda diahi tu zuela kuila, o ‘njimbu iambote ia Utuminu,’ iene imoxi ni ‘njimbu iambote ia henda ia Nzambi?’

⁴ Mu izuua íii isukidila-ku, o mundu ua Jihova uala ni kikalakalu kia kuboka o ‘njimbu iambote ia Utuminu ua Nzambi mu ngongo ioso, mu kubhana umbangi ku akua jixi joso.’ (Matesu 24:14) O njimbu iambote ia Utuminu ua Nzambi, ia lungu ué ni ‘njimbu iambote ia henda ia Nzambi.’ Mukonda diahi tu zuela kiki? Mukonda o mabesá oso u tua-nda tambula ku Utuminu ua Nzambi, tua-nda kua tambula mukonda dia henda ia Jihova. (Efezo 1:3) Phaulu ua londekesa o kisakidilu kiê mu henda ia Jihova, mu kuboka ni kusuína kuoso. O kuila eie ua mu kaiela o phangu ia Phaulu?—Tanga Loma 1:14-16.

⁵ Mu milongi i tua di longo ku dima, tua mono kiebhi ki tu katula mbote mu henda ilondekesa Jihova mu maukexilu avulu, sumbala tu akuâ ituxi. Kuma tuene mu katula mbote iavulu, tuala ni kikalakalu kia kulonga akuetu, kiebhi Jihova kia londekesa o henda iê, ni kiebhi kia tena kukatula mbote mu henda ia Nzambi. Kiebhi ki tu tena kukuatekesa akuetu kusakidila o henda ilondekesa Nzambi?

6, 7. Kioso ki tu jimbulula o sata ia kúkula ku athu, kiebhi ki tu boka o njimbu iambote ia lungu ni henda ia Nzambi?

⁶ Lelu, athu avulu ka divu kiaiibha kioso kia ta kituxi. Mukonda dia kiki, ene ka tendela se mukonda diahi o athu a bhingi o sata ia kúkula. Maji avulu mudiâ a mona kuila, o ukexilu ua muenhu uâ, ki uene mu kua bhekela o kuzediua. Se o athu enhá ka zuela ni Jimbangi ja Jihova, ene ka tena kuijiia se o kituxi ihi. Ene ka tena ué kuijiia o maka a tu bhekela o kituxi, ni mukonda diahi tua bhingi ku tu bhulula ku ubhika ua kituxi. Kioso kia tendela se o kituxi ihi, athu avulu a sakidila mu ku di longa kuila, Jihova ua tumikisa Mon’ê mu ixi, phala ku tu bhulula ku kituxi ni kalunga. Jihova ua bhange kiki mukonda dia henda iê ia dikota.—1 Nzuá 4:9, 10.

⁷ Ia lungu ni Mon’a kazola a Jihova, Phaulu ua zuela: ‘Mbata etu a tu kula mu kúfua kua Kristu, kiene muène, oko ituxi ietu iòloloke. Mukonda o henda ia tu londekesa Nzambi ni kuvula kuoso, madiuanu mê mahi ngó!’ (Efezo 1:7) O sata ia kúkula ia Kristu, iene o kima kia beta-o-kota kia bhange Nzambi phala  kulondekesa o henda Iê kokuetu. Iene ilondekesa o henda ia dikota ia Nzambi. Kima kiambote kuijiia kuila, se tu xikina mu sata ia kúkula ia Jezú, a-nda loloka o ituxi ietu, ni kuila, tua-nda kala ni kitongoluelu kia zele! (Jihebeleu 9:14) Sé phata, íii njimbu iambote phala ku i tudila akuetu!

8. Mukonda diahi o athu akuâ ituxi a bhingi kubhanga dingi o ukamba ni Nzambi?

⁸ Se o athu a kamba kuxikina mu sata ia kúkula ia Jezú, Nzambi ua mona kala jinguma jê. Mu kiki, etu tuala ni kikalakalu kia kua tangela kuila, ene a tena kukala makamba a Nzambi. Poxolo Nzuá ua soneka: “Uoso ua xikana o Mona, uala ni muenhu ki uábhua. Maji uoso ka xikana o Mona, ka kà mona muenhu, kikale o njinda ia Nzambi i xala ku thandu diê katé ku hádia ni hádia.” (Nzuá 3:36) Tu tena kusanguluka, mukonda o sata ia kúkula ia Kristu, i tu kuatekesa kukala makamba a Nzambi. Ia lungu ni maka enhá, Phaulu ua soneka: “Enu’enu m’ukulu mua kexile dikanga ni Nzambi. Mua di bhangele mu jinguma já Nzambi mukonda dia ima iaiibha i mua xinganeka jinga, ni mukonda ue dia ima iaiibha i mua bhanga jinga. Maji lelu’di, ua mi luuluila mu kufua kua Mon’ê.”—Kolose 1:21, 22.

9, 10. (a) Kikalakalu kiahi kia bhana Kristu ku jiphange jê a undu? (b) Kiebhi o “jimbudi jamukuá” a kuatekesa o Jikidistá a undu?

⁹ Kristu ua bhana ku jiphange jê a undu, ‘o kikalakalu kia kukuatekesa akuâ kukala makamba a Nzambi.’ Phaulu uambe: “Ima ioso-phe iii, Nzambi muene na i bhange, ua tena ku tu lunguluila mua Kristu ni tu kale tu makamba mê etu tua kexile tu jinguma, iú ua tu bhana o kikalakalu kia kubhanga kuila akuetu uâ a [bhiluka] makamba ma Kristu. O hundu ietu ienhi’ii: Kuma Nzambi mua Kristu ua mu luulula o mundu ni muène, iú ua mu bhangesa kuila athu oso a kala makamba mê, sè kukuata-nâ konda ia ikuma iâ. Etu-phe Muène iú ua tu bhana o maka mê ma kuluulula athu n’a kale makamba mê. Kala kiki, tua mu zuela bhabha mu dijina dia Kristu, kala muene Nzambi uala ku mi ambela mu makanu etu, kuila: Mu dijina dia Kristu, ehelenu Nzambi a mi [bhilule] mu tunde mu kukala mu jinguma jê, a mi bhange mu makamba mê.”—2 Kolindo 5:18-20.

¹⁰ O “jimbudi jamukuá,” ala ni ujitu ua kukuatekesa o Jikidistá a undu kubhanga o kikalakalu kiki. (Nzuá 10:16) Kuma akunji a Kristu, o “jimbudi jamukuá,” ene a mu bhanga dingi o kikalakalu kia kuboka. Ene a kuatekesa o athu kukala ni ukamba uambote ni Jihova, mu kua longa o kidi kia Bibidia. O kikalakalu kiki kiala ni valolo, mukonda ki kuatekesa kutula o njimbu iambote ia lungu ni henda ia Nzambi.

11, 12. Mukonda diahi o njimbu ia kuila, tu tena kusamba kua Jihova, njimbu iambote phala kutudila o athu?

¹¹ Athu avulu a samba, mukonda kioso kia samba, ene a divua kiambote.  Maji ene ka xikina ni kidi kioso kuila, Nzambi uivua o misambu iâ. Ene a tokala kuijiia kuila, Nzambi ‘Mukua kuívua o misambu.’ O mukuâ jisalamu, Davidi, ua soneka: ‘Eie u mukuâ kuívua o misambu, ko kué kuene ku bhongolokela o xitu ioso. Eme ki ngal’iki, milonga ia ngi tundu; maji eie-phe ikuma ietu u i loloka.’—Jisálamu 65:2, 3.

¹² Jezú ua tangela o maxibulu mê: “Kioso ki mu bhinga Tata mu dijina diami, muène u mi bhana-kiu.” (Nzuá 16:23) Kiki kilombolola kuila, tu tena kubhinga kima kioso-kioso kia lungu ni vondadi ia Jihova. Nzuá ua soneka: “Kuene kubhua uôma ku tuala na-ku bhu pholo ia Nzambi, kuma kima kioso ki tu mu bhinga, se kia xikina mu vondadi iê, muène u tu ivua.” (1 Nzuá 5:14) Kima kiambote kukuatekesa o athu kuijiia kuila, o musambu ki u kuatekesa ngó o muthu ku divua kiambote. U tu kuatekesa ué kuzukama ku ‘kiandu kia henda’ kia Jihova! (Jihebeleu 4:16) Kioso ki tu longa o athu o ukexilu uambote ua kusamba, o Muthu ua tokala kuzuela nê mu musambu, ni ima ia tokala kubhinga mu musambu, tua kuatekesa kukala makamba a Jihova, ni kutambula kikuatekesu kioso kia dibhana ni ibhidi.—Jisálamu 4:1; 145:18.

13, 14. (a) Ujitu uahi ua-nda tambula o Jikidistá a undu? (b) Kikalakalu kiahi kia-nda bhanga o Jikidistá a undu phala o athu?

¹³ “Ku hádia ni hádia,” Jihova ua-nda londekesa dingi o henda iê. Kiebhi kia-nda bhanga kiki? Jihova ua-nda bhana ujitu ua dikota ku 144.000 a Jikidistá a undu, a-nda tumina kumoxi ni Kristu ku diulu. Phaulu ua jimbulula o ujitu iú, kioso kiambe: “Nzambi-phe mu kulenduka kuê kua mu kala o nzungule, mukonda dia henda iê iavulu ia tu kuatela, kioso mu nzumbi ki tua kexile tu afi mu ikuma ietu, kiene muène kia tu phaphumuna kumoxi ni Kristu. Ku [henda ia] Nzambi ngó ku mua bhulukila. Kuma Nzambi ua tu fukununa kumoxi ni Kristu, iú ua tu xikamesa-nê ku ungana ku ididi ia diulu mua Kristu Jezú. Nzambi ua bhange kiki, phala ku hádia ni hádia a kà tene [kuidikisa] o jizungule josu’ojo ja [henda iê,] mu mbote ia tu bhange etu mua Kristu Jezú.”—Efezo 2:4-7.

¹⁴ Ki tu tena kuijiia o ima ioso ia madiuanu ia bhake Jihova, phala o Jikidistá a undu a-nda tumina kumoxi ni Kristu ku diulu. (Luka 22:28-30; Filipe 3:20, 21; 1 Nzuá 3:2) Jihova ua-nda ‘kuidikisa o jizungule josu’ojo ja henda iê,’ ku Jikidistá a undu, mu ukexilu ua beta-o-kota. Ene a-nda kala “o Jeluzaleme ia ubhe,” o dibhanga dia Kristu. (Dijingunuinu 3:12; 17:14; 21:2, 9, 10) Ene a-nda kalakala kumoxi ni Jezú, mu ‘ku saka akuâ jixi.’ Ene a-nda kuatekesa o athu kubhuluka ku kituxi ni kalunga, ni kua kuatekesa kukituka athu a iuka.—Tanga Dijingunuinu 22:1, 2, 17.

15, 16. Ku hádia, kiebhi Jihova kia-nda londekesa o henda iê ku “jimbudi jamukuá”?

 ¹⁵ O divulu dia Efezo 2:7 di zuela kuila, “ku hádia,” Nzambi ua-nda londekesa o henda iê. Mu kithangana kieniókio, o athu oso mu ixi, a-nda mona ‘o jizungule josu’ojo ja henda iê.’ (Luka 18:29, 30) Jihova ua-nda londekesa o henda iê ia dikota mu ixi, kioso kia-nda fukununa o athu ala “mu jimbila.” (Jobe 14:13-15; Nzuá 5:28, 29) A nanhi a-nda kua fukununa? O maiala ni ahatu a fiiele afú ande dia kithangana kia Kristu, ni ió a tokala ku “jimbudi jamukuá,” a kolokota mu ufiiele uâ kua Jihova mu izuua íii isukidila-ku, katé kiafuá. O athu oso iá a fiiele, a-nda vutuka ku muenhu, phala kusuluka ni kusidivila Jihova.

¹⁶ Mazunda ni mazunda a athu afú sé kuijiia Nzambi, a-nda kua fukununa uá. Nzuá ua soneka: “Anga ngi mona uê o madifundu, makota ni jindenge, emana bhu pholo ia kiandu. Anga a jikula madivulu, ni divulu dia mukuá a di jikula, diene o divulu dia muenhu. O madifundu anga a a fundisa o ima ioso iosonèke mu madivulu, hé a a bhana kioso kia tokala mu imbamba  iâ ia bhanga jinga. O musanza ua kalunga anga u bhana oso o madifundu ala-mu. O kùfua ni kalung’a-ngombe, anga a bhana uâ ni madifundu mâ ma jikilile bhoxi dia kutena kuâ. Ene oso hé a a fundisa mu umoxi-umoxi, kala kia tokala mu imbamba iâ ia bhanga jinga.” (Dijingunuinu 20:12, 13) O athu a-nda fukunuka, a-nda kala ni ujitu ua ku di longa o kidi kia lungu ni Jihova, ni kuxikina o Utuminu uê. Ene a-nda di longa ni kubelesela o itumu ia Bibidia, ni itendelesu ia ubhe ia-nda soneka mu “madivulu.” Jihova ua-nda londekesa ué o henda iê bhu kaxi ka itendelesu íii ia ubhe.

17. Kioso ki tu boka, ihi i tua tokala kulembalala?

¹⁷ Kuma o dizubhilu dia zukama, tua tokala kuboka dingi o njimbu iambote, m’ukulu ndenge! (Marku 13:10) Tua tokala kulembalala kuila, o kima kia tokala ku tu bhangesa o kuboka, o vondadi ietu ia ku jingisa o dijina dia Jihova. Kiebhi ki tu tena kubhanga kiki? Tua bhingi ku tangela o athu kuila, o mabesá oso u tua-nda tambula ku mundu uobhe, tua-nda kua tambula ngó mukonda dia henda ia Jihova.

18, 19. Kiebhi ki tu jingisa o henda ia Jihova?

¹⁸ Kioso ki tu bokela o athu, tu tena kua jimbuluila kuila, ku Utuminu ua Kristu, o athu a-nda tambula o mabesá oso a lungu ni sata ia kúkula, ni kuila, bhofele bhofele, ene a-nda kituka athu a iuka. O Bibidia i zuela: O “ibhangelu ioso hadia ia kà jituka ku ubhika ua kubôla, hé ia kà bokona mu ufôlo ua fuma, ua an’ a Nzambi.” (Loma 8:21) O ima íii, ia-nda bhita ngó mukonda dia henda ia Jihova.

¹⁹ Etu tuala ni ujitu ua kutudila o mundu uoso, o njimbu ia dikota i tu sanga mu divulu dia Dijingunuinu 21:4, 5, iambe: “[Nzambi] u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.” Jihova ua xikama bhu kiandu, anga u zuela, uixi: “Kindala ima ioso nga i bhangulula ku ubhe!” Muéne u zuela ué, uixi: “Kiki soneka-kiu! Kuma maka iá a kidi, a tokala ku a dielela.” Kioso ki tu boka o njimbu iambote ni kusuína kuoso, tu jingisa o henda ia Jihova!