1, 2. Vɛɛ kiilanɔɔ Pɔɔl ndoo chɔm yɛ balika melaa le kɛndɛi bɛndu bɛndu Mɛlɛkɛi?

MI KIILANƆƆ Pɔɔl dimi tonya ndɔɔ aa, “Kɛndɛi Mɛlɛka tosal la keŋ nde i tembu le.” (Nuawɔ Kɔliŋtiaŋ Tasoo 15:9, 10.) Mi Pɔɔl sina walaŋ maa o bɛnda le mi Mɛlɛka tuiinuŋ ndu inyɛɛ le. Wana ndoo duau Kilisiɔŋnda kotaa choo wo o wa ni.

² O yoomu ndɔɔ mɛɛlulaŋ, mi Pɔɔl poonyial Timoti aa, “Masanɔ naa Chiisu Kiliti o ke ya kpaayaa le wallo hoo tosaa wo, I yil ndu balika le mɛɛ o laalaŋ a ya le wallo hoo tosaa yɛ. Nduyɛ, I mel ndu balika le mɛɛ o hɛli ya le wallo hoo tosaa yɛ.” (Timoti Tasoo 1:12-14) Wali kuɛɛ wa yɛ koŋ? Mi Pɔɔl dimul bɛnduaa o kundaa Ɛfisɔɔ niŋ aa, “I chue bɛɛ yoomu nuu maa o cho nyɛ o nyɛ le, le hali kpeŋ mi chii wali Masanɔɔ Chiisu ke ya wo, ndu yɔnuŋ maa waŋnda yooŋgu kɛndɔɔ dimullo a kɛndɛi Mɛlɛkɛi okɔɔ ni.”​—Walta Wanaa Chiisuaa 20:24.

3. Wali teŋgeŋ kuɛɛ ndoo keŋnuŋ yɛ Pɔɔl? (Tofa fotueiyo o peele naŋ kandu leŋ choo.)

³ ‘Yooŋgu kɛndɛ’ yɛɛ Pɔɔl ndoo dimi yɛ, nduyɛ vɛɛ yooŋgu kɛndɛ koŋ chɔm yɛ kɛndɛi bɛndu bɛndu Chɛhowɛi? Mi Pɔɔl ndoo dimul Kilisiɔŋnda o Ɛfisɔɔ niŋ aa, “I nɔ o kɔl maa la tuei niŋ a wali Mɛlɛka ke yɛ le tosaa le nya wo. Ndu cho ni, yooŋgoo nya dimullo a mɛɛ Mɛlɛka cho wana ikɛndɛ yɛ okɔɔ.” (Ɛfisiaŋnda 3:1, 2)  Mi Chiisu ndoo dimul Pɔɔl le mbo dimul wanaa ve ŋChuu le wa yooŋgu kɛndɔɔ. Okoŋ, mi wanaa ve ŋChuu le wa sɔla dioo le ma wa o Masale Mɛsayanɔɔ niŋ. (Nuawɔ Ɛfisiaŋnda 3:5-8.) Mi Pɔɔl dimi yooŋgu kɛndɔɔ a dialuŋ fulaa, nduyɛ mbo kɛsi taamasi kɛndɔɔ le Kilisiɔŋnda hau. Mbo chɔm maa kɛndɛi bɛndu bɛndu Mɛlɛkɛi ndii “tembu le” nduyɛ maa i ve nyɛ fondo fuu le ndu le.

4, 5. Le yɛɛ naŋ dimi yɛ maa nyɛ pilɔɔ yooŋgu kɛndɔɔ a Masale Mɛlɛkaleŋ okɔɔ cho a yooŋgu kɛndɔɔ a kɛndɛi Mɛlɛkɛi okɔɔ ni?

⁴ O palɛi mɛɛlɛi hei niŋ, wanaa Mɛlɛkaa sɔla viomɔɔ le ‘yooŋgu kɛndɔɔ hoo dimioo ba o ba fee o chieeŋndo choo a Masale Mɛlɛkaleŋ okɔɔ.’ (Maatiu 24:14) Yooŋgu kɛndɔɔ a Masale Mɛlɛkaleŋ okɔɔ cho vɛlɛ “yooŋgu kɛndɔɔ . . . a kɛndɛi Mɛlɛkɛi okɔɔ” ni. Vɛɛ keŋ cho yɛ lende? Kɛndɛi Chɛhowɛi cho tosa ni miŋ sɔla tɔnɔla Masale Mɛlɛkaleŋ le cho naa ke laŋ kpou. (Ɛfisiaŋnda 1:3) Mi Pɔɔl dimi yooŋgu kɛndɔɔ a dialuŋ fulaa le balika melaa chɔmndo le kɛndɛi bɛndu bɛndu Chɛhowɛi. Baa ŋ cho taamasi Pɔɔllo tolɔɔ kɔɔli?—Nuawɔ Luomaŋnda 1:14-16.

⁵ Wanaa lahakiaa naŋ cho ni. O buŋgɛi naŋ hiou ve niŋ, miŋ pɛɛku mɛɛ kɛndɛi bɛndu bɛndu Chɛhowɛi ke naa tɔnɔɔ o nɛila bɔɔbɔɔ niŋ yɛ. Le mɛɛ naŋ sɔla tɔnɔ kaakuu waa naa yɛ, i cho naa kuee le waŋnda pɛɛkoo mɛɛ Chɛhowa cho kaalaa ndɔɔ chɔmndo yɛ, nduyɛ a mɛɛ nda bɛɛ looku tɔnɔɔ sɔla o hei niŋ yɛ. O nɛila kuɛɛ niŋ naŋ mala yɛ acheleŋnda le balika melaa chɔmndo le kɛndɛi bɛndu bɛndu Mɛlɛkɛi.

6, 7. Te ŋ wa waŋnda sala baŋaa tɛɛsiallo pɛ, vɛɛ keŋ chɔm yɛ maa ŋ cho waŋnda dimullo a kɛndɛi bɛndu bɛndu Mɛlɛkɛi okɔɔ?

⁶ Hau, wanaa bɔɔbɔɔ chi ndi iwɔɔŋ le hakioo tosaa le. Lelaŋ, a nɔ sinapɛŋgu le sabu waŋchieeya yeema sala baŋaa Chiisoo le. Kɛ wanaa bɔɔbɔɔ che vɛlɛ maa yoomu nda cho niŋndo cho nda nyaale ke le. Nduyɛ, mɛɛ ma soo o Seiyaa Chɛhowaa lo malaŋ nda sina nyɛ cho hakioo wo, mɛɛ o paaliaŋ naa yɛ, a nyɛ naŋ nɔ miŋ tosa le fulaa o chɛle hakioo bɛŋgu wo. Te wanaa yeema tonyaa sinaa wa bii bila pɛ nyɛ cho hakioo wo, ma naŋ kɔl tau le pɛɛkoo maa mi Chɛhowa yɔŋ Po ndɔɔ o chieeŋndo choo le naa solioo o hakioo niŋ a piɔmndo. Mi Chɛhowa tosa keŋ le mɛɛ o nɔ kaalaa a kɛndɛi bɛndu bɛnduei yɛ.​—Chɔŋ Tasoo 4:9, 10.

⁷ Tofawɔ nyɛ Pɔɔl dimi a Po kaalaa Chɛhowaa okɔɔ wo. “Piɔm Chiisu Kiliti vi wo, ndu tosa ni mi ŋ sɔla baŋaŋndo, koŋ cho ni, mi ŋ sɔla malɔɔ le yɔŋnda wɔɔŋnda naa ŋ tosa laŋ. Kɛndɛi bɛndu bɛnduei Mɛlɛka tosal naa hei ni.” (Ɛfisiaŋnda 1:7) Sala baŋaa Kiliti wo chɔm kaala bɛndu Mɛlɛka nɔ le naa wo a kɛndɛi bɛndu bɛndu o chɔm naa ve. Nduyɛ mi kɔllo hini naa te o wa pɛ miŋ pɛɛku maa te ŋ dɔu tiindaŋndo o sala baŋaa Chiisoo niŋ pɛ, miŋ sɔla malɔɔ hakioo a kɔl iyama walaŋndo! (Hibuluiya 9:14) Yooŋgu kɛndɔɔ kpeekpei cho hoo le waŋnda dimullo ni!

8. Le yɛɛ wanaa lahakiaa nɔ yɛ ma wa diompilɛ nda Mɛlɛka waa?

⁸ Te waŋnda dou tiindaŋndo o sala baŋaa Chiisoo niŋ te, mi Mɛlɛka che nda maa yaamɔɔwaa nduaa nda cho ni. Lelaŋ, i cho naa kuee le nda dimullo maa a nɔla ma simnuŋ chaaŋaa Mɛlɛkaa. Mi kiilanɔɔ Chɔŋ poonyiaa aa, “Wana o wana dɔu tiindaŋndo o Po Mɛlɛkaa hoo niŋ pɛ, wana koŋ o sɔla yoomu kpeekpeiyo o nɔ lamɛɛlu le wo. Kɛ, wana o wana tosa nyɛ o dimul ndu wo le o sɔla yoomu kpeekpeiyo le. Nduyɛ, o koŋ kɔɔli, mi Mɛlɛka o lo wana koŋ nyɛ palaa tusioo choo haaa.” (Chɔŋ 3:36) Ŋ naŋ kɔl le mɛɛ sala baŋaa Chiisoo tosa miŋ simnuŋ chaaŋaa Mɛlɛkaa yɛ. Mi Pɔɔl tɛɛsiaa ndu o nɛiyo hoo choo aa, “O tasela ndɔɔ nya waŋnda Koloose la wa mawaa landaŋ a Mɛlɛka. Pɛŋgu koŋ wɔwaŋndo wa nya tɛɛŋ nya Mɛlɛka waa, kani  fondole, le sɔɔŋ wɔɔŋ nya wa tosaa woŋ a sɔɔŋ wɔɔŋ nya aa yiyaŋ o kɔl niŋ ndoŋ. Kɛ nduyɛ, piɔm Kiliti vi o iwana chieeya wo, ndu tosa ni mi Mɛlɛka miŋgi nya diom pilɛ a ndu pila.”​—Kolosiaŋnda 1:21, 22.

9, 10. (a) Kalaŋ kuɛɛ Kiliti ke yɛ Kilisiɔŋaa pɔyaŋnda? (b) Vɛɛ “saa cheleŋ” nda cho yɛ Kilisiɔŋaa pɔyaŋnda malaa?

⁹ Kiliti ke Kilisiɔŋaa pɔyaŋnda o chieeŋndo choo wallo le waŋnda miŋgioo “diom pilɛ” a Mɛlɛka. Mi Pɔɔl dimul nda aa, “Mɛlɛka pila ndu tosa suɛi hei ni. O tosa mi ŋ miiŋgu diom pilɛ naa ndaa. Nduyɛ, o sabu Kilitioo niŋ o tosa hei ni. O koŋ kɔɔli, mbo ke naa wallo le tosaa, ndu yɔnuŋ ni maa naa bɛɛ mi ŋ tosa mi waŋnda apiliaa a miiŋgu diom pilɛ a ndu. Koŋ cho ni, yooŋgu naa ŋ dimul waŋnda wo, ndu cho ni maa Mɛlɛka cho tosa o sabu Kilitioo niŋ sanaa ma miiŋgu diom pilɛ nda ŋwaŋnda chiee kpou. Yɔŋnda wɔɔŋnda nda tosa laŋ, Mɛlɛka o chɔm nda laŋ choo le. Nduyɛ, mbo viam naa a yooŋgoo hoo le mi ŋ dimul waŋnda mɛɛ ndu Mɛlɛka o tosa ma miiŋgu diom pilɛ nda ŋwaŋnda chiee yɛ. Lelaŋ, wanaa Kiliti vem sɔŋgɔ ndɔɔ wa naa ŋ cho ni. te o wa maa yɔŋɔɔ pɛ, Mɛlɛka pila cho machuaa nya dɛɛniaa o sabu naa niŋ. Lelaŋ, ŋ cho nya nyɔɔloo sɔŋgɔ Kilitioo maa la chɛl mi Mɛlɛka tosa mi la miiŋgu diom pilɛ nya ndaa.”​—Kɔliŋtiaŋ Diiŋ Ndɔɔ 5:18-20.

¹⁰ Dikeŋnaŋndo i cho ni le mi “saa cheleŋ” nda mala Kilisiɔŋaa pɔyaŋnda yooŋgu kɛndɔɔ dimioo. (Chɔŋ 10:16) Maa wanaa Kiliti “vem” nda, saa cheleŋ nda cho pɛl bɛndoo tosaa o wali dimiaa yooŋgu kɛndɔɔ niŋ. A cho waŋnda tonyaa pɛɛkoo, nduyɛ ma wa nda malaa le chaŋyɛi sɔvɛi nɔɔ a Chɛhowa. Pɛl sɔviɔɔ cho hoo o yooŋgu kɛndɔɔ dimioo niŋ a kɛndɛi bɛndu bɛndu Mɛlɛkɛi okɔɔ ni.

11, 12. Le yɛɛ i cho yɛ suɛi yooŋgu kɛndɛ le mi waŋnda sina maa a nɔla ma piɛi o Chɛhowa lo?

¹¹ Mi wanaa bɔɔbɔɔ piɛi kanifuule, mi piɛileŋ le tosa ma naŋ kɔl. Kɛ a laalaŋ kpeekpei maa Mɛlɛka tuɛi piɛileŋ te. A nɔ ma sina maa “Wana muli piɛileŋ ndo” Chɛhowa cho ni. Mi Deeve poonyiaa aa, “Num cho wana muli piɛileŋ ndo ni. Waŋnda o chieeŋndo niŋ kpou, a cho hunɔɔ naa num chua ma huŋ piɛi num, le ma mal nda le yɔŋnda ndala wɔɔŋndaŋ. Mi ŋ tosa yɔŋnda wɔɔŋndaŋ mi la hiau naa mayoomu, kɛ ma mal naa le laŋ.”​—Sam 65:2, 3.

¹² Mi Chiisu dimul buɛiyaa nduaa aa, “Nyɛ o nyɛ la nyuna le ndu a diola nilaŋ pɛ, tosaa ya I tosa ni.” (Chɔŋ 14:14) Hoo sim ni maa ŋ nɔla miŋ piɛi le “nyɛ o nyɛ” cho o chɛlaŋ a hɛnaŋ Chɛhowaa. Mi Chɔŋ poonyiaa aa, “Kiisaŋ cho naa le hunɔɔ naa Mɛlɛka chua le. Kani fuule, ŋ sina maa pɛŋgu o pɛŋgu te ŋ nyuna ndu le nyɛ o nyɛ pɛ, nduyɛ mbo wa o hɛnaŋ ndɔɔ niŋ pɛ, nilaŋ o yaŋ naa ni.” (Chɔŋ Tasoo 5:14) I cho suɛi kɛndɛ le waŋnda malaa ma sina maa piɛileŋ le cho ko nyɛ tosa miŋ naŋ kɔllo le, kɛ nɛi sɔviɔɔ le cho le hunɔɔ “naa Mɛlɛka chua o tosal ŋwaŋnda chiee kɛndɛi yo” ni. (Hibuluiya 4:16) Te ŋ pɛɛku waŋnda pɛ mɛɛ nda nɔ ma piɛi yɛ, wana bɛnda le ma piɛiyo, nduyɛ a nyɛm nda nɔ ma piɛi le muŋndoŋ, ŋ cho nda mala le ma simnuŋ chaaŋaa Chɛhowaa. Okoŋ, a nɔla ma sɔla kɔl dɛɛniaa te a wa pɛ o saŋgaa niŋ.​—Sam 4:1; 145:18.

13, 14. (a) Dikeŋnaŋ sɔvɛ bɛndu kuɛɛ Kilisiɔŋaa pɔyaŋnda cho yɛ sɔla o chilaŋ niŋ? (b) Wali sɔvɛ kuɛɛ Kilisiɔŋaa pɔyaŋnda cho yɛ tosa le waŋchieeya?

¹³ Chɛhowa cho chɔɔlu kɛndɛi nduɛi bɛndu bɛnduei chɔm “le fɛɛŋ a fɛɛŋ.” Vɛɛ o cho yɛ keŋ tosa? Mɛlɛka cho ŋwaŋ 144,000 cho wa o Masaleŋ choo a Kiliti latulu wa foofu sɔviɔɔ ke. Mi Pɔɔl tɛɛsiaa dikeŋnaŋ koŋ. Mbo poonyiaa aa, “Mɛlɛka cho wana inyiɛɛ bɛndu bɛndu. Nduyɛ, le kaala bɛndu o kaala naa wo, mbo miŋgi naa yoomu naa Kiliti waa. Boondii keŋ ŋ wa wɔ a vilɛiya le kɛɛ naa ŋ kɛɛ le nyɛ  ndu oo dimul naa wo tosaa wo. O kɛndɛi Mɛlɛkɛi niŋ sanaa nya sɔla pioŋɔɔ ni. Nduyɛ, le mɛɛ naa ŋ cho diom pilɛ a Chiisu Kiliti yɛ, mi Mɛlɛka miŋgi naa yoomu naa ndaa, nduyɛ, mbo kɛsi naa Chiisu Kiliti ikɛi o fondaŋ Mɛlɛkaa. Mɛlɛka tosa matosaa hei le chɔmndo le fɛɛŋ a fɛɛŋ mɛɛ kɛndɛi o tosal naa ve i cho i bɛndu bɛndu yɛ. Nduyɛ o tosal naa kɛndɛi hei sanaa a Chiisu Kiliti.”​—Ɛfisiaŋnda 2:4-7.

¹⁴ I kendu le yiyaŋndo a sɔɔŋ kɔndɔfili Chɛhowa bɛɛndiaa le Kilisiɔŋaa pɔyaŋnda teleŋ nda cho wa o Masaleŋ choo nda Kiliti waa o choo choo niŋndo. (Luku 22:28-30; Filipiaŋnda 3:20, 21; Chɔŋ Tasoo 3:2) Chɛhowa cho Kilisiɔŋaa pɔyaŋnda kɛndɛi nduɛi bɛndu bɛnduei chɔm o nɛi teleŋndo choo. Nda cho wa “Chulusɛlɛm sɛnɛiyo” ni, ndu cho yɛ lanɔɔ Kiliti ni. (Sɔɔŋ Chɔɔmaŋndoŋ 3:12; 17:14; 21:2, 9, 10) A cho wallo tosa a Kiliti latulu le ‘waŋnda siŋgioo o lɛŋnde niŋ kpou o chieeŋndo choo.’ A cho waŋchieeya soli o hakioo niŋ a piɔmndo, nduyɛ, ma mala nda le simnɔŋndo walaŋ.​—Nuawɔ Sɔɔŋ Chɔɔmaŋndoŋ 22:1, 2, 17.

15, 16. Vɛɛ Chɛhowa cho yɛ kɛndɛi nduɛi bɛndu bɛnduei chɔm o “saa cheleŋ” nda lo o chilaŋ niŋ?

¹⁵ Ɛfisiaŋnda 2:7, dimi maa Mɛlɛka cho kɛndɛi nduɛi bɛndu bɛnduei chɔm “le fɛɛŋ a fɛɛŋ.” A teleŋ koŋ, wana o wana cho wa o chieeŋndo choo cho tɔnɔɔ sɔla o “kɛndɛi . . . bɛndu bɛndu” Mɛlɛkɛi niŋ. (Luku 18:29, 30) Nɛi bɛndoo opilɛ o Chɛhowa cho kɛndɛi nduɛi chɔmndo cho waŋchieeya solioo “o sɛilaŋ niŋ ni.” (Choobu 14:13-15; Chɔŋ 5:28, 29) Nɛɛ yaa cho yɛ fulasɛiniŋndo sɔla? Waŋpiaanduaa a waŋlaanduaa lo tiindaŋndo dɔuwɔɔ o Mɛlɛka niŋ ma wu tuupa mi Chiisu sɔla piɔmndo wo, a ‘saa cheleŋaa’ cho tiindaŋndo dɔuwɔɔ o Mɛlɛka niŋ ma wa piɔmndo sɔlaa o palɛi mɛɛlɛi hei niŋndo. Wanaa lo haa tiindaŋndo dɔuwɔɔ o Mɛlɛka niŋnda kpou cho fulasɛiniŋndo sɔla le ma hiou lachi a Mɛlɛka piɛiyo.

¹⁶ Wanaa vi o miiliɔŋndaŋ niŋ kɛ a sina Mɛlɛka le wa bɛɛ cho fulasɛiniŋndo sɔla. Mi Chɔŋ poonyiaa aa, “O koŋ kɔɔli, mi cha wanaa vi wa, wana bɛndu ni, wana pɔmbɔ ni. A wa isisi o kpeŋgbei lemasaa hɔlndɔ. Ma kumbi yaula pum, la nyɛ o nyɛ fee waŋnda  tosa o cho o poonyiaa leniŋ ndaŋ. O koŋ kɔɔli, ma kumbi vɛlɛ yau cheleŋ, yauwo hoo diola wanaa nɔ le waa yoomu wa, laŋ la cho leniŋ ni. Ma kɔɔsa a wanaa vi wa kpou, wana o wana mɛɛ kuɛila ndɔlaŋ la wa yɛ, nduyɛ mi i wa i poonyiaa o yaula laŋ niŋ yɛ. O koŋ kɔɔli, mi wanaa vi o pee mɛŋma ihɛllo niŋ nda a chaŋ ma fula o pee mɛŋma ihɛllo niŋ. Mi wanaa wa o nda veelu aa piɔmndo wo o ba wa, . . . nda kpou ma chaŋ ma fula. Ma kɔɔsa a nda kpou, wana o wana mɛɛ kuɛila ndɔlaŋ la wa yɛ.” (Sɔɔŋ Chɔɔmaŋndoŋ 20:12, 13) Wanaa cho fula o sɛilaŋ niŋnda cho dioo sɔla le pɛɛkoo a Chɛhowa okɔɔ, nduyɛ ma chɛl masale ndɔleŋ. A cho sawala mandaala Baabuiyo pɛɛku a sawala sɛnɛila cho wa o “yaula pum” niŋndaŋ. O sawala sɛnɛilaŋ niŋ Chɛhowa cho kɛndɛi nduɛi bɛndu bɛnduei chɔm ni.

17. Yɛɛ naŋ nɔ yɛ miŋ kɛsiŋ o kɔl te ŋ wa pɛ yooŋgu kɛndɔɔ dimioo?

¹⁷ I cho bɔɔ hau suɛi sɔvɛ bɛndu le miŋ dimi yooŋgu kɛndɔɔ a Masale Mɛlɛkaleŋ okɔɔ mbo hiau maa paandu kanifuule, mɛɛlulaŋ la cho niŋ kpɛɛluŋ! (Maki 13:10) Ŋ nɔ miŋ loonuŋ maa kpeleŋ naa cho le Chɛhowa bɛɛleŋ kioo o yooŋgu kɛndɔɔ dimioo niŋ ni. Vɛɛ naŋ looku yɛ hei tosa? Ŋ nɔ miŋ dimul waŋnda maa kɛndɛi bɛndu bɛndu Chɛhowɛi cho tosa ni miŋ tuei salalaŋ kpou yeela o chieeŋ sɛnɛiyo niŋ.

18, 19. Vɛɛ naŋ lisa yɛ kɛndɛi bɛndu bɛndu Chɛhowɛi?

¹⁸ Te ŋ wa pɛ waŋnda yooŋgu kɛndɔɔ dimullo, ŋ nɔ miŋ tɛɛsial nda maa te Masale Kilitileŋ le hiŋ pɛ, waŋchieeya cho tɔnɔla sala baŋaa kpou sɔla, nduyɛ o pɔmpɔmbɔ ma simnuŋ wanaa walaŋnda. Baabuiyo dimi aa, “Maa paale fuuluu niŋ mi Mɛlɛka soli muŋ o chɛleŋ niŋ, koŋ cho ni ŋ se lɛ le. Nduyɛ ŋ cho vɛlɛ lehɔl o nɛi maa muŋ bɛɛ ŋ cho baŋaŋndo sɔla nduyɛ, mi ŋ sɔla naŋɔɔ mɛɛ i yɔnuŋ a chuauwaa Mɛlɛkaa yɛ.” (Luomaŋnda 8:21) Kɛndɛi Chɛhowɛi koni cho hei tosa ni.

¹⁹ Ŋ nɔ dikeŋnaŋndo le waŋnda kpou dimullo suɛi kɛndɛi bɛnduei hei o Sɔɔŋ Chɔɔmaŋndoŋ 21:4, 5: “[Mɛlɛka] cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana vɛ le a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa, kani fuule, nyɛ o nyɛ paandu chuu faŋaŋ.” Nduyɛ mi Chɛhowa cho o ichali o kpeŋgbei lemasaa choo wo dimi aa, “I cho nyɛ o nyɛ fee toosiaa o sɛnɛi.” Mbo dimi vɛlɛ aa, “Poonyiaa diomndaŋ ndaŋ, kani fuule, tonyaa la cho ni, nduyɛ la cho diomnda wana nɔla ma tiindaŋ.” Te ŋ dimul pɛ acheleŋnda yooŋgu kɛndɔɔ hoo a dialuŋ fulaa, mɛɛ o kpeekpei niŋ, ŋ cho kɛndɛi bɛndu bɛndu Chɛhowɛi lisaa!