1, 2. Aweyi Paulu wa ntumwa kasongela vo wavutulanga matondo muna nsambu yovo nkenda za Nzambi?

PAULU wa ntumwa wavova ye ziku kiawonso vo: “E nsambu [za Nzambi] ke zankatu ko kwa mono.” (Tanga 1 Korinto 15:9, 10.) Paulu wazaya wo vo kafwanukina e nsambu yovo nkenda za Nzambi ko. Entente Akristu kabangikanga.

² Muna lumbu yansuka ya zingu kiandi, Paulu wasonekena Timoteo vo: “Ntondele Kristu Yesu wa Mfumu eto, ona wankumika, kadi wambadikila vo i nkwa kwikizi wau kangiekeka uselo.” (1 Timoteo 1:12-14) Nkia uselo Paulu kayika? Paulu wazayisa akuluntu a nkutakani ya Efeso vo: “Kibadikilanga moyo ame ko vo usundidi o mfunu kwa mono, kansi yamanisa kaka e nkul’ame ye salu kina yatambula kwa Mfumu Yesu, yasila e nsangu zambote za nsambu za Nzambi umbangi una ufwene.”—Mavangu 20:24.

3. Nkia uselo wamfunu kavewa o Paulu? (Tala e fwaniswa kuna lubantiku lwa longi.)

 ³ Nkia nsangu zambote Paulu kasamuna? Aweyi zasongela e nkenda za Nzambi? Paulu wavovesa Akristu kuna Efeso vo: “Nwawa oma ma uselo wa nsambu za Nzambi una yavewa muna wete dieno.” (Efeso 3:1, 2) Yesu wazayisa Paulu vo kasamuna e nsangu zambote kw’awana bakala vo ke Ayuda ko. Ediadi diasadisa esi zula mu kala ye vuvu kia kota muna luyalu lwa Kintinu kina kiyalwa kwa Masia. (Tanga Efeso 3:5-8.) Paulu wasilanga umbangi kuna vema kwawonso. Mbandu ambote kikilu kasisa kwa Akristu o unu. Wasonga vo e nkenda za Nzambi ke “zankatu” ko kwa yandi.

4, 5. Ekuma tulenda vovela vo e “nsangu zambote za Kintinu” zau zimosi ye “nsangu zambote za nsambu za Nzambi”?

⁴ Mu lumbu yayi yambaninu, nkangu a Yave bena ye mbebe ya samuna “e nsangu. . . zambote za Kintinu . . . mu nza yawonso muna umbangi kwa zula yawonso.” (Matai 24:14) E nsangu zambote za Kintinu, zina mpe se “nsangu zambote za nsambu (yovo nkenda) za Nzambi.” Mu nkia mpila? E nsambu zawonso tutambula muna Kintinu kia Nzambi, i mu kuma kia nkenda za Yave. (Efeso 1:3) Paulu wavutulanga matondo muna nkenda za Yave muna samunanga e nsangu zambote yo vema kwawonso. Nga tutangininanga e mbandu a Paulu?—Tanga Roma 1:14-16.

⁵ Muna longi diaviokele, twalongokele una yeto wantu a lembi lunga tuvuilanga nluta muna nkenda za Nzambi mu mpila zayingi. Wau vo nluta miayingi tuvuanga, tuna ye mbebe ya longa akaka una Yave kesongelanga o zola kwandi ye una balenda vuila nluta. Nkia mpila tulenda sadisila akaka mu vutulanga matondo muna nkenda za Nzambi?

6, 7. Vava tusasilanga kwa wantu oma ma lukûlu, aweyi tusayanesenanga e nsangu zambote za nkenda za Nzambi?

⁶ O unu, wantu ayingi ke betokananga ko vava bevanganga e sumu. Muna kuma kiaki, ke bebakulanga ko ekuma o wantu bavuididi o mfunu a lukûlu. Vana ntandu, wantu ayingi bebakulanga vo e mpil’a zingu benatanga ke yikubatwasilanga kiese ko. Wantu ayingi, una ke bamokene ye Mbangi za Yave ko, ke bazayanga ko kana nki i sumu, ye mfwilu dikututuasilanga ye dina tufwete vanga mu vevolwa muna ubundu wa sumu. Vava akwa ntima miambote bebakulanga e nsasa a sumu, bevutulanga matondo mu zaya vo Yave wafila mwan’andi ova ntoto mu kutukula muna sumu ye lufwa. Yave wavanga wo mu kuma kia zola kwandi kwampwena ye nkenda zandi.—1 Yoane 4:9, 10.

⁷ Tala dina Paulu kavova mu kuma kia mwan’a Yave: “Watukûla muna menga ma mwana ndioyo, i sia vo, twavevolwa, twalolokwa masumu mun’owu wa umvuama wa nsambu zandi [Yave].” (Efeso 1:7) E kimenga kia lukûlu kia Kristu i ziku kiampwena kisonganga o zola kwa Nzambi  muna yeto. Kisonganga mpe nkenda zandi. Dia lufiaulwisu kikilu mu zaya vo avo tusongele lukwikilu muna kimenga kia Yesu, masumu meto melolokwa yo kala ye ntona zavelela. (Ayibere 9:14) E zazi i nsangu zambote kikilu tufwete samunanga kw’akaka.

8. Ekuma wantu asumuki bafwete vutulwisila e ngwizani yo Nzambi?

⁸ Avo wantu ke basongele lukwikilu ko muna kimenga kia Yesu, Nzambi okubabadikila nze atantu. Muna kuma kiaki, tuna ye mbebe ya kubazayisa vo balenda kituka akundi a Nzambi. Yoane wa ntumwa wasoneka vo: “Ndiona okwikila muna Mwana, una yo moyo a mvu ya mvu; ndiona okolamena Mwana, kemona moyo ko, kansi o makasi ma Nzambi muna yandi kaka mekala.” (Yoane 3:36) Tuna ye kiese kia zaya vo kimenga kia Kristu kia ziula e nzila kimana twakituka akundi a Nzambi. Paulu wasoneka vo: “Oyeno atantu nwateka kala yo vambana yo Nzambi e kuma kadi nwasianga ngindu zeno muna mavangu mambi, kansi owau, unuyikakese diaka muna nitu a ndiona wakiyekola muna lufwa.”—Kolosai 1:21, 22.

9, 10. (a) Nkia mbebe Kristu kavana kwa mpangi zandi akuswa? (b) Aweyi “mameme mankaka” besadisilanga akuswa?

⁹ Kristu wavana “uselo wa lubakanisu” kwa mpangi zandi akuswa ova ntoto. Paulu wabavovesa vo: “Lekwa yawonso kwa Nzambi yatuka, ona wavutulwisa e ngwizani eto yo yandi kibeni muna Kristu yo kutuvana uselo wavutulwisa e ngwizani, i sia vo, muna Kristu, Nzambi wavutulwisa e ngwizani a nza ye yandi kibeni, ke badikanga diaka makuzuka mau ko, watuyekeka e nsangu za vutulwisa e ngwizani. Dianu vo, oyeto tu akunzi, twavinga vana fulu kia Kristu, vika sia vo Nzambi muna yeto kedodokelelanga wantu. Wau vo twavinga vana fulu kia Kristu, tuwondelele vo: “Vutulwisa e ngwizani yo Nzambi.”—2 Korinto 5:18-20.

¹⁰ “Mameme mankaka” bena ye lau diampwena dia sadisa akuswa muna uselo wau. (Yoane 10:16) Wau vo mameme mankaka “akunzi” a Kristu, bekuyivananga mu salu kia samuna e nsangu zambote, longa wantu e ludi yo kubasadisa mu kala ye ngwizani ambote yo Yave. E salu kiaki kimosi muna salu kia samuna e nsangu za nsambu za Nzambi.

11, 12. Ekuma zinina se nsangu zambote kwa wantu mu zaya vo balenda samba kwa Yave?

¹¹ Wantu ayingi besambanga kadi e sambu kikubavuvikanga o ntima, kansi, ke bekwikilanga ko vo Nzambi owanga  e sambu yau. Diamfunu tuasadisa wantu awaya bafwete zaya vo Yave “owanga sambu.” Davidi wa ntozi a nkunga wasoneka vo: “Ongeye owanga sambu, O wantu awonso kwa ngeye bekwiza. Mambu mambi mansundidi e ngolo: Vo i makuzuka meto, ongeye obukika mo.”—Nkunga 65:2, 3.

¹² Yesu wavovesa alongoki andi vo: “Avo nulombele má muna nkumbu ame, ikunuvana kio.” (Yoane 14:14) Ediadi disongele vo tulenda lomba konso má kina e ngwizani yo luzolo lwa Yave. Yoane wasoneka vo: “I kiau kiki e ziku tuna kiau kwa yandi, konso diambu tulombele mun’owu wa luzolo lwandi, okutuwá.” (1 Yoane 5:14) Diakise kikilu mu sadisa wantu babakula vo e sambu ke mpasi vuvika kaka o ntima ko, kansi, i mpila tulenda finamena e ‘kunda kia nsambu za Yave.’ (Ayibere 4:16) Vava tulonganga wantu e mpila yambote bafwete sambilanga, Ndiona bafwete sambila ye mana balenda lomba muna sambu, tukubasadisanga mu kituka akundi a Yave yo fiaulwiswa muna ntangw’a mpasi—Nkunga 4:1; 145:18.

13, 14. (a) Nkia malau mampwena bekala mau akuswa kuna sentu? (b) Nkia salu kia mfunu akuswa besala mu kuma kia wantu?

¹³ Yave otoma songa diaka e nkenda zandi “muna tandu ina ikwiza.” Mu nkia mpila? Nzambi lau diampwena kevana kwa 144.000 ana besinga yala yo Kristu kuna zulu. Paulu wayika e lau diadi vava kasoneka vo: “Nzambi ona wavuama ye nkenda, muna nzol’anene ina katuzola, watuvana o moyo kumosi yo Kristu kana nkutu vava twakala twafwa muna makuzuka—muna nsambu zandi nwavuluzilwa. Watufula yo kutuvuandisa kumosi kuna zulu muna Kristu Yesu, kimana muna tandu ina ikwiza kasonga ulolo wa umvuama wa nsambu zandi muna walakazi wandi kwa yeto muna Kristu Yesu.”—Efeso 2:4-7.

¹⁴ Ke tulendi yindula ko e lekwa yambote yina Yave kakubikila Akristu akuswa vava beyala yo Kristu kuna zulu. (Luka 22:28-30; Filipi 3:20, 21; 1 Yoane 3:2) Yave osonga “ulolo wa umvuama wa nsambu zandi” kwa akuswa mu mpil’esivi. Bekituka “Yerusaleme Yampa,” i sia vo nzitikil’a Kristu. (Lusengomono 3:12; 17:14; 21:2, 9, 10) Besinga sala kumosi yo Yesu mu ‘wuka e zula.’ Besadisa wantu kimana bavevoka muna ubundu wa sumu yo lufwa yo kituka wantu alunga.—Tanga Lusengomono 22:1, 2, 17.

15, 16. Aweyi Yave kesongela nkenda zandi kwa “mameme mankaka” kuna sentu?

¹⁵ E sono kia Efeso 2:7 kivovanga vo  Nzambi otwasa nsambu “muna tandu ina ikwiza.” Muna kolo kiakina, awonso bekala ova ntoto bemona “ulolo wa umvuama wa nsambu zandi.” (Luka 18:29, 30) E mpila isundidi ina Yave kesinga songela e nkenda zandi ova ntoto, i lufuluku lwa wantu bena muna “ziami.” (Yobi 14:13-15; Yoane 5:28, 29) Nani osinga fuluka? Akala ye akento akwa kwikizi ana bafwa vitila lufwa lwa Kristu ye “mameme mankaka” ana befwanga ye kwikizi muna Yave mu lumbu yayi yambaninu. Akwa kwikizi awaya besinga fulwa kimana bakwamanana sadila Yave.

¹⁶ Ulolo wa wantu ana bafwa lembi zaya Nzambi besinga fuluka mpe. Yoane wasoneka vo: “Mbwene mafwa, anene ye andwelo, batelamene vana ndose a kunda, nkanda mizingumwinu. Kansi mbwene nkanda wankaka uzingumwinu; i nkand’a moyo. O mafwa mafundisilu muna mambu masonama muna nkanda mun’owu wa mavangu mau. O kalunga ovaikisi mafwa mena mo, o lufwa ye Ziami yivaikisi mafwa mena mo, konso muntu ofundisilu mun’owu wa mavangu mandi.” (Lusengomono 20:12, 13) Awana befuluka bekala ye lau dia longoka mambu ma Yave yo tambulwila vo kakala nyadi au. Divava vo balongoka yo sadila nkanikinu mia Nkand’a Nzambi ye tuludiku twampa tukala muna “nkanda”. E tuludiku twatu twampa i mpila yankaka ina Yave kesongela e nkenda zandi.

17. Adieyi tufwete sungamenanga vava tusamunanga e nsangu zambote?

¹⁷ E yayi i ntangwa tufwete kuyivana muna salu kia samuna e nsangu zambote kadi e mbaninu ifinamene kikilu. (Maku 13:10) Vava tusamunanga e nsangu zambote, tufwete sungamenanga vo e kani dieto, i vana nkembo kwa Yave. Aweyi tulenda wo vangila? Tufwete zayisanga kwa wantu vo e nsambu zazi zawonso tusinga zo vua mu kuma kia nkenda za Yave.

18, 19. Aweyi tuvutulwilanga matondo muna nkenda za Yave?

¹⁸ Vava tusilanga umbangi kwa wantu, tulenda kubasasila vo vava Kintinu kia Kristu kiyala, wantu bevua nluta miawonso mia lukûlu ye malembe-malembe bekituka wantu alunga. Nkand’a Nzambi uvovanga vo: “O nsema wau kibeni uvevolwa muna ubundu wa sumu ye lufwa yo tambula luvevoko lwa nkembo a wan’a Nzambi.” (Roma 8:21) Ediadi dilendakana kaka mu kuma kia nkenda za Yave.

¹⁹ Tuna ye lau dia zayisa kwa wantu awonso e nsilu wa kiese una muna Lusengomono 21:4, 5 oku vo: “[Nzambi] okunguna mansanga mawonso muna meso mau, lufwa ke lukala diaka ko, ngatu kala diaka dilu, yovo kazu ngatu mpasi. Mambu mantete maviokele.” Yave ona ofongele vana kunda ovovele vo: “Tala! Mvanga lekwa yawonso se yampa.” Ovovele mpe vo: “Soneka, kadi e mambu mama makwikizi ye ludi.” Vava tusamunanga yo vema kwawonso e nsangu zazi zambote kw’akaka, tuvutulanga matondo muna nsambu yovo nkenda za Yave.