1, 2. Mupostori Pauro wakatatijisa kudini kubonga ngo unyasha hucikafaneri kuwana hwa Mwari?

NGO mwoyo wese, mupostori Pauro wakakwanisa kunanga kudari: “Unyasha hucikafaneri kuwana hwaakanditira [Mwari] aucainga hwa biresi.” (Verenganyi 1 VaKorinto 15:9, 10.) Pauro waizviziva zvakajeka kuti aacafanerepi unyasha hukuru hwa Mwari. Iyena waenga mutevereri wo maKristu.

² Pauro naaphedo kufa, wakatarira Timoti kuti: “Ndinobonga Kristu Jesu, Tenji wedu, wakandivangisa wondigonda no kundipa basa iri.” (1 Timoti 1:12-14) I basa rapi raakapuwaro? Pauro wakabvunja vakuru vo ungano yo mu Efeso kudari: ‘Andivoni upenyu hwangu inga unokosha kondiri, kudari ndikakwanisa kupeja basa rangu no mushando wondakapuwa ndi Tenji Jesu, kuti ndiite ucapupu hwakakwana hwo masoko akanaka o unyasha hucikafaneri kuwana hwa Mwari.’—Maitiro o Vapostori 20:24, Shanduro yeNyika Itsva.

3. Mushando wapi wakanaka maningi waakapuwa Pauro? (Vonanyi pikica yo kutanga.)

 ³ Ngoapi “masoko akanaka” aakacumaira Pauro, zve zvondhozvo zvinotatijisa kudini unyasha hucikafaneri kuwana hwa Jehovha? Pauro wakabvunja maKristu o mu Efeso kudari: “Munoziva cipuo co unyaxa [hucikafaneri kuwana, Shanduro yeNyika Itsva] hwa Mwari hwo ndakapuwa ngo pa musana penyu.” (VaEfeso 3:1, 2) Jesu wakabvunja Pauro kuti acumaire masoko akanaka ku vaya vacaengepi vaJudha. Pa mukuvowo zvaenga zvokwanisika kuti vandhu vokubva ku majinja vaitevo divi ro utongi hwo Umambo hunotongwa ndi Mesia. (Verenganyi VaEfeso 3:5-8.) Pauro waicumaira ngo kuvangisira zve wakagaja muezaniso wakanaka ku maKristu nyamasi uno. Iyena wakatatija kuti unyasha hucikafaneri kuwana hwa Mwari ahucaengepi hwa “biresi” kana hwakasvejwa ngo kuhupuwa kwake.

4, 5. Ngenyi tingananga kuti masoko akanaka o “Umambo” ndiona ondhowo no o ‘unyasha hucikafaneri kuwana hwa Mwari’?

⁴ Mukuvo uno wokugumisira, vandhu va Jehovha vakagajwa kuita basa ro kucumaira “vangeri . . . ro Umambo . . . pasi pese, kuita ufakazi ku vandhu vese.” (Mateu 24:14) Masoko akanaka o Umambo ndiona anodanijwazve kuti i ‘masoko akanaka o unyasha hucikafaneri kuwana hwa Mwari.’ Ngenyi anodanijwa kudaro? Ngokuti makomborero ese otinozowana ngo Umambo hwa Mwari ucazova muviyo wo kunaka mwoyo kwa Jehovha. (VaEfeso 1:3) Pauro wakatatija kubongesera ku unyasha hucikafaneri kuwana hwa Jehovha ngo kucumaira ngo kuvangisira. Tiri kutevejera muezaniso wa Pauro?—Verenganyi VaRoma 1:14-16.

⁵ Pa musoro wakapera, takajija kuti itusu vashaishi tingabesereka kudini ngo unyasha hucikafaneri kuwana hwa Jehovha mu njira jakawanda. Zvecivoneka kuti takabesereka maningi, tino muthwaro wo kujijisa vamweni matatijiro aari kuita Jehovha rudo hwake no mabeserekere ovangaita ndihwona. Tingabesera vamweni ngo njira japi kuti vabongesere unyasha hucikafaneri kuwana hwa Mwari?

6, 7. Potinosanangurira vandhu muripo, tinotokotesesa kudini masoko akanaka o unyasha hucikafaneri kuwana hwa Mwari?

⁶ Nyamasi uno, vandhu vazinji avazwi kuti vano ndava povanoita zvishaishi, ngo iyo ndava avazwisisi kuti ngenyi vandhu vanoda muripo. Pa nguva yondhoyo, vandhu vakawanda vanoguma pa kuziva kuti mararamiro avo aaripi kuvadakarisa. Zve vandhu vazinji avazvizivi kuti cishaishi i cinyi, cinotipsasisa kudini zve ngozvapi zvotinodikana kuita kuti tisujunuke pa uranda hwo cishaishi, mbhera povanozobhuya no Zvapupu zva Jehovha. Povanozozwisisa kuti cishaishi i cinyi, vandhu vakanaka mwoyo vanodakara ngo kujija kuti Jehovha wakatumira Mwana wake pa nyika kuti atisujunure kubva mu cishaishi no rufu. Jehovha wakaita zvondhozvo ngo pamusoro po rudo hwake hukuru no unyasha hucikafaneri kuwana.—1 Johani 4:9, 10.

⁷ Vonanyi zvakananga Pauro ngo pamusoro po Mwana anodiwa wa Jehovha: “Ngo  ngazi yo mudikani uu, itisu tino ruponeso no kufujuhwa ko uxaixi, ngokuteveja uthende hwo [unyasha hucikafaneri kuwana hwa Jehovha] hwaakatipfumisa ndihwona.” (VaEfeso 1:7, 8) Muripo wo kujipira wa Kristu i citatijo cikuru co rudo hwa Mwari kotiri zve unotatija makuriro o unyasha Hwake hucikafaneri kuwana. Zvinotondhoja kuziva kuti kudari tikadira gonda ku muripo wa Jesu, zvishaishi zvedu zvinozoregerehwa zve tinozova no hana yakacena! (Vaheberi 9:14) Aya i masoko akanaka kamare kuti tiabvunjevo vamweni!

8. Ngenyi vandhu vakashata vanodikana kuviiraniswa na Mwari?

⁸ Kudari vandhu avadiri gonda ku muripo wa Jesu, Mwari anovavona inga vavengi. Ngo kudaro, tino basa ro kuvabvunja kuti vanokwanisa kuva shamwari ja Mwari. Mupostori Johani wakatara kudari: “Ndiani anotenda Mwana ano uhomi [kana upenyu] hucingaperi; kaveta ndiani acikapurukiri Mwana aazowani uhomi [kana upenyu]: uxungu hwa Mwari unozomuwira.” (Johani 3:36) Tingadakara ngo kuti muripo wa Kristu unotita kuti tive shamwari ja Mwari. Pauro wakazvisanangura mu njira iyi: “Imwimwivo, ngari yo kare, mainga vonyikanja no vakorore, ngo ndava yo murangariro yenyu no bziito bzenyu bzakaxata, mavianiswa wari ndiyena, ngo kufa ko muviri wake wonyama.”—VaKolosi 1:21, 22.

9, 10. (a) I basa rapi Kristu raakapa hama jake jo kuzojwa? (b) ‘Mabvuta amweni’ anobeseresa kudini vo kuzojwa?

⁹ Kristu wakapa hama jake jo kuzojwa jiri panyika ‘basa ro kuviiranisa.’ Pauro wakajibvunja kudari: “Bzese ibzi bzinobva ka Mwari, wiya wakativiiranisa nayena mwa Kristu, wotipa ubatiri hwo kuviiranisa. Mbzakadi, Mwari mwa Kristu waiviiranisa na yena nyika yo pasi, acikathusi vandhu ngo ndava yo uxaixi hwayo, acidira mazwi kuviirana pa muromo pedu. Ngokudaro, tiri vatumwi vokubatira Kristu. Mwari ondhowo anomupangira ngo muromo wedu. Tinomukumbira, ngo zina ra Kristu: Viirananyi na Mwari!”—2 VaKorinto 5:18-20.

¹⁰ I rudakajiso ku ‘mabvuta amweni’ kuti abesere vakazojwa pa basa iri. (Johani 10:16) Inga “ndhumwa,” kana vatumwi va Kristu, ‘mabvuta amweni’ ari kuita divi guru ro basa ro kucumaira, kujijisa vandhu cokwadi no kuvabesera kuti vave no ushamwari hwo phedo na Jehovha. Iri i divi rinosisira maningi ro kucumaira masoko akanaka o unyasha hucikafaneri kuwana hwa Mwari.

11, 12. Ngenyi i masoko akanaka kuno vandhu kujija kuti vangaita mukumbiro kuna Jehovha?

¹¹ Vandhu vazinji vanoita mukumbiro  ngokuti unovaita kuti vajizwe ushoni, asi ivona avatendi kamare kuti Mwari anozwadi mukumbiro javo. Ivona vanodikana kuziva kuti Jehovha ndi ‘Muzwi’ wo mukumbiro. Mutari wo nduyo Dhavhidhi wakatara kudari: “Ngokuti munozwa munamato. Vandhu vese vanoza komuri kuti vakungurihwe bzixaixi; kuposa kwedu kuno simba kupinda itisu; asi imwimwi munobzikungurira.”—Nduyo 65:3, 4.

¹² Jesu wakabvunja vajiji vake kudari: “Bzese bzo [munokumbira] ngo zina rangu, ndinozobziita.” (Johani 14:14) Izvi zvinoreva kuti tingatokumbira zviri “bzese” hazvo zvinozwirana no kuda ka Jehovha. Johani wakatara kudari: “Nga uku kugonda kwedu kotinako na Mwari: Kuti tikamukumbira ciro, ngo kuteveja kuda kwake, Yena anotipurukira.” (1 Johani 5:14) Mudakaro wakadini watinawo ngo kubesera vandhu kuzwisisa kuti mukumbiro asipi ciro cinovaita kuti vajizwe ushoni basi, asi i njira yo kukhwedera ndiona ku “dendemaro ro unyaxa” hucikafaneri kuwana hwa Jehovha! (Vaheberi 4:16) Potinojijisa vandhu njira yaushoni yo kuita mukumbiro, Mundhu wovanofanera kuitira mukumbiro zve kukumbira zviro zvakarungama, tinovabesera kuti vave shamwari ja Jehovha no kuwana tondhojo povanonga vacitambujika.—Nduyo 4:2; 145:18.

13, 14. (a) Cidakajiso capi cinoshamaisa cicazova no vokuzojwa kumbejiyo? (b) I basa rapi rinoshamaisa rinozoita vokuzojwa kuitira vandhu vese?

¹³ Jehovha anozotatija maningi unyasha hwake hucikafaneri kuwana mu mugariro wo zviro ‘unozari.’ Kuitisa kudini? Mwari anozopa cidakajiso cinoshamaisa kuno 144.000, avo vanozotongano na Kristu mugore. Pauro wakasanangura Pauro wakasanangura kuti cidakajiso ici cinozova cicinyi, paakatara kudari: “Mwari, ana unyaxa hwakawanda, ngo rudo hukuru hwakatidisa ndihwona, ngari yotainga takafa mu uposi hwedu, wakatipa uhomi pamwepo na Kristu,—makaponeswa [ku] unyaxa! Wakatimusa ko vakafa pamwepo na yena, no kutigajika mugore, mwa Kristu Jesu. Atatije, kudaro, ku makore anozari, uthende hwakaxamaisa hwo unyaxa hwake, ngo ndava yo kutipfavira mwoyo, mwa Kristu Jesu.”—VaEfeso 2:4-7.

¹⁴ Zvinonesa kurangarija zviro zvinoshamaisa zvakanasirira Jehovha kuitira maKristu o kuzojwa paanozotonga na Kristu mugore. (Luka 22:28-30; VaFilipi 3:20, 21; 1 Johani 3:2) Jehovha anozotatija “uthende [hunoshamaisa] hwo unyaxa hwake” hucikafaneri kuwana kovari mu njira yakanaka maningi. Ivona vacazova “Jerusarema ipsa,” murovohwa wa Kristu. (Apokalipsi 3:12; 17:14; 21:2, 9, 10) Ivona vacazoshanda na Jesu pa “kurapa vandhu.” Vanozobesera vandhu kuti vasujunuke pa mutoro wo kushaisha no  rufu zve vacazovabesera kuti vave vakakwana.—Verenganyi Apokalipsi 22:1, 2, 17.

15, 16. Jehovha anozotatijisa kudini unyasha hwake hucikafaneri kuwana kuno ‘mabvuta amweni’ kumbejiyo?

¹⁵ VaEfeso 2:7 inonanga kuti Mwari anozotatija unyasha hucikafaneri kuwana mu mugariro wo zviro ‘unozari.’ Pa mukuvo wondhowo, vandhu vese pa nyika vanozowana kamare ‘uthende hwanoxamaisa hwo unyaxa hwake’ hucikatifaneri. (Luka 18:29, 30) Imwe yo njira huru jaanozotatija ndijona Jehovha unyasha hwake hucikatifaneri pa nyika icazova yo kumusa vandhu kubva “mu Iba.” (Jobe 14:13-15; Johani 5:28, 29) Ndiani anozomuswa? I vanarume no vanakaji vakagondeka vakafa Kristu acito afa no ‘vomabvuta amweni’ vanofa vakagondeka kuna Jehovha mu njiku jo kupejisira. Vagondeki vese ava vacazoviiswa ku upenyu kuti vaenderere mberi vacishandira Jehovha.

¹⁶ Zviuru no zviuru zvo vandhu, vakafa vacikazivi kuziva Mwari vacazomuswavo. Johani wakatara kudari: “Ndakavona vakafa: Vana vadoko no vakuru, vakaima panyasi po dendemaro. Mabhuku [kana muphukutu] akabeuhwa; sure kwabzo robeuhwazve bhuku ro uhomi. Vakafa vakatongwa, ngo kuteveja maitiro avo akatahwa mu mabhuku. Jombe rakahwirija vokufa varo. Rufu no [“Guva,” Shanduro yeNyika Itsva] bzopavo vokufa vabzo. Vese vakatongwa, ngo kuteveja maitiro avo.” (Apokalipsi 20:12, 13) Vo kumuswa vanozopuwa  mukana wo kujija ngo pamusoro pa Jehovha no kuteveja ndhungamiro jake. Vanozojija no kushandisa zviambi zvo Bhaibheri no ndhungamiriro imbza jinowanika mu muphukutu. Ndhungamiriro imbza iji jicazova njira jimweni jaanozotatija ndijona Jehovha unyasha hwake hucikafaneri kuwana.

17. Ngocapi cotinodikana kuramba ticirangarira potinoita basa redu ro ucapupu?

¹⁷ Zvinosisira maningi kupinda kare kuti ticumaire masoko akanaka o Umambo, ngokuti mugumo waaphedo kamare! (Marco 13:10) Potinocumaira tinodikana kurangarira kuti cido cedu i kukuja Jehovha. Tingazviitisa kudini? Tinodikana kubvunja vandhu kuti makomborero ese otizobusa mu nyika imbza, anozowanika basi ngo unyasha hucikafaneri kuwana hwa Jehovha.

18, 19. Tinokujisa kudini unyasha hucikafaneri kuwana hwa Jehovha?

¹⁸ Potinocumaira vandhu, tingasanangura kuti pohunozotonga Umambo hwa Kristu, vandhu vanowana makomborero ese o muripo zve vanozoita vakakwana padoko ngo padoko. Bhaibheri rinonanga kuti zvisikwa “bzinozosununguhwa ku uxoko no ku uvori, kuti bzinghwine mu rusujunuko no mu goja ro vana va Mwari.” (VaRoma 8:21) Izvi zvinozokwanisika basi ngo unyasha hucikafaneri kuwana hwa Jehovha.

¹⁹ Tino cidakajiso co kubvunja vandhu vese ngo pamusoro po cipikihwa cinodakajisa cinowanika pa Apokalipsi 21:4, 5 cokuti: “[Mwari] anozopukusa misoji yo mu meso mavo. Akucazovi no kufa nokuti mariji, kurira nokuti kuhwaja. Ngokuti bzokare bzakapinda.” Zve Jehovha, wakagara pa dendhemaro, wakati: “Ndinozoita bzese bzipsa.” Wakanangazve kudari: “Tarai kuti mazwi aya anogondeka ngokadi-kadi.” Potinocumaira masoko akanaka ku vamweni ngo kuvangisira, tinokuja kamare unyasha hucikafaneri kuwana hwa Jehovha!