1, 2. Fakakite fēfē he aposetolo ko Paulo na loto fakaaue a ia ke he fakaalofa noa he Atua?

KUA maeke he aposetolo ko Paulo ke talahau fakamooli: “Ko e fakaalofa noa he Atua kua pehenei ai au; ti nakai moua teao e au hana fakaalofa noa ia.” (Totou 1 Korinito 15:9, 10.) Iloa maali e Paulo kua nakai lata a ia ke moua he fakaalofa noa he Atua. Ko e tagata favale a ia ke he tau Kerisiano.

² He matahiku he moui ha Paulo, ne tohi e ia ki a Timoteo: “Kua fakaaue atu foki au kia Keriso Iesu ha tautolu a Iki, ko ia kua fakamalolo kia au, he manatu a ia kua fakamoli au, ti kua kotofa e ia au ke he feua nai.” (1 Timoteo 1:12-14) Ko e heigoa e feua ia? Tala age a Paulo ke he tau patu he fakapotopotoaga i Efeso: “Nakai manatu au ke he taha mena, ko e haku a moui foki nakai kuku e au, ka kia fakaoti e au haku a poitufi mo e fiafia, ko e feua ne moua e au mai he Iki ko Iesu, kia talahau fakatonu atu e au e tala mitaki he fakaalofa noa he Atua.”​—Gahua 20:24.

3. Ko e heigoa e feua pauaki ne tuku age ki a Paulo? (Kikite fakatino he kamataaga.)

 ³ Ko e heigoa e “tala mitaki” ne fakamatala e Paulo, ti fakakite fēfē he mena ia e fakaalofa noa ha Iehova? Pehē a Paulo ke he tau Kerisiano i Efeso: “Kua logona e mutolu ke he tauteaga he fakaalofa noa he Atua kua foaki mai kia au ma mutolu.” (Efeso 3:1, 2) Tala age a Iesu ki a Paulo ke fakamatala e tala mitaki ki a lautolu ne nakai ko e tau Iutaia. Maeke mogonei he tau tagata he tau motu ke fai vala he fakatufono he Kautu ne pule he Mesia. (Totou Efeso 3:5-8.) Fakamatala a Paulo mo e fakamakutu mo e fakatoka e fakafifitakiaga mitaki ma e tau Kerisiano he vahā nei. Fakakite e ia ko e fakaalofa noa he Atua ne “nakai moua teao,” po ke moumou noa ki a ia.

4, 5. Ko e ha ati talahau e tautolu kua tatai “e tala mitaki nai he kautu” mo e tala mitaki he “fakaalofa noa he Atua”?

⁴ He vahā nei he fakaotiaga, ne moua he tau tagata ha Iehova e kotofaaga ke fakamatala “e tala mitaki nai he kautu ke he lalolagi oti, ke eke mo talahau ke he tau atu motu oti.” (Mataio 24:14) Ko e tala mitaki foki he Kautu ko e “tala mitaki he fakaalofa noa he Atua.” Pihia fēfē? Ko e tau monuina oti ka moua e tautolu mai he Kautu he Atua ha ko e totonu ha Iehova. (Efeso 1:3) Fakakite e Paulo e fakaaue ke he fakaalofa noa ha Iehova he fakamatala fakamakutu. Kua muitua nakai e tautolu e fakafifitakiaga ha Paulo?​—Totou Roma 1:14-16.

⁵ He vala tala fakamua, ne fakaako e tautolu e aoga ne moua e tautolu ko e tau tagata agahala mai he fakaalofa noa ha Iehova ke he loga e puhala. Ha kua aoga lahi mahaki ki a tautolu, moua e tautolu e matagahua ke fakaako e falu ke he puhala kua fakakite e Iehova e fakaalofa haana mo e puhala kua aoga a lautolu mai he mena ia. He tau puhala fe ka lagomatai e tautolu e falu ke fakaaue ke he fakaalofa noa he Atua?

6, 7. Ka fakamaama e tautolu e lukutoto ke he tau tagata, puhala fe kua fakailoa e tautolu e tala mitaki he fakaalofa noa he Atua?

⁶ He vahā nei, tokologa e tagata ne nakai tokihala e logonaaga ka agahala, ti nakai maama e lautolu e kakano kua lata e tau tagata mo e lukutoto. He magaaho taha, tokologa e tagata ne mailoga kua nakai fakafiafia he tau puhala moui ha lautolu a lautolu. Ato tutala a lautolu mo e Tau Fakamoli a Iehova, tokologa e tagata ne nakai iloa e kakano he agahala, puhala ne lauia a tautolu, mo e mena kua lata a tautolu ke taute ke nakai fakatupa ke he agahala. Ka maama he tau tagata loto fakamooli e kakano he agahala, kua fiafia a lautolu ke iloa na fakafano mai e Iehova e Tama haana ke he lalolagi ke fakatokanoa a tautolu mai he agahala mo e mate. Taute e Iehova e mena ia ha ko e fakaalofa lahi mo e fakaalofa noa haana.​—1 Ioane 4:9, 10.

⁷ Mailoga e mena ne talahau e Paulo hagaao ke he Tama fakahele ha Iehova: “Ha ia ia foki kua moua ai e tautolu e lukutoto ke he hana toto, ko e fakamagaloaga he tau hala, ke lata mo e lahi ue atu he hana [Iehova] fakaalofa noa.” (Efeso 1:7) Ko e poa lukutoto he Keriso e fakamooliaga mua ue atu he fakaalofa he Atua ma tautolu ti fakakite  kua mua atu e fakaalofa noa Haana. Mafanatia mooli ke iloa ka fakakite e tautolu e tua ke he poa ha Iesu, to fakamagalo e tau agahala ha tautolu mo e to moua e tautolu e loto manamanatu meā! (Heperu 9:14) Ko e tala mitaki mooli anei ke tala age ke he falu!

8. Ko e ha e tau tagata agahala kua lata ke fakafeilo ke he Atua?

⁸ Ka nakai tua e tau tagata ki a Iesu to eke a lautolu mo tau fī he Atua. Ko e mena ia kua ha ha ia tautolu e matagahua ke tala age ki a lautolu ke eke mo kapitiga he Atua. Tohi he aposetolo ko Ioane: “Ha ia ia foki kua moua ai e tautolu e lukutoto ke he hana toto, ko e fakamagaloaga he tau hala, ke lata mo e lahi ue atu he hana [Iehova] fakaalofa noa.” (Ioane 3:36) Fiafia a tautolu ha kua eke e lukutoto ha Keriso ke maeke a tautolu ke kapitiga mo e Atua. Fakamaama e Paulo pehē: “Ko mutolu foki ko e tau tagata kehe a mutolu i tuai, ne fai fi a mutolu kia ia ke he tau loto ha mutolu ke he tau gahua kelea; ka ko e vaha nai kua fakafeilo tuai e ia a mutolu mo ia, Ke he hana tino tagata, ha kua matulei.”​—Kolose 1:21, 22.

9, 10. (a) Ko e heigoa e matagahua ne age e Keriso ke he tau matakainaga fakauku haana? (e) Lagomatai fēfē he ‘tau mamoe kehe’ a lautolu ne fakauku?

⁹ Kua tuku age he Keriso ke he tau matakainaga haana he lalolagi e “gahua he fakafeilo.” Tala age a Paulo ki a lautolu: “Ko e tau mena oti kana, mai he Atua ia, ko ia kua fakafeilo tuai a tautolu kia ia ia lesu Keriso, kua tuku mai foki kia mautolu e gahua he fakafeilo; Hanai, ne ha ia Keriso a Atua, kua fakafeilo e ia e lalolagi kia ia, nakai talahau ha lautolu a tau hala kia lautolu; kua tuku mai foki kia mautolu e fekafekauaga he fakafeilo. Hanai, ko e tau fekau a Keriso a mautolu nai, tuga he ole he Atua kia mutolu ia mautolu; kua hukui aki e mautolu a Keriso mo e ole atu kia mutolu kia fakafeilo a mutolu mo e Atua.”​—2 Korinito 5:18-20.

¹⁰ Ko e lilifu ma e ‘tau mamoe kehe’ ke lagomatai a lautolu ne fakauku he ha lautolu a fekafekauaga. (Ioane 10:16) Ha ko e “tau fekau,” po ke tau utafekau he Keriso kua lahi mahaki e gahua he ‘tau mamoe kehe’ he fakaako e kupu mooli ke he tau tagata ke lagomatai a lautolu ke moua e fakafetuiaga tata mo Iehova. Ko e vala aoga anei he fakamatala e tala mitaki he fakaalofa noa he Atua.

11, 12. Ko e ha ko e tala mitaki ma e tau tagata ke fakaako na maeke a lautolu ke liogi ki a Iehova?

¹¹ Tokologa e tagata ne liogi ha kua taute he mena ia a lautolu ke mitaki ka e nakai talitonu a lautolu na logona he Atua ha lautolu a tau liogi. Kua lata a lautolu ke iloa ko Iehova “ko e fanogonogo liogi.” Tohi he salamo ko Tavita: “Ko e fanogonogo liogi na e, to o atu kia koe e tau tagata oti kana. Kua  kautu kia au e tau kupu hepehepe; ko e tau holifono ha mautolu to lukutoto e koe.”​—Salamo 65:2, 3.

¹² Tala age a Iesu ke he tau tutaki haana: “Kaeke ke ole atu e mutolu ha mena ke he haku a higoa, to eke ni e au.” (Ioane 14:14) Kakano he mena nei maeke a tautolu ke liogi ke he “ha mena” ne felauaki mo e finagalo ha Iehova. Tohi e Ioane: “Ko e fakamalolo foki hanai kua moua ki mua hana, kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.” (1 Ioane 5:14) Ko e mitaki ha ia ke lagomatai e tau tagata ke iloa na lahi atu e aoga he liogi ke he logonaaga mitaki ka ko e puhala ke o atu “ke he nofoaiki [ha Iehova] he fakaalofa noa”! (Heperu 4:16) Ka fakaako e tautolu e tau tagata ke liogi he puhala hako, Atua hako, mo e tau mena kua hako, kua lagomatai e tautolu a lautolu ke eke mo tau kapitiga ha Iehova mo e moua e mafanatia ka matematekelea ai.​—Salamo 4:1; 145:18.

13, 14. (a) Ko e heigoa e lilifu mua ue atu ka moua e lautolu ne fakauku he vahā i mua? (e) Ko e heigoa e gahua mua ue atu ka taute e lautolu ne fakauku ma e tau tagata?

¹³ To fakakite foki e Iehova e fakaalofa noa haana he “hau [fakatokaaga] nakaila hohoko mai.” Pihia fēfē? To foaki he Atua ki a lautolu e 144,000 ka momoui ke he lagi mo Keriso e lilifu mua ue atu. Fakamaama e Paulo e lilifu ia he magaaho ne tohi e ia: “Ka ko e Atua ha ha i ai e fakaalofa lahi ue atu, ha ko e hana fakaalofa lahi ne fakaalofa mai ai a ia kia tautolu, Ne fakamomoui mai e ia a tautolu fakalataha mo Keriso, ka kua mamate a tautolu he tau holifono, (ko e fakaalofa noa kua fakamomoui ai a mutolu,) Ne fakatutu fakalataha mai foki e ia, mo e fakanonofo fakalataha a tautolu mo Keriso Iesu ke he tau mena ha he lagi; Kia fakakite ai e ia ke he tau hau nakaila hohoko mai e homo atu he lahi ni he hana fakaalofa noa, he totonu mai kia tautolu ha ko Keriso Iesu.”​—Efeso 2:4-7.

¹⁴ Nakai ko e mena mukamuka ke manamanatu ka pule a lautolu ne fakauku mo Iesu ke he lagi ha kua tauteute e Iehova e tau mena homo ue atu ma lautolu. (Luka 22:28-30; Filipi 3:20, 21; 1 Ioane 3:2) To “fakakite ai e ia [Iehova] e homo atu he lahi ni he hana fakaalofa noa” ki a lautolu he puhala pauaki. To eke a lautolu mo “Ierusalema fou,” ko e kitofaitane he Keriso. (Fakakiteaga 3:12; 17:14; 21:2, 9, 10) To gahua a lautolu mo Iesu ke “fakamalolo ai e tau motu.” To lagomatai e lautolu e tau tagata ke tokanoa mai he agahala mo e mate ti to lagomatai a lautolu ke mitaki katoatoa.​—Totou Fakakiteaga 22:1, 2, 17.

15, 16. Fakakite fēfē e Iehova e fakaalofa noa ki a lautolu ko e ‘tau mamoe kehe’ he vahā i mua?

¹⁵ Kua pehē e Efeso 2:7 to fakakite e Iehova e fakaalofa noa he “tau hau nakaila hohoko mai.” He magaaho ia to moua he  tau tagata oti kana “e homo atu he lahi ni he hana fakaalofa noa.” (Luka 18:29, 30) Taha he tau mena mitaki ue atu kua fakakite e Iehova ko e fakaliu tutū mai ha lautolu he tukuaga, po ko “Seoli.” (Iopu 14:13-15; Ioane 5:28, 29) Ko hai ka fakaliu tutū mai? To fakaliu tutū mai a lautolu ne mahani fakamooli ne mamate ato hoko e mate a Keriso mo lautolu he ‘tau mamoe kehe’ ne mamate fakamooli ki a Iehova he vahā he fakahikuaga. To fakaliu tutū mai oti a lautolu ne fakamooli ke matutaki ke fekafekau ki a Iehova.

¹⁶ Tokologa foki e tau tagata ne mamate ka e nakai iloa a Iehova ka fakaliu tutū mai foki. Tohi e Ioane: “Ti kitia e au a lautolu ne mamate, ko e tau lalo tagata katoa mo e tau iki, kua tutu ki mua he Atua, ti fofola ai e tau tohi; kua fofola foki e taha tohi, ko e tohi haia he moui; ti fakafili ai a lautolu kua mamate ke he tau mena kua tohi ke he tau tohi, ke lata mo e tau mahani ha lautolu. Kua ta atu he tahi a lautolu kua mamate ha i ai, kua ta atu foki he mate mo e Hate a lautolu kua mamate ha i ai; kua takitokotaha foki a lautolu mo e fakafili ke lata mo e ha lautolu a mahani.” (Fakakiteaga 20:12, 13) To moua e lautolu ka fakaliu tutū mai e magaaho ke fakaako hagaao ki a Iehova mo e talia e takitakiaga haana. Lata a lautolu ke fakaako mo e fakagahua e tau matapatu fakaakoaga he Tohi Tapu mo e tau fakatonuaga foou he “tau tohi.” Ko e taha puhala ia he fakatonuaga foou ka fakakite e Iehova e tau takitakiaga haana he fakaalofa noa.

17. Ko e heigoa ka tokaloto e tautolu ka taute e tautolu e gahua fakamatala?

¹⁷ Kua mua atu e aoga nakaila pihia fakamua ke fakamatala e tala mitaki he Kautu ha kua tata mai e fakaotiaga! (Mareko 13:10) Kua lata ke manatu e tautolu ko e foliaga ha tautolu he fakamatala ko e fakaheke a Iehova. Taute fēfē e tautolu e mena nei? Maeke a tautolu ke tala age ke he tau tagata kua maeke ni e tau monuina nei ha ko e fakaalofa noa ha Iehova.

18, 19. Fakaheke fēfē e tautolu e fakaalofa noa ha Iehova?

¹⁸ Ka fakamatala a tautolu ke he tau tagata, maeke a tautolu ke fakamaama ka pule e Kautu he Keriso to moua he tau tagata oti e monuina he lukutoto ti hokotia ke he mitaki katoatoa. Pehē e Tohi Tapu: “Ne fakamahala mo e amaamanaki, ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.” (Roma 8:21) To maeke ni e mena nei ha ko e fakaalofa noa ha Iehova.

¹⁹ To moua e tautolu e lilifu ke tala age ke he tau tagata e monuina ia Fakakiteaga 21:4, 5: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” Mo e to pehē a Iehova ne nofo he nofoaiki: “Kitiala, kua fakafou tuai e au e tau mena oti.” Pehē foki a ia: “Tohi ā; ha ko e tau kupu nai kua moli mo e fakamoli ia.” Ka fakamakutu a tautolu ke fakamatala e tala nei ke he falu kua fakaheke mooli e tautolu e fakaalofa noa ha Iehova!