1, 2. Akapeea a Paulo te akaari anga e kua āriki rekareka aia i to te Atua aroa ua?

KUA tika i te apotetoro ko Paulo kia karanga: “E taua aroa ua [no te Atua] iaku nei, kare ïa i riro ei mea puapinga kore.” (E tatau ia 1 Korinetia 15:9, 10) Kua kite meitaki a Paulo kare aia i tau kia rauka to te Atua aroa maata ua. E tangata takinokino aia i te au Kerititiano.

² Vaitata ki te openga o tona oraanga, kua tata a Paulo kia Timoteo: “Te akameitaki nei au i to tatou Atu i te Mesia ra ia Iesu, i te akamaroiroi mai iaku nei, koia i tuatua iaku i te pikikaa kore, e kua akataoonga orometua mai iaku nei.” (1 Timoteo 1:12-14) Eaa te reira angaanga orometua? Akakite a Paulo ki te aronga pakari o te putuputuanga i Ephesia e: “Kare ra au e akono ua atu i taua au mea katoa ra, kare oki au i anoano ua i taku ora, mei te mea e, e mea apinga naku uaorai, kia akaoti ra au i toku oro anga ma te rekareka, e te taoonga i rauka iaku i te Atu ra ia Iesu, kia  akakite ua atu au i te evangelia o te aroa ua o te Atua.”​—Angaanga 20:24.

3. Eaa te angaanga orometua takake tei orongaia kia Paulo? (Akara i te tutu mua.)

³ Eaa te “evangelia” ta Paulo i tutu aere, e akapeea te reira te akaari anga i to Iehova aroa ua? Akakite a Paulo ki te au Kerititiano i Ephesia e: “Kua kite oki kotou i te akaaerenga i te aroa ua o te Atua i tukuia mai kiaku nei no kotou na.” (Ephesia 3:1, 2) Kua akaue a Iesu ia Paulo kia tutu i te nuti meitaki ki te aronga kare i te ngati Iuda. I teianei kua rauka i te au tangata no te au pa enua kia riro mai ei tuanga no te kavamani Patireia tei tutaraia e te Mesia. (E tatau ia Ephesia 3:5-8.) Kua tutu maroiroi a Paulo i te nuti meitaki e kua akanoo i te akaraanga meitaki no te au Kerititiano i teia tuatau. Kua akaari aia e to te Atua aroa ua, “kare ïa i riro ei mea puapinga kore,” kare aia i kaimoumou i te reira.

4, 5. Eaa tatou i karanga ai e aiteite ua te “evangelia o te basileia nei” ki “te evangelia o te aroa ua o te Atua”?

⁴ I teia tuatau openga nei, e angaanga ta te iti tangata o Iehova kia tutu aere i te “evangelia o te basileia nei, e kako rava ake te ao katoa nei; ei kite no te pa enua ravarai.” (Mataio 24:14) Te aite ra te evangeria o te Patireia ki “te evangelia o te aroa ua o te Atua.” Akapeea ra? Pouroa te au akameitakianga mei te Patireia o te Atua, ka rauka mai no to Iehova takinga meitaki. (Ephesia 1:3) Kua akaari a Paulo i tona āriki rekareka i te aroa ua o Iehova na te tutu maroiroi anga. Te aru ra ainei tatou i to Paulo akaraanga?​—E tatau ia Roma 1:14-16.

⁵ I te atikara mua, kua apii tatou akapeea te aronga ara e puapinga ai mei to Iehova aroa ua na roto i te au mataara tukeke. No te mea e maata te au akameitakianga i rauka mai ia tatou, e apainga ta tatou kia apii i tetai ke akapeea a Iehova te akaari anga i tona aroa e akapeea ratou e puapinga ai. Eaa te au mataara ke ka tauturu tatou i te tangata kia āriki rekareka i te aroa ua o te Atua?

6, 7. Me akamārama tatou i te atinga oko ki te tangata, akapeea tatou te akakiteanga i te evangeria o te aroa ua o te Atua?

⁶ I teia tuatau, kare te maata anga o te tangata e manako tataraapa me rave ratou i te ara, no reira kare ratou e mārama i te tumu ka anoanoia ai te oko. I taua taime rai, te maata ua atura te au tangata tei kite mai e kare e mataora ana to ratou tu oraanga. Kia tuatua ake ratou ki te Au Kite o Iehova, kare te manganui i kite eaa teia mea e ara, akapeea te reira te takino anga ia tatou, e ta tatou ka rave kia matara mai mei te tuikaa ki te ara. Me mārama te aronga ngakau tae eaa te ara, ka rekareka ratou i te kite e kua tono mai a Iehova i tana Tamaiti ki te enua nei ei akarangatira ia tatou mei te ara e te mate. Kua rave a Iehova i teia no tona aroa maata e te aroa ua.​—1 Ioane 4:9, 10

⁷ Akara ana i ta Paulo i tuatua no runga i te Tamaiti akaperepere a Iehova: “Nona i raukaʼi te ora ia tatou i tona toto, i te akakore anga i te ara nei, no te maata o tona aroa ua.” (Ephesia 1:7) Ko  te atinga oko o te Mesia te akapapuanga maata rava atu i to te Atua aroa no tatou e te akaari maira mei teaa te maata i Tona aroa ua. E mea pumaana i te kite me tuku tatou i te akarongo ki roto i te atinga o Iesu, ka akakoreia mai ta tatou ara e ka rauka te akava ngakau mā! (Ebera 9:14) Ae, e nuti meitaki teia kia akakiteia atu ki te tangata ravarai!

8. Eaa ra te aronga ara i anoanoia ai kia akaongiia ki te Atua?

⁸ Me kare te tangata e akatupu i te akarongo ki roto i te atinga o Iesu, ka riro ratou ei enemi no te Atua. No reira, e apainga ta tatou i te akakite kia ratou ka rauka kia riro mai ei oa no te Atua. Kua tata a Ioane e: “Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.” (Ioane 3:36) Te mataora nei tatou i te atinga o Iesu i rauka ai kia riro ei oa no te Atua. Kua akataka a Paulo i te reira: “Ko kotou oki, ko tei taka ke i muatangana, e te ngakau enemi, i te tuatua kikino ra, kua akaongi katoaia e ia i teianei, I tona matenga i te kopapa tangata nona ra.”​—Kolosa 1:21, 22

9, 10 (a) Eaa te apainga ta Iesu i oronga ki tona au taeake akatainuia? (e) Akapeea te “mamoe ke atu” te tauturu anga i te aronga akatainuia?

⁹ Kua oronga a Iesu ki tona au taeake akatainuia i te enua nei “te taoonga akaongi.” Akakite a Paulo kia ratou: “Na te Atua ra taua au mea katoa, ra, ko tei akaongi ia tatou iaia uaorai ia Iesu Mesia nei, e kua tuku mai oki ia matou i te taoonga akaongi nei. Teia oki taua tuatua nei, ei roto te Atua i te Mesia i te akaongi anga i to teianei ao iaia uaorai, i te uri kore anga atu i ta ratou ara ia ratou; e kua tuku mai oki te tuatua akaongi ra ia matou nei. E teianei e karere matou na te Mesia, mei te mea e te ako nei te Atua i te tangata e, e akaongi kotou i te Atua.”​—2 Korinetia 5:18-20.

¹⁰ E tikaanga ngateitei to te “mamoe ke atu” kia tauturu i te aronga akatainuia kia rave i te angaanga tutu aere. (Ioane 10:16) Ei aronga apai karere na te Mesia, e tuanga maata ta te “mamoe ke atu” e rave nei i roto i te angaanga tutu aere, te apiianga i te tangata ki te tuatua mou e te tauturu ia ratou kia rauka mai tetai pirianga vaitata kia Iehova. E tuanga puapinga teia no te tutu anga i te evangeria o te aroa ua o te Atua.

11, 12 Eaa i riro ei ei nuti meitaki no te tangata e ka rauka ia ratou i te pure kia Iehova?

¹¹ E maata te tangata tei pure no te mea ka manako meitaki ratou, inara kare ratou e irinaki tikai te akarongo  maira te Atua i ta ratou pure. Ka anoanoia ratou kia kite e ko Iehova “tei akarongo i te pure.” Kua akakite te tata salamo ko Davida: “E tei akarongo i te pure ra e, ka tae te tangata ravarai kia koe na. Kua autu te tuatua kino iaku nei; kareka ta matou au ara, ka tapokiia ïa e koe ra.”​—Salamo 65:2, 3.

¹² Kua akakite a Iesu ki tana au pipi: “Ko ta kotou e pati ma toku ingoa, ka tika ïa iaku.” (Ioane 14:14) Tera te aiteanga, ka rauka ia tatou i te pure e te “pati” i tetai ua atu mea tei tau ki to Iehova anoano. Kua tata a Ioane: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioane 5:14) E mea meitaki tikai i te tauturu i te tangata kia mārama e kare te pure i riro ua ei apinga tei tauturu ia ratou kia manako meitaki mari ra e mataara ïa kia akavaitata atu ki to Iehova “terono o te aroa ua”! (Ebera 4:16) Me apii tatou i te tangata kia pure ki te Atua na roto i te mataara tau e no te au mea tau, ka tauturu tatou ia ratou kia riro mai ei oa no Iehova e kia rauka te akapumaana me rokoia ratou e te kino.​—Salamo 4:1; 145:18.

13, 14 (a) Eaa te tikaanga ngateitei te ka orongaia ki te aronga akatainuia i te tuatau ki mua? (e) Eaa te angaanga umere ta te aronga akatainuia ka rave no te tangata?

¹³ Ka akamaata atu a Iehova i tona aroa ua “i te ao a muri nei.” Akapeea? Ka oronga te Atua i tetai akameitakianga umere tikai ki te 144,000 te ka tutara kapiti ma Iesu i te rangi. Kua akamārama a Paulo eaa teia tikaanga ngateitei i te na ko anga e: “Kareka te Atua, no te aroa maata ona, e no te anoano maata tana i anoano mai ia tatou nei, Mate uaorai tatou i te ara, akaora akenei aia ia tatou ma te Mesia katoa, (i ora kotou i te aroa ua;) E kua akatu oki ia tatou ma ia katoa ki runga, e kua akanoo oki ia tatou katoa i te ao i te Mesia ra ia Iesu: Ei akakite anga nana i te au uki a muri atu i te maata ua anga o tona aroa ua, i tona takinga-meitaki anga mai ia tatou nei ia Iesu Mesia.”​—Ephesia 2:4-7.

¹⁴ E mea ngata tikai i te tamanako atu i te au mea umere ta Iehova i akapapa no te au Kerititiano akatainuia me tutara ratou e Iesu i te rangi. (Luka 22:28-30; Philipi 3:20, 21; 1 Ioane 3:2) Ka akaari a Iehova i “te maata ua anga o tona aroa ua” kia ratou na roto i tetai tu takake. Ko ratou te “Ierusalema ou,” te vaine akaipoipo a te Mesia. (Apokalupo 3:12; 17:14; 21:2, 9, 10) Ka angaanga kapiti ratou e Iesu i “te rapakau ïa i to te pa enua.” Ka tauturu ratou i te akarangatira i te tangata mei te kino o te ara e te mate e ka tauturu ia ratou kia riro mai ei aronga apa kore.​—E tatau ia Apokalupo 22:1, 2, 17

15, 16 Akapeea a Iehova me akaari i tona aroa ua ki te “mamoe ke atu” a te tuatau ki mua?

 ¹⁵ Te akakite maira a Ephesia 2:7 e ka akaari te Atua i te aroa ua “i te ao a muri nei.” I tera tuatau, ka kite te katoatoa i te enua nei “te maata ua anga o tona aroa ua.” (Luka 18:29, 30) Tetai mataara maata rava atu ka akaari mai a Iehova i tona aroa ua i te enua nei koia oki na te akatu akaou anga i te tangata mei “te vaarua.” (Iobu 14:13-15; Ioane 5:28, 29) Koai ma ka akatuia mai? Ko te au tane e te au vaine tiratiratu tei mate i mua ake i te matenga o Iesu, e te “mamoe ke atu” te ka mate tiratiratu kia Iehova i te au rā openga. Ka akatuia mai teia aronga tiratiratu kia tavini ua atu ia Iehova.

¹⁶ Mirioni ua atu tangata tei mate e kare i kite i te Atua, ka akatu katoaia ratou. Kua tata a Ioane: “E kite atura oki au i tei mate ra, ko te tangata rikiriki e te aronga mamaata, i te tu anga ki mua i te Atua, e eeuia iora nga buka ra, e eeuia iora oki tetai buka ke, koia te buka ora ra: e akavaia iora taua aronga i mate ra i te au tuatua i tataia ki roto i taua nga buka ra, i ta ratou au angaanga. E kua tuku maira te tai i te aronga i mate i roto iaia ra; e kua tuku maira te vaarua e ko ade i te aronga i mate i roto ia raua ra: e akavaia iora ratou ravarai i ta ratou au angaanga.” (Apokalupo 20:12, 13) Ka orongaia tetai tikaanga ki te aronga tei akatuia mai kia apii no runga ia Iehova e kia āriki i tana tutaraanga.  Ka anoanoia ratou kia apii e kia taangaanga i te au kaveinga Pipiria e te au ikuikuanga ou i roto i “taua nga buka ra.” Ka riro teia au ikuikuanga ou ei mataara ke no ta Iehova akaari anga i tona aroa ua.

17. Eaa ta tatou ka akamaara me rave i te angaanga tutu aere?

¹⁷ E puapinga tikai no tatou kia tutu i te nuti meitaki o te Patireia no te mea te vaitata nei te openga! (Mareko 13:10) Kia akamaara tatou e ko te akakoroanga no te tutu aere koia oki kia akapaapaa ia Iehova. Akapeea tatou me rave i teia? Ka anoanoia tatou kia akakite ki te tangata te au akameitakianga pouroa te ka rauka mai i roto i te ao ou no to Iehova takinga meitaki maata.

18, 19 Akapeea tatou me akapaapaa i to Iehova aroa ua?

¹⁸ Me tutu aere tatou ki te tangata, ka akamārama tatou e me tutara te Patireia o te Mesia, ka rauka i te tangata te au akameitakianga pouroa no te atinga oko e ka riro mai ei aronga apa kore. Te na ko ra te Pipiria: “Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua.” (Roma 8:21) Ka rauka anake teia turanga no to Iehova aroa ua.

¹⁹ E tikaanga ngateitei no tatou kia akakite ki te katoatoa te taputou manea i roto ia Apokalupo 21:4, 5: “[Na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” E te karanga ra a Iehova, tei noo ki runga i te terono e: “I na, te akariro nei au i te au mea ravarai ei mea ou.” Karanga katoa aia e: “Ka tata ana: e tuatua-mou oki teianei au tuatua e te pikikaa kore.” Me tutu maroiroi tatou i teia nuti meitaki ki tetai ke, ka akapaapaa tikai tatou i to Iehova aroa ua!