1, 2. Mpoolo balesheshe’shi e na lutumbu lukata bwa buntu sunga kalolo k’Efile Mukulu naminyi?

MPOOLO mutumiibwa baadi mulombeene kwakula n’eshimba dimune’shi: “buntu [kalolo] bw’Efile Mukulu . . . kwandji tambushaale bisumanga nya.” (Badika 1 Beena-Kodinda 15:9, 10.) Mpoolo akula kalolo’shi tabaadi mukumbeene kutambula buntu sunga kalolo kakata k’Efile Mukulu nya. Mwanda baadi abingabinga Beena Kidishitu.

² Kunfudiilo kwa muwa waye, Mpoolo bafundjile Timote’shi; “Nee na lutumbu kwi uno mumpe bukome, Kidishitu Yesu Nfumwetu: aye ngi muntundule bu a-kukulupilwa pa kungaata ku mufubo waye.” (1 Timote 1:12-14) Mmudimo kinyi ubadi mumupe? Mpoolo alungula bakulu ba kakongye ka Beena Efeso’shi; “Ntampa muuwa wande’mi nabeene muulo su ngupeela nya; kyankimbi nkobesha lwendo lande, na mufubo umpe Nfumu Yesu: wa kwikala kamonyi ka Mukandu wa buntu bw’Efile Mukulu.”​—Bikitshino 20:24.

3. Mmudimo kinyi wapabwao ubaabadi bape Mpoolo? (Tala kifwatulo ki kumbangilo.)

³ “Mmukandu wibuwa kinyi” ubabadi abalungula kwi Mpoolo, na baadi muleeshe lutumbu ku buntu sunga kalolo ka Yehowa naminyi?  Mpoolo balungwile beena Kidishitu ba mu Efeso’shi; “nwi bapwe kuuka buntu bumpe Efile Mukulu pa mwanda wenu, bwa kukumbasha kyandi mulumbule”. (Beena-Efeso 3:1, 2) Yesu batumine Mpoolo bwa kulungula mukandu wibuwa kwi bantu booso bashii beena Yuuda. Na bibekeele bibofule bwa’shi bantu ba miilo yooso bafikye mu Bufumu abukunkushibwa na Mesiya. (Badika Beena-Efeso 3:5-8.) Mpoolo baadi mulungule mukandu wibuwa na katshintshi na baadi mulekye kileshesho kibuwa bwa beena Kidishitu lelo uno. Aye nkuleesha’shi buntu sunga kalolo k’Efile Mukulu kwadi ta mbwa “bisumanga nya” sunga’shi tambukutwe kineemo.

4, 5. Bwakinyi atwakula’shi “mukandu wibuwa wa Bufumu” wi mumune na mukandu wibuwa wa “buntu bw’Efile Mukulu”?

⁴ Mu ano mafuku a ku nfudiilo, bantu ba Yehowa mbebape mudimo wa kulungula “mukandu wibuwa wa Bufumu pa nsenga yoso ishadibwe, bwa kulesha bu-kamonyi kwi maumbo oso.” (Mateo 24:14, Kilombeeno kipya 2014) Mukandu wibuwa wa Bufumu, wi mumune na “mukandu wa buntu [kalolo] bw’Efile Mukulu.” Mu mushindo kinyi? Myabi yooso yatukapete mu Bufumu bw’Efile Mukulu ayituukila ku buntu sunga kalolo ka Yehowa. (Beena-Efeso 1:3) Mpoolo baadi muleshe lutumbu ku buntu sunga kalolo ka Yehowa pa kulungula mukandu wibuwa na katshintshi. Atwe namu twi bya kwambula Mpoolo su?—Badika Beena-Looma 1:14-16.

⁵ Mu mwisambo ushale, tulongyele mushindo watudi balombeene kupeta myabi ku buntu bwa Yehowa mu bipaso bilekeenelekeene. Byabya, bu byatudi bapwe kupeta ino myabi, twi na bushito bwa kulongyesha bangi byabadya kuuka kipaso kikale Yehowa na kifulo bamone bya kupeta ino myabi. Twibalombneene kukwasha bangi bwabadya kuleesha lutumbu ku buntu sunga kalolo ka Yehowa mu kipaso kinyi?

6, 7. Nsaa yatupatulwila bantu bi nkuulo, tukwete kupalakasha mukandu wibuwa wa kalolo k’Efile Mukulu naminyi?

⁶ Lelo uno, bantu bebungi tabakwete kumona kukita milwisho bu mwanda wibubi nya, tabauku sunga nkineemo kya nkulo nya. Ingi nsaa, bantu bebungi abakumina kukita myanda yabo’bo banabeene ishayibekasha sunga na muloo. Kumpala kwa’shi Batemwe ba Yehowa babangye kwibalongyesha, bantu bebungi tababaadi abauku’shi milwisho ikwanka nya, bukitshishi bwayo kwatudi, na abitungu tukite kinyi bwa kupela kwikala bu bampika ba milwisho. Pababanga kulonga Bible, abakauku akipushisha milwisho, bantu be na mashimba alulame be na muloo wa kuuka’shi Yehowa nnaye batumine Mwan’aye pa nsenga bwa kwitufungusha ku milwisho na lufu. Yehowa bakitshine bino pa mwanda wa kifulo kyaaye kikata na kalolo kaaye.​—1 Yowano 4:9, 10.

⁷ Banda kutala ano mayi abakwile Mpoolo pabitale Mwan’a kifulo a Yehowa: “Mwadi’ye, ku mase aaye, twi bakudiibwe; mwadi’ye, milwisho yeetu ngilekibwe muyiile bupeta bwa buntu [kalolo] bwa [Yehowa].” (Beena-Efeso 1:7) Mulambu wa nkuulo wa Kidishitu nyi nkishinkamisho akileesha kifulo ky’Efile Mukulu bwetu na awituleesha bi bukata bwa kalolo kaaye. Twi na muloo ukata wa kuuka’shi su twaleesha lukumiino mu mulambu wa Yesu, abetufwila lusa ku milwisho yetu na atwikala na kondo k’eshimba katookane! (Beena-Ebelu 9:14) Uno nyi mukandu wibuwa watudi balombeene kulungula bangi!

8. Bwakinyi bantu basha milwisho be na lukalo lwa kwalusha kipwano n’Efile Mukulu?

⁸ Bantu bashii na lukumiino mu mulambu wa Yesu, Efile Mukulu ebamonaa bu beshikwanyi naye. Byabya twi na bushito bwa kwibalungula’shi  mbalombeene kufika bakuuku b’Efile Mukulu. Yowano mutumiibwa bafundile’shi: “Akumiina Mwana e na muwa wa ikalaika; apele kukumiina Mwana tapete muwa anka nsungu y’Efile Mukulu ayishala paadi.” (Yowano 3:36) Twi balombeene kwikala dingi na muloo mwanda mulambu wa Kidishitu awitupa mushindo wa kwikala bakuuku b’Efile Mukulu. Mpoolo baadi mupatuule uno mwanda bino: ‘Anwe babaadi kala bu beenyi, anwe baasha myanda ibi ibaadi ayileesha mushikwa wenu talayi binobino Efile Mukulu benupwanyisha ku lufu lwa mbidi ya Mwan’aye.’​—Beena-Kolose 1:21, 22.

9, 10. (a) Kidishitu mmupe bakwabo bediibwe mwimu bushito kinyi? (b) “Ingi mikooko” ikwete kukwatshisheena bediibwe mwimu naminyi?

⁹ Kidishitu mmupe bakwabo bediibwe mwimu be pa nsenga “mudimo wa kwalusha na bangi bantu kipwano nê.” Mpoolo bebalungwile’shi: “Byabya byoso abifiki kwi Efile Mukulu balwishe kipwano netu mwi Kidishitu, etupa mufubo wa kwalusha namu bangi bantu mu kipwano nê. Mwanda kukiila mwi Kidishitu, Efile Mukulu baadi alusha kipwano na bantu boso kushii kubadika milwisho yabo. Kunyima betupele bushito bwa kulungula wawa mwanda’shi balwiishe kipwano. Binyi byabya, [atuleesha mpala, NWT] ya Kidishitu, bi nka bu Efile Mukulu kwete kwakula kukiila mwatudi. Atwinusendeela mwishina dya Kidishitu’shi: ‘Ealusheyi kwi Efile Mukulu nupwane nê!’”​—2 Beena-Kodinda 5:18-20, EEM.

¹⁰ “Ingi mikooko” i na mwabi wa kukwasha bediibwe mwimu mu uno mudimo. (Yowano 10:16) Bu byabadi “mikyendji” sunga bantu abatwala mukandu wa Kidishitu, “ingi mikooko” ikwete kufuba ngofu mudimo wa bulungudi, abalongyesha bantu bya binyibinyi na kwibakwasha bwa’shi bekale mu kipwano kibukopo na Yehowa. Uno mudimo wa kulungula mukandu wibuwa wa kalolo k’Efile Mukulu wi na muulo ukata.

11, 12. Bwakinyi kulungula bantu’shi mbalombeene kuteka Yehowa mmukandu wibuwa?

¹¹ Bangi bantu abelaa nteko nka pa mwanda abauku’shi nteko ayibakwashaa bwa kupusha biya, kadi tabakumina’shi Efile Mukulu apushaa nteko yaabo nya. Be na lukalo lwa kushinguula’shi Yehowa ngi “apushâ nteko.” Daavide mufundi a Misambo bafundile’shi: “Bantu boso bafikye kodi obe apushâ nteko yetu! Bubi bwetu bubetukidi kipimo, ank’obe olekyêlâ myanda yatudi bakusôlele.”​—Misambo 65:2, 3, EEM.

¹² Yesu balungwile balongi baaye’shi: ‘Su nwateka kintu mwishina dyande, nekikumbasha.’ (Yowano 14:14) Bino abileesha’shi twi balombeene kuteka “kintu” kyoso ki mu kwipusheena na kikyebe ky’eshimba dya Yehowa. Yowano bafundile’shi: “Talayi lukulupilo lwatudi nalwo, su twamuteka kintu muyiile kukumiina kwaye, etuteemesha.” (1 Yowano 5:14) Twi na muloo ukata wa kukwasha bantu bwa’shi baukye’shi luteko ta kintu akikwasha bantu penda bwa’shi bapushe biya nya, anka alwibakwasha bwabadya kwifubwila peepi na “lupuna-nsulu lwa buntu [kalolo]” lwa Yehowa! (Beena-Ebelu 4:16) Nsaa yatulongyesha bantu balulame bya kuteka mu kipaso kibuwa, na bwa kuteka bintu bibuwa, atwibakwasha bwabadya kwikala bakuuku ba Yehowa na kupeta kunyingishibwa nsaa yabadi mu dikyenga.​—Misambo 4:1; 145:18.

13, 14. (a) Mmwabi kinyi ukata aukapete bediibwe mwimu mu mafuku aafiki? (b) Bediibwe mwimu abakafubu mufubo kinyi bwa bantu?

¹³ Yehowa akanyiisha kuleesha kalolo kaaye kakata “mu ndumbulwilo mupya afiki, NWT.” Mu mushindo kinyi? Efile Mukulu akapa bantu 144 000 abakamunana na Kidishitu mwiyilu mwabi ukata. Mpoolo bapatulwile abikekala  uno mwabi nsaa ibafundile’shi: “Efile Mukulu sha lusa lungi; mwanda wa kifulo kikata kibaadi mwitufule, pabaatudi bafwe mwanda wa bito byeetu, betupeele muwa pamune na Kidishitu; nku buntu [kalolo] kwanudi bapandjile, pamune naaye, mmwitusangule etutuula mwiyilu munda mwa Yesu Kidishitu, byabya ku kalolo kaadi mwituleesheshe mwi Yesu Kidishitu, akyebe nkaleesha [mu ndumbulwilo mupya afiki, NWT] bupeta bushii kupwandikishwa bwa buntu [kalolo] bwaye.”​—Beena-Efeso 2:4-7.

¹⁴ Bibukopo bwatudya kupwandikisha bintu bya kukaanya byabadi balumbulwile beena Kidishitu bediibwe mwimu kwi Yehowa pabakabanga kumunana na Kidishitu mwiyilu. (Luka 22:28-30; Beena-Fidipe 3:20, 21; 1 Yowano 3:2) Yehowa “akyebe nkaleesha . . . bupeta bushii kupwandikishwa bwa buntu [kalolo] bwaye” kwabadi mu kipaso kya kukaanya. Abakekala “Yeelusaleme mupya,” mukashi a Kidishitu. (Kibafumbwilwe 3:12; 17:14; 21:2, 9, 10) Abakafubu pamune na Yesu “bwa kubuka maumbo.” Abakakwasha bantu bwabadya kutuuka mu bupika bwa mulwisho na lufu na abakebakwasha bwabadya kwikala bapwidikye.​—Badika Kibafumbwilwe 22:1, 2, 17.

15, 16. Yehowa akaleesha kalolo kaaye kwi “ingi mikooko” naminyi?

¹⁵ Mukanda wa beena Efeso 2:7 awamba’shi Efile Mukulu akaleesha kalolo kakata “mu ndumbulwilo mupya afiki, NWT.” Mu aa mafuku, kushii mpaka muntu ooso e pa nsenga akapete “bupeta bushii kupwandikishwa bwa buntu [kalolo] bwaye.” (Luka 18:29, 30) Umune wa ku mishindo ayikaleesha Yehowa kalolo kaaye pa nsenga nyi ndusangukilo lwa bantu bafwe be “mu mashama.” (Yoobo 14:13-15; Yowano 5:28, 29) Mbantu kinyi abakasanguka? Mbantu be na lukumiino babafwile kumpala kwa lufu lwa Kidishitu na baaba be mu kisaka kya “ingi mikooko” abafu na lukumiino mwi Yehowa mu ano mafuku a ku nfudiilo. Bano bantu booso basha lukumiino abakabuuku bwabadya kutungunuka na kufubila Yehowa.

¹⁶ Midiyo ya bantu babafwile kushii kuuka Efile Mukulu, abakasanguka nabo namu. Yowano bafundile’shi:  “Naamwene bafwe, bakata na bapeela, bemane kumpala kwa lupuna-nsulu, babaabuulwile [mifungofungo]. Ungi [mufungofungo] ubaabuulwilwe: [mmufungofungo] wa muuwa. Babaasambiishe bafwe muyiile bikitshino byaabo, muyiile kibaadi kifundwe mu mikanda. Mbuu [kalunga ka meema] baalwishe bafwe baaye, lufu na kalunga-nyembo bibaalwishe bafwe baabo, ooso baasambiishwe muyiile bikitshino byaaye.” (Kibafumbwilwe 20:12, 13) Bano bantu abakasangu abakebalongyesha bwabadya kuuka Yehowa na kukumiina Bufumu bwaye. Abakalongo Bible na kutumikila mayi a kulonda e mwanka na mayi a kulonda e mu “mifungofungo.” Aa mayi a kulonda apya aakekala kingi kipaso akikaleesha Yehowa kalolo kaaye.

17. Nsaa yatulungula mukandu wibuwa nkinyi akitungu’shi tutentekyeshe?

¹⁷ Kulungula mukandu wibuwa wa Bufumu kwi na muulo ngofu bikishekishe mu ano mafuku atudi, mwanda nfudiilo tayidi peepi! (Maako 13:10) Abitungu tutentekyeshe’shi nsaa yatulungula mukandu wibuwa ngi kepatshila keetu nka kutumbisha Yehowa. Twi kukita bino naminyi? Abitungu tulungule bantu’shi myabi yooso yatukapete mu nsenga ipya atukeyipete penda pa mwanda wa buntu sunga kalolo kakata ka Yehowa.

18, 19. Atutumbisha kalolo kakata ka Yehowa naminyi?

¹⁸ Nsaa yatulungula bantu, twi kwibapatulwila’shi apakabanga kumunana Bufumu bw’Efile Mukulu pa nsenga, bantu abakapete myabi yooso ayituukila ku mulambu wa nkuulo na kwenda na kupeta mbidi ipwidikye. Bible akula’shi: “[Bipangwa] abikapoosolwa ku bupika bwa bintu abilwila, bwa kutambula bulungantu na ntumbo bya bana b’Efile Mukulu.” (Beena-Looma 8:21) Bino abikakitshika nka ku bukwashi bwa kalolo kakata ka Yehowa.

¹⁹ Twi na mwabi ukata wa kulungula bantu booso pabitale ino milayilo ibuwa i mu mukanda wa Kibafumbwilwe 21:4, 5: “[Efile Mukulu] akumuna mpolo yooso i ku meeso aabo. Lufu taalwikala kwanka dimo. Takwikala dimo sunga maalo, sunga kwidila, sunga mukumbo, mwanda bya pano bya kala bibashimina.” Na Yehowa, aye mushaale ku lupuna-nsulu akula’shi: “Talayi! Nayikasha bintu byooso bipya.” Akula dingi’shi: “Funda, myaku ino tayi mpaka, ngya binyibinyi.” Patulungula bangi bantu uno mukandu wibuwa na katshintshi, atutumbisha buntu sunga kalolo kakata ka Yehowa binyibinyi!