1. Rosai ḇeḇesebur ro fandandun ma marasrisen ya?

INFA kokenem pdef, kofandun roi ḇebor nabor ḇa. Kofandun monda roḇean, sansun, ma moḇ koḇarek ro na. Ḇape, rosai komarisen na napok fa nabro ḇa. Ma, snonkaku ḇebor sḇaḇir ḇa snar rosai simarisen na sifandun kaku na ḇa.

2. Rosai roi ḇeḇeso snonkaku sya simarisen na?

² Snonkaku ḇeḇarek ro sup ḇenana ḇa rosai simarisen na neḇesebur kuker snonkaku ḇeḇarek ro sup ḇenana sya. Ro sup ḇeḇeso, snonkaku sya simarisen monda fa sna handphone, sepeda motor, ḇaido saprop na. Ro sup ḇese, snonkaku simarisen sna sansun ḇebor ḇena ḇaḇyak ḇekaki, rum ḇeba kaku, ḇaido oto ḇepyum kaku. Ḇape, ro moḇ risai koḇarek ya ḇaido kona pipi nabor ke roḇa, na kona marasrisen syadi faro roi ḇebor kofandun ḇa na ḇaido ḇesambraḇ ḇa fa kokoḇes na.

3. Rosai ḇaḇearasai ya?

³ Rosai ḇaḇearasai ya? Ine iso kenem befandun syadi arasaiya buro fasfesepen kuker Allah I. Imbape, snonkaku oso isma  roi ifandunna, boi ḇyaḇir nane nasrow ḇa. Imarisen nya syadi kaku. Iḇasyadi snonkaku ḇenana ḇa ḇaido ḇemarisen ḇa ḇekoḇes roieḇor ḇeyek kaku na ḇaḇearasai ḇyedenemi kako. Ine nafnai fa, simewer sfakapono Karajan Allah ro kenem sena.​—Ibr. 13:5.

4. Rariso Setan nawyaye snonkaku sya kuker marasrisen faro roi komamna?

⁴ Setan imarisen insama kokyar snar na kosma marasrisen ro kankenem ya rofyor kona roiebor nabore. Inja, ḇyuko dunya ine ma marasrisen faro roi komamna insama komarisen kona roieḇor nabor syadi wer. (1 Yoh. 2:15-17; Kej. 3:6; Ams. 27:20) Ro moḇ nakam, komam ma korower iklan sfasna fa nawyaye kofa kokoḇes roieḇor ḇebabo. Fafisu oso wakoḇes roi oso snaro rosai sfasna na ro toko ma iklan na ke? Ḇarpur ya ḇaḇir snar wafandun kaku naḇa ke? Rofyor kokoḇes ker roieḇor kofandun ḇana, na kenem koḇena nesamswen. Roiebor anna na nawyaye kankenem kobena ro Yahwe I. Inja, kona oras noḇa fa kofarkor Refo, kofrur fasasos ma koso fananjur, ma koso ro ḇaḇeḇaryas. Koswarepen, manwawan Yohanes byuk swarapepen, ”Supswan ine ma roi ḇeḇor kawasa sirmomen ro ina nari napromes.”

5. Rosai na ḇeḇejadi rofyor snonkaku oso isewar ker pipi ma nana nabor syadi wer?

⁵ Setan imarisen insama koḇuk samambraḇ koḇena fa kosewar pipi ma nana nabor syadi ḇape faro Yahwe I ḇa. (Mat. 6:24) Ḇape, kosewar marasrisen mankun koḇena monda ido, kenem koḇena na nefromo. Kobe stres ḇaido kosma samswen kuker kumpan ya. Ḇeḇyeḇa syadi wer, na kakyar kobena faro Yahwe ma Karajan Ḇyedi nari napromes. (1 Tim. 6:9, 10; Why. 3:17) Yesus ikofen snar ”raryaḇ faro roi ḇese” ine imnis raris mbron kaḇrai borek na ḇefrur fa mor ya isur werba ḇaido ḇyebon ḇa.​—Mrk. 4:14, 18, 19.

6. Rosai na kofarkor ro Barukh i?

⁶ Barukh i, nabi Yeremia manfasfas ḇyedi. Rofyor imbe ”isewar roi ḇebor beba kaku” faro mankundi, Yahwe byuk swarapepen ḇe i snar kawan werḇa nari Yerusalem ḇyeḇekakok. Ḇape, Yahwe ḇyeasas nari fyaspar Barukh kankenem ḇyedi. (Yer. 45:1-5) Fandun ḇa fa Barukh ikyar syadi awer faro roi anna. Yahwe nari fyaspar arasai na ḇa. (Yer. 20:5) Fafisu ine, Setan dunya ḇyedi fyoro werḇa nari ḇyenande. Inja, kirine swaf fa kosofer roieborna ḇa. Ma, fandun ḇa fa kokyar awer snar rosai kona ḇe roi ḇemaeja kaku ro kirine, nari nasya kaker rofyor kandera ḇebaya posa kwar.​—Ams. 11:4; Mat. 24:21, 22; Luk. 12:15.

7. Rosai nari kowawos ya, ma rosai ḇefnai ya?

⁷ Inja, rariso na kofamfon fandandun koḇena ma kina koḇesi, ma koḇefnder awer rosai ḇefandun kaku syadi ro kankenem koḇena? Rariso na kobinkwan bur ḇaḇearasai ya rai? Ma, nyan ya rariso insama komnai fa koḇeḇirḇar syadi awer kuker fandandun koḇena rai? Ro Fafaya ro Urek ya, Yesus ḇyuk ananun ḇepyum kaku kuker roi annane. (Mat. 6:19-21) Mkorama kowasya ma kawos syap Matius 6:25-34. Rarirya ido, nari kokyar kaku snar fandun fa kosewar pdef Karajan Allah, ḇape arasai yaḇa.​—Luk. 12:31.

8, 9. (a) Rosai ḇefnai fandun ḇa fa koḇeḇirḇar syadi kuker fandandun koḇena? (b) Rosai Yesus ifawi kuker snonkaku ma fandandun sena?

⁸ Wasya Matius 6:25. Yesus ifawi snar manfamyan ḇyesi seḇirḇar kuker rosai nari san, sinem, ma sesansun na. Inja, ro Fafaya ro Urek ya, Yesus ikofen, ”Mkomkakwarek  awer.” Yesus imarisen insama sifawi kaku rosai ḇefnai fandun ḇa fa seḇirḇar awer kuker roi nanekam. Ifawi snar seḇirḇar mankenem faro fandandun ḇepon sena ido, na sḇefnder rosai ḇefandun kaku syadi ro kankenem sena. Snaro iswar kaku manfamyan ḇyesi, inja ro Yesus fafaya ḇyedi ḇyuk swarapepen kali ririm kuker roi ḇeḇyeḇa nari sismana.​—Mat. 6:27, 28, 31, 34.

⁹ Ḇape, rosai ḇefnai fa Yesus dor ko insama komnai koḇeḇirḇar awer kuker fandandun ḇepon koḇena? Roḇean ma sansun na kofandun na ḇake? Oroḇa, kofandun na ḇae! Ma kona pipi nabor ḇa fa kokoḇes na ido, na koḇeḇirḇar kaku. Yesus ifawi, rosai snonkaku sya sifandun na. Ikako ifawi snar ”ro ras ḇepupesna”, manfamyan ḇyesi nari sikenem ro fafisu ḇesamswen kaku. (2 Tim. 3:1) Kakuya, snonkaku ḇebor ro fafisu ine samswen ḇe si fa sna fararur ma roi sboḇna nek fafayaba. Ro sup ḇebor, kawasa ḇero dia sesabarar inja fyorno ido, sna roḇeyan fa san ḇa. Ḇape, Yesus ikako ifawi snar ”kankenem ya isyadi ro roḇean ma ḇaken ya isyadi ro famamar”.

10. Rofyor Yesus fyarkor manfamyan ḇyesi kuker nyan rariso senadi rai, ro karkara ḇyeja rosai ḇefandun kaku ro kankenem koḇena?

¹⁰ Ḇepon ya, Yesus fyarkor manfamyan ḇyesi fa sor ḇe Kma sedi ro nanki kuker rosai sfandun na. Na sḇenadi ḇo sikofen, ”Buk maro nko ro ras ine roḇean namnis maro nko.” (Mat. 6:11) Ro swaf ḇesena, Yesus fyarkor sifa sḇenadi, ”Buk maḇe inko fandun ḇeḇor ḇemnis ro ras-ras.” (Luk. 11:3) Ḇape, ine kyurfasna ḇa snar fandun fa kokara ker rariso nyan fa kofamfon fandandun koḇena rai. Imḇape, Yesus fyarkor ko fa koḇenadi insama Karajan Allah ryama, inema fyandun syadi buro koḇenadi kuker fandandun koḇena. (Mat. 6:10; Luk. 11:2) Insama manfamyan ḇyesi simnai sḇeḇirḇar, Yesus ḇyuk swarapepen ḇesi rariso Yahwe ḇyuk fandandun ro ḇraur ḇramin Ḇyenakam.

11, 12. Farkarkor rosai kun ro rariso Yahwe myamfaduru mansya? (Mam sonin ḇerandak ro artikel ine.)

¹¹ Wasya Matius 6:26. Fandun fa ’komam faro man sya ro farsyos’. Si kasun mboi, san aibon nabor, mor, mankampam, ma ansyawek. Syadiwer, mansya siba simnis snonkaku sya ido, na san nabor syadi buro snonkaku sya. Ḇape, sfandun fa skekef ma skaker ḇa. Yahwe fyasos fandandun senakam. (Mz. 147:9) Kakuya, Yahwe isu randum roḇeyan ro snonipo sena ḇa! Fandun fa sramura ma sisewar roḇean ro mankunsi. Ḇape, Yahwe fyasos nakam kwar ḇesi.

¹² Yesus ikyar kaku snar mansya monda Yahwe myamfaduru si, ibasyadiwer snonkaku koine. ^[1] (Mam fasfas ḇepupes.) (1 Ptr. 5:6, 7) Kaku ḇae, imnis mansya fandun fa komyaren. Fandun fa kofararure, raris kokaker ro mankun ko ḇaido kosewar pipi fa kokoḇes roḇean na. Yahwe nari ḇyebarakas rosai kofrurna. Ma, kona pipi ḇaido roḇean nabor ḇa ido, Yahwe nari fyasos fandandun koḇena pdef. Imnis raris, imbude snonkaku ḇesesya sḇuk rosai kofandun na. Yahwe ikako fyasos moḇ fa mansya siḇarek rona. Ḇyuk samambraḇ ḇesi ma roi fa sḇuki frur narem sena. Yahwe ikako na ifnoḇek ko fa kona moḇ ḇesrow fa kina koḇesi sḇarek rona.

13. Rosai ḇefasna kaku snar koḇemaeja syadi buro mansya?

¹³ Rofyor Yesus ḇyuk swarapepen ḇe manfamyan ḇyesi snar Yahwe fyan mansya, ramnai Yesus ifuken, ”Inja  mkofawiḇake mko kada mkosyadi bur ro man sya?” (Mam kako Lukas 12:6, 7.) Rofyor ikofen roi ine, Yesus ifawi kwar fyoro wer ḇa nari ḇyuk kankenem ḇyedi faro snonkaku sya. Kristus imarwarek mansya ḇa ḇaido aiwan ḇesesya. Imarwarek ko insama kosmai kankenem fyoro ya.​—Mat. 20:28.

14. Rosai ḇefnai fa koḇeḇirḇar awer?

¹⁴ Wasya Matius 6:27. Yesus ikofen snonkaku ḇeḇirḇar sya pok fa spam rof oser monda ro nyan kankenem sena ḇa. Rosai knam ya? Snar koḇeḇirḇar faro fandandun koḇena, na kofrur umur koḇena nakwan syadi ḇa. Ḇape, koḇe stres kaku ido, na koduf rawo komar.

15, 16. (a) Rosai kofarkor ro nyan rariso Yahwe myamfaduru lili pampen ya? (Mam sonin ḇerandak ro artikel ine.) (b) Fakfuken rosai fandun fa kowasen na, ma rosai ḇefnai ya?

¹⁵ Wasya Matius 6:28-30. Komarisen kosun sansun ḇepyum kaku, rofyor koḇaryas, koso fananjur ḇaido kebaktian. Ḇape, fandun fa koḇebirbar kuker roi kosansun na ke? Yesus ḇyuk swarapepen wer ḇe manfamyan ḇyesi rariso Yahwe fyasos fandandun ro ḇraur ḇramin Ḇyesikam. Yesus ḇyuk contoh kuker ”mampyoper [lili] pampen ro maper”. Yesus imbude ikofen  kuker pampem ḇemnis lili pampen. Pampen nakam fandun ḇa fa sisip sansun ḇe mankunsi. Ḇape, sipduk kaku. Yesus ikofen snar ”Salomo kuker payamyum ḇyena kako, ḇape daksansuni kuker sansun ḇepyum imnis pampen sya osoḇa”!

¹⁶ Kwara rosai Yesus ikofen wer, ”Inja raris Allah fyamankor aḇris ro maper . . . , inja Allah ipokḇake fa fyamankor mko syadi wer, ne, mko snonkaku ḇekyar mnis ḇa?” Kaku ḇae! Ḇape Yesus manfamyan ḇyesi sfandun kakyar nabor syadiwer. (Mat. 8:26; 14:31; 16:8; 17:20) Fandun fa sikyar snar Yahwe imarisen ma nari ḇyuk rosai sfandun na. Rariso kuker ko rai? Na kokyar snar Yahwe nari ḇyuk rosai kofandun na ke?

17. Rosai na ḇefrur fa fasfesepen koḇena kuker Yahwe namuk?

¹⁷ Wasya Matius 6:31, 32. Snonkaku ḇebor smambir Yahwe I ḇa sya sisewar monda pipi ya ma siryur roiebor nabor. Komnis kuker si ido, fesepen koḇena kuker Yahwe I nari namuk. Kofawi snar Yahwe iso Kma ḇeswar kaku ko. Ma, kokyar kaku snar rofyor kofrur marisen ḇyena ma kofakapon Karajan Ḇyedi, nari Ḇyuk roi kofandun nakam ma na Ḇyuk nabor  syadiwer. Ko kako koḇaḇir snar marasrisen ḇekakuya iso snaro kona fasfesepen ḇefanam kaku kuker Yahwe I. Rarirya ido ”rofyor roḇean ma sansun naisya, namnis kwar”.​—1 Tim. 6:6-8.

18. Rosai monda Yahwe Ifawi kuker ko oser-oser, ma rosai nari Ifrurna?

¹⁸ Wasya Matius 6:33. Kosewar ḇepon Karajan Allah ido, Yahwe nari fyasos fandandun koḇenakam. Yesus fyasnabos rosai ḇefnai fa na kokyar kaku faro asas ani. Ikofen, ”Kma mkoḇedi ro boiyaswa Ifawi, mḇoi mkoḇe fandun nakam.” Yahwe ifawi fandandun bena, ibasyadi rofyor wafawi ḇaim na. (Flp. 4:19) Ifawi ras risai sansun koḇena na napyum ḇa kwar. Ifawi roḇean minsai wafandun na. Ma, Ifawi snar au ma kina bedi mkofandun moḇ fa mkobarek. Yahwe nari ḇyuk kakakyar ḇe au snar na nwa rosai wafandun kaku na.

19. Rosai ḇefnai fandun ḇa fa koḇeḇirbar kuker fafisu naiwama?

¹⁹ Wasya Matius 6:34. Yesus ikofen wer ḇe manfamyan ḇyesi, ”Inja mkomkakwarek awer.” Yahwe nari fyasos fandandun koḇena ras ḇe ras. Inja, pok fa koḇirḇar awer kuker fafisu naiwama. Koḇebirḇar mankenem ker ido, na kokyar faro samambraḇ mankun koḇena, ḇarpurya nari ḇaḇebati kobena kuker Yahwe I namuk. Fandun fa kokyar kaku faro I.​—Ams. 3:5, 6; Flp. 4:6, 7.

20. (a) Fararur rosai wakinfir fa wafrurna faro fandandun Karajan? (b) Rosai na wafrurna insama kankenem Bedi ipyan?

²⁰ Faḇye kaku rofyor kobuk samambraḇ koḇena fa koryur arasai inja kofarmyan ḇe Yahwe I kuker sne ḇesiper ḇa! Kakuya fandun fa kobuk roi ḇepyum kaku faro Yahwe I. Imnis raris, na wamarisen ke rwama ḇe sidang ḇefandun syadi manbaryas ḇebor? Wamarisen ḇe perintis ke? Ḇaido, ḇeperintis kwar ido, na wawasen fa waso Sekolah bagi Penginjil Kerajaan ke? Na wabuk ras ḇeḇeso ro minggu oser fa wafnoḇek fararur ro Betel ḇaido kantor penerjemahan ke? Ḇaido, na ḇesukarelawan ro fararur Rancang/Bangun Setempat ma ḇuk oras bena fa waso ro fararur ḇaḇawes Balai Karajan. Kwara rosai monda na wafrur kankenem bedi ipyan insama nwa oras ma samambraḇ bena nabor syadi faro fararur Karajan. Mam anun ḇero kotak ” Nyan Fa Wafrur Kankenem Bedi Ipyan”. Ḇenadi wor farfnoḇek ro Yahwe I fa wafrur snemuk bedi. Ramnai, wafrur fararwe wafandun na.

21. Rosai nari ḇefrur fa wafanam syadi kuker Yahwe I?

²¹ Yesus fyarkor kofa kosewar ḇepon Karajan ya. Rarirya ido, nari koḇeḇirḇar syadiwer kuker fandandun koḇena ḇa. Na kofanam syadi kuker Yahwe I snaro kokyar nari myamfaduru ko. Kosambraḇ fa kokoḇesna rariryano, kofarkor fa kofarmku mankun ko ma kokoḇes rosai komarisen kam na ḇa ḇaido dunya ine fyasnai na. Kirine kofrur kankenem kobena napyan ido, nari kosoasuser pdef ḇe Yahwe I ma nari ’kosma kankenem ḇekakuya’ Allah ḇyeasas kwarna.​—1 Tim. 6:19.