1. ¿Jamüsü naataka sukuwaʼipa tü choʼujaakat wamüin suulia tü keeʼireekat waaʼin?

NAATA sümüin tü choʼujaakat wamüin suulia tü keeʼireekat waaʼin. Nnojotsü wainmain tü choʼujaakat wamüin süpüla anainjanain waya, shiajaʼa neʼe choʼujaaka wamüin weküin, washeʼin otta wepia. Aluʼusaʼa tü kasa keeʼireekat waaʼin, eesü wainmale maʼin shia. Eeshii na nnojoliikana ayaawatüin saaʼu sünain nnojoluin choʼujaain namüin süpüshuaʼa tü kasa keeʼireekat naaʼin.

2. ¿Kasa tü keeʼireekat saaʼin wayuu?

² Naata sümüin tü keeʼireekat naaʼin na wayuu kepiakana eere alin maʼin shiiʼiree nneerü sümaa tü keeʼireekat naaʼin na kepiakana eere jouluin tü nneetkat. Eesü mma eere keeʼireein saaʼin wayuu kamaʼanaa wanee serulaat, wanee mooto jee wanee nuumainchon. Suluʼu waneeirua mma, shia kachiiruaka saaʼin wayuu wainmainjatüin süsheʼin kojutüsü, müleʼuin shipia otta shiyaʼlajüinjatüin wanee kemion kojutüsü. Jaʼitaichi jalain kepiain wanee wayuu otta jeʼrain nneerü nümaʼana, eesü süpüla sukumajaain suluʼu naaʼin kamaʼanaa wainma korolo nnojotka choʼujaain nümüin jee nnojotka süpüla niyaʼlajüin.

3. ¿Jarat tü nukuwaʼipakat chi wayuu eekai kachiiruain naaʼin kamaʼanaa wainma korolo?

³ Chi wayuu kachiiruakai aaʼin kamaʼanaa wainma korolo, kojutüleesia tia nümüin suulialeʼeya nukuwaʼipa nümaa Jeʼwaa. Akaʼaya nia, nnojoishi talatüin sümaa tü kasa choʼujaakat nümüin süka keeʼireein naaʼin sooʼomüin. Eesü süpüla sukumajaain suluʼu saaʼin wayuu süpüshuaʼa keeʼireein saaʼin kamaʼanaa wainma korolo, jaʼitairü manneetsein süpüla ayaʼlajaa kasa kojutüsü. Kachiiruale waaʼin kamaʼanaa wainma korolo, nnojoleerü palajanain watuma Nuluwataaya Maleiwa (Heb. 13:5).

4. ¿Kasa naaʼinraka Satanaa süka suchuntawalin waaʼin tü weirakaakalü amüin?

⁴ Nunoujireein waya Satanaa sünain choʼujaain maʼin wamüin kamaʼanaa wainma kasa süpüla talatüinjanain waya. Süka suchuntawalin waaʼin tü weirakaakalü amüin, nüchajaain sukuwaʼipa Satanaa süpüla keeʼireeinjatüin waaʼin kamaʼanaa wainma korolo (1 Juan 2:15-17; Gén. 3:6; Prov. 27:20). Waapawalin otta weʼrajaʼawalin waneepia suluʼu telewisoot anain wayaʼlajüle jeketü shiiʼiraka tü kasairua eekat wamaʼana. ¿Eeirü piyaʼlajüin wanee kasa sutuma anachoin shia piʼrüin eere suikkaanüin jee shiale sutuma anain shiyolojo sünain tü shiyaakuakat? Eesüjaʼa wayaʼlajüirüle wanee kasa eekai müin aka tia, shiasaʼa mapa, weʼrüin nnojoluin choʼujaain shia wamüin. Macheʼere waya sünain ayaʼlajaa kasa nnojotka choʼujaain wamüin, naateerü neʼe tü jülüjakat waaʼin. Eesüjaʼa süpüla nnojoluin jülüjain maʼin waaʼin tü waʼyataainkat nümüin Jeʼwaa. Jee nnojoleerü wekirajaain maʼin anain tü Wiwüliakat, nnojoleerü wekirajaain anain tü pütchi süpülajatkat tü outkajawaakat, nnojoleena waya oʼunüin waneepia sünain tü outkajawaakat jee sünain aküjaa pütchi. Soteesü waaʼin tü nümakat Juan: «Tü nakuaippakat na manoujainsaliikana sümaa tü kasa mojusü keeʼireekat naaʼin, yüüʼülaa meerü soʼuweena wane kaʼi».

5. ¿Kaseerü alataka nümüin chi eekai kachiiruain maʼin naaʼin kamaʼanaa wainma korolo?

⁵ Keeʼireesü naaʼin Satanaa mapüsainjanain waya sünain aʼyatawaa süchiirua kamaʼanaa wainma nneerü otta korolo. Niyouktüin süpüleerua waʼyataainjanain nümüin Jeʼwaa (Mat. 6:24). Nnojoleenapejeʼe talatüin waya shiale neʼe kachiiruain waaʼin wainmainjatüin kasa wamaʼana. Kachiiruale waaʼin kamaʼanaa wainma kasa, eesü süpüla shapaain waaʼin sutuma jee wainmain wojuyaala. Eesü süpüla sümalajaain wanoula nünain Jeʼwaa otta nnojoleerü weʼitaain waaʼin sünain tü Nuluwataayakat (1 Tim. 6:9, 10; Alat. Map. 3:17). Naashin Jesuu, kachiiruale waaʼin washirüü, müsü aka saaʼin wanee mojuui keipüsesü nnojotka miyoʼuin atuma wanee apünajuushi sümaa nnojoluin kachoin sutuma (Mar. 4:14, 18, 19).

6. ¿Kasa shikirajaka anain waya tü alatakat nümüin Baruc?

⁶ Jülüja waaʼin tü alatakat nümüin Baruc, chi ashajüikai niʼipajee Jeremías. Wanaa sümaa suchuntaain naaʼin Baruc «kamaʼanaa wainma korolo», nüsoʼirirüin naaʼin Jeʼwaa sünain pejechoin sükalia süpüla sajaʼlajeʼennüin Jerusalén. Nüküjapejeʼe Jeʼwaa nümüin nuʼtteʼerüinjachin nia (Jer. 45:1-5, TNM). Shia neʼe naʼatapajüinjatka tia Baruc. Nnojotsü naaʼinmajüin Jeʼwaa tü kasa eejatkat sümaʼana wayuu soʼu tia suulia sajaʼlajeʼennüin (Jer. 20:5). ¿Kasa shikirajaka anain waya tü alatakat nümüin Baruc? Maaʼulu yaa, pejechonsü maʼin sükalia süpüla sajaʼlajeʼennüin tü kasa nuluwataakalü aaʼu Satanaa. Nnojotsüjeseʼe anain jülüjakuʼu müle waaʼin kamaʼanaa wainma korolo. Nnojoleerü kasain apütaain wamaʼana süchikijee tü müliaa miyoʼusükat, jaʼitairü kojutüin maʼin wamüin tia kasakalüirua (Prov. 11:4; Mat. 24:21, 22; Luc. 12:15).

7. ¿Kasa wekirajaainjatka anain jooluʼu? ¿Jamüshii wekirajaainjanaka sünain tia pütchikat?

⁷ ¿Kasa paaʼinrajatka süpüla jülüjain paaʼin pukuwaʼipa, sukuwaʼipa püpüshi sümaa jülüjain paaʼin tü pukuwaʼipakat nümaa Jeʼwaa? ¿Kasa paaʼinrajatka suulia kachiiruain paaʼin kamaʼanaa wainma kasa? ¿Kasa akaaliinjeechika pia suulia shapaain maʼin paaʼin saaʼu tü kasa choʼujaakat pümüin? Wanaa sümaa chajachinkain Jesuu ekirajüin saaʼu wanee uuchi, nüküjüin tü waaʼinrajatkat (Mat. 6:19-21). Waashajeʼerüinjatü jooluʼu tü sümakat  Mateo 6:25-32, 34 otta Mateo 6:33, TNM, wekirajaajeerü anain tia pütchikat. Wayaawateerü aaʼu sutuma tia pütchikat shiainjatüin kachiiruain waaʼin Nuluwataaya Maleiwa suulialeʼeya kamaʼanaa wainma korolo (Luc. 12:31, TNM).

8, 9. (1) ¿Jamüsü nnojotka anain shapaale waaʼin waneepia saaʼu tü kasa choʼujaakat wamüin? (2) ¿Kasa nütüjaaka aaʼu Jesuu?

⁸ (Paashajeʼera Mateo 6:25). Nütüjaa aaʼu Jesuu shapaain naaʼin na nikirajüinkana saaʼu tü neküinjatkat otta tü nasheʼinjatkat. Müshi nia namüin: «Nnojo jüshapataain aaʼin». Tü nüküjeekat Jesuu namüin na nikirajüinkana shia nnojoluinjatüin shapaain naaʼin saaʼu tia kasakalüirua, mayaapejeʼe choʼujaain shia namüin. Shapaale naaʼin waneepia saaʼu tia, eesü süpüla motuin naaʼin tü nakuwaʼipakat nümaa Jeʼwaa. Süka jülüjashaatain naaʼin Jesuu na nikirajüinkana, pienchitua nüküjüin namüin soʼuleʼeya kaʼikat tia jamüin mojuka shapaale naaʼin waneepia (Mat. 6:27, 28, 31, 34).

⁹ ¿Jamüsüche nnojoluinjatka shapaain waaʼin saaʼu tü weküinjatkat jee tü washeʼinjatkat naashin Jesuu? ¿Nnojottaale choʼujaain wamüin? Nnojotsü shiain tia. Shapawaisü saaʼin wayuu süpüshuaʼa manneetsere shia süpüla ayaʼlajaa süsheʼin otta shiküin. Nütüjaa aaʼulu tia Jesuu otta nütüjaa aaʼulu kasain choʼujaain sümüin wayuu. Otta müsia nütüjaatüjülia aaʼu Jesuu kapüleeinjatüin wamüin ousütaa sünain tü kasa choʼujaakat wamüin maaʼutpünaa yaa (2 Tim. 3:1). Maaʼulu yaa, aisü maʼin shiiʼiree aʼyatawaa otta oʼotoosü maʼin sülia tü kasakalüirua. Eeshii wayuu eekai müliain sutuma maʼletsein naya otta eeshii meküinre naya. Nütüjaapejeʼe aaʼu Jesuu shiain kojutüleein maʼin katüle noʼu wayuu suulialeʼeya tü eküütkat jee tü kuluutkat.

10. ¿Kasa wayuu kojutüleeinjatka wamüin naashin Jesuu?

¹⁰ Niʼiküin Jesuu na nikirajüinkana sünain achuntaa nümüin Maleiwa tü kasa choʼujaakat namüin. Müinjatü nanüiki naashin Jesuu: «Anakaja müleka paapawaire wamüin weküin süpüla waneʼewai kaʼi» (Mat. 6:11). Müshi nia namüinya soʼu wanee kaʼi: «Paapa maa wamüin tü weküin choʼujaakat süpüla waneʼewai kaʼi» (Luc. 11:3, TNM). Nnojotpejeʼe jülüjakuʼu müinjatüin waaʼin waneepia tü waaʼinrajatkat süpüla wousütüin sünain tü kasairua choʼujaakat wamüin. Nüküjüin Jesuu namüin na nikirajüinkana shiain nachuntajatüin maʼin süntüin Nuluwataaya Maleiwa suulialeʼeya achuntaa tü kasairua choʼujaakat namüin (Mat. 6:10, TNM; Luc. 11:2, TNM). Nüsoʼirirüin Jesuu naaʼin na nikirajüinkana sünain jülüjain naaʼin Jeʼwaa süpüshuaʼa tü kasa nukumajakat, nüküjüin Jesuu tia namüin süpüla nnojoluin shapaain maʼin naaʼin.

11, 12. ¿Kasa shikirajaka anain waya naaʼinmajüin Jeʼwaa tü wüchiikalüirua? (Piirakaa sümüin tü ayaakuaa suluʼukat süpana 9).

¹¹ (Paashajeʼera Mateo 6:26). Jülüja waaʼin «sukuaippa tü wuchiikalüirua». Wainma shiküin mayaapejeʼe joʼuuchoin shiairua. Jamüsüjaʼa wanaawale sajaʼapüin wanee wüchii nümaa wanee wayuu, wainmaleejeeria maʼin shiküin nuulia. Tü wüchiikalüirua, eküsü süchon wunuʼu, süʼü wunuʼu, sheʼe mma otta jokoma. Nnojotsü apünajüin shiaʼaya süka naapüin Jeʼwaa tü choʼujaakat sümüin (Sal. 147:9). Nnojotpejeʼe nikajirüin Jeʼwaa tü wüchiikalüirua, süchajaainjatü shiküin sümüiwaʼa. Eesü tü neküinjatkat süpaʼapünaa mmakat.

¹² Nütüja aaʼu Jesuu jülüjain naaʼin Jeʼwaa tü wayuukalüirua maʼaka jülüjain naaʼin tü wüchiikalüirua (1 Ped. 5:6, 7). Tütüinjanapejeʼe waya maʼaka saaʼin tü wüchiikalüirua. Apünajüinjana waya süpüla weküin süchon waʼttia otta aʼyataainjana waya süpüleerua weküin. Nükaaliinjeena waya Jeʼwaa waaʼinrüle tia. Paliʼirüle tü wanneetsekat jee shiale tü weküinkat, naapeerü Jeʼwaa wamüin tü choʼujaakat wamüin. Eesü süpüla naaʼinrüin tia nükajee chi eekai nikiraain wamaa tü niküinkat. Wanee kasa naapaka Jeʼwaa sümüin tü wüchiikalüirua shia tü shipiakat. Nukumajatüjülia Jeʼwaa tü wüchiikalüirua süpüla sütüjüinjatüin akumajaa shipia otta nukumajüin Jeʼwaa tü kasairua sukumajüinjatkalü aka shipia. Müsia  neʼe wakuwaʼipa nutuma Jeʼwaa, nükaaliinjain waya süpüla wousütüin sünain eeinjanale kepiain waya sümaa wapüshi.

13. ¿Jamüsü watüjaaka saaʼu wayain kojutüleein suulialeʼeya wüchii?

¹³ Suluʼu Mateo 6:26, nüküjüin Jesuu namüin na nikirajüinkana niain Jeʼwaa aapüin shiküin tü wüchiikalüirua sümüin. Süchikijee, nüküjaka namüin nayain alanaʼaleein ojut nutuma Maleiwa suulialeʼeya wüchii (anasü paashajeʼerüle Lucas 12:6, 7). Wanaa sümaa nüküjüin Jesuu tia namüin, eesüjaʼa jülüjale naaʼin nülüʼülüin süpüla naapajiraain nikii saaʼu wayuu süpüshuaʼa. Nnojoishi aapajiraain nikii Jesuu saaʼu wüchii jee saaʼu mürüt, aapajiraashi nikii waaʼu wayakana süpüla katüinjatüin woʼu waneepia (Mat. 20:28). Shiiʼiyatüin tia sünain kojutüleein maʼin waya suulia wüchii, ¿aashimüin?

14. ¿Kasa eeka süpüla sülatüin nümüin wanee wayuu shapaakuʼu müle naaʼin waneepia?

¹⁴ (Paashajeʼera Mateo 6:27). Naashin Jesuu, shapaakuʼu sümüle naaʼin wanee wayuu saaʼu tü choʼujaakat nümüin, nnojoleerü kasain saapüin nümüin süpüla epijawaa. Nnojoleechi kamaʼain wanee wayuu sutuma shapaain naaʼin waneepia, eeshi süpüla ayuulin jee ouktüin nia sutuma tia, maluʼulu nünüiki Jesuu.

15, 16. (1) ¿Kasa watüjaka sünainjee sukuwaʼipa süsii tü wüitshiikat nutuma Jeʼwaa? (Piirakaa sümüin tü ayaakuaa suluʼukat süpana 9). (2) ¿Kasa wasakireʼerüinjatka anain waaʼin? ¿Jamüsü wasakireʼerüinjatka waaʼin tia?

¹⁵ (Paashajeʼera Mateo 6:28-30). Keejiasü wamüin wayakana wapüshuaʼa anain maʼin washeʼin  süpüla aküjaa pütchi, süpüla oʼunaa sünain tü outkajawaakat jee tü outkajawaakat miyoʼu. ¿Anasüche shapaale maʼin waaʼin saaʼu tü washeʼinjatkat? Nüküjüin Jesuu süchikuaʼa namüin na nikirajüinkana jülüjain naaʼin Jeʼwaa süpüshuaʼa tü nukumalakat. Nüküjüin namüin süchiki «tü süsiikat tü wüitshiikat». Eesüjaʼa shiale naashajaain achiki süsii tü kanüliakat gladiola, jacinto otta tulipan. Nnojotsü choʼujaain saainjain süsheʼin tia süsiikat wüitshii. Anapejeʼe maʼin sünoʼu, «alanaʼaleesia maʼi sünain anachonin shiyolojo suulialeʼeya sünoʼu nüsheʼin Salomón».

¹⁶ Süchikijee nüküjüin Jesuu süchiki tü naainjakat Maleiwa süpüla naaʼinmajüin tü süsiikat wüitshii, müshi nia namüin na nikirajüinkana: «¿Jamüsü nnojotkaʼa jünoujain sünain jaaʼinmajünüin nütüma Maleiwa?». Nüküjüin namüin naapeerüin Maleiwa tü nasheʼinjatkat. Choʼujaapejeʼe nakooʼomüinrüin nanoula na nikirajüinkana Jesuu (Mat. 8:26; 14:31; 16:8; 17:20). Nanoujainjatü anain naaʼinmajeenain naya Jeʼwaa süka keeʼireein naaʼin tia. Jülüjeesü waaʼin tia sümaa wasakireʼerüin waaʼin tüü: «¿Shiimainchejeʼe tanoujain sünain naaʼinmajeechin taya Jeʼwaa?».

17. ¿Kasa eeka süpüla sumojujaain atuma tü wakuwaʼipakat nümaa Jeʼwaa?

¹⁷ (Paashajeʼera Mateo 6:31, 32). Wainma wayuu kachiiruaka aaʼin nakanajüin wainma nneerü otta kamaʼanaa wainma korolo, naaʼinrüin tia süka nnojolin neʼraajüin chi Maleiwakai. Washatüle nakuwaʼipa, eesü süpüla sumojujaain wakuwaʼipa nümaa Jeʼwaa. Nia Jeʼwaa Washikai otta aishii waya nüpüla. Woonoole nümaa otta palajanale  watuma Nuluwataaya, watüjaa aaʼu wainmeerüin kasa naapaka wamüin. Shia neʼe talateetka atuma waaʼin aleewale waya nümaa Jeʼwaa. Aleewale waya nümaa, talateena waya sutuma eein wamaʼana tü kuluulu waʼatüinjatkat wanain otta eere wamaʼana weküin (1 Tim. 6:6-8).

18. ¿Kasa nütüjaaka aaʼu Jeʼwaa? ¿Kasa naapeetka wamüin?

¹⁸ (Paashajeʼera Mateo 6:33, TNM). Palajanale watuma Nuluwataaya Maleiwa, naapeerü Jeʼwaa wamüin süpüshuaʼa tü kasa choʼujaakat wamüin. ¿Jamüsü watüjaaka saaʼu shiimain tia? Müshi Jesuu: «Soto jaaʼin sünain nütüjaain saaʼu chi Jüshikai Maleiwa tü cheʼojaakat jümüin» (Mat. 6:32). Nütüjaatüjülia aaʼu Jeʼwaa wapülapünaa tü kasa choʼujaakat wamüin (Filip. 4:19). Nütüjaa aaʼu Jeʼwaa jaralüin tü washeʼin otta weküin choʼujaakat wamüin otta nütüjaa aaʼu choʼujaain wanee wepia. Naapeerü wamüin Jeʼwaa tü eekai shiimain choʼujaain wamüin.

19. ¿Jamüsü nnojotka anain shapaale waaʼin saaʼu tü choʼujaweetkat wamüin soʼu wanee kaʼi?

¹⁹ (Paashajeʼera Mateo 6:34). «Nnojo jüshapajaain aaʼin», müshi Jesuu nüchikuaʼa namüin na nikirajüinkana. Naapeerü wamüin Jeʼwaa tü choʼujaakat süpüla waneʼewai kaʼi. Makalaka nnojoluinjatüin shapaain waaʼin waneepia saaʼu tü choʼujaweetkat wamüin. Shapaale waaʼin waneepia, nnojoleerü weʼitaain waaʼin nünain Jeʼwaa, weʼitaajeerü neʼe waaʼin wanainjiraa. Amojujaajeerü wakuwaʼipa nümaa Jeʼwaa suluʼujee tia. Müsüjeseʼe anain weʼitaale süpüshuaʼa waaʼin nünain Jeʼwaa (Prov. 3:5, 6; Filip. 4:6, 7).

20. (1) ¿Kasa piʼitaainjatka püpüleerua süpüla püsaʼwatüin sünain aʼyatawaa nümüin Jeʼwaa? (2) ¿Kasa paaʼinrüinjatka süpüla süpütaain kaʼi süpüla piʼyataain nümüin Jeʼwaa?

²⁰ Mojushaatasü maʼin nnojoire piʼyataain nümüin Jeʼwaa süka süpüshuaʼa paaʼin saaliijee kachiiruain paaʼin kamaʼanaa wainma korolo. Anasü weʼitaale wapüleerua tü wasaʼwateekalü amüin sünain tü waʼyataainkat nümüin Jeʼwaa. Eeshii süpüla walataain suluʼumüin wanee outkajaalee eere choʼujaain aküjülii pütchi, eeshii süpüla pürekutsoolüin waya, pürekutsoorüle waya, eeshii süpüla woʼunüin sünain tü Ekirajawaa napülajatkat na Aküjüliikana pütchi nüchiki Jeʼwaa. Eeshii süpüla waʼyataain suluʼu Weteet waneeirua kaʼi süpüla semaanaka jee shiale eere sülatinnüin pütchi. Eeshii süpüla wakaaliinjain sünain adibujaajaa jee akumajaa Piichi Outkajaalee. Jülüja waaʼin wanoukteʼerüinjatüin wakuwaʼipa süpüla süpütaain kaʼi süpüla waʼyataain nümüin Jeʼwaa. Sünain tü pütchikat « ¿Choʼujaasüche pümüin wainmain kasa pümaʼana?», aküjünüsü waneeirua kasa eeka süpüla waaʼinrüin. Wachunta kaaliinwaa nümüin Jeʼwaa otta wanoukteʼera wakuwaʼipa.

21. ¿Kasa akaaliinjeenaka waya süpüla warütkaain maʼin nünainmüin Jeʼwaa?

²¹ Palajanainjatü watuma Nuluwataaya Maleiwa naashin Jesuu suulialeʼeya wanee kasa. Waaʼinrüle tia, nnojoleerü shapaain waaʼin saaʼu tü choʼujaakat wamüin otta weʼitaajeerü maʼin waaʼin sünain naaʼinmajeenain waya Jeʼwaa. Jee wachechereerü waaʼin suulia wayaʼlajüin tü kasairua keeʼireekat neʼe waaʼin jee shiale tü kasa sümaʼaneekat wayuu süpüshuaʼa, jaʼitairü eein tü süliakat wamaʼana. Müle wakuwaʼipa mayaa, sükaaliinjeena waya süpüla warütkaain nünainmüin Jeʼwaa. Nnojorüle kachiiruain waaʼin kamaʼanaa wainma korolo, waneepieena waya nümaa Jeʼwaa otta kateerü woʼu waneepia nutuma (1 Tim. 6:19, TNM).