Naalagaaffik noqqaassutigiuk, pigisat pinnagit
“[Guutip] Naalagaaffia noqqaassutiginiarsiuk, taava tamakku ilanngullugit ilissinnut tunniunneqarumaarput.” – LUK 12:31.
1. Pisariaqartitavut kissaatigisavullu qanoq assigiinngissuteqarpat?
INUUINNARSINNAAJUMALLUTA ikittuinnaat, soorlu nerisassat, atisat angerlarsimaffillu, pisariaqartippavut. Kissaatigisavulli amerlaqaat. Inuppassuit nassuerutigerusunneq ajorpaat pilerigisatik tamaasa inuuinnarsinnaanissamut pisariaqavinngitsut.
2. Inuit suut pilerigisarpaat?
2 Inuit nunani piitsoqarfiusuniittut inunnit nunani pigissaarfiunerusuniittunit allaanerulluinnartunik kissaateqarsinnaasarput. Nunat ilaanni mobili, motorcykeli nunaminertarluunniit pigineqarusuttarput. Nunanili allani atisat akisuut, illorujussuaq biilillu akisoorsuit inuit pigerusuttarpaat. Sumiluunniilli najugaqaraluarutta qassinilluunniit aningaasaateqaraluarutta pisariaqartinngisatsinnik akissaqartinngisatsinnillu suli amerlanerusunik pigisaqarusulersinnaavugut.
PIGISALERITUNEQ MIANERSUUTIGIUK
3. Pigisalerituneq qanoq isumaqarpa?
3 Pigisalerituneq qanoq isumaqarpa? Tassaavoq pigisanik Guutiminngarnit pingaarnerutitsinermik isiginnittaaseqarneq. Pigisaleritooq pisariaqartitaannani naammaginagit suli amerlanerusunik pigisaqarusuttuaannartarpoq. Allaat aningaasaateqarpianngitsut akisuunulluunniit akissaqanngitsut pigisalerituusinnaapput inuunerminnilu Guutip naalagaaffianik salliutitsiunnaarsinnaallutik. – Hebr 13:5.
4. “Isit pilerigisaat” atorlugit Saatanip sutinniartarpaatigut?
4 Saatanip isumaqalersinniarpaatigut aatsaat pigisarpassuaqarutta inuuneq nuannaarutigisinnaagipput. Taamaattumik silarsuaq ‘isillu pilerigisaat’ atorlugit suli amerlanerusunik pigisaqarusutsinniartuartarpaatigut. (1 Joh 2:15-17; 1 Mos 3:6; Uss 27:20) Pilerisaarutit nioqqutissanik nutaajunerusunik pigisaqartariaqarnitsinnik qularunnaarsitsiniaasut takujuarlugillu tusaajuarpavut. Pisiniarfimmi pilerisaarutiniluunniit takusimasavit pilerinarnera piinnarlugu pisiaqarnikuuit? Kingornatigullu paasinikuuiuk pisariaqartippallaarnagu? Pisariaqartinngisatsinnik pisigaangatta asuli pisarissersuutigiinnartarpavut. Tamakku Jehovamut kiffartornitsinnut akornutigisinnaavavut. Assersuutigalugu Biibilimik atuaqqissaarnissamut, ataatsimiinnernut piareersarnissamut najuunnissamullu, aamma aalajangersimasumik oqaluusseqataasarnissamut piffissaajaatigisinnaavavut. Apustilip Johannesip mianersoqqussutaa eqqaamajuk: ‘Silarsuaq piumatussusialu nungussapput.’
5. Pigisaqarnerulerumalluni ilungersorneq qanoq kinguneqarsinnaava?
5 Saatanip kissaatigaa nukivut Jehovamut atornagit aningaasarsiornermut pigisaqarnerulernissamullu atussagivut. (Matt 6:24) Pigisaqarnerunissarput kisiat soqutigigutsigu inuunerput siunertaqarnavianngilaq. Pakatsisinnaavugut aningaasatigulluunniit ajornartorsiulersinnaalluta. Allaat Jehovamut taassumalu naalagaaffianut uppersuserput sanngiillerujussuarsinnaavoq. (1 Tim 6:9, 10; Saqq 3:17) Jiisusi oqarpoq ‘sunut tamanut pileritsannerit’ assigigaat naasupiluit kapinartullit naatsiiassat naajartornissaannik inerititaqarnissaannillu ipititsisartut. – Mark 4:14, 18, 19.
6. Baruki qanoq ilikkagaqarfigaarput?
6 Baruki, pruffiitip Jeremiap allattaa, eqqarsaatigeriaruk. Barukip ‘angisooq ujalermagu’ Jehovap eqqaasippaa ungasinngitsukkut Jerusalemi piuneerutissallugu. Barukili neriorsorpaa inuunera asattuukkumallugu. (Jer 45:1-5) Jehovap inuit pigisaat annaannavianngimmagit Barukip nassataqarnissani naatsorsuutigissanngilaa. (Jer 20:5) Ullumikkut Saatanip silarsuaata naggatissaata nalaani inuuvugut. Taamaattumik suli amerlanerusunik pisaartortuarnissatsinnut maanna piffissaanngilaq. Pigisavut qanorluunniit erligitigigaluarutsigit ilimagissanngilarput annikilliornartussarsuup kingornatigut suli pigissallutigit. – Uss 11:4; Matt 24:21, 22; Luk 12:15.
Suli amerlanerusunik pisaartortuarnissatsinnut maanna piffissaanngilaq
7. Suna sammissavarput, aamma sooq?
Matt 6:19-21) Matthæusip iivangkiiliua kapitali 6 versit 25-miit 34-mut atuarlugillu sammeriartigit. Tamatumani qularunnaarsinneqassaagut pigisat pinnagit Guutip naalagaaffianik noqqaassutiginnittuartariaqarluta. – Luk 12:31.
7 Taavami imminut ilaquttariittullu pilersuutigaluta inuunermi pingaarnerpaasut qanoq eqqumaffigisinnaavavut? Qanoq pigisalerituunngornaveersaarsinnaavugut? Aamma pisariaqartitatsinnik ernumassuteqarpallaannginnissatsinnut suna iluaqutigisinnaavarput? Jiisusip qaqqami oqaluutsimini pitsaanerpaamik siunnersorpaatigut. (JEHOVAP PISARIAQARTITATSINNIK TUNISARPAATIGUT
8, 9. (a) Sooq pisariaqartitavut ernumassutigivallaassanngilavut? (b) Inuit taakkualu pisariaqartitaat pillugit Jiisusip suut nalunngilai?
8 Matthæusip iivangkiiliua 6:25 atuaruk. Jiisusip nalunngilaa ajoqersukkami suna nerissanerlugu, suna imissanerlugu sunalu atissanerlugu isumakuluutigigaat, taamaattumik qaqqami oqaluutsimini ima oqarfigai: “Inuunersi isumakuluutigeqinasiuk.” Jiisusip paasitikkusuppai sooq tamakkuninnga tamanik isumakuluuteqassanngitsut. Nalunngilaa allaat pisariaqartilluinnakkaminnik isumakuluuteqarpallaarunik inuunermi suna pingaarnerusoq puiorsinnaagaat. Jiisusip ajoqersukkani isumassungaaramigit ulorianartoq tamanna pillugu oqaluutsimini suli sisamariarluni mianersoqquai. – Matt 6:27, 28, 31, 34.
9 Soormiuna Jiisusip suna nerissagipput, suna imissagipput sunalu atissagipput isumakuluutigeqqunngikkai? Nerisassat atisallu pisariaqartinnginnatsigit? Soorunami pisariaqartippavut! Aamma tamakku naammattumik akissaqartinngikkutsigit ernumaneq pissusissamisoorpoq. Tamanna Jiisusip nalunngilaa. Nalunngilaattaaq inuit suut pisariaqartikkaat. Nalunngilaa “ullussani kingullerni” ajoqersukkami piffissaq atugarliungaarfiusoq inuuffigilerumaaraat. (2 Tim 3:1) Ullumikkummi inuppassuit suliffissaqanngillat sunalu tamarmi akitsoraluttuinnarluni. Nunarpassuarni inuit piitsuusorujussuupput nerisassaqalaaginnarlutilluunniit nerisassaqanngivittarput. Jiisusilli aamma nalunngilaa inuuneq nerisassaqarnermit timilu atisassaqarnermit pingaarnerusut.
Jiisusi oqarpoq inuuneq nerisassaqarnermit timilu atisassaqarnermit pingaarnerusut
10. Jiisusip suna pingaarnerpaatillugu qinnutigisaqqullugu ajoqersukkani ilinniartippai?
10 Jiisusip ajoqersukkani ilinniartippai Ataataminnut qilammiusumut pisariaqartitatik qinnutigisaqqullugit. Ima qinusinnaapput: “Inuussutissatsinnik ullumi tunisigut.” (Matt 6:11) Kingusinnerusukkut ima qinusaqqullugit ilinniartippai: “Ullormut pisariaqartitavut naapertorlugit ullut tamaasa inuussutissatsinnik tunisartigut.” (Luk 11:3, NW) Tamannali isumaqanngilaq pisariaqartitatta pissarsiarinissaat eqqarsaatigiinnavissagivut. Tassa Jiisusip ajoqersukkani ilinniartippai Guutip naalagaaffiata tikiunnissaata qinnutiginissaa taakkua pisariaqartitaata qinnutiginissaaninngarnit pingaarnerusoq. (Matt 6:10; Luk 11:2) Ajoqersukkani ernumassuteqannginniassammata Jehovap pinngortitaminik tamanik isumassuineranik eqqaasillugit Jiisusip tuppallersarpai.
11, 12. Jehovap qilaap timmiaanik isumaginnittarnera qanoq ilikkagaqarfigisinnaavarput? (Allaaserisap aallaqqaataani asseq takuuk).
11 Matthæusip iivangkiiliua 6:26 atuaruk. “Qilaap timmiai” ilinniarfigissavavut. Timmiaaqqat mikisunnguugaluarlutik neriuaannartuupput. Timmiaaraq inuttut angitigigaluaruni inummit nerrersunerussagaluarpoq. Timmiaaqqat naatitanik, naatsiiassanik, sullernginit qullugissanillu nerisaqartarput. Taakkuli naatsiiassanik siaruarterinatillu nerisassaminnik naatitsineq ajorput. Jehovap pisariaqartitaannik tamanik isumassorpai. (Tuss 147:9) Soorunami nerisinneq ajorpai! Ujaasisariaqartarput nanisisarlutillu.
12 Jiisusip qularutiginngilluinnarpaa Ataatami timmiaaqqat isumagisinnaagunigit aamma inuit isumagisinnaassagai. [1] (1 Petr 5:6, 7) Kisianni timmissatulli eqiasuitsuusariaqarpugut. Nerisassatsinnik naatitsiniarluta pisiniutissaqarniarlutalu sulisariaqarpugut. Jehovap ilungersornivut pilluaqqusinnaavai. Naammattunik aningaasaateqanngikkaluarutta nerisassaqanngikkaluaruttaluunniit pisariaqartitatsinnik tunisarsinnaavaatigut. Assersuutigalugu allat uagutsinnik avitseqatiginnissinnaapput. Aamma Jehovap timmissat inissaannik isumagisarpai. Ulluliorsinnaatippai, ulluliornissaannullu atortussaqartippai. Taamatuttaaq aamma uagut ilaqutariittut najugassaqarnissatsinnik ikiorsinnaavaatigut.
13. Suup uppernarsarpaa qilaap timmiaanit pingaarnerusugut?
13 Jehovap timmiaaqqanik nerisassaqartitsisarnera pillugu Jiisusip ajoqersukkani paasitereerlugit ima oqarfigai: “Ilissili taakkunannga pingaarnerujussuunnginnerpisi?” (Lukasi 12:6, 7 naleqqiuguk). Taama oqarami eqqarsaatigigunarpaa inuit tamaasa pillugit ungasinngitsukkut inuunini tunniutissallugu. Aap, Jiisusi timmiaaqqat uumasulluunniit allat pillugit toqunngilaq. Uagut naassaanngitsumik inuusinnaaniassagatta toquvoq. – Matt 20:28.
14. Isumakuluuteqarnikkut qanoq iliortoqarsinnaanngila?
14 Matthæusip iivangkiiliua 6:27 atuaruk. Jiisusip suna pivaa oqarami ‘isumakuluuteqarnitsigut ullut inuuffigisassavut ataasiinnarmilluunniit ilasinnaanngikkivut’? Una pivaa pisariaqartitatta isumakuluutiginerisigut sivisunerusumik inuuneqalersinnaanngitsugut. Allaat uippakajaarpallaalerutta napparsimalersinnaavugut allaallu toqusinnaalluta.
15, 16. (a) Jehovap narsaammi liljanik isumaginninnera qanoq ilinniarfigisinnaavarput? (Allaaserisap aallaqqaataani asseq takuuk). (b) Imminut qanoq aperisinnaavugut, aamma sooq?
15 Matthæusip iivangkiiliua 6:28-30 atuakkit. Pingaartumik oqaluussinermi imaluunniit ataatsimiinnerni ataatsimeersuarnernilu kusanartunik atisassaqaraangatta nalerisimaartarpugut. ‘Atisalli pillugit isumakuluuteqartariaqarpugut?’ Aammaarluni Jiisusip ajoqersukkani eqqaaseqqippai Jehovap pinngortitani qanoq isumassortarai. Jiisusip “liljat” narsaammiittut assersuutitut atorpai. “Liljat” naasunut soorlu gladiolusinut, hyacintinut, irisinut tulipaninullu tunngatinneqarunarput. Taakkua arlaannaalluunniit imminut atisaliutinngilaq. Kusanangaarmata Jiisusip oqarneratut “Salomoluunniit alutornangaarsutsimini taakkua ilaattut atisitinneqanngilaq”!
16 Jiisusip oqaasii tulliuttut eqqarsaatigikkit: “Guutip narsaatip ivigai ... taama atisitikkamigit ilissi annerungaartumik pissannginnerpaasi, uppernikitsusi!” Soorunami taamaaliussaaq! Jiisusilli ajoqersugai suli uppersuseqarnerusariaqarput. (Matt 8:26; 14:31; 16:8; 17:20) Jehova tatiginerusariaqarpaat. Uagummi? Jehovap uagutsinnik isumassuinissaminut piumassuseqarnera piginnaaneqarneralu upperilluinnarparput?
Jehovap uagutsinnik isumassuinissaa upperilluinnarparput?
17. Jehovamut attaveqarnerput qanoq navianartorsiortissinnaavarput?
17 Matthæusip iivangkiiliua 6:31, 32 atuakkit. Jehovamik ilisimanninngitsut amerlasuut aningaasaaterpassuaqarniarneq pigisarpassuaqarniarnerlu inuunerminni anguniagarinerpaasarpaat. Uagut taamaaliorniarutta Jehovamut attaveqarnerput navianartorsiortilersinnaavarput. Nalunngilarput Jehova Ataatagalutigu taassumalu asagaatigut. Aamma piumasaanik iliortarutta inuunitsinnilu naalagaaffianik salliutitsigutta qularutigissanngilarput Jehovap pisariaqartitatsinnik tamanik amerlanerusunillu tunisarumaaraatigut. Aamma paasinikuuarput Jehovamut attaveqarluarneq pilluarnarnerpaasoq, tamannalu pisariaqartitaannatsinnik, tassa ‘nerisassanik atisassanillu’, naammaginninnissatsinnut iluaqutigaarput. – 1 Tim 6:6-8.
GUUTIP NAALAGAAFFIA INUUNINNI SALLIUTIPPIUK?
18. Jehovap uagut pilluta suna nalunngilaa, qanorlu isumagissavaatigut?
18 Matthæusip iivangkiiliua 6:33 atuaruk. Naalagaaffik inuunitsinni salliutittuarutsigu Jehovap pisariaqartitavut tamaasa tunniutissavai. Neriorsuutip tamatuma upperinissaanut pissutaalluartoq Jiisusip nassuiarpaa ima oqarluni: “[Ataatassi] qilammiittup nalunngilaa tamakku tamaasa pisariaqartikkisi.” Suliluunniit pisariaqartitatit paasinngikkitit Jehovap nalunngereertarpai. (Fil 4:19) Nalunngilaa atisat suut tulliani pisariaqartikkivut. Aamma nalunngilaa nerisassat suut pisariaqartikkitit. Aammattaaq nalunngilaa illit ilaquttatillu angerlarsimaffik qanoq ittoq pisariaqartikkissi. Jehovap pisariaqartitannik isumagiumaarpaatit.
19. Sooq siunissami qanoq pisoqarnissaa isumakuluutigissanngilarput?
19 Matthæusip iivangkiiliua 6:34 atuaruk. Jiisusip ajoqersukkani oqarfigeqqippai ‘isumakuluuteqassanngitsut’. Jehovap ullormut pisariaqartitatsinnik isumagiumaarpaatigut. Taamaattumik Jehova tatigilluinnarlugulu siunissami qanoq pisoqarumaarnera isumakuluutigivallaartariaqanngilarput. Isumakuluuteqarpallaarutta Jehovamut attaveqarnitsinnut akornutaasumik imminut tatigivallaalersinnaavugut. – Uss 3:5, 6; Fil 4:6, 7.
NAALAGAAFFIK NOQQAASSUTIGIUK, TAAVA JEHOVAP ISUMAGIUMAARPAATIT
20. (a) Jehovamut kiffartorninni qanoq anguniagaqarsinnaavit? (b) Inuuninni pisariillisaaniarlutit qanoq iliorsinnaavit?
20 Qanoq alianartigissava suli amerlanerusunik pissarsiorniarnerput pissutigalugu Inuuninni qanoq pisariillisaasinnaasutit”-mi siunnersuutitsialaat takukkit. Silatusaartumik aalajangiinissannut ikioqqullutit Jehovamut qinugit, allannguiniarsarigillu.
Jehovamut tamakkiisumik kiffartornissatsinnut nukissaarukkutta! Jehovamummi kiffartornerput inuunitsinni pingaarnerpaatittariaqarparput. Ilagiinnut oqaluussisartunik pisariaqartitsiffiusumut nuussinnaavit? Pionerinngorsinnaavit? Pioneriuguilluunniit Kristumiunut Oqaluussisartunut Ilinniarfimmut qinnuteqarnissat eqqarsaatiginikuuiuk? Sapaatip-akunnerani ullualunnik Betelimi nutserivimmiluunniit ikiortaasarsinnaavit? Imaluunniit sanaartoqataasartunut ilanngussinnaavit naalagaaffilersaarfilioqataasarlutillu? Jehovamut kiffartorninnut piffissaqarnerujumallutit nukissaqarnerujumallutillu inooriaatsinnik qanoq pisariillisaasinnaanerlutit eqqarsaatigiuk. Ungalusami “21. Jehovamut qaninnerulernissannut suna iluaqutigissaviuk?
21 Jiisusip Naalagaaffimmik salliutitsinissatsinnik ilinniartippaatigut. Taamaaliortarutta pisariaqartitavut isumakuluutigisassanngilavut. Jehovamut qaninnerulissaagut tatigigatsigu isumassorumaaraatigut. Imminut aqussinnaanerulissaagut, aamma akissaqaraluaruttaluunniit pilerigisavut silarsuarmilu neqeroorutigineqartut tamatigut pisiariniarnavianngilavut. Maannakkut inuunerput pisariillisarutsigu Jehovamut aalajaattuarnissatsinnut ‘inuuniviullu pigilersinnaanissaanut’ iluaqutigissavarput. –^ [1] (immikkoortoq 12) Jehovamut kiffartortut ilaat naammattunik nerisassaqartuaannarneq ajorput. Sooq Jehovap taamaattoqartarneranut akuliunnianngitsoq paasiniarlugu takuuk “Atuartartut apeqqutaat” Napasuliaq Alapernaarsuiffik septembarip 15-iat 2014-imoortumi, qupp. 22.