1. Us difrɛns de bitwin wetin wi nid ɛn wetin wi want?

WI NƆ nid bɔku tin fɔ lɛ wi kɔntinyu fɔ liv. Fɔ ɛgzampul, wi nid tin fɔ it, klos fɔ wɛr, ɛn say fɔ slip. Bɔt wi nɔ kin ɛva lɛf fɔ tink bɔt di tin dɛn we wi want. Bɔku pipul dɛn nɔ no se dɛn nɔ rili nid ɔl di tin dɛn we dɛn want.

2. Wetin na sɔm tin dɛn we pipul dɛn kin want?

² Di tin dɛn we pɔsin kin want we i de na po kɔntri kin difrɛn frɔm wetin pɔsin we de na mɔniman kɔntri kin want. Sɔm say dɛn na di wɔl, pipul dɛn go lɛk fɔ gɛt mobayl fon, ɔnda, ɔ smɔl land. Bɔt ɔda say dɛn, pipul dɛn go want fɔ gɛt bɔku dia dia klos dɛn, big os, ɔ dɛn dia dia motoka. Bɔt i nɔ mata usay wi de ɔ ɔmɔs mɔni wi gɛt, wi kin want fɔ gɛt bɔku tin dɛn we wi nɔ nid ɔ we wi nɔ ebul fɔ bay.

3. Wetin na want want?

³ Wetin na want want? Dis na tin we kin mek pɔsin bisin mɔ bɔt prɔpati pas Gɔd biznɛs. Pɔsin we want want nɔ de satisfay wit di tin dɛn we i nid, i kin want fɔ gɛt mɔ ɔltɛm. Ivin di wan dɛn we nɔ gɛt bɔku mɔni ɔ di wan dɛn we nɔ de bay dia tin dɛn kin bi pɔsin we want want. Dɛn kin stɔp fɔ put di Kiŋdɔm fɔs na dɛn layf.—Di Ibru Pipul Dɛn 13:​5.

4. Aw Setan de yuz “dɛn tin we pɔsin kin want bad bad wɛn i si dɛn”?

⁴ Setan want lɛ wi biliv se na we wi gɛt bɔku tin dɛn na in wi go ɛnjɔy layf. So i de yuz di wɔl ɛn “dɛn tin we pɔsin kin want bad bad wɛn i si dɛn” fɔ tray fɔ mek wi want mɔ tin dɛn ɔltɛm. (Jɔn In Fɔs Lɛta 2:​15-17; Jɛnɛsis 3:​6; Prɔvabs 27:​20) Wi kin si ɔ yɛri we dɛn de advatayz tin dɛn ɔltɛm fɔ mek wi bay dɛn. Yu dɔn ɛva bay sɔntin jɔs bikɔs i fayn ɔ yu si we dɛn de advatayz am? If yu ansa na yɛs, sɔntɛm yu bin kam fɔ no se yu nɔ rili nid wetin yu bay. If yu de bay tin dɛn we yu nɔ nid, i go mek layf tranga fɔ yu. Dɛn tin dɛn de kin mek wi nɔ ebul fɔ sav Jiova gud gud wan. Fɔ ɛgzampul, dɛn kin mek wi nɔ gɛt bɛtɛ tɛm fɔ stɔdi di Baybul, fɔ pripia fɔ di mitin ɛn go di mitin, ɛn fɔ du di prichin wok ɔltɛm. Mɛmba wetin di apɔsul Jɔn bin wɔn wi, we i se: “Di wɔl ɛn ɔltin we lib de we pipul want bad bad go dɔn wande.”

5. Wetin kin apin to di wan dɛn we de yuz ɔl dɛn trɛnk fɔ gɛt bɔku bɔku tin dɛn?

⁵ Setan nɔ want lɛ wi yuz wi trɛnk fɔ sav Jiova, bɔt i want mek wi yuz am fɔ gɛt mɔ mɔni ɛn ɔda tin dɛn. (Matyu 6:​24) Bɔt if wi jɔs bisin fɔ gɛt mɔ tin dɛn fɔ wisɛf, wi layf nɔ go gɛt minin. Wi at go pwɛl ɔ wi go gɛt mɔni prɔblɛm. Di wan we bad pas ɔl, na we wi nɔ go gɛt bɛtɛ fet pan Jiova ɛn in Kiŋdɔm. (Fɔs Lɛta To Timoti 6:​9, 10; Rɛvɛleshɔn 3:​17) Jizɔs bin se “di ɔda tin dɛn we [pɔsin] want” tan lɛk chuk chuk bush we de mek sid nɔ gro ɛn bia.—Mak 4:​14, 18, 19.

6. Us lɛsin wi lan frɔm Baruk?

⁶ Tink smɔl bɔt Baruk we na bin prɔfɛt Jɛrimaya in sɛktri. We Baruk bigin fɔ “luk fɔ big tin” fɔ insɛf, Jiova bin mɛmba am se i nɔ go te igen dɛn go kam pwɛl Jerusɛlɛm. Bɔt Jiova bin prɔmis Baruk se i go sev in layf. (Jɛrimaya 45:​1-5) Baruk nɔ fɔ fil se i go gɛt ɛnitin pas dat. Jiova nɔ go sev di tin dɛn we pipul dɛn gɛt. (Jɛrimaya 20:​5) Tide, wi de nia di tɛm we Setan in wɔl fɔ dɔn. So naw nɔto di tɛm fɔ de gɛt mɔ ɛn mɔ tin dɛn fɔ wisɛf. Ɛn wi nɔ fɔ fil se afta we da big trɔbul go dɔn, wi go stil gɛt di tin dɛn we wi gɛt naw, ivin if dɛn valyu to wi.—Prɔvabs 11:​4; Matyu 24:​21, 22; Lyuk 12:​15.

7. Wetin wi de kam tɔk bɔt? Wetin mek wi go tɔk bɔt am?

⁷ So aw wi go kia fɔ wisɛf ɛn wi famili ɛn wi stil put wi maynd pan di tin we impɔtant pas ɔl na wi layf? Aw wi kin avɔyd want want? Wetin go ɛp wi fɔ lɛf fɔ wɔri tumɔs bɔt wetin wi nid? We Jizɔs bin de tɔk to pipul dɛn ɔp wan mawnten, i bin gi di bɛst advays we go ɛp wi. (Matyu 6:​19-21) Lɛ wi rid ɛn tɔk bɔt wetin i bin se na Matyu 6:​25-34. Dis go mek wi biliv se wi fɔ de put wi at pan di Kiŋdɔm, nɔto pan ɔda tin dɛn.—Lyuk 12:​31.

8, 9. (a) Wetin mek wi nɔ fɔ wɔri tumɔs bɔt di tin dɛn we wi nid? (b) Wetin Jizɔs no bɔt mɔtalman ɛn di tin dɛn we dɛn nid?

⁸ Rid Matyu 6:​25. Jizɔs bin no se in disaypul dɛn bin wɔri bɔt wetin dɛn go it, drink, ɛn wɛr, so we i bin de tɔk to pipul dɛn ɔp wan mawnten, i bin tɛl dɛn se: “Una nɔ wɔri fɔ wetin una go it, drink, ɔ wɛr.” Jizɔs bin want fɔ ɛp dɛn fɔ no wetin mek dɛn nɔ fɔ wɔri fɔ ɔl dɛn tin dɛn ya. I bin no se if dɛn wɔri tumɔs, ivin if na fɔ tin dɛn we dɛn rili nid, dɛn go fɔgɛt bɔt wetin rili impɔtant na layf. Jizɔs bin so bisin bɔt in disaypul dɛn dat i wɔn dɛn ɔp to 4 tɛm bɔt want want, we i bin de tɔk to pipul dɛn ɔp da mawnten.—Matyu 6:​27, 28, 31, 34.

⁹ Bɔt wetin mek Jizɔs bin se wi nɔ fɔ wɔri bɔt wetin wi go it, drink, ɔ wɛr? Fɔ se wi nɔ nid tin fɔ it ɛn tin fɔ wɛr? Nɔ, wi nid dɛn! Ɛn if wi nɔ gɛt bɛtɛ mɔni fɔ gɛt dɛn tin ya, na nɔmal tin fɔ lɛ wi wɔri. Jizɔs bin no dis. I bin no wetin pipul dɛn nid. Ɛn Jizɔs bin no se insay di las dez, in disaypul dɛn go liv insay tɛm we rili tranga. (Sɛkɛn Lɛta To Timoti 3:​1) Infakt, bɔku pipul dɛn tide nɔ gɛt wok, ɛn tin dɛn jɔs de dia. Na bɔku say dɛn na di wɔl, pipul dɛn rili po; sɔm nɔ gɛt bɛtɛ tin dɛn fɔ it ɛn sɔm nɔ gɛt natin atɔl fɔ it. Bɔt Jizɔs bin no se pɔsin in layf impɔtant pas tin fɔ it ɛn klos fɔ wɛr.

10. We Jizɔs bin tich in disaypul dɛn aw fɔ pre, wetin i bin se fɔ impɔtant pas ɔl na dɛn layf?

¹⁰ Bifo dis tɛm, Jizɔs bin dɔn tich in disaypul dɛn se we dɛn de pre, dɛn fɔ aks dɛn Papa we de na ɛvin fɔ gi dɛn wetin dɛn nid. Dɛn fɔ pre se: “Gi wi wetin wi fɔ it tide.” (Matyu 6:​11) Wan ɔda tɛm, Jizɔs bin tɛl dɛn fɔ pre se: “Gi wi wetin wi fɔ it ɛvride.” (Lyuk 11:​3) Bɔt dis nɔ min se wi fɔ jɔs de tink bɔt aw wi go gɛt di tin dɛn we wi nid. Infakt, Jizɔs bin tɛl in disaypul dɛn se i impɔtant fɔ pre fɔ lɛ Gɔd in Kiŋdɔm kam pas fɔ pre fɔ wetin dɛn nid. (Matyu 6:​10; Lyuk 11:​2) Fɔ mek Jizɔs ɛp di disaypul dɛn fɔ lɛ dɛn nɔ wɔri, i bin ɛnkɔrej dɛn bay we i mek dɛn no se Jiova de kia fɔ ɔl wetin i mek.

11, 12. Wetin wi lan frɔm di we aw Jiova de kia fɔ di bɔd dɛn? (Luk di pikchɔ nia dis atikul in taytul.)

¹¹ Rid Matyu 6:​26. Wi fɔ “luk dɛn bɔd” dɛn gud wan. Pan ɔl we bɔd na smɔl animal, i de it bɔku bɔku wan. Infakt, if bɔd bin big lɛk mɔtalman, i go it pas aw mɔtalman de it. Bɔd de it frut, sid, dɛn smɔl smɔl flay dɛn, ɛn bilolo. Bɔt dɛn nɔ nid fɔ plant sid ɔ mek dɛn yon fam. Jiova de gi dɛn ɔl wetin dɛn nid. (Sam 147:​9) Bɔt i nɔ de put di it na dɛn mɔt! Di it de, bɔt na dɛn gɛt fɔ go fɛn am.

¹² Jizɔs nɔ bin gɛt wan dawt se if in Papa de kia fɔ di bɔd dɛn, i go kia fɔ pipul dɛn bak. ^[1] (Rid di ɛndnot ɔnda di las paregraf.) (Pita In Fɔs Lɛta 5:​6, 7) Jɔs lɛk di bɔd dɛn, wi nɔ fɔ lezi. Wi fɔ wok fɔ plant wi yon it ɔ fɛn mɔni fɔ bay it. Jiova kin blɛs di tray we wi kin tray fɔ du sɔntin. Ɛn we wi nɔ gɛt bɛtɛ mɔni ɔ tin fɔ it, i kin stil gi wi wetin wi nid. Fɔ ɛgzampul, ɔda pipul dɛn kin gi wi wetin dɛn gɛt. Jiova kin gi di bɔd dɛn say fɔ de bak. I gi dɛn sɛns fɔ bil os fɔ dɛnsɛf, ɛn i dɔn mek di tin dɛn we di bɔd dɛn kin yuz fɔ bil dɛn os. Semweso, Jiova kin ɛp wi fɔ fɛn fayn ples fɔ lɛ wi famili de.

13. Wetin sho se wi bɛtɛ fawe pas di bɔd dɛn?

 ¹³ Afta we Jizɔs bin mɛmba in disaypul dɛn se Jiova de fid di bɔd dɛn, i bin tɛl dɛn se: “Una ɔl bɛtɛ pas plɛnti smɔl bɔd na Gɔd in yay!” (Luk Lyuk 12:​6, 7.) We Jizɔs tɔk dis, i go mɔs bi se i bin de tink bɔt aw i go day fɔ ɔlman. Jizɔs nɔ bin day fɔ di bɔd dɛn ɔ fɔ ɛni ɔda animal. I day fɔ wi so dat wi go de sote go.—Matyu 20:​28.

14. Wetin pɔsin we de wɔri tumɔs nɔ go ɛva du?

¹⁴ Rid Matyu 6:​27. Wetin Jizɔs bin min we i se wi nɔ go ebul ad natin pan wi layf we wi wɔri tumɔs? I bin min se wi layf nɔ go lɔng pas aw i fɔ lɔng ilɛksɛf wi wɔri bɔt di tin dɛn we wi nid. Infakt, if wi wɔri pasmak, wi go sik ɛn ivin day.

15, 16. (a) Wetin wi lan frɔm di we we Jiova de kia fɔ di flawa dɛn? (Luk di pikchɔ nia dis atikul in taytul.) (b) Us kwɛstyɔn dɛn wi nid fɔ aks wisɛf? Wetin mek?

¹⁵ Rid Matyu 6:​28-30. Wi kin gladi we wi gɛt fayn tin fɔ wɛr, mɔ we wi kin go prich ɔ go mitin ɛn asɛmbli dɛn. Bɔt yu tink se wi fɔ “wɔri fɔ klos fɔ wɛr”? Jizɔs bin mɛmba in disaypul dɛn bak  bɔt aw Jiova de kia fɔ ɔltin we i mek. Jizɔs bin gi ɛgzampul bɔt dɛn “flawa we de gro.” Dɛn nɔn nɔ de so klos fɔ dɛnsɛf. Bɔt dɛn so fayn dat Jizɔs bin se “pan ɔl di jɛntri we Kiŋ Sɔlɔmɔn bin jɛntri, in klos dɛn nɔ bin fayn rich ɛni dɛn flawa de.”

¹⁶ Tink bɔt di nɛks tin we Jizɔs tɔk. I se: “Na Gɔd de mek flawa pan gras lɛkɛ we pɔsin go wɛr klos . . .  Gɔd nɔ go du pas dat fɔ gi una klos fɔ wɛr? Una nɔ biliv Gɔd lɛkɛ aw una fɔ biliv am!” Fɔ tru, Gɔd go du dat! Bɔt Jizɔs in disaypul dɛn bin nid mɔ fet. (Matyu 8:​26; 14:​31; 16:​8; 17:​20) Dɛn bin nid fɔ biliv se Jiova want fɔ kia fɔ dɛn ɛn i go rili du dat. We wi? Wi biliv se Jiova go kia fɔ wi?

17. Wetin go pwɛl wi padi biznɛs wit Jiova?

¹⁷ Rid Matyu 6:​31, 32. Bɔku pipul dɛn we nɔ no Jiova kin put ɔl dɛn at fɔ fɛn mɔ mɔni ɛn gɛt mɔ prɔpati. Bɔt if wisɛf du di sem tin, wi go pwɛl wi padi biznɛs wit Jiova. Wi no se Jiova na wi Papa ɛn i lɛk wi. Wi biliv se if wi du wetin i tɛl wi fɔ du ɛn put in Kiŋdɔm fɔs na wi layf,  i go gi wi ɔl wetin wi nid ɛn bɔku ɔda tin dɛn. Wi dɔn kam fɔ no bak se wan tin we go rili mek wi gladi na we wi gɛt tayt padi biznɛs wit Jiova ɛn dis de ɛp wi fɔ satisfay we wi gɛt tin fɔ “it ɛn klos fɔ wɛr.”—Fɔs Lɛta To Timoti 6:​6-8.

18. Wetin Jiova no bɔt wi ɔl? Wetin i go du fɔ wi?

¹⁸ Rid Matyu 6:​33. If wi put di Kiŋdom fɔs na wi layf, Jiova go gi wi ɔl wetin wi nid. Jizɔs bin ɛksplen wetin mek wi fɔ biliv da prɔmis de. I bin se: “Gɔd we na una Papa we de na ɛvin no se una fɔ gɛt ɔl dɛn tin ya.” Jiova no wetin yu nid ivin bifo yu no se yu nid am. (Lɛta Fɔ Filipay 4:​19) I no us klos wi nid nɛks. I no bak us it yu go nid. Ɛn i no se yu ɛn yu famili nid ples fɔ de. Jiova go mek shɔ se yu gɛt wetin yu rili nid.

19. Wetin mek wi nɔ fɔ wɔri bɔt wetin go apin tumara bambay?

¹⁹ Rid Matyu 6:​34. Jizɔs bin tɛl in disaypul dɛn se: “Una fɔ lɛf tumara yon wɔri fɔ tumara.” Jiova go gi wi wetin wi nid ɛvride. So wi nɔ fɔ wɔri tumɔs bɔt wetin go apin tumara bambay. If wi du dat, wi go bigin abop pan wisɛf, ɛn dis go pwɛl wi padi biznɛs wit Jiova. Bifo dat, wi fɔ rili abop pan Jiova.—Prɔvabs 3:​5, 6; Lɛta Fɔ Filipay 4:​6, 7.

20. (a) Us plan yu go mek we yu de sav Jiova? (b) Wetin yu go du fɔ mek yu layf simpul?

²⁰ I go rili bad if wi nɔ gɛt bɛtɛ trɛnk fɔ sav Jiova gud gud wan jɔs bikɔs wi de tray fɔ gɛt mɔ tin dɛn! Wi fɔ gi Jiova wi bɛst. Fɔ ɛgzampul, yu go ebul muf fɔ go ɛp wan kɔngrigeshɔn we nid mɔ pɔblisha dɛn? Yu go ebul fɔ payɔnia? Ɔ if yu de payɔnia, yu dɔn tink fɔ go di Skul fɔ Pipul dɛn We De Prich bɔt Gɔd in Kiŋdɔm? Yu tink se yu go ebul yuz sɔm dez dɛn insay di wik fɔ ɛp na Bɛtɛl ɔ na wan transleshɔn ɔfis? Ɔ sɔntɛm yu kin bi pɔsin we rɛdi fɔ ɛp fɔ bil Kiŋdɔm Ɔl dɛn. Tink bɔt wetin yu go du fɔ mek yu layf simpul so dat yu go gɛt tɛm ɛn trɛnk fɔ wok fɔ di Kiŋdɔm. Di bɔks we se “ Aw fɔ Liv Simpul Layf?” sho sɔm tin dɛn we go ɛp wi. Pre to Jiova fɔ ɛp yu fɔ disayd wetin yu nid fɔ du. Dɔn stat fɔ chenj di tin dɛn we yu fɔ chenj na yu layf.

21. Wetin go ɛp yu fɔ kam nia Jiova mɔ?

²¹ Jizɔs bin tich wi fɔ put di Kiŋdɔm fɔs na wi layf. We wi du so, wi nɔ go wɔri pasmak bɔt di tin dɛn we wi nid. Wi go kam nia Jiova mɔ bikɔs wi biliv se i go kia fɔ wi. Wi go lan fɔ kɔntrol wisɛf fɔ lɛ wi nɔ bay ɔltin we wi want ɔ ɔltin we di wɔl de gi wi, ivin if wi ebul fɔ bay am. If wi mek wi layf simpul naw, i go ɛp wi fɔ kɔntinyu fɔ fetful to Jiova ɛn fɔ “gɛt da layf we na di tru layf” we Jiova dɔn prɔmis wi.—Fɔs Lɛta To Timoti 6:​19.