1. ¿Tiquʼn junxitl aju at tajbʼen qe twitzju qajbʼil tuʼn tten qe?

NYA junx taʼ aju at tajbʼen qe twitzju qajbʼil tuʼn kyten mas tiʼchaq qe, ¿tiquʼn? Tuʼnju oʼkx at tajbʼen junjun tiʼchaq qe tuʼn qanqʼin, ik tzeʼn qwa, qxbʼalun ex jun qja jatumel jaku qo najan toj. Atzun qeju tiʼchaq qaj tuʼn kyten qe, at nim. Ex at nim xjal mintiʼ in nel kynikʼ tiʼj qa nya kykyaqil qe tiʼchaq kyajbʼil tuʼn tten kye at tajbʼen tuʼn kyanqʼin.

2. ¿Alkyeqe tiʼchaq kyajbʼil xjal tuʼn tten kye?

² Nyalo axju kyajbʼil xjal in che anqʼin toj jun tnam prow kywitz qeju xjal ateʼ toj jun tnam qʼinun. Ateʼ xjal toj junjun tnam kyajbʼil tuʼn tten jun kyyolbʼil, jun kymot moqa kyaj tuʼn tten chʼin kytxʼotxʼ. Atzun toj junjuntl tnam, kyajbʼil xjal tuʼn tten nim kyxbʼalun wiʼyil, jun kyja mas matij moqa jun kykar mas wiʼyilxix. Noqtzun tuʼnj, noq jaxku tumel in qo anqʼin ex noq jniʼxku qpwaq at, jaku tzaj qajbʼil tuʼn kyten mas ex mas  tiʼchaq qe, aju nya il tiʼj tuʼn tten qe moqa mlay che laqʼet quʼn.

3. ¿Tiʼ t-xilen aju tuʼn tten mas tiʼchaq qe?

³ ¿Tiʼ t-xilen aju tuʼn tten mas tiʼchaq qe? A jlu in yolin tiʼj aj tok qqʼoʼn mas nim kyoklen qe tiʼchaq te twitz txʼotxʼ twitzju qamiwbʼil tukʼil Jehová. Qa ma tzʼok qkʼujlaʼn qe tiʼchaq te twitz txʼotxʼ, mlay qo tzalaj kyiʼj qe tiʼchaq at tajbʼen qe. Aju kbʼantel quʼn, kukx qo jyol kyiʼj mas tiʼchaq. Noq alkyexku jun qe jaku tzʼok tkʼujlaʼn qe tiʼchaq te twitz txʼotxʼ, maske nya nim qpwaq at moqa mintiʼ in tzaj qlaqʼoʼn qe tiʼchaq nim kywiʼ. Axpe ikx, jakulo kyaj qtzaqpiʼn tuʼn tkubʼ qqʼoʼn aju Tkawbʼil Dios tnejel toj qanqʼibʼil (Hebreos 13:5).

4. ¿Tiquʼn in najbʼen aju «nnoʼk qkeʼyin» tuʼn Satanás?

⁴ Tajbʼil Satanás tuʼn tkubʼ qximen qa il tiʼj tuʼn kyten nim tiʼchaq qe tuʼntzun qtzalaj. Tuʼntzunju, in che ajbʼen qe tiʼchaq te twitz txʼotxʼ tuʼn ex aju «nnoʼk qkeʼyin» tuʼntzun ttzaj qajbʼil tuʼn kyten mas tiʼchaq qe (1 Juan 2:15-17; Génesis 3:6; Proverbios 27:20). Toj tkyaqil ambʼil in nok qqʼoʼn qwitz ex in nok qbʼiʼn qe tqanil tuʼntzun tkubʼ qkʼuʼj kyuʼn tuʼn kytzaj qlaqʼoʼn qe tiʼchaq mas akʼaj. ¿Ope bʼaj jun maj qiʼj tzaj qlaqʼoʼn jun tiʼ oʼkx tuʼnju ok qqʼoʼn qwitz tiʼj qa tbʼanel moqa noq tuʼnju ok qqʼoʼn qwitz tiʼj toj jun tqanil? Qa ikju, yajxitl el-lo qnikʼ tiʼj qa nya iltoq tiʼj. Qa kukx ma che tzaj qlaqʼoʼn qe tiʼchaq nya il tiʼj tuʼn kyten qe, jaku tzaj nya bʼaʼn qiʼj kyuʼn. Kyuʼn jlu jaku ya mlay tzʼok qqʼoʼn qwiʼ tiʼj qajbʼebʼil te Jehová. Jun techel, ya mlay ten nim ambʼil qiʼj tuʼn qxnaqʼtzan tiʼj Tyol Dios, tuʼn tbʼaj qbʼinchaʼn qten kyiʼj chmabʼil, tuʼn qxiʼ kyoj chmabʼil ex tuʼn kukx qex pakbʼal. Bʼaʼn tuʼn ttzaj qnaʼn aju kawbʼil kyaj tqʼamaʼn apóstol Juan qa kbʼajel aju te twitz txʼotxʼ kyukʼix kyajbʼil xjal nya bʼaʼn.

5. ¿Tiʼ jaku bʼaj kyiʼj qeju in nok kyqʼoʼn chʼixmi tkyaqil kyipumal tuʼn tkanet mas tiʼchaq kye?

⁵ Tajbʼil Satanás tuʼn tajbʼen qipumal quʼn tuʼn tkanet mas qpwaq ex tuʼn kyten mas tiʼchaq qe. Nya taj tuʼn tajbʼen qipumal quʼn tuʼn qajbʼen te Jehová (Mateo 6:24). Noqtzun tuʼnj, qa oʼkx tok qwiʼ tiʼj tuʼn kykanet mas tiʼchaq qe, ya mlay ten ttxolil qchwinqlal. Jaku tzaj bʼaj qkʼuʼj ex jaku tzʼokx qqʼon qibʼ tjaqʼ kʼas. Ex aju mas nya bʼaʼn, jaku naj qʼuqbʼil qkʼuʼj tiʼj Jehová ex tiʼj Tkawbʼil (1 Timoteo 6:9, 10; Apocalipsis 3:17). Tqʼama Jesús qa ma pon qkʼuʼj tiʼj nim tiʼchaq, in nok jlu ik tzeʼn qe chʼiʼx aju mintiʼ in tqʼoʼn ambʼil tuʼn tchʼiy awal ex tuʼn tel twitz (Marcos 4:14, 18, 19).

6. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Baruc?

⁶ Qo ximen tiʼj Baruc aju ok te aj tzʼibʼil te Jeremías. Tej tok ten Baruc jyol nim tiʼchaq te te, xi tnaʼn Jehová te qa nya nimtoq ambʼil atxtoq tuʼn tkubʼ xitin tnam Jerusalén. Noqtzun tuʼnj, xi tqʼamaʼn Jehová te qa oktoq kkletel tchwinqlal tuʼn (Jeremías 45:1-5). Mintiʼtoq juntl tiʼ tuʼn tyon Baruc tiʼj. Mlaytoq kolin Jehová kyiʼj qe tiʼchaq at kye xjal (Jeremías 20:5). ¿Tiʼ xnaqʼtzbʼil jaku  tzʼel qiʼn tiʼjju bʼaj tiʼj Baruc? Ax ikx toj ambʼil jaʼlo, nya nim ambʼil atx tuʼn tkubʼ xitin tkyaqilju tokx tjaqʼ tkawbʼil Satanás. Tuʼntzunju, mintiʼ tuʼn tkubʼ qximen qa atx ambʼil tuʼn qjyon kyiʼj mas ex mas tiʼchaq. Mlay kubʼ qyon qa kukx che tel qeju tiʼchaq at qe jaʼlo ajxi tikʼ nimxix yajbʼil, maske nim kyoklen toj qwitz (Proverbios 11:4; Mateo 24:21, 22; Lucas 12:15).

7. ¿Tiʼ qo xnaqʼtzal tiʼj kyoj junjuntl taqikʼ, ex tiquʼn?

⁷ Qa ikju, ¿alkye tten jaku kanet aju at tajbʼen qe ex kye toj qja, ex tuʼn kukx tok qxqʼuqin aju mas nim toklen toj qanqʼibʼil? ¿Alkye tten mlay tzʼok qqʼoʼn qwiʼ kyiʼj qeju tiʼchaq te twitz txʼotxʼ? ¿Tiʼ kʼonil qiʼj tuʼn miʼn ttzaj bʼajxix qkʼuʼj tuʼn kykanet qeju tiʼchaq at tajbʼen qe? Kyaj tqʼamaʼn Jesús qe tbʼanel nabʼil kyiʼj jlu toj tchikʼbʼabʼil twiʼ jun witz (Mateo 6:19-21). Atzun jaʼlo kjawil quʼjin ex qo xnaqʼtzal tiʼj Mateo 6:25-34. A jlu kʼonil qiʼj tuʼn telxix qnikʼ tiʼj qa il tiʼj tuʼn kukx qjyon tiʼj Tkawbʼil Dios, ex nya kyiʼj qeju tiʼchaq te twitz txʼotxʼ (Lucas 12:31).

8, 9. a) ¿Tiquʼn nya il tiʼj tuʼn ttzaj bʼajxix qkʼuʼj kyiʼj qeju tiʼchaq at tajbʼen qe? b) ¿Tiʼtoq ojtzqiʼn tuʼn Jesús tiʼj alkye at tajbʼen kye xjal?

⁸ (Kjawil uʼjit Mateo 6:25). Ojtzqiʼntoq tuʼn Jesús qa in tzaj bʼajtoq kykʼuʼj t-xnaqʼtzbʼen tiʼj alkye tten tuʼn tkanet kywa ex kyxbʼalun. Tuʼntzunju, toj tchikʼbʼabʼil twiʼ jun witz xi tqʼamaʼn jlu kye: «Miʼn bʼaj kykʼuʼje tiʼj kychwinqlale». Tajbʼiltoq tuʼn tonin kyiʼj tuʼn tel kynikʼ tiʼj tiquʼn nya il tiʼj tuʼn ttzaj bʼajxix kykʼuʼj kyiʼj tiʼchaq lu. Maske attoq tajbʼen qe tiʼchaq lu kye, noqtzun tuʼnj, ojtzqiʼntoq tuʼn Jesús qa ma tzaj bʼajxixtoq kykʼuʼj qe t-xnaqʼtzbʼen, jakutoq tzikʼ tnaʼl kyuʼn alkye mas nim toklen toj kyanqʼibʼil. Ex tuʼnju nim in ximintoq Jesús kyiʼj, toj ambʼil aju xi tqʼamaʼn kyaje maj kye tiʼ jakutoq tzaj qa kukx in tzaj bʼajxixtoq kykʼuʼj (Mateo 6:27, 28, 31, 34).

⁹ ¿Tiquʼn tqʼama Jesús tuʼn miʼn ttzaj bʼajxix qkʼuʼj tiʼj qwa ex tiʼj qxbʼalun? ¿Mintiʼpe kyajbʼen qe tiʼchaq lu qe? At kyajbʼen. Tuʼntzunju at maj in tzaj bʼaj qkʼuʼj kyiʼj qe tiʼchaq lu aj mintiʼxix qpwaq tuʼn kylaqʼet. Ojtzqiʼntoq jlu tuʼn Jesús, ex ojtzqiʼntoq tuʼn alkye at tajbʼen kye xjal. Ax ikx ojtzqiʼntoq tuʼn qa kwesttoq kʼokel kyanqʼibʼil qeju t-xnaqʼtzbʼen kyoj «mankbʼil tqʼijlalil» (2 Timoteo 3:1). Toj ambʼil jaʼlo, nim xjal mintiʼ in kanet kyaqʼun ex mas in jax kywiʼ qe tiʼchaq. Kyoj junjuntl tnam, ateʼ nim xjal mebʼa, moqa prow, ex nya nim kywa at moqa mintiʼx chʼin kywa at. Noqtzun tuʼnj, ojtzqiʼntoq tuʼn Jesús qa aju kychwinqlal xjal atzunju mas nim toklen twitzju kywa ex aju kyxmilal twitz kyxbʼalun.

10. Ik tzeʼn xi t-xnaqʼtzaʼn Jesús kye t-xnaqʼtzbʼen, ¿alkyetoq il tiʼj tuʼn tok kyqʼoʼn mas nim toklen toj kyanqʼibʼil?

¹⁰ Otoq che bʼaj t-xnaqʼtzaʼn Jesús qeju t-xnaqʼtzbʼen qa aj kynaʼn Dios, jakutoq t-xi kyqanin te Kytat toj kyaʼj qeju tiʼchaq at tajbʼen kye. Xi tqʼamaʼn kye tuʼn kynaʼn Dios kyjalu: «Qʼontza qwaye jaʼlo» (Mateo 6:11). Ex toj juntl ambʼil xi tqʼamaʼn kye tuʼn kynaʼn  Dios ik tzeʼn jlu: «Qʼontza qwaye jaʼlo, aju in ajbʼen tkyaqil qʼij» (Lucas 11:3). Noqtzun tuʼnj, nya a t-xilen jlu qa toj tkyaqil ambʼil qo ximel tiʼj tuʼn kykanet qeju tiʼchaq at tajbʼen qe. Ax ikx, xi t-xnaqʼtzaʼn Jesús kye t-xnaqʼtzbʼen qa mas nim toklen tuʼn t-xi kyqanin tuʼn tul Tkawbʼil Dios twitzju tuʼn t-xi kyqanin qe tiʼchaq at tajbʼen kye (Mateo 6:10; Lucas 11:2). Tuʼn tonin Jesús kyiʼj t-xnaqʼtzbʼen tuʼn miʼn ttzaj bʼajxixtoq kykʼuʼj, xi tnaʼn kye qa in nok t-xqʼuqin Jehová tkyaqilju o bʼaj tbʼinchaʼn.

11, 12. ¿Tiʼ xnaqʼtzbʼil jaku tzʼel qiʼn tiʼj alkye tten in nok t-xqʼuqin Jehová qe chyuʼj? (Qʼonka twitza tiʼj tnejel tilbʼilal).

¹¹ (Kjawil uʼjit Mateo 6:26). Qo ximen kyiʼj «chyuʼj», moqa pichʼ. Maske tal chʼin qe, nim kywa in bʼaj. Noqwit ik jun chyuʼj ik tzeʼn jun xjal, mas twa jaku bʼaj ik tzeʼn qe. In xi kywaʼn chyuʼj twitz tzeʼ, ijaj, qe tal txkup ex ẍchuqʼ. Noqtzun tuʼnj, nya il tiʼj tuʼn tkux kyawaʼn kywa tuʼnju in tzaj tqʼoʼn Jehová tkyaqilju at tajbʼen kye (Salmo 147:9). Ax tok, mintiʼ in nokx tqʼoʼn Jehová kywa toj kytziʼ. Il tiʼj tuʼn kyxiʼ chyuʼj jyolte kywa. Ex at kywa, noq oʼkx il tiʼj tuʼn kyjyon tiʼj.

¹² Qʼuqlitoq tkʼuʼj Jesús tiʼj qa in noktoq t-xqʼuqin Jehová qe chyuʼj, ax ikx kʼokeltoq t-xqʼuqin qeju xjal (1 Pedro 5:6, 7) ^[1] (tqanil jun). Noqtzun tuʼnj, ik tzeʼn qeju chyuʼj, il tiʼj tuʼn qaqʼunan. Il tiʼj tuʼn tkux qawaʼn qwa moqa il tiʼj tuʼn tkambʼet qpwaq tuʼntzun ttzaj qlaqʼoʼn. Ex tzul tkʼiwlaʼn Jehová qe aj tok tilil quʼn. Qa nya nim qpwaq at ex qwa, jaku tzaj tqʼoʼn aju at tajbʼen qe. Jun techel, jakulo tzaj kyqʼoʼn junjuntl chʼin qe tiʼjju at kye. Ax ikx in xi tqʼoʼn Jehová jun tembʼil tuʼn kyanqʼin qe chyuʼj. O bʼaj tbʼinchaʼn kye tuʼn tten kyipumal tuʼn tbʼaj kybʼinchaʼn jun kyja. Ex o bʼaj tbʼinchaʼn qe tiʼchaq in najbʼen kyuʼn tuʼn tbʼaj kybʼinchaʼn kyja. Chʼixmi axju in bʼant tuʼn Jehová qiʼj, in qo tzaj tonin tuʼn tkanet jun qja jatumel jaku qo anqʼin kyukʼil toj qja.

13. ¿Alkye yekʼbʼil at tiʼj qa mas nim qoklen kywitz qe chyuʼj?

¹³ Toj Mateo 6:26, xi tnaʼn Jesús kye t-xnaqʼtzbʼen qa in xi tqʼoʼn Jehová kywa qe chyuʼj. Ex yajxitl xi tqanin jlu kye: «¿Myapetzun mas maʼ kyxilene kywitz qe chyuʼj?» (chʼixmi ax ximbʼetz lu kkanetel tuʼna toj Lucas 12:6, 7). Tej tqʼama jlu, in ximenlo tiʼj qa toj chʼintl ambʼil, kxeʼltoq tqʼoʼn tchwinqlal kyiʼj kykyaqil xjal. Ikju, mintiʼ kyim Jesús kyiʼj chyuʼj moqa tiʼj alkyexku juntl txkup. Kyim Jesús tuʼn qpaj tuʼntzun qanqʼin te jumajx (Mateo 20:28). A jlu in tzaj tyekʼun qa mas nim qoklen kywitz qeju chyuʼj.

14. ¿Tiʼ mlay kanet tuʼn jun xjal in tzaj bʼajxix tkʼuʼj?

¹⁴ (Kjawil uʼjit Mateo 6:27). Tqʼama Jesús qa mlay tzʼok tqʼoʼn jun xjal jun «xkʼachubʼtl» tiʼj tchwinqlal noq tuʼnju in tzaj bʼajxix tkʼuʼj kyiʼj tiʼchaq at tajbʼen te. ¿Tiʼ tajbʼiltoq Jesús tuʼn ttzaj tqʼamaʼn? Tukʼil jlu tqʼama qa mlay tzʼel laqʼeʼ toj tchwinqlal jun xjal qa ma tzaj bʼajxix tkʼuʼj kyiʼj qeju tiʼchaq. Qa ma tzaj bʼajxix tkʼuʼj jaku tzaj yabʼil tiʼj moqa axpe ikx jaku kyim.

15, 16. a) ¿Tiʼ xnaqʼtzbʼil in tzaj tqʼoʼn qe tiʼj alkye tten in che ok t-xqʼuqin Jehová qeju bʼech toj kʼul? (Qʼonka twitza tiʼj tnejel tilbʼilal). b) ¿Alkye xjel bʼaʼn tuʼn tkubʼ qxjelin, ex tiquʼn?

¹⁵ (Kjawil uʼjit Mateo 6:28-30). Qkyaqilx qgan tuʼn tok tbʼanel qxbʼalun, mas aj in qoʼx pakbʼal, aj in qoʼx kyoj chmabʼil ex kyoj nimaq chmabʼil. Qa ikju, ¿ilpe tiʼj tuʼn ttzaj bʼajxix qkʼuʼj tuʼn tkanet qxbʼalun? Juntl maj xi tnaʼn Jesús kye qeju t-xnaqʼtzbʼen qa in nok  t-xqʼuqin Jehová tkyaqil tbʼinchbʼen. Yolin tiʼj techel «kyiʼj bʼech tuj kʼul». Ni jun bʼech il tiʼj tuʼn tbʼaj tbʼinchaʼn t-xbʼalun. Noqtzun tuʼnj, tbʼanelxix che keʼyin ex tuʼntzunju tqʼama Jesús qa «mintiʼ pon jun t-xbʼalun» Salomón «ik tzaʼn kye tal bʼech».

¹⁶ Tej otoqxi bʼaj tqʼamaʼn Jesús kye t-xnaqʼtzbʼen tiʼj alkye tten in bʼaj «t-xbʼalumiʼn Dios tal kʼul tuj kojbʼil», xi tqanin jlu kye: «¿Yajtzun kyeye, mlaypelo che xbʼaluminjtze tuʼn, aqeye xinaq chʼin kyokslabʼle?». Oktoq tzul tqʼoʼn kyxbʼalun. Noqtzun tuʼnj, iltoq tiʼj tuʼn tten mas qʼuqbʼil kykʼuʼj qeju t-xnaqʼtzbʼen (Mateo 8:26; 14:31; 16:8; 17:20). Iltoq tiʼj tuʼn tok qeʼ kykʼuʼj tiʼj qa tajbʼiltoq Jehová tuʼn kyok t-xqʼuqin ex qa kbʼanteltoq tuʼn. Bʼaʼn tuʼn qximen tiʼj jlu, ex qxjelinku jlu: «¿Axpe tok qʼuqli nkʼuʼje tiʼj qa chin okel xqʼuqine tuʼn Jehová?».

17. ¿Tiquʼn jaku naj qamiwbʼil tukʼil Jehová?

¹⁷ (Kjawil uʼjit Mateo 6:31, 32). Aqeju xjal mintiʼ ojtzqiʼn Dios kyuʼn, oʼkx in che jyoʼn tiʼj pwaq ex kyiʼj qe tiʼchaq te twitz txʼotxʼ. Qa ax jlu ma bʼant quʼn, jaku naj qamiwbʼil tukʼil Jehová. Ojtzqiʼn quʼn qa a te Qtat ex kʼujlaʼn qoʼ tuʼn. Tuʼntzunju, qʼuqli qkʼuʼj tiʼj qa ma kubʼ qbʼinchaʼn aju in tzaj tqanin qe ex qa ma qo jyon tnejel tiʼj Tkawbʼil, tzul tqʼoʼn aju at tajbʼen qe ex junjuntl tiʼchaq. Ax ikx ojtzqiʼn quʼn qa ax tok kbʼel qnaʼn tzalajbʼil qa ma qo ok te tamiw Jehová. Ex a jlu kʼonil qiʼj tuʼn qtzalaj tiʼj qxbʼalun at ex qwa (1 Timoteo 6:6-8).

18. ¿Tiʼ ojtzqiʼn tuʼn Jehová qiʼj, ex tiʼ tzul tqʼoʼn qe?

¹⁸ (Kjawil uʼjit Mateo 6:33). Qa ma kubʼ qqʼoʼn Tkawbʼil Dios tnejel toj qanqʼibʼil, in tzaj ttziyen Jehová qe qa tzul tqʼoʼn tkyaqilju at tajbʼen qe. ¿Tiquʼn jaku tzʼok qeʼ qkʼuʼj tiʼj qa kbʼantel jlu tuʼn? Ik tzeʼn in tzaj tqʼamaʼn Mateo 6:32, tqʼama Jesús jlu: «At jun Kymane aju at tuj kyaʼj ojtzqiʼn tuʼn qa at tajbʼen tkyaqil jlu kyeye». Ya ojtzqiʼn tuʼn Jehová tiʼ at tajbʼen qe aj naʼmxtoq tel qnikʼ tiʼj (Filipenses 4:19). Ojtzqiʼn tuʼn alkye qwa ex qxbʼalun kʼajbʼel. Ex ojtzqiʼn tuʼn qa il tiʼj tuʼn tten jun qja jatumel jaku qo anqʼin kyukʼil toj qja. A Jehová tzul qʼonte aju axix tok at tajbʼen qe.

19. ¿Tiquʼn mintiʼ tuʼn ttzaj bʼajxix qkʼuʼj tiʼjju jaku bʼaj toj ambʼil tzul?

¹⁹ (Kjawil uʼjit Mateo 6:34). Juntl maj, xi tqʼamaʼn Jesús jlu kye t-xnaqʼtzbʼen: «Miʼn bʼaj kykʼuʼje». Tzul tqʼoʼn Jehová aju at tajbʼen qe junjun qʼij. Tuʼntzunju mintiʼ tuʼn ttzaj bʼajxix qkʼuʼj tiʼjju jaku bʼaj toj ambʼil tzul. Qa ma tzaj bʼajxix qkʼuʼj, jaku tzʼok qeʼ mas qkʼuʼj qiʼjx ex nya tiʼj Jehová. Ex tuʼn jlu jaku naj qamiwbʼil tukʼil. Tuʼntzunju, bʼaʼn tuʼn tok qeʼxix qkʼuʼj tiʼj Jehová (Proverbios 3:5, 6; Filipenses 4:6, 7).

20. a) ¿Tiʼ jaku bʼant quʼn tuʼntzun qajbʼen mas te Jehová? b) ¿Tiʼ jaku bʼant quʼn tuʼntzun qanqʼin kyukʼil nya nim tiʼchaq?

²⁰ Bʼisbʼajilxix qa mintiʼ ma qo ajbʼen te Jehová tuʼn tkyaqil qipumal noq tuʼnju in qo  jyon mas ex mas tiʼchaq. Mas bʼaʼn qa ma txi qqʼoʼn aju mas tbʼanel at qe te Jehová. Jun techel, ¿jakupe qoʼx onil tiʼj jun kʼloj okslal jatumel kyaj onbʼil toj pakbʼabʼil? ¿Jakupe qo ok te precursor? Ex qa o qo ok te precursor, ¿jakupe qoʼx toj Xnaq’tzb’il kye Pakb’al ti’j Tkawb’il Dios? ¿Jakupe qoʼx onil junjun qʼij toj Betel moqa toj Ja jatumel in che kubʼ qʼoʼn Uʼj kyoj txqantl Yol? ¿Jakupe qo ok te onil tuʼn kybʼaj ximet tzeʼn che jawel bʼinchet ja ex tuʼn tajbʼen chʼin ambʼil quʼn tuʼn qonin tuʼn kyjaw bʼinchet Ja te Chmabʼil? Qo ximen tiʼj junjun chʼixpubʼil jaku bʼant quʼn tuʼn miʼn tten nim tiʼchaq qe. Iktzun tten ktel mas ambʼil qiʼj ex qipumal tuʼn qaqʼunan tiʼj Tkawbʼil Dios. Aju recuadro « Tzeʼn jaku qo anqʼin kyukʼil nya nim tiʼchaq», in tzaj tqʼoʼn junjun tumel qe. Bʼaʼn tuʼn t-xi qqanin te Jehová tuʼn qtzaj tonin tuʼn tel qnikʼ tiʼj tiʼ kbʼantel quʼn. Yajxitl, bʼaʼn tuʼn tok tilil quʼn tuʼn kybʼant qeju chʼixpubʼil.

21. ¿Tiʼ kʼonil qiʼj tuʼn qok laqʼeʼ mas ttxlaj Jehová?

 ²¹ Kyaj t-xnaqʼtzaʼn Jesús qe tuʼn tkubʼ qqʼoʼn tnejel Tkawbʼil Dios toj qanqʼibʼil. Qa ma bʼant jlu quʼn, mlay tzaj bʼajxix qkʼuʼj kyiʼj qe tiʼchaq at tajbʼen qe. Kʼokel qeʼ mas qkʼuʼj tiʼj qa qo okel xqʼuqin tuʼn Jehová. Ax ikx kxel qxnaqʼtzan qibʼ tuʼn qjakʼunte qibʼ tuʼn miʼn ttzaj qlaqʼoʼn tkyaqil qe tiʼchaq qajbʼil moqa tkyaqilju at twitz txʼotxʼ, maske jaku chjet quʼn. Tkyaqil jlu kʼonil qiʼj tuʼn qok laqʼeʼ mas ttxlaj Jehová. Qa ma qo anqʼin kyukʼil nya nim tiʼchaq toj ambʼil jaʼlo, kʼonil qiʼj tuʼn kukx qajbʼen te Jehová ex tuʼn tkanet qchwinqlal te jumajx aju o tzaj ttziyen (1 Timoteo 6:19).