1. Nkwilekeena kinyi kwi pankatshi pa bintu byatudi nabyo lukalo na bintu byatudi nabyo malaka?

TWI na lukalo na bintu bipeela bwa’shi twikale na muwa. Bu kileshesho, twi na lukalo lwa bidiibwa, bilamba, na mbalo ya kushala. Kadi kwi bintu bikile bungi byatudi balombeene kulakila. Na bantu bebungi tabashinguula’shi ta be na lukalo na bintu byooso byabalakila nya.

2. Mbintu kinyi byabakambaa kulakila kwi bantu bebungi?

² Muntu mushaale mu eumbo mwi bulanda e kulakila kintu kilekeene na kintu akilakila muntu e mu eumbo di na bupeta bwibungi. Mu bingi bipindji bya nsenga, bantu mbalombeene kwikala na malaka a kupeta telefone, moto, sunga kapindji ka nsenga. Mu angi ma mbalo namu, bantu abalakila kwikala na bilamba bya muulo ukaamine, nshibo ikata, sunga mootoka wa makuta ebungi. Kadi sunga twekala mbalo kinyi na makuta e bungi bwi naminyi, twi balombeene kubanga kulakila bintu bibungi byatushii nabyo lukalo sunga byatushii balombeene kupeta.

3. Lwabi lwa bintu bya ku mbidi nkinyi?

³ Lwabi lwa bintu bya ku mbidi nkinyi? Nyi mwikeelo wa muntu mukambe kwipaana ku bintu bya kumbidi kukila kipwano kyaaye n’Efile Mukulu. Tasangalaa penda na bintu byadi nabyo lukalo nya, kadi akumina nka kupeta bintu bibungi. Mpa na bantu bashii na makuta ebungi sunga bashi na bintu bya muulo wibukopo be kwikala na lwabi lwa bintu bya ku mbidi. Be kukita bino nsaa yabalekye kutuula Bufumu pa mbalo ya kumpala mu muwa wabo.​—Beena-Ebelu 13:5.

4. Satana afubishaa “ndakalaka ya meeso” naminyi?

⁴ Satana akyebe kwitukuminyisha’shi, bwa’shi twikale na muloo mu muwa wetu abitungu twikale nka na bintu bibungi. Ngi bwakinyi kwete kufuba na ndumbulwilo aaye na “ndakalaka ya meeso” bwa kwitutakula mu kukimba bintu bibungi. (1 Yowano 2:15-17; Kibangilo 3:6; Nkindji 27:20) Nsaa yooso tukwete kumona na kupusha bantu abakimbi bya kwitutakula mu kuula bintu bipya. We muule kintu kampanda mu kisalwe nka pa mwanda wa’shi bwekimono buwa ku meeso sunga pa mwanda we mumone sunga kupusha kwabekikampula su? Su we mukite byabya, we nkamona kunyima’shi twekalanga na lukalo lwa kyakya kintu nya. Su twatungunuka na kuula bintu byatushii nabyo lukalo, atulwisha nshaleeleo eetu. Byabya bintu mbilombeene kukatusha binangu byetu ku mufubo wa Yehowa. Bu kileshesho twi kukutwa nsaa ya kwilongyela Bible, kulumbuula bisangilo na kwenda mu bulungudi lubingo looso. Tentekyesha’shi, Yowano mutumiibwa betudimwishe’shi: Bintu “bya pano abikidi, abyo na malaka aabyo.”

5. Nkinyi kilombeene kufikila bantu abafubu na bukome bwabo booso bwa kukimba bintu bikile bungi?

⁵ Satana akumina’shi tufube na bukome bwetu booso bwa kukimba makuta na bintu bibungi pamutwe pa kufubila Yehowa. (Mateo 6:24) Byabya patwipaana nka penda mu kukimba bintu bya kumbidi bibungi, nshalelo eetu tekala na muulo nya. Twi balombeene kwikala na twinyongoshi twibungi sunga kutwelakana mu mabaasa. Bubi bwabyo, twi balombeene kushimisha lukumiino lwetu mwi Yehowa na Bufumu bwaye. (1 Timote 6:9, 10; Kibafumbwilwe 3:17) Yesu bambile’shi “malaka a bingi bintu” e nka bu milobo ayikutshishwa lubyo byaludya kukula na kutusha bikuba.​—Maako 4:14, 18, 19.

6. Ndilongyesha kinyi dyatupete ku kileshesho kya Baruke?

⁶ Banda kunangusheena pa kileshesho kya Baruke, kaleeleki ka mutemuki Yeelemiya. Pabaabangile Baruke kukimba “myanda ikata,” Yehowa bamutentekyeshe’shi Yeelusaleme abutulwa binobino. Kadi balayile Baruke’shi akapaasha muwa waye. (Yeelemiya 45:1-5) Baruke tabaadi na kya kukimba bingi bintu nya. Yehowa tabaadi akyebe kupaasha bintu bya bantu nya. (Yeelemiya 20:5) Lelo uno, twi mu mafuku a ku nfudilo kwa ndumbulwilo a Satana. Byabya ano ta mafuku a kukimba bya kupeta bintu bikile bungi nya. Na dingi tatukulupilanga’shi kunyima kwa mpombo ikata atukekala nka na bintu bya kumbidi byatudi nabyo binobino nya, sunga byekala na muulo ku meeso kwetu.​—Nkindji 11:4; Mateo 24:21, 22; Luka 12:15.

7. Binobino atukyebe kutaluula kinyi, na bwakinyi?

⁷ Byabya twi balombeene kulombasha nkalo yetu na ya beena bifuko byetu na kushaala bepaane ku mwanda wi na muulo ukata mu muwa wetu naminyi? Twi kusuuka lwabi lwa bintu bya ku mbidi naminyi? Na nkinyi ki bya kwitukwasha bwa kupela kukamba kwikalakasha bwa bintu byatudi nabyo lukalo? Yesu betupeele elango dibuwa pabitale uno mwanda mu Mwisambo waye wa pa mwengye. (Mateo 6:19-21) Tubandeyi kubadika na kutaluula mukanda wa Mateo 6:25-34. Kukita bino akuketukwasha bwa kushala bashinkamishe’shi abitungu kukimba Bufumu, pamutwe pa bintu bya ku mbidi.​—Luka 12:31.

8, 9. (a) Bwakinyi tabitungu’shi twikale atwikalakasha bikilekile bwa bintu byatudi nabyo lukalo? (b) Yesu baadi auku myanda kinyi pabitale bantu na nkalo yaabo?

⁸ Badika Mateo 6:25. Yesu baadi muukye’shi balondji baye babaadi abekalakasha pabitale bya  kudya, kutoma, na kufwala. Ngi bwakinyi mu Mwisambo waye wa pa mwengye bebalungwile’shi: “Tanwikalanga na katshim’a-munda bwa muwa wenu.” Yesu baadi mwibakwashe bwabadya kupusha bwakinyi ta mbalombeene kwikalakasha bwa bino bintu byoso. Badi muukyenyi’shi su babakamba kwikalakasha bwa bintu byabadi nabyo lukalo, abakayilwankana myanda i na muulo mu nshalelo aabo. Na dingi Yesu baadi apasukila balongi baye ngofu nyi bwakinyi mu Mwisambo waye wa pa mwengye baadi mwibadimushe misango ibungi pabitale masaku a kwipaana mu kukimba bintu bya ku mbidi.​—Mateo 6:27, 28, 31, 34.

⁹ Bwakinyi Yesu baadi mwitulungule bwa kupela kwikalakasha bwa byakudya, bya kutoma, na bya kufwala? Ta twi na lukalo na byakudya na bya kufwala su? Twi nabyo lukalo binyibinyi! Na su tatwi na mushindo wa kupeta bino bintu, ta bi bubi kwikalakasha bwabyo nya. Yesu baadi auku byabya. Baadi auku bintu byabadi nabyo lukalo kwi bantu. Baadi auku’shi “mu mafuku a ku nfudiilo,” balongi baaye abakekala mu mafuku e myanda ibukopo. (2 Timote 3:1) Byabya, bantu bebungi ta be na mushindo wa kupeta mudimo, na bintu bikwete kwenda na kukaamina muulo. Mu ma mbalo ebungi, bantu be na bulanda bukile na be mu nsala. Kadi Yesu baadi auku dingi’shi muwa wa muntu wi na muulo kukila bya kudya, na mbidi ngikile kilamba.

10. Nsaa ibaadi Yesu mulongyeshe balondji baye bwa kuteka, nkintu kinyi kibaadi muleeshe’shi ki na muulo ukata mu nshalelo aabo?

¹⁰ Kumpala kwa byabya, Yesu balongyeshe balongi baaye’shi, nsaa yabatekye, mbalombeene kuteka Nshabo e mwiyilu bwadya kwibapa bintu byabadi nabyo lukalo. Babaadi balombeene kuteka’shi: “Etupe lelo kya-kudya kyatudi nakyo lukalo.” (Mateo 6:11) Ungi musango bebalungwile bwabadya kuteka’shi: “Etupe bya-kudya byatudi nabyo lukalo efuku dyooso.” (Luka 11:3) Anka bino taabilesha’shi abitungu twikale atunangusheena nsaa yooso pabitale mushindo wa kupeta bintu byatudi nabyo lukalo nya. Byabya, Yesu balungwile balondji baaye’shi kuteka bwa’shi Bufumu bw’Efile Mukulu bufikye nyi kintu ki na muulo kukila kuteka bwa nkalo yaabo. (Mateo 6:10; Luka 11:2) Bwa kukwasha balongi baaye bwa’shi balekye kwikala abekalakasha, Yesu bebanyingishe pa kwibatentekyesha kipaso akipasukilaa Yehowa bipangwa byaaye.

11, 12. Kipaso ky’abapasukilaa toonyi kwi Yehowa akitulongyesha kinyi? (Tala kifwatulo ki kumbangilo.)

¹¹ Badika Mateo 6:26. Abitungu ‘tutale toonyi twa mwiyilu.’ Sunga toonyi twekala tuntu tupeela, atudiyaa ngofu. Byabya, su koonyi kabadya kwikala bukata bumune na muntu, kabadya kwikala akadi bya-kudya kukila muntu. Toonyi atudiyaa bikuba, ntete, twishi na misadi. Tatwikalaa na lukalo lwa kukuna mbyo na kutengyela bwa’shi bidibwa byato bikome nya. Yehowa apeyaa toonyi bintu byatudi nato lukalo. (Misambo 147:9) Byabya, t’elaa bidibwa mu madiilo a toonyi nya! Abitungu’shi toonyi twende mu kwibikimba, kadi atukasanganaa nka bidibwa byato.

¹² Yesu baadi mushinkamishe’shi su Nshaye adishaa toonyi, akadisha namu bantu. ^[1] (Tala mayi e ku nfudiilo.) (1 Mpyeele 5:6, 7) Byabya, nka bu toonyi, tabitungu twekala bantu bashii na mudimo nya. Abitungu’shi twikale atudimi sunga kukimba makuta bwa kuula bidibwa. Yaya nsaa Yehowa e kwitwelela myabi. Nsaa yatushii na makuta sunga bya kudya, mmulommbeene dingi kwitulombeesha nkalo yeetu. Bu kileshesho, bangi bantu be kwitwitanyina bwa’shi tudye nabo pamune. Yehowa apeyaa dingi toonyi mbalo ya kushaala. Mmupe toonyi ngobesha ya kwibaka eswa, na mmupangye bintu abikwasha toonyi bwatudya kwibaka maswa. Yehowa etukwasha bwa kupeta mbalo yatudya kushala na kifuko kyetu.

13. Nkinyi akileesha’shi twi na muulo kukila toonyi?

¹³ Kunyima kwa Yesu kutentekyesha balongi baaye’shi Yehowa adishaa toonyi, bebayipwishe’shi: “Anwe tanwi na kineemo kwitukila su?” (Tala byabidi bipusheene na Luka 12:6, 7.) Pabaadi akula bino, Yesu baadi ele binangu pabitale bibaadi akyebe kutuusha muwa waye bwa  bantu booso. Eyendo, Yesu tamufwile toonyi sunga ingi nyema nya. Betufwidile’twe bantu bwa’shi tukapete muwa wa ikalaika.​—Mateo 20:28.

14. Muntu e na twinyongoshi ta mulombeene kukita kinyi?

¹⁴ Badika Mateo 6:27. Yesu baadi akyebe kwamba kinyi nsaa ibambile’shi tatwi balombeene kufiimisha bungi bwa mafuku eetu pa kwinyongola? Baadi akyebe kwamba’shi tatwi balombeene kufiimisha bungi bwa mafuku a muwa wetu nsaa yatwinyongola bwa bintu byatudi nabyo lukalo. Anka su tubekala na twinyongoshi nsaa yooso, twi kukumba maladi na kufwa.

15, 16. (a) Kipaso akipasukilaa Yehowa bilongo bya mu mapya akitulongyesha kinyi? (Tala kifwatulo ki kumbangilo.) (b) Ndukonko kinyi lwatudi balombeene kwiyela, na bwakinyi?

¹⁵ Badika Mateo 6:28-30. Atwikalaa na muloo nsaa yatupete bilamba bibuwa, bikishekishe nsaa yatwende mu bulungudi sunga patutwele mu bisangilo na mu bikongeeno byetu. Kadi abitungu’shi ‘pa mwanda wa bilamba . . . twikale n’eshimba kwiyilu’ su? Pano, Yesu badi mutentekyeshe balongi baaye kipaso kyabakwete kupasukila bipangwa kwi Yehowa. Yesu batshile kileshesho kya “bilongo bya mapya.” “Bilongo” bibaadi mwakwile bi kwikala bilongo bi bu nsungulume, kilongo kya mbushi na napimbya. Takwi kilongo su nkimune kilombeene kwiteela bilamba  nya. Kadi abimwenekaa buwa bukile ngi bwakinyi Yesu bambile’shi: “Salomone nabeene, mu nkumo yaaye yooso, tabaadi mufwale buu kimune kyaa kwabidi nya”!

¹⁶ Banda kwela binangu pa ano mayi abakwile Yesu: “Su Efile Mukulu afwadika byabya kisuku kya mapya . . . tee kwinukitshina bikile paapa, bantu ba lukumiino lupeelayi?” Eyendo aketukitshina byanka! Anka bibaadi abitungu’shi balongi ba Yesu bekale na lukumiino lwibungi. (Mateo 8:26; 14:31; 16:8; 17:20) Bibaadi abitungu bakulupile’shi Yehowa e bya kulombasha nkalo yaabo na akebikitshi binyibinyi. Atwe namu twi kwamba naminyi? Twi bashinkamishe’shi Yehowa akalombasha nkalo yetu su?

17. Nkinyi kilombeene kulwisha kipwano kyeetu na Yehowa?

¹⁷ Badika Mateo 6:31, 32. Bantu bebungi bashi’abauku Yehowa abepanaa mu kukimba makuta ebungi na bintu bya ku mbidi. Kadi su’twe namu twakita byabya, twi balombeene kulwisha kipwano kyeetu naye. Atuuku’shi Yehowa nyi Nsheetu mwitufule. Na twi bashinkamishe’shi su tubatumikila myanda yooso y’etutekye na kutuula Bufumu bwaye pa mbalo ya kumpala mu muwa wetu, aketupa bintu byooso byatudi nabyo lukalo na kwitutentekyela bingi. Atushinguula dingi’shi kwikala mu kipwano na Yehowa nyi akwitwikasha na muloo wa binyibinyi, na bino abitukwasha bwa kusangala nsaa yatupete  “bidiibwa na bilamba” byatudi nabyo lukalo.​—1 Timote 6:6-8.

18. Yehowa auku myanda kinyi itutale, na aketukitshina kinyi?

¹⁸ Badika Mateo 6:33. Su tubatuulu Bufumu bw’Efile Mukulu pa mbalo ya kumpala mu muwa wetu, byabya Yehowa namu akalombasha nkalo yetu yooso. Yesu baadi mupatuule bwakinyi twi balombeene kukulupila uno mulayilo. Bambile’shi: “Nsheenu a mwiyilu auku kalolo’shi nwi na dikyenga dya bintu byooso byabya.” Yehowa auku bintu byodi nabyo lukalo mpa na kumpala kwa’shi oshinguule’shi we nabyo lukalo. (Beena-Fidipe 4:19) Auku kalolo’shi kino kilamba kyodi nakyo akilwila mu mafuku e kumpala. Auku dingi bya kudya byodi nabyo lukalo. Na dingi auku’shi obe na kifuko kyobe nwi na lukalo na mbalo ya kushaala. Yehowa akakulombeesha bintu byooso byodi nabyo lukalo.

19. Bwakinyi tabitungu twekala atwikalakasha pabitale byatukekala mu mafuku aafiki?

¹⁹ Badika Mateo 6:34. Pano dingi Yesu balungwile balongi baaye’shi: “Tanwikalanga na katshim’a-munda.” Yehowa aketulombeesha nkalo yetu ya kwifuku n’efuku. Ngi bwakinyi tabitungu twikale atwikalakasha bikilekile pabitale byatukekale mu mafuku aafiki nya. Su twakita byabya, twi kubanga kwikulupila atwe banabeene, na bino mbilombeene kulwisha kipwano kyetu na Yehowa. Anka, abitungu tukulupile mwi Yehowa n’eshimba dimune.​—Nkindji 3:5, 6; Beena-Fidipe 4:6, 7.

20. (a) Mbiipatshila kinyi byodi mulombeene kwiatshila mu mudimo wa Yehowa? (b) We kukita kinyi bwa kwikala na nshaleelo mupeelepeele?

²⁰ Mbilombeene kwikala bubi bukile su twakutwa bukome bwa kufubila Yehowa pamwanda twi bepaane mu kukimba bintu bya ku mbidi bibungi! Pamutwe pa byabya, twi balombeene kupa Yehowa bintu byetu bya muulo. Bu kileshesho, we kwenda mu kukwasha kakongye ke na lukalo lwa balungudi. We kufuba bu mbala-mashinda. Su we mupwe kwikala mbala-mashinda, we kunangusheena bwa kutwela mu kalasa ka Balungudi ba Bufumu. Pangi we kwata ndambo ya mafuku mu lubingo bwa kwenda mu kukwasha ku Betele sunga ku biro bya baluudi bi mu kibundji kyenu. Sunga’shi we kwenda mu mudimo wa kwibaka sunga kufuba na nsaa yoobe bwa kukwasha ku lwibako lwa Mashibo a Bufumu. Banda kunangusheena pa myanda yoodi mulombeene kukita bwa kwikala na nshaleelo mupeelepeele bwa’shi opete nsaa na bukome bwibungi bwa kufuba midimo ya Bufumu. We kupeta ingi milango mu kashibo akamba’shi “ Mushindo odya kwikala na nshalelo mupelepele.” Teka Yehowa bwa’shi akukwashe bwa kwata kitshibilo kibuwa. Akupu abitungu oshintuule ingi myanda.

21. Nkinyi akikakukwasha bwa kwifubwila peepi na Yehowa?

²¹ Yesu balongyeshe balongi baaye bwabadya kubanda kukimba Bufumu. Su tubakitshi byabya, atukaleka kwikalakasha bikilekile pabitale bintu byatudi nabyo lukalo. Atukefubwila peepi na Yehowa mwanda atukulupila’shi etulombeesha nkalo yetu. Atukalongo bya kwikanda na kupela kuula kintu kyooso kyatulakila sunga kintu kyooso kyabatuusha mu uno ndumbulwilo, sunga twekala na mushindo wa kwikiula. Su tubekala na nshaleelo mupeelepeele kubanga binobino, abiketukwasha bwa kushaala na lukumiino mwi Yehowa na “kutambula muuwa wa biinyibiinyi.”​—1 Timote 6:19.