Tou Kumi Ia Te Puleʼaga, Kaʼe Mole Ko Te ʼu Koloa
“Ke kotou haga kumi [te] Puleʼaga [ʼo te ʼAtua], pea ko te ʼu meʼa fuli ʼaia ʼe toe foaki atu anai kia koutou.”—LUKA 12:31, MN.
KATIKO: 40, 98
1. Kotea te kehekehe ʼo te ʼu meʼa ʼae ʼe ʼaoga kia tatou mo te ʼu meʼa ʼae ʼe tou loto ki ai?
ʼE MOLE lahi te ʼu meʼa ʼae ʼe ʼaoga kia tatou ke tou maʼuʼuli ai. Ohage la, ʼe ʼaoga kia tatou te meʼa kai, mo te meʼa laofi pea mo hotatou nofoʼaga. Kaʼe ʼe mole he gataʼaga ʼo te ʼu meʼa ʼae ʼe tou loto ki ai. Pea ʼe mole mahino te tokolahi, ʼe mole ʼaoga kia natou te ʼu meʼa fuli ʼae ʼe natou loto ki ai.
2. Kotea la he ʼu meʼa ʼe loto ki ai te hahaʼi?
2 ʼE lagi kehekehe te ʼu meʼa ʼae ʼe loto ki ai he tahi ʼe maʼuli ʼi he fenua masiva mo ia ʼae ʼe maʼuli ʼi he fenua koloaʼia. ʼI ʼihi fenua, ʼe fia maʼu anai e te hahaʼi ia he telefoni, he motopai peʼe ko honatou kele. Pea ʼi ʼihi atu potu fenua, ko te hahaʼi ʼe natou fia maʼu he ʼu teu ʼe totogi kovi, mo he ʼapi matalelei, peʼe ko he motoka ʼe totogi kovi age. Logo la te koga meʼa ʼe tou maʼuʼuli ai mo te lahi ʼo tatatou foʼi falā, kaʼe ʼe feala ke mole ʼaoga kia tatou te ʼu meʼa ʼae ʼe tou loto ki ai, pea ʼe lagi mole feala ke tou totogi te ʼu meʼa ʼaia.
TOU TOKAKAGA KI TE FIA MAʼU KOLOA
3. Kotea ia te fia maʼu koloa?
3 Kotea ia te fia maʼu koloa? ʼE ko te tokaga tafitō ʼa he tahi ki te ʼu koloa ʼi ʼana felogoʼi ʼae mo te ʼAtua. ʼE mole gata ʼaki pe te ʼu meʼa ʼae ʼe ʼaoga kia ia, kaʼe ʼe loto tuʼumaʼu pe ia ke toe lahi age te ʼu meʼa ʼae ʼe ina maʼu. Maʼia foki la mo natou ʼae ʼe mole lahi tanatou foʼi falā, ʼe feala ke natou fia maʼu koloa. ʼE lagi mole kei natou fakamuʼamuʼa te Puleʼaga ʼi tonatou maʼuli.—Hepeleo 13:5.
4. ʼE fakaʼaogaʼi feafeaʼi e Satana “te manumanu o te u mata”?
4 ʼE loto e Satana ke tou tui, ʼe hoki feala pe ke tou maʼuʼuli fiafia moka lahi te ʼu meʼa ʼae ʼe tou maʼu. Koia ʼe ina fakaʼaogaʼi tona malama pea mo “te manumanu o te u mata,” ke lahi tuʼumaʼu pe te ʼu meʼa ʼae ʼe tou loto ki ai. (1 Soane 2:15-17; Senesi 3:6; Taaga Lea 27:20) ʼE tou sisio pea mo tou logo tuʼumaʼu ki te ʼu fakahaha ʼo te ʼu koloa, ʼae ʼe fakalotoʼi ai tatou ke tou olo ʼo totogi te ʼu meʼa foʼou. Neʼe kua ke totogi koa he meʼa ʼuhi pe ko tau sio ki ai ʼi te koloa? Pe neʼe kua ke totogi koa he meʼa ʼuhi pe ko tau sio ki tona fakahaha? Kapau koia, neʼe lagi ke sio ki muli age ʼe mole ʼaoga moʼoni te meʼa ʼaia kia koe. Ka tou totogi tuʼumaʼu he meʼa ʼe mole ʼaoga kia tatou, ʼe tou fakamafasia ai totatou maʼuli. Koteʼuhi ʼe feala ai ke fakaleluʼi tatatou tauhi ʼae kia Sehova. Ohage la, ʼe feala ke mole kei maʼu ai hotatou temi ki te ako ʼo te Tohi-Tapu, mo te teuteuʼi ʼo te ʼu fono pea mo te kau ki te faifakamafola. Tou manatuʼi ia te fakatokaga ʼaeni ʼa te apositolo ko Soane: “E puli te malamanei, mo ona holi foki.”
5. Kotea ʼe feala ke hoko kia natou ʼae ʼe gaue kinakina ke natou maʼu koloa?
5 ʼE loto e Satana ke tou gaue kinakina ke lahi age tatatou foʼi falā mo ʼotatou koloa, kaʼe mole ki tatatou tauhi ʼae kia Sehova. (Mateo 6:24) Kaʼe kapau ʼe tou fia maʼu koloa pe tatou, pea ʼe mole anai he ʼuhiga ʼo totatou maʼuli. ʼE feala ke mole tou maʼuʼuli fiafia peʼe ke tou to ki he ʼu fihifihia fakapaʼaga. Peʼe feala ke puli ai tatatou tui ʼae kia Sehova mo tona Puleʼaga. (1 Timoteo 6:9, 10; Apokalipisi 3:17) Neʼe ui e Sesu, ko “te ʼu holi ʼae ki niʼihi atu meʼa,” ʼe hage ia ko te vao kovi ʼae ʼe ina taʼofi te homo ʼa te pulapula pea ke ʼi ai hona ʼu fua.—Maleko 4:14, 18, 19, MN.
6. Kotea te ako ʼe tou taʼofi mai te faʼifaʼitaki ʼa Paluke?
6 Tou fakakaukauʼi age muʼa ia te aluʼaga neʼe hoko kia Paluke, te sikalaipe ʼa te polofeta ko Selemia. ʼI te temi ʼae neʼe kamata kumi ai e Paluke ‘ni meʼa lalahi’ maʼa ia totonu, neʼe fakamanatuʼi age e Sehova kua ina vave pulihi pe anai ia Selusalemi. Kaʼe neʼe fakapapauʼi e Sehova kia Paluke, ʼe ina haofaki anai tona maʼuli. (Selemia 45:1-5) Neʼe mole tonu ke fakaʼamu ia Paluke ki he tahi age ʼu meʼa. Koteʼuhi ʼe pulihi anai e Sehova ia te ʼu koloa fuli ʼa te hahaʼi. (Selemia 20:5) Ia ʼaho nei, ʼe tou maʼuʼuli ʼi te temi fakaʼosi ʼo te malama ʼa Satana. Koia ʼe mole ko he temi ʼaeni ke tou haga kumi ai he ʼu koloa maʼa tatou. Pea ʼaua tatatou manatu ʼae ʼe tou toe maʼu pe anai ʼotatou koloa ʼi te hili ʼo te mamahi lahi, tatau aipe pe ʼe maʼuhiga te ʼu koloa ʼaia kia tatou.—Taaga Lea 11:4; Mateo 24:21, 22; Luka 12:15.
ʼE mole ko he temi ʼaeni ke tou haga kumi ai he ʼu koloa maʼa tatou
7. Kotea ʼae ka tou vakaʼi anai, pea kotea tona tupuʼaga?
Mateo 6:19-21) Koia ʼe tou lau pea mo faipalalau anai kia Mateo 6:25-34. Koteʼuhi ʼe ʼekenaki ai anai tatou ke tou haga kumi muʼa ia te Puleʼaga, kaʼe mole ko te ʼu koloa.—Luka 12:31.
7 Kaʼe, ʼe feafeaʼi hatatou tokakaga kia tatou totonu mo totatou kiʼi famili, pea mo tou tokakaga aipe ki te ʼu faʼahi maʼuhiga tafitō ʼo te maʼuli? ʼE feafeaʼi hatatou teteke ia te fia maʼu koloa? Pea kotea ʼae ka tokoni mai anai ke mole tou hoha fau ki te ʼu meʼa ʼae ʼe ʼaoga kia tatou? Neʼe foaki mai e Sesu ia te ʼu tokoni ʼae ʼe lelei tuku pau ʼo ʼuhiga mo te ʼu faʼahi ʼaia, ʼi tana Akonaki ʼi Te Moʼuga. (ʼE FOAKI MAI E SEHOVA TE ʼU MEʼA ʼAE ʼE ʼAOGA KIA TATOU
8, 9. (1) He koʼe ʼe mole tonu ke tou hoha fau ki te ʼu meʼa ʼae ʼe ʼaoga kia tatou? (2) Kotea ʼae neʼe iloʼi e Sesu ʼo ʼuhiga mo te hahaʼi pea mo te ʼu meʼa ʼae ʼe ʼaoga kia natou?
8 Lau ia Mateo 6:25. Neʼe iloʼi e Sesu, neʼe tuʼania ʼana tisipulo ki te meʼa kai, te meʼa inu pea mo te meʼa laofi. Koia ʼae neʼe ina fai ai te fakatotonu ʼaeni kia natou ʼi tana Akonaki ʼi Te Moʼuga: “Aua naa kotou tuania ki tokotou mauli.” Neʼe loto e Sesu ke natou mahino pe koʼe ʼe mole tonu ke natou tuʼania ki te ʼu meʼa fuli ʼaia. Pea neʼe mahino ia Sesu, kapau ʼe natou hoha fau ki te ʼu meʼa ʼae ʼe ʼaoga kia natou, neʼe feala ke mole natou toe tokakaga ki te ʼu faʼahi maʼuhiga ʼo te maʼuli. Neʼe ina fakatokaga tuʼa fa ʼana tisipulo ʼi tana akonaki ʼo ʼuhiga mo te tuʼutamaki ʼaia, koteʼuhi neʼe lahi tona ʼofa kia natou.—Mateo 6:27, 28, 31, 34.
9 Kaʼe he koʼe neʼe ui mai e Sesu ke mole tou tuʼania ʼo ʼuhiga mo te meʼa kai, te meʼa inu mo te meʼa laofi? ʼE mole koa la ʼaoga kia tatou ia te meʼa kai pea mo te meʼa laofi? ʼEi. Pea ʼe mole kovi hatatou tuʼania mo kapau ʼe mole feala hatatou maʼu ia te ʼu meʼa ʼaia. Neʼe mahino ia Sesu ki te aluʼaga ʼaia. ʼE ʼaoga te ʼu meʼa ʼaia ki te hahaʼi. Pea neʼe iloʼi e Sesu ʼe tau anai ʼana tisipulo mo ni fihifihia lahi lolotoga “te u aho fakamuli.” (2 Timoteo 3:1) ʼI tona fakahagatonu, ʼe mole feala ki te tokolahi ia ʼaho nei hanatou maʼu he gaue pea kua ʼasilisili totogi kovi ia te maʼuli. ʼE lahi te ʼu fenua, ʼe masisiva ʼaupito ai te hahaʼi, ʼe mole feʼauga tanatou meʼa kai peʼe mole pe la ʼi ai hanatou meʼa kai. Kaʼe neʼe toe iloʼi e Sesu, ʼe maʼuhiga age te maʼuli ʼo he tahi ʼi te meʼa kai, pea ko te sino ʼi te meʼa laofi.
Neʼe ui e Sesu ʼe maʼuhiga age te maʼuli ʼo he tahi ʼi te meʼa kai, pea ko te sino ʼi te meʼa laofi
10. Ohage ko tona ui e Sesu, kotea ʼae ʼe tonu ke maʼuhiga age ʼi tonatou maʼuli?
10 ʼI tana akonaki ʼi te moʼuga, neʼe akoʼi e Sesu ʼana tisipulo ke natou faikole ki tanatou Tamai ʼae ʼe ʼi selo, ke ina foaki age te ʼu meʼa ʼae ʼe ʼaoga kia natou. Pea neʼe feala ke natou faikole fenei: “Foaki mai kia matou i te aho nei te pane o te aho taki tahi.” (Mateo 6:11) ʼI te tahi lakaga, neʼe ina ui age ke natou faikole fenei: “Foaki mai tamatou pane ki te ʼaho ʼaeni, ʼae ʼe ʼaoga ki te ʼaho nei.” (Luka 11:3, MN) ʼE mole fakaʼuhiga leva ʼe tonu ke tou manatu tuʼumaʼu pe ki te ʼu meʼa ʼae ʼe ʼaoga kia tatou. Kaʼe neʼe ui e Sesu ki ʼana tisipulo ʼe maʼuhiga age tanatou faikole ʼae ke hoko mai te Puleʼaga ʼo te ʼAtua, ʼi hanatou faikole ki te ʼu meʼa ʼae ʼe ʼaoga kia natou. (Mateo 6:10; Luka 11:2) Neʼe fia tokoni ia Sesu ki ʼana tisipulo ke tuku tanatou tuʼania. Koia ʼae neʼe ina fakalotofimalieʼi ai natou ʼaki tana fakamanatuʼi age, ʼe tokaga ia Sehova ki ʼana fakatupu fuli.
11, 12. Kotea te ako ʼe tou taʼofi mai te faʼahiga tokaga ʼae ʼa Sehova ki te ʼu manulele? (Vakaʼi te ʼuluaki pāki.)
11 Lau ia Mateo 6:26. ʼE tonu ke tou “sisio ki te u manulele o te lagi.” Logo la ko te ʼu kiʼi manu ʼe liliki, kaʼe ʼe natou faʼa kakai. ʼI tona fakahagatonu, ka na pau la neʼe natou lalahi ohage ko te tagata, ʼe toe lahi age pe anai tanatou kakai. ʼE natou kai te ʼu fuaʼi ʼakau, te ʼu pulapula, te ʼu kiʼi manu liliki pea mo te ʼu ʼunukele. Kaʼe ʼe mole natou to pulapula pea ʼe mole natou gaue kele ke maʼu hanatou meʼa kai. ʼE foaki e Sehova ia meʼa fuli ʼae ʼe ʼaoga kia natou. (Pesalemo 147:9) ʼE mahino ia, ʼe mole ʼai anai e Sehova te meʼa kai ki ʼonatou gutu. Kaʼe ʼe tonu ke natou olo ʼo kumi tanatou meʼa kai.
12 Neʼe tui papau ia Sesu, mo kapau ʼe tokaga ia tana Tamai ki te ʼu manulele, ʼe toe tokaga anai ia ki te hahaʼi. (Vakaʼi te nota ʼi te fakaʼosi ʼo te alatike.) (1 Petelo 5:6, 7) Ohage pe ko te ʼu manulele, ʼe mole tonu ke tou pipiko. ʼE tonu ke tou gaue ke tou maʼu hatatou meʼa kai peʼe ke tou maʼu hatatou foʼi falā moʼona totogi. Ko Sehova ʼe ina tapuakina anai ʼatatou faiga. Pea moka mole feʼauga tatatou foʼi falā peʼe ko tatatou meʼa kai, ʼe feala ke foaki mai e Sehova ia te ʼu meʼa ʼae ʼe ʼaoga kia tatou. Ohage la, ʼe feala ke vaevae e ʼihi te ʼu meʼa ʼae ʼe natou maʼu mo tatou. Ko Sehova ʼe ina toe foaki ki te ʼu manulele tonatou nofoʼaga. Neʼe ina foaki te fealagia ʼae ki te ʼu manulele ke natou faʼu ʼonatou fataʼi, pea ko te ʼu meʼa fuli ʼae ʼe ʼaoga ki ʼonatou fataʼi, neʼe faʼu e Sehova. ʼO toe feia pe, ʼe feala ke tokoni mai ia Sehova ke tou maʼu he kiʼi nofoʼaga ke tou maʼuʼuli ai mo totatou famili.
13. Kotea te fakamoʼoni ʼae ʼe ha ai ʼe tou maʼuhiga age ʼi te ʼu manulele?
13 ʼI te ʼosi fakamanatuʼi e Sesu ki ʼana tisipulo ia te haga ʼae ʼa Sehova ʼo fafaga te ʼu manulele, neʼe ina ui fenei age: “E mole kotou mauhiga lahi age ia natou?” (Vakaʼi ia Luka 12:6, 7.) ʼI tana fai te ʼu palalau ʼaia, neʼe lagi manatu ia Sesu ki tana kua vave foaki ia tona maʼuli maʼa te malamanei. ʼEi, ko Sesu neʼe mole mate ʼuhi ko he ʼu manulele peʼe ko he tahi atu ʼu manu. Kaʼe neʼe mate ia maʼa tatou ke feala ai hatatou maʼu te maʼuli heʼe gata.—Mateo 20:28.
14. Kotea ʼae ʼe mole feala ke fai e he tahi moka lahi fau tana hoha?
14 Lau ia Mateo 6:27. Kotea te fakaʼuhiga ʼo te ui ʼae ʼa Sesu, ʼe mole feala ke tou hilifaki he tuli nima ki totatou maʼuli moka tou hoha? Neʼe ina fia ui, ʼe mole feala ke tou fakaloaloa atu totatou maʼuli moka tou hoha fau ki te ʼu meʼa ʼae ʼe ʼaoga kia tatou. Koteʼuhi ʼi tona fakahagatonu, kapau ʼe lahi fau tatatou hoha, ʼe feala ai ke tou mahahaki pea mo tou mamate.
15, 16. (1) Kotea te ako ʼe tou taʼofi mai te faʼahiga tokaga ʼa Sehova ki te ʼu fisiʼi teu? (Vakaʼi te ʼuluaki pāki.) (2) Kotea te ʼu fehuʼi ʼe ʼaoga ke tou fai kia tatou totonu, pea kotea tona tupuʼaga?
15 Lau ia Mateo 6:28-30. ʼE tou fiafia moka tou tui he ʼu mutuʼi meʼa matalelei, tafitō la moka tou olo ʼo faifakamafola peʼe ki te ʼu fono mo te ʼu fakatahi lalahi. Kaʼe ʼe ʼaoga koa ke tou ‘tuʼania ʼo ʼuhiga mo te meʼa laofi’? Ko te tahi ʼaeni fakamanatuʼi e Sesu ki ʼana tisipulo ʼe tokaga ia Sehova ki tana fakatupu fuli. Neʼe fakaʼaogaʼi e Sesu ia te faʼifaʼitaki ʼa “te u matala o te vao.” Neʼe lagi manatu ia Sesu ki te ʼu fisiʼi teu matalelei ohage ko te ʼu lilio. Pea ʼe mole he fisiʼi teu ʼe ina tui he ʼu mutuʼi meʼa. Kaʼe ʼi te lahi ʼo tonatou matalelei, neʼe ui ai e Sesu, “ko Salomone foki, i tona kololia katoa, nee mole teu o hage ko he tahi ia natou.”
16 Tou toe fakakaukauʼi age te ʼu palalau ʼaeni ʼa Sesu: “Kapau kua teu fenai e te Atua te luna o te vao, . . . pe e mole koutou mauhiga age ke ina laofi koutou, hahai tui vaivai?” ʼE mahino ia, ʼe ina fai anai. Kaʼe neʼe ʼaoga ke toe lahi age ia te tui ʼa te ʼu tisipulo ʼa Sesu. (Mateo 8:26; 14:31; 16:8; 17:20) Neʼe tonu ke natou falala kia Sehova, he ʼe fia tokaga kia natou pea mo ina fia fakahoko moʼoni te faʼahi ʼaia. Kaʼe ʼe feafeaʼi kia tatou? ʼE tou tui koa ko Sehova ʼe tokaga anai kia tatou?
ʼE tou tui koa ko Sehova ʼe tokaga anai kia tatou?
17. Kotea ʼae ʼe feala ke fakatupu kovi ki ʼatatou felogoʼi mo Sehova?
17 Lau ia Mateo 6:31, 32. Ko te tokolahi ia natou ʼae ʼe mole natou iloʼi ia Sehova, ʼe tokakaga tafitō ke natou maʼu falā pea mo maʼu koloa. Kaʼe kapau ʼe tou fai feia, ʼe fakatupu kovi anai ki ʼatatou felogoʼi mo Sehova. ʼE tou iloʼi ko Sehova ʼe ko tatatou Tamai pea ʼe ʼofa ia tatou. Pea ʼe tou tui papau, ka tou fai te meʼa ʼae ʼe ina kole mai pea mo tou fakamuʼamuʼa tona Puleʼaga ʼi totatou maʼuli, ʼe ina foaki mai anai ia meʼa fuli ʼae ʼe ʼaoga kia tatou ʼo laka atu. ʼE tou toe iloʼi foki, kapau ʼe tou maʼu he ʼu felogoʼi lelei mo Sehova, ʼe tou fiafia moʼoni ai anai. Pea ʼe tokoni mai anai ke tou maʼuʼuli fakafeʼauga ʼi ‘te meʼa kai mo te meʼa laofi.’—1 Timoteo 6:6-8.
ʼE KE FAKAMUʼAMUʼA KOA TE PULEʼAGA ʼO TE ʼATUA ʼI TOU MAʼULI?
18. Kotea ʼae ʼe iloʼi e Sehova ʼo ʼuhiga mo tatou takitokotahi? Pea kotea ʼae ka ina fai anai maʼa tatou?
18 Lau ia Mateo 6:33. Kapau ʼe tou fakamuʼamuʼa te Puleʼaga, ʼe foaki mai anai e Sehova ia meʼa fuli ʼae ʼe ʼaoga kia tatou. Neʼe fakamahino e Sesu pe koʼe ʼe feala ke tou tui papau ki te fakapapau ʼaia. Neʼe ina ui fenei: “E iloi e takotou Tamai i selo e natou aoga kia koutou.” (Vakaʼi te nota ʼi te fakaʼosi ʼo te alatike.) ʼE iloʼi fakatomuʼa e Sehova pe ʼe kotea ʼae ʼe ʼaoga kia koe. (Filipe 4:19) ʼE ina iloʼi pe ʼe ko te ʼu faʼahiga teu feafeaʼi ʼae ka ʼaoga anai kia tatou. ʼE ina toe iloʼi mo te faʼahiga meʼa kai ʼae ʼe ʼaoga kia koe. Pea ʼe ina iloʼi ʼe ʼaoga kia koe mo tou famili hokotou nofoʼaga. Ko Sehova ʼe tokaga anai ke ke maʼu te ʼu meʼa ʼae ʼe ʼaoga moʼoni kia koe.
19. He koʼe ʼe mole tonu ke tou tuʼania ki te ʼu aluʼaga ʼae ʼe feala ke hoko ʼi te ka haʼu?
19 Lau ia Mateo 6:34. Neʼe toe ui fenei e Sesu ki ʼana tisipulo: “Aua naa kotou tuania.” Ko Sehova ʼe ina foaki mai anai te ʼu meʼa ʼae ʼe ʼaoga kia tatou ʼi te ʼaho fuli. Koia ʼe mole tonu ke tou tuʼania fau ki te ʼu aluʼaga ʼae ʼe feala ke hoko ʼi te ka haʼu. Koteʼuhi ʼe feala ke tou kamata falala kia tatou totonu, ʼo tou maumauʼi ai ʼatatou felogoʼi mo Sehova. Kaʼe ʼe tonu ke tou falala katoa kia te ia.—Taaga Lea 3:5, 6; Filipe 4:6, 7.
KUMI MUʼA IA TE PULEʼAGA ʼO TE ʼATUA PEA ʼE TOKAGA ANAI IA SEHOVA KIA KOE
20. (1) Kotea he fakatuʼutuʼu ʼe feala ke ke fai ʼi te tauhi ʼae kia Sehova? (2) Kotea ʼe feala ke ke fai ke ke fakafaigafua ai tou maʼuli?
20 ʼE mole ko he agafakapotopoto hatatou fakaʼaogaʼi katoa totatou malohi ke tou maʼu koloa, kaʼe mole ki te tauhi ʼae kia ʼE Feafeaʼi Anai Hau Fakafaigafua Tou Maʼuli?” Faikole kia Sehova ke tokoni atu ke ke iloʼi pe ʼe kotea ʼae ʼe tonu ke ke fai. Hili ia, pea ʼe tonu anai ke ke fai he ʼu fetogi.
Sehova. ʼE tonu ke tou foaki kia Sehova ia te ʼu meʼa ʼae ʼe lelei tuku pau. Ohage la, ʼe feala koa ke ke alu ʼo tokoni ki he kokelekasio ʼe ʼaoga ki ai he kau faifakamafola? ʼE feala koa ke ke liliu ʼo pionie katoa? Peʼe kapau kua ke pionie katoa, ʼe feala koa ke ke kau ki te Ako ʼo Te Kau Faifakamafola ʼo Te Puleʼaga? ʼE feala koa ke ke gaue ʼi ni ʼu kiʼi ʼaho ʼo te vahaʼa ʼi te Petele peʼe ʼi he pilo faifakaliliu? Peʼe lagi feala ke ke kau kia natou ʼae ʼe natou laga te ʼu Fale Fono. Fakakaukauʼi age muʼa pe kotea ʼae ʼe feala ke ke fai moʼo fakafaigafua tou maʼuli, ke tupu ai hau fakaʼaogaʼi lahi tou temi mo tou malohi ki te ʼu gaue ʼo te Puleʼaga. ʼE ke maʼu he ʼu tokoni ʼaoga ʼi te fakamatala ʼae ʼi te ʼa takai “21. Kotea ʼae ka tokoni atu anai ke toe malohi age ʼau felogoʼi mo Sehova?
21 Neʼe akoʼi tatou e Sesu ke tou kumi 1 Timoteo 6:19.
muʼa te Puleʼaga. Kapau ʼe tou fai te faʼahi ʼaia, ʼe mole tou tuʼania fau anai ki te ʼu meʼa ʼae ʼe ʼaoga kia tatou. ʼE toe malohi age anai ʼatatou felogoʼi mo Sehova, koteʼuhi ʼe tou falala ʼe tokaga anai kia tatou. Tou ako ke tou lolomi ia tatou totonu, ʼo mole tou toʼo te ʼu meʼa fuli pe ʼae ʼe tou loto ki ai, peʼe ko te ʼu meʼa ʼae ʼe fakahaha e te malama kaʼe ʼe mole feala ke tou totogi. Kapau ʼe tou fakafaigafua totatou maʼuli ʼi te temi nei, ʼe feala ai anai ke tou nonofo agatonu kia Sehova pea mo ‘puke maʼu te maʼuli moʼoni’ ʼae neʼe ina fakapapauʼi mai.—[1] (palakalafe 12) Ko ʼihi kaugana ʼa Sehova neʼe mole feʼauga tanatou meʼa kai ʼi ʼihi temi. Ke tou mahino pe koʼe neʼe fakagafua e Sehova ke hoko te aluʼaga ʼaia, tou vakaʼi te alatike “Te ʼu Fehuʼi ʼa Te Kau Lautohi” ʼi Te Tule Leʼo (Fakafalani) ʼo te ʼaho 15 ʼo Sepetepeli 2014, ʼi te pasina 22.
[2] (palakalafe 18) ʼI te vaega ʼaeni pea mo ʼihi atu, ko matou ʼae neʼe matou fakailoga keheʼi.