1. Patorang ma boasa ringkot mamparrohahon tingki dohot na masa di humaliangta. (Ida gombar di mula ni parsiajaran.)

LAHO dipungka ma kebaktian. Mardalan ma ketua tu panggung jala dijangkon ma sude na ro. Diputar ma musik pamungka. Hundul ma angka na ro manangihon musik, jala dipaima do jamita na laho dipasahat. Alai, adong do pigapiga na so mamparrohahon hata ni ketua dohot musik na diputar. Ndang diboto nasida naung dipungka kebaktian i. Mardalani dope nasida jala adong na mangkatai tu donganna. On ma na boi masa molo ndang taparrohahon tingki dohot na masa di humaliangta. Parsiajaran na ringkot do on di hita, alana satongkin nai adong do ulaon na umbalga na laho masa, jala ingkon mangarade do hita tusi. Ulaon aha do i?

2. Boasa didok Jesus tu siseanna asa tongtong ”dungo”?

² Dipaingot Jesus do siseanna asa tongtong jaga jala mangarade tu ”ajal ni hasiangan on”. Dipaboa tu nasida, ”Tagam ma hamu; dungo ma hamu, ai ndang diboto  hamu, manang sadihari tingkina i!” Didok Jesus muse, ”Dungo ma hamu!” (Mat. 24:3; jaha Markus 13:32-37.) Di buku Mateus, dipaingot Jesus do siseanna. Dipaboa tu nasida, ”Dungo ma hamu; ai ndang diboto hamu ari haroro ni Tuhanmuna!” Dipaingot muse, ”Dibahen i sai tagam ma hamu, ai na ro ma Anak ni jolma i di na so pangkirimon ni rohamu!” Didok ibana muse, ”Jaga ma hamu, ai ndang diboto hamu arina manang sadiharina!”​—Mat. 24:42-44; 25:13.

3. Boasa ingkon taparrohahon sipaingot ni Jesus?

³ Diparrohahon Sitindangi Ni Jahowa do sipaingot na dilehon Jesus. Taboto do, hita mangolu di tingki parpudi jala jonok nama hasusaan bolon! (Dan. 12:4; Mat. 24:21) Songon na disurirangkon Jesus, di tingki parpudi, masa ma porang, godang sahit, gempa dohot haleon di godang inganan. Lam godang ma agama na so sintong jala lam jahat do angka jolma. Jala marbarita na uli do naposo ni Jahowa di liat portibi on. (Mat. 24:7, 11, 12, 14; Luk. 21:11) Maimaima ma hita di haroro ni Jesus na laho pasauthon lomo ni roha ni Jahowa.​—Mrk. 13:26, 27.

4. (a) Boasa porsea hita naung diboto Jesus andigan haroro ni Armagedon? (b) Nang pe ndang taboto andigan masa hasusaan bolon, aha do na tahaporseai?

⁴ Tingki ro hita tu kebaktian, taboto do andigan angka jamita dipungka. Alai, ndang boi taboto andigan masa hasusaan bolon. Tingki di portibi on Jesus, didok do, ”Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i.” (Mat. 24:36) Alai saonari, ra nunga diboto Jesus andigan masa Armagedon, alana Jesus do na manguluhon porang i. (Pgk. 19:11-16) Molo hita, ndang taboto andigan ro ajal ni portibi on. Alani i, mansai ringkot do asa tongtong dungo. Nunga ditontuhon Jahowa andigan masa hasusaan bolon, jala lam jonok ma ari i. Alani i, ”ndang tagamon tartading” ari i. (Jaha Habakuk 2:1-3.) Boasa porsea hita na laho masa i?

5. Paboa ma aha na patuduhon sai pasauton ni Jahowa do angka surirangNa.

⁵ Sai saut do surirang ni Jahowa! Pingkirhon ma tingki Ibana paluahon bangsoNa sian Mesir. Tingki i tanggal 14 Nisan 1513 SM. Disurat si Musa do taringot i, ”Jadi dung salpu ma opat ratus tolupulu taon i, boho ma di ari na sasada i, ruar ma sandok punguan ni Jahowa sian tano Misir.” (2 Mus. 12:40-42) Tanggal 14 Nisan 1943 SM, 430 taon andorang so dipalua bangso Israel, digohi Jahowa ma janjiNa mamasumasu pinompar ni si Abraham.  (Gal. 3:17, 18) Dung i, dipaboa Jahowa tu si Abraham, ”Ia pinomparmu gabe panompang ma di tano ni halak; gabe hatoban disi jala porsuk bahenonna tu nasida, opatratus taon lelengna.” (1 Mus. 15:13, Bibel siganup ari; Ul. 7:6) Taon 1913 SM ma dimulai taringot 400 taon i, tingki si Ismael mangarehei si Isak. Dipaujung ma taon i tingki Jahowa paluahon bangso Israel sian Mesir. (1 Mus. 21:8-10; Gal. 4:22-29) Tangkas ma, nunga disurirangkon Jahowa andigan tingki laho paluahon naposoNa!

6. Boasa porsea hita na laho paluaon ni Jahowa naposoNa?

⁶ Si Josua ma sada sian bangso Israel na dipalua sian Mesir. Ibana mandok, ”Ingkon botoonmuna do sian nasa rohamuna dohot sian nasa ateatemuna, na so tartading nanggo sada hata sian sude hata angka na denggan i, angka na pinarbaga ni Jahowa, Debatamuna i tu hamu; tung saluhutna do na songgop tu hamu, ndang tartading sian angka i, nanggo sada hata.” (Jos. 23:2, 14) Marjanji do Jahowa paluahon bangsoNa sian hasusaan bolon, jala mangalehon hangoluan salelengna di tano na imbaru. Pos ma rohanta tu janji ni Jahowa. Molo naeng mangolu di tano na imbaru, tongtong ma hita dungo.

7, 8. (a) Aha do ulaon ni angka panjaga najolo, jala aha do parsiajaranna tu hita? (b) Aha do na masa molo tarpodom angka panjaga ni kota? Bahen ma tudosan.

⁷ Tadapot ma parsiajaran sian panjaga ni kota najolo. Songon Jerusalem, godang do kota na dihaliangi tembok na timbo asa unang masuk musu. Jongjong ma angka panjaga i di ginjang ni tembok, jala sian i boi do diida nasida sude kota i. Panjaga na asing jongjong di gerbang ni kota. Ingkon dungo do nasida arian dohot borngin. Molo diida nasida adong musu, ingkon dipaboa do tu angka halak na di kota. (Jes. 62:6) Diboto nasida, ringkot do tongtong dungo jala mamparrohahon aha na masa. Molo tarpodom nasida, mate ma godang halak.​—Hes. 33:6.

⁸ Si Yosefus, na manurat taringot sejarah ni halak Jahudi, patorangkon boasa boi halak Rom masuk tu Jerusalem di taon 70 M. Na tarpodom do angka panjaga ni kota i, gabe masuk ma tentara ni halak Rom tusi. Masuk ma nasida tu bagas joro, ditutung ma i, jala dilengsehon ma Jerusalem. On ma hasusaan bolon na umbalga na hea dihilala halak Jahudi.

9. Aha do na so diboto godang jolma saonari?

⁹ Dibahen angka pamarenta saonari do tentara dohot sistem keamanan na jago manjaga parbatasan kota ni nasida. Diboto nasida ma, ise manang aha na naeng manggugai negaranasida. Alai ndang diboto nasida, di surgo adong do pamarentaon na umgogo, i ma na diparenta Jesus Kristus. Pamarentaon on ma na laho mamorangi sude pamarentaon na di portibi on. (Jes. 9:5, 6; surat na ditoru; 56:10; Dan. 2:44) Tapaima ma haroro ni pamarentaon i  jala mangarade ma hita. Taparrohahon ma surirang ni Bibel jala tongtong ma marsihohot tu Jahowa.​—Ps. 130:6.

10, 11. (a) Aha do na ingkon taparrohahon, jala boasa? (b) Sian dia do taboto Sibolis mangotootoi angka jolma asa unang manjangkon surirang ni Bibel?

¹⁰ Pingkirhon ma taringot panjaga ni kota na tongtong dungo saborngin manipat. Dung laho tiur ari, loja jala mondokondok ma ibana. Suang songon i ma hita naung mangolu di tingki parpudi. Lam jonok tu ari i, lam maol ma hita tongtong dungo. Marisuang do molo ndang tongtong hita dungo! Taulas ma tolu na boi mambahen hita ndang dungo.

¹¹ Sibolis mangotootoi angka jolma. Sibolis do ”raja ni portibi on”. Andorang so mate, tolu hali ma dipaboa Jesus taringot on tu siseanna. (Joh. 12:31; 14:30; 16:11) Dipangke Sibolis do agama na so sintong laho mangotootoi jolma. I do alana godang halak ndang olo manjangkon surirang ni Bibel na patuduhon nunga jonok ajal ni portibi on. (Sep. 1:14) Tangkas ma, ”dipapitung debata ni portibi on do pingkiran ni angka na so porsea”. (2 Kor. 4:3-6) Alani i, tingki tapaboa tu halak naung jonok ajal ni portibi on jala Jesus nunga mamarenta, godang do na so olo manangihon. Jotjot do didok nasida, ”Ndang sanga ahu.”

12. Boasa ndang olo hita diotootoi Sibolis?

¹² Nang pe godang halak ndang olo manjangkon surirang ni Bibel, unang ma marmetmet ni roha hita. Taboto do boasa ringkot tongtong dungo. Si Paulus paboahon, ”Ai diboto hamu do tangkas, na songon panangko borngin do haroro ni ari ni Tuhan i.” (Jaha 1 Tessalonik 5:1-6.) Dipaingot Jesus do hita, ”Hamu pe, gabe hobas ma, ai na ro do Anak ni jolma i di tingki na so panagamanmuna!” (Luk. 12:39, 40)  Satongkin nai, bahenon ni Sibolis ma angka jolma porsea na boi do ”dame” portibi on. Dung i, songgot ma roha ni nasida tingki ro ari rimas ni Jahowa. Songon dia molo hita? Asa boi mangarade tu ari i, jala ndang diotootoi songon na asing, ”sai dungo ma hita jala marroha na torang”. Alani i, ringkot do manjaha jala mangarimangi Hata ni Debata ganup ari.

13. Songon dia do tondi ni portibi on manegai pingkiran ni jolma, jala songon dia do hita pasidingkon i?

¹³ Tondi ni portibi on manegai pingkiran ni jolma. Godang do halak mandok, ndang porlu mananda Debata. (Mat. 5:3) Dilehon nasida do godang tingki dohot gogona laho mandapot sude na adong di portibi on. (1 Joh. 2:16) Ndang songon najolo, saonari godang do hiburan na mambahen angka jolma mangkalomohon giotgiot ni daging jala mangulahon na dihalomohon rohana sandiri. (2 Tim. 3:4) On mambahen nasida ndang mangkaringkothon paralealeonna tu Debata. Alani i, si Paulus paingothon hita asa ”hehe [dungo] sian na modom”, jala unang mangkaringkothon giotgiot ni daging.​—Rom 13:11-14.

14. Sipaingot aha do na disurat di Lukas 21:34, 35?

¹⁴ Tondi parbadia ma na manogunogu hita, tapasiding ma tondi ni portibi on. Marhite tondiNa, diurupi Jahowa do hita mangantusi angka na laho masa. (1 Kor. 2:12) ^[1] (Ida catatan.) Alai, ingkon manat do hita. Na tahaporluhon ganup ari pe, boi mambahen hita ndang marhiras ni roha manomba Jahowa. (Jaha Lukas 21:34, 35.) Ra halak mandok, na oto do hita ala porsea naung mangolu di tingki parpudi hita. (2 Ptr. 3:3-7) Alai, unang ma gabe gale haporseaonta alani i. Tangkas do taboto nunga jonok ajal ni portibi on. Asa ditogutogu tondi parbadia, ringgas ma hita marpungu rap dohot dongan sahaporseaon.

15. Aha do na dihilala si Petrus, si Jakobus, dohot si Johannes, jala songon dia do on boi masa tu hita?

¹⁵ Hagaleonta mambahen hita maol tongtong dungo. Diboto Jesus do mardosa hita jala adong hagaleonta. Pingkirhon ma na masa di borngin andorang so mate ibana. Nang pe tipak, mangido pangurupion do Jesus tu Jahowa asa tongtong marsihohot. Disuru Jesus do si Petrus, si Jakobus, dohot si Johannes tongtong dungo tingki martangiang ibana. Alai, ala loja hian dihilala nasida, ndang diparrohahon be hata ni Jesus, gabe tarpodom ma nasida. Jesus pe loja do, alai tongtong do ibana dungo jala martangiang tu Amana. Sasintongna, ingkon martangiang do angka apostel di tingki i.​—Mrk. 14:32-41.

16. Hombar tu Lukas 21:36, aha do didok Jesus na ingkon taulahon asa tongtong ”dungo”?

 ¹⁶ Aha do na mangurupi hita asa tongtong ”dungo” jala mangarade tu ari rimas ni Jahowa? Ingkon marsitutu ma mangulahon na sintong. Alai ndang sae holan songon i. Andorang so mate Jesus, didok do tu siseanna ringkot mangido pangurupion tu Jahowa. (Jaha Lukas 21:36.) Asa boi tongtong dungo, ingkon martangiang do hita tu Jahowa ganup tingki.​—1 Ptr. 4:7.

17. Songon dia do hita mangarade tu na laho masa di ari na naeng ro?

¹⁷ Jesus mandok, ro ma ajal ni hasiangan on ”di na so pangkirimon” ni roha. (Mat. 24:44) Ingkon sai rade do hita. Ndang tingkina be sonari mangihuthon portibi ni Sibolis na mandok boi hita martua. Gabus do i. Marhite Bibel, dipaboa Jahowa dohot Jesus do songon dia hita asa tongtong dungo. Alani i, taparrohahon ma surirang ni Bibel jala songon dia i digohi. Tapajonok ma dirinta tu Jahowa jala mangkaringkothon ulaon Harajaon. Molo taulahon i, rade ma hita tingki ro ajal ni portibi on. (Pgk. 22:20) Malua ma hita molo tongtong dungo!