1. Buk contoh rosai ḇefnai fandun fa kofawi oras ma fafisu ro ris koḇena. (Mam sonin ḇerandak ro artikel ine.)

KEBAKTIAN ya imbe ḇyerak kwar. Naek ḇefarkin ya imbran ḇe panggung ma isaser ḇerama sya. Knik wer musik imbe ifnak. Kawasa sifawi kwar ine oras fa skain ro moḇ sena fa srower musik ya. Sikako siwaf fafaya nari sawawos na rofyor musikya imnai. Ḇape, imbude snonkaku ḇeḇeso sya smam ḇe naek ḇefarkin ani ḇa ḇaido srower musik ḇefnak ani ḇa. Inja, sfawi ḇa snar kebaktian ani imbran kwar. Simbran mura muma ḇaido sifarfyar kaker. Fafisu ḇeradine kyurfasna rosai na ḇeḇejadi rofyor kofawi oras ḇaido roi ḇefnai ro ris koḇena ḇa. Ine ḇyefarkarkor ḇefandun kaku faro ko snar kero monda wer sarisa ḇeba kaku nari ḇeḇejadi, ma fandun fa kofasos mankun ko. Sarisa rosairirya?

2. Rosai ḇefnai fa Yesus dor manfamyan ḇyesi fa ’siwaren pdef’?

² Yesus Kristus ḇyuk swarapepen ḇe manfamyan ḇyesi insama siwaren ma sifasos pdef fa siwaf ”papupes supswan ya”. Ikofenḇadir ḇe si, ”Mkosasor mko ma mkowaren! Snar mkofawi fafisu ya ryama nya ḇa.” Ramnai ikofen ker ḇesi, ”Insa  mkowaren.” (Mat. 24:3; wasya Markus 13:32-37.) Syap Matius kako fyasnaḇair snar Yesus ḇyuk swarapepen kali ḇeḇeso ḇe manfamyan ḇyesi kuker roi ine. Ikofen, ”Inja iḇye mkepen mko, snar mkofawiḇa ras rosai Manseren mkoḇedi ryama ya.” Ma ḇyuk swarapepen ḇe si wer, ”Rarirya mko kako mkofasos, snar Rumkun Snonkaku ryama ro fafisu mkokaraḇa.” Ramnai ikofen wer, ”Rarirya, mkowaren, snar mkofawiḇa ras ma fafisu ya.”​—Mat. 24:42-44; 25:13.

3. Rosai ḇefnai fa komamuser faro swarapepen Yesus ḇyukna?

³ Saksi-Saksi Yahwe smamuser kaku swarapepen Yesus ḇyena. Kofawi snar kokenem ro ’fafisu papupes’ ma ’kandera ḇeba’ kero monda nari myun! (Dan. 12:4; Mat. 24:21) Imnis raris Yesus ḇyardi kwar ani, Yahwe kawasa ḇyesi sḇaryas Karajan Allah ro supswan ḇesiper. Ro fafisu ḇemnis, mamamun, dafduf, saprop ya iwawa, ma basbiser ya komam ro moḇ nakam. Ayayin ro agama na, ḇaḇeḇarḇor, ma pakpikyaye nabor syadi wer. (Mat. 24:7, 11, 12, 14; Luk. 21:11) Kirine, kowaf kaku ras Yesus ryama ma ifrurmnis Kmari marisen ḇyena.​—Mrk. 13:26, 27.

4. (a) Rosai ḇefnai fa kokofen snar kirine Yesus ifawi kwar fafisu risai Armagedon nari ḇyerak? (b) Kofawi ḇa fafisu risai kandera ḇeba ya ḇyerak rariryano, rosai na kokyar kaku ya?

⁴ Ro kebaktian, kofawi oras risai munara ya ḇyerak. Ḇape, kopok fa kofawi ḇa oras ḇemnis kandera ḇeḇaya nari ḇyerak. Rofyor ikenem ro supswan, Yesus ikofen, ”Ḇape ras ma fafisu ani snonkaku oso ipok ifawiḇa beri, ma malaikat-malaikat ro boiyaswa kako roḇa, ma Rumkun ya kako roḇa, derer Mami mankundi.” (Mat. 24:36) Ḇape, snar Yesus iso ḇebukor ro mamamun Armagedon ya, inja kaku ḇeri ifawi kwar fafisu risai mamamun ani nari ḇyerak. (Why. 19:11-16) Ḇape, kofawiḇa ras ma oras risai papupes ya nari ryama. Inja, fandun kaku fa kowaren pdef. Yahwe dap kwar fafisu risai kandera ḇebaya nari ḇyerak. Fyanam kaku kwar ma ’isyaryar ḇa.’ (Wasya Habakuk 2:1-3.) Rosai ḇefnai fa kokyar kaku na?

5. Buk contoh ḇefasnaḇair snar ḇardadi Yahwe ḇyedi ndarirya kaku ro fafisu ḇemnis ya.

⁵ Yahwe ḇardadi ḇyena ḇyendarirya kaku ro fafisu ḇemnis! Imnis raris, ro 14 Nisan 1513 SM, Yahwe fyaspar kawasa Ḇyesi ro sup Masir. Ḇarpur muma, Moses fyas kuker ras ani, ”Ro papupes ro taun ḇeḇe utin rifyak samfur seser rikyor ani, ma ro ras ine kako sordade Yahwe ḇyesikam sisaebur ro sup Masir.” (Kel. 12:40-42) Ro 14 Nisan 1943 SM, iso 430 taun rofyor snonkaku Israel sisae ḇaim ro Masir, Yahwe ḇyeasas ḇe Abraham nari ḇyebarakas kpu ḇyesi. (Gal. 3:17, 18) Ramnai, Yahwe ikofenḇair ḇe Abraham i, ”Na wafawi kaku snar kpu ḇesi nari sḇemandaman ro sup snana ḇa, ma nari sefarmyan ḇe kawasa ḇero diansya, ma snonkaku ansi sifrur kandera si ro swaf taun utin rifyak.” (Kej. 15:13; Kis. 7:6) Taun ḇeḇe-400 ani ḇyerak ro 1913 SM rofyor Ismael ḇyewayam Ishak i. Ma, taun ḇeḇe-400 ani imnai rofyor Yahwe fyaspar er Israel sya ro sup Masir. (Kej. 21:8-10; Gal. 4:22-29) Inja taun utin ma utin ḇepon ya, Yahwe dap kwar fafisu risai nari ḇyuk ḇaḇemkei ḇe er Israel sya!

6. Rosai ḇefnai fa kokyar kaku nari Yahwe fyaspar kawasa Ḇyesi?

⁶ Yosua iso snonkaku Israel oso ḇemkei bur ro Masir. Taun-taun ḇyenande ramnai,  ḇyuk swarapepen ḇe er ḇyesi, ”Mkofawi kaku kuker sne ḇesiper mkoḇedi ma kuker kankenem ḇesiper mkoḇedi snar wos osoḇaḇeri ro asas ḇepyum nakam ro Yahwe, Allah mkoḇedi, ikofenna faro mko nefromo. Nanekam kaku ndarirya ḇe mko. Wos osoḇaḇeri ro rosai ikofenna nefromo.” (Yos. 23:2, 14) Yahwe ḇyeasas nari fyaspar kawasa ḇyesi ro kandera ḇeba ma ḇyuk ḇesi kankenem fyoro ro dunya babo ya. Na kokyar kaku snar asas Ḇyena na ndarirya namnis kaku. Inja komarisen kokenem ro dunya babo ido, fandun kaku fa kowaren pdef.

7, 8. (a) Rosai fararur manwadwaren ro fafisu iwara, ma rosai farkarkor ya ḇeko? (b) Buk contoh kuker rosai ḇeḇejadi rofyor manwadwaren sya senef fyor sifrur fararur sena.

⁷ Na kofarkor ro manwadwaren sya ḇero mnu ḇeba ro fafisu iwara. Mnu ḇeba ḇeḇeso, Yerusalem ya kako, siḇawes ayar karui ḇekaki fa sidwarek mbroḇ sya. Manwadwaren ono sisya sores ro ayar karui yabori fa smamwarek moḇ ḇero ris mnu aniya. Ḇesesya siwaren ro kerwa ḇeba. Snon ansya fandun fa siwaren ro roḇ ma meser. Mbroḇ ono sisya sfanam ido, fandun fa sḇuk swarapepen ḇe kawasa ḇero mnu ani. (Yes. 62:6) Sifawi fandun kaku fa siwarwaren ma smamwarek pyum rosai ḇeḇejadi ro ris sena. Rofyor sifrur rariryaḇa ido, na kawasa ḇebor sya simar.​—Yeh. 33:6.

⁸ Yosefus, manfasfas sarisa ro Yahudi sya, ikofenḇair rariso snonkaku Romawi na smun Yerusalem ro 70 M. Manwadwaren ḇero ḇar mnu ḇeḇeso ani senef. Ine nafrur fa, sordade Romawi sya sisun ro Yerusalem. Srap bait ma skakok mnu ḇeba ani. Iso papupes ro kandera ḇeba ḇeḇekur er Yahudi sya.

9. Ro fafisu ine rosai snonkaku ḇebor sya sfawi na ḇa?

⁹ Fafisu ine, sup ḇeba ḇebor sidwarek moḇ ḇewas ḇe sup sena kuker sordade militer ma sistem keamanan ḇepyum kaku. Imḇape, simamwarek sup sena ro mbroḇ ḇero supswan ine monda. Sifawi ḇa snar ḇaḇesasoser oso ḇesambraḇ kaku isya ro nanki kuker Yesus Kristus i ḇebukor ya. Yesus nari fasawdam myun ḇaḇesasoser syakam ro supswan. (Yes. 9:6, 7; 56:10; Dan. 2:44) Kowaf ma komarisen kaku fa kofasos ko rofyor ras ani fyafer. Inja, komampyum kaku ḇardadi ro Refo ma kofarmyan kuker soasuser ḇe Yahwe I pdef.​—Mz. 130:6.

10, 11. (a) Rosai ḇefrur fa kosasor ko, ma rosai ḇefnai ya? (b) Rosai ḇefnai fa wakyar kaku snar Ibiris ifrur kwar snonkaku sya fa simewer sikyar faro ḇardadi ḇero Refoya?

¹⁰ Wawasen kada manwadwaren oso iwaren kwar ro roḇ ya ḇesiper. Fafisu imbe imnai ro fararur ḇyena, imbrus kaku inja samswen kaku fa iwaren pdef. Rarirya kako, kofanam ḇe papupes dunya ine, samswen kaku faro ko fa kowaren pdef. Rofyor kowaren pdef ḇa ido, na kofafko kaku! Mkorama kowawos roi rikyor na ḇefrur fa komnai kowaren pdef.

¹¹ Ibiris ifrowes snonkaku sya. Iso ḇena ”papoik supswan ine”. Rofyor Yesus imar ḇaim, ḇyuk swarapepen ḇe manfamyan ḇyesi kuker roi ine kali rikyor. (Yoh. 12:31; 14:30; 16:11) Ibiris ifrowes snonkaku sya kuker agama ḇekaku ḇa. Iso ḇefrur fa snonkaku ḇebor ansya sikyar ḇa faro ḇardadi ḇero Refo ḇefasnabos kaku snar papupes dunya ine fyanam kaku kwar.  (Zef. 1:14) Kaku ya, Setan ’irup kakara snonkaku ḇekyarḇasya’. (2 Kor. 4:3-6) Ine ḇefrur fa, rofyor kokofenḇadir ḇe snonkaku sya snar papupes dunya ine fyanam kwar ma Kristus ḇyeḇepoik kwar, snonkaku ḇebor simewer srowerdi. Simarisen faro anun koḇena ḇa.

12. Rosai ḇefnai fa komewer Ibiris ifrowes ko?

¹² Rofyor snonkaku ḇebor sya simarisen ḇa kuker ḇardadi Refoya, pok fa kofafko awer. Kofawi rosai ḇefnai fa fandun kaku kowaren pdef. Paulus ikofen ḇe naek srar ḇyesya, ”Snar mankun mko ḇardi mkofawi kwar, mboi ras Manseren ryamumaya imnisbos kaku ḇekaraw ro roḇna.” (Wasya 1 Tesalonika 5: 1-6.) Yesus ḇyuk swarapepen ḇe ko, ”Mkokako mkepen mkokada ma mkofasos snar Rumkun Snonkakuya nari ryama rofafisu mkofawiḇa.” (Luk. 12:39, 40) Kawan wer ḇa, Setan i kako nari ifrowes snonkaku insama sikyar snar dunya ine nari ”neaski ma naknon”. Ramnai, Yahwe ras ḇyedi ryama ḇeri, ma ifrur kanandor si. Rariso kuker ko? Komarisen kofasos ko faro ras ani ma komewer dunya ine ifrowes ko imnis snonkaku ḇese sya ido, fandun ḇeko fa ’koḇaḇir ma kowaren’ ro kirine kako. Inja, fandun fa kowasya Refo ras ḇe ras ma kowasen rosai Yahwe ikofenḇadirna.

13. (a) Rariso rur dunya ine nawyaye snonkaku sya? (b) Nyan rariso insama rur dunya ine nawyaye ko ḇa rai?

¹³ Rur dunya ine nawyaye nyan kakara ro snonkaku sya. Fafisu ine, snonkaku ḇebor sḇaḇir fandun ḇa fa smambir Allah I. (Mat. 5:3) Inja, sḇuk oras ma samambraḇ sena fa sisma roi ḇebor ro dunya ine. (1 Yoh. 2:16) Osower ido, hiburan ḇebor naisya nafrur fa snonkaku sya simarisen syadi siso rmomen nafsu sena monda. (2 Tim. 3:4) Nanekam nawyaye kakara snonkaku sya ro roi ḇefandun kaku na. Sfandun Allah I ḇa. Iso ḇefnai fa Paulus ḇyuk swarapepen ḇe snonkaku Kristen sya fa ’sikḇok ro anenef’ insama siso monda rmomen sena awer.​—Rm. 13:11-14.

14. Swarapepen rosai ḇeḇefas ro Lukas 21:34, 35?

¹⁴ Komarisen insama rur Allah ḇyedi fyarkin nyan kakara koḇena, ḇape rur dunya ineḇa. Kuker rur Ḇyedi, Yahwe ifnoḇek kofa kofawi kaku rosai nari ḇeḇejadi ya. (1 Kor. 2:12)  ^[1] (Mam fasfas ḇepupes.) Rariryano, fandun fa kosasor ko. Roi kofrur ro ras ḇe ras kako na nafrur kofa kobuk roi ḇepyum ḇe Yahwe I ḇa. (Wasya Lukas 21:34, 35.) Ḇesesya imbude skara kofawi royoḇa snar kokyar kokenem ro ras-ras ḇepupes. (2 Ptr. 3:3-7) Ḇape, pok fa sifrur kofa kofafko awer. Kona aḇyair ḇefasnabos kaku snar papupes ani nari ryama fasaw. Insama Allah rur ḇyedi fyarkin ko, fandun fa koso ro fananjur ya pdef.

15. Rosai manwawan Petrus, Yakobus, ma Yohanes skofrur ya, rariso roi ḇeradine na ḇejadi ro ko kako?

¹⁵ Ḇaḇeraryarḇa koḇena nafrur samswen  kofa kowaren pdef. Yesus ifawi snar snonkaku sya sima snonkaku ḇemnisḇa ma sna ḇaḇeraryarḇa. Kokarapan rosai ḇeḇejadi ro roḇ rofyor imar ḇaime. Yesus ima snonkaku ḇemnis kaku rariryano, ifawi fyandun fa ḇyenadi ma dor farfnoḇek ro Kmari insama isoasuser pdef. Yesus dor manwawan Petrus, Yakobus, ma Yohanes fa skowaren pdef rofyor ḇyenadi. Ḇape, manwawan sya sḇaḇir ḇa roi ine nefandun kaku. Simbrus ma senef. Yesus ikako imbrus, ḇape iwaren pdef ma ḇyenadi. Manwawan sya kako fandun fa sḇenadi ro fafisu ani.​—Mrk. 14:32-41.

16. (a) Rosai knam ro wos ’kowaren pdef’? (b) Ro Lukas 21:36, ananun rosai Yesus ḇyuk na insama ’kowaren pdef’?

¹⁶ Rosai na ḇefnoḇek ko fa ’kowaren pdef’ ma kofasos ko ro ras Yahwe ḇyedi ryama? Fandun fa komarisen kaku fa kofrur rosai ḇenapes. Ḇape ine monda ḇa. Ras ḇeḇeso rofyor Yesus imar ḇaim, ikofenḇadir ḇe manfamyan ḇyesi snar fandun fa senadi pdef fa sor farfnoḇek ro Yahwe I. (Wasya Lukas 21:36.) Insama kowaren pdef ro fafisu papupes ine, fandun fa ko kako koḇenadi ḇe Yahwe ḇesyakwar.​—1 Ptr. 4:7.

17. Rosai fandun fa kofrur ya insama kofasos ko rofyor papupes dunya ya ryama?

¹⁷ Yesus ikofen snar papupes ani nari ryama ”ro fafisu mkokaraḇa”. (Mat. 24:44) Inja, fandun fa kofasos ro oras nakam. Kirine oras ḇa fa kosewar nyan kankenem iso dunya ine kyara na nbuk marasrisen ḇeko. Inema mafafu monda rirya. Ro Refo ya, Yahwe ma Yesus sukofenḇair ḇeko rariso insama kowaren pdef. Inja, mkorama komam rariso ḇardadi ḇero Refo nane kaku ndarirya ro kirine. Ma, iḇye kada kofanam pdef ḇe Yahwe ma kofakapon Karajan Allah ro kankenem koḇena. Kofrur rarirya ido, na kofasos ko rofyor papupes ya ryama. (Why. 22:20) Kankenem koḇena neknam ro roi nane!