1. ¿Kenke tlauel moneki kuali titlakakisej uan kuali tikitasej tlake panotok? Xikixtoma ika se neskayotl (xikita nopa achtoui tlaixkopinkayotl).

NECHKA peuas ueyi tlanechikolistli. Katli kiyakana pano tlaixpa uan kiijtoua tlauel kualtitok pampa nochi asitokej. Nojkia peua kakisti nopa uikatl tlen kitlaliaj. Nochi kimatij moneki moseuisej. Kinekij kitlakakilisej nopa yejyektsitsij uikatl, uan ika miak pakilistli kinekij kitlakakilisej nopa tlamachtili tlen moixtomas. Sekij amo kiampa kichiuaj, pampa uelis amo kitlakakiliaj tlen kiijtoua katli kiyakana tlanechikolistli o amo kikakij kakistitok nopa uikatl tlen ika peua. Pampa amo kuali tlakaktokej, amo kiitaj tlaj ya pejtok nopa tlanechikolistli, yeka nojua nejnentinemij o kamanaltitokej ininuaya ininuampoyouaj. Ni kinextia tlake uelis techpanos tlaj amo kuali tijkakij o tikitaj tlake panotok kampa tiitstokej. Nojkia techmachtia tlauel moneki kuali titlachixtosej o titlakaktosej, pampa nechka panos se tlamantli tlen tlauel ipati. ¿Tlake nopa tlamantli?

2. ¿Kenke Jesús kiniljuik itokilijkauaj kuali ma tlachixtokaj?

² Jesucristo kiniljuik itokilijkauaj monekiyaya kuali tlachixtosej uan kiampa kimatiskiaj tlake kichiuasej kema “nechkatitos para tlamis ni tonali”. Kiniljuik: “[Ximomokuitlauikaj], xitlachixtokaj kuali uan ximomaijtokaj pampa axinkimatij kema asis nopa tonal kema sampa niualas”. Teipa miakpa kiniljuik: “Uajka xitlachixtokaj kuali” (Mat. 24:3; xijpoua Marcos 13:32-37). Tlen kiijkuilok Mateo nojkia kinextia Jesús miakpa kiniljuik nopa. Kiniljuik itokilijkauaj:  “Xitlachixtokaj pampa axinkimatij ipan tlachke tonal niinmoTeko sampa niualasok”. Teipa kiniljuik: “Xitlachixtokaj pampa na tlen nimokuepki tlakatl niualasok ipan se hora kema axinnechchiaj”. Teipa sampa kiniljuik: “Xitlachixtokaj pampa axinkimatij tlachke tonal, yon tlachke hora, na tlen nimokuepki tlakatl niualas” (Mat. 24:42-44; 25:13).

3. ¿Kenke moneki nojkia tijneltokasej tlen Jesús kiijtok?

³ Jehová itlajtoltemakauaj tijneltokaj tlen Jesús kiijtok. Tijmatij tiitstokej ipan “itlamia tonali” uan nechka peuas nopa “ueyi tlaijiyouilistli” (Dan. 12:4; Mat. 24:21). Ipan ni tonali moaxitijtok tlen Jesús kiijtok, pampa Jehová itekipanojkauaj kimoyauaj nopa kuali tlamachtili tlen toTeotsij iTlanauatijkayo ipan nochi Tlaltipaktli. Nojkia onka uejueyi tlauilankayotl, kokolistli, mojmolinia tlali, onka mayantli, uan kampa ueli kichiuaj tlen amo kuali. Nojkia katli tlayakanaj ipan religiones tlauel kinkajkayauaj maseualmej (Mat. 24:7, 11, 12, 14; Luc. 21:11). Tijchixtokej ma asi tonali kema Jesús kichiuas tlen iTata mosentlalijtok (Mar. 13:26, 27).

4. 1) ¿Kenke tikijtouaj uelis Jesús kimati kema mochiuas nopa Armagedón? 2) Maske amo tijmatij kema peuas ueyi tlaijiyouilistli, ¿tlake temachtli tijmatij?

⁴ Kema tiauij ipan ueyi tlanechikolistli, tijmatij tlake hora peuas. Ika nopa ueyi tlaijiyouilistli amo kiampa pano, pampa amo tijmatij kema peuas. Jesús kiijtok: “Axaka kimati tlachke tonal, yon tlachke hora nimokuepas. Axkimatij nopa iluikaeuanij [...] uan yon na niiKone axnijmati, san noTata [...] kimati” (Mat. 24:36). Jesús yaya kiyakanas nopa tlauilankayotl ipan Armagedón, uajka uelis ya kimati kema mochiuas (Apoc. [Rev.] 19:11-16). Tojuantij ayamo tijmatij kema mochiuas nopa ueyi tlauilankayotl. Yeka, tlauel moneki kuali titlachixtosej. Jehová kitlalijtok se tonali kema peuas ueyi tlaijiyouilistli, uan nopa tonali monechkauijtiuala. “Temachtli panos [...] ipan nopa tonali tlen [ki]ixtlalijtok” (xijpoua Habacuc 2:1-3). ¿Kenke uelis timotemachisej nelia panos?

5. Xikijto se neskayotl tlen kinextia nochi tlen Jehová kiijtoua moaxitia ipan nopa tonali tlen kiixtlalijtok.

⁵ Nochi tlajtolpanextili tlen Jehová kiijtok moaxitik ipan nopa tonali tlen kiixtlalik. Ma tikitakaj se ome tlajtolpanextili. Ipan tonali 14, metstli nisán, xiuitl 1513 a.u.J., Jehová kinkixtik israeleuanij tlen Egipto. Teipa, Moisés kiijkuilok Jehová kinkixtijtoya “ipan nopa tonal” tlen ika tlanki “nopa 430 xiuitl” (Éx. 12:40-42). Nopa 430 xiuitl nojkia pejki ipan tonali 14, metstli nisán, xiuitl 1943 a.u.J, kema pejki moaxitia tlen Jehová kiiljuijtoya Abraham (Gál. 3:17, 18). Teipa, Jehová nojkia kiiljuik Abraham: “Moteipaixuiuaj yasej itstotij ipan seyok tlali keja sejkoyok euanij. Uan tlakamej tlen nopano euaj kintekiuisej chikauak uan kinitasej keja ininaxkauaj uan nopano moteipaixuiuaj tlaijiyouisej para 400 xiuitl” (Gén. 15:13; Hech. 7:6). Nopa 400 xiuitl pejki ipan 1913 a.u.J, kema Ismael pejki kipinajtia Isaac, uan tlanki kema Jehová kinkixtik israeleuanij tlen Egipto (Gén. 21:8-10; Gál. 4:22-29). Uajka, maske poliuiyaya miak xiuitl, Jehová kiijtojtoya ipan tlake tonali kinmakixtiskia itekipanojkauaj.

6. ¿Kenke uelis timotemachisej Jehová nelia kinmakixtis itekipanojkauaj?

⁶ Josué nojkia momakixtik kema kinkixtijkej tlen Egipto. Kema panotoya miak xiuitl, kiniljuik israeleuanij: “Inkimatij ika nochi inmoyoltsi uan ika nochi inmotonaltsi para axtleno polijtok tlen toTeko Dios inmouaya mokajtok. Nochi tlen kiijtok kichiuaskia, yajaya kichijtok” (Jos. 23:2, 14). Jehová kintenkauilijtok itekipanojkauaj kinmakixtis kema mochiuas nopa ueyi tlaijiyouilistli uan kinkauas ma itstokaj nochipa ipan Xochimili. Uelis timotemachisej nelia kichiuas tlen kiijtojtok.  Yeka, tlaj tijnekij tiitstosej ipan Xochimili, moneki kuali titlachixtosej.

7, 8. 1) ¿Tlake monekiyaya kichiuasej katli tlajpiayayaj, uan tlake techmachtia? 2) ¿Tlake panoskia tlaj kochiskiaj katli tlajpiayayaj? Xikijto se neskayotl.

⁷ Tlauel techpaleuis tlaj timoiljuisej tlake kichiuayayaj uejkajkia se keskij tlakamej katli tlajpiayayaj. Jerusalén uan sekinok altepemej kinyaualojtoya uejuejkapantik tepamitl, kiampa ininkualankaitakauaj amo ueliskiaj kalakisej. Katli tlajpiayayaj moketsayayaj iixko nopa tepamitl, kiampa kampa ueli tlajtlachiayayaj. Uan sekinok tlajpiayayaj ipan kaltemitl. Nochi inijuantij monekiyaya kuali tlachixtosej tonali uan youali. Uan kema kinitayayaj ininkualankaitakauaj monechkauiaj, uajka kiniljuiyayaj nochi maseualmej katli itstoyaj altepeko (Is. 62:6). Kimatiyayaj tlauel ipati amo kochiskiaj uan kuali kiitaskiaj nochi tlen panoyaya ininnechka. Tlaj amo kuali tlachixtoskiaj, miakej maseualmej ueliskia kinmiktisej (Ezeq. 33:6).

⁸ Ipan xiuitl 70 y.u.J., romaeuanij kalajkej ipan altepetl Jerusalén. Josefo, katli kiijkuilok tlen kinpanok judíos kiijtoua se keskij katli tlamokuitlauijtoyaj kochkej. Yeka romaeuanij uelkej kalajkej, kitlatijkej teokali uan kitsontlamiltijkej nopa altepetl. Ika ni tlaijiyouilistli tlanki kintlaijiyouiltiaj judíos pampa tlauel uejkajki kintlaijiyouiltijtoyaj.

9. ¿Tlake amo kimatij miakej maseualmej ipan ni tonali?

⁹ Ipan ni tonali, miakej tlanauatianij kinpiaj soldados tlen tlamokuitlauiaj kampa tlami inintlal uan peua seyok ueyi altepetl. Uan nojkia kitlalijtokej miak tlamantli tlen ika tlamokuitlauiaj. Kiampa kichiuaj pampa amo kinekij se akajya o se tlenijki ma kalaki ipan ininaltepe uan ma kichiua tlen amo kuali. Maske tlauel tlamokuitlauijtokej, amo kimatij ne iluikak tekichijtok Jesucristo kej se tlanauatijketl tlen tlauel kipia miak chikaualistli, uan nechka kinteuis nochi tlanauatianij tlen itstokej ipan Tlaltipaktli (Is. 9:6, 7; 56:10; Dan. 2:44). Tijchixtokej nopa tonali uan tijnekij kuali titlachixtosej kema kiampa panos. Yeka, kuali tikitaj kenijkatsa moaxitijtia miak tlajtolpanextili uan tijchiuaj kampeka nochipa tijtekipanojtosej Jehová (Sal. 130:6).

10, 11. 1) ¿Kenke moneki timomokuitlauisej, uan tlake panos tlaj amo tijchiuasej? 2) ¿Kenijkatsa tijmati Diablo nelia kichijtok maseualmej amo ma kiitakaj tlake tlajtolpanextili moaxitijtok?

¹⁰ Ximoiljui se tlamokuitlauijketl seyoual amo kochtok. Uan kema nechka tlanesis, tlauel kochisneki, yeka tlauel ouij kimati kuali tlachixtos. Tojuantij nojkia uelis techpanos nopa pampa tiitstokej ipan itlamia tonali. Yeka, tlauel moneki timomokuitlauisej uan kiampa kuali titlachixtosej. ¿Kenke tlauel moneki? Pampa toTeotsij nechka kitlamiltis tlen amo kuali, yeka kej panotias tonali tlauel ouij tijmatisej kuali titlachixtosej. ¡Techpanos tlen tlauel amo kuali tlaj ayokmo kuali titlachixtosej! Ma tikitakaj eyi tlamantli tlen ueliskia kichiuas kejuak ma tikochikaj o ayokmo kuali ma tijtekipanokaj Jehová.

¹¹ Diablo kinkajkayaua maseualmej. Kema Jesús nechka mikiskia, expa kiniljuik itokilijkauaj Satanás “tlanauatia ipan ni Tlaltipaktli” (Juan 12:31; 14:30; 16:11). Satanás kinkajkayajtok miakej maseualmej ika religiones tlen amo melauak. Yeka miakej maseualmej amo kiitaj kenijkatsa moaxitia miak tlajtolpanextili tlen kinextia toTeotsij nechka kitlamiltis tlen amo kuali (Sof. 1:14). Satanás “kintsakuilijtok inintlalnamikilis” maseualmej (2 Cor. 4 :3-6). Yeka, miakej amo kinekij techtlakakilisej kema tikiniljuiaj Jesucristo tlanauatijtok ne iluikak uan toTeotsij nechka kintsontlamiltis nochi katli amo kualmej. Kemantika techiljuiaj: “Amo nijneki nijmatis”.

12. ¿Kenke tlauel moneki amo tijkauasej ma techkajkayaua Satanás?

 ¹² Maske miakej maseualmej amo kinekij kimatisej tlake tlajtolpanextili moaxitijtok ipan ni tonali, amo ma timokuesokaj. Tojuantij tijmatij kenke tlauel moneki kuali titlachixtosej. Apóstol Pablo kiniljuik toikniuaj: “Kuali inkimatij tlalochasis nopa tonal tlen iaxka toueyiTeko [Jehová]. Asis kema tlakamej axmoiljuisej para asiskia, keja se tlachtejketl kalaki tlalochtli ika tlayoua” (xijpoua 1 Tesalonicenses 5:1-6). Uan Jesús kiijtok: “Ximokualtlalijtokaj pampa na tlen nimokuepki tlakatl nimokuepas ipan se hora kema axinnechchiaj” (Luc. 12:39, 40). Teipa, Satanás nojua kinkajkayauas maseualmej ika seyok tlamantli. Kichiuas ma moiljuikaj ipan Tlaltipaktli “ya onka tlaseuilistli uan ya itstokej ika kuali”. Kema panos nopa, nima asis nopa tonali kema Jehová tetlatsakuiltis uan maseualmej nelia momajmatisej. Tlaj tijnekij kuali titlachixtosej kema asiki nopa tonali, uajka amo ma tijkauakaj Satanás nojkia ma techkajkayaua kej sekinok. Moneki tijchiuasej tlen Pablo kiijtok: “Ma titlachixtokaj para kema asis nopa tonal. Ma tijpiakaj kuali totlalnamikilis”. Yeka, moneki ma tijpouakaj Biblia mojmostla uan ma timoyoliljuikaj ipan tlen Jehová techiljuia.

13. 1) ¿Kenijkatsa monejnemiltiaj katli amo kualmej? 2) ¿Tlake tlamantli uelis tijchiuasej uan kiampa amo timonejnemiltisej kej inijuantij?

¹³ Nopa ‘tonaltsi tlen ni Tlaltipaktli’ kichiua maseualmej amo kuali ma monejnemiltikaj. Ipan ni tonali miakej moiljuiaj amo moneki kiixmatisej toTeotsij (Mat. 5:3). Yeka nochipa kitemouaj kenijkatsa kipiasej san tlen inijuantij kinekij (1 Juan 2:16). Nojkia onka miak tlamantli tlen ika moyolpakiltiaj maseualmej, yeka san kinekij moyolpakiltisej uan kichiuasej san tlen inintlajtlakolchijkanakayo kineki kichiuas (2 Tim. 3:4). Pampa nochipa san moyolpakiltiaj, ayokmo moiljuiaj kinamiki mouampojchiuasej iuaya toTeotsij. ¿Tlake moneki tijchiuasej tlaj amo tijnekij kiampa ma techpano? Pablo kiijtok amo kinamiki timosentlalijtosej san timoyolpakiltisej o san tijchiuasej tlen totlajtlakolchijkanakayo kineki. Tlaj tijchiuasej tlen tetlajtolmakak, uajka nochipa kuali titlachixtosej (Rom. 13:11-14).

14. ¿Tlake techtlajtolmaka Lucas 21:34, 35?

¹⁴ Tijnekij toTeotsij itonal ma techyakana uan amo tijnekij timoiljuisej kej maseualmej moiljuiaj. Ika itonal, Jehová techpaleuijtok ma tijmatikaj tlake panos teipa (1 Cor. 2:12) ^[1] (xikita nopa nota kampa tlami ni tlamachtili). Maske tijmajtokej nopa, moneki kuali timomokuitlauisej pampa onka miak tlamantli tlen uelis kichiuas ayokmo kuali ma tijtekipanokaj Jehová (xijpoua Lucas 21:34, 35). Sekij uelis techpinajtisej pampa tijneltokaj Jehová nechka kitsontlamiltis nochi tlen amo kuali (2 Ped. 3:3-7). Maske techpinajtisej, amo kinamiki timotekipachosej, pampa ika miak tlamantli tlen tikitaj pano, tijmatij nelia nechka tlamis tlen amo kuali. Yeka, tlaj tijnekij ma techyakana toTeotsij itonal, uajka moneki nochipa tiasej tlanechikoli.

15. ¿Tlake kinpanok Pedro, Santiago uan Juan, uan kenijkatsa nojkia uelis techpanos nopa?

¹⁵ Tijmatij ouij kuali titlachixtosej pampa  titlajtlakolejkej. Jesús kimatiyaya tojuantij titlajtlakolejkej uan nochipa techyoltilana tlen amo kuali. Ma tikitakaj tlake panok ipan nopa youali kema nechka kimiktiskiaj. Maske amo eliyaya tlajtlakole, kimajtoya monekiyaya kiiljuis Jehová ma kipaleui amo kema kitlauelkauas. Jesús kiniljuik Pedro, Santiago uan Juan amo ma kochikaj kema ya momaijtoskia. Inijuantij amo kimatkej kenke tlauel monekiyaya kuali tlachixtosej. Yeka, ¿tlake kinpanok? Kochkej pampa tlauel siajtoyaj. Maske Jesús nojkia siajtoya, ya amo kochki uan uejkajki kinojnotstoya iTata kema momaijtojtoya. Nopa apóstoles kinamikiyaya kichijtoskiaj kej Jesús (Mar. 14:32-41).

16. Kej kiijtoua Lucas 21:36, ¿tlake moneki tijchiuasej tlaj tijnekij kuali titlachixtosej?

¹⁶ ¿Tlake techpaleuis kuali titlachixtosej uan kiampa timokualchijchijtosej kema asiki nopa tonali kema Jehová kitlamiltis tlen amo kuali? Tlauel moneki nelnelia tijnekisej tijchiuasej tlen kuali. Uan nojkia moneki tijchiuasej sekinok tlamantli. Kema poliuiyaya se keski tonali ika kimiktiskiaj Jesús, ya kiniljuik itokilijkauaj monekiyaya nochipa kiiljuisej Jehová ma kinpaleui (xijpoua Lucas 21:36). Uajka, tlaj tijnekij kuali titlachixtosej ipan itlamia tonali, moneki nochipa timomaijtosej (1 Ped. 4:7).

17. ¿Tlake moneki tijchiuasej uan kiampa kuali titlachixtosej?

¹⁷ Jesús kiniljuik itokilijkauaj asiskia itlamia nochi “ipan se hora” kema inijuantij amo kimatiskiaj (Mat. 24:44). Yeka tlauel moneki nochipa kuali titlachixtosej. Amo kinamiki tijkauasej ma techyoltilana tlen onka ipan Tlaltipaktli. Maske Satanás uan katli kinnauatia kiijtouaj nopa tlamantli kichiuas ma tiyolpakikaj, nopa amo nelia. Jehová uan Jesús techtlalnamiktiaj ika Biblia uan techiljuiaj tlake moneki tijchiuasej tlaj tijnekij nochipa kuali titlachixtosej. Yeka, moneki kuali tikixmatisej tlajtolpanextili tlen uala ipan Biblia uan kuali tikitasej kenijkatsa moaxitijtia ipan ni tonali. Ma tijchiuakaj kampeka nojua kuali timouikasej iuaya Jehová uan nochipa ma tijtekipanokaj ika nochi toyolo, kiampa tijnextisej nelia tijpaleuiaj iTlanauatijkayo. Tlaj kiampa tijchiuasej, techpaleuis kuali ma titlachixtokaj kema asiki itlamia nochi (Apoc. 22:20). ¡Uelis timomanauisej tlaj nochipa kuali titlachixtosej!