1. ¿Imamandata ima punllacunapi o ima pasajushcataca yaipi cana capanchi? Shuj ejemplomanda parlapai (callari fotota ricupangui).

PENSARIPASHUN, shuj jatun tandanajuica ñami callarigrijun. Chaimandami, jatun tandanajuipa presidenteca plataformaman rishpa tucuicunata ali shamushca capaichi nin. Jatun tandanajuipa musicapash ña uyari callarijpimi gentecunaca ña tiarina horas cashcata yachan. Paicunaca chai juyailla musicacunatapash, discursocunatapash uyangapami munan. Shinapash huaquingunaca jatun tandanajuipa presidente parlai callarishcatapash, musicatapash na uyajunllu. Paicunaca na yaipi cashcamandami jatun tandanajui ña callarishcataca na cuenta japishpa purinajunra o rijsicunahuan parlanajunra. Imashinami cai ejemplopi ricupanchi, na yaipi cashpaca ima punllacunapi causajushcata o ima pasajushcataca na cuenta japishunllu. Shinaca ¿imatata yachajupanchi? Ñallami shuj jatun punlla chayamugrin. Chai punllapaca prepararishcami cana canchi. ¿Ima punllamandata parlanajunchi?

2. ¿Imamandata Jesusca paipa catijcunataca rijchariami causana canguichi nirca?

² Cai mundopa ruraicuna tucurina punllacunamanda parlajushpami Jesusca paipa catijcunataca chapariami causana canguichi nirca. Jesusca nircapashmi: ‘Ricuichi, ima punllacuna chashna tucunata na yachaimandami, na puñushpa chapariana canguichi’ nishpa. Jipamanga, Jesusca cutin cutinmi “na puñushpami chapariana canguichi” nirca (Mateo 24:3; Marcos 13:32-37, liingui). Mateo libropipashmi Jesusca chai punllamanda parlashpa nirca: ‘Cangunata Mandaj ñuca ima horas tigramunata na yachaimandami rijcharianshna chapariana canguichi” nishpa. Shinallata nircami:  ‘Runa Aichayu tucushca ñucapash cungashcapimi ñapash shamusha’ nishpa. Cutinbash nircami: ‘Runa Aichayu tucushca ñuca ima punlla, ima hora shamunatapash na yachanguichichu. Chaimandami, na puñushpa chapariana canguichi’ nishpa (Mateo 24:42-44; 25:13).

3. ¿Imamandata Jesús advirtishca shimicunataca yaipi charina capanchi?

³ Testigo de Jehovacunaca ‘tucurimui punllacunapi’ causanajushcata crishpa, ninan manllanai llaqui punllacunapi causanajushcata crishpami Jesús advirtishca shimicunataca yaipi charinchi (Daniel 12:4; Mateo 24:21). Jesús nishca shinaca, Jehovata sirvijcunaca mundo enteropimi Diospa Reinomanda villachinajun. Shinallata Jesusca nircami, guerracuna, ungüicuna, terremotocuna, yarjaicuna, nali ruraicunaca shuj shuj ladocunapimi ashtahuan miranga nishpa. Ashtahuangarin cunan punllacunapimi pastorcuna, curacunapash gentecunataca ashtahuan pandachinajun (Mateo 24:7, 11, 12, 14; Lucas 21:11). Chaimandami Jesús shamushpa Jehová Diospa munaita pactachichun shuyanajunchi (Marcos 13:26, 27).

4. a) ¿Imamandata ninchi, Armagedón ima hora callarinataca Jesusca yachangami nishpa? b) Ninan Manllanai Llaqui Punllacuna ima hora callarinata na yachashpapash ¿imatata seguro capanchi?

⁴ Casi tucuicunami jatun tandanajuipa cada parte ima horas callarinataca yachanchi. Shinapash, Ninan Manllanai Llaqui Punllacuna ima horapacha callarinataca na yachanchichu. Jesús cai Alpapi cashpaca nircami: “Ima punlla, ima horas ñuca tigramunataca, pipash na yachanllu. Jahua pachapi tiaj angelcunapash na yachanllu. Ñuca tigramunataca, ñuca Taitallami yachan” nishpa (Mateo 24:36). Shinapash, cunanbica chai punlla ima hora canataca Jesusca yachangami. ¿Imamandata shina ninchi? Imashinami ña yachapanchi, Armagedón jatun macanajuitaca Jesusmi ñaupaman pushajunga. Chaimandami paica Armagedón ima hora chayamunataca yachanga (Apocalipsis 19:11-16). Shinapash ñucanchicunaca tucuri punlla ima hora canataca na yachanchichu. Chaimandami na puñushpa rijchariashna causana canchi. Jehová Diosca, Ninan Manllanai Llaqui Punllacunata ima hora callarichinataca alimi yachan. Chai punllaca ashtahuan ashtahuanmi quimirimujun. Bibliapi nishca shinaca, chai punllaca “na unayangachu” (Habacuc 2:1-3, liingui). Shinapash ¿imamandata seguro canchi?

5. Jehovapa nishcacuna pai agllashca tiempopi pactarijta ricuchingapaca shuj ejemplomanda parlapai.

⁵ Jehová Diosca siempremi pai imata nishcataca pai nishca tiempopi pactachin. Shuj ejemplota ricupashun. Jesús cai Alpaman shamungapaj 1513 huatacuna faltajuj punllacunapi 14 de nisanda yaripashun. Chai punllapimi Jehová Diosca israelitacunata Egipto llactamanda llujchirca. Jipamanga Moisesca nircami, Jehová Diosca 430 huatacuna tucurijuj punllacunapillatami israelitacunataca pai nishca ‘punllapillata’ salvarca nishpa (Éxodo 12:40-42). Chai 430 huatacunaca, Jesús cai Alpaman shamungapaj 1943 huatacuna faltajuj punllacunapi 14 de nisanbimi callarirca. Chai punllapimi Abrahanba miraita bendiciashami nishca Jehovapa shimicunaca pactari callarirca (Gálatas 3:17, 18). Jipamanga Jehová Diosca Abrahandaca nircami, canba miraicunaca caru llactapimi esclavocunashna maltratai tucushpa 400 huatacunata causanga nishpa (Génesis 15:13; Hechos 7:6). Chai 400 huatacunaca Jesús cai Alpaman shamungapaj 1913 huatacuna faltajuj punllacunapimi pactari callarirca. Chai punllacunapimi Ismaelca Isaacmanda burlari callarirca. 400 huatacunaca chai punllacunapi callarishpami israelitacunata Egiptomanda salvashpa llujchijpi pactarirca (Génesis 21:8-10; Gálatas 4:22-29). Imashinami ricupanchi, ashtaca huatacuna faltajujpillatami Jehová Diosca paipa llactata salvangapaj shuj punllata ña agllashcalla charijurca.

6. Paipa sirvijcunata Jehová Dios salvanataca ¿imamandata seguro caita ushapanchi?

⁶ Josuepashmi israelitacunahuan Egiptomanda llujshirca. Chaimandami ashtaca huatacunaca jipaca israelitacunata nirca: ‘Cangunata Mandaj Taita Diosca, pai imashina aliguta rurasha nishcataca tucuitami pactachishca. Pai imashna nishcata tucuita pactachishcamandaca, tucui shunguhuan, tucui almahuanmi  pagui nina canguichi. Tucuitami cangunaman pactachishca, imatallapash na saquishcachu’ nishpa (Josué 23:2, 14). Jehová Diosca paipa sirvijcunataca nishcami, Ninan Manllanai Llaqui Punllacunapica cangunata salvashpami unai unaicaman causana oportunidadta cusha nishpa. Jehová Dios paipa nishcata pactachinataca seguromi caita ushanchi. Chaimandami Jehová Dios mandana mundopi causangapaj munashpaca rijchariashna causana canchi.

7, 8. a) Ñaupa tiempocunapi cuidashpa ricujcunaca ¿imatata ruran carca? ¿Imatata paicunamandaca yachajupanchi? b) Cuidashpa ricujcuna puñushpa quedajpica ¿imata pasan carca? Shuj ejemplomanda parlapai.

⁷ Punda tiempo llactacunapi cuidashpa ricujcunamandapash ashtacatami yachajuita ushapanchi. Jerusalén llactapash shuj llactacunapash contracuna ama yaicuchun nishpami jatun racu pircacunata rurashpa charin carca. Cuidashpa ricuj huaquin jaricunaca chai jatun pircacuna jahuapi shayarishpami tucui ladocunata ricunajun carca. Cutin shujcunaca llactapa pungu yaicunapimi cuidanajun carca. Chai jaricunaca tucuicunami tutapash punllapash ricuriajuna carca. Contracuna shamunajujta ricushpaca, chai llactapi tucuilla gentecunamanmi villana carca (Isaías 62:6). Paicuna na rijcharia ricunajujpica ashtaca gentecunami huañunman carca (Ezequiel 33:6).

⁸ Shinapash, huata 70pica Roma llactamanda contra soldadocunami Jerusalenman yaicurca. ¿Imamandata yaicui usharca? Historiador judío Josefo nishca shinaca, Jerusalén llactata cuidashpa ricuriajcunaca puñushpami quedashcarca. Chaimandami romanocuna yaicushpa chai llactapash tucuchirca, Jehovapa templo huasitapash rupachirca. Judiocunaca chai punllacunapimi ninan manllanai jatun llaquita charirca.

9. Ashtaca gentecunaca ¿imatata na cuenta japin?

⁹ Cunan punllacunapi gobiernocunaca paicunapa llacta seguro cachun nishpami ashtaca soldadocunata, mushuj aparatocunata charin. Shinapash chai gobiernocunaca jahua cielopi shuj jatun gobierno tiajtaca na cuenta japinllu. Jahua cielo gobiernopica Jesusmi ayudajun. Ashtahuangarin, ñallami chai gobiernoca cai Alpapi tucuilla gobiernocunata tucuchinga (Isaías 9:6, 7, nota; 56:10; Daniel 2:44). Chai punlla chayamuchunmi tucui shunguhuan munanchi. Shinapash chai punllapaca listomi cana canchi. Chaimandami Bibliapi ima profeciacuna o ima nishcacuna pactarijujtaca yaipi causana canchi. Shinallata tucui shunguhuanmi Jehová Diostaca sirvishpa catina canchi (Salmo 130:6).

10, 11. a) ¿Imapita shinllita esforzarina capanchi? ¿Imamanda esforzarina capanchi? b) Profeciacuna pactarijujta gentecuna ama crichun Diablo pandachishcataca ¿imamandata seguro capangui?

¹⁰ Pensaripashun, cuidashpa ricuj runaca tuta entero rijcharia cashcanman. Ña pacarijuj horastaca shaijushcami can, rijcharia canaca shinllimi can. Ñucanchicunapashmi tucurimui punllacunapi causanajunchi. Rijchariashna causangapaca shinllitami esforzarina canchi. ¿Imamandata esforzarina canchi? Cai tucurimui punllacuna ña tucurijujpica rijcharia cashpa catinaca shinllimi can. Ña tucurijujpira puñurinshna Jehovata sirvinata saquinaca llaquimi canman. Shinaca ama puñurinshna saquiringapaca quimsa yuyaicunata ricupashun.

¹¹ Diabloca gentecunata pandachinmi. Huañungapaj ashalla punllacuna faltajujpimi Jesusca quimsa viajecaman paipa catijcunataca nirca, Diablomi ‘cai pachata mandajun’ nishpa (Juan 12:31; 14:30; 16:11). Diabloca panda religiongunata utilizashpami ashtaca gentecunata pandachishca. Chaimandami ashtaca gentecunaca, profeciacuna pactarishpa tucuri punlla chayamujtaca na crin (Sofonías 1:14). Imashinami ricupanchi, Diabloca gentecunapa ‘yuyaicunata yanayachishpami saquishca’ (2 Corintios 4:3-6). Chaimandami ashtaca gentecunaca, tucuri punllaca ñallami chayamunga, Jesusmi Diospa Reinopica mandajun nishpa villachijpipash ñucanchitaca na uyangapaj munan. Cutin cutinmi ñucanchitaca nishca, “na uyanayanllu, ripailla” nishpa.

12. ¿Imamandata Diablo pandachichunga na saquina capanchi?

 ¹² Ashtaca gentecunaca Bibliapi ima profeciacuna pactarijujtaca na yachangapaj munanllu. Shinapash na desanimarinachu canchi. Ñucanchicunaca rijchariashna causana cashcataca alimi yachanchi. Apóstol Pabloca congregacionbi huauquicunataca nircami: ‘Tuta shuhua shamunshnami, [“Jehovapa punllaca”, NM] chayamunga. Chaitaca, cangunallata alipachami yachanguichi’ nishpa (1 Tesalonicenses 5:1-6, liingui). Chaimandami Jesusca advirtirca: “Runa Aichayu tucushca ñucapash, cungashcapi ñapash shamusha. Shinamandami cangunaca, alichirishcalla causana canguichi” nishpa” (Lucas 12:39, 40). Diabloca ñallami gentecunataca crichinga “casilla aliguta, imatapash na manllashpami causanajunchi” nishpa. Gentecuna shina yuyaicunahuan pandarishca cajpimi Jehová Diospa punllaca ñapash shamunga. Chaipica gentecunaca manllarishcacunami canga. Cutin ñucanchicunaca ¿imashinata cashun? Jehovapa punllapa listo cangapaj munashpaca, chaishuj gentecunatashna Diablo pandachichunga na saquinachu canchi. Chaimandami apóstol Pablopa cai shimicunataca cunanllata pactachina canchi. Paica nircami: “Ashtahuangarin ñucanchica, aliguta yarishpa rijchariami causana canchi” nishpa. Chai shimicunata pactachingapaca Bibliatami cada punlla liishpa, chai liishcapi Jehová Dios imata nijta pensarina canchi.

13. a) Cai pachapi tiaj espirituca ¿imashinata gentecunataca pandachin? b) Cai pachapi tiaj espíritu ñucanchitapash ama pandachichunga ¿imatata rurana capanchi?

¹³ Cai pachapi tiaj espiritumi ashtaca gentecunapa yuyaicunata pandachin. Cunan punllacunapi ashtaca gentecunaca yuyanmi, Taita Diosta rijsinaca na minishtirinllu nishpa (Mateo 5:3). Shina yuyashpami paicunaca, cai mundopi tiashca cosascunata charingapaj ashtaca tiempota, ashtaca fuerzacunata utilizan (1 Juan 2:16). Ashtahuangarin, cunan punllacunapica ashtaca diversiongunami tian. Chai diversiongunami gentecunataca paicunapa munaicunatalla rurachun yuyachin (2 Timoteo 3:4). Chaimandami ashtaca gentecunaca ima ashtahuan importante cashcata cungashpa Jehovapa amigo cangapaca na munan. Shinaca cai pachapi tiaj espíritu ñucanchitapash ama pandachichunga ¿imatata rurana canchi? Apóstol Pabloca Jesustaca catijcunata nircami, na cangunapa munaicunapilla pensarinachu canguichi nishpa. Apóstol Pablopa consejota uyashpaca rijchariashna causashpami Jehovataca ali sirvishpa cati ushashun (Romanos 13:11-14).

14. Lucas 21:34, 35​pica ¿imashinata Jesusca advirtirca?

¹⁴ Cai pachapi tiaj espíritu ñucanchita pandachichunga na munanchichu. Chaipa randica Jehová Diospa espíritu ñaupaman pushachunmi munanchi. Jehová Diosca paipa espirituta utilizashpami ñucanchitaca ñalla ima pasanata ali intindichishca (1 Corintios 2:12) ^[1] (cai tema tucuripi notata ricupangui). Shinapash cuidadota charinami canchi. Huaquinbica uchilla cosasgucunapashmi Jehovata ali sirvijcunataca asha asha pandachita ushan (Lucas 21:34, 35, liingui). Huaquingunaca ninmi, cangunaca muspa caimandami tucurimui punllacunapi causajushcataca cringuichi nishpa (2 Pedro 3:3-7). Shinapash chai shimicuna ñucanchita desanimachunga na saquinachu canchi. Ñucanchicunaca tucuri punlla ñalla chayamunataca alimi yachanchi. Jehovapa espíritu ñaupaman pushachun munashpaca, congregacionbi tandanajuicunamanga na faltanachu canchi.

15. Apóstol Pedro, Santiago, Juanga ¿imata tucurca? ¿Imashinata ñucanchicunapash paicunashna pandarinchiman?

 ¹⁵ Juchayucuna caimandami rijchariashna causangapaca esforzarina canchi. Jesusca ñucanchicuna juchayucuna nacirishca caimanda pandarijtaca alimi yacharca. Shinaca Jesús huañungapaj ashalla faltajujpi ima pasashcata ricupashun. Paica jucha illaj cashpapash Jehovata tucuipi cazungapaj Jehovapa ayudata minishtishcatami ali yacharca. Chaimandami apóstol Pedrota, Santiagota Juandaca nirca, ñuca mañangacamanga rijcharia canguichi nishpa. Shinapash paicunaca, rijcharia cana ashtahuan importante cashcataca na cuenta japircachu. ¿Imata pasarca? Paicunaca shaijushca caimandami puñushpa quedarca. Jesuspash shaijushcami carca. Shinapash paica, Jehovata mañangapami rijcharia cashpa catirca. Apostolcunapash Jesuspa ejemplotami catina carca (Marcos 14:32-41).

16. a) Rijchariashna causashpa catichunga ¿imatata Jesusca Lucas 21:36​pica nirca?

¹⁶ Shinaca, rijcharia causashpa catichun, Jehovapa punllapa listo cachunga ¿imata ayudanga? Chaipaca alita rurangapaj munaitami charina canchi. Shinapash na chai munaihuanllachu saquirina canchi. Huañungapaj huaquin punllacuna faltajujpica Jesusca paipa catijcunataca nircami, ayudachunga Jehová Diostami mañashpa catina canguichi nishpa (Lucas 21:36, liingui). Cai tucurimui punllacunapi rijchariashna causangapaj munashpaca cutin cutinmi Jehovataca mañajuna canchi (1 Pedro 4:7).

17. Tucuri punllapa listo cangapaca ¿imatata rurana capanchi?

¹⁷ Jesusca paipa catijcunataca nircami: Tucuri punllapica “cungashcapimi ñapash shamusha” nishpa (Mateo 24:44). Shinaca tucui horasmi listo cana canchi. Diablopa mundopi tiashca cosascunata mascana tiempoca na canllu. Cai mundopica yachachinmi, cai mundopi cosascunami cushilla causachun ayudan nishpa. Shinapash chaica na ciertochu can. Rijchariashna causangapaj imata rurana cashcataca Jehová Diospash, Jesuspashmi Bibliapi ricuchinajun. Chaimandami, Bibliapi ima profeciacuna pactarijujta, imashina pactarijujtaca yaipi cana canchi. Ashtahuangarin, Jehovaman ashtahuan quimirishpa, paipa Reinota pundapi churashpami causana canchi. Shinami tucuri punlla chayamujpica listo cashun (Apocalipsis 22:20). Ama cungapashunchichu, rijcharia causashpaca salvarita ushashunmi.