Leeqkunapa tapukuyninkuna
¿Imawantaq tupan Ezequiel qillqapa 37 capitulonpi iskay kaspikunapa hukllawakusqanqa?
Jehova Diosmi Ezequielman willarqa prometesqa allpaman llaqtan kutinanmanta hinaspa huk nacion hina kaqmanta hukllawakunankumanta. Kay willakuyqa cumplikunantaqmi karqa tukupay punchawkunapi Diosta yupaychaqkuna huk nacion hina hukllawakuptinku.
Jehova Diosmi Ezequielta nirqa iskay kaspikunapi qillqananpaq. Huknin kaspipim qillqanan karqa: “Kayqa Juda castapaqwan hukllawakuqnin wakin Israel castapaqmi”, niqta. Hukninpiñataqmi qillqanan karqa: “Kayqa Joseypa rantinpi kaq Efrain castapaqwan hukllawakuqnin wakin Israel castapaqmi”, niqta. Chay iskaynin kaspikunam Ezequielpa makinpi ‘hukllawakunanku’ karqa (Ezeq. 37:15-17).
¿Imawantaq ‘Efrainqa’ kay willakuypi tupan? Efrain aylluqa norte lawpi chunka ayllukunapa nacionninmanta aswan atiyniyuqmi karqa. Chaymi chay nacionpa punta kaq kamachiqninqa Efrain ayllumanta Jeroboam sutiyuq runa karqa (Deut. 33:13, 17; 1 Rey. 11:26). Chay mirayqa Efrain ayllumantam hamurqa, Joseypa churinmanta (Num. 1:32, 33). Joseyqa taytan Jacobmantam hatun bendicionta chaskirqa. Chayraykum ‘Efrain castapaq’ niq kaspiqa norte lawpi chunka ayllukunapa nacionninwan tuparqa. Jesuspa tiemponmanta ñawpaqtaraqmi 740 kaq watapi, achka wata manaraq Ezequiel kay willakuyta qillqachkaptin, Asiria tropakunaqa norte lawpi chunka ayllukunapa nacionninta munaychakururqaku, hinaspa chaypi kaq runakunatapas presocharuspanku apakurqaku (2 Rey. 17:6). Tiempopa risqanman hinam, Babilonia tropakunaqa Asiria nacionta munaychakururqaku. Hinaptinmi Ezequiel chay iskay kaspikunamanta qillqaptin Israel runakunaqa Babilonia nacionpi chiqisqa kachkarqaku.
Jesuspa tiemponmanta ñawpaqtaraqmi 607 kaq watapi, Babilonia tropakunaqa sur lawpi Juda sutichasqa iskay ayllukunapa nacionninta munaychakurqaku hinaspa chaypi yachaqkunatapas presochaspa apakurqaku. Apakurqakuchá norte lawpi chunka ayllukunapa nacionninmanta puchuq runakunatapas. Sur lawpi iskay ayllukunapa nacionninta kamachiqkunaqa Juda ayllumantam karqaku. Sacerdotekunapas Juda nacionpim yacharqaku, chaypim Jerusalen templopi llamkarqaku (2 Cron. 11:13, 14; 34:30). Chaymi ‘Juda castapaq’ niq kaspiqa tuparqa sur lawpi iskay ayllukunapa nacionninwan.
¿Haykapim kay iskay kaspikunaqa hukllawakurqaku? Jesuspa tiemponmanta ñawpaqtaraqmi 537 kaq watapi, Jerusalenpi templota kaqmanta hatarichinankupaq Israel runakuna kutiruptinku. Kutimuqkunaqa karqaku norte lawpi chunka ayllukunapa nacionninmantam hinaspa sur lawpi iskay ayllukunapa nacionninmantam. Israel nacionqa manañam rakinasqachu kachkarqa (Ezeq. 37:21, 22). Kaqmantam Diosta huk sunqulla yupaycharqaku. Chayna kananmantam willakurqaku Isaiaswan Jeremiaspas (Is. 11:12, 13; Jer. 31:1, 6, 31).
¿Imatam Ezequielqa willakurqa Jehova Dios yupaychaqkunamanta? Nirqam lliw yupaychaqninkunata hukllaman hukllawananmanta (Ezeq. 37:18, 19). Chaytam qawachkanchik 1919 watamanta. Chay watamanta ñawpaqtaqa satanasmi tukuyta ruwarqa Dios yupaychaqkunata rakinachinanpaq. Ichaqa 1919 watapim paykunaqa hukllawasqa karqaku, chaynapim pisi-pisimanta huk sunqulla Diosta yupaychayta kaqmanta qallaykurqaku.
Chay watakunapaqqa, Diosta yaqa llapallan yupaychaqkunam Jesuswan kuska hanaq pachapi reykuna hinaspa sacerdotekuna hina kanankupaq suyakuyniyuq karqaku (Apoc. 20:6). Paykunataqa tupachichwanmi ‘Juda castapaq’ niq kaspiwan. Ichaqa kay pachapi kawsanankupaq suyakuyniyuqkunaqa aschallam karqaku. Chaymantam astawan yapakururqaku (Zac. 8:23). Paykunataqa tupachichwanmi Josey castapaq niq kaspiwan.
Kunanqa llapanchikmi Jehova Diostaqa huk sunqulla yupaychachkanchik. Hukllam kamachiqninchik Jesucristopas. Paymanta rimaspanmi Ezequiel willakurqa ‘serviqniy David’ nispan (Ezeq. 37:24, 25). Jesusmi qatiqninkunapaq taytanta mañakurqa: ‘Mañakuchkaykiqa paykuna huklla kanankupaqmi, imaynam qanwan huklla kasqanchikpi hina’, nispa (Juan 17:20, 21). * (Qaway willakuyta). Jesusqa willakurqataqmi hanaq pachapaq hinaspa kay pachapaq suyakuyniyuqkuna “chulla kanchallaña” hina kanankumanta. Paykunaqa ‘chulla michiqllankutañam’ qatinanku karqa (Juan 10:16). Jesuspa nisqanman hinam Diosta yupaychaqkunaqa huk sunqulla kachkanchik hanaq pachapaq utaq kay pachapaq suyakuyniyuq kaspanchikpas.
^ par. 10 Tukupay punchawkunamanta Jesus rimaspanmi qatiqninkunaman achka rikchanachiykunamanta willarqa. Puntatam rimarqa ‘allin yuyayniyuq confianza sirvientemanta’, paykunaqa Diospa llaqtanpi punta apaqkunam kanku (Mat. 24:45-47). Chaymantam rikchanachiykunata willarqa hanaq pachapaq suyakuyniyuqkunamanta (Mat. 25:1-30). Tukunanpaqñataqmi willarqa kay pachapaq suyakuyniyuqkunamanta hinaspa Jesuspa wawqinkunata yanapanankumanta (Mat. 25:31-46). Chaynallataqmi Ezequielpa willakusqanpas puntataqa cumplikurqa hanaq pachapaq suyakuyniyuqkunapi. Israel nacionpi chunka ayllukuna kay pachapaq suyakuyniyuqkunawan mana tupaptinpas, iskay kaspikunapa hukllawakusqanqa yuyarichiwanchikmi hanaq pachapaqwan kay pachapaq suyakuyniyuqkuna hukllaña kasqankuta.
