1, 2. a) Xú káʼnii xkujndu eraʼníí mbaʼin rí mbiʼi xúgi̱ ga̱jma̱a̱ ndiéjunʼ gándoo garigá nda̱wa̱á rá. b) Ndiéjunʼ eʼthúlú náa Isaías 41:10, 13 rá.

 MBÁA ndxájulú precursora regular xtáa ga̱jma̱a̱ mbáa bi̱ kayá edxu̱u̱. Ikha naʼthí: “Maski ajndu nani má xúʼko̱ ñajunʼ Dios, niʼni tsiguʼ rí naxmiéjunʼ wéñuʼ. Ikha jngó na̱nguá eyoo gígú májánʼ, gúʼdoo nandii ga̱jma̱a̱ nguáná na̱nguá ni̱ndxu̱ʼ májánʼ xa̱bu̱ gajmíi̱nʼ eʼwíínʼ. Nguáná naku̱mu̱ʼ rí xáʼngo̱ʼ itháan”.

² Lá nakru̱ʼu̱lú xú káʼnii ku̱mu̱u̱ ndxájulú bugi̱ ráʼ. Nakru̱ʼu̱lú numuu rí kuwáanʼ náa numbaaʼ ndrígóo Satanás. Ikha jngó kuaʼdáá wéñuʼ xkujndu. Rí naxmiéjunlú ma̱ndoo maʼni makuwáanʼ gíná ga̱jma̱a̱ néʼngulú, xóo mbá barco rí gíʼdoo ancla rí tséniñuʼ maʼba̱a̱n (Prov. 12:25). Ndiéjunʼ gáʼni rí maxmiéjunlú rá. Mbáa kuwáanʼ gíná numuu rí nikháñu mbáa bi̱ kuʼyáá. Mbáa naʼniulú wéñuʼ nandii o xa̱bu̱ nuxkulú. O mbáa kuwáanʼ ruñajunʼ gakhi̱i̱ mu muxnún rí nda̱ñúnʼ bi̱ kuwa náa guʼwúlú numuu rí na̱jkha̱ raʼni gakhi̱i̱ wéñuʼ. Nda̱wa̱á, xúgíʼ rígi̱ ma̱ndoo maʼni makáguabáanʼ ga̱jma̱a̱ ní xákuwáanʼ gagi. Mú Ajngá rawunʼ Dios naʼthúlúʼ rí Jeobá xtáa xawii mu maxnúlúʼ ñawúunʼ ga̱jma̱a̱ mambáyulúʼ (atraxnuu Isaías 41:10, 13). *

3, 4. a) Ndiéjunʼ eyoo gáʼthi náa Biblia índo̱ naʼthí ga̱jma̱a̱ numuu ñawúnlú rá. b) Ndiéjunʼ gándoo maʼni rí muʼniñátígú ñawúnlú rá.

 ³ Mbaʼa nuthu, Biblia najmuu rí kaʼyoo xuyulú mu maʼthí xú káʼnii xa̱bu̱ ni̱ndxu̱lú o rí nuʼni. Mbá xkri̱da, naʼthí ga̱jma̱a̱ numuu ñawúnlú mbaʼa nuthu. Índo̱ náa Biblia naʼthí rí mbáa xa̱bu̱ nuxnáá tsiakii ñawúunʼ, mbáa nandoo gáʼthi rí xa̱bu̱ buʼko̱ nakánaa tsiakii, ga̱jma̱a̱ xtáa xawii mu mayambáá (1 Sam. 23:16; Esd. 1:6). Ma̱ngaa nandoo gáʼthúu̱n rí xa̱bu̱ buʼko̱ nandxaʼwáminaʼ rí májánʼ ga̱jma̱a̱ nda̱wa̱á makánaa rí májánʼ.

⁴ Nguáná, náa Biblia naʼthí rí xa̱bu̱ naniñátígú ñawúunʼ. Rígi̱ nandoo gáʼthúu̱n rí xa̱bu̱ buʼko̱ nikáguabaaʼ o nándáa rí gíʼthu̱u̱n nda̱wa̱á (2 Crón. 15:7; Heb. 12:12). Á mu nakumulú rí nagáanʼ o néʼngulú wéñuʼ, o nakumulú rí nánguá embáxulú májánʼ gajmiúlú Jeobá xóo nákha ginii, rúʼko̱ gáʼni rí muʼniñátígú ñawúnlú. Ndiéjunʼ gándoo gáxnulú tsiakii mu maʼngulú muraʼníí rí gáʼkha̱ ga̱jma̱a̱ makuwáanʼ gagi má xúʼko̱ rá.

5. a) Xú káʼnii gakumulú índo̱ kuaʼdáá xkujndu, mú ndiéjunʼ gíʼmaa marmáʼáan a̱jkiu̱lú rá. b) Ndiéjunʼ gúʼyáá náa artículo rígi̱ rá.

⁵ (Atraxnuu Sofonías 3:16, 17). * Índo̱ kuaʼdáá xkujndu, ragíʼmaa mamiñúlú ni má makáguabáanʼ. Rígi̱ nindxu̱u̱ xóo rí muʼniñátígú ñawúnlú. Garmáʼáan a̱jkiu̱lú rí Jeobá nindxu̱u̱ Anu̱lú ga̱jma̱a̱ nandoo kaʼyulú wéñuʼ. Ikhaa nandoo rí muniʼñáaʼ náa ñawúunʼ rí naʼni maxmiéjunʼlú (1 Ped. 5:7). Ga̱jma̱a̱ mañewu̱nlú xó má niña̱wu̱u̱n israelitas. Náa Biblia naʼthí: “Ñawúunʼ Jeobá tseʼni̱i̱ chíʼmbaʼ, mu xándoo maʼni káwáanʼ”. Rígi̱ nandoo gáʼthúu̱n rí ikhaa xtáa xawii mu maʼni káwíin xa̱bi̱i̱ jmbiin (Is. 59:1). Náa artículo rígi̱ gúʼyáá ajtsú májánʼ xkri̱da rí na̱ʼkha̱ náa Biblia. Majmañulúʼ rí Jeobá nandoo ga̱jma̱a̱ maʼngo̱o̱ maxnún tsiakii mu muni rí nandoo ikhaa maski ajndu guáʼdáá xkujndu gakhi̱i̱. Ma̱ngaa mbuʼyáá xú káʼnii xkri̱da rígi̱ maxnúlúʼ tsiakii.

6, 7. Ndiéjunʼ ku̱ma̱ʼ ikháánʼ rí ma̱ndoo majmañulúʼ rí xú káʼnii israelitas niʼngu̱u̱n nini gajmiún amalequitas rá.

⁶ Táʼni má mba̱yu̱ʼ rí israelitas niguma káwíin náa Egipto índo̱ nixnúún amalequitas. Moisés niʼthúu̱n mbáa xa̱bu̱ bi̱ támiñuu rí maʼga kagu̱u̱n israelitas mu muxmijná. Nda̱wa̱á Moisés nitsimuu náa kúbá dí rígá mijngii ga̱jma̱a̱ ndxájuu Aarón ga̱jma̱a̱ imba̱a̱ xa̱bu̱ bi̱ mbiʼyuu Hur. Asndu ikhí nakujmaa náa nuxmijná. Lá nagáñun numuu rí namiñun xáʼ. Na̱nguá.

⁷ Moisés nigiʼdoo mbá awan mu israelitas maʼngu̱u̱n muni gajmiún amalequitas. Nigujtun xkuiya ndrígóo Dios gajkhun ga̱jma̱a̱ nikuxi̱ rijma̱a̱. Nákha Moisés kagu̱ ñawúunʼ rijma̱a̱ Jeobá naxnún tsiakii israelitas mu maʼngu̱u̱n muni gajmiún xa̱bu̱ sia̱nʼ. Mú índo̱ Moisés naʼni néʼngo̱o̱ ga̱jma̱a̱ narígúu ñawúunʼ, ikhú xa̱bu̱ sia̱nʼ naʼngu̱u̱n. Ikha jngó Aarón ga̱jma̱a̱ Hur nimbayíí nacha̱ Moisés. Náa Biblia naʼthí: “Índo̱ nigaʼ ñawúunʼ Moisés, ikhú nitsiji mbá itsí ga̱jma̱a̱ ikhaa nigi̱ʼi̱ ikhí; Aarón ga̱jma̱a̱ Hur nijuadaʼ ñawúunʼ, ikha jngó ñawúunʼ niguájun jmbu asndu índo̱ nirámáʼ a̱jkha̱ʼ”. Nda̱wa̱á kayuʼ, israelitas niʼngu̱u̱n nixmijná ga̱jma̱a̱ numuu ñawúunʼ Dios (Éx. 17:8-13).

8. a) Ndiéjunʼ niʼni rey Asá índo̱ soldados etíopes inu muxmijná ga̱jma̱a̱ Judá rá. b) Xú káʼnii gándoo guʼyaridáá xkridoo Asá rá.

 ⁸ Jeobá ma̱ngaa nixtáa xawii mu majmuu ñawúunʼ rí gíʼdoo tsiakii mu mambáyúu xuajñu nákha mbiʼi ndrígóo rey Asá. Ikhaa ndiyóoʼ maxmínaʼ ga̱jma̱a̱ Zérah xa̱bu̱ etíope, bi̱ nigiʼdiin mbaʼin soldados eʼthí náa Biblia. Soldados ndrígóo ninindxu̱ún mbá millón bi̱ najmañún, itháan mbaʼin ki xóo soldados bi̱ gíʼdiin Asá. Ndiéjunʼ niʼni Asá rá. Lá nixmiéjunʼ o nimíñu xáʼ. Lá niniñuʼ majpátrigu ñawúunʼ xáʼ. Na̱nguá. Mbá nacha̱ ninda̱ʼa̱ rí Jeobá mambáyúu. Asndu tsáa soldado ma̱ndoo maʼthí rí xáʼngu̱u̱n muni gajmiún soldados ndrígóo etíope. Mú náa Biblia naʼthí rí “Dios tsi mba xugui ri mago maʼne” (Mat. 19:26). Dios nijmuu tsiakii ndrígóo ga̱jma̱a̱ ‹niʼni gámbíin soldados etíopes náa inuu Asá›. Ga̱jma̱a̱ rey bugi̱ niʼni ñajunʼ Jeobá ga̱jma̱a̱ xúgíʼ a̱jkiu̱u̱n náa xúgíʼ mbiʼi rí nixtáa (2 Crón. 14:8-13; 1 Rey. 15:14).

9. a) Índo̱ Nehemías ni̱jkha̱nú náa Jerusalén, ndiéjunʼ rí ndiʼyoo, ga̱jma̱a̱ káʼnii niʼni xá. b) Xú káʼnii niriʼña̱a̱ Jeobá rí niʼtájkáan Nehemías rá.

⁹ Rí xúgi̱ guʼyáá xkridoo Nehemías. Índo̱ ikhaa ni̱jkha̱ náa Jerusalén, ndiʼyoo rí xa̱bu̱ sia̱nʼ bi̱ kuwa náa i̱ʼwáʼ xuajen mba̱ʼu̱ kuwa runimiñún judíos mu xúni̱i̱ xtátsí ndrígóo Jerusalén. Xuajen na̱nguá kúguamaʼa, ga̱jma̱a̱ judíos kuwa gíná. Xú káʼnii nikumu̱u̱ Nehemías rá. Lá niguabaminaʼ ga̱jma̱a̱ niʼniñátígú ñawúunʼ xáʼ. Na̱nguá. Ikhaa niguʼwuun ma̱ndo̱ʼo̱o̱ Jeobá rí mambáyúu, xóo niʼni Moisés, Asá ga̱jma̱a̱ eʼwíínʼ xa̱bi̱i̱ Dios bi̱ ninindxu̱ún jmbiin. Ikhú, Nehemías ma̱ngaa ndiyáaʼ rí Jeobá mambáyúu. Ikhaa niʼtájkáan, ga̱jma̱a̱ Jeobá niriʼñuu. Xú káʼnii rá. Nijmuu ‹tsiakii ndrígóo ga̱jma̱a̱ ñawúunʼ rí gíʼdoo tsiakii› mu mambáñun judíos (atraxnuu Nehemías 1:10; 2:17-20; 6:9). * Lá nakumulú rí Jeobá najmuu rí mbiʼi xúgi̱ ‹tsiakii ndrígóo ga̱jma̱a̱ ñawúunʼ rí gíʼdoo tsiakii› mu mambáyulúʼ ráʼ.

10, 11. a) Ndiéjunʼ eʼni Satanás mu muʼniñátígú ñawúnlú rá. b) Xú káʼnii exnúlú tsiakii Jeobá rá. c) Arathá xú káʼnii embáyaʼ ikháánʼ rí naʼsngúlú Jeobá.

¹⁰ Nduʼyáá májánʼ rí Satanás nditháan xáʼniñátígú ñawúunʼ. Ikhaa majmuu nduwaʼ ga̱jma̱a̱ maʼni rí Xa̱bu̱ Ñajunʼ munimiñúlú, mangiin xa̱bu̱ ede̱ bi̱ kuwa náa guʼwá ndxajkun ga̱jma̱a̱ bi̱ niniñaaʼ kamba̱a̱ rí gajkhun mugíʼ murikháá ñajunʼ rí nuʼni. Ndiéjunʼ rí eyoo xá. Rí muniʼñáʼ ruʼtáraʼa ajngáa numuu Reino. Mú Jeobá maʼngo̱o̱  ga̱jma̱a̱ nandoo mambáyulúʼ. Ikhaa naxnúlú tsiakii ga̱jma̱a̱ xi̱ʼ kaʼwu ndrígóo (1 Crón. 29:12). Á mu nandulúʼ muʼni gajmiúlú Satanás ga̱jma̱a̱ numbaaʼ ndrígóo, phú gíʼdoo numuu munda̱ʼa̱a̱ xi̱ʼ kaʼwu ndrígóo Dios (Sal. 18:39; 1 Cor. 10:13). Jeobá ma̱ngaa naxnúlú tsiakii ga̱jma̱a̱ Ajngá rawunʼ ikha jngó nuxnáa wéñuʼ núma̱aʼ. Ma̱ngaa gundxaʼwamíjna̱ xúgíʼ rí najmañulúʼ mámbá gu̱nʼ náa i̱yi̱i̱ʼ ndrígúlú. Ga̱jma̱a̱ garmáʼáan a̱jkiu̱lú rí naʼthí náa Zacarías 8:9, 13 (atraxnuu). * Ajngáa rígi̱ nijuiʼthá índo̱ xtáa raguma̱a̱ templo náa Jerusalén, mú xóó naxnúlú tsiakii.

¹¹ Jeobá ma̱ngaa naxnúlú tsiakii náa reunión, náa asamblea ga̱jma̱a̱ náa escuela náa nusngúlú ga̱jma̱a̱ numuu Dios. Rí najmañulúʼ ikhí nambáyulúʼ muʼni ñajunʼ ga̱jma̱a̱ mbá numuu májánʼ, muʼgími̱jna̱ metas ga̱jma̱a̱ muʼni ñajunʼ Dios (Sal. 119:32). Lá gajkhun rí nandulúʼ muguaʼdáá tsiakii rí Jeobá exnúlú índo̱ naʼsngúlú ráʼ.

12. Ndiéjunʼ gándoo muʼni mu maguaʼdáá itháan tsiakii rá.

¹² Xó má eʼyáá, Jeobá nimbáñun xa̱bi̱i̱ maʼngu̱u̱n muni gajmiún amalequitas ga̱jma̱a̱ etíopes. Ma̱ngaa, nixnúu tsiakii Nehemías ga̱jma̱a̱ judíos mu muni̱i̱ xtátsí ndrígóo Jerusalén. Xúʼko̱ má xúgi̱, Dios gaxnúlú tsiakii mu xúniʼñáʼ ruʼtáraʼa maski ajndu kuaʼdáá gamiéjunʼ ga̱jma̱a̱ rí xa̱bu̱ nuxkulu o rí tsíñún gúdxuun (1 Ped. 5:10). Jeobá xáʼni mbá milagro mu maʼni gámbáa xkujndu ndrígúlú. Á mu nandulúʼ muguaʼdáá tsiakii, rígá rí ndayóoʼ muʼni mangáanʼ. Ndiéjunʼ eyóoʼ muʼni rá. Muraxnuu Biblia xúgíʼ mbiʼi, muʼniratamijná mu mu̱ʼgua̱ náa nagimbáanʼ ga̱jma̱a̱ mu̱ʼgua̱ ikhí xúgíʼ xmáná, muʼnigajmaa ndajkuáanʼ ga̱jma̱a̱ mbá guʼwáanʼ, ma̱ngaa munda̱ʼa̱a̱ Jeobá rí mambáyulúʼ. Xúniʼñáʼ rí nimbá maʼni rí xuguáʼdáálu tsiakii rí naxnúlú Jeobá. Á mu índo̱ nundxa̱ʼwa̱míjna̱ ga̱jma̱a̱ mbá ñajunʼ ndrígóo Dios nduʼyáá rí nuʼniñátígú ñawúnlú, gunda̱ʼa̱a̱ Jeobá rí mambáyulúʼ. Mbuʼyáá xú káʼnii xi̱ʼ ndrígóo naxnúlú tsiakii ga̱jma̱a̱ naʼni rí maʼndulú muʼni rí ikhaa naʼthúlúʼ (Filip. 2:13). Mú, lá ma̱ndoo mangáanʼ muxnún tsiakii eʼwíínʼ xa̱bu̱ ráʼ.

13, 14. a) Ndiéjunʼ nixnúu tsiakii mbáa ndxájulú bi̱ nikháñu a̱ʼgiu̱u̱ rá. b) Ndiéjunʼ gándoo muʼni mu muxnún tsiakii eʼwíínʼ rá.

¹³ Jeobá naxniúlú mbaʼin wéñuʼ a̱ngiu̱lú náa xúgíʼ numbaaʼ bi̱ naxmiéjunʼ kuyulúʼ ga̱jma̱a̱ bi̱ ma̱ndoo muxnulu tsiakii. Apóstol Pablo niʼthí: “Guxnu̱u̱n tsiakii bi̱ nuniñátígú ñawúunʼ ga̱jma̱a̱ ragómiu̱u̱n bi̱ néʼngu̱u̱n, ga̱jma̱a̱ guni̱i̱ jmbu kamba̱a̱ mu ma̱ndoo mu̱ʼgua̱” (Heb. 12:12, 13). Mbaʼin a̱ngiu̱lú bi̱ nikuwa ginii nindrigú tsiakii rúʼko̱. Ikháá má kayuʼ rígá xúgi̱. Guʼyáá xkri̱da ndrígóo mbáa ndxájulú bi̱ nikháñu a̱ʼgiu̱u̱ ga̱jma̱a̱ nigiʼdoo i̱ʼwáʼ xkujndu mingíjyúuʼ wéñuʼ. Ikhaa niʼthí: “Nijmañuʼ rí xándoo muraʼwíí tsáʼkhá rí gúraʼníí, ní nguáná guguaʼdáálú ni nguáthá mba̱yu̱ʼ. Ikhúúnʼ nda̱yo̱o̱ rí natajkáan ga̱jma̱a̱ rí nanigajmaa mbáwun nindxu̱u̱ xóo rí maguʼwúnʼ mbá chaleco rí maʼni kríñunʼ rí tséniñuʼ magu̱ʼu̱u̱n. Ma̱ngaa naxnúʼ wéñuʼ tsiakii índo̱ a̱ngui̱nʼ numbayúʼ”. Ga̱jma̱a̱ xóó niʼthí: “Ni̱jkhánú ndi̱yo̱o̱ rí gíʼdoo wéñuʼ numuu  mambaxúʼ májánʼ ga̱jmu̱ʼ Jeobá nákha xóó tséʼkha̱nú xkujndu gakhii”.

¹⁴ Aarón ga̱jma̱a̱ Hur nixnáá tsiakii Moisés índo̱ nijuadaʼ ñawúunʼ nákha kuwa rugiʼdu̱u̱n gajmiún amalequitas. Mangáanʼ ma̱ndoo mbuʼyáaʼ xóo gúxnún tsiakii o mumbáñuun eʼwíínʼ. Mbá xkri̱da, ma̱ndoo muxnún tsiakii a̱ngiu̱lú guanii, bi̱ guáʼdáá nandii, bi̱ nuxkúún, bi̱ kuwa ndajkúun o á mu nikháñu mbáa bi̱ kuyáá. Ma̱ngaa ma̱ndoo muxnún tsiakii bi̱ ni̱ndxu̱ún jiáma ga̱jma̱a̱ wa̱ʼxa̱ʼ, numuu rí nutsijmin má xúʼko̱ mu muni dí ra̱májánʼ o numuu rí maʼngu̱u̱n mudaʼ náa numbaaʼ rígi̱ (1 Tes. 3:1-3; 5:11, 14). Guʼyáaʼ mbaʼa enii mu maxmiéjunʼlú kuʼñúún eʼwíínʼ índo̱ kuwaanʼ náa Guʼwá nagimbáanʼ, índo̱ nuʼtáraʼa, índo̱ kuwaanʼ ruphiʼtsu mbóó o índo̱ nuʼtáraʼa ga̱jma̱a̱ teléfono.

15. Xú káʼnii gándoo gambáñun a̱ngiu̱lú ajngáa rí gíʼdoo tsiakii rá.

¹⁵ Nda̱wa̱á rí niʼngo̱o̱ Asá nixmínaʼ gajmíi̱n soldado etíope, gaʼyee Azarías nixnúu tsiakii ikhaa ga̱jma̱a̱ xuajñu índo̱ niʼthí ajngáa rígi̱: “Gaguaʼdáá tsiakii ga̱jma̱a̱ xúniʼñátígú ñawánla, numuu dí rígá mbá rí muʼdaʼla ga̱jma̱a̱ numuu ñajunʼ rí gúnila” (2 Crón. 15:7). Ga̱jma̱a̱ ajngáa rígi̱, Asá mbaʼa rí niriʼkhu̱u̱ mu xuajen muni rí nandoo Jeobá xó má gíʼmaa. Xúʼko̱ má kayuʼ nindxu̱u̱, ajngáa ndrígúlú ma̱ndoo maxnún tsiakii eʼwíínʼ ga̱jma̱a̱ mambáñun mu muni má xúʼko̱ ñajunʼ Jeobá (Prov. 15:23). Ga̱jma̱a̱ xámbumulú nditháan rí comentario ndrígúlú náa nagimbáanʼ naxnún tsiakii a̱ngiu̱lú.

16. a) Xú káʼnii gándoo bi̱ kuya̱ edxu̱u̱ mbuyaridáá Nehemías rá. b) Arathá xú káʼnii tikhun a̱ngiu̱lú nimbayáʼ ikháánʼ.

 ¹⁶ Jeobá nimbáyúu Nehemías mangiin judíos mu muxnáá tsiakii ñawúunʼ ga̱jma̱a̱ numuu ñajunʼ rí muni. Niʼngu̱u̱n nini̱i̱ xtátsí ndrígóo Jerusalén káaʼ mbá 52 mbiʼi (Neh. 2:18; 6:15, 16). Mú Nehemías tági̱ʼi̱ mbaʼyoo xóo eñajunʼ eʼwíínʼ, ma̱ngaa niñajunʼ (Neh. 5:16). Rí mbiʼi xúgi̱, mbaʼin bi̱ kuya̱ edxu̱u̱ nduyaridáá Nehemías índo̱ nuñajunʼ náa naguma guʼwá o índo̱ naguma kaʼwi̱i̱ ga̱jma̱a̱ índo̱ naguma májáánʼ Guʼwá náa nagimbáanʼ. Numuu rí nandún kuñún a̱ngiu̱ún, a̱ngiu̱lú bugi̱ nuxnún tsiakii a̱ngiu̱lú bi̱ guáʼdáá tsiakii índo̱ nagún gúñún o nutaraʼa gajmiún (atraxnuu Isaías 35:3, 4). *

17, 18. Ndiéjunʼ guguaʼthi̱i̱n índo̱ gaguaʼdáá xkujndu ga̱jma̱a̱ á mu kuwaanʼ gíná rá.

¹⁷ Rí muñajunʼ gajmiúlú a̱ngiu̱lú nambáyulúʼ makuwáanʼ itháan jnduʼ ga̱jma̱a̱ mambáxulu gajmiúlú kámuu. Ma̱ngaa naʼni mbuʼyáá májánʼ rí Dios inu maʼni tsajkurámáánʼ ga̱jma̱a̱ numuu Reino ndrígóo. Índo̱ nuxnún tsiakii eʼwíínʼ, numbañún mu maʼngu̱u̱n muraʼníí xkujndu ga̱jma̱a̱ mbuʼyáá rí nda̱wa̱á makhánulúʼ rí májánʼ wéñuʼ. Ikhú má mangáanʼ naʼni̱i̱ gujkhuʼ ñawúnlú ga̱jma̱a̱ nambáyulúʼ mundxaʼwamíjna̱ ga̱jma̱a̱ numuu rí kuaʼti̱i̱n nda̱wa̱á.

¹⁸ Índo̱ nundxa̱ʼwa̱míjna̱ xú káʼnii Jeobá niyambáá ga̱jma̱a̱ niña̱wu̱u̱n xa̱bi̱i̱ nákha wajyúúʼ, fe rí kuaʼdáá náa ikhaa naʼni itháan gujkhuʼ. Ikha jngó índo̱ guguaʼdáá xkujndu ga̱jma̱a̱ á mu nakuwáanʼ gíná, xúʼniñátígú ñawúnlú. Mbuʼyáá májánʼ rí á mu nunda̱ʼa̱a̱ Jeobá mambáyulúʼ, ñawúunʼ maxnúlúʼ tsiakii ga̱jma̱a̱ mbá nacha̱ mundrígúlú rí májánʼ rí maxnúlúʼ Reino ndrígóo (Sal. 73:23, 24).