1, 2. Kai si arus iperjuangken ntah pe si man lawanen juak-juak Jahwe?

KERINA juak-juak Dibata si setia terus erjuang, mulai Abil nari seh asa si gundari. Ipebetehken rasul Paulus man kalak Kristen Heber maka ’melala reh kiniseran man kalak e tapi la ia talu i bas perbeben e’ gelah ngena ate Jahwe janah ipasu-pasuNa kalak e. (Heber 10:32-34) Ipeseri Paulus perjuangen kalak Kristen ras perjuangen atlet i Junani si iusahakenna kal menang i bas melala pertandingen. (Heber 12:1, 4) Gundari, kita lit i bas perlumban guna ndatken kegeluhen. Tapi, lit musuh si atena erban kita ndabuh gelah lanai kita ermeriah ukur janah la ndatken pasu-pasu i bas wari si pepagi.

² Perjuangenta ntah pe si man ”lawanenta” eme Setan ras donina. (Epesus 6:12) Emaka, arus situlak pengaruh arah ajaren, filsafat, ras kebiasen si la mehuli i doni  enda, bagi perbahanen amoral, ngisap, mabuk-mabuk, ntah pe make narkoba. Kita pe arus erjuang ngelawan perasan kitik ukur ras kelemahenta.—2 Korinti 10:3-6; Kolose 3:5-9.

3. Uga Dibata mere pelatihen man banta guna ngelawan musuh?

³ Banci nge kita menang ngelawan musuh-musuhta si megegeh e? Banci, tapi arus erjuang! Ipeseri Paulus dirina ras petinju sanga ikatakenna, ”Bali ras kalak si jago ertinju, la aku nggit ninju angin.” (1 Korinti 9:26) Bagi petinju si ngadapi lawanna, perlu silawan musuhta. Isampati ras ilatih Jahwe kita i bas perjuangenta. IajariNa kita arah Pustaka si Badia, publikasi, perpulungen, ras kebaktin. Idalankenndu nge kai si nggo ipelajarindu? Adi lang, kam seri saja ras petinju si ninju angin. Ertina, la tutus atendu ngelawan musuhndu.

4. Kai si arus silakoken gelah la italuken si jahat?

⁴ Arus lalap kita erjaga-jaga. Engkai? Banci rempet kita iserang musuh ntah pe sanga kita lemah. Ipersingeti Pustaka kita, nina, ”Ola pelepas kam talu ibahan si jahat, tapi talukenlah si jahat e alu perbahanen si mehuli.” (Roma 12:21) Adi terus silawan kai si jahat, banci kita menang! Tapi adi kita melantar janah ngadi erbebe, kita banci italuken Setan, donina, bage pe kelemahenta. Emaka, ula pernah nerah. Ula kitik ukurndu janah ula kote tanndu!—1 Petrus 5:9.

5. (a) Kai si perlu siinget gelah ngena ate Jahwe janah ipasu-pasuNa kita? (b) Contoh ise saja si nandangi sibahas?

⁵ Gelah banci menang, perlu siinget kai alasenta erjuang. Kita erjuang gelah ngena ate Dibata janah ipasu-pasuNa kita. Nina Heber 11:6, ”Kerina si reh ndahi Dibata arus tek maka Dibata lit dingen iberekenNa upah man kalak si ndarami Ia.” Kata-kata si ndarami Ia ncidahken maka gelah ngena ate Jahwe man banta, perlu lit usahanta. (Perbahanen 15:17) I bas Pustaka, lit melala contoh kerna dilaki ras diberu si bage. Jakup, Rahel, Jusup, ras Paulus ngadapi keadan si erban kitik ukurna bage pe erban latih iakapna. Tapi, berhasil kalak enda ngatasisa. Contoh kalak enda mbuktiken maka adi erjuang kita, banci sidatken pasu-pasu Jahwe. Mari sibahas uga carana.

6. Engkai Jakup banci megeng-geng, janah kai upahna? (Nehen gambar i bas pemena artikel.)

⁶ Jakup erjuang ras la nerah erkiteken keleng kal atena Jahwe janah iergaina hubungenna ras Ia. Erkiniteken kal ia man janji Jahwe guna masu-masu kesusurenna. (Kejadin 28:3, 4) Merhat kal ia ipasu-pasu Dibata alu bage erbebe ia ras malekat amin gia umurna menam 100 tahun. (Oge Kejadin 32:24-28.) Ngasup nge Jakup sisada erbebe ras malekat si megegeh e? Tentu lang! Tapi paguh kal tekadna ndatken pasu-pasu! Emaka, ibere Jahwe pasu-pasu man bana erkiteken ia megeng-geng. Janah ibereNa ka man bana gelar Israel, si ertina ”Enggo erbebe kam ras Dibata”. Ialoken Jakup upahna, eme, ngena ate Jahwe man bana janah ipasu-pasuNa ia. Kita pe merhat kal ndatken upah si seri.

7. (a) Kai si erbanca kitik ukur Rahel? (b) Kai si ilakoken Rahel janah kai asilna?

 ⁷ Rahel, ndehara si ikelengi Jakup, merhat ka meteh uga Jahwe nepati janjiNa man perbulangenna. Tapi, lit sada masalah. La banci ia mupus. I bas jaman Pustaka, masalah enda erban kitik kal ukur diberu. Uga Rahel ngelawan perasan si bage? La pernah ia nerah. Terus ia erjuang alu reh rusurna ertoto man Jahwe. Ibegiken Jahwe toto Rahel si bulat ukur. Dungna, meriah kal ukur Rahel sanga banci ia mupus. Nina, ”Enggo kupekeri gegehku erbebe . . . janah aku enggo menang.”—Kejadin 30:8, 20-24.

8. Perbeben kai si iadapi Jusup, janah usihen kai si iberena?

⁸ Banci jadi kiniteken Jakup ras Rahel maba pengaruh man anakna, Jusup, terutama sanga iadapina perbeben i bas geluhna. Sanga umur Jusup 17 tahun, berubah kal kegeluhenna. Cian ate senina-seninana man bana janah idayakenna ia jadi juak-juak. Kenca si e, ipenjaraken ia ertahun-tahun dekahna i Mesir aminna la ersalah. (Kejadin 37:23-28; 39:7-9, 20, 21) Tapi la kitik  ukur Jusup ntah pe nembeh atena, janah la iusahakenna balas dendam. Engkai? Erkiteken iergaina janah iukurina hubungenna ras Jahwe. (Imamat 19:18; Roma 12:17-21) Usihen Jusup banci nampati kita. Aminna gia siadapi melala perbeben sanga kitik denga ntah pe tempa-tempa la lit arapenta gundari, perlu kita terus erjuang janah la nerah. Alu bage, banci kita tek maka Jahwe pasti masu-masu kita.—Oge Kejadin 39:21-23.

9. Uga banci siusih Jakup, Rahel, ras Jusup?

⁹ Gundari, banci saja arus ka kita ngadapi mbue perbeben. Mungkin la adil perbahanen kalak man bandu, icurigai, itokohi, ntah pe lit si cian man bandu. Asangken kitik ukurndu, ingetlah kai si nampati Jakup, Rahel, bage pe Jusup gelah terus ngelayani Jahwe alu meriah ukur. Ipegegehi janah ipasu-pasu Dibata kalak e erkiteken iergaina kal hubungenna ras Dibata. Kalak enda terus erjuang janah perbahanenna sentudu ras totona. Gundari kita nggeluh i bas wari-wari perpudi. Emaka, arapenta i bas wari pepagi arus terus siinget! Nggit nge kam erbebe, ntah pe erjuang gelah ngena ate Jahwe man bandu?

10, 11. (a) Engkai kita arus erbebe guna ndatken pasu-pasu Dibata? (b) Kai si banci nampati kita erban pilihen si benar?

¹⁰ Engkai kita arus erbebe guna ndatken pasu-pasu Dibata? Salah sadana erkiteken kita la serta, jadi banci saja kita erjuang ngelawan sura-suranta si salah. Lit si erjuang gelah positif perukurenna nandangi pendahin erberita, janah piga-piga erjuang ngadapi penakit ntah pe lungunen. Si debanna mesera iakapna ngalemi kalak si deban. La soal asa dekahna kita ngelayani Jahwe, kerina kita perlu ngelawan kai saja si banci erban mesera siakap ngelayani Dibata, pribadi si mere upah man kalak si setia.

¹¹ Memang, jadi kalak Kristen ras erban pilihen si benar banci jadi mesera, terutama sanga erjuang ngelawan sura-sura si salah. (Jeremia 17:9) Adi bage perasanndu, pindolah kesah si badia man Jahwe. Toto ras kesah si badia banci mpegegehi kam ngelakoken kai si benar, janah kam pe ipasu-pasu Dibata. Ertekadlah nggeluh sentudu ras totondu. Ogelah Pustaka tep-tep wari janah ban waktundu pelajaren pribadi bage pe kebaktin jabu.—Oge Masmur 119:32.

12, 13. Uga dua kalak Kristen isampati i bas ngelawan sura-sura si salah?

¹² Lit melala contoh uga Kata Dibata, kesah si badia, ras publikasinta nampati turang senina ngelawan sura-sura si salah. Sekalak anak perana ngoge artikel ”Bagaimana Anda Dapat Melawan Hasrat yang Salah?” i bas Sedarlah! 8 Desember 2003. Uga tanggapenna? ”Erjuang aku ngelawan perukuren si salah. I bas artikel e ituriken kerna ’lit nterem jelma si mberat kal iakapna naluken sura-sura si salah’. Kenca kuoge, kugejapken maka aku bagin i bas persadan turang senina. Lanai kuakap sisada.” Datna ka manfaat arah artikel ”Gaya Hidup Alternatif—Apakah Diperkenan Allah?” i bas Sedarlah!  8 Oktober 2003. Arah artikel e, ietehna lit piga-piga kalak la erngadi-ngadi erjuang, bali bagi ’duri i bas daging’. (2 Korinti 12:7) Tapi, alu terus erjuang mpertahanken lagu langkah si bersih, lit arapen si mehuli i bas wari si pepagi. Nina, ”Erkiteken si e, kuakap aku pe banci tetap setia. Bujur kal kukataken man Jahwe erkiteken igunakenNa organisasiNa nampati kita gelah berhasil ndalani kegeluhenta i bas doni si jahat enda.”

¹³ Sekalak turang seninanta i Amerika Serikat nulis surat, nina, ”Bujur kukataken erkiteken lalap ibereken kena pangan rohani si cocok ras keperlun kami i bas waktu si tepat. Rusur kuakap artikel-artikel enda iban khusus bangku. Ertahun-tahun dekahna, erjuang aku ngelawan sura-sura si nembeh ate Jahwe. Maun-maun, nerah saja ateku. Kueteh Jahwe perkuah janah nggit ngalemi. Tapi, erkiteken la tuhu-tuhu nembeh ateku sura-sura si salah e, la kuakap aku patut ndatken penampatNa. Perjuangen enda mpengaruhi kegeluhenku. . . . Kenca kuoge artikel ’Apakah Saudara Memiliki ”Hati untuk Mengenal” Yehuwa?’ i bas Menara Pengawal 15 Maret 2013, tek aku maka Jahwe situhuna merhat nampati aku.”

14. (a) Uga perasan Paulus kerna perjuangenna? (b) Uga kita banci menang ngelawan kelemahenta?

¹⁴ Oge Roma 7:21-25. Paulus pe mesera iakapna ngelawan kelemahen ras sura-sura si salah. Tapi, tek ia banci ia menang adi ertoto janah mindo penampat man Jahwe bage pe erkiniteken man tebusen Jesus. Uga kita? Banci nge kita menang ngelawan kelemahenta? Banci, adi siusih Paulus alu erpengendes man Jahwe labo man gegehta, janah erkiniteken man tebusen.

15. Uga Jahwe banci nampati kita tetap setia janah la nerah sanga ngadapi masalah?

¹⁵ Maun-maun, banci saja merhat kal Jahwe meteh uga ermediatena kita nandangi masalahta. Contohna, adi kita ntah pe anggota keluarganta mekelek penakitna ntah pe iperlakoken alu la adil, uga nge tanggapenta? Adi tuhu-tuhu tek kita man Jahwe, sipindo gelah ipegegehiNa kita, alu bage kita banci tetap setia, ermeriah ukur, janah rembak ras Ia. (Pilipi 4:13) Usihen-usihen kalak Kristen si marenda ras si gundari ncidahken maka toto banci mpegegehi kita janah ngiahken kita gelah la nerah.

16, 17. Kai tekadndu?

¹⁶ Pasti meriah ukur Iblis adi kitik ukurndu, nerah, janah ngadi erjuang. Emaka, ertekadlah gelah ’cikepndu si mehuli’. (1 Tesalonika 5:21) Kam banci menang ngelawan Setan, donina si jahat, janah kerina sura-sura si salah! Banci kam menang adi tuhu-tuhu kam tek maka Jahwe banci mpegegehi ras nampati kam.—2 Korinti 4:7-9; Galati 6:9.

¹⁷ Emaka teruslah erjuang. Teruslah erbebe. Ula pernah nerah. Banci kam tuhu-tuhu tek adi Jahwe pasti ’ncurcurken man bandu kerina erbage si mehuli alu la kurang-kurangen’.—Maleaki 3:10.