1, 2. Koddo gani ena emeleli a Yehova?

OROMANA masaka a Abel ofiyedha masaka abano, emeleli otene ororomeleya a Yehova anogumanana masoso. Murumiwi Paulo wahawaddela Akristu a akadda Hebreu wila nyuwo “muvilela goyi dhinjidhene” mudhidhi watamelani orumeeliwa vina wakela mareliho a Yehova. (Ahebreu 10:32-34) Paulo wahiladdaniha koddo eji ya Akristu na mavurhano a anamattamaga a Agrego, obe abale araba koddo dha vatamuni. (Ahebreu 12:1, 4) Masaka abano, iyo vina nili mmavurhanoni ninga abene a ottamaga, nanda nihikaana amwiddani enjene ana efunelo ya onobaniha wi niyelele osanzaya wehu obe mareliho a musogorho.

² Koddo yehu ‘ya mpaje’ jorutxa sabwani ninwana na Satana vamodha na elabo yaye yovuta. (Éfeso 6:12) Jaderetu iyo okala oliba sabwani elaboya eji enovaha masunziho a filozofia, merelo abure, dhifunelo dha maningo, oja fola vina mirobwe dhinviriganiha ogogo. Iyo vina ninowanana  okwaranya dhubuwelo dha onyimuwa vina dhawobana dhehu.​—2 Korinto 10:3-6; Kolosi 3:5-9.

3. Mulugu onnishagiha dhavi owana na amwiddani ehu?

³ Koddi enowodheya opemberha koddo eso masiki niwanaga na amwiddani ovadda? Ndde, niziwa wi enorutxa! Paulo wahiviladdaniha na anamattamaga valogiye: “Miyo vina ddinothamaga, ddiziwaga vandhowimi; ddinowana n’ekalelo yovada, kayiye ninga muthu onvada pevo.” (1 Korinto 9:26) Dhahene ninga munyakoddo onivilibihedha ompemberha mwiddani waye, iyo vina nikose kukuttu wi nipemberhe. Yehova onele onikamihedha wi nipemberhe. Nikamihedhona nili mBibiliani. Iyene ononivaha nikamihedho ntto modhela manivuru andela mBibiliani, matugumano a Mulogo, murudda na a ttattamwa. Weyo onolabihedhaga gari eso dhetene wi olibe? Akala kunkosa kunawodhe ompemberha mwiddani wawo, onakale ninga muttu onvada pevo.

4. Ninarabele dhavi ojiwa na obure?

⁴ Ninofanyeela okala txenjewa mudhidhi oli wotene. Sabwaya? Sabwani mwiddani wehu onnilupela mudhidhi wotene, obe nigakumuwa. Bibilia ononivaha malago vina ononilibiha alogaga: “Muhirumele ojiwa na obure; mupemberhe mobureni mwiraga dhapama.” (Roma 12:21) Nigakosa kukuttu wi nipemberhe obure, ninele owodha! Mbwenye nigattiya okosa kukuttu, Satana na elabo yaye na ekalelo yehu ya wobana dhinele onija. Noona kanitxelele koddoya. Kuwobane vina kawundeye guru!​—1 Pedro 5:9.

5. (a) Wi nikaane mareliho a Mulugu txini enfanyeelihu wubuwela? (b) Attu gani elebiwe mBibiliani anfunihu wasunza?

⁵ Wi nipemberhe koddo ejo, ninofanyeela wubuwela sabwaya enwanela iyo. Ninowana sabwani ninofuna orumeeliwa vina wakela mareliho a Mulugu. Ahebreu 11:6 onloga: “Ole onimususela Mulugu, enofuneya orumela wi Mulugu okalawo, vina onoathuva abale animutamela.” Omususela Mulugu entapulela olaba na guru akala ninofuna orumeeliwa na iyene. (Merelo 15:17) Bibilia ohikaana dhotagiha gwé dhapama dha alobwana vina ayana akosile dhawene. Jakob, Rakel, José na Paulo ahitonyihedha ovadda masiki vanani makattamiho na dhubuwelo dhawobaniha. Mbwenye awene awodha opemberha. Yotagiha yawa enolagiha wila nigakosa mabasa ehu na oliba, ninele wakela mareliho a Yehova. Ndowe noone mukaleloya.

6. Txini emukamihedhi Jakob ovilela nanda orelihiwe na mukalelo gani? (Koona foto eli omaromo.)

⁶ Mulobwana wororomeleya Jakob, wahiwana nanda bapemperha sabwani wanimukwela Yehova vina wanttittimiha mandano aye. Iyene wahikaana nroromelo noliba wi Yehova agahakwanihedha nlibelo nakosileye noreliha ziza naye. (Wita 28:3, 4) Jakob vaniye vyaka 100, wahiwana na mungelo afunaga wi akale mareliho a Mulugu. (Kengesa Wita 32:24-29.) Koddi Jakob welolibetxa ofiyedha owana na mungelo oddu waguru? Nne kahiyo mwenemo! Mbwenye iyene wana efunelo enddimuwa vina wahilagiha wila agakosa kukuttu wi  aakele mareliho abo! Yehova wahimureliha Jakob sabwa ya ovilela na ntidi naye nanda wahinvaha nzina na Izrayel nintapulela ‘Ovuruwaniwa na Mulugu.’ Jakob wahakela mareliho akakene antamela iyo ovanene obe niloge wi iyene wahirumeeliwa vina wahirelihiwa na Mulugu.

7. (a) Makattamiho gani a wobaniha agumanilela Rakel? (b) Txini ekosile Rakel, nanda orelihiwe dhavi?

⁷ Rakel mwadhi wokweleya wa Jakob wahigana woona mukalelo ogakwanihedhi Yehova nlibelo nakosileyi na mamunaye. Mbwenye vahikala makani. Rakel kabala, okodda obaala yali elobo yatabutxa ayana enjene masaka a Bibilia. Rakel wakanile dhavi nroromelo masiki na makattamiho amobaniha? Iyene txipo katxeleli ojeedhela. Iyene wahididelavi omuloba na ntidi Yehova. Yehova wahivuruwana malobelo a Rakel nanda wahimureliha na onvaha mwana. Noona Rakel wahiloga: “Ddiwana, na guru dha Mulugu. . . . ddipemberha!”​—Wita 30:8, 20-24

8. José wagumanilena makattamiho gani, nanda okalelini yotagiha yaderetu?

⁸ Yotagiha ya nroromelo na Jakob na mwadhiye Rakel, nimukamihedha mwanawa José mudhidhi waniyena makattamiho mwigumini. José vaniye vyaka 17 egumi yaye yahidha osadduwa kakamwe. Abali aye ahimutxiga, ofiyedha omuguliha na anyamarhondda. Musogorhomwa wahifugeliwa mu kambura o Ejipitu ahina muladdu. (Wita 37:23-28; 39:7-9, 20, 21) Masiki dhawene José kanyimuwile nne kobanile, vina katameli okaana ntxiga. Sabwaya? Makaniya bawi José watameletxa olibiha omarho waye na Yehova vina wamukuluvela odduwene na murima waye wotene. (Onamakutha 19:18; Roma 12:17-21) Yotagiha ya José enonikamihedha. Masiki akala kanileliwe na malago  ofanyeela, obe akala egumi yehu enkala ninga kina njeedhelo, ninofanyeela okosa kukuttu vina ovilela. Nigakosa ejuwene ninele okaana ebaribari wi Yehova onele oniruriha.​—Kengesa Wita 39:21-23.

9. Niwodhe dhavi omutagiha Jakob, Rakel na José?

⁹ Masaka abano vina ninokaanaga makattamiho akakene. Txino weyo okaana makattamiho ninga ofarafariwa, otxigiwa obe okaneliwa nrima na attu eena. Ottiya wobana, kobuwela emukamihedhi Jakob, Rakel na José odhowavi vasogorho bagamulaba Yehova bagahagalala. Yehova wahapangarhaza vina wahalibiha etene sabwa yotamela olibiha mandano na iyene. Awene adhowavi bagavilibihedha owana koddo, mowiwanana na malobelo akosani. Vowi ninkala masaka omariha, ninofanyeela wang’ana njeedhelo nehu na musogorho! Weyo oli womala-nawale wi opemberhe koddo yawo obe olaba na guru wi orumeeliwe na Yehova?

10, 11. (a) Ninfanyeelela eni okosa kukuttu wi nakale mareliho a Mulugu? (b) Txini enanikamihedhe okosa yosakula yaderetu?

¹⁰ Ninfanyeelela eni okosa kukuttu wi nakele mareliho a Mulugu? Sabwa yawi naattu ohakwana vina ninowana na dhifunelo dhabure. Enaya anowana na efunelo ya okala oliba mmabasani a olaleya, vina anowana na makattamiho a egumi. Ena kanwodha walevelela abale anattegela. Masiki dhivire vyaka dhinjene nimulabaga Yehova, ninofanyeela okosa kukuttu wi nipemberhe dhilobo dhotene dhinnirutxiha omwebedha Yehova, ole anattuva etene animuroromela.

¹¹ Txibarene, enorutxa Mukristu okosa dhosakula dhapama, makamaka nigawanaga na dhifunelo dhabure. (Jeremiya 17:9) Akala eji enowupadduwelaga, omulobe Yehova wi ovahe muya wokoddela. Kalobela nanda muya wokoddela wa Mulugu onele wukamihedha okosa yosakula yaderetu vina musogorho onele wakela mareliho a Mulugu. Kagana okalawo mowiwanana na malobelo awo. Omwengesege Bibilia malabo etene, otamele mudhidhi wa okosa nsunzo nomwinya vina webedha wa vamuralani.​—Kengesa Masalmo 119:32.

12, 13. Akristu eeli akamihedhiwe dhavi owanana dhowobana dhawa?

¹² Dhotagiha dhinjene dhili Mmazuni a Mulugu, muya wokoddela, mmanivuruni ehu a Okristu dhinowakamihedha abali enjene owana na dhubuwelo dhabure. Muzombwe dhahi ohengesa mutoma onloga “Como vencer desejos errados?” olebiwe mu Despertai! 8 de Dezembro 2003. Iyene okosile eni? “Ddinowanavi na dhubuwelo dhabure. Mumalelimi wengesa mutoma obu ddoona wi ‘attu enjene akaana koddo yowanana dhubuwelo dhabure’, ddinovyona vina wi ddili mu nikuruni na abali. Ddihona wila kaddili meka.” Muzombwe oddu ohipurelamo vina mutoma onloga “Deus aprova estilos de vida alternativos?” obudduwile mu Despertai! 8 de Outubro 2003. Iyene ohifiyedha woona wila wa attu enjene koddo eji ja mudhidhi wotene eli ‘minga mmaningoni mwawa.’ (2 Korinto 12:7) Noona oku akosaga kukuttu wi ekalelo  yawa ekale yotxena, awene akaana njeedhelo na musogorho. “Noona iyene ologa,” “Ddinoona wi masaka etene ddinofanyeela okala woliba. Ddinomutamaalela Yehova sabwa ya olabihedha nikuru naye ninnikamihedha okalawovi malabo etene masaka abano omariha.”

¹³ Koona yotagiha ya murogora dhahi wa Amerika. Iyene olebile dhahi: “Ddinfuna dditamaalele sabwa ya onivaha yoja enfunihu yomuyani mudhidhi wotene. Mudhidhi mwina ddinowoonaga wila mitoma esi olebeliwe ddi miyo. Mwari mwa mudhidhi mwinjene ddinowana na yubuwelo ya okosa dhilobo dhabure dhinidda Yehova. Mudhidhi mwina, ddinowubuwelaga wila ddittiye okosa kukuttu na makaniya. Ddiziwa wila Yehova ddolevelela vina wokwela, mbwenye sabwa yawila ddikana efunelo eji yabure, kaddili mwiddani waye vina ddinofuna wakela nikamihedho naye. Koddo eji enopattaga dhipaddi dhetene dha egumi yaga. . . . Mumalelimi wengesa mutoma onloga “Você tem ‘um coração para conhecer’ a Jeová?” mu A Sentinela 15 Março 2013, ddihoona wila txibarene Yehova onofuna oddikamihedha.”

14. (a) Paulo wavyona dhavi na koddo yarabiye? (b) Ninawodhe dhavi opemberha dhowobana dhehu?

¹⁴ Kengesa Roma 7:21-25. Paulo wanziwa wi owana na dhubuwelo dhabure elobo yorutxa vaddiddi. Masiki dhawene, iyene wanziwa wi agahiwodha opemberha, kolobela wa Yehova, akuluvelaga nikamihedho naye, na ororomela mukutto wa yobolo okosile Yezu. Kito iyo masaka abano? Enowodheya-wene opemberha dhawobana dhehu? Ndde, nimutagihe kakamwe murumiwi Paulo, nimukuluvelaga Yehova ottiya guru dhehu vina nikaane nroromelo na yobolo.

15. Yehova onnikamihedha dhavi okala woliba vina opemberha dhawobana dhehu?

¹⁵ Mudhidhi mwina Mulugu onottiya okalawo wa makattamiho wi one akala ninoziwelamo empadduwelani. Ninga motagiha, akala mmudhehu onofanyiwa eredda yawopiha, obe ofarafariwa, ninakose eni? Nigamukuluvela kakamwe Yehova, ninele omukumbirha wila anivahe guru wi nikalevi oliba, nittiddeelevi wagalala wehu vina olibiha mandano ehu na iyene. (Filipi 4:13) Dhotagiha dhinji dha Akristu a nsaka na wale vina a masaka abano, dhinolagiha wila nlobelo ninowodha onikamihedha wila nikalevi oliba vina odhowavi banigavilela.

16, 17. Txini egaganile weyo okosa?

¹⁶ Ddiabo onoziveliwa agamoona muttu eyelelaga mundduni obe wunddeyile guru. Noona nigane okosa “dhetene dhapamadhá.” (1 Tesalónika 5:21) Onele owodha ompemberha Satana, elabo yaye yovuta vamodha na dhubuwelo dhabure! Onele opemberha ogakaana kakamwe ekuluvelo yawi Mulugu onele wulibiha vina wukamihedha.​—2 Korinto 4:7-9; Galásia 6:9.

¹⁷ Orabe Koddo. Kakalavi wolibene. Kadhowavi vasogorho. Kavilelavi. Okaanevi ebaribari yawila Yehova ologa wila “Txibarene ddinere ourubwihedhani muzogwe, ddinjivihe vilo dhenyu.”​—Malakiya 3:10.