1, 2. ¿Kasa eejiraaka amaa na aʼyataashiikana nümüin Jeʼwaa?

NAPÜSHUAʼA na aʼyataashiikana nümüin Maleiwa eejiraashii naya sümaa tü alatakat namüin, soʼujee nükalia Abel sünainmüinreʼeya maaʼulu yaa. Naashin Pablo, na anoujashii hebreokana eʼrüshii namüliala jee eejiraashii naya sümaa tü alatakat namüin shiiʼiree anain nakuwaʼipa nutuma Maleiwa (Heb. 10:32-34). Tü naaʼinrakat na anoujashiikana naashin Pablo süpüla eejiraain naya sümaa tü alatakat namüin müsü aka saaʼin tü naaʼinrakat na griegokana sünain ayoujirawaa, asheʼejirawaa otta aapirawaa (Heb. 12:1, 4, TNM). Maaʼulu yaa, müshii sünainkai waaʼin wanee ayoujirawaa süpülajatka kataa oʼuu waneepia. Kaʼünüüpejeʼe waya sünain tü ayoujirawaakat, nemeejeein waya süpüla nnojoluinjatüin talatüin waaʼin sünain aʼyatawaa nümüin Jeʼwaa jee sünain tü kasa eejeetkat mapeena nutuma.

 ² Tü atkawaa kapüleekat maʼin wamüin, shia tü atkawaakat nümaa Satanaa otta namaa na nuluwataakana aaʼu (Éf. 6:12). Eeinjatü waaʼin suulia woonooin sümaa tü alawaa nekirajakalü anain jee suulia keejiain wamüin tü naaʼinrakat na manoujainsaliikana, maʼaka saaʼin amaʼüjirawaa akuwaʼipa, akaijaa otta epeʼraa. Otta müsia, eejiraainjana waya sümaa tü mojuukalü aaʼin jee sümaa tü kasa jookana apüla waya (2 Cor. 10:3-6; Col. 3:5-9).

3. ¿Kasa nikirajaka aka waya Jeʼwaa süpüla eejiraain waya namaa na waʼünüükana?

³ ¿Eeshiiche süpüla wayamülüin naya waʼünüükana? Aa. Kapüleepejeʼe shia wamüin. Naashin Pablo, müshi aka nia naaʼin chi wayuu yalayalakai aaʼin sünain asheʼejirawaa (1 Cor. 9:26). Eejiraainjana waya namaa na waʼünüükana maʼaka naaʼin wanee wayuu asheʼejiraai. Nükaaliinjain waya Jeʼwaa süpüla eejiraain waya namaa. ¿Jamüsü sukuwaʼipa tia nutuma? Nikirajüin waya sükajee tü Wiwüliakat, sükajee tü karalouktakalüirua, sükajee tü outkajawaakalüirua jee sükajee tü outkajawaakalüirua miyoʼu. ¿Oonooshiiche waya sümaa tü nikirajakalü anain waya Jeʼwaa? Nnojorüle waaʼinrüin tia, nnojoleena waya eejiraain namaa na waʼünüükana, meena aka waya chi wayuu mojukai ojunain.

4. ¿Kasa waaʼinrajatka süpüla wayamülüin tü kasa mojusükat?

⁴ Eejüinjatü waaʼin waneepia süka nnojoluin watüjaain saaʼu tü kaʼi nüntajachikalü oʼu wanee waʼünüü. Saapirüin waya jee sütütüleʼerüin waaʼin tü Wiwüliakat sükajee pütchikat tüü: «Shia anaka aluʼu müleka jüyamürüle tü mojusükat süka tü anasü jaaʼinrakat waneepia» (Roma 12:21). Ayatüle waaʼinrüin waneepia tü kasa anasükat, wayamüleerü tü kasa mojusükat. Shiasaʼa nnojorüle eejüin waaʼin sünain tü atkawaakat, niyamüleena waya Satanaa, na wayuu nuluwataakana aaʼu jee tü kasa jookalü apüla waya. Nnojo wamalajaain, nnojo wooʼulaain seemiajaain wanoula jee nnojo müin washakatirakai saaʼin wajapü (1 Ped. 5:9).

5. (1) ¿Kasa jülüjainjatka waaʼin aneere wakuwaʼipa noʼuluʼu Jeʼwaa? (2) ¿Jaralii na wekirajaainjanakana achiki?

⁵ Wakanajeere, jülüjainjatü waaʼin kasain watkaain achiirua. Waaʼinrüinjatü tia süpüla anainjanain waya noʼuluʼu Maleiwa. Müsü tü Wiwüliakat: «Anoujainjana sünain eein nia otta naapüin kasa anasü namüin na achajaakana maʼin nüchiki» (Heb. 11:6, TNM). Aneere wakuwaʼipa noʼuluʼu Jeʼwaa, wachajaashaatainjachi nia (Aluw. 15:17). Aküjüsü tü Wiwüliakat nachiki tooloyuu otta jieyuu aaʼinrakana tia süka süpüshuaʼa naaʼin maʼaka naaʼin Jacob, Raquel, José nümaa Pablo. Eesüjaʼa mojupuʼule naaʼin sutuma müliapuʼuin naya. Talatapejeʼe Maleiwa namaa sutuma eejiraain naya sümaa tü müliaa neʼrakat. Aneerü wakuwaʼipaya noʼuluʼu Jeʼwaa wanaa namaa müleka eejiraale waya sümaa tü alatakat wamüin. Wekirajaa sünain tü naaʼinrapuʼukat süpüla washatüinjatüin nakuwaʼipa.

6. (1) ¿Jamüshi eejiraaka waneepia Jacob sümaa tü alatakat nümüin? (2) ¿Kasa niʼraka Jacob suluʼujee tia? (Piirakaa sümüin tü ayaakuaa suluʼukat süpana 12).

⁶ Eejiraashi waneepia Jacob sümaa tü alatakat nümüin. Naaʼinrüin tia süka alin Jeʼwaa nüpüla jee kojutüin nümüin aleewaa nümaa. Niʼitaashaatain naaʼin sünain aneerüin sukuwaʼipa nuuʼuliwoʼu nutuma Jeʼwaa (Gén. 28:3, 4). Wanaa sümaa 100 nuuyase Jacob, aapiraashi nia nümaa wanee aapiee shiiʼiree naapüin Jeʼwaa naʼanasia nümüin (paashajeʼera Génesis 32:24-28). Eejiraashi nia nümaa chi aapieekai shiiʼiree aneein nukuwaʼipa nutuma Jeʼwaa. Nuuntüinjeseʼe tia. «Israeleerü pünülia. [...] Sükajee paapiraaichipain nümaa chi  Maleiwakai», müshi Jeʼwaa nümüin. Anakuwaʼipaishi Jacob nutuma Jeʼwaa. Meesia wakuwaʼipa mayaa.

7. (1) ¿Kasa mojuka atuma saaʼin Raquel? (2) ¿Kasa saaʼinraka Raquel otta kasa shiʼraka suluʼujee tia?

⁷ Raquel sünülia tü nuʼwayuuse Jacob aikat maʼin nüpüla. Saʼatapajüinya maʼin Raquel nikeraajüin Jeʼwaa tü nümakat nümüin chi suʼwayuusekai. Nnojotpejeʼe süpüla kachoin shia süka maralüin shia. Soʼu tia, tü jiet eekai maralüin mojutsat shia atumawaa. Sütüjaapejeʼe aaʼu kachonjeerüin shia soʼu wanee kaʼi, müsüjeseʼe suʼuraajawalüin süpüla katsüinjatüin saaʼin. Kachonkalaka shia mapa sutuma naapüin Jeʼwaa sünüiki. Saashin Raquel, shiyamülüin tü kasa eejiraakalü amaa shia (Gén. 30:8, 20-24).

8. (1) ¿Kasa alataka nümüin José? (2) ¿Kasa shikirajaka anain waya nukuwaʼipa José?

⁸ Nüshatakajasaʼa José sukuwaʼipa nunoula Jacob sümaa Raquel, müshijeseʼe eejiraain nia sümaa tü alatakat nümüin. Wanaa sümaa 17 nuuyase José, noikküin nia na nuwalayuukana süpüla achepchieeinjachin nia, naaʼinrüin tia süka nachumülain nia. Süchikijee tia, kakalia püreesain José chaa Egipto sümaa nnojoluin kasain naainjalain (Gén. 37:23-28; 39:7-9, 20, 21). Nnojoipejeʼe yüülain José saaliijee tia, nnojotsü üttakuʼu müin naaʼin otta nnojoishi pasalaweein nia. Shiajaʼa jülüjaka naaʼin waneepia tü nukuwaʼipakat nümaa Jeʼwaa (Lev. 19:18; Roma 12:17-21). ¿Kasa shikirajaka anain waya nukuwaʼipa José? Ayatüinjana waya eejiraain sümaa  tü alatakat wamüin jaʼitainna weʼrüin wamüliala tepichijaiwaʼaya waya jee jaʼitairü müin kapüleekai saaʼin anoukteʼeraa tü alatakat wamüin. Shiimain maʼin aneerüin wakuwaʼipa nutuma Jeʼwaa ayatüle wachecherüin waaʼin (paashajeʼera Génesis 39:21-23).

9. ¿Kasa waaʼinrajatka süpüla washatüinjatüin nukuwaʼipa Jacob, Raquel nümaa José?

⁹ Eesüjaʼa kapüleere maʼin tü alatakat wamüin. Eesüjaʼa shiale sutuma saainjünüin kasa mojusü wamüin, waʼürülaanüin anain jee müliale waya atumawaa saaliijee süchumülain waya wayuu. Nnojo wamalajaain aaʼin saaliijee tia. Soto waaʼin tü kasa akaaliinjakat Jacob, Raquel nümaa José süpüla talatüinjanain naya waneepia sünain aʼyatawaa nümüin Jeʼwaa. Kojutüsü maʼin namüin tü aleewaakat nümaa Jeʼwaa, nükatchinrüinjeseʼe Jeʼwaa naaʼin jee anakuwaʼipaliishii naya nutuma. Eejiraashii maʼin naya wayuukana sümaa tü alatakat namüin jee pansaasü nakuwaʼipa sümaa tü nachuntakat nümüin Jeʼwaa. Süka sülüʼülaain tü kaʼi sajaʼttajatkat oʼu kasa süpüshuaʼa, acheküsü weʼitaainjatüin maʼin waaʼin sünain nikeraajeerüin Jeʼwaa tü naaʼinrüinjatkat mapeena. ¿Aʼyataajeenache maʼin waya süchiirua süpüla anakuwaʼipaliin waya nutuma Jeʼwaa?

10, 11. (1) ¿Jamüshii eejiraainjanaka waya süpüla anainjatüin wakuwaʼipa nutuma Maleiwa? (2) ¿Kasa aneetka atuma wakuwaʼipa?

¹⁰ ¿Jamüsü choʼujaaka eejiraain waya süpüla anainjatüin wakuwaʼipa nutuma Maleiwa? Wainma sukuwaʼipa tia. Eeshii anoujashii eejiraakana sümaa tü kasa mojusü suchuntaakat naaʼin. Eeshii eekai eejiraain süpüla jülüjainjatüin naaʼin kasa anasü süchiki tü aküjaakat pütchi. Eetaashii na eejiraakana sümaa tü ayuuliikat jee sümaa tü mojaakalü aaʼin saaʼu namüiwaʼain naya. Eetaashii na kapüleekana amüin motuin naaʼin naainjala na waneeinnua namüin. Jaʼitainna kakaliainnain waya sünain aʼyatawaa nümüin Jeʼwaa, eesü tü kasa eejiraainjanakalü ama waya, kapüleeka atuma aʼyatawaa nümüin. Sotuinjatpejeʼe waaʼin aneerüin wakuwaʼipa nutuma Jeʼwaa waneepiale waya nümaa.

¹¹ Watüjaa aaʼulu kapüleein anain wakuwaʼipa sünain anoujaa otta anain sukuwaʼipa wanee kasa watuma, shialeekajaʼa eejiraale waya sümaa tü kasa mojusü suchuntaakat waaʼin (Jer. 17:9). Anashii wachuntüle chi naaʼinkai Jeʼwaa sülatüle wamüin tia. Waaʼinreerü tü kasa anasükat woʼuraajüle sümaa wachuntüin chi naaʼinkai Maleiwa. Aneetkalaka wakuwaʼipa nutuma. Wanaawainjatpejeʼe watuma tü waaʼinrakat sümaa tü wachuntakat nümüin. Waashajeʼerüinjatü tü Wiwüliakat weinshi sümaa wekirajaain sünain wamüiwaʼa otta sümaa wapüshi (paashajeʼera Salmo 119:32).

12, 13. ¿Kasa akaaliinjaka piamashii wawalayuu süpüla nachecherüin naaʼin suulia tü kasa mojusü suchuntaakat naaʼin?

¹² Wattainna naalii na wawalayuu ayamütkana tü kasa mojusü suchuntaakat naaʼin süka sükaaliinjain naya tü Wiwüliakat, chi naaʼinkai Maleiwa jee tü karalouktairua eekat wamaʼana. Eejachinka wanee jimaʼai aashajeʼeraka tü pütchikat «¿Cómo puede usted resistirse a los malos deseos?», suluʼusü ¡Despertad! ojuʼitaka tisienpüroʼu 8 soʼu 2003. Anuu nünüiki süchiki tia: «Eejiraashi taya sümaa tü kasa mojusü suchuntaakat taaʼin. Taashajeʼerapa sünain tü pütchikat ‹wattain naalii na wawalayuu eejiraakana sümaa tü kasa mojusü suchuntaakat naaʼin›, tayaawata aaʼu nnojoluin tayain neʼe tamüiwaʼa eejiraain sümaa tia». Müshia chi jimaʼaikai sükaaliinjain tü pütchi makalü anülia: «¿Aprueba Dios los estilos de vida alternativos?», ojuʼitaka suluʼu ¡Despertad! oʼutuupüroʼu 8, 2003. Suluʼujee tia pütchikat, niyaawata aaʼu eein na wawalayuu eejiraakana sümaa tia, müsü aka saaʼin «wane ayuulii» namüin (2 Cor. 12:7). Niyaawata aaʼu ayatüin eejiraain naya wawalayuukana sümaa tü kasa  mojusü suchuntaakat naaʼin süpüla wuleinjatüin nakuwaʼipa noʼuluʼu Maleiwa jee anain tü jülüjakat naaʼin. Müshi nia: «Sutuma tia, tatüjaa aaʼu eein süpüla jüüjüüin taya waneepia nümüin Jeʼwaa. Taapashaatain analuʼut nümüin Jeʼwaa saaʼujee nükaaliinjain waya sükajee tü nupueulosekat süpüla eejiraain waya sümaa tü alatakat maaʼulu».

¹³ Anuutaajaʼa joo tü alatakat sümüin wanee wawala chejeʼewat Estados Unidos. Müsü shia: «Taapüin analuʼut jümüin saaʼujee jaapüin wamüin tü pütchikat wanaapünaa sümaa tü kaʼi choʼujaakalü oʼu shia wamüin. Müsü tayakai kamüinjatüin tia pütchikat. Kakaliairü taya eejiraain sümaa tü kasa mojusü suchuntaakat taaʼin, tü kasa nüʼürülakat Jeʼwaa. Eesü kaʼi tayüülajaweekai aaʼin jee müin tashakatireekai saaʼin tajapü. Tatüjaa aaʼu amüliajülin Jeʼwaa jee motuin naaʼin saainjala wayuu, isapejeʼe tachiki tasünneʼerüin tü kasa mojusü suchuntaakat taaʼin, müsü anajakai saaʼin tamüin. Eesü süntajaale suluʼu taaʼin nnojoleerüin taya nükaaliinjain Jeʼwaa. Müsü suʼunakai aaʼin suluʼu mojuin takuwaʼipa sutuma». Saashajeʼeraka tü pütchikat: «¿Keeʼireesü paaʼin piʼraajüin Jeʼwaa?», suluʼu Aapiria Wayuu ojuʼitaka maatsoʼu 1, 2013. ¿Jamüsü saaʼin süchikijee saashajeʼerüin tia pütchikat? Müshi shia: «Shiimain nükaaliinjeein maʼin taya Jeʼwaa».

14. (1) ¿Kasa nütüjaaka aaʼu Pablo? (2) ¿Kasa wayamüleetka akajee tü kasa jookalü apüla waya?

¹⁴ (Paashajeʼera Roma 7:21-25). Nütüjaa aaʼu Pablo kapüleein eejirawaa sümaa tü kasa mojusü suchuntaakat waaʼin jee tü jookalü apüla waya. Niyaawatapejeʼe aaʼu eein süpüla niyamülüin tia kasa mojusükat müleka nuʼuraajüle nümüin Jeʼwaa, niʼitaale naaʼin sünain nükaaliinjeechin nia jee niʼitaale naaʼin sünain naakajirüin nia Jesuu suulia naainjala. ¿Jama wayakana? ¿Eesüche süpüla wayamülüin tü kasa jookalü apüla waya? Jamüsaʼa shia. Choʼujaasü washatüinjatüin nukuwaʼipa Pablo, weʼitaainjatüin waaʼin sünain naakajirüin waya Jesuu suulia waainjala otta weʼitaainjatüin süpüshuaʼa waaʼin nünain Jeʼwaa suulialeʼeya weʼitaain waaʼin wanainjiraa.

15. ¿Kasa nükatchinraka aka waaʼin Jeʼwaa süpüla eejiraain waya sümaa tü alatakat wamüin?

¹⁵ Eesü nuuʼulaale Jeʼwaa sülatüin kasa wamüin süpüla nütüjaain saaʼu müleka wakaaliinjüneere nutuma. Jamüshijaʼa mayeinre wanee wapüshi sutuma wanee ayuulii jee shiale sutuma saainjünüin kasa mojusü nümüin, ¿kaseerü waaʼinraka? ¿Kaseerü waaʼinraka wayale ayuulin jee aainjünüin amüin kasa mojusü? Weʼitaale süpüshuaʼa waaʼin nünain Jeʼwaa, wachuntashaateerü nümüin nükatchinrüin waaʼin süpüla eejiraain waya sümaa tia, süpüla nnojoluinjatüin mojuin waaʼin jee süpüla ayatüinjanain waya aleewain nümaa (Filip. 4:13, TNM). Sutuma tü naaʼinrakat na anoujashiikana namaiwa jee maaʼulu yaa, watüjaa aaʼu nükatchinreerüin waaʼin Jeʼwaa müleka woʼuraajüle nümüin jee müsia eejiraajeena waya sümaa tü alatakat wamüin.

16, 17. ¿Kasa ayatüinjatka waaʼinrüin?

¹⁶ Niʼreeshaatain waya Satanaa mojuin waaʼin, wayüülajaain suulia aʼyatawaa nümüin Jeʼwaa sümaa müin washakatirakai saaʼin wajapü. Müsüjeseʼe choʼujaain maʼin waaʼinrüin tü kasa anasükat (1 Tes. 5:21). Eeshii süpüla wayamülüin Satanaa, na manoujainsaliikana jee tü kasa mojusü suchuntaakat waaʼin. Akanajeena waya müleka weʼitaale süpüshuaʼa waaʼin sünain nükaaliinjeenain waya Jeʼwaa jee nükatchinreerüin waaʼin (2 Cor. 4:7-9; Gal. 6:9).

¹⁷ Ayata eejiraain waya jee nnojo wamalajaain aaʼin suulia aʼyatawaa nümüin Jeʼwaa. Shiimain anakuwaʼipaleena waya nutuma Jeʼwaa süpüla kaʼikat süpüshuaʼa (Mal. 3:10).