1, 2. ¿Ja ngwäkitadre kwin ye ñobätä ütiäte ni testiko Jehovakwe kräke?

NITRE ji ngwanka kukwebätä janamene gätä nuainbare kwetre yebätä ye ngwane nämenentre ja ngwäkitani ño yebätä periódico holandés blitabare. Kä nämene ngire yebätä nitre ji ngwanka kukwebätä ye kwati krubäte nämene dän ñaka kwin gätä kräke kitani jabätä niebare kwe. Nitre testiko Jehovakwe janamane gätä kri keteitibätä yebätä periódico ye blitabare arato, niebare kwe niaratre nämene ja ngwäkitani kwin. Monsotre kia brare aune nitre brare umbre nämene corbata aune saco kitani jabätä niebare kwe. Monsotre kia merire aune meritre umbre nämene falda mrä mrä sribeta kä nengwane akwa nga kitani jabätä niebare kwe arato. Nitre testiko Jehovakwe tä ja ngwäkite kwin yebätä käre blitata kwinbätä. Apóstol Pablo niebare ni kristiano rabadre ja ngwäkite “kuin era metre”, ñobätä ñan aune ye ribeta ni Ngöbö mikaka täte yei (1 Timoteo 2:9, 10). Pablo kukwe niebare yekänti nämene blite nitre merire yebätä, akwa kukwe ye nitre brare kräke arato.

 ² Ja ngwäkitadre kwin ye ütiäte krubäte ni Ngöbö mikaka täte kräke ñobätä ñan aune ye ütiäte Ngöbö mikata täte nikwe ye kräke arato (Génesis 3:21). Jehová ye Rei kä jökräbiti tibien. Aune Biblia tä mike gare metre ni niara mikaka täte käkwe ja ngwäkitadre ño ie niara tö ye kräke kukweta ükaninte ie. Aisete dän meden diandre kitadre jabätä nikwe ye ñaka rabadre tuin kwin ni aibe ie. Ñakare aune Jehová, Ngöbö nikwe aune Rei nikwe ie rabadre tuin kwin ye bäri ütiäte.

3. ¿Ngöbökwe kukwe biani Moisés ie ja ngwäkita yebätä ye tä dre driere nie?

³ Nitre juta mada mada te nämene nüne nitre israelita bäre nämene ja mike gure kämekäme yebätä Ngöbökwe kukwe biani Moisés ie ye nämene niaratre kriemike. Kukwe biani ye tä mike gare, nitre brare aune merire tä ja ngwäkite ño yebätä niaratre meden brare aune meden merire ñaka tä nüke gare kwin ye tuin käme krubäte Jehovai (ñäkädre Deuteronomio 22:5 yebätä). * Ngöbökwe kukwe biani Moisés ie ye tä driere nie ni brare tä ja ngwäkite abokän nemen tuin meri kwrere aune meri tä ja ngwäkite abokän nemen tuin ni brare kwrere ye tuin käme Jehovai.

4. ¿Dre raba ni kristiano dimike töbike kwin ja ngwäkitadre ño yebätä?

⁴ Kukwe Bibliabätä ja jie ngwankäre ye raba ni dimike töbike kwin ja ngwäkitadre ño yebätä. Kä ngire o kä tibo, nita nüne ño o juta medente nita nüne akwa kä ye jökrä känti kukwe ja jie ngwankäre ye ütiäte. Dän meden kitadre nikwe jabätä aune meden abokän ni ñaka kitadre jabätä ye niedre nie ye ni ñaka ribere jai. Ñakare aune kukwe nieta Bibliabätä ja jie ngwankäre ye ererebätä, dän meden kwin ni kräke ye nikwe kitadre jabätä. Nikwe ja ngwäkitadre ño yebätä nikwe töbikadre ye ngwane, “kukwe meden kwin aune meden Ngöböta kain ngäbiti bätä meden metre” ye kukwe ruäre Bibliabätä ja jie ngwankäre raba ni dimike mike nüke gare jai yebätä ani ja tötike (Romanos 12:1, 2, TNM).

5, 6. ¿Nita ja ngwäkite ye raba nitre mada töi mike ño?

⁵ Jehovakwe Pablo mikani kukwe ütiäte ja jie ngwankäre nie ye tike 2 Corintios 6:4 yekänti (ñäkädrebätä). Nita ja ükete ño yebätä nitre tä blite kwin nibätä (1 Samuel 16:7). Ni abokän Ngöbö mikaka täte, yebätä dän meden tuin kwin nie o meden nemen kwin nibätä ye ñan aibätä nikwe kitadre jabätä. Kukwe Bibliabätä ja jie ngwankäre ye rabadre ni dimike ñaka dän dime aune nginimä kite jabätä. Ye abokän, ni ñaka rabadre dän raba ni ngrabare bäin mike tuare ye kite jabätä. Dän ñaka kwin ye nikwe ñaka kitadre jabätä ne  kwe nitre mada ñaka rabadre ja gaire o ñaka nikradre kwetre kä madabiti.

⁶ Nita ja ükaninte kwin aune dän kwin kitani jabätä ye köböire nitre raba juta ükaninte Jehovakwe bätä ni Jehová mikaka täte ye mike bäri ütiäte jai. Niaratre töi raba nemen Ngöbö mikata täte nikwe ye mikabätä gare bäri jai. Aune kukwe drieta nikwe nitre mikakäre kwäre ye niaratre raba kukwe nuin.

7, 8. ¿Ñongwane ütiäte krubäte nikwe ja ngwäkitadre kwin?

⁷ Ngöbö nikwe deme, ja mräkätre aune ja ngwaitre bätä nitre ie nita kukwe driere ye nita mike tuin ütiäte jai, yebätä nikwe ja ngwäkitadre kwin Jehová aune kukwe drieta nikwe ye mikakäre ütiäte jai (Romanos 13:8-10). Nikwe ja ngwäkitadre kwin ye ütiäte krubäte, metrere nita niken gätäbätä o nita niken kukwe driere ye ngwane. Nita Ngöbö mike täte yebätä nikwe ja ngwäkitadre kwin (1 Timoteo 2:10). Erametre, kä medenkänti nita ye kräke dän ruäre kwin kitadre jabätä akwa kä madakänti abokän ni ñaka raba dän ye arabe kite jabätä. Aisete kä medenkänti nita nüne akwa kä ye jökrä känti, ni testiko Jehovakwe ñaka raba dän käme raba nitre mada mike ja gaire ye kite jabätä.

 ⁸ (Ñäkädre 1 Corintios 10:31 yebätä). * Nita niken gätä kribätä ye ngwane, nikwe dän kwin aune nemen kwin nibätä ye kitadre jabätä. Nitre kä nebätä ñaka ja ngwäkite kwin ye erere nikwe ñaka ja ngwäkitadre. Ni rikadre gätä kri yete, ni rükadre hotelte ye känenkri o ye bitikäre nikwe dän kwin kitadre jabätä arato. Ye köböire, kä jutobiti nikwe mikai gare nitre madai ni abokän testiko Jehovakwe aune ni täi juto biare kukwe driekäre kä jökrä ngwane.

9, 10. ¿Filipenses 2:4 ye raba ni dimike ño nita ja ngwäkite yebätä?

⁹ (Ñäkädre Filipenses 2:4 yebätä). Nita ja ngwäkite yebätä ja mräkätre aune ja ngwaitre tä töbike ño, ¿ye ñobätä nikwe ja töi mikadrebätä? Ñobätä ñan aune ni Ngöbö mikaka täte tä ja di ngwen krubäte kukwe nieta mäträkäre ne mikakäre täte: “Kukwe kämekäme mdei tä munye, ye kite jökrä temen munkwe abko krörö: munkwe ñan ja mika gure bati bati ni mda mdabe amne, mun merire brare käkwe ñan kukwe nuen kämekäme jabtä kwärikwäri. Mun tö rabai bäri ni mda mike jabe, ye munkwe kita temen” (Colosenses 3:2, 5). Ja mräkätre aune ja ngwaitre ruäre jämi nemen testiko Jehovakwe ye ngwane nämene nemen kämekäme ni madabe aune täbe ja di ngwen kukwe käme yebe raba ruin nie. Ni ñaka ja ngübaibiti angwane, nita ja ngwäkite ño ye köböite ñaka raba nemen nuäre niaratre kräke kukwe nieta Bibliabätä mäträkäre nibätä ye mikakäre täte aune kukwe käme ye tuametrekäre (1 Corintios 6:9-11, TNM). Ni ñaka tö kukwe ye tuai nemen bare, ¿ñan ererea?

¹⁰ Nita ja ngätäite ja mräkätre aune ja ngwaitre ben ye ngwane, nita kä kwin känti abokän tä ni kriemike nitre töita nemen kämekäme ni madabe yebätä. Nikwe ja ngwäkitadre kwin ye käkwe ni dimikai ja ngwen kwin, Ju Ja Ükarakrö yete aune kä jökrä känti. Erametre nikwe dän meden kitadre jabätä ye tä gare nie. Akwa nikwe dän kitadre jabätä ye käkwe nitre mada dimikadre töbike kwin, blite kwin aune ja ngwen kwin Ngöbö tö ie ye erere ye tä gare nie arato (1 Pedro 1:15, 16). Ja tareta erametre nikwe ye ngwane “ñan nita ñäke diän diän ni mdaye mikakäre ja gaire amne ñan nita jändrän kuin känene kaibe jakrä” (1 Corintios 13:4, 5).

11, 12. ¿Eclesiastés 3:1, 17 tä ni dimike ño töbike kwin?

¹¹ Ni Ngöbö mikaka täte ja ngwäkitadre ño yebätä nita töbike angwane, “kä tärä kukwe jökrä kräke” ye gare nie (Eclesiastés 3:1, 17). Kä ngire o kä tibo, kä moren o kä ñüre aune kukwe mada mada ye ererebätä ni raba ja ngwäkite. Akwa kukwe ükaninte Jehovakwe ye käre tä ja erebe (Malaquías 3:6).

¹² Juta ruäre känti kä ngire yebätä bäri ñaka nemen nuäre dän kwin diankäre kitadre jabätä. Ni ñaka dän dime aune nginimä kite jabätä yebätä ja mräkätre aune  ja ngwaitre tä debe bien (Job 31:1). Ni tädre jüben mren kräbäre o piscinate ye ngwane, nikwe dän kwin jübakäre kitadre jabätä arato (Proverbios 11:2, 20). Nitre kwati kä nebätä tätre dän jübakäre nginimä kite jabätä. Akwa ni abokän käkwe dän jübakäre kwin kitadre jabätä, Jehová Ngöbö deme nikwe ye mikakäre ütiäte jai.

13. Nikwe dän meden diandre kitadre jabätä ye ngwane, ¿1 Corintios 10:32, 33 tä kukwe niere ye ñobätä nikwe ngwandre törö jai?

¹³ Dän meden kwin nikwe diain kitadre jabätä ye ngwane, nikwe kukwe mada ütiäte ja jie ngwankäre ye mikadre täte. Nikwe ja ngübadrebiti ne kwe nikwe ñaka nitre mada mikadre ngoto ritete (ñäkädre 1 Corintios 10:32, 33 yebätä). * Nikwe dän kwin kitadre jabätä ne kwe ja mräkätre aune ja ngwaitre o nitre ñaka Jehová mike täte ye nikwe ñaka ngwandre ngoto ritete ye tä gare nie. Apóstol Pablo tikabare: “Ni jökrä käkwe jändrän kuin nuendre ni mräkä tödekaka Jesubti [...] kräke, [...] ja die mikakäre kwärikwäri”. Aune ye bitikäre ñobätä ye mikani gare kwe: “Ñobtä ñan angwane Kristo ara jire käkwe ñan jändrän kuin känäbare kaibe au jakrä” (Romanos 15:2, 3). Jesús kräke, Ngöbö kukwei mikadre täte aune nitre mada dimikadre ye nämene bäri ütiäte dre nämene tuin kwin ie ye kräke. Ye erere nikwe mikadre tuin jai arato. Ye medenbätä, dän meden tuin kwin nie akwa ye köböite nitre ruäre ñaka raba kukwe drieta nikwe kukwe nuin ye nikwe ñaka kitadre jabätä.

14. ¿Monsotre tä ja ngwäkite ño yebiti rabadre Ngöbö mike ütiäte jai ye nitre rüne aune meyere raba driere ño ietre?

¹⁴ Monsotre rabadre kukwe Bibliabätä ja jie ngwankäre mike täte ye nitre kristiano rüne aune meyere rabadre driere ietre. Nitre rüne aune meyere bätä monsotre ye rabadre dän kwin kite jabätä aune ja ükete kwin kä mikakäre juto Jehovabätä (Proverbios 22:6; 27:11). Monsotre rabadre Ngöbö aune kukwe ükaninte kwe mike ütiäte jai, ¿ye nitre rüne aune meyere raba driere ño ietre? Niaratre rabadre kukwe kwin bämike monsotre käne aune dän kwin ye kwandre ño bätä medente monsotre ie ye niaratre rabadre driere töi jämebiti ietre. Dän meden tuin kwin monsotre ie ye ñan aibätä rabadre den jai, ñakare aune bäri ütiäte rabadre dän kwin kite jabätä Jehová, Ngöbö mikata täte kwetre ye mikakäre ütiäte jai ye nitre rüne aune meyere rabadre driere ietre arato.

15. ¿Dre raba ni dimike ja ngwen töbätä kukwe kwin diankäre nuaindre jai?

¹⁵ Biblia ye kwin krubäte ja jie ngwankäre nie abokän raba ni dimike ja ngwen töbätä kukwe kwin den nuaindre jai Ngöbö mikakäre ütiäte. Akwa yebiti ta, dän meden kitata nikwe jabätä ye tä bämike dän ye tuin kwin nie. Aune dän meden meden nemen tuin kwin nie aune dän meden kökata nikwe jai ye ñaka ja erebe nitre madakwe yebe. Akwa käre nikwe dän kwin, bätäninte kwin aune nemen kwin nibätä ye kitadre jabätä aune nita dre dre nuainne  ye ererebätä nikwe dän kitadre jabätä bätä nita nüne kä medenkänti ye ererebätä nikwe ja ngwäkitadre.

16. ¿Ñobätä ütiäte krubäte nikwe ja di ngwandre ja ngwäkite kwin?

¹⁶ Käre dän kwin kwandre nie ye ñaka nuäre. Tienda kwati krubäte känti dän sribeta mrä mrä ye aibe rürübäinta. Aisete, falda, blusa, dän nga, aune pantalón kwin kwandre nie yekäre nikwe kä diandrekä bäri jai aune ja di ngwandre krubäte känänkäre. Nita dän dike akwle ja kräke ye ngwane dän kwin sribedre ja kräke arato. Akwa ja di ngwandre dän kwin känänkäre ye ütiäte krubäte. ¿Ñobätä? Kena, ye köböire nita ja di ngwen ja ngwäkitakäre kwin aune bä nuäre ye jutuai ja mräkätre bätä ja ngwaitre ie yebätä debe biain kwetre nie. Aune ketebukäre, nikwe ni Rün kä kwinbiti ni tare kwe ye käikitaikä. Nikwe Jehová käikitaikä ye rabai bäri ütiäte nita ja di ngwen ja ngwäkitakäre kwin ye kräke.

17. ¿Ja mräkä tö ja klo ngübai nga ye rabadre dre dre ngwen törö jai?

¹⁷ ¿Ja mräkätre ja klo ngübadre nga ye kwin? Ngöbökwe kukwe biani Moisés ie yebätä nie nämene nitre brare rabadre ja klo ngübare nga. Akwa Kukwe biani ye ni kristiano ñaka niena mike täte aune ni ñaka rabadre ja dibiti nuainne (Levítico 19:27; 21:5; Gálatas 3:24, 25). Kä ruäre känti nitre tä ja klo dätere kwin ye ñäkäi ñaka raba aune mika raba ütiäte jai bätä ye köböire nita kukwe driere ye nitre raba kain ngäbiti. Kä yekänti ja mräkätre tä kädekani ye ruäre klo tärä. Akwa yebiti ta, kä yekänti ja mräkätre ruäre raba ja töi mike ñaka ja klo ngübare nga (1 Corintios 8:9, 13; 10:32). Kä mada känti abokän nitre brare ñaka tä ja klo ngübare nga aune nitre kristiano rabadre ja klo ngübare nga ye ka ngäbiti ñaka. Kä yekänti ni brare Testiko tä ja klo tuenmetre nga ye ngwane ñaka raba Ngöbö käikitekä aune ñaka “tädrera nüne metre” ye nie rababätä (1 Timoteo 3:2, 7; Romanos 15:1-3).

18, 19. ¿Miqueas 6:8 tä ni dimike ño?

¹⁸ Nikwe ja ngwäkitadre ño aune ja ükadrete ño ye Jehová ñaka tä mike gare nie kukwe keta kabrebiti yebätä nita debe bien krubäte ie. Ñakare aune, kukwe Bibliabätä ja jie ngwankäre yebiti tä ni dimike kukwe kwin den nuaindre akwle jai. Aisete nikwe dän meden diain kitadre jabätä aune nikwe ja ükaite ño yebiti ni raba bämike ni tö ja töi bobrebiti Ngöbö mikai täte, Miqueas 6:8 tä niere ye erere.

¹⁹ Nikwe ja töi mikadre bobre aune Jehová ye deme bätä kukwe ükaninte kwe ye bäri kwin ja jie ngwankäre nie ye nikwe kadre ngäbiti. Ni tö ja töi mikai bobre angwane, kukwe ükaninte Ngöbökwe ye ererebätä nikwe nünandre. Ne madakäre, ni töi bobre angwane nitre mada ie ja ruin ño aune tätre töbike ño ye nikwe mikai ütiäte jai.

20. ¿Nita ja ngwäkite aune ja ükete yekwe nitre mada töi mikai ño?

²⁰ Nita ja ngwäkite kwin yebiti nikwe bämikai metre ni abokän Jehová mikaka täte. Kukwe ükaninte Ngöbökwe ye ütiäte krubäte aune nita mike täte kä jutobiti. Ja mräkätre aune ja ngwaitre jökrä tätre ja ükete aune ja ngwen kwin yebätä ni rabadre kwin niere ietre. Kukwe Bibliabätä ni mikakäre kwäre yebätä tätre nitre brukwä kwin ye töi mike aune tätre Jehová käikitekä bätä kä mike jutobätä. Nikwe töbikai kwin ja ngwäkitakäre angwane, nikwe Ngöbö “kwin aune ütiäte krubäte” ye käikitaikä jankunu (Salmo 104:1, 2).