1, 2. ¿Tiquʼn nimxix toklen kye testigos de Jehová tuʼn tbʼaj kyxbʼalumin kyibʼ toj tumel? (Qʼonka twitza tiʼj tnejel tilbʼilal).

TQʼAMA jun periódico te tnam Holanda alkye tten bʼaj kyxbʼalumin kyibʼ junjun nejenel kye okslabʼil tej tok kychmon kyibʼ. Tqʼama qa ateʼ nim nejenel kye okslabʼil ok kyqʼoʼn alkyexku kyxbʼalun tuʼnju attoq nim kyaq. Ax ikx yolin periódico kyiʼj testigos de Jehová aʼyeju e ten toj jun nimaq kychmabʼil ex tqʼama qa junxitl tten in bʼaj kyxbʼalumin kyibʼ. Tqʼama periódico qa qʼiʼntoq kysaco ex kycorbat qe xinaq ex qe tal kʼwaʼl. Ex tqʼama qa oktoq kyqʼoʼn xuʼj ex qe tal txin tbʼanel kyxbʼalun ex toj tumel. Nim maj in tzaj qʼamaʼn qa tbʼanel qe testigos de Jehová tuʼnju alkye tten in bʼaj kyxbʼalumin kyibʼ. Tqʼama apóstol Pablo qa il tiʼj tuʼn tbʼaj kyxbʼalumin kyibʼ okslal toj tumel «tuʼntzun miʼn tok bʼaj kywitz xjal kyiʼj» ex mintiʼ tuʼn kyikʼ tibʼaj (1 Timoteo 2:9, 10). Maske kye xuʼj tqʼama Pablo aju kawbʼil lu, noqtzun tuʼnj, ax ikx in yolin kyiʼj xinaq, moqa ichan.

 ² Nimxix toklen toj kywitz tmajen Jehová alkye tten in bʼaj kyxbʼalumin kyibʼ tuʼnju ax ikx nim toklen toj twitzju Dios in che ajbʼen te (Génesis 3:21). A Jehová aj Kawil tibʼaj tkyaqil. Ex in tzaj tqʼamaʼn Xjan Uʼj qa ateʼ kawbʼil tuʼn kye tmajen, tiʼjju alkye tten tuʼn tbʼaj kyxbʼalumin kyibʼ. Tuʼntzunju, aj tjaw qjyoʼn jun qxbʼalun, nya oʼkx kbʼel qximen qa qgan. Aju mas nim toklen, aju qa tgan Jehová aju Qdios ex aj Kawil qibʼaj.

3. ¿Alkye xnaqʼtzbʼil in tzaj tqʼoʼn qe aju Ley xi qʼoʼn te Moisés tiʼjju alkye tten tuʼn tbʼaj qxbʼalumin qibʼ?

³ Tojju Ley xi qʼoʼn te Moisés ateʼtoq kawbʼil aju in noktoq kyxqʼuqin qeju aj Israel kyiʼj nya bʼaʼn kyanqʼibʼil xjal in che anqʼintoq kytxlaj. In xitoq tchikʼbʼaʼn Ley qa in nel tikʼun Jehová qa in bʼajtoq kyxbʼalumin kyibʼ xjal ex mintiʼ qʼanchaʼl qa xinaq moqa xuʼj jun xjal (kjawil uʼjit Deuteronomio 22:5). Aju Ley xi qʼoʼn te Moisés, in tzaj tyekʼun qe qa nya taj Jehová tuʼn tajbʼen jun t-xbʼalun xuʼj tuʼn jun xinaq ex nya taj tuʼn tajbʼen t-xbʼalun jun xinaq tuʼn jun xuʼj, ex nya taj tuʼn tajbʼen jun xbʼalun aju kwest tuʼn tel nikʼbʼaj tiʼj qa xinaq moqa xuʼj jun xjal.

4. ¿Tiʼ jaku tzʼonin qiʼj tuʼntzun tjaw qjyoʼn qeju tbʼanel qxbʼalun?

⁴ Jaku che onin nabʼil tkuʼx toj Tyol Dios qiʼj tiʼj alkye qxbʼalun kʼajbʼel. Jaku che ajbʼen nabʼil lu quʼn qkyaqilx ex noq jaxku tumel in qo anqʼin. Nya il tiʼj tuʼn ttzaj tzʼibʼin qe alkye qxbʼalun kʼajbʼel ex alkye mlay tzʼajbʼen. Oʼkx tuʼn tkubʼ qqʼoʼn toj xnaqʼtzbʼil qeju nabʼil in tzaj tqʼoʼn Tyol Dios aqeju in tzaj kyqʼoʼn ambʼil qe tuʼn tjaw qjyoʼn qe tiʼchaq qgan. Qo xnaqʼtzan kyiʼj junjun nabʼil tuʼn tonin qiʼj tuʼn tel qnikʼ tiʼj «alkye bʼaʼn, ex alkye in tzalaj Dios tiʼj ex alkye ju tzʼaqlxix» aj tjaw qjyoʼn alkye qxbʼalun kʼokel qqʼoʼn (Romanos 12:1, 2).

5, 6. ¿Tiʼ kyximbʼetz txqantl jaku ten tiʼj qxbʼalun?

⁵ Bʼant tuʼn Jehová tuʼn tkubʼ ttzʼibʼin Pablo aju nabʼil nim toklen in jaw quʼjin toj 2 Corintios 6:4 (kjawil uʼjit). Jaku tzʼel kynikʼ xjal qiʼj tukʼilju alkye tten in bʼaj qxbʼalumin qibʼ ex tuʼn jlu jaku che yolin bʼaʼn moqa nya bʼaʼn qiʼj (1 Samuel 16:7). Tuʼnju tmajen Jehová qoʼ, mintiʼ tuʼn tok qqʼoʼn jun xbʼalun noq tuʼnju in kubʼ qnaʼn bʼaʼn tuʼn moqa noq tuʼnju qgan. In che onin nabʼil in tzaj tqʼoʼn Tyol Dios qiʼj tuʼntzun miʼn kyajbʼen xbʼalun jtzʼon qo kyuʼn moqa aju qʼanchaʼl qxmilal kyuʼn. Mintiʼ tuʼn tkubʼ kynaʼn txqantl nya bʼaʼn nix tuʼn tel kypaʼn kywitz qiʼj noq tuʼnju qxbʼalun in nok qqʼoʼn.

 ⁶ Qa saq aju qxbʼalun tok ex toj tumel in bʼaj qxbʼalumin qibʼ, jakulo tzʼok kyqʼoʼn xjal toklen ttnam Jehová ex jaku qo ok nimen kyuʼn. Axpe ikx, jaku tzaj kyajbʼil tuʼn tel kynikʼ tiʼjju Dios in qo kʼulin te. Ex tuʼn jlu, jakulo tzʼok kybʼiʼn tqanil kolbʼil in qo yolin tiʼj.

7, 8. ¿Toj alkye ambʼil nimxix toklen tuʼn tbʼaj qxbʼalumin qibʼ toj tumelxix?

⁷ Tuʼnju in qo nimen teju Dios xjan, kye qe erman ex kye xjal jatumel in qo pakbʼan, tuʼntzunju in nok qqʼoʼn qxbʼalun aju in jaw nimsaʼn Jehová tuʼn ex aju tqanil in qo pakbʼan tiʼj (Romanos 13:8-10). Nim toklen tuʼn tbʼaj qxbʼalumin qibʼ toj tumel, mas aj qxiʼ kyoj chmabʼil moqa aj qex pakbʼal. Il tiʼj tuʼn kyajbʼen qxbʼalun aju in najbʼen tuʼn jun xjal in kʼulin te Dios (1 Timoteo 2:10). Ax tok, at maj bʼaʼn jaku tzʼel jun xbʼalun toj kywitz xjal toj jun lugar, atzun toj juntl lugar nya bʼaʼn jaku tzʼela toj kywitz. Tuʼntzunju, noq jaxku tumel in qo anqʼin, il tiʼj tuʼn tbʼaj qxbʼalumin qibʼ toj tumel, aju mintiʼ tuʼn tkubʼ kynaʼn txqantl nya bʼaʼn tuʼn.

 ⁸ (Kjawil uʼjit 1 Corintios 10:31). Aj qxiʼ kyoj nimaq chmabʼil, il tiʼj tuʼn tbʼaj qxbʼalumin qibʼ toj tumel ex aju in kubʼ tyekʼun qa in kubʼ qmansin qibʼ. Mintiʼ tuʼn tel qkanoʼn tiʼj kyxbʼalun xjal nix tiʼj alkye tten in bʼaj kyxbʼalumin kyibʼ. Ex mintiʼ tuʼn kyajbʼen xbʼalun nya toj tumel quʼn naʼmxtoq qpon toj nimaq chmabʼil nix aj tbʼaj nimaq chmabʼil. Iktzun tten qo tzalajel aj t-xi qqʼamaʼn qa testigos de Jehová qoʼ ex iktzun tten bʼantni qten tuʼn qpakbʼan toj alkyexku ambʼil.

9, 10. ¿Alkye tten jaku tzʼonin Filipenses 2:4 qiʼj tiʼj alkye tten kbʼajel qxbʼalumin qibʼ?

⁹ (Kjawil uʼjit Filipenses 2:4). ¿Tiquʼn bʼaʼn tuʼn qximen tiʼj tiʼ kbʼel kynaʼn erman tuʼnju alkye tten kbʼajel qxbʼalumin qibʼ? Jun tiquʼn, tuʼnju in nok tilil quʼn tuʼn t-xi qbʼiʼn aju nabʼil lu: «Kytzoqpinkje tkyaqilju mya bʼaʼn in kybʼinchaʼn xjal: Aju yaẍbʼil, ex ju ttzʼilil, tukʼix ju achbʼil mya bʼaʼn» (Colosenses 3:2, 5). Ateʼ junjun erman in che yaẍintoq tej naʼmxtoq kyok te testigos de Jehová ex kukxlo in nok tilil kyuʼn tuʼn tkubʼ tiʼj nya bʼaʼn ximbʼetz kyuʼn. Qa mintiʼ ma tzʼok qxqʼuqin qibʼ, maslo kwest kʼelel toj kywitz tuʼn t-xi kybʼiʼn qeju kawbʼil in tzaj tqʼoʼn Tyol Dios ex tuʼn tkubʼ tiʼj nya bʼaʼn kyajbʼil kyuʼn noq tuʼnju alkye tten in bʼaj qxbʼalumin qibʼ (1 Corintios 6:9-11). Nya qajbʼil tuʼn tbʼaj jlu.

¹⁰ Aj qten kyukʼil qerman, atoʼ toj jun lugar txubʼtxaj jatumel mintiʼ ateʼ xjal in che yolin tiʼj yaẍbʼil ex tiʼj junjuntl nya bʼaʼn. Qa ma bʼaj qxbʼalumin qibʼ toj tumel toj Ja te Chmabʼil moqa noq jaxku tumel, in nok qxqʼuqin lugar txubʼtxaj at toj ttnam Jehová. Ax tok, in tzaj qʼoʼn ambʼil qe tuʼn tjaw qjyoʼn alkye qxbʼalun kʼajbʼel. Noqtzun tuʼnj, ax ikx at qoklen tiʼj tuʼn qonin kyiʼj txqantl tuʼn kyximen, tuʼn kyyolin ex tuʼn tkubʼ kybʼinchaʼn aju in nok tqʼoʼn Dios te saq (1 Pedro 1:15, 16). Aju axix tok kʼujlabʼil «at tchi tuj twitz» ex «mya noq oʼkx tiʼjx tok tkʼuʼj» (1 Corintios 13:4, 5).

11, 12. ¿Alkye tten in nonin Eclesiastés 3:1, 17 qiʼj tuʼn tten qnabʼil?

¹¹ Aj tkubʼ qximen alkye qxbʼalun kʼajbʼel ojtzqiʼn quʼn qa «teylex junjun tiʼxti at tqʼijlalil tuʼn tbʼinchet» (Eclesiastés 3:1, 17). Jaku kubʼ qximen alkye qxbʼalun kʼokel qqʼoʼn qa at nim cheʼw ex qa nim kyaq. Noqtzun tuʼnj, mintiʼ in che chʼexpaj qeju tkawbʼil Jehová (Malaquías 3:6).

¹² Mas kwest tuʼn kyjyet qxbʼalun qa at nim kyaq jatumel in qo anqʼin. In che tzalaj erman qa mintiʼ ma tzʼok qqʼoʼn qxbʼalun jtzʼon qo kyuj nix qeju xbʼalun qʼanchaʼl qxmilal toj (Job 31:1). Ax ikx il tiʼj tuʼn kyajbʼen qxbʼalun toj tumel aj qxiʼ ttzi mar moqa toj jun piscina (Proverbios 11:2, 20). Aqeju xjal  mintiʼ in che ajbʼen te Jehová in nok kyqʼoʼn kyxbʼalun aju qʼanchaʼl tkyaqil kyxmilal toj. Atzun qe kʼokel tilil quʼn tuʼn tel qnikʼ tiʼj qa in jaw qnimsaʼn Jehová, aju Dios xjan, tuʼnju qxbʼalun kʼokel qqʼoʼn.

13. ¿Tiquʼn nim toklen tuʼn ttzaj qnaʼn aju nabʼil in tzaj tqʼoʼn 1 Corintios 10:32, 33 aj tkubʼ qximen alkye qxbʼalun kʼajbʼel?

¹³ At juntl nabʼil nim toklen tuʼn t-xi qbʼiʼn aj tkubʼ qximen alkye qxbʼalun kʼajbʼel. Il tiʼj tuʼn tok qxqʼuqin qibʼ tuʼntzun miʼn tkubʼ qqʼoʼn jun tolsabʼil toj kybʼe txqantl (kjawil uʼjit 1 Corintios 10:32, 33). Mintiʼ tuʼn tok qqʼoʼn qxbʼalun aju jaku kubʼ kynaʼn ermano moqa ermana jun nya bʼaʼn tuʼn moqa qeju xjal mintiʼ in che ajbʼen te Jehová. Kubʼ ttzʼibʼin Pablo jlu: «Teyle junjun qe qbʼincham aju bʼaʼn, tuʼn tajbʼen te jun onbʼil te qukʼil ex tuʼn ttzalaj tiʼj, ex tuʼn tchʼiy tnabʼl». Ex tqʼama tiquʼn: «Porque ik tzaʼn te Crist mintiʼ tbʼincha tex tajbʼil tuʼn ttzalaj tiʼj» (Romanos 15:2, 3). Mas nimtoq toklen toj twitz Jesús tuʼn tkubʼ tbʼinchaʼn tajbʼil Jehová ex tuʼn tonin kyiʼj xjal twitzju tuʼn tbʼant tex tajbʼil. Ax jlu kbʼantel quʼn. Tuʼntzunju, mintiʼ tuʼn t-xi qiʼn qxbʼalun aju mlay tzʼonin tuʼn tok kybʼiʼn xjal tbʼanel tqanil maske qgan aju qxbʼalun.

14. ¿Alkye tten jaku txi kyxnaqʼtzaʼn mambʼaj kye kykʼwaʼl tuʼntzun tjaw kynimsaʼn Jehová tukʼilju alkye tten in bʼaj kyxbʼalumin kyibʼ?

¹⁴ At kyoklen mambʼaj tuʼn t-xi kyxnaqʼtzaʼn kye kykʼwaʼl qeju nabʼil in tzaj tqʼoʼn Tyol Dios. Aju oklenj jlu ax ikx in yolin tiʼj qa il tuʼn tok tilil kyuʼn tuʼn tel kynikʼ tiʼj qa in tzalaj Jehová tiʼjju alkye tten in bʼaj kyxbʼalumin kyibʼ ex qeju kykʼwaʼl (Proverbios 22:6; 27:11). ¿Alkye tten jaku che onin mambʼaj kyiʼj kykʼwaʼl tuʼntzun t-xi kynimen Jehová ex qeju tkawbʼil? Qa ma kubʼ kyqʼoʼn jun tbʼanel techel kywitz ex qa ma txi kyxnaqʼtzaʼn tukʼil kʼujlabʼil jatumel jaku che kanet tbʼanel qxbʼalun, ex toj alkye ambʼil. Ax ikx il tiʼj tuʼn t-xi kyxnaqʼtzaʼn mambʼaj kye kykʼwaʼl qa mas nim toklen tuʼn tjaw kynimsaʼn Jehová, aju Dios in qo nimen te, twitzju noq oʼkx tuʼn tjaw kyjyoʼn aju kyxbʼalun kygan.

15. ¿Tiʼ jaku tzʼonin qiʼj tuʼn tjaw qjyoʼn qxbʼalun tukʼil qnabʼil?

¹⁵ Jaku tzʼonin Tyol Dios qiʼj tuʼn ttzaj tqʼoʼn qnabʼil aj tjaw qjyoʼn qxbʼalun tuʼntzun tjaw qnimsaʼn Jehová. Maske ikju, jakulo kubʼ qyekʼun alkye qxbʼalun qgan. Nyalo ax kygan txqantl aju qxbʼalun kʼokel qqʼoʼn ex aju tzul qlaqʼoʼn. Noqtzun tuʼnj, il tiʼj tuʼn kyten qxbʼalun saq, toj tumel, aju in kubʼ tyekʼun qa in kubʼ qmansin qibʼ, aju jaku tzʼajbʼen quʼn jatumel aj qxiʼ ex aju bʼaʼn jaku tzʼela kye txqantl jatumel in qo anqʼin.

16. ¿Tiquʼn tbʼanel qa ma tzʼok tilil quʼn tuʼj tjaw qjyoʼn qeju tbʼanel qxbʼalun?

¹⁶ Kwest tuʼn kykanet qeju qxbʼalun aju in kubʼ tyekʼun qa in kubʼ qmansin qibʼ ex toj tumel. Nimku kʼaybʼil oʼkx in che kʼayin tiʼj xbʼalun in najbʼen kyuʼn xjal jaʼlo. Tuʼntzunju, il-lo tiʼj tuʼn tel qpaʼn mas ambʼil tuʼn kykanet tbʼanel amj, klobʼj, wexj ex juntl xbʼalun quʼn,  aju nya jtzʼon qo kyoj. Ax ikx in yolin jlu tiʼj qa ax qoʼ in qo kubʼ bʼinchante qxbʼalun. Noqtzun tuʼnj, tbʼanel qa ma tzʼok tilil quʼn. ¿Tiquʼn? Tnejel, tuʼnju kʼokel kyqʼoʼn kywitz erman tiʼj qa in nok tilil quʼn tuʼn kykanet tbʼanel qxbʼalun ex toj tumel, ex che tzalajel tiʼj. Ex tkabʼ, tuʼnju kjawil qnimsaʼn Qtat at toj kyaʼj aju kʼujlaʼn qoʼ tuʼn. Mas nim tzalajbʼil kbʼel qnaʼn aj tjaw qnimsaʼn Jehová twitz alkyexku juntl tiʼj in bʼant quʼn tuʼn tbʼaj qxbʼalumin qibʼ.

17. ¿Tiʼ il tiʼj tuʼn tkubʼ t-ximen jun ermano qa taj tuʼn tkyaj tqʼoʼn t-xmatz?

¹⁷ ¿Bʼaʼnpe tuʼn tten kyxmatz, moqa kyxmatzi, erman? In tzajtoq tqʼamaʼn Ley xi qʼoʼn te Moisés tuʼn tten kyxmatz qe xinaq. Noqtzun tuʼnj, nya ateʼ okslal tjaqʼ Ley ex nya il tiʼj tuʼn t-xi kynimen (Levítico 19:27; 21:5; Gálatas 3:24, 25). Toj junjun tnam, bʼaʼn toj kywitz xjal qa at kyxmatz xinaq ex at maj in che ok nimen tuʼn jlu, ex mintiʼ in kubʼ kyximen nya bʼaʼn aj in che pakbʼan erman kye. Kyoj tnam lu ateʼ junjun erman nejenel at kyxmatz. Maske ikju, ateʼ junjun erman in kubʼ kyximen tuʼn miʼn tten kyxmatz (1 Corintios 8:9, 13; 10:32). Atzun kyoj junjuntl tnam nya naqʼli qe xjal tuʼn tok kyqʼoʼn kywitz kyiʼj xinaq tukʼil kyxmatz ex nya bʼaʼn in nela toj kywitz tuʼn tten kyxmatz qeju in che ajbʼen te Dios. Tuʼntzunju, qa at jun erman at t-xmatz toj lugar aju, mintiʼlo in jaw tnimsaʼn Jehová tuʼn jlu ex mlaylo txi qʼamet qa «mintiʼ tpaltil» (1 Timoteo 3:2, 7; Romanos 15:1-3).

18, 19. ¿Alkye tten in qo tzaj tonin Miqueas 6:8?

¹⁸ In xi qqʼoʼn chjonte te Jehová tuʼnju mintiʼ in tzaj ttzʼibʼin jun tajlal tiʼj alkye tten kbʼajel qbʼinchaʼn qten ex alkye qxbʼalun bʼaʼn tuʼn tajbʼen. Aju te in bʼant tuʼn, in tzaj tqʼoʼn ambʼil qe tuʼn tkubʼ qximen tiʼ kbʼantel quʼn tuʼn tonbʼil Tyol. Tuʼntzunju, aj tkubʼ qximen alkye qxbʼalun kʼajbʼel, jaku kubʼ qyekʼun qa qajbʼil tuʼn qok te mans aj qajbʼen te Dios ik tzeʼn in tzaj tqʼamaʼn Miqueas 6:8.

¹⁹ Bʼaʼn tuʼn tkubʼ qmansin qibʼ ex tuʼn tel qnikʼ tiʼj qa saq Jehová ex xjan te, ex tbʼanel qeju tkawbʼil aj ttzaj kyyekʼun qbʼe. Qa mintiʼ in jaw qnimsan qibʼ, kʼokel tilil quʼn tuʼn kykubʼ qqʼoʼn toj xnaqʼtzbʼil qeju tkawbʼil. Nya oʼkxju, qa in kubʼ qmansin qibʼ kʼokel qqʼoʼn kyoklen txqantl ex qo ximil tiʼj tiʼ jaku kubʼ kyximen.

20. ¿Tiʼ kyximbʼetz txqantl jaku ten qiʼj tuʼnju alkye tten in bʼaj qxbʼalumin qibʼ?

²⁰ Kʼelel kynikʼ xjal qiʼj qa testigos de Jehová qoʼ tuʼnju alkye tten in bʼaj qxbʼalumin qibʼ. Nimxix kyoklen qeju tkawbʼil Jehová ex tuʼn tkyaqil qkʼuʼj in xi qbʼiʼn. Ex tuʼntzunju in xi qqʼamaʼn qa tbʼanel in bʼant kyuʼn ermano ex ermana tuʼnju in bʼaj kyxbʼalumin kyibʼ toj tumel ex tuʼnju in kubʼ kyyekʼun tbʼanel kymod. Tuʼn jlu in che onin tuʼn tok kybʼin xjal tbʼanel tqanil te kolbʼil ex in jaw kynimsaʼn Jehová, ex in tzalaj kyuʼn. Qa ma bʼaj qxbʼalumin qibʼ toj tumel, kukx kjawil qnimsaʼn Jehová aju at tajwalil ex t-spikʼumal (Salmo 104:1, 2).