1, 2. ¿Tleka iteixpantijkauan Jehová noneki manotlakentikan ken kijtoua itlanauatiluan toTajtsin? (Xkita tlaixkopinajli kampa peua tlen tomachtijtokej).

IPAN Holanda se periódico okijto ken notlakentiaj akin yauej ipan se teopan ijkuak nosentlaliaj. Kijtoua: “Nesi ika miyekej san kenon notlakentiaj, ijkon kichiuaj ijkuak melak tona”. San ika, noijki ipan yejon periódico okijto kenon iteixpantijkauan Jehová yejuamej xijkon ijkuak yauej ipan uejueyimej tlanechikoltin. Kijtoua ika kokonej niman tlakamej notlakentiaj ika trajes niman corbatas. Ichpokatsitsintin niman siuamej notlakentiaj ika kualtsin inkue ken kinamiki. Iteixpantijkauan Jehová miyekpa melak kuajli tlajtouaj intech ipampa ken notlakentiaj. Pablo, itlatitlankauj Cristo, okijto ika akin kichiuaj ken Cristo manotlakentikan “kuajli ken noneki” noso ken kinamiki (1 Timoteo 2:9, 10). Maski Pablo tlajtouaya itech siuamej, tlanauatijli tlen okijto noijki kitlakamatiskej tlakamej.

² Itlanauatiluan toTajtsin itech kenon totlakentiskej tikitaj ika melak ueyi kijtosneki akin tiktekichiuiliaj Jehová niman yejua noijki ijkon kita (Génesis 3:21). Biblia kijtoua ika Jehová, akin Ueyixtika, yokintlali tlanauatiltin itech ken totlakentiskej niman kineki matiktlakamatikan. Ika yejon, tlakentli tlen noneki tiktlapejpeniskej xsan tejuamej noneki techyolpaktis, noneki noijki makiyolpakti toTajtsin Jehová akin Ueyixtika.

3. ¿Tlenon uelis tomachtiskej itech tlanauatiltin tlen okinmakakej israelitas itech tlakentli?

 ³ Ipan Tlanauatijli tlen okimakakej Moisés kipiaya tlanauatiltin tlen kintlajpiaya israelitas itech auilnemilistli kampa chantiyaj. Yejuin tlanauatijli teititia ika Jehová melak kitlauelita ijkuak notlakentia se tlen xnesi tla tlakatl noso siuatl (xpoua Deuteronomio 22:5). * Itech yejon tlanauatijli, tejuamej tomachtiaj ika Jehová xkuelita tlakentli tlen kichiua ika tlakamej manesikan ken siuamej noso tlen kichiua ika siuamej manesikan ken tlakamej. Noso tlen kichiua maka nimantsin manesi tla tlakatl noso siuatl.

4. ¿Tlenon uelis techpaleuis kuajli tiktlapejpeniskej ken totlakentiskej?

⁴ Tlajtolyekanalistin itech Biblia uelis techpaleuis kuajli matiktlapejpenikan ken totlakentiskej. Yejon tlajtolyekanalistin nochiuiyan niman san kemanon uelis tikchiuaskej, maski san kanon matichantikan niman tinochimej. Xnoneki matikpiyakan se amatl kampa maijkuiliujto kenon noneki niman xnoneki matotlakentikan. San melak noneki matoyekanakan ika tlajtolyekanalistin, tlen techkauilia matiktlalikan tlakentli tlen tikuelitaj. Matikitakan seki tlajtolyekanalistin itech Biblia tlen uelis techpaleuis matikmatikan “tlen kuajli, on tlen kipaktia niman nochi on tlen chipauak” ijkuak tiktlapejpeniskej kenon totlakentiskej (Romanos 12:1, 2).

5, 6. ¿Tlenon uelis panos ika ken totlakentiaj?

⁵ Pablo ika iespíritu santo toTajtsin okiteneuj tlajtolyekanalistli tlen uajlauj ipan 2 Corintios 6:4 (xpoua). Ken tinesij ijkon tlanemiliaj totech oksekimej (1 Samuel 16:7). Pampa tejuamej tiitekipanojkauan toTajtsin, xsan noneki matotlakentikan ijkon pampa kuajli tomachiliskej noso yejon tlen tikuelitaj. Ijkuak tikchiuaj tlajtolyekanalistin itech Biblia, noneki matechpaleui maka matiktlalikan tlakentli tlen pepechijtik, tlen tlatlanesi noso pantlanesi. Yejuin kijtosneki maka tiktlaliskej tlakentli tlen makichiua manesi tlen xnoneki itech totlalnakayo. Nion se xkipiya ika xkuajli nomachilis nion ontlachias oksekan ijkuak techitas ken ototlakentijkej.

⁶ Ijkuak kuajli tinesij, tichipaujkej, kuajli yotoyektlalijkej niman yototlakentijkej ken kinamiki, akin techitaj kanaj ok uelis techtlakaitaskej ken akin tiktekichiuiliaj toTajtsin Jehová akin Ueyixtika. Niman yejuamej uelis kinekiskej kiueyichiuaskej toTajtsin, kitlakaitaskej ikalpan toTajtsin niman kanaj kinekiskej techkakiskej itech tlen titenojnotsaj.

7, 8. ¿Kemanon melak noneki kuajli matotlakentikan?

⁷ Pampa tiktlakaitaj toTajtsin akin chipauak, tokniuan niman akin tikinnojnotsaj, noneki totlakentiskej ken uelis kiueyichiuas Jehová niman totenojnotsalis (Romanos 13:8-10). Niman melak noneki kuajli matotlakentikan ijkuak tiauej ipan totlanechikoluan niman ijkuak tontenojnotsaj. Noneki totlakentiskej ken kinamiki tlen manesi ika tikueyichiuaj toTajtsin (1 Timoteo 2:10). Kema, onka seki tlakentli tlen kinamiki sekan niman oksekan kanaj uelis kitaskej ika xkinamiki. Kuakon maski san kanon matichantikan, ken tiiteixpantijkauan Jehová noneki maka matotlakentikan tlen uelis kichiuas maka kuajli manomachilikan oksekimej.

⁸ (Xpoua 1 Corintios 10:31). Ijkuak tiauej ipan uejueyimej tlanechikoltin, melak noneki kuajli matotlakentikan niman ken kinamiki. Maka matotlakentikan ken notlakentiaj oksekimej tlaltikpakchanejkej tlen xkuajli nesi akin xnotlajpiyaj kenon notlakentiaj. Yejuin ijkon noneki maski ijkuak xipeua ueyi tlanechikojli  noso tla yotlan, ijkuak tiaskej kanaj niman ijkuak tinemij ipan hotel. Kuakon noneki matikitakan ika totlaken nochipa kuajli manesi. Tla ijkon tikchiuaj, kuajli tomachiliskej niman tiknekiskej tikteijliskej ika tejuamej tiiteixpantijkauan Jehová niman uelis titenojnotsaskej maski san kemanon.

9, 10. ¿Kenon uelis techpaleuis Filipenses 2:4 itech ken totlakentiskej?

⁹ (Xpoua Filipenses 2:4). ¿Tleka noneki titlanemiliskej itech kenon uelis kimijtlakos tokniuan ken totlakentiaj? Se, pampa akin tiktekichiuiliaj toTajtsin tochikauaj tikchiuaskej yejuin tlajtolpaleuilistli: “Yejua ika, tej, xpopolokan nochi tlen xkuajli nemotech onkaj yejuan kisa ipan in tlaltikpaktli. Ma ka yakaj ma auilnemi. Xkixtikan nochi on tlen xchipauak ipan nemonemilis. Ma ka xkauilikan nemoeleuilis ma mechyekana, nion ma ka xnejnekikan on yejuan tlen xkuajli” (Colosenses 3:2, 5). Sekimej tokniuan kichiuayaj auilnemilistli, san ika, yejuamej nochikauaj kixnamikiskej noso xkichiuaskej xkuajli ileuilistli. Kuakon tla xtiknemiliaj itech tlenon uelis panos ken totlakentiaj, uelis tikchiuaskej melak ouijtika makitakan kitlakamatiskej tlajtolpaleuilistli itech Biblia niman ouijtika nochikauaskej xkichiuaskej tlen xkuajli ileuilistli (1 Corintios 6:9, 10). ¿Tiknekiskiaj mapano yejon itech tokniuan?

 ¹⁰ Ijkuak tinemij iuan tokniuan, tikmatij ika xtlaj uelis techijtlakos itech akin kichiuaj auilnemilistli pampa tinemij kampa tlachipaujkan. Tla totlakentiaj ken kinamiki, titlapaleuiyaj ika maonia chipauak kampa tinemij, ken ijkuak tinemij ipan tlanechikojli noso ijkuak tinemij oksekan. Maski tinochimej uelis tiktlapejpeniskej katlejua tlakentli tiktlaliskej, noijki noneki ika ken totlakentiskej maka makintekiyomaka oksekimej makipiyakan intlanemilil chipauak, intlajtol chipauak niman chipauak innemilis ixpan toTajtsin (1 Pedro 1:15, 16). Melauak tlasojtlalistli xsan kenijki kichiua niman “xkitejtemoua on tlen kuajli san para yejua” (1 Corintios 13:4, 5).

11, 12. ¿Kenon Eclesiastés 3:1, 17 techpaleuis kuajli matiktlapejpenikan katlejua tlakentli tiktlaliskej?

¹¹ Ijkuak itekipanojkauan toTajtsin kipiyaj ika kitlapejpeniskej katlejua tlakentli kikuiskej, noneki kilnamikiskej ika onka nochi kemanon nochiua (Eclesiastés 3:1, 17). Nochiuiyan tlamantik noso sejneka, ken ijkuak tona niman seua, niman okseki tlemach ken tinemij uelis kichiuas ika manopatla ken totlakentiaj. San ika, itlanauatiluan Jehová xkeman nopatlaj (Malaquías 3:6).

¹² Kampa melak tona kichiua ika ouijtika tiktlapejpeniskej tlakentli tlen kinamiki niman kuajli manesi. Tokniuan tlakamej niman siuamej kitlasojkamatij ijkuak tejuamej xtiktlaliaj tlakentli tlen pepechijtik, tlen tlatlanesi noso pantlanesi (Job 31:1). Noijki ijkuak tiauej ipan playa noso oksekan kampa tonapanouaj noneki matiktekitiltikan totlaken tlen kinamiki (Proverbios 11:2, 20). Maski miyekej tlaltikpakchanejkej kikuij tlakentli tlen tlatlanesi noso pantlanesi, tejuamej noneki kuajli matikitakan ika tlakentli tlen tiktlapejpeniskej makiueyichiua toTajtsin Jehová akin chipauak.

13. ¿Tleka noneki matechpaleui tlajtolpaleuilistli tlen tiknextiaj ipan 1 Corintios 10:32, 33 ijkuak tiktlapejpeniskej tlakentli?

¹³ Onka se tlajtolyekanalistli itech Biblia tlen noneki tikilnamikiskej ijkuak tiktlapejpeniskej tlakentli. Noneki maka matikilkauakan ika maka tikchiuaskej xkuajli manomachili intlamachilis oksekimej (xpoua 1 Corintios 10:32, 33). Tejuamej melak noneki matikitakan ken totlakentiaj maka makichiua ika xkuajli manomachilikan tokniuan niman akin xkitekichiuiliaj Jehová. Pablo okijto: “Cada se de tejuamej ma tikimpaktikan oksekimej  ika on tlen kuajli para yejuamej. Ijkon noneki tikchiuaskej para yejuamej noskaltiskej ipan intlaneltok”. Pablo noijki okijto: “Pampa nion Cristo sa no yejua onopaktij” (Romanos 15:2, 3). Ijkon ken Jesús, tejuamej noneki tikitaskej ika tikchiuaskej tlen toTajtsin kineki niman tikinpaleuiskej oksekimej yejon tlen melak ueyi kijtosneki niman xijkon ken tlen san tejuamej tikuelitaj. Ika yejon maka matiktlapejpenikan tlakentli tlen uelis kichiuas maka matechkakikan ijkuak titenojnotsaj maski yejon tlakentli tikuelitaj.

14. ¿Kenon uelis tajtin kimititiskej inkoneuan makiueyichiuakan toTajtsin ken notlakentiskej?

¹⁴ Tajtin noneki kinmachtiskej inkoneuan makitlakamatikan tlajtolyekanalistin itech Biblia. Ika yejon noijki noneki kuajli makitakan yejuamej niman inkoneuan makichiuakan ika toTajtsin mayolpaki ika ken notlakentiskej niman noyektlaliskej (Proverbios 22:6; 27:11). ¿Kenon uelis tajtin kinmachtiskej inkoneuan makitlakaitakan toTajtsin niman itlanauatiluan? Tajtin noneki kimititiskej se kuajli neskayotl inkoneuan. Noijki kinmachtiskej ika tlasojtlalistli inkoneuan kanon niman kenon kinextiskej tlakentli tlen kinamiki. Kokonej xsan noneki kitlapejpeniskej tlakentli tlen yejuamej kuelitaj, melak noneki makitlapejpenikan tlen makiueyichiua toTajtsin Jehová akin kiteixpantiaj.

15. ¿Tlenon noneki techpaleuis kuajli matiktlapejpenikan tlakentli?

¹⁵ Biblia melak tepaleui niman uelis techyekanas ijkuak tiktlapejpeniskej itlaj tlen makiyolpakti toTajtsin. Maski yejon xkijtosneki ika tla xtiktlaliskej tlakentli tlen tikuelitaj. Ken tikuelitaj totlakentiskej niman tlakentli tlen uelis tijkouaskej xuelis san noijki yes ken oksekimej kitlaliaj niman tlen kuelitaj. San ika, totlaken noneki nochipa machipauak, kuajli manesi, tlen kinamiki niman tlen notlalia kampa tichantij.

16. ¿Tleka melak noneki matochikauakan kuajli matotlakentikan?

¹⁶ Kemantika ouijtika tiknextiskej tlakentli tlen kinamiki niman kuajli manesi. Miyekan kampa kinemakaj tlakentin san onka tlen kemach kistika. Kuakon kanaj tiuejkauiskej tiknextiskej tlakentli tlen tijkouaskej, ken kuetli, blusa noso trajes niman pantalones tlen xpepechijtik. San ika, tokniuan kitaskej niman kitlasojkamatiskej ika tochikauaj tiknextiskej kuajli totlaken niman ken kinamiki. Noijki kuajli tomachiliskej pampa ijkon tikueyichiuaskej toTajtsin maski san tlenon nonekis tikchiuaskej ijkuak tochikauaskej totlakentiskej ken yejua kuelita.

17. ¿Itech tlenon uelis kinemilis se tokniuj tla kinemilia kipiyas ixayakatson?

¹⁷ ¿Kinamiki tla tokniuan makinokauilikan inxayakatson noso intson ipan inxayak? Tlanauatijli tlen okimakakej Moisés kitlajtlaniya ika tlakamej makipiyakan inxayakatson. San ika, ipan yejuin tonajli akin kichiuaj ken Cristo xok noneki makitlakamatikan yejon Tlanauatijli (Levítico 19:27; 21:5; Gálatas 3:24, 25). Ipan oksekan, kuajli kitaj tla se kikaua ixayakatson niman kiyektlalia. Niman yejuin xkichiua ika tlaltikpakchanejkej maka makinekikan techkakiskej ijkuak titenojnotsaj. Niman hasta sekimej tokniuan akin kipiyaj se tekitl ipan tlanechikojli kipiyaj inxayakatson. Maski ijkon sekimej tokniuan yokinemilijkej xkipiyaskej (1 Corintios 8:9, 13; 10:32). San ika, oksekan noso ipan okseki kalpamej xijkon kichiuaj niman xkuajli kitaj ika akin kichiuaj ken Cristo ijkon makichiuakan. Niman se tokniuj hasta uelis kichiuas maka manoueyichiua toTajtsin niman xuelis kijtos ika xkipiya tlen ika “kijixkomakaskej” (1 Timoteo 3:2, 7; Romanos 15:1-3).

18, 19. ¿Kenon techpaleuis Miqueas 6:8?

¹⁸ Melak tiktlasojkamatij ika Jehová xtechmaka se amatl kampa maijkuiliujto katlejua tlakentli noso ken toyektlaliaj kuajli niman tlen xkuajli. Yejua techkauilia tejuamej matiktlapejpenikan tlen tikchiuaskej ika tlajtolyekanalistin itech Biblia. Kuakon hasta ijkuak noneki tiknemiliskej kenon totlakentiskej niman toyektlaliskej, uelis tikteititiskej ika tiknekij tikchiuaskej ken kinamiki ijkon ken akin tiktekichiuiliaj toTajtsin (Miqueas 6:8).

¹⁹ Matikasikamatikan ken kinamiki ika Jehová yejua chipauak niman ika itlanauatiluan melak kuajli techyekanaj. Tla tiknekij tiyolyemankej yeskej, noneki maka tijkauaskej itlanauatiluan ipan tonemilis. Tla tikasikamatij ken kinamiki techpaleuis matitetlakaitakan niman matitlanemilikan itech tlen kimachiliaj niman tlen kinemiliaj oksekimej.

20. ¿Tlenon noneki mapano itech oksekimej ika ken totlakentiaj?

²⁰ Ken totlakentiaj noneki kuajli manesi ika tejuamej tiktekichiuiliaj toTajtsin. Yejua yokitlali uejueyimej tlanauatiltin niman techyolpaktia ika toyekanaskej. Miyekpa kuajli tlajtouaj intech tokniuan ipampa ken nesij niman ika kuajli noyekanaj, tlen kichiua ika tlaltikpakchanejkej makuelitakan tlen kijtoua Biblia niman manoueyichiua toTajtsin niman mayolpaki. Ijkuak tiktlapejpeniaj ken totlakentiaj, nochipa tikchiuaskej manoueyichiua Jehová akin notlakentia “ika ueyilistli niman ika melak kualtsin” (Salmo 104:1, 2).