1, 2. Omokonda yatyi Onombangi mba Jeova vavalela ovikutu vikahi nawa? (Tala olutalatu pefo pahimbikila onthele.)

O JORNALE imwe yoko Holanda yapopia oñgeni ononkhalamutwe mbonongeleya mbuvala tyina venda komaliongiyo avo. Yati: “Vavala ovikutu vihekahi nawa, haunene tyina kutokota.” Mahi o jornale oyo yapopia okuti Onombangi mba Jeova ha ngotyoko vavala tyina venda komaliongiyo avo. Yapopia okuti ovana ovatutu vavala ovikapote no nongalavata, ovakainthu vavala onosaya onondande. Onombangi mba Jeova vapopiwa nawa konthele yomuvalo wavo. Apostolu Paulu wapopia okuti Ovakristau vena okuvala “no nondunge, nokuapola pokati.” (1 Timóteo 2:9, 10) Namphila Paulu apopia ovakai, mahi novalume Ovakristau vesukisa okuendela monondonga ombo.

² Ovitumino via Huku konthele yomuvalo viakolela kovaumbili  va Jeova, tupu viakolela ku Huku tufenda. (Gênesis 3:21) Ombimbiliya yayandyulula nawa konthele ya Jeova Ohamba Yavilapo, konthele yoñgeni ovaumbili vae vena okuvala. Ngotyo, tyina tuholovona omuvalo katupondola okuholovona una uhambukiswa vala onthue, mahi tuna okuholovona omuvalo uhambukiswa Ohamba yetu Tatekulu, Jeova.

3. Oityi tulilongesila kovitumino viomuvalo Huku avelele ova Isilayeli?

³ Ovitumino Viapelwe Moisesi ankho viyakulila ova Isilayeli opo velityilike okulinga ovipuka viasila vilingwa no vanthu vakala ponthele yavo. Ovitumino ankho vilekesa okuti Jeova uyele omuvalo uhetavela okuimbuka inkha omunthu wevivala omulume ine omukai. Hono, omuvalo oo wakaka unene. (Tanga Deuteronômio 22:5.) Ovitumino vitulongesa okuti Jeova kahambukilwa omulume avale ovikutu vielifwa no viomukai, ine omukai uvala ovikutu vielifwa no viomulume, ine omuvalo upuiya okupungulula okuti ou omulume ine omukai.

4. Oityi tyipondola okukuatesako Ovakristau okulinga omatokolo aviuka konthele yomuvalo?

⁴ Ovitumino vio Mbimbiliya vitukuatesako okulinga omatokolo aviuka konthele yomuvalo. Ovitumino ovio viundapeswa kovilongo aviho, tyilinge viokutokota ine viokutenda unene. Onthue katuesukisile okuhonekelwa omuvalo patyi tuna okuvala. Onthue tuesukisa okulandula onondonga mbukahi Movihonekwa nongotyo atuvale ovikutu tuhole. Matulilongesa onondonga mbumwe mbo Mbimbiliya mambutukuatesako okuimbuka “etyi tyaviuka nehando lia Huku,” tyina tutokola etyi matuvale.—Romanos 12:1, 2.

5, 6. Oñgeni ovikutu vietu tuvala vikalesa vakuetu?

⁵ Apostolu Paulu watumwa na Huku opo ahoneke onondaka ombu mbakolela mbukahi mu 2 Coríntios 6:4. (Tanga.) Onondaka tuhonekela vakuetu mo telefone ine mo Internete, mbulekesa oñgeni tuvetala. (1 Samuel 16:7) Mokonda tuvaumbili va Huku katuvale vala ovikutu tusoka okuti vikahi nawa ine evi tuhole. Tyina tulandula onondonga Mbombimbiliya matyitukuatesako okulityilika okuvala ovikutu viatona unene, nokumonekela ine vio kulihandesa. Otyo tyihangununa okuti tuesukisa okulityilika okuvala ovikutu viatona unene kolutu luetu. Ovanthu kavapondola okulitehelela omapita tyina vatala onkhalelo yetu yokuvala.

⁶ Tyina tuvala ovikutu viasukuka nokukahi nawa, ovanthu mavaimbuka okuti tuumbila Tatekulu Omukulami  Jeova. Ovanthu mavesuku vali na Huku tufenda, avakala nonthilo neongano lietu, tupu mavahande vali okutehelela onondaka tuvepopila.

7, 8. Onalupi haunene tuesukisa okuvala nawa?

⁷ Tuna okuvala monkhalelo ihapopisa Huku yetu omusukuki, novakuatate vetu no nomphange iya ovanthu tuivisa potyilongo tyetu avakala nonthilo na Jeova no nondaka tuivisa. (Romanos 13:8-10) Omuvalo wetu wakolela unene tyina tuenda komaliongiyo ine tyina tuenda movilinga viokuivisa. Tuna okuvala monkhalelo yaviuka ilekesa okuti tuvanthu vafenda Huku. (1 Timóteo 2:10) Tyotyili, ovikutu vimwe kaviapengele okuvivala pomphangu imwe, mahi pomphangu onkhuavo viapenga. Katyesukisile opi tukala, mokonda Tunombangi mba Jeova tuna okulityilika okuvala ovikutu vinguanguanesa ovanthu.

⁸ Tanga 1 Coríntios 10:31. Putyina tuenda ko vionge tuesukisa okuvala ovikutu  vikahi nawa. Onthue katupondola okuhetekela onkhalelo yokuvala yomouye. Tyina tuenda kotyonge natyina tutundako tuesukisa okuvala ovikutu vikahi nawa. Okulinga ngotyo matulekesa okuti Tunombangi mba Jeova tupu matyituavela omphitilo yokuava oumbangi kese muvo.

9, 10. Omokonda yatyi Filipenses 2:4 itukuatesako okuvala monkhalelo ikahi nawa?

⁹ Tanga Filipenses 2:4. Omokonda yatyi tuesukisila okusoka konthele yo oñgeni omuvalo wetu ukalesa ovakuatate vetu no nomphange? Ehunga limwe omokonda ovanthu va Huku valinga ononkhono mbo kulandula onondonga ombu: “ Ipaei ononthele mbolutu luenyi, konthele yomahando a pano pohi, omaumbalehi, esilo, oluiho luovinepo ovivi.” (Colossenses 3:2, 5) Ovakuatate vetu nonomphange vayekapo okulinga ovipuka ovivi, mahi hamwe nkhele vatualako nokulwa nomalusoko omavi. Inkha katulunguka, omuvalo wetu upondola okuvepaka motyitateka avehetyivili okulandula onondonga mbo Mbimbiliya nokulwa nomahando avo. (1 Coríntios 6:9, 10) Onthue katuhande okuyawisa vali kovilwa viavo?

¹⁰ Tyina tuna ovakuatate vetu nonomphange onthue tukahi kokule novanthu vokuyandyanesa oumbalehi. Omuvalo wetu una okusukuka nawa nokuaviuka tyina tukahi meliongiyo. Namphila onthue tuna okuholovona omuvalo wetu, mahi tuna otyilinga tyokuvala ovikutu vikuatesako vakuetu okukala nomalusoke novituwa viaviuka komaiho a Huku. (1 Pedro 1:15, 16) Ohole yotyotyili “kailingi ovivi, kaiovola okulinga omahando ayo muene.”—1 Coríntios 13:4, 5.

11, 12. Oñgeni Eclesiastes 3:1, 17 itukuatesako okupola pokati?

¹¹ Tyina ovaumbili va Huku vaholovona omuvalo vetyii okuti “Kuna omuvo wokulinga ovipuka aviho.” (Eclesiastes 3:1, 17) Ovanthu hamwe vavala omuvalo welikalaila mokonda yo kovilongo vakala, ku vimwe kutenda unene, kovikuavo kutokota unene. Mahi ovitumino via Jeova kavipiluluka.—Malaquias 3:6.

¹² Alo umwe pomuvo wokutokota tuesukisa okuvala ovikutu vikahi nawa. Ovakuatate vetu nonomphange vetupanda tyina tuhavale ovikutu viatona unene nevi vimonekela. (Jó 31:1) Tupu tyina tukayoa tuesukisa okuvala omuvalo ukahi nawa. (Provérbios 11:2, 20) Namphila ovanthu vomouye tyina vakayoa vavala omapita, mahi onthue tuesukisa okuvala  monkhalelo inkhimaneka Huku yetu omusukuki, Jeova.

13. Omokonda yatyi onondonga mbuli mu 1 Coríntios 10:32, 33 mbutukuatesako pokuholovona omuvalo?

¹³ Kuna otestu onkhuavo ipondola okutukuatesako okuholovona nawa omuvalo wetu. Onthue tuesukisa okuliyunga nawa opo ovipuka tulinga vihapundukise vakuetu. (Tanga 1 Coríntios 10:32, 33.) Otyilinga tyetu okuholovona ovikutu vihapundukisa ovakuatate vetu nonomphange alo umwe ovanthu vahaumbila Jeova. Apostolu Paulu wahoneka okuti: “Kese umwe puonthue ahambukiswe mukuavo ku tyina tyaviuka pala epameko liae”. Ayawisako okuti: “Mokonda alo umwe Kristu kelihambukisilwe oe muene.” (Romanos 15:2, 3) Nga Jesus, okulinga ehando lia Huku nokukuatesako vakuetu, otyipuka tyakolela vali tyipona omahando etu. Ngotyo katuholovona okuvala ovikutu monkhalelo onthue tuhanda mahi matuvale monkhalelo ongwa opo ovanthu vatehelele onondaka tuivisa.

14. Oñgeni ovohe vapondola okulongesa ovana vavo okunkhimaneka Huku nomuvalo wavo?

¹⁴ Ovohe ovakristau vena otyilinga tyokulongesa ovana vavo okulandula onondonga Mbombimbiliya. Tyilinge ovohe no vana vavo vesukisa okuvala monkhalelo ihambukiswa Huku. (Provérbios 22:6; 27:11) Oñgeni ovohe vapondola okulongesa ovana vavo opo vakale nonthilo na Huku yetu omusukuki novitumino viae? Ovohe vesukisa okuava ongeleka ongwa kovana vavo. Vena okulongesa nohole ovana vavo opi vena okulanda noñgeni vapondola okukoya ovikutu vikahi nawa. Ovana kavapondola okuholovona vala ovikutu mokonda vevihole, mahi tyakolela vali, vena okuholovona ovikutu vinkhimaneka Jeova, Huku vaumbila.

15. Oityi tyipondola okutukuatesako okulinga omatokolo nounongo?

¹⁵ Mombimbiliya muna onondonga mbukahi nawa mbupondola okutukuatesako okulinga omatokolo nonondunge ankhimaneka Huku. Nongotyo, omuvalo wetu ulekesa kuvakuetu onthue tuvanthu patyi. Ovikutu tuhole nonkhalelo yetu yokuvala ipondola okulikalela no ya vakuetu. Mahi ovikutu vietu apeho viesukisa okukala tyasukuka nokukahi nawa iya nokuhapundukisa ovanthu.

16. Omokonda yatyi otyiwa okulinga ononkhono mbokuovola ovikutu vikahi nawa?

¹⁶ Katyapepukile okuvasa ovikutu vikahi nawa. Monovenda ononyingi muna vala ovikutu vio kuankhimana. Pamwe tyesukisa okupwa-elundo opo uvase osaya, no mbulusa, vikahi nawa nokuhatono. Mahi ovakuatate nonomphange vapanda ononkhono tulinga mbokuvala ovikutu vikahi nawa. Ehambu tunalio liokuetela omunkhima Tate yetu keulu wo luembia lituavela ondundo yokuovola ovikutu vimunkhimaneka.

17. Okuti tyapenga ovakuatate okukala nonondyeli?

¹⁷ Okuti tyaviuka ovakuatate okukala nonondyeli? Ovitumino Viapelwe Moisesi vipopia okuti ovalume vena okuliyekela onondyeli. Mahi, Ovakristau kaveli mombuelo yovitumino Viapelwe Moisesi ine okuvilandula. (Levítico  19:27; 21:5; Gálatas 3:24, 25) Kovilongo ovinyingi katyapengele ovalume okuliyekela onondyeli mbakeyua nawa iya otyo katyityilika ovanthu okutehelela onondaka tuivisa. Ovakuatate vamwe veliyekela onondyeli. Nongotyo movilongo ovio, ovakuatate vamwe vatokola okuhakala nonondyeli. (1 Coríntios 8:9, 13; 10:32) Kovilongo ovikuavo okuliyekela onondyeli katyaviukile Komukristau. Kovilongo ovio, okuliyekela onondyeli tyipondola okupopisa omapita Huku. Ovakuatate veliyekela onondyeli kovilongo ovio, kavaave ongeleka ongwa mewaneno.​—1 Timóteo 3:2, 7; Romanos 15:1-3.

18, 19. Oñgeni Miquéias 6:8 itukuatesako?

¹⁸ Tupandula Jeova wahahonekele ovikutu patyi tupondola okuvala nevi tuhapondola okuvala. Mahi, utuyeka tuholovone omuvalo wetu, ngetyi Ombimbiliya ipopia. Nongotyo, katupondola okulimbuako okuti omuvalo wetu una okulekesa okuti tuvaumbili va Huku yetu.​—Miquéias 6:8.

¹⁹ Onthue nomutima weliola tuimbuka okuti Jeova omusukuki iya ovitumino viae opala ouwa wetu. Inkha tueliola omutima, apeho matulandula ovitumino viae momuenyo wetu. Okupola pokati matyitukuatesako okukala nonthilo netyi vakuetu vasoka nokutavela tyina vetupakela-mo.

20. Oñgeni omuvalo wetu upondola okukalesa vakuetu?

²⁰ Ovikutu vietu vipondola okulekesa nawa okuti tuvaumbili va Jeova. Ovitumino via Jeova viavilapo unene iya onthue tuhambukilwa okuvilandula. Ovakuatate vetu nonomphange ovikando ovinyingi vapopiwa nawa mokonda yonkhalelo yavo ongwa yokuvala. Onkhalelo yavo yokuvala ikoka ovanthu vokueliola omutima okutavela onondaka Mbombimbiliya, iya tyietela omunkhima nehambu Jeova. Tyina tulinga omatokolo nonondunge konthele yomuvalo, matutualako okunkhimaneka Una welivaleka “omunkhima nouwa uhuvisa.”​—Salmo 104:1, 2.