1, 2. ¿Testigo de Jehovacunaca imamantataj pinganayaj, maipishcachun ropataca mana churarinchij? (Jahuapi tiyaj dibujota ricui).

HOLANDA llajtamanta shuj periodicopica: “Religionta pushajcunaca shuj rupai punllapimi tandanacurca. Paicunaca mana tandanacuiman rij laya ropahuanmi carcacuna” nircami. Chai periodicopi testigo de Jehovacunamantapish parlashpaca: “Paicunaca jatun tandanacuiman ringapajca mana shujtaj religioncunata pushajcuna shinachu churarincuna. Cꞌaricunapish huahuacunapish corbatahuan, ternohuanmi rincuna. Huarmicunapish huahuacunapish uchilla faldacunahuanca mana rincunachu” nircami. Testigo de Jehovacuna alli yuyashpa churarishcamantaca cutin cutinmi felicitancuna. Diosta servijcunataca apóstol Pabloca: ‘Ama pinganayaj maipish cachun churaringuichij’ nircami. Ñucanchijca Bibliapi mandashca shinami churarina canchij (1 Timoteo 2:9, 10). Apóstol Pablo nishca shimicunataca huarmicunapish cꞌaricunapishmi cazuna canchij.

² Jehová Diosca pinganayaj, maipishcachun ropata churarichunca mana munanchu. Chaimantami alli yuyashpa ropata churarina canchij (Génesis 3:21). Jehová Diosca tucuita Jatun Mandajmi can. Chaimantami ñucanchij ima shina churarina cashcataca Bibliapi yachachin. Ima ropata churanata agllacushpaca  mana ñucanchijllapi yuyanachu canchij. Ashtahuanpish Jehová Dios imata yuyashcata ricushpami paita cushichina canchij.

3. ¿Moisesman cushca leypica imatataj yachachin?

³ Israelitacunapaj cꞌuchullapi causaj gentecunaca huainayashpa, maipishcachunmi causajcuna carca. Israelitacuna ama paicuna shina causachunmi Diosca Moisesman huaquin leycunata curca. Chai leypica Jehová Diosca: “Huarmicunaca cꞌaricunapaj churanataca ama churaringuichijchu. Cꞌaricunapish huarmicunapaj churanataca ama churaringuichijchu” nircami (Deuteronomio 22:5-ta leyipai). Moisesman cushpa leypica cꞌaricunataca ama huarmicuna shina churarichun. Cutin huarmicunataca ama cꞌaricuna shina churarichun ninmi. Chaitaca Jehová Diosca millanayachinmi.

4. ¿Alli yuyashpa ropata churaringapajca Bibliaca ima shinataj ayudan?

⁴ Alli yuyashpa ropata churaringapajca Bibliaca alhaja consejocunata cushpami ayudan. Cai consejocunaca maipi cashpapish, maipi causashpapish, inticujpipish, chiricujpipish alli yuyashpa ropata churarichunmi ayudan. Imata churana cashcata, imata mana churana cashcata yachangapajca mana shuj jatun listapi quillcashpa cuchun minishtinchijchu. Ima ropata churarisha nishpapish Bibliapi Dios mandashcata cazushpaca churarinallami canchij. Imata churanata agllacushpaca “Diospaj munai ima cashcata, ima mana paipaj munai cashcata” yachangapajca Bibliapi huaquin consejocunata ricushun (Romanos 12:1, 2).

5, 6. ¿Limpio, mana maipishcachun ropata churarijpica gentecunaca imatataj rurasha ningacuna?

⁵ (2 Corintios 6:4-ta leyipai). Cai versopi tiyaj consejotaca Jehová Diosmi quillcachirca. Ima ropata churarishcata ricushpami gentecunaca ñucanchij ima shina cashcata yachancuna (1 Samuel 16:7). Jehová Diosta servijcunaca mana ñucanchij munashcallamantachu imatapish churarinalla canchij. Bibliapaj consejocunata catishpami alli yuyashpa ropata churarina canchij. Alirayacuj, cuerpoman pegaricuj, ropataca mana churarinachu canchij. Ñucanchij charishcacunata munachij ropatapish mana churarinachu canchij. Shujtajcuna ñucanchijta ricushpaca mana pingai tucushpa shujtaj ladoman ricunachu can.

⁶ Limpio, mana maipishcachun ropata churarijpica, gentecunaca Jehová Diospaj organizacionta, ñucanchijtapish respetangacunachari. Gentecunapish Jehová Diosmanta yachasha ningacunachari. Huillanaman rijpipish uyasha ningacunachari.

7, 8. ¿Maiman ricushpataj alli yuyashpa churarina canchij?

⁷ Jehová Diosta, huauquicunata panicunata, shujtaj gentecunatapish respetashcamantami alli yuyashpa ropata churarina canchij. Chashnami Jehová Diosta jatunyachishun (Romanos 13:8-10). Tandanacuicunaman, huillanaman rishpaca ñucanchij churanacunahuanmi Jehová Diosta adorajcuna cashcata ricuchina canchij (1 Timoteo 2:10). Huaquin llajtacunapica shuj laya ropata churanaca allimi ricuringa. Cutin shujtaj ladocunapica chai ropallatajmi mana alli ricuringa. Chaimantami maipi causashpapish shujtajcuna alli sintirichun alli yuyashpa churarina canchij.

⁸ (1 Corintios 10:31-ta leyipai). Jatun tandanacuicunaman ringapajca pinganayaj ropataca mana churarinachu canchij. Diosta mana servij gentecuna shinaca mana churarinachu canchij. Jatun tandanacuiman manaraj  rishpa, jatun tandanacui qꞌuipapish maipish cachun ropataca mana churarinachu canchij. Shinallataj jatun tandanacuiman ringapaj hotelman chayashpa o chaimanta rishpaca ima ropata churarishpapish alli yuyashpami churarina canchij. Chashnami maipi cashpapish testigo de Jehovacuna cashcata ricuchishun. Jehovamantapish mana pingarishpa huillashun.

9, 10. ¿Filipenses 2:4-pi nishca shimicunaca imatataj yachachin?

⁹ (Filipenses 2:4-ta leyipai). Huauquicuna panicuna ñucanchij ropata ricushpa ima shina sintirishcatami yuyana canchij. Testigo de Jehovacunaca Bibliapi yachachishcatami cazusha ninchij. Bibliapica: “Chashna cana cashcamanta, cancunapi tiyaj mana alli munaicunataca tucuita saquichij. Ama huainayanguichij, ama ima millaita ruranguichij. Millai yuyaicuna mapa munaicuna shamujpipish, ama chaita ruranguichij” nishpami yachachin (Colosenses 3:2, 5, QIC, 1989). Huaquincunaca manaraj testigo de Jehovacuna cashpami huainayanapi, mapa ruraicunapi urmashcacuna. Paicunaca cunancamachari chai mapa munaicunataca mishashpa caticunga. Ñucanchijca paicuna mana alli sintirichunca mana munanchijchu. Chaimantami alli yuyashpa, alli agllashpa churarina canchij. Mana chashna rurajpica paicunapajca Diospaj consejocunata cazunapish, mapa munaicunata saquinapish  ashtahuan sinchimi tucunga (1 Corintios 6:9-11).

¹⁰ Diosta mana servij gentecunaca huainayashpa, mapata rurashpami causancuna. Pero ñucanchij huauquicunahuan panicunahuan cashpaca chai millai gentecunamantami cuidarinchij. Alli yuyashpa ropata churarishpaca congregacionpi o maipi cashpapish huauquicuna panicuna mapa munaicunata ama charichunmi ayudashun. Ima ropata churarinataca cada unomi agllai tucunchij. Chashna cajpipish shujtajcuna alli yuyachun, alli parlachun, Dios munashca shina imatapish rurachunca cada unomi ayudana canchij (1 Pedro 1:15, 16). Bibliapica: “Cꞌuyaita charijca maipish cachun mana imata ruranchu, mana paipajlla mashcanchu” ninmi (1 Corintios 13:4, 5).

11, 12. ¿Eclesiastés 3:1, 17-pica imatataj yachachin?

¹¹ Bibliapica ‘imata rurangapajpish shuj punllami tiyan’ ninmi (Eclesiastés 3:1, 17). Ima ropata churarigrishpapish puntapica allimi yuyana canchij. Inticujpi, chiricujpi o maipi causashpapish chꞌican chꞌican ropatami churari tucunchij. Shina cajpipish Jehová Diospaj mandashcacunaca manataj shujtajyanchu (Malaquías 3:6).

¹² Cunujlla llajtacunapica alli agllashpa ropata churarinaca asha sinchimi can. Chaimanta ñucanchij cuerpoman pegaricuj ropata mana churarijpica huauquicuna panicunaca allimi sintiringacuna (Job 31:1). Diosta mana servijcunaca tucui alirayaj ropacunahuanmi playaman o piscinaman rincuna. Pero ñucanchijca Diosta servijcuna shinami churarina canchij (Proverbios 11:2, 20). Ñucanchijca Jehová Diosta jatunyachingapajmi alli yuyashpa churarina canchij.

13. ¿Ropata agllacushpaca imamantataj 1 Corintios 10:32, 33- ta yuyarina canchij?

¹³ Bibliapica shujtajcunata mana ñitcachinachu canchij ninmi. Chaimantami ropata alli yuyashpa agllana canchij (1 Corintios 10:32, 33-ta leyipai). Huauquicunata panicunata, Diosta mana servijcunatapish ama ñitcachingapajca tucuicunami alli yuyashpa churarina canchij. Apóstol Pabloca: “Cada quiquinmi ñucanchijca, shujtajpaj imapish alli canapaj, paita sinchiyachinapaj ayudana canchij. Cristopish paipaj allipajllaca mana rurarcachu” nircami (Romanos 15:2, 3). Jesusca paipaj munaita huashaman saquishpami shujtajcunata ayudarca. Jehová Diospaj munaitapish puntapi churarca. Ñucanchijpish Jesuspaj ejemplotami catina canchij. Chaimantami ima ropata munashpapish shujtajcunapi yuyashpa churarina canchij. Chashnami shujtajcunapish Diosta rijsisha ningacuna.

14. ¿Huahuacunapish Diosta jatunyachichunca yaya mamacunaca imatataj rurana can?

¹⁴ Yaya mamacunaca paicunapaj huahuacunamanmi Jehová Diosmanta yachachina can. Paicunapish paicunapaj huahuacunapish mana maipish cachunchu ropata churarina can. Chashnami Jehová Diosta cushichingacuna (Proverbios 22:6; 27:11). Huahuacuna Diosta respetachunca yaya mamacunaca paicunapaj ejemplohuanmi yachachina can. Shinallataj ima laya ropata, maipi randinatapishmi cꞌuyaihuan yachachina can. Huahuacuna mana paicunallapi yuyashpa ropata agllachunmi yachachina can. Chashnami paicunapish Diosta jatunyachingacuna.

15. ¿Alli yuyashpa agllangapajca imatataj rurana canchij?

¹⁵ ¿Alli yuyashpa agllangapajca imatataj rurana canchij? Bibliapaj consejocunatami  cazuna canchij. Ñucanchij ropaca ñucanchij imata munashcatami ricuchin. Ñucanchij munashca ropataca mana tucuicuna churarisha ningachu. Pero siempremi limpio, mana maipish cachun, alli cana can. Maipi causashcapish, maiman rishpapish alli yuyashpami churarina canchij.

16. ¿Imamantataj alli yuyashpa churarina canchij?

¹⁶ Cunan punllacunapica casi tucui ropacunami pinganai ropacuna can. Chaimantami alli yuyashpa ropata agllanaca sinchi can. Achca ladocunapica cunanlla llujshishca mushuj churanacunallatami cꞌatuncuna. Chaimantami faldacunata, blusacunata, vestidocunata mana pegaricuj pantaloncunatapish alli yuyashpa agllangapajca tiempota minishtinchij. ¿Imamantataj alli yuyashpa churarina canchij? Ropata alli agllashpa alhajata churarijpica huauquicunapish panicunapish allimi sintiringacuna. Jehová Diostapish jatunyachishunmi. Ñucanchij munaicunata huashaman saquishpaca Jehová Diosta jatunyachishpami cushilla sintirishun.

17. ¿Shuj huauqui barbasta huiñachisha nishpaca imapitaj alli yuyana can?

¹⁷ ¿Huauquicunaca barbasta huiñachinachu can? Moisesman cushca leypica Jehová Diosca barbasta ama utuchichun o ama pꞌitichun nircami. Pero cunan punllacunapica mana chai leyta catinchijchu (Levítico 19:27; 21:5; Gálatas 3:24, 25). Huaquin llajtacunapica barbasta huiñachijcunataca allimi ricuncuna. Chaipica huauquicuna huillanaman rijpica gentecunaca Diospaj Shimita allichari uyancuna. Chai llajtacunapica huaquin ancianocuna, siervo ministerialcunaca barbastami huiñachincuna. Shina cajpipish huaquin huauquicunaca manachari barbasta huiñachisha nincuna (1 Corintios 8:9, 13; 10:32). Cutin shujtaj llajtacunapica cꞌaricunaca barbasta mana huiñachincunachu. Chaimantami testigo de Jehovacunapish barbasta mana huiñachincuna. Chai llajtacunapi shuj huauqui barbasta huiñachijpica manachari Diosta jatunyachicun. Paipish ‘mana juchachipaj cashcataca’ manachari ricuchicun (1 Timoteo 3:2, 7; Romanos 15:1-3).

18, 19. ¿Miqueas 6:8-ca imatataj yachachin?

¹⁸ Jehová Diosca mana jatun listata cushpachu ima ropata churarina cashcata o mana churarina cashcataca ricuchin. Ashtahuanpish Bibliapaj consejocunata cazushpa imata churana cashcata, imata mana churana cashcataca ñucanchijllataj agllachunmi Diosca saquin. Chaimantami paita pagui ninchij. Ñucanchij churashca ropahuanpish Miqueas 6:8-pi nishca shinami Diosta servisha nishcata ricuchina canchij.

¹⁹ Jehová Diosca limpio, jucha illaj cashcatami yuyarina canchij. Chaimantami paipaj mandashcacunaca ñucanchijpaj alli can. Alli yuyashpa imatapish rurajcuna cangapaj, humildecuna cangapajca Diospaj mandashcacunatami cazushpa causana canchij. Alli yuyashpa imatapish rurajcuna cashpaca shujtajcuna ima shina sintirishcata, imata yuyashcatapish respetashunmi.

20. ¿Alli yuyashpa ropata churarijpica shujtajcunaca imatataj rurasha ningacuna?

²⁰ Ñucanchij churarishca ropaca Diosta servijcuna cashcatami ricuchina can. Diospaj mandashcacuna valishca cashcamantami cushicushpa cazuna canchij. Huauquicuna panicuna alli yuyashpa churarishcamanta, Dios munashca shina causacushcamantapish felicitanchijmi. Chashnami cancunaca Diosmanta shujtajcuna yachachun, paita jatunyachichunpish ayudacunguichij. Alli agllashpa ropata churarishpaca Jehová Diostami jatunyachinchij. Paica “Achij nicujta mandaj cashcahuan churarishca” Diosmi can (Salmo 104:1, 2).