1, 2. Momo lie Olombangi Via Yehova vi kuetele olonumbi viwa via tiamẽla koku wala? (Tala elitalatu kefetikilo liocipama cilo.)

UKANDA umue wa sapulo kofeka yo Holanda, wa lombolola ndomo asongui vatavo va wala kohongele yimue va linga. Owo wa lombolola hati: “Ove o mola okuti va wala uwalo ka wa sungulukile, capiãla enene eci kua kala oku linga owuya.” Pole, ukanda waco wasapulo wa lombololavo okuti, ocituwa caco ca litepa lonjila ndomo Olombangi Via Yehova via wala kohongele yavo yofeka. Owo wa lombolola okuti amãlehe alume kuenda akulu va wala ovikutu lolongalavata, kuenda omãla vakãi kumue lakãi akulu va wala ovowalo a lepa awo wa sunguluka. Olombangi Via Yehova olonjanja vialua via siata oku pandiyiwa omo lioku wala kuavo. Upostolo Paulu wa popia okuti Akristão va sukila oku liposuisa “lesunguluko kuenda olondunge,” ndomo ca sesamẽla kafendeli va Suku. (1 Timoteo 2:9, 10) Ndaño okuti Paulu wa tiamisila olondaka viaco kakãi, pole, onumbi yaco yi tiamisiwilavo kalume Akristão.

 ² Oku wala lonjila yimue ya sunguluka ci kuete esilivilo kokuetu, kuenda ci kuetevo esilivilo ku Suku tu fendela. (Efetikilo 3:21) Embimbiliya li popia okuti Yehova Ululiki woluali, wa eca olonumbi vi lekisa ndomo afendeli vaye va sukila oku wala. Ndaño okuti tu yongola oku li sanjuisa poku wala kuetu, pole, eci ca velapo oku eca esivayo ku Ñala Yetu Yehova.

3. Nye tu pondola oku lilongisa kocihandeleko Suku a ecele ku va Isareli catiamẽla koku wala?

³ Ocihandeleko Yehova a ecele ku Mose, ca teyuila va Isareli kovituwa ka via sungulukile viomanu vokolofeka vikuavo va lisunguile lavo. Ocihandeleko caco, ca lekisa okuti Yehova o sumua omo liovowalo ana okuti ka a ecelela oku tepisa alume lakãi. Koloneke vilo, omanu va siata oku wala ovowalo ana a tukuiwa hati: Ovowalo a waliwa lalume kuenda akãi. (Tanga Esinumuĩlo 22:5.) Pole, ocihandeleko Yehova a ecele ku Mose ci tu longisa okuti Yehova ka sanjuka eci alume va wala uwalo una u kala ndu okuti akãi ale uwalo una okuti akãi va kala ndu okuti alume, momo nda va ci linga ka ku kala etepiso pokati kulume lukãi.

4. Nye ci pondola oku kuatisa Akristão vocili oku nõla ciwa uwalo wavo?

⁴ Olonumbi vi sangiwa Vembimbiliya vi pondola oku tu kuatisa oku nõla onjila ya sunguluka yatiamẽla kuwalo. Kolonepa viosi tu sangiwa tu sukila oku kapako olonumbi viaco. Ka tu sukila oku kuata ulala walua watiamẽla kuwalo wa sunguluka la una ka wa sungulukile. Tu sukila lika oku kuama olonumbi Viembimbiliya oco vi tu kuatise oku nõla uwalo una tu sole. Tu konomuisi olonumbi vimue Viembimbiliya vi pondola oku tu kuatisa oku “limbuka ndeci ci kasi ocipango ca Suku okuti ciwa, ca sunguluka kuenda ca pua eko” poku nõla uwalo wetu.​—Va Roma 12:1, 2.

5, 6. Oku wala kuetu ku pondola oku vetiya ndati omanu vakuavo?

⁵ Upostolu Paulu wa vetiyiwa oku soneha olonumbi vi kuete esilivilo lia velapo vi sangiwa vu kanda 2 Va Korindo 6:4 (Tanga.) Ekalo lietu li pondola oku eca uvangi komanu, kuenje omanu vaco va pondola oku popia ovina via litepa viatiamẽla kekalo liaco. (1 Samuele 16:7) Omo okuti tuafendeli va Suku, tu sukila oku likolisilako calua okuti oku wala uwalo una wa kemãla ale una tu sole ci sule. Nda tua kapako olonumbi vi sangiwa Vembimbiliya, ci ka tu kuatisa oku yuvula oku wala uwalo una wa tõla okuti u lekisa ovimatamata vietimba lietu. Tu sukila oku wala uwalo una okuti eci omanu va tu vanja ka u va kokela ocilondokua.

 ⁶ Nda uwalo wetu wa sunguluka hawo wa yelisiwa ciwa, tu sumbiwa calua lomanu kuenda tu eca esivayo ku Ñala Yetu Yehova. Handi vali, va ka kuatavo onjongole yoku kũlĩha Suku tu fendela kuenda va ka sumbilavo ocisoko cetu, loku lekisa onjongole yoku yevelela esapulo li popela omuenyo.

7, 8. Kapuluvi api tu sukila oku wala uwalo wa sunguluka?

⁷ Omo okuti Yehova o kola, eci tu nõla ciwa uwalo wetu tu eca esivayo kokuaye, tu lekisa okuti tua kapako vamanji, omanu tu sanga vocikanjo cetu kuenda esapulo tua siata oku kunda. (Va Roma 13:8-10) Uwalo wetu u kuete esilivilo lia velapo eci tu enda kolohogele vietu ale kupange woku kunda. Tu sukila oku wala lonjila yimue yi lekisa okuti tuafendeli va Suku. (1 Timoteo 2:10) Uwalo luwalo u kuete ocitumãlo tu sesamẽla oku u wala. Omo okuti tu Lombangi Via Yehova, kovitumãlo viosi tu sangiwa, tu sukila oku yuvula oku kapela ocilondokua omanu poku wala kuetu.

⁸ Tanga 1 Va Korindo 10:3. Eci tu enda kolohongele yimbo kuenda kolohongele  viofeka, tu sukila oku wala uwalo una wa sunguluka. Tu sukilavo oku yuvula uwalo una wa siata voluali. Tu ci lingavo eci ohongele yofeka yi fetika kuenda kesulilo lihongelo yaco. Handi vali, tu sukila oku wala ciwa eci tu sikĩla vohotele kuenda oku yuvula oku wala uwalo una wa tõla vetimba. Nda tua ci linga, tu kuata esumũlũho lioku kũlĩhĩwa okuti tu Lombangi Via Yehova, kuenje ci ka tu kuatisa oku kundila omanu kapuluvi osi.

9, 10. Momo lie ukanda wa Va Filipoi 2:4 u tu kuatisila koku wala kuetu?

⁹ Tanga Va Filipoi 2:4. Momo lie tu sukilila oku sokolola vamanji eci tu nõla uwalo wetu? Momo afendeli va Suku va likolisilako oku kapako onumbi yokuti: “Ipayi ovimatamata vietimba liene okuti vio kilu lieve, ndeci evĩho liukahonga, eliño, oloñeyi viukahonga.” (Va Kolosai 3:2, 5) Vamue pokati ka vamanjetu okuti kosimbu va ambatele omuenyo woku linga evĩho liukahonga, va kasi oku amamako loku liyaka loloñeyi viaco ka via sungulukile. Nda ka tua lekisile utate poku nõla uwalo wetu, ci pondola oku va tateka oku kapako olonumbi vi sangiwa Vembimbiliya, oco va yuvule oloñeyi viaco ka via sungulukile. (1 Va Korindo 6:9, 10) Anga hẽ tu yongola oku tateka alikolisilo avo?

¹⁰ Oku kala la vamanjetu ci tu teyuila komanu vana va siata oku linga evĩho liukahonga. Oku wala kuetu ku sitululavo ekalo lietu liwa eci tu kasi kolohongele ale kolomapalo. Ndaño okuti tu kuete elianjo lioku nõla eci tu yongola oku wala, tu kuetevo ocikele coku wala lonjila yimue okuti ka ci lingi ocilondokua komanu vakuavo oco va kuate ovisimĩlo via sunguluka kuenda ekalo liwa kovaso a Suku. (1 Petulu 1:15, 16) Momo ocisola cocili “ka ci lingi akutisasõi, ka ci sandi ovina vialio muẽle.”​—1 Va Korindo 13:4, 5.

11, 12. Elivulu Liukundi 3:1, 17 li tu kuatisa ndati oku lekisa esunguluko?

¹¹ Eci afendeli va Suku va nõla uwalo wavo, va kũlĩha okuti “ovina viosi vi kuete uvo wavio, kuenda upange.” (Ukundi 3:1, 17) Onjila tu kuama poku wala, yi pondola oku likuata lekalo liocitumãlo tu sangiwa nda okuti kocitumãlo caco kuli owuya, ombambi, ale ekalo liomuenyo lia litepa. Pole, olonumbi via Yehova ka vi pongoloka.​—Malakiya 3:6.

¹² Olonjanja vimue ka ca lelukile oku wala uwalo wa sunguluka capiãla enene kovitumãlo vina ku linga owuya walua. Vamanji va kuata esanju lialua eci va mola okuti uwalo wetu ka wa tõlele ketimba. (Yovi 31:1) Handi vali, eci tu enda kohulo yokalunga ale kociva cimue covava, tu sukila oku nõla uwalo wa sunguluka. (Olosapo 11:2, 20) Ndaño okuti omanu valua voluali eci va kasi kovitumãlo viaco va wala uwalo ka wa sungulukile, pole tu sukila oku wala lonjila yimue yeca esivayo ku Suku yetu o kola okuti, Yehova.

13. Momo lie onumbi yi sangiwa vukanda wa 1 Va Korindo 10:32, 33 yi tu kuatisa koku nõla uwalo wetu?

 ¹³ Kuli onumbi yikuavo Yembimbiliya yi pondola oku tu kuatisa oku nõla ciwa uwalo wetu. Tu sukila oku kuata olondunge oco ka tu ka kokele ocilondokua komanu vakuavo. (Tanga 1 Va Korindo 10:32, 33.) Tu kuete ocikele coku yuvula uwalo una u pondola oku kokela ocilondokua ku vamanji kuenda komanu vana ka va fendela Yehova. Upostolo Paulu wa soneha ndoco: “Omunu lomunu pokati ketu, a sanjuise ukuavo kueci ciwa coku u kolisa.” Paulu wa lombolola esunga liaco poku popia hati: “Momo ndaño Kristu ka sandele oku tẽlisa onjongole yaye muẽle.” (Va Roma 15:2, 3) Tu sukila oku kuama ongangu ya Yesu yoku velisapo ocipango ca Suku kuenda oku kuatisa omanu vakuavo okuti oku linga lika ovina vietu muẽle ci sule. Omo liaco, tu sukila oku yuvula uwalo una tu sole okuti u pondola oku tateka omanu oku yevelela esapulo tu va kundila.

14. Olonjali vi pondola oku kuatisa ndati omãla vavo oco va wale uwalo u sivaya Suku?

¹⁴ Olonjali Akristão vi kuete ocikele coku longisa omãla vavo oco va kuame olonumbi Viembimbiliya. Velongiso liaco, mua kongela oku kũlĩhĩsa nda onjila va kuama poku wala ya sunguluka kuenda yi sanjuisa Suku. (Olosapo 22:6; 27:11) Olonjali vi pondola oku pindisa ndati omãla vavo oco va sumbile Suku lolonumbi viaye? Ovo va sukila oku ci linga poku lekisa ongangu yiwa komãla vavo. Olonjali vi sukilavo oku longisa locisola omãla vavo ndomo va pondola oku sanga kuenda oku nõla uwalo wa sunguluka. Omãla ka va sukila lika oku nõla uwalo una va sole pole, eci ca velapo oku nõla uwalo una weca esivayo kuYehova Suku.

15. Nye ci pondola oku tu kuatisa oku nõla ciwa uwalo wetu?

¹⁵ Vembimbiliya mu sangiwa olonumbi vi tu kuatisa oku nõla lolondunge ovina tu yongola, oco tu sivaye Suku. Uwalo wetu u pondola oku situlula ovituwa vietu. Uwalo una tu sole, kuenda epondolo lioku landa uwalo waco citava okuti wa litepa lomanu vakuavo. Pole, tu sukila oku wala uwalo wa sungunguluka una wa yelisiwa ciwa kuenda u taviwa locitumãlo tu sangiwa.

16. Momo lie tu sukilila oku likolisilako oco tu wale ciwa?

¹⁶ Ocili okuti, ka ca lelukile oku sanga uwalo wa sunguluka hawo wa posoka. Momo volovenda vimue va landisa lika ovowalo ana a kemãla. Olonjanja vimue oco tu sange o saya, esanya, kuenda ombulusa, ale oku nõla o fatu locikasãu ya sunguluka, ci sukila otembo kuenda alikolisilo. Pole, vamanjetu va ka limbuka loku sanjukila alikolisilo tu kasi oku linga poku wala uwalo una wa sunguluka kuenda wa posoka. Omo okuti tu yongola oku eca esivayo ku isietu ukuacisola wokilu, tu sukila oku likolisilako oku sanda uwalo wa sunguluka okuti weca esivayo kokuaye.

17. Ovina vipi vi lekisa okuti, manji umue o pondola oku kuata olonjele ale sio?

¹⁷ Anga hẽ ca sunguluka okuti vamanji alume va kulisa olonjele? Ocihandeleko ca eciwile ku Mose ca ecelele okuti alume va kulisa olonjele. Pole, Akristão vocili ka  va sukila oku pokola kocihandeleko caco. (Ovisila 19:27; 21:5; Va Galatia 3:24, 25) Kapata amue citava okuti, alume va kulisa olonjele, momo ci lekisa esumbilo kokuavo kuenda citava okuti ocituwa caco ka ci tateka omanu oku yeva esapulo tu va kundila. Kuenje, eci cecelela okuti vamanji vamue va kuete ovikele vekongelo va kulisa olonjele. Handi vali, vamanji vakuavo va nõlapo oku teta olonjele. (1 Va Korindo 8:9, 13; 10:32) Omo okuti kapata amue ale kovitumãlo vikuavo ka citava oku kulisa olonjele, alume Akristão va yuvulavo oku ci linga. Momo, oku kulisa olonjele ci pondola oku tateka manji umue oku eca esivayo ku Suku kuenda oku ‘pua eko.’​—1 Timoteo 3:2, 7; Va Roma 15:1-3.

18, 19. Elivulu lia Mika 6:8 li pondola oku tu kuatisa ndati?

¹⁸ Tu eca olopandu ku Yehova omo okuti ka ecele kokuetu ulala wovina tu sukila oku wala poku li posuisa levi ka tu sukila. Pole, eye wa tu ĩha Olonumbi vi tu kuatisa oku talavaya ciwa lelianjo lietu lioku nõla ovina tu yongola oku wala. Omo liaco, eci tu nõla ndomo tu pondola oku wala kuenda oku liposuisa tu sukila oku lekisa olondunge omo lioku kala afendeli va Suku.​—Mika 6:8.

¹⁹ Etu tu tava okuti Yehova wa yela haeye o kola, kuenda olonumbi viaye vi kuete esilivilo lialua kokuetu. Oco tu lekisa esunguluko kuenda umbombe tu sukila oku kapako olonumbi via Yehova komuenyo wetu. Esunguluko li tu kuatisa oku sumbila kuenda oku kapako ovisimĩlo viomanu vakuavo.

20. Uwalo wetu u pondola oku vetiya ndati omanu vakuavo?

²⁰ Uwalo wetu u sukila oku lekisa okuti tuafendeli va Yehova. Yehova o kuete olonumbi via velapo, kuenda tu kuete esanju lioku kapako olonumbi viaco komuenyo wetu. Vamanjetu va siata oku pandiyiwa omo lioku wala kuenda oku lekisa ovilinga viwa. Poku ci linga, va siata oku vetiya omanu oku tava kesapulo Liembimbiliya lina li popela omuenyo, kuenda va eca esivayo lesanju ku Yehova. Eci tu nõla ciwa uwalo wetu tu ka amamako oku eca esivayo ku Una “Wa lisikilila ocinyi nduwalo.”​—Osamo 104:1, 2.